თავი მეოთხე

იეჰოვას სახლი აღზევებულია

ესაია 2:1—5

1, 2. რა სიტყვებს ვკითხულობთ „ესაიას კედელზე“ და საიდან არის აღებული ეს ციტატა?

„მახვილებისგან სახნისებს გამოჭედავენ და შუბებისგან — ნამგლებს, ერი ერზე აღარ აღმართავს მახვილს და აღარავინ ისწავლის ომს“. ამ სიტყვებს ნიუ-იორკში გაეროს მოედანზე, „ესაიას კედელზე“, ვკითხულობთ. წლების მანძილზე არ ჩანდა, საიდან იყო აღებული ეს ციტატა. რამდენადაც გაერო მსოფლიო მშვიდობის დამყარებას ისახავს მიზნად, შეიძლებოდა ვინმეს ეფიქრა, რომ ის 1945 წელს გაეროს დამაარსებლებს ეკუთვნოდა.

² მოგვიანებით, 1975 წელს, წარწერის ქვეშ ესაიას სახელი გამოჩნდა, რამაც ნათელი გახადა, რომ ეს არ იყო თანამედროვე ადამიანის მიერ წარმოთქმული სიტყვები. ისინი 2700 წელზე მეტი ხნის წინათ დაწერილი წინასწარმეტყველების ნაწილია, რომელსაც დღეს ესაიას წიგნის მეორე თავში ვკითხულობთ. ათასწლეულების მანძილზე მშვიდობისმოყვარეთ აინტერესებდათ, როგორ და როდის მოხდებოდა ესაიას მიერ ნაწინასწარმეტყველები მოვლენები. ახლა კი ამ კითხვებზე პასუხი გაცემულია. დღეს ჩვენი თვალით შეგვიძლია დავინახოთ, რა დიდებულად სრულდება ეს უძველესი წინასწარმეტყველება.

3. ვინ არიან ერები, რომლებიც მახვილებისგან სახნისებს ჭედავენ?

³ ვინ არიან ეს ერები, რომლებიც მახვილებისგან სახნისებს ჭედავენ? ცხადია, ისინი არ არიან თანამედროვე სახელმწიფოები და მათი მთავრობები. ეს სახელმწიფოები დღემდე მახვილებს აკეთებენ ანუ იარაღს აწარმოებენ, როგორც საომრად, ისე ძალის გამოყენებით „მშვიდობის“ შესანარჩუნებლად. მათზე ის უფრო შეიძლება ითქვას, რომ სახნისებისგან ყოველთვის მახვილებს ჭედავდნენ! ესაიას წინასწარმეტყველება სრულდება ყველა ერის წარმომადგენლებზე — ხალხზე, რომელიც იეჰოვას, „მშვიდობის ღმერთს“, სცემს თაყვანს (ფილიპელთა 4:9).

ერები ჭეშმარიტი თაყვანისმცემლობისკენ მიედინებიან

4, 5. რა არის ნაწინასწარმეტყველები ესაიას მე-2 თავის პირველ მუხლებში და როგორ არის დადასტურებული ამ სიტყვების უტყუარობა?

⁴ ესაიას მე-2 თავი შემდეგი სიტყვებით იწყება: «სიტყვა, რომელიც იხილა ესაიამ, ამოცის ძემ, იუდაზე და იერუსალიმზე. უკანასკნელ დღეებში იქნება, რომ უფლის სახლის მთა მთათა სათავეში დადგინდება, აღიმართება მწვერვალებზე [„გორაკებზე“, აქ] მაღლა და ყოველი ერი მისკენ დაიწყებს დენას» (ესაია 2:1, 2).

⁵ აღსანიშნავია, რომ ეს წინასწარმეტყველება უბრალო ვარაუდი არ არის. ესაია ღვთის შთაგონებით წერს და ამბობს, რომ ყველაფერი, უეჭველად, ასე „იქნება“. იეჰოვას განზრახვები ყოველთვის სრულდება (ესაია 55:11). როგორც ჩანს, თავისი დანაპირების უტყუარობის დასადასტურებლად ღმერთმა ესაიას თანამედროვე წინასწარმეტყველი მიქა აღძრა, რომ მასაც ჩაეწერა თავის წიგნში იგივე წინასწარმეტყველური სიტყვები, რომლებსაც ესაიას 2:2—4-ში ვკითხულობთ (მიქა 4:1—3).

6. როდის უნდა შესრულებულიყო ესაიას წინასწარმეტყველება?

⁶ როდის უნდა შესრულებულიყო ესაიას წინასწარმეტყველება? „უკანასკნელ დღეებში“. ქრისტიანულ-ბერძნულ წერილებში ნაწინასწარმეტყველებია ის თავისებურებანი, რომლებითაც ამ პერიოდის ამოცნობა შეიძლება. ესენია ომები, მიწისძვრები, ეპიდემიები, შიმშილობა და „საზარელი ჟამი“ (2 ტიმოთე 3:1—5; ლუკა 21:10, 11)a. ამ წინასწარმეტყველებათა შესრულება საკმარისად ამტკიცებს, რომ „უკანასკნელ დღეებში“, ამ სისტემის უკანასკნელ ჟამს, ვცხოვრობთ. ამგვარად, შეგვიძლია მოველოდეთ, რომ ჩვენს დროში შესრულდება და საკუთარი თვალით ვიხილავთ ყოველივე იმას, რაც ესაიამ იწინასწარმეტყველა.

უფლის მთა — თაყვანისცემის ადგილი

7. რა წინასწარმეტყველურ სურათს წარმოგვიდგენს ესაია?

⁷ ესაია რამდენიმე სიტყვით შესანიშნავ წინასწარმეტყველურ სურათს წარმოგვიდგენს. თვალწინ იშლება მაღალი მთა და მის მწვერვალზე აღმართული დიდებული სახლი, იეჰოვას ტაძარი. ეს მთა ზემოდან გადაჰყურებს მაღალ მთა-გორებს. მიუხედავად ამისა, ის თავზარდამცემი და შემაძრწუნებელი კი არ არის — მიმზიდველია. ყველა ერში არიან უფლის სახლის მთაზე ასვლის მსურველები და ისინი მიედინებიან კიდეც მისკენ. ამის წარმოდგენა რთული არ არის, მაგრამ რას ნიშნავს ეს ყოველივე?

8. ა) რასთან იყო დაკავშირებული მთა-გორები ესაიას დღეებში? ბ) რა არის წარმოდგენილი „უფლის სახლის მთისკენ“ ერების დენით?

⁸ ესაიას დღეებში მთა-გორები ყოველთვის თაყვანისმცემლობასთან იყო დაკავშირებული. მაგალითად, კერპთაყვანისმცემლები იქ რელიგიურ რიტუალებს ასრულებდნენ და მსხვერპლს სწირავდნენ თავიანთ ცრუ ღმერთებს (მეორე რჯული 12:2; იერემია 3:6). მაგრამ მორიას მთის თხემს იერუსალიმში იეჰოვას სახლი ანუ ტაძარი ამშვენებდა. ღვთის ერთგული ისრაელები წელიწადში სამჯერ მიემგზავრებოდნენ იერუსალიმს და ადიოდნენ მორიას მთაზე, რომ ჭეშმარიტი ღვთისთვის ეცათ თაყვანი (მეორე რჯული 16:16). აქედან გამომდინარე, „უფლის სახლის მთისკენ“ ერების დენით ჭეშმარიტ თაყვანისმცემლობაში უამრავი ხალხის გაერთიანებაა წარმოდგენილი.

9. რა არის წარმოდგენილი „უფლის სახლის მთით“?

⁹ დღეს, რა თქმა უნდა, ღვთის ხალხი პირდაპირი გაგებით მთაზე აგებულ ქვის ტაძარში არ იკრიბება. იეჰოვას ტაძარი იერუსალიმში ახ. წ. 70 წელს რომაელთა ჯარებმა მიწასთან გაასწორეს. გარდა ამისა, მოციქულმა პავლემ ნათლად დაგვანახვა, რომ იერუსალიმის ტაძარსა და მანამდე არსებულ კარავს წინასწარმეტყველური მნიშვნელობა ჰქონდა. ისინი ასახავდნენ უფრო დიდებულ, მომავლის სულიერ „ჭეშმარიტ კარავს, რომელიც უფალმა ააშენა და არა ადამიანმა“ (ებრაელთა 8:2). ეს სულიერი კარავი იესო ქრისტეს მსხვერპლის საფუძველზე იეჰოვას თაყვანისმცემლობაში გაერთიანების საშუალებაა (ებრაელთა 9:2—10, 23). აქედან გამომდინარე, ესაიას 2:2-ში მოხსენიებული „უფლის სახლის მთა“ ჩვენს დროში განდიდებულ წმინდა თაყვანისმცემლობას წარმოადგენს. წმინდა თაყვანისმცემლობის მიმდევარნი რომელიმე კონკრეტულ ტერიტორიაზე არ იკრიბებიან, მათი შეკრება თაყვანისმცემლობაში გაერთიანებით ხდება.

წმინდა თაყვანისმცემლობის აღზევება

10, 11. როგორ იქნა აღზევებული იეჰოვას თაყვანისმცემლობა ჩვენს დროში?

¹⁰ წინასწარმეტყველების თანახმად, ‘უფლის სახლის მთა მთათა სათავეში დადგინდებოდა და მწვერვალებზე მაღლა აღიმართებოდა’. ესაიას მოღვაწეობის პერიოდამდე დიდი ხნით ადრე მეფე დავითმა აღთქმის კიდობანი სიონის მთაზე აიტანა იერუსალიმში, რომელიც ზღვის დონიდან 760 მეტრის სიმაღლეზე მდებარეობდა. კიდობანი იქ ინახებოდა, ვიდრე მორიას მთაზე ტაძრის მშენებლობა საბოლოოდ დასრულდებოდა (მეორე მეფეთა 5:7; 6:14—19; მეორე ნეშტთა 3:1; 5:1—10). ამგვარად, ესაიას დროს კიდობანი უკვე აღზევებული იყო, ანუ ტაძარში იყო დასვენებული, ბევრ იმ გორაკზე მაღლა, რომლებზეც ხალხი ცრურელიგიურ რიტუალებს ასრულებდა.

¹¹ რა თქმა უნდა, იეჰოვას თაყვანისმცემლობა სულიერი გაგებით ყოველთვის ცრუთაყვანისმცემლობაზე მაღლა იდგა. ჩვენს დროში კი იეჰოვამ ცამდე აღამაღლა და განადიდა წმინდა თაყვანისმცემლობა და ყოველგვარ უწმინდურ თაყვანისმცემლობაზე, „გორაკებსა“ და „მთებზე“, გაცილებით მაღლა დააყენა. როგორ? ძირითადად მათი შეკრებით, ვისაც „სულითა და ჭეშმარიტებით“ მისი თაყვანისცემა სურს (იოანე 4:23).

12. ვინ არიან „სასუფევლის ძენი“ და როგორ მოხდა მათი შეკრება?

¹² იესო ქრისტემ „წუთისოფლის აღსასრული“ მკის დროდ მოიხსენია, როდესაც ანგელოზებს „სასუფევლის ძენი“ ანუ ქრისტეს მომავალი თანამეფეები და ზეციური დიდების თანაზიარნი უნდა შეეკრიბათ (მათე 13:36—43). 1919 წლიდან ამ ძეთაგან ‘დარჩენილები’ იეჰოვას ნებით ანგელოზებთან ერთად მონაწილეობენ მკაში (გამოცხადება 12:17). ამგვარად, პირველად „სასუფევლის ძენი“ ანუ იესოს ცხებული ძმები იკრიბებიან, რომლებიც მონაწილეობას იღებენ შემდგომ შეკრებაში.

13. როგორ აკურთხა იეჰოვამ ცხებულები?

¹³ მკის პერიოდში იეჰოვა ეხმარება ცხებულებს ღვთის სიტყვის, ბიბლიის, თანდათანობით გაგებასა და პრაქტიკულად გამოყენებაში. ესეც ხელს უწყობს წმინდა თაყვანისმცემლობის აღზევებას. მიუხედავად იმისა, რომ ‘წყვდიადი ფარავს ქვეყანას და ბნელი — ხალხებს’, იეჰოვას მიერ განწმენდილი ცხებულები ‘მნათობებივით ანათებენ’ კაცობრიობაში (ესაია 60:2; ფილიპელთა 2:15). „მისი ნების შეცნობით, ყოველნაირი სიბრძნითა და სულიერი გონებით“ სულითცხებულები ‘მზესავით ბრწყინავენ თავიანთი მამის სასუფეველში’ (კოლასელთა 1:9; მათე 13:43).

14, 15. ვისი შეკრება ხდება „სასუფევლის ძეთა“ გარდა და როგორ იწინასწარმეტყველა ეს ანგიამ?

¹⁴ მათ გარდა სხვებმაც დაიწყეს დენა „უფლის სახლის მთისკენ“. ამ ხალხს, რომელსაც იესომ „სხვა ცხვრები“ უწოდა, დედამიწაზე სამოთხეში მარადიული ცხოვრების იმედი აქვს (იოანე 10:16; გამოცხადება 21:3, 4). 30-იან წლებში ასეთი ადამიანები ათასობით გამოჩნდნენ, შემდეგ ასობით ათასი გახდნენ, ხოლო დღეს მათმა რიცხვმა მილიონებს მიაღწია! მოციქულ იოანეს ხილვაში ისინი აღწერილი არიან, როგორც „უამრავი ხალხი, რომლის დათვლა არავის შეეძლო, ყოველი ერიდან და ტომიდან, ხალხებიდან და ენებიდან“ (გამოცხადება 7:9).

¹⁵ ანგიას ნაწინასწარმეტყველები ჰქონდა ამ უამრავი ხალხის გამოჩენა. ის წერდა: «ასე ამბობს ცაბაოთ უფალი: კიდევ ცოტაც და შევარყევ ცას და მიწას, ზღვასა და ხმელეთს. შევარყევ ყველა ხალხს, და ასრულდება ყოველი ხალხის საწადელი [„უნდა შემოვიდნენ ყოველი ერიდან სასურველნი“, აქ (ისინი, რომლებიც წმინდა თაყვანისმცემლობაში ცხებულებს შეუერთდებიან)]; დიდებით ავავსებ ამ სახლს, ამბობს ცაბაოთ უფალი» (ანგია 2:6, 7). რიცხობრივად ამ ჯერ კიდევ მზარდი „უამრავი ხალხისა“ და მათი ცხებული თანამსახურების არსებობა იეჰოვას სახლში წმინდა თაყვანისმცემლობას განადიდებს. არასდროს ყოფილა ჭეშმარიტი ღვთისადმი თაყვანისცემაში ამდენი ხალხი გაერთიანებული, რამდენიც დღეს. ეს კი განადიდებს იეჰოვასა და ღვთის სამეფოს ცხებულ მეფეს, იესო ქრისტეს. როგორც მეფე სოლომონი წერდა, „ერის სიმრავლე მეფის დიდებაა“ (იგავნი 14:28).

ადამიანთა ცხოვრებით ამაღლებული თაყვანისმცემლობა

16—18. ზოგმა რა ცვლილებები მოახდინა ცხოვრებაში, რათა იეჰოვასთვის სათანადოდ ეცათ თაყვანი?

¹⁶ მხოლოდ იეჰოვას დამსახურებაა ჩვენს დროში ჭეშმარიტი თაყვანისმცემლობის ამაღლება, მაგრამ ამაში მის მსახურებსაც შეუძლიათ წვლილის შეტანა. როგორც მთაზე ასვლას სჭირდება ძალისხმევა, ისე ღვთის სამართლიანი ნორმების სწავლა და მათთან შეთანხმებულად ცხოვრება მოითხოვს მონდომებას. პირველ საუკუნეში მცხოვრები ქრისტიანების მსგავსად, ღვთის მსახურებმა დღესაც მიატოვეს ისეთი ცხოვრების წესი და საქმეები, რომლებიც შეუფერებელია ჭეშმარიტი თაყვანისმცემლობისთვის. მეძავნი, კერპთაყვანისმცემელნი, მრუშნი, მპარავნი, ხარბნი, ლოთნი და სხვა არასწორი საქმეების ჩამდენნი, რომლებმაც ახალი ცხოვრება დაიწყეს, დღეს ‘განბანილნი’ არიან ღვთის თვალში (1 კორინთელთა 6:9—11).

¹⁷ მრავალმა შეიცვალა ცხოვრება იმ ახალგაზრდა ქალის მსგავსად, რომელიც წერს: „მომავლის იმედი არ გამაჩნდა. უზნეობა და ლოთობა ჩემი ცხოვრების განუყოფელი ნაწილი იყო; ვენერულ დაავადებებსაც ვერსად გავექეცი; ნარკოტიკებით ვვაჭრობდი; ჩემთვის ცხოვრებაში ყველაფერი სულ ერთი იყო“. ბიბლიის შესწავლის შემდეგ ის ძირეულად ცვლიდა თავის ცხოვრებას, რათა ღვთის ნორმების შესაბამისად მოქცეულიყო. ახლა ის ამბობს: „დღეს უდიდეს სულიერ სიმშვიდეს განვიცდი და საკუთარი ღირსების გრძნობაც გამიჩნდა, იმედით ვუყურებ მომავალს, გავიგე, რა არის ნამდვილი ოჯახი და, რაც ყველაზე მთავარია, ჩვენს მამა იეჰოვასთან ურთიერთობით ვხარობ“.

¹⁸ იეჰოვას კეთილგანწყობილების მოპოვების შემდეგაც უნდა განვაგრძოთ წმინდა თაყვანისმცემლობის განდიდება ცხოვრებაში მისი პირველ ადგილზე დაყენებით. იეჰოვამ ესაიას მეშვეობით ათასწლეულებით ადრე იწინასწარმეტყველა, რომ ჩვენს დროში უამრავი ადამიანი მიანიჭებდა მის თაყვანისმცემლობას ცხოვრებაში ყველაზე დიდ მნიშვნელობას. ხართ თქვენც მათ შორის?

ხალხი, რომელმაც ისწავლა იეჰოვას გზები

19, 20. რას და სად სწავლობს ღვთის ხალხი?

¹⁹ ესაია განაგრძობს წინასწარმეტყველებას ჩვენი დროის ჭეშმარიტი თაყვანისმცემლების შესახებ: «დაიძრება უთვალავი ხალხი და იტყვის: მოდი, ავიდეთ უფლის მთაზე, იაკობის [„იაკობის ღვთის“, აქ] სახლში; გვასწავლოს თავისი გზები და მისი ბილიკებით ვიაროთ, რადგან რჯული სიონიდან გამოვა და უფლის სიტყვა — იერუსალიმიდან» (ესაია 2:3).

²⁰ იეჰოვას ხალხი დაკარგული ცხვარივით გზააბნეული არ დადის. ბიბლიისა და ბიბლიაზე დაფუძნებული ლიტერატურის საშუალებით იეჰოვა თავის „რჯულსა“ და „სიტყვას“ აწვდის მათ და ისინიც სწავლობენ მის გზებს. ეს ცოდნა მათ „მისი ბილიკებით“ სიარულში ეხმარება. ღვთის ხალხს მადლიერების გრძნობა აღძრავს, და ღმერთიც ამასვე მოუწოდებს მათ, რომ ერთმანეთს იეჰოვას გზების შესახებ ესაუბრონ. ისინი დიდ კონგრესებზე ან პატარ-პატარა ჯგუფებად სამეფო დარბაზებსა თუ სახლებში იკრიბებიან, რათა გაიგონ და ისწავლონ ღვთის გზები (მეორე რჯული 31:12, 13). ამით ადრინდელ ქრისტიანებს ბაძავენ, რომლებიც ერთად იკრიბებოდნენ ერთმანეთის გასამხნევებლად და „სიყვარულისა და კეთილი საქმეებისათვის“ წასახალისებლად (ებრაელთა 10:24, 25).

21. რა დავალებას ასრულებენ იეჰოვას მსახურები?

²¹ ისინი სხვებსაც იწვევენ ‘მთაზე ასასვლელად’, ანუ გზას უჩვენებენ იეჰოვას განდიდებული თაყვანისმცემლობისკენ, რითაც ზუსტად ასრულებენ ზეცად ამაღლებამდე იესოს მიერ მოწაფეებისთვის მიცემულ დავალებას: „წადით და მოიმოწაფეთ ყველა ხალხი, მონათლეთ ისინი მამისა და ძისა და სულიწმიდის სახელით. ასწავლეთ მათ ყოველივეს დაცვა, რაც მე გამცნეთ“ (მათე 28:19, 20). ღვთის შეწევნით იეჰოვას მოწმეები მორჩილად ასრულებენ ამ მოწოდებას — მთელ მსოფლიოში იმოწაფებენ ხალხს, ასწავლიან ღვთის სიტყვას და ნათლავენ.

მახვილებისგან სახნისები

22, 23. რა არის ნაწინასწარმეტყველები ესაიას 2:4-ში და რა თქვა ამის შესახებ გაეროს ერთმა ოფიციალურმა პირმა?

²² ახლა კი მივედით იმ მუხლამდე, რომლის ნაწყვეტსაც გაეროს მოედანზე, „ესაიას კედელზე“, ვკითხულობთ. ესაია წერს: «სამართალს განიკითხავს იგი ერებს შორის და ამხილებს უთვალავ ხალხს [„ყველაფერს მოაგვარებს უთვალავ ხალხს შორის“ აქ]; მახვილებისგან სახნისებს გამოჭედავენ და შუბებისგან — ნამგლებს, ერი ერზე აღარ აღმართავს მახვილს და აღარავინ ისწავლის ომს» (ესაია 2:4).

²³ ზემოხსენებულის ხორცშესხმა ნამდვილად დიდი მიღწევა იქნებოდა. გაეროს განათლების, მეცნიერებისა და კულტურის საკითხთა ორგანიზაციის გენერალურმა დირექტორმა, ფედერიკო მაიორმა, შემდეგი აზრი გამოთქვა: „ომის ვერავითარი საშინელება, რომელიც საკმაოდ კარგად დავინახეთ [მასობრივი ინფორმაციის საშუალებების წყალობით], როგორც ჩანს, ვერ აჩერებს მრავალი საუკუნის წინათ ამოქმედებულ ომის უზარმაზარ მანქანას. დღევანდელი თაობების წინაშე თითქმის გადაუჭრელი ბიბლიური ამოცანა დგას — ‘მახვილებისგან სახნისები გამოჭედონ’ და ომისკენ სწრაფვა, რომელიც უხსოვარი დროიდან განუვითარდა ადამიანს, მშვიდობის სიყვარულით შეცვალონ. ეს იქნებოდა ყველაზე კეთილშობილური საქმე, რის გაკეთებაც კი კაცობრიობას შეუძლია, და ყველაზე დიდი დანატოვარი ჩვენი შთამომავლობისთვის“.

24, 25. ვინ და როგორ ასრულებს ესაიას სიტყვებს?

²⁴ ერები, მთლიანობაში, ვერასდროს მიაღწევენ ამ ამაღლებულ მიზანს. ეს, უბრალოდ, მათ შესაძლებლობას აღემატება. ესაიას სიტყვებს ასრულებენ სხვადასხვა ერის წარმომადგენლები, რომლებიც წმინდა თაყვანისმცემლობაში არიან გაერთიანებული. იეჰოვამ ‘ყველაფერი მოაგვარა მათ შორის’. მან თავის ხალხს ერთმანეთთან მშვიდობიანი ცხოვრება ასწავლა. ამ დაყოფილ, დაუსრულებელი ომების წუთისოფელში მათზე შეიძლება ითქვას, რომ ‘მახვილებისგან სახნისები გამოჭედეს და შუბებისგან — ნამგლები’. როგორ?

²⁵ უპირველესად, აღსანიშნავია ის, რომ ისინი არ მონაწილეობენ ერებს შორის ომებში. იესოს სიკვდილამდე ცოტა ხნით ადრე შეიარაღებული ხალხი მივიდა მის შესაპყრობად. როდესაც პეტრემ მახვილი იშიშვლა თავისი მოძღვრის დასაცავად, იესომ უთხრა მას: „თავის ადგილას ჩააბრუნე ეგ მახვილი, ვინაიდან ყველა მახვილის ამღები მახვილითვე დაიღუპება“ (მათე 26:52). მას შემდეგ იესოს მიმდევრები მახვილებისაგან სახნისებს ჭედავენ, ხელში არ იღებენ იარაღს ადამიანის მოსაკლავად და მხარს არ უჭერენ ომებს. ისინი ‘ცდილობენ, მშვიდობა იქონიონ ყველასთან’ (ებრაელთა 12:14).

მშვიდობისკენ სწრაფვა

26, 27. როგორ ‘ეძიებს მშვიდობას და ისწრაფვის მისკენ’ ღვთის ხალხი? მოიყვანეთ მაგალითი.

²⁶ ღვთის ხალხის მშვიდობა მხოლოდ ომებში მონაწილეობაზე უარის თქმით არ შემოიფარგლება. მიუხედავად იმისა, რომ იეჰოვას მოწმეებს, რომლებიც 230-ზე მეტ ქვეყანაში ცხოვრობენ, ერთმანეთისგან სრულიად განსხვავებული მრავალი ენა და კულტურა აქვთ, მათ შორის მშვიდობა მეფობს. ჩვენს დროში მათზე სრულდება პირველ საუკუნეში იესოს მიერ თავისი მოწაფეებისთვის ნათქვამი სიტყვები: „ჩემი მოწაფეები რომ ხართ, იმით გაიგებენ ყველანი, თუ სიყვარული გექნებათ ურთიერთს შორის“ (იოანე 13:35). ქრისტიანები დღეს „მშვიდობის მყოფელნი“ არიან (მათე 5:9). ისინი ‘ეძიებენ მშვიდობას და მისკენ ისწრაფვიან’ (1 პეტრე 3:11). მათი მხარდამჭერი „მშვიდობის ღმერთი“ იეჰოვაა (რომაელთა 15:33).

²⁷ მრავალი საოცარი მაგალითი არსებობს იმისა, თუ როგორ გახდნენ ადამიანები მშვიდობისმყოფელნი. ერთი ახალგაზრდა მამაკაცი თავისი წარსულის შესახებ წერს: „მძიმე ბავშვობამ თავდაცვა მასწავლა, გამაუხეშა და ცხოვრებაზე გამანაწყენა. დიდ ჩხუბისთავად ვიქეცი. ყოველდღე ვჩხუბობდი მეზობელ ბავშვებთან, ხან მუშტებით, ხანაც ქვებითა და ბოთლებით. საშინლად აგრესიულ პიროვნებად ჩამოვყალიბდი“. ეს ახალგაზრდა გამოეხმაურა მოწოდებას, ‘ასულიყო უფლის მთაზე’, ისწავლა ღვთის გზები და ბოლოს ღვთის მშვიდობიანი მსახური გახდა.

28. როგორ ისწრაფიან მშვიდობისკენ ქრისტიანები?

²⁸ იეჰოვას მსახურთა უმრავლესობა წარსულში არ ყოფილა ასეთი აგრესიული. ისინი ცდილობენ, თუნდაც უბრალო მოქმედებით — თავაზიანობით, პატიებითა და თანაგრძნობით — მშვიდობა შეინარჩუნონ სხვებთან. არასრულყოფილების მიუხედავად, ისწრაფვიან იმისკენ, რომ მიჰყვნენ ბიბლიურ რჩევას: ‘შეიწყნარონ ერთიმეორე და მიუტევონ ერთმანეთს, თუ ვინმესთან რაიმე სადავო აქვს ვინმეს’ (კოლასელთა 3:13).

მშვიდობიანი მომავალი

29, 30. რა მომავალი ელის დედამიწას?

²⁹ იეჰოვამ ამ „უკანასკნელ დღეებში“ საოცარი რამ მოიმოქმედა. მან ყველა ერიდან შეკრიბა ხალხი, რომელსაც მის სამსახურში ყოფნა სურს და მათ თავისი გზებით, მშვიდობის გზებით, სიარული ასწავლა. ეს ხალხი მოახლოებულ „დიდ გასაჭირს“ გადაიტანს და მშვიდობიან ახალ ქვეყნიერებას დაიმკვიდრებს, სადაც არასდროს იქნება ომი (გამოცხადება 7:14).

³⁰ მახვილი ანუ იარაღი აღარასოდეს იარსებებს. ფსალმუნმომღერალი წერდა ამ დროზე: «მოდით, იხილეთ საქმენი უფლისანი, როგორ გააპარტახა დედამიწა [„რა საოცრებანი მოახდინა დედამიწაზე“, აქ]. შეწყვეტს ომებს დედამიწის კიდით-კიდემდე, მშვილდს შემუსრავს და შუბს დაამსხვრევს, ეტლებს დაბუგავს ცეცხლით» (ფსალმუნი 45:9, 10). მომავლის ამ მოვლენების გათვალისწინებით, ესაიას შემდგომი მოწოდება დღესაც ისეთივე დროულია, როგორც მისი დაწერის დროს იყო: „ჰოი, იაკობის სახლო! მოდით და უფლის ნათელში ვიაროთ!“ (ესაია 2:5). დაე გვიძღოდეს იეჰოვას სინათლე, რათა მარადიულად შევძლოთ მისი გზებით სიარული (მიქა 4:5).

თავი მეხუთე

იეჰოვა ამდაბლებს მედიდურთ

ესაია 2:6—4:1

1, 2. რით არის ჩვენთვის საინტერესო ესაიას მიერ თავისი დროის იუდაელებისთვის გადაცემული წინასწარმეტყველური ცნობა?

იერუსალიმსა და იუდაში შექმნილი მდგომარეობით შეძრული ესაია წინასწარმეტყველი ახლა იეჰოვა ღმერთს მიმართავს: „შენ მოიკვეთე შენი ერი, იაკობის სახლი“ (ესაია 2:6ა). რატომ უარყო ღმერთმა ხალხი, რომელიც „საკუთარ ერად“ ჰყავდა ამორჩეული? (მეორე რჯული 14:2).

² ჩვენთვის ძალზე საინტერესოა, როგორ ამხილა ესაიამ თავისი დროის იუდაელები, რადგან დღევანდელი ქრისტიანული სამყაროს მდგომარეობა მეტად ჰგავს ესაიას თანამედროვე ხალხის მდგომარეობას და ასევე ერთმანეთის მსგავსია იეჰოვას მიერ მათთვის გამოტანილი განაჩენი. ესაიას სიტყვების განხილვა დაგვეხმარება იმის გაგებაში, თუ როგორი საქციელია ღვთისთვის მიუღებელი და როგორ უნდა მოვერიდოთ ასეთ საქციელს. ამიტომ მთელი ყურადღებით გამოვიკვლიოთ იეჰოვას წინასწარმეტყველური სიტყვა, რომელსაც ესაიას 2:6—4:1-ში ვკითხულობთ.

სიამაყით უხრიან ქედს კერპებს

3. თავისი ხალხის რა ცოდვას არ ფარავს ესაია?

³ ესაია არ ფარავს თავისი ხალხის ცოდვას და ამბობს: „აღმოსავლეთით ავსებულან ისინი და ჯადოქრობით ფილისტიმელთა მსგავსად; უცხო თესლთა შვილებთან გადასკვნილან“ (ესაია 2:6ბ). იეჰოვამ ჯერ კიდევ 800 წლით ადრე გააფრთხილა თავისი ხალხი: „არცერთი ამ სისაძაგლით არ გაიუწმიდუროთ თავი... [რომლითაც] არიან გაუწმიდურებული ის ხალხები, რომლებიც უნდა განვდევნო თქვენგან“ (ლევიანნი 18:24). საკუთარ ერად ამორჩეული ხალხის შესახებ იეჰოვამ ბალაამს ათქმევინა: „კლდის თავიდან ვხედავ მას და გორაკებიდან ვუყურებ მას: აჰა, ცხოვრობს ერი განმარტოებით და ხალხებში არ ირიცხება“ (რიცხვნი 23:9, 12). მაგრამ ესაიას დღეებში იეჰოვას რჩეულ ხალხს გადაღებული ჰქონდა სხვა ერების უზნეო საქმეები და ‘ავსებული იყო აღმოსავლელთა’ ჩვევებით. იეჰოვასა და მისი სიტყვისადმი რწმენის გამომჟღავნების ნაცვლად ‘ფილისტიმელთა მსგავსად ჯადოქრობდნენ’. ერი არა თუ გამოყოფილი, არამედ ‘გადასკვნილი’ იყო „უცხო თესლთა შვილებთან“ — უეჭველია, იმ უცხოტომელებთან, რომლებიც ღვთის ხალხს უწმინდურ საქმეებს აჩვევდა.

4. რას აკეთებდნენ იუდაელები, იმის მაგივრად, რომ კეთილდღეობისა და ძლიერებისთვის იეჰოვას მადლობელი ყოფილიყვნენ?

⁴ ესაია აღნიშნავს, რომ მდიდარი და ძლიერი იყო იუდა, სადაც იმ დროს ყუზია მეფობდა: „ავსებულა მათი ქვეყანა ოქრო-ვერცხლით და ბოლო არ უჩანს მათ საგანძურებს; ავსებულა მათი ქვეყანა ცხენებით და ბოლო არ უჩანს მათ ეტლებს“ (ესაია 2:7). იყო ხალხი იეჰოვას მადლობელი კეთილდღეობისა და ძლიერებისთვის? (მეორე ნეშტთა 26:1, 6—15). სრულიადაც არა! ისინი მთელ იმედს სიმდიდრეზე ამყარებდნენ და ზურგს აქცევდნენ იეჰოვას, ვისი წყალობითაც ჰქონდათ ყველაფერი. რა შედეგი გამოიღო ამან? ესაია განაგრძობს: «ავსებულა მათი ქვეყანა კერპებით და ეთაყვანებიან [„ქედს უხრიან“, აქ] საკუთარ ნახელავს, რაც მათმა თითებმა გამოძერწა. დამცირდა ადამიანი, დამდაბლდა კაცი, შენ კი არ პატიობ მათ» (ესაია 2:8, 9). მათ მიტოვებული ჰყავდათ ცოცხალი ღმერთი და ქედს უხრიდნენ უსიცოცხლო კერპებს.

5. რატომ არ ნიშნავს კერპებისადმი ქედის მოხრა მორჩილებას?

⁵ ქედის მოხრა შეიძლება მორჩილებას ნიშნავდეს, მაგრამ უსიცოცხლო კერპების წინაშე ქედის მოხრას არავითარი აზრი არ ჰქონდა და მხოლოდ ‘ამდაბლებდა’ და გადაგვარების გზაზე აყენებდა ადამიანს. როგორ უნდა ეპატიებინა იეჰოვას ასეთი ცოდვა? რა უნდა ექნათ ამ კერპთაყვანისმცემლებს, როდესაც იეჰოვა პასუხს მოსთხოვდა მათ?

‘დამდაბლდება ამაყი მზერა’

6, 7. ა) რა ემართებათ მედიდურებს იეჰოვას განაჩენის აღსრულებისას? ბ) რას და ვის ატყდება ღვთის რისხვა? რატომ?

⁶ ესაია განაგრძობს: „კლდეში შეასწარ, მიწაში ჩაემალე უფლის ზარტეხილს და მისი სიდიადის ელვარებას!“ (ესაია 2:10). მაგრამ ვერავითარი უზარმაზარი კლდე და ვერავითარი საიმედო საფარი ვერ დამალავს მათ, რადგან იეჰოვა ყოვლისშემძლეა. მისი განაჩენის აღსრულებისას „[დამდაბლდება] ადამიანის ამაყი მზერა და კაცთა მედიდურება დამცირდება, მხოლოდ უფალი იქნება მაღალი იმ დღეს!“ (ესაია 2:11).

⁷ ახლოვდება „ცაბაოთ უფლის დღე“, როდესაც ღვთის რისხვა დაატყდება „ყველა ლიბანურ კედარს, მაღალს და აზიდულს, ყველა ბაშანურ მუხას, ყველა მაღალ მთასა და ყველა აზიდულ მწვერვალს, ყველა მაღალ გოდოლს და ყველა გამაგრებულ გალავანს, ყველა თარშიშულ ხომალდს და ყველა თვალწარმტაც მორთულობას“ (ესაია 2:12—16). დიახ, მრისხანების დღეს ადამიანთა მიერ აღზევებული არანაირი ორგანიზაცია, რაც მათი მედიდურობის გამოხატულებას წარმოადგენს, არ დარჩება იეჰოვას შეუმჩნეველი და არც ერთ უღვთო ადამიანს არ დატოვებს დაუსჯელს. „დამცირდება ადამიანის სიამაყე და კაცთა მედიდურება დამდაბლდება, მხოლოდ უფალი იქნება მაღალი იმ დღეს“ (ესაია 2:17).

8. როგორ დაატყდა ნაწინასწარმეტყველები რისხვა იერუსალიმს ძვ. წ. 607 წელს?

⁸ ნაწინასწარმეტყველები რისხვა იუდაელებს ძვ. წ. 607 წელს დაატყდათ თავს, როდესაც მეფე ნაბუქოდონოსორმა იერუსალიმი ააოხრა. მისმა მცხოვრებლებმა იხილეს, როგორ გადაიწვა მათი საყვარელი ქალაქი, დაინგრა საამაყო შენობები და ჩამოიქცა დიდებული კედელი. იეჰოვას ტაძრისგან ნანგრევებიღა დარჩა. საგანძურიც და ეტლებიც ყოვლად უსარგებლო გახდა „ცაბაოთ უფლის დღეს“. რა დაემართა მათ კერპებს? ზუსტად შესრულდა ესაიას სიტყვები: „ყოველგვარი კერპი გაცამტვერდება“ (ესაია 2:18). იუდაელები — მათ შორის მთავრები და დიდებულებიც — ბაბილონის ტყვეობაში მოხვდნენ. იერუსალიმი 70 წლით გაუკაცრიელდა.

9. რით ჰგავს ქრისტიანული სამყაროს მდგომარეობა ესაიას დროინდელი იერუსალიმისა და იუდას მდგომარეობას?

⁹ რა ძალიან ჰგავს ქრისტიანული სამყაროს მდგომარეობა ესაიას დროინდელი იერუსალიმისა და იუდას მდგომარეობას! ქრისტიანული სამყარო ნამდვილად მჭიდროდ არის დაკავშირებული წუთისოფლის ერებთან. ის აქტიურად უჭერს მხარს გაერთიანებული ერების ორგანიზაციას და ავსებს თავის სახლს კერპებითა და ისეთი საქმეებით, რომლებსაც ბიბლია გმობს. მისი წევრები მატერიალისტები არიან და სამხედრო ძალაზე ამყარებენ იმედს. გარდა ამისა, განა არ განადიდებენ ისინი სამღვდელოებას ტიტულებითა და უდიდესი პატივის მიგებით? ქრისტიანული სამყაროს ქედმაღლობას უეჭველად მოეღება ბოლო. მაგრამ როდის?

კარს მომდგარი „უფლის დღე“

10. რას დაუკავშირეს „უფლის დღე“ პავლე და პეტრე მოციქულებმა?

¹⁰ საღვთო წერილში მოხსენიებულია „უფლის დღე“, რომელიც იერუსალიმისა და იუდას განაჩენის შესრულების დღეზე ბევრად მნიშვნელოვანი იქნება. მოციქულმა პავლემ მოახლოებული „უფლის დღე“ ღვთის შთაგონებით იესო ქრისტეს, როგორც ტახტზე აღზევებული მეფის, თანდასწრებას დაუკავშირა (2 თესალონიკელთა 2:1, 2). პეტრემ კი ეს დღე ‘სამართლიან ახალ ცასა და ახალ მიწასთან’ დაკავშირებით მოიხსენია (2 პეტრე 3:10—13). ამ დღეს იეჰოვა განაჩენს აღასრულებს მთელ ბოროტ სისტემაზე და არც ქრისტიანულ სამყაროს დატოვებს უპასუხოდ.

11. ა) ვინ „გაუძლებს“ კარს მომდგარ „უფლის დღეს“? ბ) როგორ უნდა მოვიქცეთ, რომ იეჰოვამ დაგვიფაროს?

¹¹ „ვაი ჩვენს დღეს! — ამბობს იოველ წინასწარმეტყველი, — რადგან ახლოვდება უფლის დღე და დაქცევასავით მოდის უზენაესისგან“. ახლა, როდესაც კარს არის მომდგარი ეს შიშის მომგვრელი „დღე“, განა ყველას არ უნდა აფიქრებდეს უსაფრთხოების საკითხი? „ვინ გაუძლებს მას?“ — კითხულობს იოველი უფლის დღის შესახებ. „უფალი დაიცავს თავის ერს“, — თვითონვე პასუხობს შემდგომ (იოველი 1:15; 2:11; 4:16). დაიფარავს თუ არა იეჰოვა ღმერთი მედიდურთ, ვინც სიმდიდრეზე, სამხედრო ძალასა და ადამიანის ნახელავ ღმერთებზე ამყარებს იმედს? შეუძლებელია! ღმერთმა თავისი რჩეული ერიც კი მიატოვა, როდესაც ხალხი ამგვარად მოიქცა. რამდენად მნიშვნელოვანია, რომ ღვთის ყველა მსახურმა ‘ეძიოს სიმართლე და თვინიერება’ და სერიოზულად დაფიქრდეს, რა ადგილზე აყენებს იეჰოვას თაყვანისმცემლობას ცხოვრებაში (სოფონია 2:2, 3).

„თხუნელებსა და ღამურებს გადაუყრიან“

12, 13. რატომ იქნება შესაფერისი კერპთაყვანისმცემელთა მიერ თავიანთი კერპების გადაყრა თხუნელებისა და ღამურებისთვის იეჰოვას რისხვის დღეს?

¹² რა ფასი ექნება კერპებს მათი თაყვანისმცემლებისთვის იეჰოვას დიად დღეს? ესაია გვპასუხობს: „შევლენ კლდის ქვაბებში და მიწის ნაპრალებში დაემალება ხალხი უფლის ზარტეხილს და მისი სიდიადის ელვარებას, როცა ქვეყნის შესაზარად შეიმართება. იმ დღეს კაცი თხუნელებსა და ღამურებს გადაუყრის თავის ვერცხლის კერპებს და თავის ოქროს კერპებს... რათა კლდეთა მღვიმეებში და პიტალოთა ბზარებში დაემალოს უფლის ზარტეხილს და მისი სიდიადის ელვარებას, როცა ქვეყნის შესაზარად შეიმართება. ბარემ გაეცალეთ ადამიანს, ნესტოებში რომ უდგას სული, რადგან რაღა ღირსება აქვს მას?“ (ესაია 2:19—22).

¹³ თხუნელები სოროებში ცხოვრობენ, ხოლო ღამურები ბნელ და უკაცრიელ მღვიმეებს აფარებენ თავს. იქ, სადაც ბევრი ღამურა ერთად ბინადრობს, საშინელი სუნი დგება და ირგვლივ მათი ექსკრემენტები გროვდება. კერპები ნამდვილად სათანადო ადგილზე ხვდებიან. ისინი სიბნელისა და სიბინძურის მეტს არაფერს იმსახურებენ. რაც შეეხება ხალხს, იეჰოვას რისხვის დღეს გამოქვაბულებსა და კლდის ნაპრალებში დაიწყებენ თავშესაფრის ძებნას. ასე რომ, კერპებსა და მათ თაყვანისმცემლებს ერთი და იგივე ხვედრი ეწევათ. ძვ. წ. 607 წელს ყველაფერი ზუსტად ისე მოხდა, როგორც ესაიას ჰქონდა ნაწინასწარმეტყველები — უსიცოცხლო კერპებმა ვერც თავიანთი თაყვანისმცემლები იხსნეს და ვერც იერუსალიმი ნაბუქოდონოსორის ხელიდან.

14. როგორ მოიქცევა ხალხი, როდესაც იეჰოვა სისრულეში მოიყვანს თავის განაჩენს ცრუ რელიგიის მსოფლიო მპყრობელთან დაკავშირებით?

¹⁴ როგორ მოიქცევა ხალხი, როდესაც ქრისტიანულ სამყაროსა და, მთლიანობაში, ცრუ რელიგიის მსოფლიო მპყრობელს თავს იეჰოვას რისხვა დაატყდება? როდესაც მთელ მსოფლიოში გამოუვალი მდგომარეობა შეიქმნება, სავარაუდოა, რომ უმრავლესობა დაინახავს თავისი კერპების უსარგებლობას. მათ ნაცვლად ისინი მფარველად და დამცველად ადამიანთა მიერ შექმნილ ორგანიზაციებს აღიარებენ და მთელ იმედს მათზე, მათ შორის, შესაძლებელია, გაერთიანებული ერების ორგანიზაციაზეც, დაამყარებენ, რომელიც გამოცხადების მე-17 თავში „შავწითელ მხეცად“ არის აღწერილი. ამ სიმბოლური მხეცის „ათი რქა“ გაანადგურებს ცრუ რელიგიის მსოფლიო მპყრობელ დიდ ბაბილონს, რომლის მნიშვნელოვანი ნაწილიც ქრისტიანული სამყაროა (გამოცხადება 17:3, 8—12, 16, 17).

15. როგორ იქნება ‘მხოლოდ უფალი მაღალი’ თავისი განაჩენის აღსრულების დღეს?

¹⁵ მიუხედავად იმისა, რომ სიმბოლური ათი რქა დაარბევს და დაწვავს დიდ ბაბილონს, ეს იეჰოვას განაჩენის აღსრულება იქნება. დიდი ბაბილონის შესახებ გამოცხადების 18:8-ში ნათქვამია: „ამიტომ ერთ დღეს მოვა მისი წყლულები და სიკვდილი, გლოვა და შიმშილი, და დაიწვება ცეცხლში, რადგან ძლიერია უფალი ღმერთი, რომელიც განიკითხავს მას“. ასე რომ, ცრუ რელიგიისგან კაცობრიობის გათავისუფლებისთვის ყოვლადძლიერ იეჰოვა ღმერთს უნდა მივაგოთ პატივი. ესაიას სიტყვების თანახმად, „მხოლოდ უფალი იქნება მაღალი იმ დღეს“ ანუ „ცაბაოთ უფლის დღეს“ (ესაია 2:11ბ, 12ა).

[სურათი 50 გვერდზე]

კერპებმა, სიმდიდრემ და სამხედრო ოსტატობამ ვერ იხსნა იერუსალიმი იეჰოვას რისხვის დღეს.

[სურათი 55 გვერდზე]

„უფლის დღეს“ ცრუ რელიგიის მსოფლიო მპყრობელს განადგურება ელის.