რატომ აქამდე არ გაანადგურა ღმერთმა ეშმაკი?

ვინმესთვის ტანჯვის შემსუბუქება რომ შეგეძლოთ, არ შეუმსუბუქებდით? მოხალისეები ცდილობენ, რომ დაუყოვნებლივ აღმოუჩინონ დახმარება და სიკვდილს გადაარჩინონ სტიქიური უბედურების დროს დაზარალებული სრულიად უცხო ადამიანები. ამიტომ ზოგს შეიძლება დაებადოს კითხვა: რატომ მაშინვე არ გაანადგურა ღმერთმა ეშმაკი, რომელიც ადამიანებს ენით აუწერელ ტანჯვას აყენებს?

ამ კითხვას რომ ვუპასუხოთ, წარმოვიდგინოთ სასამართლო პროცესი. მკვლელი, რომელიც ყველანაირად ცდილობს პროცესის შეჩერებას, ირწმუნება, რომ მოსამართლე პატიოსნად არ უძღვება სასამართლოს და ნაფიცი მსაჯულებიც მოსყიდული ჰყავს. ჩვენების მისაცემად მრავალი მოწმეა მოწვეული.

მოსამართლემ იცის, რომ გაწელილი სასამართლო პროცესი ბევრ დისკომფორტს შექმნის. მას სურს, რომ პროცესი დროულად დასრულდეს. მაგრამ იმასაც ხვდება, რომ საბოლოო განაჩენის გამოტანამდე, რომელიც პრეცედენტი გახდება ყველა სხვა მსგავსი პროცესისთვის მომავალში, ორივე მხარეს საკმარისი დრო უნდა მიეცეს საკუთარი სიმართლის დასამტკიცებლად.

როგორ უკავშირდება ეს მაგალითი იმ ბრალდებას, რომელიც ეშმაკმა, ეგრეთ წოდებულმა დრაკონმა, გველმა და სატანამ, წაუყენა იეჰოვას, „უზენაესს მთელ დედამიწაზე“? (გამოცხადება 12:9; ფსალმუნი 83:18). სინამდვილეში ვინ არის ეშმაკი? რაში დასდო მან იეჰოვა ღმერთს ბრალი? როდის მოუღებს ღმერთი მას ბოლოს?

რატომ გაჩნდა პრეცედენტის შექმნის აუცილებლობა?

ის, ვისაც ეშმაკი ეწოდა, თავდაპირველად სრულყოფილი სულიერი ქმნილება, ღვთის ერთ-ერთი ანგელოზი იყო (იობი 1:6, 7). ეშმაკი ის მას შემდეგ გახდა, რაც პატივმოყვარეობამ შეიპყრო და ადამიანებისგან თაყვანისცემა მოინდომა. ამიტომ მან ეჭვქვეშ დააყენა ღვთის მმართველობის უფლება, რაშიც იმასაც გულისხმობდა, რომ ღმერთი არ იმსახურებს მორჩილებას. მან ასეთი აზრიც წამოჭრა, რომ ადამიანები ღმერთს ემსახურებიან მხოლოდ მაშინ, როცა ის მათ კურთხევებით „ქრთამავს“. სატანა ირწმუნებოდა, რომ გასაჭირში ნებისმიერი ადამიანი დაგმობდა თავის შემოქმედს (იობი 1:8—11; 2:4, 5).

სატანის მიერ წამოყენებულ ბრალდებებს იეჰოვა მხოლოდ ძალის დემონსტრირებით ვერ გააბათილებდა. ღმერთს რომ ეშმაკი ედემის ბაღშივე გაენადგურებინა, ზოგს ისეთი შთაბეჭდილება დარჩებოდა, რომ ეშმაკი მართალი იყო. ამიტომ ღმერთმა, რომელიც აბსოლუტურ ძალაუფლებას ფლობს, წამოიწყო სასამართლო პროცესი, რათა ყველას დაენახა, როგორ გადაწყდებოდა ეს საკამათო საკითხები.

თავისი პრინციპებისა და სრულყოფილი სამართლიანობიდან გამომდინარე, იეჰოვა ღმერთმა წინასწარ განაცხადა, რომ თითოეული მხარე წარმოადგენდა თავის მოწმეებს, რომლებიც მათ სასარგებლოდ მისცემდნენ ჩვენებას. ამ პროცესისთვის გამოყოფილი დრო ადამის შთამომავლებს იმის შესაძლებლობას აძლევდა, რომ თავიანთი ცხოვრებით ღვთის სასარგებლოდ დაემოწმებინათ, ანუ ღვთის სიყვარულის გამო მისი ერთგულები დარჩენილიყვნენ ნებისმიერი სირთულის მიუხედავად.

კიდევ რამდენ ხანს?

იეჰოვა ღმერთს კარგად ესმის, რომ ვიდრე სასამართლო პროცესი გრძელდება, ადამიანების ტანჯვა არ დასრულდება. მას სურს, რაც შეიძლება მალე დასრულდეს ეს პროცესი. ბიბლია ღმერთს „თანაგრძნობისა და ყოველგვარი ნუგეშის მამას“ უწოდებს (2 კორინთელები 1:3). „ყოველგვარი ნუგეშის მამა“ ეშმაკს იმაზე დიდხანს არსებობის უფლებას არ მისცემს, ვიდრე საქმეს სჭირდება. არც იმას დაუშვებს, რომ სატანის გაფუჭებული საქმე გამოუსწორებელი დარჩეს. მაგრამ ღმერთი დროზე ადრე არ მოსპობს ეშმაკს და უზენაესი სასამართლო პროცესის დასრულებას დაელოდება.

როცა ყველა საკამათო საკითხი გადაიჭრება, ღვთის მმართველობის უფლება ერთხელ და სამუდამოდ დამტკიცდება. სატანისთვის გამოტანილი განაჩენი სამუდამოდ გახდება ნიმუში ყველა სხვა მსგავსი პროცესისთვის. თუ მსგავსი საკითხი ოდესმე წამოიჭრება, ის ავტომატურად გადაიჭრება სატანისთვის გამოტანილი განაჩენის მიხედვით.

თავის დროზე იეჰოვა ღმერთი თავისი ძის მეშვეობით, რომელიც მკვდრეთით აღადგინა, ბოლოს მოუღებს ეშმაკს და გააუქმებს ყველა მის საქმეს. ბიბლია გვეუბნება, რომ მაშინ ქრისტე „ბოლოს მოუღებს ყველა მმართველობას, ძალაუფლებასა და ძალას, და თავის ღმერთსა და მამას გადასცემს სამეფოს, რადგან მან უნდა იმეფოს, სანამ ღმერთი მის ფეხქვეშ არ მოაქცევს ყველა მტერს. უკანასკნელი მტერი, რომელსაც ბოლო მოეღება, სიკვდილია“ (1 კორინთელები 15:24—26).

ბიბლია გვპირდება, რომ დედამიწაზე სამოთხისებური პირობები იქნება. ადამიანები მშვიდობიანად იცხოვრებენ სამოთხეში, როგორც ეს ღმერთს თავდაპირველად ჰქონდა ჩაფიქრებული. „თვინიერნი დაიმკვიდრებენ დედამიწას და გაიხარებენ დიდი მშვიდობით . . . მართლები დაიმკვიდრებენ დედამიწას და მარადიულად იცხოვრებენ მასზე“, — ნათქვამია ბიბლიაში (ფსალმუნი 37:11, 29).

ნახეთ, რა შესანიშნავად არის აღწერილი ბიბლიაში, თუ რა ელით ღვთის მსახურებს: „აი, ღვთის კარავი ადამიანებთანაა. იგი მათთან დამკვიდრდება, ისინი მისი ხალხი იქნებიან და თვითონ ღმერთი მათთან იქნება. მოსწმენდს მათ ყოველ ცრემლს თვალებიდან და აღარ იქნება სიკვდილი, აღარც გლოვა, გოდება და ტკივილი, რადგან წინანდელი ყველაფერი მოისპო“ (გამოცხადება 21:3, 4).