„სიხარულით გამცემი უყვარს ღმერთს“

იეჰოვა ხელგაშლილი ღმერთია. ბიბლია ამბობს, რომ ის ‘ყველა კეთილი საბოძვრისა და ყველა სრულყოფილი ნიჭის’ მომცემია (იაკობი 1:17). მაგალითად, განვიხილოთ რა შექმნა ღმერთმა. მან უგემური საკვები კი არ შექმნა, არამედ გემრიელი; შექმნა მრავალფეროვანი ყვავილები და არა ერთფეროვანი; მზის ჩასვლის შთამბეჭდავი სანახაობა და არა უფერული. დიახ, იეჰოვას შემოქმედება მის სიყვარულსა და ხელგაშლილობაზე მეტყველებს (ფსალმუნი 18:2, 3; 138:14). გარდა ამისა, იეჰოვა სიხარულით გამცემია. მას ახარებს სიკეთის კეთება თავისი მსახურებისთვის (ფსალმუნი 83:12; 149:4).

ისრაელებს ღვთის მსგავსად გულუხვობა უნდა გამოევლინათ ერთიმეორესთან ურთიერთობაში. „გულს ნუ გაიქვავებ და ხელმოჭერილი ნუ იქნები შენი ღარიბი მოძმის მიმართ, — უთხრა მოსემ მათ, — მიეცი და ნუ ინაღვლებს შენი გული“ (მეორე რჯული 15:7, 10). მთელი გულით გაცემა ისრაელებს სიამოვნებას მიანიჭებდა.

ქრისტიანებს იესომ მსგავსი მითითება მისცა. მან თქვა, რომ ‘გაცემა ნეტარებაა’ (საქმეები 20:35). იესოს მოწაფეები სამაგალითოები იყვნენ სიხარულით გაცემაში. მაგალითად, ბიბლია გვამცნობს, რომ, ვინც მორწმუნე ხდებოდა იერუსალიმში, ‘მამულებსა და ქონებას ჰყიდდა და უნაწილებდა ყველას, თითოეულის საჭიროების მიხედვით’ (საქმეები 2:44, 45).

მაგრამ ეს ხელგაშლილი იუდეველები მოგვიანებით გაღარიბდნენ. ბიბლია ზუსტად არ ამბობს, თუ რით იყო ეს გამოწვეული. ზოგი სწავლულის აზრით, ამის მიზეზი შიმშილობა იყო, რომელზედაც საქმეების 11:28, 29-შია ლაპარაკი. ნებისმიერ შემთხვევაში, იუდეველი ქრისტიანები საშინელ გასაჭირში აღმოჩნდნენ და პავლეს სურდა, დახმარებოდა მათ. როგორ მოიქცა პავლე?

შეგროვება გაჭირვებულთათვის

პავლემ მაკედონიაში არსებული კრებები შეიპირა, რომ დაეხმარებოდნენ და ორგანიზება გაუწია იუდეაში მცხოვრები გაჭირვებული ქრისტიანებისთვის შესაწირავების შეგროვებას. პავლემ კორინთელებს მისწერა: „როგორც გალატიის ეკლესიებს დავუწესე, თქვენც ისე მოიქეცით. ყოველ ერთშაბათს თითოეულმა თქვენგანმა გადადოს თავისთან და გადაინახოს, წარმატებისამებრ“a (1 კორინთელთა 16:1, 2).

პავლეს განზრახული ჰქონდა, რომ ეს ფულადი სახსრები სწრაფად გაეგზავნათ ძმებისთვის იერუსალიმში, მაგრამ კორინთელები არ ცდილობდნენ პავლეს მითითებების სწრაფად შესრულებას. რატომ? გულგრილები ხომ არ იყვნენ გასაჭირში მყოფი იუდეველი ძმების მიმართ? არა, რადგან პავლემ იცოდა, რომ კორინთელებს ‘სიუხვე ჰქონდათ ყველაფერში: რწმენაში, სიტყვაში, შემეცნებასა და სიბეჯითეში’ (2 კორინთელთა 8:7). შესაძლებელია, ისინი უფრო მეტ ყურადღებას ამახვილებდნენ სხვა მნიშვნელოვან საკითხებზე, რომელთა შესახებაც პავლემ მათ თავის პირველ წერილში მისწერა. მაგრამ ახლა საჭირო იყო, იერუსალიმელი ძმებისთვის სწრაფად აღმოეჩინათ დახმარება. ასე რომ, პავლემ ამ საკითხთან დაკავშირებით კორინთელებს მეორე წერილი გაუგზავნა.

მოწოდება ხელგაშლილობისკენ

თავდაპირველად პავლემ კორინთელებს უთხრა, რომ მაკედონელები სამაგალითოდ გამოეხმაურნენ დახმარების გაწევის ღონისძიებას. „მიუხედავად დიდი შევიწროებით გამოცდისა, მათი სიხარულის სიუხვე და სიღატაკის სიღრმე უხვად გამოიხატა მათი ხელგაშლილობის სიმდიდრეში“, — წერდა პავლე. მაკედონელებს არ სჭირდებოდათ დაძალება. პირიქით, პავლემ თქვა, რომ ‘დიდი დაჟინებით სთხოვეს მონაწილეობის მიღება’. თუ მხედველობაში მივიღებთ იმ ფაქტს, რომ მაკედონელები თავად იმყოფებოდნენ „სიღატაკის სიღრმეში“, მეტად ღირსშესანიშნავია მათ მიერ სიხარულით გამოვლენილი ხელგაშლილობა (2 კორინთელთა 8:2–4).

ხომ არ ცდილობდა პავლე მაკედონელთა შექებით, კორინთელებს შორის მეტოქეობის სულის აღძვრას? სულაც არა, რადგან მან იცოდა, რომ წახალისებისთვის ეს არ იყო სათანადო მეთოდი (გალატელთა 6:4). გარდა ამისა, მან იცოდა, რომ კორინთელებს არ სჭირდებოდათ შერცხვენა, რომ კეთილი საქმე გაეკეთებინათ. პირიქით, ის დარწმუნებული იყო, რომ კორინთელებს ნამდვილად უყვარდათ თავიანთი იუდეველი ძმები და სურდათ დახმარებოდნენ მათ. პავლემ უთხრა კორინთელებს: „შარშან წამოიწყეთ და ხალისითაც“ (2 კორინთელთა 8:10). მართლაც, დახმარების გაწევის ზოგიერთ საკითხში კორინთელები სამაგალითოები იყვნენ. „ვიცი თქვენი გულმოდგინება და ვიკვეხნი თქვენით მაკედონელთა წინაშე, — უთხრა პავლემ მათ და დაამატა, — მრავალი წაახალისა თქვენმა მოშურნეობამ“ (2 კორინთელთა 9:2). კორინთელებს ახლაც უნდა ემოქმედათ თავიანთი გულმოდგინებითა და ენთუზიაზმით.

აქედან გამომდინარე, პავლემ უთხრა მათ: „თითოეულმა როგორც გულით აირჩია, არც შეწუხებით და არც ძალდატანებით. ვინაიდან სიხარულით გამცემი უყვარს ღმერთს“ (2 კორინთელთა 9:7). მაშ, პავლეს მიზანი არ ყოფილა, ზეგავლენა მოეხდინა კორინთელებზე, რადგან შეუძლებელია ადამიანი სიხარულით გამცემი იყოს, როდესაც ძალდატანებით აკეთებინებენ ამას. ცხადია, პავლე ფიქრობდა, რომ მათ უკვე ჰქონდათ სწორი აღძვრა, რადგან თითოეულს უკვე მტკიცედ ჰქონდა გადაწყვეტილი გაცემა. პავლემ მათ ისიც უთხრა, რომ „როცა გულმოდგინება არის, ეს მიიღება იმის მიხედვით, ვისაც რა აქვს, და არა იმის მიხედვით, რაც არა აქვს“ (2 კორინთელთა 8:12). დიახ, როდესაც გულმოდგინებითა და სიყვარულით ვწირავთ, რამდენად მცირეც უნდა იყოს შესაწირავი, მისაღები იქნება ღვთისთვის (შეადარეთ ლუკა 21:1–4).

სიხარულით გამცემები დღეს

იუდეველი ქრისტიანებისთვის გაწეული დახმარება დღეს ჩვენთვის საუკეთესო მაგალითს წარმოადგენს. იეჰოვას მოწმეებს წამოწყებული აქვთ მსოფლიო სამქადაგებლო კამპანია, რომლითაც კვებავენ მილიონობით სულიერად დამშეულ ადამიანს (ესაია 65:13, 14). ისინი იესოს მითითებისამებრ მოქმედებენ: „ამიტომ წადით და მოიმოწაფეთ ყველა ხალხი, მონათლეთ ისინი. . . ასწავლეთ მათ ყოველივეს დაცვა, რაც მე გამცნეთ“ (მათე 28:19, 20).

ამ დავალების შესრულება არ არის იოლი. მასში შედის მსოფლიო მასშტაბით მისიონერთა სახლებისა და ასზე მეტი ფილიალის შენახვა. აგრეთვე სამეფო და საკონგრესო დარბაზების მშენებლობები, რათა იეჰოვას თაყვანისმცემლებს ხელსაყრელი ადგილი ჰქონდეთ შეხვედრებისთვის და ერთმანეთის გასამხნევებლად (ებრაელთა 10:24, 25). დროდადრო, იეჰოვას მოწმეები დახმარების ხელს უწვდიან სტიქიური უბედურებით დაზარალებულ ქვეყნებს.

აგრეთვე, წარმოიდგინეთ ბეჭდვითი საქმისთვის გაწეული დიდძალი ხარჯები. ყოველკვირა საშუალოდ 22 000 000-ზე მეტი „საგუშაგო კოშკი“ და 20 000 000 „გამოიღვიძეთ!“ იბეჭდება. ამ რეგულარული სულიერი საზრდოს გარდა ყოველ წელს გამოიცემა მილიონობით წიგნი, ბროშურა, ვიდეო- და აუდიოკასეტები.

როგორ უჭერენ მხარს ამ ყოველივეს? ნებაყოფლობითი შესაწირავებით. ეს რეკლამისთვის ან ეგოისტური აღძვრების გამო კი არ კეთდება, არამედ ჭეშმარიტი თაყვანისმცემლობის წინ წასაწევად. აქედან გამომდინარე, ასეთი გაცემით ხარობს გამცემი და კურთხევებსაც იღებს იეჰოვასგან (მალაქია 3:10; მათე 6:1–4). იეჰოვას მოწმეებს შორის ბავშვებიც ხელგაშლილები და სიხარულით გამცემები არიან. მაგალითად, მას შემდეგ, რაც ოთხი წლის ელისონმა გაიგო, რომ შეერთებული შტატების ერთ-ერთი მხარე გრიგალმა გაანადგურა, $2 გაიღო დაზარალებულთა დასახმარებლად. „ეს არის მთელი ფული, რაც ყულაბაში მქონდა, — დაწერა მან, — გავიგე რომ ბავშვებმა დაკარგეს სათამაშოები, თოჯინები და წიგნები. იქნებ ამ ფულით ჩემხელა გოგონას წიგნი უყიდოთ“. მაკლეინმა, 8 წლის ბიჭუნამ, დაწერა, თუ როგორ გაუხარდა, როდესაც გაიგო, რომ არც ერთი ძმა არ დაღუპულა გრიგალის დროს. მან დაამატა: „მე და მამიკომ მანქანის ნაწილები $17-ად გავყიდეთ. ჩემი ფულით რაღაცის ყიდვას ვაპირებდი, მაგრამ შემდეგ ძმები გამახსენდა“. (იხილეთ აგრეთვე ზემოთ მოცემული ჩარჩო.)

იეჰოვა ხარობს, როცა ხედავს, რომ დიდებიც და პატარებიც პირველ ადგილზე აყენებენ სამეფოს ინტერესებს და ‘პატივს მიაგებენ მას თავიანთი ქონებიდან’ (იგავნი 3:9, 10). რასაკვირველია, ნამდვილად არავის შეუძლია იეჰოვას გამდიდრება, რადგან მას ეკუთვნის ყოველივე (პირველი ნეშტთა 29:14–17). მაგრამ სამეფოს საქმისადმი მხარდაჭერა უპირატესობაა, რომელიც მის თაყვანისმცემელს შესაძლებლობას აძლევს, სიყვარული გამოავლინოს იეჰოვასადმი. მადლიერებას გამოვთქვამთ ყველას მიმართ, ვინც მთელი გულით აკეთებს ამას.

[სქოლიო]

[ჩარჩო 27 გვერდზე]

შეწირვის ზოგი საშუალება

შესაწირავები სამეფოს საქმისთვის

მრავალი გადადებს ხოლმე ანუ ბიუჯეტიდან გამოყოფს თანხას, რომელსაც დებს შესაწირავების ყუთში, წარწერით „შესაწირავები სამეფოს საქმისთვის (მათე 24:14)“. ამ თანხებს კრებები ყოველთვიურად აგზავნიან საზოგადოება „საგუშაგო კოშკის“ ადგილობრივ ფილიალში.

ფულადი ნებაყოფლობითი შესაწირავები შეიძლება პირდაპირაც გაიგზავნოს საზოგადოების ფილიალში, რომელიც თქვენს ქვეყანას ემსახურება. ამ შესაწირავებს თან უნდა ახლდეს მოკლე წერილი, სადაც აღნიშნული იქნება, რომ შესაწირავები ძღვენს წარმოადგენს.

გათვალისწინებული შესაწირავები

პირდაპირი ფულადი შესაწირავების გარდა, სხვა მეთოდებიც არსებობს, მსოფლიო სამეფო საქმის მხარდასაჭერად. ამაში შედის:

უძრავი ქონება: გასაყიდად ვარგისი უძრავი ქონება შეიძლება შეწირულ იქნეს საზოგადოება „საგუშაგო კოშკისთვის“ პირდაპირ ან შემწირველის უფლების დაცვით — ისარგებლოს თავისი ქონებით სიცოცხლის ბოლომდე. შესაწირავის გამღები უნდა დაუკავშირდეს საზოგადოებას, სანამ გააფორმებს საზოგადოებისთვის უძრავი ქონების გადაცემის აქტს.

ანდერძი: ქონება ან ფულადი სახსრები შეიძლება ანდერძით გადაეცეს საზოგადოება „საგუშაგო კოშკს“ კანონით დადგენილი წესების მიხედვით. საზოგადოებას უნდა გაეგზავნოს ანდერძის ასლი.

დამატებითი ინფორმაციისთვის შეგიძლიათ მიმართოთ საზოგადოების ადგილობრივ ოფისს, რომელიც თქვენს ქვეყანას ემსახურება.

[ჩარჩო 28 გვერდზე]

ბავშვებიც სიხარულით გამცემები არიან!

მინდა ამ ფულით წიგნები დაბეჭდოთ ჩვენთვის. მამიკოს ვეხმარებოდი და ეს ფული ისე მოვაგროვე. დიდი მადლობა რომ ამდენს შრომობთ (პამელა, 7 წლის).

გიგზავნით $6.85, რომ დაგეხმაროთ სამეფო დარბაზების აშენებაში. ამ ზაფხულს ქუჩაში ლიმონათს ვყიდდი და ეს ფული იქ მომცეს (სელენა, 6 წლის).

ერთ დედალს ვზრდიდი, რომელმაც დედალ-მამალი წიწილა გამოჩეკა. დედალი გავზარდე და იეჰოვას მივუძღვენი. მან სამი წიწილა გამოჩეკა. ისინიც გავზარდე და გავყიდე, თანხა კი იეჰოვას საქმისთვის გავიღე (ტიერი, 8 წლის).

ეს არის მთელი ჩემი ფული! გთხოვთ, გონივრულად გამოიყენოთ. მისი შეგროვება იოლი არ იყო. აქ 21 ამერიკული დოლარია (სარა, 10 წლის).

სასკოლო კონკურსში პირველი ადგილი ავიღე. ამიტომ სარაიონო კონკურსშიც უნდა მიმეღო მონაწილეობა. იქაც პირველი ადგილი მოვიპოვე, ფინალურ საოლქო კონკურსში კი — მეორე. ყველა ამ კონკურსში ფულით დამაჯილდოვეს. მსურს ამ ფულის ნაწილი საზოგადოებას გადავურიცხო. ვგრძნობ, ამ პრიზების მოპოვებაში ის დამეხმარა, რაც თეოკრატიული სამსახურის სკოლაში ვისწავლე. კმაყოფილების გრძნობა დამეუფლა, როდესაც თემა ჟიურის წარვუდგინე (ემბერი, მეექვსე კლასის მოსწავლე).

მსურს ეს ფული იეჰოვასთვის გავიღო. ჰკითხეთ მას, თუ რაში გამოიყენოთ ის. მან ყველაფერი იცის (კარენი, 6 წლის).

[სურათები 25 გვერდზე]

იეჰოვას მოწმეების საქმიანობა მხარდაჭერილია ნებაყოფლობითი შესაწირავებით