ყველა ჩვენგანს რაღაცის გაღება შეუძლია იეჰოვასთვის
1 იცოდი, რომ ადამიანებს შეუძლიათ რაღაც გაიღონ ღვთისთვის? აბელმა თავისი ფარის საუკეთესო პირუტყვი შესწირა იეჰოვას. ნოემ და იობმაც მსგავსი შესაწირავები გაიღეს ღვთისთვის (დაბ. 4:4; 8:20; იობ. 1:5). ცხადია, ასეთ შესაწირავებს არანაირად არ გაუმდიდრებია შემოქმედი, რადგან ყველაფერი ისედაც მას ეკუთვნის. მაგრამ ეს მსხვერპლი უჩვენებდა იმას, თუ რა დიდი სიყვარული ჰქონდათ ამ ერთგულ მამაკაცებს ღვთის მიმართ. დღეს ჩვენ შეგვიძლია გავიღოთ ჩვენი დრო, ენერგია და სახსრები იმისთვის, რომ იეჰოვას „ქების მსხვერპლი“ შევწიროთ (ებრ. 13:15).
2 დრო: რაოდენ საქებარია, როდესაც ადამიანი ნაკლებად მნიშვნელოვანი საქმეებიდან ‘დროს გამოისყიდის’ იმისათვის, რომ უფრო სრულად მიიღოს მონაწილეობა მსახურებაში! (ეფეს. 5:15, 16). შეგვიძლია, საკუთარი გეგმები ისე შევცვალოთ, რომ წლის განმავლობაში ერთი ან რამდენიმე თვე დამხმარე პიონერად ვიმსახუროთ? ან ხომ არ შევძლებდით გაგვეზარდა ის დრო, რასაც, ჩვეულებრივ, მსახურებას ვუთმობთ? თუ ყოველკვირა ნახევარი საათით მეტხანს ვიმსახურებთ, თვის ბოლოს, სულ მცირე, ორი საათით მეტი გვექნება გატარებული მსახურებაში!
3 ენერგია: მსახურებისთვის რომ ენერგია გვქონდეს, უნდა მოვერიდოთ ისეთი სახის სამუშაოსა თუ გართობას, რომელიც ისე დაგვღლიდა, რომ ვეღარ შევძლებდით იეჰოვასთვის საუკეთესოს გაღებას. გარდა ამისა, ზედმეტად არ უნდა ვწუხდეთ ისეთ რამეზე, რაც ‘გულს დაგვიმძიმებდა’ და ღვთის მსახურებისთვის საჭირო ენერგიას წაგვართმევდა (იგავ. 12:25). იმ შემთხვევაშიც კი, თუ ნერვიულობის საფუძვლიანი მიზეზი გვაქვს, ბევრად უკეთესი იქნება, თუ ‘იეჰოვას მივანდობთ ჩვენს ტვირთს’! (ფსალმ. 55:22; ფილ. 4:6, 7).
4 სახსრები: გარდა ამისა, ჩვენ შეგვიძლია მატერიალური სახსრებიც გავიღოთ სამქადაგებლო საქმიანობის მხარდასაჭერად. პავლე მოუწოდებდა თანაქრისტიანებს, რომ რეგულარულად ‘გადაედოთ და გადაენახათ, ვის რისი საშუალებაც ჰქონდა’, რათა ჰქონოდათ გაჭირვებულთათვის მისაცემად (1 კორ. 16:1, 2). მსგავსადვე, ჩვენ შეგვიძლია გადავდოთ გარკვეული თანხა ჩვენი კრების საჭიროებებისა და მსოფლიო საქმიანობისთვის. იეჰოვა აფასებს იმას, რასაც გულით გავცემთ, თუნდაც ჩვენი შესაწირავი ძალიან მცირე ოდენობის იყოს (ლუკ. 21:1—4).
5 იეჰოვა ჩვენ ძალიან ბევრ რამეს გვაძლევს (იაკ. 1:17). ჩვენ მის მიმართ მადლიერებას გამოვხატავთ, როდესაც მსახურებას გულუხვად ვწირავთ ჩვენს დროს, ენერგიასა და სახსრებს. ეს კი ძალიან სიამოვნებს იეჰოვას, რადგან „ღმერთს სიხარულით გამცემი უყვარს“ (2 კორ. 9:7).