აზია და ახლო აღმოსავლეთი

ერთი გასაუბრების შედეგად ბევრი დაინტერესდა

ფილიპინებზე ჯონათანი საავადმყოფოს მიმღებში ექიმს ელოდებოდა. მისმა მოწესრიგებულმა ჩაცმულობამ მიმღებში მომუშავე ქალის ყურადღება მიიქცია, რომელმაც ჰკითხა, სადაზღვევო აგენტი ხომ არ იყო. ჯონათანმა აუხსნა, რომ ის იეჰოვას მოწმე იყო და იქ თანამორწმუნის დასახმარებლად მივიდა. ამან დიდი შთაბეჭდილება მოახდინა ამ ქალზე, რომელსაც ლაილე ერქვა. მან უთხრა ჯონათანს, რომ მამამისი, რომელიც ცოტა ხნის წინ დაიღუპა, რეგულარულად კითხულობდა ჟურნალ „საგუშაგო კოშკს“. ჯონათანმა ბიბლიიდან იოანეს 5:28, 29 ამოუკითხა და მისცა ბუკლეტი „რა იმედი არსებობს საყვარელი განსვენებულებისთვის?“.

მომდევნო ჯერზე მან სხვა პუბლიკაციები მიუტანა ლაილეს და ერთი და გააცნო, რომელმაც მასთან ბიბლიის შესწავლა დაიწყო. მალე ლაილეს შესწავლაში და, მეუღლე და დედა შეუერთდა, რომლებიც მასთან ერთად ცხოვრობდნენ.

ერთხელ ლაილეს მეზობელი როუზი დაინტერესდა, რატომ მიდიოდა მასთან ამდენი სტუმარი. ლაილემ უთხრა, რომ იეჰოვას მოწმეებთან ბიბლიას სწავლობდა. ბოლოს როუზმაც დაიწყო ბიბლიის შესწავლა. ერთხელ, როცა ის თავის დას, აბიგაილს, ეწვია, აღფრთოვანებულმა გაუზიარა ნასწავლი. ამან იმხელა შთაბეჭდილება მოახდინა მასზე, რომ ბიბლიის შესწავლა მოითხოვა. როუზს დედამისიც შეუერთდა.

ლაილე ახლახან ჩატარებულ რეგიონულ კონგრესზე მოინათლა. მოგვიანებით დედამისიც მოინათლა. რაც შეეხება როუზსა და მის დას, ისინი გასულ წელს მოინათლნენ. როუზის დედა კი რეგულარულ ესწრება კრების შეხვედრებს. ლაილეს ოჯახის ზოგიერთი წევრი აგრძელებს ბიბლიის შესწავლას. თქვენ წარმოიდგინეთ, ეს ყველაფერი ერთი გასაუბრებით დაიწყო!

თანამედროვე ტექნოლოგიების გამოყენება სმენადაკარგულთა მოსაძებნად

შრი-ლანკაში იზრდება იმ დაინტერესებულების რიცხვი, რომლებიც ჟესტების ენაზე საუბრობენ. 2015 წელს ძმებს 80-მდე სმენადაკარგულის მისამართი ფურცელზე ჰქონდათ ჩამოწერილი. თუმცა მას შემდეგ, რაც პირველი ჟესტებისენოვანი კრება ჩამოყალიბდა, ძმებმა კრებისთვის კომპიუტერი შეიძინეს, რომელშიც დაახლოებით 420 დაინტერესებულის სახელი და მისამართი შეიტანეს. აქედან ძმები დაახლოებით 80 პროცენტს დაუკავშირდნენ, რომელთაგან ზოგი პირადად მოინახულეს, ზოგს ტექსტური შეტყობინება გაუგზავნეს, ზოგსაც ვიდეოთვალის მეშვეობით დაეკონტაქტნენ. ერთმა მისიონერმა წყვილმა მოგვწერა: „ახლა უკვე ჩვენს სმენადაკარგულ მაუწყებლებს აქვთ სამქადაგებლო უბნები, მანამდე კი ისინი მხოლოდ ნაცნობებთან ქადაგებდნენ“.

ხელისუფლების წარმომადგენელი მადლიერებას გამოთქვამს

მონღოლეთში ძმები საზოგადოებრივი თავშეყრის ადგილებში აქტიურად ქადაგებენ სტენდებით მაშინაც კი, როცა ტემპერატურა -30 გრადუსამდე ეცემა. ერთხელ ერთმა ხელისუფლების წარმომადგენელმა სტენდიდან პუბლიკაციები აიღო და მათი წაკითხვის შემდეგ მადლიერება ასეთი სიტყვებით გამოხატა: „მე ბუდისტი ვარ, მაგრამ სხვადასხვა რელიგიას ვეცნობი, რადგან ვფიქრობ, რომ სიმართლეში დასარწმუნებლად მხოლოდ ერთი გზით არ უნდა იარო. სხვა გზებიც უნდა მოსინჯო. მას შემდეგ, რაც თქვენი პუბლიკაციები წავიკითხე, გადავწყვიტე, მადლიერება წერილობით გამომეხატა. ვხედავ, რომ დროსა და ძალ-ღონეს არ იშურებთ, რათა ყველას ყურამდე მიიტანოთ ეს მნიშვნელოვანი ინფორმაცია. თქვენმა ლიტერატურამ დამარწმუნა, რომ ბიბლია არის წიგნი, რომელიც ყველამ უნდა წაიკითხოს, რადგან მასში ჭეშმარიტებაა ჩაწერილი. ის მართლაც პრაქტიკულ რჩევებს შეიცავს. მინდა, მადლობა ვუთხრა ყველას, ვინც თავდაუზოგავად შრომობს, რათა ეს ლიტერატურა მონღოლურ ენაზეც ითარგმნოს. მადლობას ვეუბნები მათაც, ვინც სიცხესა თუ სიცივეში არ წყვეტს ამ პუბლიკაციებს გავრცელებას“.

მის ლოცვას პასუხი გაეცა

ჰონკონგში პიონერი ძმა, სახელად ბრეტი, 30 წლამდე მამაკაცს მიუახლოვდა და შესთავაზა ბუკლეტი „რა არის საჭირო ოჯახის ბედნიერებისთვის?“. ბუკლეტს რომ დახედა, მამაკაცი აცრემლდა. შემდეგ ბრეტს უთხრა, რომ მოწმეების ოჯახში გაიზარდა, მაგრამ 16 წლის ასაკში სახლიდან წავიდა. მომდევნო 5 წლის მანძილზე ქუჩაში ცხოვრობდა და ნარკოტიკებზე გახდა დამოკიდებული, თუმცა ბოლოს მას ერთი საქველმოქმედო ორგანიზაცია დაეხმარა.

მან ბრეტს გაუმხილა, რომ იმ დილით ღმერთს ლოცვაში ასეთი სიტყვებით მიმართა: „თუ ჩემი ბავშვობის რელიგია ჭეშმარიტია, ძალიან გთხოვ, გამაგებინე“. ბრეტთან შეხვედრა მისთვის ლოცვაზე პასუხი იყო. ისინი ახლომდებარე კაფეში დასხდნენ და ბროშურიდან „დაუბრუნდი იეჰოვას“ რამდენიმე საკითხზე იმსჯელეს. ეს ახალგაზრდა მამაკაცი იმ საღამოს საფრანგეთში უნდა ჩასულიყო, ამიტომ მათ საკონტაქტო ინფორმაცია გაცვალეს. მოგვიანებით მან ბრეტს წერილი მისწერა: „ძვირფასო ძმაო, იეჰოვამ უპასუხა ჩემს ლოცვებს. ამ კვირას სამეფო დარბაზში მივდივარ“. იგი დაუკავშირდა საფრანგეთში მოწმეებს, დაიწყო ბიბლიის შესწავლა და დღეს კრების შეხვედრებს ესწრება.