უძილო ღამეები, რომლებიც სასარგებლო იყო

თვით მეფეებსაც კი აქვთ უძილო ღამეები. ძვ. წ. V საუკუნეში ასეთი ღამე სპარსეთის მმართველ ახაშვეროშს ჰქონდა. შესაძლოა იმაზე ფიქრით, რომ რაღაცის შესრულება გამორჩა, ბრძანა სამეფო მატიანის წაკითხვა. მან შეიტყო, რომ მარდოქაიმ, ერთგულმა მონამ, ხელი შეუშალა მეფის მოსაკლავად შეთქმულებას, მაგრამ არ დაუსაჩუქრებიათ. ახაშვეროშმა გადაწყვიტა, დაუყოვნებლივ გამოესწორებინა ეს დაუდევრობა. ღვთის ხალხისთვის მისი მოქმედებების სასარგებლო შედეგები მიანიშნებს, რომ მეფის უძილობაში ღვთის ხელი ერია (ესთერი 6:1–10).

სამხრეთ აფრიკის ზღვისპირა ქალაქ ჰერმანუსის იეჰოვას მოწმეების კრებას აქვს მიზეზი, ახსოვდეს ბიბლიის ეს მონაკვეთი. ისინი დაქირავებულ დარბაზში ატარებდნენ შეხვედრებს. მრავალი წლის მანძილზე ცდილობდნენ საკუთარი სამეფო დარბაზის ასაშენებლად ნაკვეთი შეესყიდათ. ბოლოს 1991 წელს საუკეთესო ნაკვეთი შესთავაზა ქალაქის საბჭომ.

მაგრამ იეჰოვას მოწმეებისთვის ამ ნაკვეთის მიყიდვას ზოგი შეეწინააღმდეგა. რამდენიმე თვის შემდეგ კრებას აცნობეს, რომ ეკლესიებისთვის ნაკვეთის მიყიდვის თაობაზე სამწლიანი მორატორიუმი დაიდო და შეთავაზება მიწის თაობაზე გაუქმდა. 1993 წლის მაისში კრებამ კვლავ მისწერა საბჭოს თხოვნით, რომ ხელახლა განეხილათ გადაწყვეტილება. ორსიტყვიანი წერილით უპასუხეს, რომ მორატორიუმი ძალაში რჩებოდა.

ამავე წლის ოქტომბერს ქალაქის საბჭოს ერთ-ერთ წევრს უძილობა სჭირდა. ეს მანდილოსანი დროის გაყვანის მიზნით საბჭოს ძველ ოქმებს ათვალიერებდა, რათა ენახა თუ იყო რაიმე საყურადღებო. მისი ყურადღება მიიპყრო იეჰოვას მოწმეთა წერილმა საბჭოს მიმართ, რათა გადაესინჯათ თავიანთი გადაწყვეტილება. ამიტომ მან გადაწყვიტა ეს საკითხი შემდგომი სხდომის დღის წესრიგში დაეყენებინა. მას სურდა აღენიშნათ, რომ იეჰოვას მოწმეებმა ეკლესიებისთვის ნაკვეთის მიყიდვაზე მორატორიუმის დადებამდე მოითხოვეს მიწა.

თავის დროზე კრებას გამოეყო იგივე ნაკვეთი, რომელიც 1991 წელს შესთავაზეს! ეს მთავარ გზაზე მდებარეობს, ამიტომ კრების წევრებისა და დაინტერესებულებისთვის ადვილია იქ მისვლა. მათ მშვენიერი სამეფო დარბაზი ააშენეს, რომელიც 1996 წლის 5 ოქტომბერს იეჰოვასადმი იქნა მიძღვნილი.

თუმცა კრება წუხს, რომ ქალაქის საბჭოს ამ წევრს უძილო ღამე ჰქონდა, მისთვის შეიძლება სანუგეშებელი იყოს ის ფაქტი, რომ მეფე ახაშვეროშსაც კი ჰქონდა ეს. ორივე შემთხვევის შედეგები სასარგებლო იყო. რა თქმა უნდა, ჰერმანუსის კრება ძლიერ მადლიერია, რომ აქვთ საკუთარი სამეფო დარბაზი, ცენტრი წმინდა თაყვანისმცემლობისა და თეოკრატიული სწავლებისთვის, ცნობილ ზღვისპირა ქალაქში (ებრაელთა 10:24, 25).