ირინას საყვარელი სიმღერების წიგნი

არცთუ ისე დიდი ხნის წინ სოფიაში (ბულგარეთი) მოინათლა ცხრა წლის გოგონა ირინა და გახდა იეჰოვას მოწმე. მას უყვარს სიმღერა და დიდ სიხარულს პოულობს იმ სიმღერებით, რომლებიც მოცემულია წიგნში „უგალობეთ იეჰოვას ქებათა ქება“. ირინამ მიზნად დაისახა, რომ ყოველთვიურად რამდენიმე სიმღერა ისწავლოს ზეპირად.

ირინას ერთ-ერთი საყვარელი საგანი სკოლაში არის მუსიკა. ამიტომ მისი მუსიკის მასწავლებელი ძალიან გაოცდა, როდესაც ირინამ სკოლის გუნდში ჩაწერაზე უარი განაცხადა. რატომ მოიქცა ირინა ასე? ის მიხვდა, რომ სიმღერები, რომლის შეწავლასაც მოსთხოვდნენ, ძირითადად ეროვნული გმირებისა და ცრურწმენაზე დაფუძნებული დღესასწაულების განმადიდებელია. ზოგიერთი სიმღერა კი ეროვნული იდეალების ასამაღლებლად აჯანყებისა და ძალადობის მხარდამჭერი. მასწავლებელმა ვერ გაიგო ირინას პოზიცია ამ საკითხთან დაკავშირებით. ირინამ მისწერა მასწავლებელს წერილი, სადაც უხსნიდა თავის რელიგიურ შეხედულებებს, მაგრამ ეს ცდა უშედეგო აღმოჩნდა.

ირინას მამას კარგი იდეა დაებადა. მან მასწავლებელს მისცა წიგნი „უგალობეთ იეჰოვას ქებათა ქება“, რომელშიც სწორედ ის სიმღერებია, ირინას რომ ძალიან უყვარს. რამდენიმე დღის შემდეგ მასწავლებელმა უთხრა ირინას მისულიყო მუსიკის კაბინეტში. მან ირინას სთხოვა ემღერა თავისი საყვარელი სიმღერები კლასის თანდასწრებით, აკომპანემენტს თვითონ მასწავლებელი ასრულებდა პიანინოზე. ირინა საათზე მეტ ხანს მღეროდა! მასწავლებელმა აღნიშნა, რომ ირინას საყვარელი სიმღერების წიგნში მშვენიერი მელოდიები იყო.