დავუმოწმოთ არაქრისტიანული რელიგიების მიმდევრებს

¹¹ ადამიანის რელიგიურ წარსულთან დაკავშირებული გარკვეული ცოდნა გვეხმარება, ეფექტურად დავამოწმოთ ღვთის სამეფოს შესახებ. ბევრ ენაზე ხელმისაწვდომი წიგნი „კაცობრიობა ღვთის ძიებაში“ (ინგლ.) გვახედებს მსოფლიოს მთავარ რელიგიებში, რომ საკმაოდ კარგად გვესმოდეს ხალხის რწმენა, რათა დავეხმაროთ მათ ჭეშმარიტების შეცნობაში.

¹² ამ დანართის ბოლო გვერდზე ჩარჩოში მოცემულია იმ არსებული პუბლიკაციების სია, რომლებზეც იეჰოვას ორგანიზაციამ იზრუნა არაქრისტიანებისთვის დამოწმებისას სარგებლობისთვის. ამ პუბლიკაციების წაკითხვით ვიგებთ, როგორ გადავცეთ ხალხს კეთილი ცნობა. არ უნდა დავივიწყოთ ისეთი დამხმარე საშუალება, როგორიცაა ბუკლეტი „როგორ დავიწყოთ და გავაგრძელოთ ბიბლიურ თემაზე საუბარი“. 13–16 გვერდებზე მოცემულია პრაქტიკული რჩევები, თუ როგორ ვუპასუხოთ ბუდისტებს, ინდუსებს, ებრაელებსა და მუსულმანებს.

¹³ დაუკვირდი რას ამბობ: არ უნდა დავასკვნათ, რომ ერთი რელიგიის მიმდევრებს აუცილებლად ერთნაირი შეხედულებები აქვთ. ნაცვლად ამისა, ეცადე გაიგო როგორ ფიქრობს პიროვნება, რომელსაც ესაუბრები (საქ. 10:24–35). როგორც მუსულმანი, სელიმუნი იმ რწმენით აღიზარდა, რომ ყურანი ღვთის სიტყვაა. მაგრამ ის ბოლომდე ვერასოდეს ეთანხმებოდა მუსულმანურ სწავლებას, რომ ყოვლადმოწყალე ღმერთი ცეცხლოვან ჯოჯოხეთში აწამებდა ადამიანებს. ერთ დღეს ის იეჰოვას მოწმეებმა მიიწვიეს შეხვედრაზე. მან მაშინვე მიიღო ჭეშმარიტება და ამჟამად ქრისტიანულ კრებაში სიხარულით მსახურობს უხუცესად.

¹⁴ არაქრისტიანული რწმენის მქონე ადამიანებისთვის დამოწმებისას სიფრთხილე გვესაჭიროება, რომ ჩვენმა მიდგომამ არ წაგვართვას მათთან კეთილ ცნობაზე საუბრის შესაძლებლობა (საქ. 24:16). ზოგი რელიგიის მიმდევარი ძალიან მგრძნობიარეა რწმენაში მოქცევის ნებისმიერ მცდელობაზე. ამიტომ ფხიზლად იყავი, რათა ნიადაგის მოსამზადებლად ისეთი აზრები მოძებნო, რომ ისინი ღვთის სიტყვის მთლიანი ჭეშმარიტებისკენ მიიზიდო. ცხვრისმაგვარი ადამიანები გამოეხმაურებიან გულთბილ მიდგომასა და ჭეშმარიტების გასაგებად შეთავაზებას.

¹⁵ სიტყვების შერჩევაც მნიშვნელოვანი ფაქტორია, რომ არ ჩამოვაცილოთ ადამიანები ჩვენს ცნობას. მაგალითად, თუ მაშინვე ქრისტიანად აცნობ თავს, მსმენელმა შეიძლება ავტომატურად მიგაკუთვნოს ქრისტიანული სამყაროს ეკლესიებს, რამაც შეიძლება ბარიერი აღმართოს. შეიძლება ისიც სასარგებლო იყოს, რომ ბიბლია მოიხსენიო ‘წერილებად’ ან ‘საღვთო [ან წმინდა] წერილებად’ (მათ. 21:42; 2 ტიმ. 3:15).

¹⁶ თუ არაქრისტიანული რელიგიის მიმდევარს ხვდები და მოუმზადებლად თვლი თავს, რომ მაშინვე დაუმოწმო, გამოიყენე შესაძლებლობა, რომ მხოლოდ გაიცნო და ტრაქტატი დაუტოვო. შემდეგ ერთ-ორ დღეში დაბრუნდი დამოწმებისთვის შესაბამისად მომზადებული (1 ტიმ. 4:16; 2 ტიმ. 3:17).

¹⁷ დავუმოწმოთ ბუდისტებს: ბუდიზმის ყველა მომხრეს თავისებური რწმენა აქვს. ნაცვლად იმისა, რომ ცოცხალი შემოქმედი აღიაროს, ბუდიზმის რელიგიური იდეალია ძვ. წ. მეექვსე საუკუნეში მცხოვრები ინდოელი მამაკაცი გაუტამა (ბუდა). როდესაც პირველად დაინახა ავადმყოფი, მოხუცი და მკვდარი, გაუტამა შეაწუხა სიცოცხლის მნიშვნელობამ. „ნუთუ მხოლოდ იმისთვის გაჩნდა ადამიანი, რომ იტანჯოს, დაბერდეს და მოკვდეს?“ — დაინტერესდა ის. რასაკვირველია, ჩვენ შეგვიძლია ამ კითხვებზე პასუხების გაცემა გულწრფელი ბუდისტებისთვის, რომელთაც ამის გაგება სურთ.

¹⁸ ბუდისტებთან საუბრისას გამოიყენე მხოლოდ დადებითი ცნობა და გასაგები ჭეშმარიტებები, რომლებიც მოცემულია წმინდა წიგნებიდან ყველაზე დიდებულ წიგნში, ბიბლიაში. მსგავსად მრავალი სხვა ადამიანისა, ბუდისტები ძლიერ არიან დაინტერესებულები მშვიდობით, ზნეობრიობითა და ოჯახური ცხოვრებით და ხშირად მოსწონთ ამ თემებზე საუბარი. ამის მეშვეობით შეგიძლია ხაზი გაუსვა, რომ სინამდვილეში მხოლოდ სამეფო იხსნის კაცობრიობას პრობლემებისგან.

¹⁹ ჩვენს ქვეყანაში ზოგან არიან ჩინელები, რომელთაც ბუდიზმი და სხვა აღმოსავლური ფილოსოფიები სწამთ. მრავალი სწავლობს ან მეწარმეობას ეწევა. როდესაც დამ ჩინელი მამაკაცი დაინახა საბაყლო მაღაზიაში, ტრაქტატი მისცა მის ენაზე და ბიბლიის შესწავლა შესთავაზა. ჩინელმა უთხრა: „წმინდა ბიბლიას გულისხმობთ? მთელი სიცოცხლეა ამას ვეძებ!“ ის იმავე კვირაში შეუდგა შესწავლას და ყველა შეხვედრაზე დასწრება დაიწყო.

²⁰ ერთ ქვეყანაში პიონერი და ათწლეულზე მეტია ჭეშმარიტებას ასწავლის ჩინელ სტუდენტებს. რვა ბინიანი შენობის დამუშავებისას, რომელიც ამ სტუდენტებს ჰქონდათ დაქირავებული, ის ლოცვაში სთხოვდა იეჰოვას, რომ თითოეულ ბინაში დაეწყო შესწავლა. ორ კვირაში ის უკვე სულ მცირე ერთ სტუდენტს ასწავლიდა თითოეულ ბინაში. მან აღმოაჩინა, რომ პრაქტიკული მიდგომა იმის თქმაა, რომ საერთო წუხილი აღმოაჩინა სტუდენტებს შორის — ყველა მათგანს მშვიდობა და ბედნიერება უნდა. შემდეგ ეკითხება, მათაც ხომ არ აწუხებთ ეს. ისინი ყოველთვის ეთანხმებიან. ის მათ ყურადღებას ამახვილებს ბროშურაზე „უსასრულო მშვიდობა და ბედნიერება — როგორ ვიპოვოთ ისინი“, რომელიც ჩინელებისთვისაა გამოცემული. ხუთი შეხვედრის შემდეგ ერთმა სტუდენტმა მას უთხრა, რომ დიდი ხანია ეძებდა ჭეშმარიტებას და ახლა იპოვა.

²¹ დავუმოწმოთ ინდუსებს: ინდუიზმს არა აქვს გარკვეული მრწამსი. მისი ფილოსოფია ძალიან რთულია. ინდუსებს თავიანთი მთავარი ღმერთი ბრაჰმანი სამსახოვნად წარმოუდგენიათ (ბრაჰმა — შემოქმედი, ვიშნუ — ქომაგი და შივა — დამანგრეველი). უკვდავი სულის რწმენა გარდასახვასთან დაკავშირებული მათი სწავლების განუყრელი ნაწილია, რაც ხელს უწყობს სიცოცხლეზე მათ ფატალისტურ თვალსაზრისს (იხილე 1997 წლის 15 მაისის „საგუშაგო კოშკი“, გვერდები 3–8). ინდუიზმი შემწყნარებლობისკენ მოუწოდებს და ასწავლის, რომ ყველა რელიგია ერთსა და იმავე ჭეშმარიტებამდეა მიმყვანი.

²² ინდუსისთვის დამოწმებისას მიდგომაში უნდა ავხსნათ ბიბლიაზე დაფუძნებული იმედი დედამიწაზე სრულყოფილებაში მარადიულ ცხოვრებასთან დაკავშირებით, აგრეთვე ის, რომ ბიბლია დამაკმაყოფილებელ პასუხებს იძლევა მნიშვნელოვან კითხვებზე, რომლებიც მთელ კაცობრიობას ებადება.

²³ დავუმოწმოთ ებრაელებს: სხვა არაქრისტიანული რელიგიებისგან განსხვავებით იუდაიზმს ფესვები ისტორიაში აქვს გადგმული და არა მითოლოგიაში. კაცობრიობის მიერ ჭეშმარიტი ღვთის ძიება მნიშვნელოვანწილად უკავშირდება ინსპირირებულ ებრაულ წერილებს. და მაინც, ღვთის სიტყვის საპირისპიროდ, თანამედროვე იუდაიზმის ძირითადი სწავლებაა ადამიანის უკვდავი სულის რწმენა. საერთო ნიადაგის შექმნა შეიძლება იმის თქმით, რომ თაყვანს ვცემთ აბრაამის ღმერთს, და იმის აღიარებით, რომ დღევანდელ წუთისოფელში ყველა ერთსა და იმავე სიძნელეებს ვაწყდებით.

²⁴ თუ ხვდები ებრაელს, რომელსაც არა სწამს ღმერთი, შეკითხვას — ასე ფიქრობდა თუ არა ის ყოველთვის — შეუძლია დაგეხმაროს იმის ამოცნობაში, თუ რის შეთავაზება იქნებოდა უკეთესი. მაგალითად, მას შეიძლება არასოდეს სმენია დამაკმაყოფილებელი ახსნა, თუ რატომ უშვებს ღმერთი ტანჯვას. გულწრფელი ებრაელები შეიძლება წავახალისოთ, იესოს, როგორც მესიის, ვინაობა გადაამოწმონ არა ქრისტიანული სამყაროს დამახინჯებების საშუალებით, არამედ იმით, როგორც ბერძნული წერილების იუდეველმა მწერლებმა წარმოადგინეს ის.

²⁵ დავუმოწმოთ მუსულმანებს: მუსულმანები (ანუ მუსლიმანები) არიან ისლამის (ანუ მაჰმადიანობის) მიმდევრები, რომელიც მოიცავს ალაჰის, როგორც მათი ერთპიროვნული ღვთაების, და მაჰმადის (ახ. წ. 570–632 წლები), როგორც მისი ბოლო და ყველაზე მნიშვნელოვანი წინასწარმეტყველის, რწმენას. მათ არ სწამთ, რომ ღმერთს ძე ჰყავდა, და იესო ქრისტეს მხოლოდ ღვთის უფრო მცირე წინასწარმეტყველად აღიარებენ. ყურანი, რომელიც 1 400 წლისაც არ არის, ციტირებს როგორც ებრაულ, ასევე ბერძნულ წერილებს. ძლიერი მსგავსებაა ისლამსა და კათოლიციზმს შორის. ორივე ასწავლის ადამიანის სულის უკვდავებას, სალხინებელისა და ცეცხლოვანი ჯოჯოხეთის არსებობას.

²⁶ აშკარა საერთო ნიადაგს წარმოადგენს ჩვენი რწმენა, რომ არსებობს ერთადერთი ჭეშმარიტი ღმერთი და რომ ბიბლია მის მიერ იყო ინსპირირებული. ყურანის ყურადღებიანი მკითხველი ხედავს მითითებებს თორაზე, ფსალმუნებზე და სახარებებზე, როგორც ღვთის სიტყვაზე, და კითხულობს, რომ ისინი უნდა აღიარო ასეთად და დაემორჩილო. აქედან გამომდინარე, შეგიძლია ყოველივე ამის შესწავლა შესთავაზო პიროვნებას.

²⁷ მუსულმანთან შეიძლებოდა ამ შეთავაზების გამოყენება: „მე არ მილაპარაკია ბევრ მუსულმანთან, მაგრამ წაკითხული მაქვს გარკვეული რამ თქვენი რელიგიის რამდენიმე სწავლებაზე. თქვენ გწამთ, რომ იესო წინასწარმეტყველი იყო, მაგრამ მაჰმადი იყო ბოლო და ყველაზე მნიშვნელოვანი წინასწარმეტყველი. ისიც გწამთ, რომ მოსე ჭეშმარიტი წინასწარმეტყველი იყო? [ნება მიეცი გიპასუხოს]. შემიძლია გაჩვენოთ, რა უთხრა ღმერთმა მოსეს თავის პირად სახელზე?“ შემდეგ წაუკითხე გამოსვლის 6:2, 3. (ისარგებლე ბიბლიის იმ თარგმანით, რომელშიც ამ მუხლებში გამოყენებულია ღვთის სახელი). განმეორებითი მონახულებისას შეგეძლო განგეხილა მე-14 გვერდზე მოცემული ქვესათაური „ერთი ღმერთი, ერთი რელიგია“ ბუკლეტში „ჟამი ღვთისადმი ჭეშმარიტი მორჩილებისა“ (რუს.).

²⁸ დღეს მრავალი მოქმედებს ესაიას 55:6-ის შესაბამისად, სადაც ვკითხულობთ: „ეძებეთ უფალი, როცა შეიძლება მისი პოვნა; მოუხმეთ მას, როცა ახლოს არის იგი“. ეს ეხება ყველა გულწრფელ ადამიანს, მიუხედავად მისი სალაპარაკო ენისა და რელიგიური წარსულისა. შეგვიძლია დარწმუნებულები ვიყოთ, რომ იეჰოვა აკურთხებს ჩვენს მცდელობებს — წავიდეთ და ‘მოვიმოწაფოთ ხალხი ყველა ერიდან’ (მათ. 28:19, აქ).

ლიტერატურა, გამოცემული არაქრისტიანებისთვისa

ბუდისტებისთვის

„მამის ძიებაში“ (ბუკლეტი)

„ნახე! მე ვქმნი ყოველივე ახალს“ (ბროშურა)

ჩინელებისთვის

„უსასრულო მშვიდობა და ბედნიერება — როგორ ვიპოვოთ ისინი“ (ბროშურა)

ინდუსებისთვის

„კურუკშეტრადან არმაგედონამდე — და შენი გადარჩენა“ (ბუკლეტი)

„რატომ უნდა ვცეთ თაყვანი ღმერთს სიყვარულითა და ჭეშმარიტებით?“ (ბროშურა)

„სიკვდილზე გამარჯვება — შესაძლებელია შენთვის?“ (ბუკლეტი)

„ღვთიური ჭეშმარიტების ბილიკი, რომელიც გათავისუფლებისკენ მიდის“ (ბუკლეტი)

„ჩვენი პრობლემები — ვინ დაგვეხმარება მათ გადაჭრაში?“ (ბროშურა)

ებრაელებისთვის

„იეჰოვას მოწმეები — რა სწამთ მათ?“ (ტრაქტატი №18)

„იქნება ოდესმე ქვეყნიერება ომის გარეშე?“ (ბროშურა)

„მშვიდობიანი ახალი ქვეყნიერება — იქნება თუ არა ოდესმე?“ (ტრაქტატი №17)

მუსულმანებისთვის

„ბედი მართავს ჩვენს ცხოვრებას — თუ ჩვენ გვთვლის ღმერთი პასუხისმგებლებად?“ (ტრაქტატი №71)

„ვინ არიან იეჰოვას მოწმეები?“ (ტრაქტატი №73)

„ჟამი ღვთისადმი ჭეშმარიტი მორჩილებისა“ (ბუკლეტი)

„როგორ ვიპოვოთ სამოთხისკენ მიმავალი გზა“ (ტრაქტატი)