ალბათ გინახავთ, როგორ ქადაგებენ იეჰოვას მოწმეები კარდაკარ თუ საზოგადოებრივი თავშეყრის ადგილებში და როგორ სთავაზობენ ადამიანებს ბიბლიურ ლიტერატურას თუ ბიბლიის უფასო შესწავლას. შესაძლოა ეს ჟურნალიც იეჰოვას მოწმეებმა მოგცეს. მაგრამ მაინც არ იცით, ვინ არიან იეჰოვას მოწმეები. შეიძლება თქვენც იზიარებთ რომელიმე ზემოხსენებული ადამიანის აზრს.

თუ თავში მსგავსი კითხვები ან ფიქრები გიტრიალებთ, ვის უნდა მიმართოთ სწორი პასუხების მისაღებად? როგორ შეიძლება იმის გაგება, თუ რა სწამთ სინამდვილეში იეჰოვას მოწმეებს? როგორ ფინანსდება მათი საქმიანობა და თაყვანისმცემლობისთვის განკუთვნილი ადგილები? რატომ მოდიან ისინი თქვენს კართან ან რატომ გესაუბრებიან ქუჩაში?

„იეჰოვას მოწმეების შესახებ ინტერნეტში ბევრი რამ წამიკითხავს. მათზე ბევრი ჭორი და წინასწარშექმნილი არასწორი აზრი მსმენია. ამიტომ იეჰოვას მოწმეების მიმართ უარყოფითად ვიყავი განწყობილი“, — ამბობს ზემოთ ხსენებული სესილი. მაგრამ მას შემდეგ, რაც სესილი იეჰოვას მოწმეებს პირადად გაესაუბრა, თავის კითხვებზე ამომწურავი პასუხები მიიღო.

თქვენც ხომ არ ისურვებდით სიმართლე გაგეგოთ იეჰოვას მოწმეების შესახებ? საამისოდ, მიმართეთ ყველაზე სანდო და ზუსტი ინფორმაციის წყაროს — თავად იეჰოვას მოწმეებს (იგავები 14:15). ვიმედოვნებთ, რომ შემდგომი სტატიების მეშვეობით გაიგებთ, ვინ არიან იეჰოვას მოწმეები, რა სწამთ მათ და რა საქმიანობას ეწევიან.

ჩვენ ვართ სხვა რელიგიებისგან დამოუკიდებელი საერთაშორისო ორგანიზაცია. ჩვენი მთავარი სამმართველო შეერთებულ შტატებში მდებარეობს, თუმცა იეჰოვას მოწმეების დიდი უმეტესობა სხვა ქვეყნებში ცხოვრობს. დაახლოებით რვა მილიონი იეჰოვას მოწმე ბიბლიას ვასწავლით 230-ზე მეტ ქვეყანაში მცხოვრებ ადამიანებს, რითაც ვასრულებთ იესოს სიტყვებს: „ამ სასიხარულო ცნობას სამეფოს შესახებ იქადაგებენ მთელ მსოფლიოში ყველა ხალხისთვის დასამოწმებლად“ (მათე 24:14).

იეჰოვას მოწმეები ყველგან, სადაც უნდა ვცხოვრობდეთ, კანონმორჩილი მოქალაქეები ვართ, თუმცა პოლიტიკურად ნეიტრალურები ვრჩებით. და ეს იმიტომ, რომ ვითვალისწინებთ ქრისტიანებისთვის ნათქვამ იესოს სიტყვებს: „ქვეყნიერების ნაწილი არა ხართ“. აქედან გამომდინარე, არანაირ მონაწილეობას არ ვღებულობთ პოლიტიკაში და საომარ მოქმედებებში (იოანე 15:19; 17:16). მეორე მსოფლიო ომის დროს იეჰოვას მოწმეებს აპატიმრებდნენ, აწამებდნენ და კლავდნენ იმის გამო, რომ კომპრომისზე არ მიდიოდნენ. ერთმა ყოფილმა გერმანელმა ეპისკოპოსმა იეჰოვას მოწმეების შესახებ დაწერა: „მხოლოდ მათ შეუძლიათ იმის თქმა, რომ ისინი ერთადერთნი იყვნენ, რომლებიც რელიგიური მრწამსის გამო მხარს არ უჭერდნენ მესამე რაიხს“.

მართალია, პოლიტიკაში არ ვერევით, მაგრამ ეს იმას არ ნიშნავს, რომ საზოგადოებისგან იზოლირებულნი ვართ. იესომ ლოცვაში ღმერთს თავის მიმდევრებზე სთხოვა: „იმას არ გთხოვ, ქვეყნიერებიდან წაიყვანო ისინი“ (იოანე 17:15). ამიტომ ჩვენი ნახვა ყველგან შეგიძლიათ, მაგალითად, ქუჩაში ან მაღაზიაში; ჩვენ შეიძლება თქვენი თანამშრომლებიც კი ვიყოთ ან ერთ სასწავლებელში ვსწავლობდეთ.

იეჰოვას მოწმეებს სწამთ, რომ „მთელი წმინდა წერილი ღვთისგან არის შთაგონებული და სასარგებლოა“ (2 ტიმოთე 3:16). ბიბლია ჩვენთვის პრაქტიკული სახელმძღვანელოა, რომელიც გვაცნობს შემოქმედს და გვასწავლის აზრიან ცხოვრებას.

ბიბლიაში ვკითხულობთ: „რათა იცოდეს ხალხმა, რომ შენ, რომლის სახელიც არის იეჰოვა, მხოლოდ შენა ხარ უზენაესი მთელ დედამიწაზე!“ (ფსალმუნი 83:18). აქედან გამომდინარე, ჩვენ თაყვანს ვცემთ მხოლოდ იეჰოვა ღმერთს და როგორც მისი მოწმეები, ვცდილობთ, ღვთის საკუთარი სახელი ყველას ვაუწყოთ (ესაია 43:10—12).

ჩვენ, როგორც ქრისტიანებს, გვწამს, რომ იესო ქრისტე, ღვთის ძე,a დედამიწაზე მოვლენილი მესია იყო (იოანე 1:34, 41; 4:25, 26). სიკვდილის შემდეგ იესო ზეცად ამაღლდა (1 კორინთელები 15:3, 4). მოგვიანებით ის ღვთის სამეფოს მეფე გახდა (გამოცხადება 11:15). ღვთის სამეფო რეალური ხელისუფლებაა, რომელიც დედამიწაზე სამოთხეს აღადგენს (დანიელი 2:44). „თვინიერნი დაიმკვიდრებენ დედამიწას და გაიხარებენ დიდი მშვიდობით“ (ფსალმუნი 37:11, 29).

იეჰოვას მოწმეებს სწამთ, რომ ბიბლიური პრინციპები დღესაც გამოსადეგი და აქტუალურია (ესაია 48:17, 18). ამიტომ ზედმიწევნით ვცდილობთ, დავიცვათ ბიბლიაში ჩაწერილი პრინციპები. მაგალითად, რადგან ბიბლია გვაფრთხილებს, მოვერიდოთ ყველაფერს, რაც ბილწავს გონებას და სხეულს, ჩვენ თავს ვიკავებთ თამბაქოს მოწევისა და ნარკოტიკების ბოროტად გამოყენებისგან (2 კორინთელები 7:1). გარდა ამისა, ვერიდებით იმას, რასაც ბიბლია მკაცრად განსჯის, მაგალითად, ლოთობას, სექსუალურ უზნეობასა და ქურდობას (1 კორინთელები 6:9—11).

ყოველ წელს ჩვენ ვბეჭდავთ და ვავრცელებთ ასობით მილიონ ბიბლიასა და მასზე დაფუძნებულ ლიტერატურას. მთელ მსოფლიოში ვაშენებთ ფილიალებსა და სტამბებს. ათობით ათასი კრება იკრიბება თაყვანისმცემლობისთვის განკუთვნილ მოკრძალებულ, თუმცა ლამაზ შენობებში, რომლებსაც „სამეფო დარბაზებს“ ვუწოდებთ. საინტერესოა, ვინ აფინანსებს ამ ყოველივეს?

ჩვენი საქმიანობა მთლიანად ნებაყოფლობითი შესაწირავებით ხორციელდება (2 კორინთელები 9:7). 1879 წელს ამ ჟურნალის მეორე ნომერში აღნიშნული იყო: «ჩვენ გვჯერა, რომ იეჰოვა უჭერს მხარს „სიონის საგუშაგო კოშკის“ [ასე უწოდებდნენ მაშინ ამ ჟურნალს] გამოცემას. ამიტომ არასოდეს ვთხოვთ ადამიანებს ფინანსურ დახმარებას». ჩვენ დღემდე ამ კურსს მივყვებით.

შესაწირავები ან უშუალოდ ფილიალებში იგზავნება, ან იყრება ადგილობრივ სამეფო დარბაზებში არსებულ შესაწირავების ყუთში. ჩვენთან არ ხდება საეკლესიო გადასახადის გადახდა და ფულის აგროვება; ჩვენ არც მსახურებაში ვიღებთ ფულს და არც პუბლიკაციებში. ჩვენ ფულს არ გვიხდიან ქადაგებაში, კრების შეხვედრებზე თემით გამოსვლისას და არც მაშინ, როცა თაყვანისმცემლობისთვის განკუთვნილ შენობებს ვაშენებთ. იესომ თქვა: „უსასყიდლოდ გაქვთ მიღებული და უსასყიდლოდვე გაეცით“ (მათე 10:8). ჩვენს ფილიალებში თუ მთავარ სამმართველოში მომსახურე ყველა მოხალისე, მათ შორის იეჰოვას მოწმეების ხელმძღვანელი საბჭოს წევრები, რელიგიურ გაერთიანებას მიეკუთვნებიან, რომლებსაც ხელფასს არ უხდიან.

შემოწირული თანხა აგრეთვე ხმარდება სტიქიური უბედურებების დროს დაზარალებულთა დახმარებას. პირველ საუკუნეში ქრისტიანები სიამოვნებით ეხმარებოდნენ გაჭირვებაში ჩაცვენილ და-ძმებს (რომაელები 15:26). მათ მსგავსად, ჩვენც ვამარაგებთ დაზარალებულებს საკვებით, ტანსაცმლითა და მედიკამენტებით. გარდა ამისა, თანაქრისტიანებს დანგრეული სახლებისა და თაყვანისმცემლობის ადგილების აღდგენაში ვეხმარებით.

იეჰოვას მოწმეები ყველაზე მეტად მასშტაბური სამქადაგებლო საქმიანობით გამოვირჩევით. ჩვენ ვქადაგებთ ყველგან, სადაც ხალხია — კარდაკარ თუ საზოგადოებრივი თავშეყრის ადგილებში. რატომ ვაკეთებთ ამას?

იეჰოვას მოწმეების ქადაგების მიზანი ღვთის განდიდება და მისი სახელის საჯაროდ გაცხადებაა (ებრაელები 13:15). ჩვენ აგრეთვე ვემორჩილებით იესო ქრისტეს მითითებას, რომელმაც თავის მიმდევრებს მოუწოდა: „წადით და მოწაფეებად მოამზადეთ ხალხი ყველა ერიდან . . . ასწავლეთ მათ ყველაფრის დაცვა, რაც მცნებად დაგიდეთ“ (მათე 28:19, 20).

გარდა ამისა, ჩვენ გვიყვარს მოყვასი (მათე 22:39). ვიცით, რომ უმრავლესობას საკუთარი რელიგია აქვს და ყველა არ დაინტერესდება ჩვენი ცნობით. თუმცა გვესმის, რომ ბიბლიური სწავლებები სასიცოცხლოდ მნიშვნელოვანია. ამიტომ მივყვებით პირველი საუკუნის ქრისტიანების მაგალითს, რომლებიც „დაუღალავად ასწავლიდნენ და აუწყებდნენ სასიხარულო ცნობას ქრისტე იესოზე“ (საქმეები 5:41, 42).

ჩვენს ლიტერატურას უმეტესწილად ისინი კითხულობენ, რომლებიც არ არიან იეჰოვას მოწმეები. მილიონობით ადამიანი, რომლებიც ჩვენთან ბიბლიას სწავლობენ, სხვა რელიგიას მიეკუთვნებიან. მიუხედავად ამისა, ისინი მადლიერნი არიან, რომ იეჰოვას მოწმეები აკითხავენ.

შეიძლება, იეჰოვას მოწმეების შესახებ სხვა კითხვებიც გაგიჩნდეთ. პასუხების მისაღებად შეგიძლიათ . . .

• მიმართოთ რომელიმე იეჰოვას მოწმეს.

• ეწვიოთ ჩვენს ვებ-გვერდს www.pr2711.com.

• დაესწროთ ჩვენს შეხვედრებს, რომლებზე დასწრებაც ყველასთვის უფასოა.