იესო ქრისტე — უდიდესი მისიონერი

„მისგან ვარ და მან გამომგზავნა“ (იოან. 7:29).

1, 2. ვინ არიან მისიონერები, და ვის შეიძლება ეწოდოს უდიდესი მისიონერი?

ვინ გახსენდებათ, როდესაც გესმით სიტყვა მისიონერი? ზოგს ახსენდება ქრისტიანული სამყაროს მისიონერები, რომელთაგან ბევრი ერევა იმ ქვეყნის პოლიტიკურ თუ ეკონომიკურ საკითხებში, სადაც მსახურობენ. მაგრამ თქვენ, როგორც იეჰოვას მოწმეს, ალბათ გახსენდებათ ის მისიონერები, რომლებსაც ხელმძღვანელი საბჭო დედამიწის სხვადასხვა კუთხეში გზავნის სასიხარულო ცნობის საქადაგებლად (მათ. 24:14). ეს მისიონერები არ იშურებენ თავიანთ დროსა და ენერგიას, რათა ხალხმა იეჰოვა ღმერთი გაიცნოს და მასთან ახლო ურთიერთობა ჰქონდეს (იაკ. 4:8).

² „ახალი ქვეყნიერების თარგმანში“ სიტყვები მისიონერი და მისიონერები არ გვხვდება. მაგრამ ეფესოელების 4:11-ში მოხსენიებული ბერძნული სიტყვა, რომელიც ქართულად „მახარობლად“ ითარგმნა, მისიონერსაც ნიშნავს. უდიდესი მახარობელი არის იეჰოვა, მაგრამ მას ვერ ვუწოდებთ უდიდეს მისიონერს, რადგან შეუძლებელია, ვინმეს იეჰოვა გაეგზავნა. იესომ თავისი ზეციერი მამის შესახებ თქვა: „მისგან ვარ და მან გამომგზავნა“ (იოან. 7:29). იეჰოვამ თავისი მხოლოდშობილი ძე დედამიწაზე იმიტომ გამოგზავნა, რომ ძალიან უყვარს ადამიანები (იოან. 3:16). უდიდესი მისიონერი შეიძლება ვუწოდოთ იესოს, რადგან დედამიწაზე მისი მოსვლის ერთ-ერთი მიზეზი ‘ჭეშმარიტების შესახებ დამოწმება’ იყო (იოან. 18:37). იესომ უნაკლოდ შეასრულა თავისი მისია. მისი მსახურებიდან ჩვენ ბევრი რამის სწავლა შეგვიძლია. მნიშვნელობა არა აქვს, მისიონერებად ვმსახურობთ თუ არა, ყველას შეგვიძლია იმ მეთოდებით ქადაგება, რომლებსაც იესო იყენებდა.

3. რა კითხვებს განვიხილავთ?

³ როდესაც ვეცნობით იესოს მსახურებას, კითხვები გვებადება. მაგალითად, რა პირობებში უწევდა იესოს მსახურება? რატომ იყო იესოს სწავლების მეთოდები ეფექტური? რატომ გამოჰქონდა ნაყოფი მის მსახურებას?

იესოს სულისკვეთება სრულიად ახალ გარემოში

4—6. როგორ შეიცვალა იესოს მდგომარეობა დედამიწაზე მოსვლის შემდეგ?

⁴ მისიონერებსა და იმ ქრისტიანებს, რომლებიც საქადაგებლად სხვაგან გადადიან, შეიძლება იქ მოუწიოთ მსახურება, სადაც ცხოვრების დაბალი დონეა. მაგრამ ის პირობები, რომელშიც იესო ცხოვრობდა დედამიწაზე, ვერც კი შეედრება იმ მდგომარეობას, რომელიც მას ზეცაში ეკავა. იესო იქ თავისი მამის, იეჰოვას გვერდით იყო, რომელსაც ანგელოზები წრფელი მოტივებით ემსახურებოდნენ (იობ. 38:7). წარმოიდგინეთ, როგორი იქნებოდა ბოროტ ქვეყნიერებაში ცოდვილ ადამიანებთან ცხოვრება (მარ. 7:20—23). იესოს თავის საყვარელ მოწაფეებს შორის არსებული მეტოქეობის ატანაც კი უწევდა (ლუკ. 20:46; 22:24). ყველაფრის მიუხედავად, იესოს ვერაფერმა შეუშალა ხელი, რომ წარმატებით შეესრულებინა თავისი მისია დედამიწაზე.

⁵ გარდა ამისა, იესოს სასწაულებრივად არ დაუწყია ლაპარაკი. მან ენა სხვა ბავშვებივით ისწავლა. არადა მანამდე, ზეცაში, ანგელოზებს მითითებებს აძლევდა. დედამიწაზე იესომ, სულ ცოტა, ‘ადამიანთა ერთი ენა’ მაინც იცოდა. ეს ენა ბევრად განსხვავდებოდა „ანგელოზთა ენებისგან“ (1 კორ. 13:1). მაგრამ მადლიანი სიტყვის წარმოთქმაში იესოს ბადალი არ ჰყავდა (ლუკ. 4:22).

⁶ გავიგოთ, კიდევ როგორ შეიცვალა ღვთის ძის მდგომარეობა, როდესაც დედამიწაზე მოვიდა. მართალია, ადამისგან მემკვიდრეობით ცოდვა არ მიუღია, იესო განკაცდა და დაემსგავსა მათ, ვინც მოგვიანებით ‘მისი ძმები’, ცხებულები გახდებოდნენ (წაიკითხეთ ებრაელების 2:17, 18). დედამიწაზე ყოფნის უკანასკნელ ღამეს იესოს თავისი მამისთვის არ უთხოვია, რომ გამოეგზავნა მისთვის „ანგელოზთა თორმეტზე მეტი ლეგიონი“, თუმცა ის მიქაელ მთავარანგელოზი იყო და ეს ანგელოზები მის განკარგულებაში იყვნენ (მათ. 26:53; იუდ. 9). მართალია, იესო სასწაულებს ახდენდა დედამიწაზე, მაგრამ ეს არაფერი იყო იმასთან შედარებით, რასაც ზეცაში აკეთებდა.

7. როგორ იქცეოდნენ იუდეველი რელიგიური წინამძღოლები?

⁷ ბიბლიაში იესოს ეწოდება სიტყვა. შესაძლოა უდაბნოში სწორედ ის გადასცემდა ისრაელებს იეჰოვას მითითებებს (იოან. 1:1; გამ. 23:20—23). ‘ისრაელებმა კანონი ანგელოზებისგან მიიღეს, მაგრამ არ დაიცვეს’ (საქ. 7:53; ებრ. 2:2, 3). პირველ საუკუნეში მცხოვრები იუდეველი რელიგიური წინამძღოლები ვერ ჩასწვდნენ კანონის არსს. მაგალითად მოვიყვანოთ შაბათის კანონი (წაიკითხეთ მარკოზის 3:4—6). მწიგნობრებმა და ფარისევლებმა ‘დაივიწყეს უფრო მნიშვნელოვანი კანონში: სამართალი, გულმოწყალება და ერთგულება’ (მათ. 23:23). მიუხედავად ამისა, იესოს ხელი არ ჩაუქნევია და კვლავაც განაგრძობდა ჭეშმარიტების ქადაგებას.

8. რა გვარწმუნებს იმაში, რომ იესოს ნამდვილად შეუძლია ჩვენი დახმარება?

⁸ იესოს მზადყოფნის სული ჰქონდა. მას ხალხის სიყვარული აღძრავდა, რომ დახმარებოდა მათ. მას არასოდეს დაუკარგავს ქადაგების ხალისი. იესომ იეჰოვასადმი ერთგულება ბოლომდე შეინარჩუნა, რითაც „თავის მორჩილთა სამუდამო ხსნაზე გახდა პასუხისმგებელი“. უფრო მეტიც, „რაკი თვითონ იტანჯა, როცა იცდებოდა, შეუძლია დაეხმაროს მათაც, ვინც ახლა იცდება“ (ებრ. 2:18; 5:8, 9).

დახელოვნებული მასწავლებელი

9, 10. რა მომზადება გაიარა იესომ, ვიდრე დედამიწაზე მოვიდოდა?

⁹ ვიდრე გაიგზავნებიან, მისიონერები ხელმძღვანელი საბჭოს ზედამხედველობით სპეციალურ მომზადებას გადიან. მომზადება იესომაც გაიარა, სანამ ცხებული, ანუ მესია გახდებოდა, ოღონდ არა რაბინების სკოლებში. მას არც რელიგიური წინამძღოლებისგან მიუღია განათლება (იოან. 7:15; შეადარეთ საქმეების 22:3). მაშ, ვინ მოამზადა იესო?

¹⁰ მართალია, მარიამმა და იოსებმა ბევრი რამ ასწავლეს, მაგრამ იესო მსახურებისთვის ყველაზე დიდებულმა მოძღვარმა, იეჰოვამ მოამზადა. იესომ თქვა: „ჩემით კი არ ვილაპარაკე, არამედ თვითონ მამამ, რომელმაც გამომგზავნა, მომცა მცნება, რა ვთქვა და რა ვილაპარაკო“ (იოან. 12:49). როგორც ვხედავთ, იესომ ზუსტი მითითებები მიიღო იეჰოვასგან, თუ რა უნდა ესწავლებინა. ამისათვის მცირე ხანი ნამდვილად არ იქნებოდა საკმარისი. სად გაივლიდა იესო ამაზე უკეთეს მომზადებას?

11. როგორ იმოქმედა იესოზე ადამიანებისადმი ღვთის სიყვარულმა?

¹¹ შექმნის დღიდან იესოს ახლო ურთიერთობა ჰქონდა მამასთან. ის აკვირდებოდა, როგორ ეპყრობოდა იეჰოვა ადამიანებს. მათდამი ღვთის სიყვარულმა იმდენად იმოქმედა იესოზე, რომ მას, როგორც გაპიროვნებულ სიბრძნეს, შეეძლო ეთქვა: „მიყვარდა ადამიანის მოდგმა“ (იგავ. 8:22, 31).

12, 13. ა) რა ისწავლა იესომ იმაზე დაკვირვებით, თუ როგორ ეპყრობოდა იეჰოვა ისრაელებს? ბ) როგორ იყენებდა იესო იმას, რაც მამისგან ისწავლა?

¹² იესო იმასაც აკვირდებოდა, თუ როგორ წყვეტდა იეჰოვა ძნელად მოსაგვარებელ საკითხებს. მაგალითად, გავიხსენოთ, როგორ ექცეოდა იეჰოვა ქედმოუხრელ ისრაელებს. ნეემიას 9:28-ში ვკითხულობთ: „მაგრამ, როგორც კი სულს მოითქვამდნენ, ისევ ბოროტებას სჩადიოდნენ შენ წინაშე [იეჰოვა] და შენც ტოვებდი მათ მტრების ხელში, რომლებიც ჩაგრავდნენ მათ. გიბრუნდებოდნენ ისინი და შველას გთხოვდნენ, შენც უსმენდი ზეციდან და მრავალჯერ შველოდი შენი უხვი წყალობით“. მამის გვერდით ყოფნა და მის საქმეებზე დაკვირვება დაეხმარა იესოს, რომ თვითონაც გამოევლინა თანაგრძნობა იმ ხალხის მიმართ, ვისაც უქადაგებდა (იოან. 5:19).

¹³ იესო პრაქტიკულად იყენებდა იმას, რასაც მამისგან სწავლობდა. ის მოწაფეებს თანაგრძნობით ეპყრობოდა. სიკვდილამდე ერთი დღით ადრე მოციქულებმა, რომლებიც იესოს ძალიან უყვარდა, ‘მიატოვეს ის და გაიქცნენ’ (მათ. 26:56; იოან. 13:1). პეტრე მოციქულმა კი სამჯერ უარყო იესო. მაგრამ ამის გამო იესომ თავის მოციქულებს ზურგი არ აქცია. მან პეტრეს უთხრა: „მე ვილოცე შენთვის, რომ რწმენა არ გამოგელიოს, და როცა შემობრუნდები, განამტკიცო შენი ძმები“ (ლუკ. 22:32). სწორედ „მოციქულები და წინასწარმეტყველები“ გახდნენ სულიერი ისრაელის პირველი წევრები. ახალი იერუსალიმის გალავნის საძირკვლის ქვებს იესო ქრისტეს, კრავის 12 ერთგული მოციქულის სახელები აწერია. დღესაც, ძლევამოსილი ღვთისა და მისი ძის ხელმძღვანელობით ცხებული ქრისტიანები „სხვა ცხვართან“ ერთად წარმატებით ასრულებენ სამეფოს შესახებ ქადაგების საქმეს (ეფეს. 2:20; იოან. 10:16; გამოცხ. 21:14).

რა მეთოდებით ასწავლიდა იესო

14, 15. რით განსხვავდებოდა იესოს სწავლების მეთოდები მწიგნობრებისა და ფარისევლების მეთოდებისგან?

¹⁴ როგორ იყენებდა იესო თავისი მიმდევრების დასამოძღვრად იმას, რაც მამამ ასწავლა? თუ ერთმანეთს შევადარებთ იესოსა და იუდეველი რელიგიური წინამძღოლების სწავლების მეთოდებს, აშკარა სხვაობას დავინახავთ. მწიგნობრებმა და ფარისევლებმა თავიანთი „ადათ-წესებით ძალა დაუკარგეს ღვთის სიტყვას“. მათგან განსხვავებით, იესო თავის აზრებს კი არ ამბობდა, არამედ ყოველთვის ღვთის სიტყვის საფუძველზე ქადაგებდა (მათ. 15:6; იოან. 14:10). ჩვენც ასე უნდა მოვიქცეთ.

¹⁵ ვნახოთ კიდევ ერთი მიზეზი, რითაც იესო რადიკალურად განსხვავდებოდა რელიგიური წინამძღოლებისგან. იესომ მწიგნობრებისა და ფარისევლების შესახებ თქვა: „რასაც ისინი გეტყვიან, ყველაფერი გააკეთეთ და დაიცავით, ოღონდ იმ საქმეებს ნუ გააკეთებთ, რასაც ისინი აკეთებენ, რადგან ისინი ამბობენ და არ აკეთებენ“ (მათ. 23:3). იესო რასაც ასწავლიდა, იმასვე აკეთებდა. გავიხსენოთ ამის დამადასტურებელი მაგალითი.

16. საიდან ვიცით, რომ იესო თავისივე მოწოდების თანახმად ცხოვრობდა?

¹⁶ იესომ მოუწოდა თავის მოწაფეებს, რომ ‘განძი ზეცაში მოეგროვებინათ’ (წაიკითხეთ მათეს 6:19—21). თვითონ თუ ცხოვრობდა იესო ამ მოწოდების თანახმად? მან თავის თავზე თქვა: „მელიებს სოროები აქვთ და ცის ფრინველებს — ბუდეები, კაცის ძეს კი თავის დასადები ადგილი არ გააჩნია“ (ლუკ. 9:58). იესო უბრალოდ ცხოვრობდა. ის, ძირითადად, სამეფოს შესახებ სასიხარულო ცნობის ქადაგებით იყო დაკავებული, რის გამოც თავისუფალი იყო იმ საზრუნავისგან, რაც თან სდევს განძის დედამიწაზე დაგროვებას. იესომ დაგვანახვა, თუ რამდენად უკეთესია განძის ზეცაში დაგროვება, „სადაც არც ჩრჩილი და ჟანგი ჭამს და არც ქურდები ტეხენ და იპარავენ“. ცხოვრობთ თქვენც იესოს მოწოდების თანახმად და აგროვებთ განძს ზეცაში?

რა თვისებებით იზიდავდა იესო ხალხს

17. რატომ იყო იესო დიდებული მახარობელი?

¹⁷ რატომ იყო იესო დიდებული მახარობელი? ერთ-ერთი მიზეზი იყო ხალხისადმი მისი დამოკიდებულება. მას ჰქონდა ისეთი თვისებები, როგორიც იეჰოვას აქვს — თავმდაბლობა, სიყვარული და თანაგრძნობა. ვნახოთ, როგორ იზიდავდა იესო ხალხს თავისი თვისებებით?

18. საიდან ჩანს, რომ იესო თავმდაბალი იყო?

¹⁸ როდესაც დედამიწაზე მსახურების დავალება მიიღო, იესომ „ყველაფერზე უარი თქვა, მონის სახე მიიღო და ადამიანის მსგავსი გახდა“ (ფილ. 2:7). ეს თავმდაბლობის მაჩვენებელი იყო. გარდა ამისა, იესო ხალხს ზემოდან არ უყურებდა. ის არ ფიქრობდა, რომ რადგან ზეციდან დედამიწაზე ჩამოვიდა, ყველა ვალდებული იყო, მისთვის მოესმინა. თვითმარქვია მესიებისგან განსხვავებით, იესო არ ტრაბახობდა, რომ ნამდვილი მესია იყო. ზოგჯერ ხალხს იმასაც კი ეუბნებოდა, რომ არ გაემხილათ მისი ვინაობა და საქმეები (მათ. 12:15—21). იესოს უნდოდა, რომ ხალხს მის საქმეებზე დაკვირვების შედეგად გადაეწყვიტა, გაჰყვებოდნენ თუ არა მას. რა ბედნიერები იქნებოდნენ მისი მოწაფეები იმის გამო, რომ მათი უფალი არ ითხოვდა მათგან, იმ ანგელოზებივით სრულყოფილები ყოფილიყვნენ, ვისთანაც იესოს ზეცაში ურთიერთობა ჰქონდა.

19, 20. როგორ აღძრავდა სიყვარული და თანაგრძნობა იესოს ხალხის დასახმარებლად?

¹⁹ იესო ქრისტე სიყვარულსაც ავლენდა, რაც მისი ზეციერი მამის გამორჩეული თვისებაა (1 იოან. 4:8). იესო ხალხს სიყვარულით ასწავლიდა. გავიხსენოთ, რა გრძნობა დაეუფლა მას, როცა ერთ ახალგაზრდა მმართველს ესაუბრებოდა (წაიკითხეთ მარკოზის 10:17—22). იესო „სიყვარულით აღიძრა მისდამი“, უნდოდა დახმარებოდა მას, მაგრამ ეს მმართველი ვერ შეელია თავის დიდძალ ქონებას და უარი თქვა ქრისტეს მიმდევრობაზე.

²⁰ იესო აგრეთვე თანამგრძნობი იყო. როგორც ყველა არასრულყოფილი ადამიანი, იესოს მსმენელებიც პრობლემებით იყვნენ გატანჯულები. მას ეცოდებოდა ისინი და თანაგრძნობით ეპყრობოდა მათ. ერთხელ, იესო და მისი მოწაფეები ისე იყვნენ დაკავებულნი, რომ ჭამის დროც კი არ ჰქონდათ. მაგრამ, როგორც კი დაინახა ერთად შეკრებილი ხალხი, „გული დაეწვა მათ გამო, რადგან უმწყემსო ცხვრებივით იყვნენ, და ბევრ რამეს ასწავლიდა მათ“ (მარ. 6:34). იესო ხედავდა ხალხის სავალალო მდგომარეობას და ძალ-ღონეს არ იშურებდა, რომ ესწავლებინა მათთვის და სასწაულები მოეხდინა. ზოგიერთზე იმდენად ძლიერ შთაბეჭდილებას ახდენდა იესოს თვისებები და სიტყვები, რომ მისი მოწაფეები ხდებოდნენ.

21. რა იქნება განხილული მომდევნო სტატიაში?

²¹ იესოს მსახურებიდან ბევრის სწავლა შეგვიძლია. შემდეგი სტატიიდან დავინახავთ, კიდევ რა მხრივ იყო იესო ქრისტე უდიდესი მისიონერი.

მიჰბაძეთ უდიდეს მისიონერს

„მომბაძეთ მე, როგორც მე — ქრისტეს“ (1 კორ. 11:1).

1. რატომ უნდა მივბაძოთ იესო ქრისტეს?

პავლე მოციქული უდიდეს მისიონერს, იესო ქრისტეს ჰბაძავდა. ის თანამორწმუნეებს მოუწოდებდა: „მომბაძეთ მე, როგორც მე — ქრისტეს“ (1 კორ. 11:1). როდესაც იესომ მოციქულებს ფეხები დაბანა, ამით თავმდაბლობის მაგალითი დაუტოვა. მან უთხრა: „მაგალითი მოგეცით, რათა, რაც მე გაგიკეთეთ, თქვენც იგივე აკეთოთ“ (იოან. 13:12—15). ჩვენ, ქრისტიანები, ვალდებულები ვართ, მივბაძოთ იესოს სიტყვითა და საქმით და ისეთივე თვისებები გამოვავლინოთ, როგორსაც ის ავლენდა (1 პეტ. 2:21).

2. შესაძლებელია თუ არა, რომ მახარობლის სულისკვეთება გქონდეთ?

² წინა სტატიიდან გავიგეთ, რომ მისიონერი არის ის, ვინც მახარობლად, ანუ სასიხარულო ცნობის საქადაგებლად იგზავნება. ამასთან დაკავშირებით პავლემ რამდენიმე საინტერესო კითხვა დასვა (წაიკითხეთ რომაელების 10:11—15). მან იკითხა: „როგორ მოისმინონ, თუ არავინ უქადაგა?“ შემდეგ ციტატა მოიყვანა ესაიას წინასწარმეტყველებიდან: „რა მშვენიერია კარგის მახარობელთა ფეხები!“ (ეს. 52:7). შეიძლება მისიონერად არ მსახურობდეთ, მაგრამ გქონდეთ მახარობლის სულისკვეთება. ამისათვის კი უნდა მიჰბაძოთ იესო ქრისტეს და გულმოდგინედ იქადაგოთ სასიხარულო ცნობა. გასულ წელს 236 ქვეყანაში 6 957 852 მაუწყებელი ‘ასრულებდა მახარობლის საქმეს’ (2 ტიმ. 4:5).

„ჩვენ ყველაფერი დავტოვეთ და შენ გამოგყევით“

3, 4. რა დატოვა იესომ ზეცაში და რა არის საჭირო იმისათვის, რომ ყოველთვის მას მივყვებოდეთ?

³ დედამიწაზე თავისი მისიის შესასრულებლად იესომ „ყველაფერზე უარი თქვა, მონის სახე მიიღო“, რაც იმას ნიშნავს, რომ დატოვა ზეციერი ცხოვრება და დიდება (ფილ. 2:7). რასაც არ უნდა ვაკეთებდეთ, ჩვენ მიერ გაღებული მსხვერპლი ვერ შეედრება იესოს მიერ გაღებულ მსხვერპლს. მაგრამ ჩვენ შეგვიძლია ბოლომდე მტკიცენი დავრჩეთ და არ დაგვწყდეს გული იმაზე, რაც სატანის ქვეყნიერებაში გვქონდა (1 იოან. 5:19).

⁴ ერთხელ მოციქულმა პეტრემ იესოს უთხრა: „ჩვენ ყველაფერი დავტოვეთ და შენ გამოგყევით“ (მათ. 19:27). როდესაც იესომ უთხრა, რომ გაჰყოლოდნენ, პეტრემ, ანდრიამ, იაკობმა და იოანემ მაშინვე დატოვეს ბადეები და გაჰყვნენ. მათ მეთევზეობას ქადაგება ამჯობინეს. ჩვენგან უმეტესობას არ მოგვიწია ყველაფრის დატოვება იმისათვის, რომ იესოს მიმდევრები გავმხდარიყავით, თუმცა ‘უარვყავით საკუთარი თავი’ და მთელი გულით ვემსახურებით იეჰოვას (მათ. 16:24). ამ არჩევანმა არაერთი კურთხევა მოგვიტანა (წაიკითხეთ მათეს 19:29). თუ მახარობლის სულისკვეთება გვექნება, ეს ბედნიერებას მოგვიტანს. ამას განსაკუთრებით მაშინ ვიგრძნობთ, როდესაც სხვებს ღმერთთან და მის საყვარელ ძესთან დაახლოებაში დავეხმარებით.

5. მოყევით შემთხვევა, საიდანაც ჩანს, თუ როგორ შეიძლება მოიქცეს ემიგრანტი, როდესაც ჭეშმარიტებას გაიგებს.

⁵ ერთი ბრაზილიელი კაცი, ვალმირი, რომელიც სურინამის ცენტრალურ ნაწილში ცხოვრობდა, ოქროს მომპოვებელ კომპანიას ხელმძღვანელობდა. ის ალკოჰოლიკი იყო და უზნეო ცხოვრებას ეწეოდა. ერთხელ იეჰოვას მოწმეებმა მასთან ბიბლიის შესწავლა დაიწყეს. ვალმირი გულმოდგინედ სწავლობდა, ცხოვრებაში ბევრი რამ შეცვალა და მალე მოინათლა კიდეც. მაგრამ სამსახური ხელს უშლიდა, რომ ბიბლიური ცოდნის თანახმად ეცხოვრა. ამიტომ გაყიდა თავისი კომპანია და ბრაზილიაში დაბრუნდა, რათა მისი ოჯახის წევრებსაც გაეგოთ ჭეშმარიტება. ვალმირის მსგავსად, ბევრმა ემიგრანტმა დატოვა სამსახური განვითარებულ ქვეყნებში და სამშობლოში დაბრუნდა, რომ როგორც თავისიანებს, ისე სხვებს, სულიერად დახმარებოდა. ეს მაუწყებლები მართლაც ავლენენ მახარობლის სულისკვეთებას.

6. რისი გაკეთება შეგვიძლია, თუ არა გვაქვს შესაძლებლობა, იქ გადავიდეთ, სადაც სამეფოს მაუწყებლებზე დიდი მოთხოვნილებაა?

⁶ ბევრი მოწმე გადადის იქ, სადაც სამეფოს მაუწყებლებზე დიდი მოთხოვნილებაა. ამ მიზნით ზოგი საზღვარგარეთაც კი მიემგზავრება. შეიძლება პირადად ამის შესაძლებლობა არა გვაქვს, მაგრამ შეგვიძლია მივბაძოთ იესოს და ყველაფერი გავაკეთოთ, რომ საუკეთესოდ ვიმსახუროთ.

იეჰოვა გვამზადებს

7. რომელი სკოლები ამზადებს მათ, ვისაც უნდა, რომ უკეთესი მქადაგებელი იყოს?

⁷ იესო დედამიწაზე მსახურებისთვის იეჰოვამ მოამზადა. ის ჩვენც გვამზადებს. იესომ აღნიშნა: «წინასწარმეტყველთა წიგნებში წერია: „ყველა იეჰოვას მიერ განისწავლება“» (იოან. 6:45; ეს. 54:13). დღესდღეობით სამეფოს მაუწყებლების მოსამზადებლად რამდენიმე სკოლა არსებობს. ჩვენ ყველანი ბევრს ვსწავლობთ თეოკრატიული მსახურების სკოლიდან. პიონერებს შესაძლებლობა აქვთ, დაესწრონ პიონერული მსახურების სკოლას. ზოგიერთი გამოცდილი პიონერი უკვე მეორედ დაესწრო ამ სკოლას. უხუცესები და მომსახურეები ესწრებიან სამეფო მსახურების სკოლას, რათა გაიუმჯობესონ სწავლების უნარი და თანამორწმუნეებს უკეთესად დაეხმარონ. დაუქორწინებელი უხუცესები და მომსახურეები სწავლობენ მსახურებაში დახელოვნების სკოლაში, რათა და-ძმებს დაეხმარონ სამქადაგებლო მსახურებაში. ბევრი და-ძმა, რომლებიც სხვა ქვეყნებში მისიონერებად იგზავნებიან, „საგუშაგო კოშკის“ ბიბლიურ სკოლა „გალაადში“ გადიან მომზადებას.

8. რით აჩვენებენ ძმები, რომ აფასებენ მომზადებას, რომელსაც გადიან?

⁸ ამ სკოლებში რომ ესწავლათ, ბევრმა იეჰოვას მოწმემ ცხოვრებაში ცვლილებები მოახდინა. მაგალითად, ერთი ძმა იუგუ მსახურებაში დახელოვნების სკოლას რომ დასწრებოდა კანადაში, თავი დაანება სამუშაოს, რადგან უფროსმა შვებულების აღებაზე უარი უთხრა. იუგუ ამბობს: „არ ვნანობ, რომ სამუშაოს თავი დავანებე. დროებით წამოსვლის უფლება რომ მოეცათ, მერე შეიძლება მოეთხოვათ, სულ იქ მემუშავა. მაგრამ ახლა შემიძლია ნებისმიერი საქმე შევასრულო, რასაც იეჰოვა დამავალებს“. მომზადება რომ გაევლოთ, ბევრმა უარი თქვა იმაზე, რაც ერთ დროს მათთვის ძვირფასი იყო (ლუკ. 5:28).

9. მოყევით შემთხვევა იმის საჩვენებლად, რომ ბიბლიურ სწავლებებსა და სხვების დასახმარებლად ჩვენს გულწრფელ მცდელობას კარგი შედეგები მოაქვს.

⁹ ბიბლიურ სწავლებებსა და სხვების დასახმარებლად ჩვენს გულწრფელ მცდელობას კარგი შედეგები მოაქვს (2 ტიმ. 3:16, 17). განვიხილოთ ერთი შემთხვევა. გვატემალელი საულო დაბადებიდან გონებაშეზღუდული იყო. მასწავლებელმა საულოს დედას უთხრა, რომ თუ ბავშვს დააძალებდა კითხვის სწავლას, ამით მხოლოდ გააღიზიანებდა. დედამ საულო სკოლიდან გამოიყვანა. მაგრამ საულოს ერთმა მოწმემ ასწავლა კითხვა ბროშურით „ისწავლეთ წერა-კითხვა“. საულომ ისე კარგად ისწავლა კითხვა, რომ თეოკრატიული მსახურების სკოლაში დავალებებით გამოსვლა შეძლო. ერთხელაც საულოს დედა კარდაკარ მსახურების დროს მის მასწავლებელს შეხვდა. როდესაც გაიგო, რომ საულომ კითხვა ისწავლა, მასწავლებელმა საულოს დედას სთხოვა, რომ მომდევნო კვირას მასთან მიეყვანა. ასეც მოხდა. მასწავლებელმა საულოს ჰკითხა: „რა უნდა მასწავლო?“ საულომ წაუკითხა ერთი აბზაცი წიგნიდან „რას გვასწავლის ბიბლია სინამდვილეში?“. მასწავლებელმა უთხრა: „ვერ ვიჯერებ, რომ ახლა შენ მე მასწავლი“. მან ცრემლები ვერ შეიკავა და საულოს მოეხვია.

სწავლება, რომელიც ცვლის ადამიანს

10. რომელი პუბლიკაციით შეგვიძლია ბიბლიიდან ჭეშმარიტების სწავლება?

¹⁰ იესო იმას ასწავლიდა, რაც უშუალოდ იეჰოვამ ასწავლა და რაც ღვთის სიტყვაში ეწერა (ლუკ. 4:16—21; იოან. 8:28). როდესაც ვითვალისწინებთ იესოს რჩევებს და იმას ვასწავლით, რაც ბიბლიაშია ჩაწერილი, ამით იესოს ვბაძავთ. ამგვარად, ჩვენ ყველანი ‘ერთსა და იმავეს ვლაპარაკობთ’, რაც ხელს უწყობს ჩვენს ერთიანობას (1 კორ. 1:10). მადლიერები ვართ, რომ „ერთგული და გონიერი მონა“ გვაწვდის ბიბლიაზე დაფუძნებულ პუბლიკაციებს. ეს პუბლიკაციები გვეხმარება, რომ ერთსა და იმავეს ვასწავლიდეთ და როგორც მახარობლებმა, დაკისრებული საქმე შევასრულოთ (მათ. 24:45; 28:19, 20). ერთ-ერთი ასეთი პუბლიკაციაა „რას გვასწავლის ბიბლია?“, რომელიც დღეისათვის 179 ენაზეა ხელმისაწვდომი.

11. როგორ გაუმკლავდა წინააღმდეგობას ერთი ეთიოპიელი და წიგნით „რას გვასწავლის ბიბლია“?

¹¹ ამ წიგნმა მოწინააღმდეგეებს შეიძლება აზრიც კი შეაცვლევინოს. ერთი ეთიოპიელი პიონერი და, ლულა, ბიბლიის შესწავლას ატარებდა. მოულოდნელად ოთახში შემსწავლელის ნათესავი შევარდა და გაბრაზებულმა თქვა, რომ არ სჭირდებოდათ ბიბლიის შესწავლა. ლულა მშვიდად დაელაპარაკა შემსწავლელის ნათესავს და წიგნის „რას გვასწავლის ბიბლია?“ მე-15 თავიდან ყალბი ფულის მაგალითი მოუყვანა. ქალი დამშვიდდა და მათ შესწავლის გაგრძელების საშუალება მისცა. ის მომდევნო შესწავლასაც დაესწრო. მან თქვა, რომ მზად იყო ფულიც კი გადაეხადა, ოღონდ ლულას მასთან ბიბლიის შესწავლა დაეწყო. ლულა კვირაში სამჯერ უტარებდა მას ბიბლიის შესწავლას. ის სულიერად გაიზარდა.

12. მოყევით შემთხვევა, საიდანაც ჩანს, რომ ბავშვებსაც შეუძლიათ ეფექტურად ქადაგება.

¹² ბავშვებსაც შეუძლიათ თანატოლების დახმარება ამ წიგნის გამოყენებით. ერთხელ, 11 წლის ჰავაელი კიანუ სკოლაში ამ წიგნს კითხულობდა. ერთმა თანაკლასელმა ჰკითხა, რატომ არ აღნიშნავდნენ დღესასწაულებს. კიანუმ პირდაპირ წაუკითხა წიგნის დანართის ერთ-ერთი ნაწილი, სათაურით „უნდა აღვნიშნავდეთ დღესასწაულებს?“. შემდეგ წიგნის სარჩევი აჩვენა და ჰკითხა, ყველაზე მეტად რომელი თემა აინტერესებდა. კიანუს კლასელმა ბიბლიის შესწავლა დაიწყო. უნდა აღინიშნოს, რომ გასულ სამსახურებრივ წელს იეჰოვას მოწმეები ძირითადად ამ წიგნით 6 561 426 შესწავლას ატარებდნენ. თქვენც ამ წიგნით ატარებთ ბიბლიის შესწავლებს?

13. მოიყვანეთ მაგალითი, თუ რამდენად ძლიერი გავლენის მოხდენა შეუძლია ბიბლიის შესწავლას?

¹³ ამ წიგნმა შეიძლება დიდი გავლენა მოახდინოს მათზე, ვისაც ღვთის ნების შესრულება უნდა. ცოლ-ქმარმა, რომლებიც სპეციალურ პიონერებად მსახურობენ ნორვეგიაში, ერთ ზამბიელ ოჯახთან ბიბლიის შესწავლა დაიწყო. დაინტერესებულ ცოლ-ქმარს სამი გოგონა ჰყავდა და მეტი შვილი აღარ უნდოდათ. ამიტომ, როდესაც ცოლი დაფეხმძიმდა, მათ აბორტის გაკეთება გადაწყვიტეს. ექიმთან კონსულტაციამდე რამდენიმე დღით ადრე მათ შეისწავლეს მე-13 თავი სათაურით „ღვთის თვალსაზრისი სიცოცხლეზე“. მათზე ძლიერ იმოქმედა იმავე თავში მოცემულმა არდაბადებული ბავშვის სურათმა. ამიტომ გადაწყვიტეს, ცოლს აღარ გაეკეთებინა აბორტი. მათ ვაჟი შეეძინათ და შესწავლის ჩამტარებლის სახელი დაარქვეს. ისინი სულიერად გაიზარდნენ.

14. მოყევით შემთხვევა, რომელიც ცხადყოფს, რომ თუ იმის მიხედვით ვცხოვრობთ, რასაც ვასწავლით, ამას კარგი ნაყოფი გამოაქვს.

¹⁴ როგორც აღვნიშნეთ, იესო რასაც ასწავლიდა, იმასვე აკეთებდა. იეჰოვას მოწმეები ამ მხრივ იესოს ჰბაძავენ. მათი სამაგალითო საქციელი მრავალ ადამიანს ანცვიფრებს. მოვიყვანოთ შემთხვევა. ახალ ზელანდიაში ერთი ბიზნესმენის მანქანა გატეხეს და მისი პორტფელი წაიღეს. მან მომხდარის შესახებ პოლიციას შეატყობინა. პოლიციელმა უთხრა: „პორტფელს მხოლოდ იმ შემთხვევაში დაიბრუნებ, თუ იეჰოვას მოწმე იპოვის“. პორტფელი მართლაც იეჰოვას მოწმემ იპოვა, რომელიც ფოსტალიონად მუშაობდა. ბიზნესმენმა შეიტყო ამის შესახებ და დას სახლში მიაკითხა. როდესაც ნახა, რომ მნიშვნელოვანი დოკუმენტი არ იყო დაკარგული, შვებით ამოისუნთქა. დამ უთხრა მას: „სხვაგვარად ვერც მოვიქცეოდი, რადგან იეჰოვას მოწმე ვარ“. ბიზნესმენს გაახსენდა იმ დილით პოლიციელის ნათქვამი. ეს შემთხვევა აჩვენებს, რომ იეჰოვას მოწმეები იესოს ჰბაძავენ და ბიბლიური სწავლებების თანახმად ცხოვრობენ (ებრ. 13:18).

ისეთი დამოკიდებულება გქონდეთ ადამიანების მიმართ, როგორიც იესოს ჰქონდა

15, 16. რა თვისებები უნდა დაინახოს ჩვენში ხალხმა, ჭეშმარიტებით რომ დაინტერესდეს?

¹⁵ როდესაც ადამიანები ხედავდნენ, თუ როგორ ეპყრობოდა იესო მათ, ჭეშმარიტებით ინტერესდებოდნენ. ის იმდენად მოსიყვარულე და თავმდაბალი იყო, რომ იზიდავდა უბრალო ადამიანებს. იესო თანაუგრძნობდა მათ, თბილი სიტყვებით ანუგეშებდა და კურნავდა კიდეც (წაიკითხეთ მარკოზის 2:1—5). მართალია, ჩვენ სასწაულების მოხდენა არ შეგვიძლია, მაგრამ, თუ ადამიანები დაინახავენ, რომ სიყვარულით, თავმდაბლობითა და თანაგრძნობით ვეპყრობით, მეტად დაინტერესდებიან ჭეშმარიტებით.

¹⁶ სპეციალურმა პიონერმა, ტარიუამ, თანაგრძნობა გამოავლინა, როდესაც კარდაკარ ერთ ხანდაზმულ კაცს, ბეერეს შეხვდა, რომელიც წყნარი ოკეანის სამხრეთ ნაწილში კირიბატის ერთ-ერთ შორეულ კუნძულზე ცხოვრობს. თავიდან კაცმა ანიშნა, რომ მოსმენა არ უნდოდა. ტარიუამ როცა დაინახა, რომ კაცი ნახევრად პარალიზებული იყო, ჰკითხა: „იცით, რას ჰპირდება ღმერთი ავადმყოფებსა და ხანდაზმულებს?“ შემდეგ ესაიას წიგნიდან ერთ-ერთი წინასწარმეტყველება წაუკითხა (წაიკითხეთ ესაიას 35:5, 6). გაოცებულმა კაცმა უთხრა: „წლებია, რაც ბიბლიას ვკითხულობ, მისიონერიც მაკითხავს, რომელიც ჩემი თანამორწმუნეა, მაგრამ არ ვიცოდი, ასეთი რამ თუ ეწერა ბიბლიაში“. ბეერემ ბიბლიის შესწავლა დაიწყო და სულიერად წინ წაიწია. ეს ხეიბარი კაცი, რომელიც მოინათლა, დღეს შედარებით უკეთ გრძნობს თავს და ერთ დამოუკიდებელ ჯგუფს ხელმძღვანელობს. ის მთელ კუნძულზე ქადაგებს სასიხარულო ცნობას.

კვლავაც მიჰბაძეთ იესოს

17, 18. ა) რა შემთხვევაში იქნება ჩვენი მსახურება ნაყოფიერი? ბ) როგორი მომავალი ელით მათ, ვინც გულმოდგინედ მსახურობს?

¹⁷ ასეთი შემთხვევები კიდევ ერთხელ ადასტურებს, რომ თუ ისეთ თვისებებს გამოვავლენთ, როგორსაც იესო ავლენდა, ჩვენი მსახურება ნაყოფიერი იქნება. ამიტომ მივბაძოთ იესოს და გულმოდგინედ ვიქადაგოთ!

¹⁸ მას შემდეგ, რაც პეტრე და კიდევ რამდენიმე კაცი იესოს მიმდევრები გახდნენ, პეტრემ ჰკითხა მას: „ამისთვის რა გვექნება?“. იესომ მიუგო: „ყოველი, ვინც დატოვა სახლები ან ძმები, ან დები, ან მამა, ან დედა, ან შვილები, ან ადგილ-მამული ჩემი სახელისთვის, ბევრად მეტს მიიღებს და მარადიულ სიცოცხლეს დაიმკვიდრებს“ (მათ. 19:27—29). ჩვენ საკუთარ თავზე გამოვცდით ამ სიტყვების ჭეშმარიტებას, თუ კვლავაც მივბაძავთ უდიდეს მისიონერს, იესო ქრისტეს.