„მრავლდება თითოეული თქვენგანის სიყვარული“
2004 წელს იაპონიას სტიქიური უბედურებების ტალღამ გადაუარა. კერძოდ კი ტაიფუნები, წყალდიდობები და მიწისძვრები. ამის გამო მნიშვნელოვნად შეიცვალა ბევრი ადამიანის, მათ შორის იეჰოვას მოწმეების, ცხოვრება (ეკლესიასტე 9:11). ამ უბედურებებმა მოწმეებს ერთმანეთის მიმართ ძმური სიყვარულის გამოვლენის საშუალება მისცა (1 პეტრე 1:22).
მაგალითად, ივლისში კოკისპირული წვიმების შედეგად მდინარე ადიდდა და ცენტრალური იაპონიის სანაპიროები დატბორა. წყალდიდობამ იეჰოვას მოწმეთა 20-ზე მეტი სახლი დააზიანა. ერთ სამეფო დარბაზში წყალი დაახლოებით ერთ მეტრს აღწევდა. მეზობელი კრებები მაშინვე გაერთიანდნენ მათ დასახმარებლად. ასობით მოხალისე წმენდდა შლამით სავსე სახლებს. სამეფო დარბაზი სულ რაღაც ორ კვირაში დაასუფთავეს და შეაკეთეს.
მოგვიანებით 23 ოქტომბერს იმავე ტერიტორიაზე მოხდა მიწისძვრა, რომლის სიძლიერეც რიხტერის სკალის მიხედვით 6,8 ბალი იყო. ამ მიწისძვრას, სულ ცოტა, 40 ადამიანის სიცოცხლე ემსხვერპლა, საჭირო გახდა 100 000 ადამიანის ევაკუაცია. შეწყდა წყლის, გაზისა და ელექტროენერგიის მიწოდება. მიუხედავად იმისა, რომ მიწისძვრის ეპიცენტრი სამეფო დარბაზიდან მხოლოდ 50 კილომეტრით იყო დაშორებული, შეკეთებული დარბაზი არ დაზიანებულა. უფრო მეტიც, ის გარკვეული დროით დახმარების აღმოჩენის ცენტრი გახდა. ქრისტიანი ზედამხედველების სიხარულს საზღვარი არ ჰქონდა, როცა გაიგეს, რომ არც ერთი იეჰოვას მოწმე არ იყო დაშავებულთა და გარდაცვლილთა შორის. მეორე დღეს, დილაადრიან, ექვსმა იეჰოვას მოწმემ, რომლებიც ივლისში მომხდარი წყალდიდობის დროს დაზარალდნენ, მაშინვე გამოთქვეს სურვილი, მიწისძვრით დაზარალებულთათვის საკვები და წყალი მიეწოდებინათ. მიწისძვრის შემდეგ რამდენიმე საათში მათ მიიღეს დახმარება.
ერთი ქრისტიანი ზედამხედველი აღნიშნავს: „მათ, რომლებიც წყალდიდობის შედეგად დაზარალდნენ, შესაძლებლობა მიეცათ, დახმარებოდნენ მიწისძვრით დაზარალებულებს, რათა მადლიერება გამოეხატათ იმ დახმარებისთვის, რაც თავის დროზე მიიღეს. ისინი დილიდან გვიან ღამემდე მძიმედ, მაგრამ ხალისით მუშაობდნენ“.
ვერც წყალდიდობები და ვერც მიწისძვრები ვერ შეუქმნის საფრთხეს სიყვარულს, რომელიც იეჰოვას მოწმეთა ქრისტიანულ საძმოს ერთმანეთთან აკავშირებს. პირიქით, როდესაც ასეთი უბედურებები ხდება, ქრისტიანებზე სრულდება მოციქული პავლეს მიერ თესალონიკელებისთვის მიწერილი სიტყვები: „მრავლდება თითოეული თქვენგანის სიყვარული ერთმანეთის მიმართ“ (2 თესალონიკელები 1:3).