მიენდეთ იეჰოვას, რადგან აღსასრული კარსაა მომდგარი
„მუდამ მიენდეთ იეჰოვას“ (ეს. 26:4).
1. რით განსხვავდებიან ღვთის მსახურები ქვეყნიური ხალხისგან?
ჩვენ ვცხოვრობთ მსოფლიოში, სადაც მილიონებმა ნდობა დაკარგეს ყველასა და ყველაფრის მიმართ. ამის მიზეზი შეიძლება ის არის, რომ მათ არაერთხელ მიაყენეს ტკივილი და გაუცრუეს იმედი. იეჰოვას მსახურების შემთხვევაში სრულიად სხვაგვარ სურათს ვხედავთ. ისინი ღვთის სიბრძნით ხელმძღვანელობენ და კარგად ესმით, რომ არ ღირს ქვეყნიურ მმართველებსა და წარჩინებულებზე მინდობა (ფსალმ. 146:3). ღვთის მსახურები თავიანთ სიცოცხლეს იეჰოვას ანდობენ, რადგან იციან, რომ ღმერთს უყვარს ისინი და ყოველთვის ასრულებს თავის სიტყვას (რომ. 3:4; 8:38, 39).
2. როგორ ცხადყოფს იესო ნავეს ძის სიტყვები, რომ ღმერთი სანდოა?
2 იესო ნავეს ძის სიტყვები ცხადყოფს, რომ ღმერთი სანდოა. სიკვდილის წინ მან ისრაელებს უთხრა: „მე უკვე ვკვდები; კარგად იცით თქვენი გულითა და სულით, რომ არ გამტყუნებულა არც ერთი სასიკეთო სიტყვა, რომელიც იეჰოვამ, თქვენმა ღმერთმა გითხრათ, ყველა შეგისრულდათ, არც ერთი არ გამტყუნებულა“ (იეს. 23:14).
3. რას გვიმჟღავნებს ღვთის სახელი ღმერთის შესახებ?
3 იეჰოვა თავის დანაპირებს, პირველ რიგში, თავისი სახელის განსადიდებლად ასრულებს და არა უბრალოდ იმიტომ, რომ უყვარს თავისი მსახურები (გამ. 3:14; 1 სამ. 12:22). ღვთის სახელის შესახებ როდერემის თარგმანის შესავალში ნათქვამია: „ღვთის სახელის მნიშვნელობა კეთილშობილურ დანაპირებს გულისხმობს. ამ სახელის მნიშვნელობიდან გამომდინარე, ღმერთს შესწევს ძალა, ნებისმიერ სიტუაციაში, რა სირთულეებიც არ უნდა წამოიჭრას, იმოქმედოს თავისი სახელის განსადიდებლად . . . ეს სახელი ღვთის თვისებებს გვიმჟღავნებს და გონებაში ღრმად გვებეჭდება ცოცხალი ღმერთის საქმეები. ღვთის სახელი იმაზე მოწმობს, რომ ღმერთი ყველა თავის განზრახვას ასრულებს და არასდროს მიაქვს საკუთარი სიტყვები უკან“ (The Emphasized Bible).
4. ა) რისკენ მოგვიწოდებს ესაიას 26:4? ბ) რას განვიხილავთ ამ სტატიაში?
4 ჰკითხეთ საკუთარ თავს: ვიცნობ იეჰოვას იმდენად კარგად, რომ შემიძლია, სრულიად ვენდო მას? ვუყურებ მომავალს იმედის თვალით და მჯერა, რომ ღმერთი ყველაფერს თავის დროზე მოაგვარებს? ესაიას 26:4-ში ვკითხულობთ: „მუდამ მიენდეთ იეჰოვას, რადგან იაჰი, იეჰოვაა კლდე მარადიულად!“ მართალია, დღეს ღმერთი სასწაულებრივად არ ერევა ადამიანთა ცხოვრებაში, როგორც ეს ბიბლიურ დროში ხდებოდა, მაგრამ რამდენადაც იეჰოვაა „კლდე მარადიულად“, შეგვიძლია ყოველთვის ვენდოთ. როგორ ეხმარება ღმერთი თავის ერთგულ მსახურებს დღეს? განვიხილოთ, როგორ გვაძლიერებს ღმერთი, როცა ცდუნებასთან გასამკლავებლად მას მივმართავთ დახმარებისთვის, როგორ გვიჭერს მხარს, როცა გულგრილობასა და დევნას ვხვდებით და როგორ გვამტკიცებს, როცა სირთულეები ძალას გვაცლის. ამ მხარეებზე დაფიქრება დაგეხმარებათ, რომ უფრო მეტად მიენდოთ იეჰოვას.
მიენდეთ იეჰოვას ცდუნების დროს
5. როდის უფრო რთულია, ვენდოთ იეჰოვას?
5 ჩვენ მაშინ უფრო გვიადვილდება, ვენდოთ იეჰოვას, როცა საქმე მისი დანაპირების შესრულებას ეხება — ჩვენ მოუთმენლად ველით, რომ დედამიწაზე სამოთხე იქნება და მკვდრები აღდგებიან. მაგრამ გაცილებით რთულია, ვენდოთ იეჰოვას მაშინ, როცა საქმე ზნეობრივ საკითხებს ეხება — ადვილი არ არის, მთელი გულით ვიაროთ მისი გზებით და გვჯეროდეს, რომ მისი ნორმები საუკეთესოა და მათ დაცვას ნამდვილი ბედნიერება მოაქვს. მეფე სოლომონმა მოგვიწოდა: „მიენდე იეჰოვას მთელი გულით და საკუთარ გონებას ნუ დაეყრდნობი. გახსოვდეს იგი ყველა შენს გზაზე და ის გაგისწორებს სავალს“ (იგავ. 3:5, 6). ყურადღება მიაქციეთ ამ მუხლში მოყვანილ სიტყვებს „გზასა“ და „სავალს“. მხოლოდ მაშინ კი არ უნდა ვენდოთ იეჰოვას, როცა მისი დანაპირების შესრულებას მოველით, არამედ მთელი ჩვენი ცხოვრების გზაზე უნდა ვენდობოდეთ მას. როგორ შეგვიძლია ცხადვყოთ, რომ ცდუნების დროს ვენდობით იეჰოვას?
6. როგორ შეგიძლიათ თავიდან მოიცილოთ არასწორი ფიქრები?
6 პირველ რიგში, გონებიდან უნდა ამოვიგდოთ არასწორი ფიქრები (წაიკითხეთ რომაელების 8:5; ეფესოელების 2:3 ). როგორ შეგიძლიათ თავიდან მოიცილოთ ცუდი ფიქრები? დაფიქრდით ხუთ დამხმარე საშუალებაზე: 1) ღმერთს დახმარებისთვის ლოცვით მიმართეთ (მათ. 6:9, 13). 2) დაფიქრდით იმ ბიბლიურ პერსონაჟებზე, ვინც უსმენდა იეჰოვას და ვინც ყურს არ ათხოვებდა მის სიტყვას. ყურადღება გაამახვილეთ, როგორ წარიმართა მოვლენები მათ შემთხვევაშიa (1 კორ. 10:8—11). 3) კარგად გაიაზრეთ, რამხელა ემოციური ტკივილი შეიძლება იგრძნოთ ცოდვის ჩადენის შემდეგ თქვენ და თქვენმა საყვარელმა ადამიანებმა. 4) დაფიქრდით იმაზეც, რას გრძნობს ღმერთი, როცა მისი მსახურები სერიოზულ ცოდვას სჩადიან (წაიკითხეთ ფსალმუნის 78:40, 41 ). 5) წარმოიდგინეთ, როგორ ახარებს იეჰოვას, როცა მისი ერთგული თაყვანისმცემლები არასწორ ფიქრებს იშორებენ და სახალხოდ თუ მარტო ყოფნისას იმას აკეთებენ, რაც ღვთის თვალში სწორია (ფსალმ. 15:1, 2; იგავ. 27:11). თქვენც შეგიძლიათ აჩვენოთ თქვენი საქმეებით, რომ ენდობით იეჰოვას.
მიენდეთ იეჰოვას, როცა გულგრილობასა და წინააღმდეგობას ხვდებით
7. როგორ იცდებოდა იერემიას რწმენა, და რატომ ეუფლებოდა მას დროდადრო გულგატეხილობა?
7 ბევრი ჩვენი ძმა ისეთ ტერიტორიაზე მსახურობს, სადაც მოთმინების გამოვლენა არც თუ ისე ადვილია. წინასწარმეტყველ იერემიას რთულ პირობებში უწევდა მსახურება — იუდას სამეფოს მშფოთვარე დღეები ედგა, რადგან მალე ღვთის რისხვა უნდა დასტყდომოდა თავს. იერემია გაბედულად უცხადებდა ხალხს ღვთის განაჩენს, რის გამოც ყოველდღიურად რწმენის არაერთ გამოცდას ხვდებოდა. იყო პერიოდი, როცა მის ერთგულ მწერალს, ბარუქს მსახურებაზე გული აუცრუვდა (იერ. 45:2, 3). იერემიასაც მასავით აუცრუვდა გული? დროდადრო იერემიასაც ეუფლებოდა გულგატეხილობა, რაც მისივე სიტყვებიდან გამოჩნდა: „დაწყევლილი იყოს ის დღე, როცა დავიბადე! . . რატომ გამოვედი საშვილოსნოდან, რომ მეხილა გარჯა და მწუხარება, და ჩემი დღეები სირცხვილში გამელია?“ (იერ. 20:14, 15, 18).
8, 9. იერემიას 17:7, 8-ის და ფსალმუნის 1:1—3-ის თანახმად, რა უნდა გავაკეთოთ, რომ არ შევწყვიტოთ კარგი ნაყოფის გამოღება?
8 მიუხედავად ამისა, იერემია დარდს არ შთაუნთქავს. ის კვლავ იეჰოვას ენდობოდა. ერთგულ წინასწარმეტყველ იერემიას საკუთარმა გამოცდილებამ დაანახვა, რომ იეჰოვა იმედს არ უმტყუნებს თავის ერთგულებს და ასრულებს თავის სიტყვას. ამას ადასტურებს იერემიას 17:7, 8-ში ჩაწერილი სიტყვები: „კურთხეულია კაცი, რომელიც იეჰოვაზე ამყარებს იმედს და ენდობა იეჰოვას. იქნება ის წყალთან დარგული ხესავით, წყლის ნაკადულთან რომ იდგამს ფესვს; არ იხილავს პაპანაქების დადგომას და ხშირი ფოთლებით შეიმოსება. არ შეწუხდება გვალვიან წელს და არც ნაყოფის გამოღებას შეწყვეტს“.
9 „წყლის ნაკადულებთან დარგული“ ნაყოფიერი ხის მსგავსად, იერემია არ წყვეტდა ნაყოფის გამოღებას. ის არასდროს ექცეოდა ბოროტი დამცინავების გავლენაში. იერემია არ სცილდებოდა მაცოცხლებელ „წყლის ნაკადულებს“ და ყოველთვის ყურად იღებდა იეჰოვას ნათქვამს (წაიკითხეთ ფსალმუნის 1:1—3; იერ. 20:9). მართლაც მისაბაძია იერემია, განსაკუთრებით მათთვის, რომლებიც მის მსგავსად რთულ ვითარებაში მსახურობენ! თუ თქვენც ასეთ გარემოში მსახურობთ, მიენდეთ იეჰოვას, რომელიც მოთმინების ძალას მოგცემთ, რომ კვლავაც სახალხოდ აღიაროთ მისი სახელი (ებრ. 13:15).
10. რა კურთხევები გვაქვს იეჰოვასგან და რა უნდა ვკითხოთ საკუთარ თავს?
10 იეჰოვას წყალობით სულიერ სამოთხეში ვცხოვრობთ, რაც ამ ბოლო დღეებში სირთულეებთან გამკლავების ძალას გვაძლევს. დღესდღეობით ჩვენთვის მთლიანი ბიბლიაა ხელმისაწვდომი, რომლის ზუსტი თარგმანი უფრო და უფრო მეტ ენაზე გამოიცემა. გარდა ამისა, გვაქვს უხვი სულიერი საზრდო, რომელსაც ღმერთი „ერთგული და გონიერი მონის“ მეშვეობით გვაძლევს. ჩვენ გვყავს უამრავი და-ძმა, რომელთა მხარდაჭერასაც განსაკუთრებით ვგრძნობთ ქრისტიანული კრების შეხვედრებსა თუ კონგრესებზე. სრულად სარგებლობთ ღვთის ამ ღონისძიებებით? ყველა, ვინც ასე იქცევა, სიხარულით შესძახებს მხიარული გულის გამო, ისინი კი, რომლებიც არ უსმენენ ღმერთს, აყვირდებიან გულისტკივილის გამო და იღრიალებენ სულგამწარებულნი! (ეს. 65:13, 14).
მიენდეთ ღმერთს, როცა ქვეყნიური საზრუნავით ხართ მოცული
11, 12. დღევანდელი დაძაბული მსოფლიო ვითარების ფონზე, სად შეგვიძლია ვიპოვოთ ჭეშმარიტი სიბრძნის წყარო?
11 როგორც ბიბლიაშია ნაწინასწარმეტყველები, ადამიანებს უფრო და უფრო მეტი უბედურება ატყდებათ თავს (მათ. 24:6—8; გამოცხ. 12:12). როდესაც წყალდიდობა ხდება, ყველა ცდილობს, რომ შემაღლებულ ადგილს მიაშუროს ან შენობის სახურავზე ავიდეს. მსგავსად ამისა, დღეს, როცა მსოფლიოში უარესდება მდგომარეობა, მილიონები იმედს ამყარებენ, ერთი შეხედვით, საიმედო კომერციულ, რელიგიურ თუ პოლიტიკურ ორგანიზაციებზე, ასევე მეცნიერულ და ტექნოლოგიურ მიღწევებზე. სინამდვილეში არც ერთი მათგანი არ იძლევა უსაფრთხოების გარანტიას (იერ. 17:5, 6). მაგრამ იეჰოვას მსახურების შემთხვევაში სრულიად სხვაგვარადაა საქმე — მათ საიმედო თავშესაფარი აქვთ, რადგან იეჰოვაა მათი კლდე მარადიულად (ეს. 26:4). ფსალმუნმომღერალმა თქვა: „ის [იეჰოვა] არის ჩემი კლდე, ჩემი ხსნა და ჩემი თავშესაფარი მაღლობზე“ (წაიკითხეთ ფსალმუნის 62:6—9 ). როგორ შეგვიძლია ჩვენს კლდეს, იეჰოვას, შევაფაროთ თავი?
12 ჩვენ მტკიცედ ვეჭიდებით იეჰოვას, როცა ყურად ვიღებთ მის სიტყვას, რომელიც ხშირად უპირისპირდება ადამიანურ სიბრძნეს (ფსალმ. 73:23, 24). მაგალითად, ზოგისგან, ვინც ადამიანური სიბრძნით საზრდოობს, შეიძლება ასეთი რამ მოისმინოთ: ამ ცხოვრებაში ერთხელ მოდიხარ და ამიტომ, ყველაფერი უნდა მოასწრო — მოიწყვე კარიერა; იშოვე ბევრი ფული; შეიძინე, რაც თვალს გაუხარდება; იმოგზაურე; სრულად დატკბი ქვეყნიური სიამეებით! ღვთიური სიბრძნე კი საპირისპიროს გვკარნახობს, რომ ვიყოთ „ქვეყნიერებით მოსარგებლენი — როგორც მისით არასრულად მოსარგებლენი, რადგან ცვალებადია ეს ქვეყნიერება“ (1 კორ. 7:31). იესოც მოგვიწოდებს, რომ სამეფოს ინტერესები პირველ ადგილზე დავაყენოთ და ამგვარად მოვაგროვოთ „განძი ზეცაში“, რომელსაც ვერავინ წაგვართმევს (მათ. 6:19, 20).
13. თუ 1 იოანეს 2:15—17-ში ჩაწერილ სიტყვებს მივიღებთ მხედველობაში, რაზე უნდა დავფიქრდეთ?
13 აჩვენებს თქვენი დამოკიდებულება ქვეყნიერებისა და იმის მიმართ, რაც ქვეყნიერებაშია, რომ ბოლომდე ენდობით ღმერთს? (1 იოან. 2:15—17). სულიერ საქმიანობაში მონაწილეობა უფრო მეტ სიამოვნებას განიჭებთ თუ ქვეყნიური სიამეებით ტკბობა? (ფილ. 3:8). ცდილობთ, გქონდეთ „სუფთა თვალი“? (მათ. 6:22). რასაკვირველია, ღმერთს არ სურს, რომ დაუფიქრებლად მოვიქცეთ ან უპასუხისმგებლოდ მოვეკიდოთ საქმეს განსაკუთრებით მაშინ, თუ ოჯახზე ზრუნვა გვიწევს (1 ტიმ. 5:8). მაგრამ იეჰოვა მოელის თავისი მსახურებისგან, რომ ბოლომდე მიენდონ მას და არა სატანის ქვეყნიერებას, რომელიც სულს ღაფავს (ებრ. 13:5).
14—16. რას გრძნობენ ისინი, ვისაც „სუფთა თვალი“ აქვს და სამეფოს ინტერესებს პირველ ადგილზე აყენებს?
14 განვიხილოთ რიჩარდისა და რუთის მაგალითი, რომელთაც სამი შვილი ჰყავთ. რიჩარდი ამბობს: „შინაგანად ვგრძნობდი, რომ ბოლომდე არ ვიხარჯებოდი იეჰოვასთვის. კეთილმოწყობილი ცხოვრება მქონდა, მაგრამ ვხედავდი, რომ ღმერთს მხოლოდ მონარჩენს ვაძლევდი. მე და რუთი ამის თაობაზე ვლოცულობდით. ჩვენ გამოვთვალეთ ხარჯები, რის შემდეგაც გადავწყვიტე, უფროსისთვის მეთქვა, რომ კვირაში მხოლოდ ოთხი დღე ვიმუშავებდი მიუხედავად იმისა, რომ ქვეყანაში ეკონომიკური კრიზისი მძვინვარებდა. უფროსმა ჩემი თხოვნა დააკმაყოფილა და ერთ თვეში ახალი სამუშაო განრიგით დავიწყე მუშაობა“. როგორ გრძნობს ახლა რიჩარდი თავს?
15 იგი გვიზიარებს: „დღეს ყოველთვიურად 20 პროცენტით ნაკლებს გამოვიმუშავებ. სამაგიეროდ, წელიწადში კიდევ 50 დღე გამომითავისუფლდა მეუღლისა და შვილებისთვის. ორჯერ მეტ დროს ვუთმობ მსახურებას, მაქვს სამჯერ მეტი ბიბლიის შესწავლა და კრებასაც შემიძლია ვუხელმძღვანელო. რამდენადაც უფრო მეტი დრო მრჩება შვილებისთვის, რუთს შეუძლია დროდადრო დამხმარე პიონერად იმსახუროს. გადაწყვეტილი მაქვს, რომ რაც შეიძლება დიდხანს ვიმუშაო ამ განრიგით“.
16 როიმ და პეტინამაც, რომლებსაც საკუთარ ქალიშვილზეც უწევთ ზრუნვა, შეამცირეს სამუშაო საათები, რათა სრული დროით მსახურება დაეწყოთ. როი ამბობს: „მე კვირაში სამი დღე ვმუშაობ, პეტინა კი — ორი დღე. ჩვენ კერძო სახლიდან ბინაში გადავედით, რომელზე ზრუნვაც გაცილებით ადვილია. სანამ ჩვენი ვაჟი და ქალიშვილი შეგვეძინებოდა, სრული დროით ვმსახურობდით. ჩვენ არასდროს დაგვიკარგავს პიონერული სული. ამიტომ, როცა შვილები გაიზარდნენ, გადავწყვიტეთ, ისევ დაგვეწყო სრული დროით მსახურება. ვერანაირი სიმდიდრე ვერ განგვაცდევინებს იმ სიხარულს, რაც ღვთის მსახურებას მოაქვს ჩვენთვის“.
„ღვთის მშვიდობამ“ დაიცვას თქვენი გული
17. პირადად შენ, როგორ განუგეშებს ბიბლია, თუ გავითვალისწინებთ იმას, რომ არავინ ვიცით, რა გველის ხვალ?
17 არც ერთმა ჩვენგანმა არ იცის, რა მოხდება ხვალ, რადგან „დრო და შემთხვევა მოქმედებს“ ყველა ჩვენგანზე (ეკლ. 9:11). მაგრამ ხვალინდელ დღეზე ფიქრმა არ უნდა წაგვართვას სულის სიმშვიდე, როგორც ეს ხშირად მათ შემთხვევაში ხდება, ვისაც ახლო ურთიერთობა არა აქვს იეჰოვასთან და, შესაბამისად, თავსაც ვერ გრძნობს უსაფრთხოდ (მათ. 6:34). პავლე მოციქულმა დაწერა: „ნურაფერზე დაიწყებთ წუხილს, არამედ ლოცვით, ვედრებითა და მადლიერებით აცნობეთ ყველა თქვენი სათხოვარი ღმერთს და ღვთის მშვიდობა, რომელიც ნებისმიერ აზრს აღემატება, დაიცავს თქვენს გულებსა და გონებას“ (ფილ. 4:6, 7).
18, 19. როგორ გვანუგეშებს ღმერთი? მოიყვანეთ მაგალითი.
18 ბევრმა და-ძმამ გამოუვალ ვითარებაშიც იგრძნო სულის სიმშვიდე და ღვთის მშვიდობა. ერთი და ამბობს: «ქირურგმა არაერთხელ სცადა ჩემი დაშინება, რომ სისხლს თუ არ გადავისხამდი, ოპერაცია სავალალო შედეგით დასრულდებოდა. მან შემოსვლისთანავე ჩემ გასაგონად თქვა: „რა სისულელეა სისხლის გადასხმაზე უარის თქმა?!“ გულში ვლოცულობდი და იეჰოვას ვთხოვდი დახმარებას, რის შემდეგაც ენით აუწერელი სიმშვიდე დამეუფლა და კლდესავით შეუვალი გავხდი. ჩემი სისხლის ანალიზი აჩვენებდა, რომ ძალიან დაბალი ჰემოგლობინი მქონდა. მიუხედავად ამისა, საკუთარი პოზიციის დასაცავად ბიბლიის საფუძველზე შევძელი დამაჯერებელი არგუმენტების მოყვანა».
19 დროდადრო ღმერთი თანამორწმუნეების ან დროული სულიერი საზრდოს საშუალებით გვანუგეშებს. ალბათ, არაერთხელ უთქვამს ძმას ან დას: „ეს სტატია ჩემთვის წამალივითაა. თითქოს, ჩემთვის დაიწერა!“ რა ვითარებაშიც არ უნდა აღმოვჩნდეთ და რაც არ უნდა დაგვჭირდეს, იეჰოვა სიყვარულით იზრუნებს ჩვენზე, თუ მივენდობით მას. ჩვენ ხომ მისი „ცხვარი“ ვართ, რომლებიც მისი სახელით ვიწოდებით (ფსალმ. 100:3; იოან. 10:16; საქ. 15:14, 17).
20. რატომ იქნებიან იეჰოვას მსახურები უსაფრთხოდ, როცა სატანის ქვეყნიერებას ღვთის რისხვა დაატყდება თავს?
20 „იეჰოვას მრისხანების დღე“ გვიახლოვდება, ამიტომ, ყველაფერი, რაზეც სატანის ქვეყნიერებაში იმედს ამყარებენ, შეიმუსრება. ვერც ოქრო-ვერცხლი და ვერც სხვა ძვირფასეულობა ვერ იხსნის ხალხს იმ დღეს (სოფ. 1:18; იგავ. 11:4). მაშინ ერთადერთი საიმედო თავშესაფარი იქნება იეჰოვა, რომელიც ჩვენი „კლდეა მარადიულად“ (ეს. 26:4). ბოლომდე მივენდოთ იეჰოვას და მორჩილად ვიაროთ მისი სამართლიანი გზებით, გავაცხადოთ სამეფოს შესახებ ცნობა გულგრილობისა თუ წინააღმდეგობის მიუხედავად და ჩვენი საწუხარი მას მივანდოთ. თუ ასე მოვიქცევით, უსაფრთხოდ ვიცხოვრებთ და უბედურების შიში არ შეგვაწუხებს (იგავ. 1:33).
[სქოლიო]
შეგიძლიათ ახსნათ?
როგორ შეგვიძლია მივენდოთ იეჰოვას . . .
• როდესაც ცდუნების წინაშე ვდგავართ?
• როცა გულგრილობასა და წინააღმდეგობას ვხვდებით?
• როცა ქვეყნიური საზრუნავით ვართ მოცული?
[სურათი 13 გვერდზე]
ღვთის ზნეობრივი ნორმების დაცვას ბედნიერება მოაქვს
[სურათი 15 გვერდზე]
„იეჰოვაა კლდე მარადიულად!“