კუნძულზე თაყვანისმცემლობის უფრო დიდი თავისუფლებით ხარობენ
კარიბის ზღვაში მდებარე მშვენიერ კუნძულ კუბის მცხოვრებლებმა ამას წინათ არნახული სულიერი გამოცოცხლება განიცადეს. 1998 წლის დასასრულს ვესტინდოეთში მცხოვრები იეჰოვას მოწმეები დიდი ხნის ნანატრი კურთხევებით დაჯილდოვდნენ. 30 წელზე მეტი ხნის მანძილზე იეჰოვას მოწმეების ხელმძღვანელი საბჭოს წევრები პირველად ეწვივნენ ამ მხარეს 15 სხვა დელეგატის თანხლებით. მოწვეული სტუმრები ჩამოსულები იყვნენ ავსტრალიიდან, ავსტრიიდან, ახალი ზელანდიიდან, ბელგიიდან, დიდი ბრიტანეთიდან, იტალიიდან და პუერტო-რიკოდან.
ეს იყო ისტორიული მოვლენა იქ მყოფი სამეფოს 82 258 მაუწყებლისთვის და 87 590 ადამიანისთვის, რომლებიც შეუერთდნენ მათ 1998 წლის გაზაფხულზე უფლის გახსენების საღამოს აღნიშვნისას.
1998 წლის 1-დან 7 დეკემბრის ჩათვლით ლოიდ ბერი, ჯონ ბარი და გერიტ ლეში ეწვივნენ ბეთელის ოჯახს ჰავანაში და დაესწრნენ რამდენიმე საოლქო კონგრესს სახელწოდებით, „ღვთისმოსაწონი ცხოვრების გზა“, რომლებიც ჩატარდა კუბაში. ისინი მოხარულნი იყვნენ, რომ მიეცათ შესაძლებლობა შეხვედროდნენ მიმომსვლელ უხუცესებს და უკეთესად გაცნობოდნენ კუბის სახელმწიფო მოხელეებს.
„ეს იყო მნიშვნელოვანი თეოკრატიული მოვლენა ჩემსა და ჩემი მეუღლის ცხოვრებაში“, — აღნიშნა ჯონ ბარმა. „კუბაში მცხოვრები ჩვენი საყვარელი ძმები და დები ჭეშმარიტებისთვის თავდადებული მსახურები არიან! ჩემზე ამან დიდი შთაბეჭდილება მოახდინა და ვიგრძენი, რომ ჩვენი მსოფლიო საძმო მართლაც ძვირფასია!“ „ამ მნიშვნელოვანი კვირის განმავლობაში კარგად დავინახე, როგორ პირობებში ცხოვრობენ ჩვენი ძმები იქ“, — დაამატა ლოიდ ბერიმ.
ბოლო ხუთი წლის მანძილზე, იეჰოვას მოწმეები თაყვანისმცემლობის უფრო დიდი თავისუფლებით სარგებლობენ კუბაში. კუბის ხელისუფლების წარმომადგენლების კომენტარები ცხადყოფენ, რომ მათი სურვილია გაგრძელდეს ეს საქმიანობა.
1994 წლის სექტემბერში ჰავანის ბეთელში ამოქმედდა ბეჭდვითი საქმიანობა. იეჰოვას მოწმეებს კიდევ ერთხელ მიეცათ შესაძლებლობა, დაუფარავად ჩაეტარებინათ შეხვედრები და ექადაგათ კარდაკარ. მოგვიანებით, 1998 წელს, ხელისუფლების წარმომადგენლებმა დაუშვეს, რომ მათ ქვეყანას სწვეოდა იეჰოვას მოწმეების 18-კაციანი დელეგაცია, რომელთა შორისაც იყო ხელმძღვანელი საბჭოს სამი წევრი.
კვლავ სასიხარულო შეხვედრა
როდესაც დელეგატების ჯგუფი ჰავანაში ჩავიდა, ხოსე მარტის სახელობის აეროპორტში ისინი გულითადად მიიღეს ხელისუფლების წარმომადგენლებმა და ჯგუფმა ბეთელის ოჯახიდან, რომელთა შორისაც იყო ძმა, რომელსაც ახსოვდა, 1961 წელს ხელმძღვანელი საბჭოს წევრის, მილტონ ჰენშელის, ბოლო ვიზიტი კუბაში. იმ პერიოდში ეს ძმა 12 წლის იყო, ამჟამად კი მიმომსვლელ ზედამხედველად მსახურობს.
როდესაც დელეგატები ბეთელის სახლში მივიდნენ, მათ გლადიოლუსის, ვარდების, ჟასმინების, ყვითელი და წითელი ზიზილების თაიგულებით დახვდნენ, რომლებიც ერთმა ძმამ სპეციალურად ამ განსაკუთრებული შემთხვევისთვის გაზარდა. დელეგატების მიღებისას ყველას ცრემლებით ჰქონდა თვალები სავსე. მოგვიანებით ისინი სტუმრებს კუბური შემწვარი ღორის ხორცით, ბრინჯით, ლობიოთი, სალათით, „მოჯოს“ საწებლიანი იუკათი („მოჯო“ მზადდება ნივრითა და ზეითუნის ზეთით) და ახალმოკრეფილი ხილით გაუმასპინძლდნენ. სადილის შემდეგ ხელმძღვანელი საბჭოს თითოეულმა წევრმა წაიკითხა გამამხნევებელი მოხსენება ბეთელის ფასდაუდებელ მსახურებასთან დაკავშირებით. განსაკუთრებით გულის ამაჩუყებელი იყო, როცა ძმა ლეშმა ესპანურ ენაზე მიმართა ძმებს. ჰავანის ბეთელის ოჯახში 48 რეგულარული და 18 დროებითი მოხალისე მსახურია.
კუბელი ძმებისთვის წიგნები და ბიბლიები იტალიაში იბეჭდება, ხოლო შავ-თეთრი ჟურნალები „საგუშაგო კოშკი“ და გამოიღვიძეთ!“ უშუალოდ კუბაში — ორ როტაციულ მანქანაზე. ჟურნალების დასაბეჭდად საჭიროა საათობით მუშაობა და ხელით მონოტონური საქმის შესრულება არასაკმარისი ფართობის მქონე შენობაში. მოხალისეები უზომოდ აფასებენ იეჰოვასადმი მსახურებას (2 კორინთელთა 4:7).
კონგრესის მნიშვნელოვანი პუნქტები
დელეგაციის 18 წარმომადგენელი 3 ჯგუფად დაიყო საოლქო კონგრესებზე დასასწრებად, რომლებიც ტარდებოდა სამ ქალაქში: ჰავანაში, კამაგუესა და ოლგინში. ძმებისა და დების დიდი ჯგუფი, რომელთა შორის მრავალი უხუცესი და პიონერი იყო, მიიწვიეს ამ კონგრესების სამივე დღის პროგრამაზე დასასწრებად სამ სხვადასხვა ადგილზე. ადგილობრივ მოწმეებს აცნობეს, რომ ეს იქნებოდა განსაკუთრებული შემთხვევა, მაგრამ მათ არ იცოდნენ, რომ დამსწრეებს შორის ხელმძღვანელი საბჭოს წევრებიც იქნებოდნენ. წარმოიდგინეთ, რამხელა სიურპრიზი იქნებოდა მათთვის, როდესაც დაინახავდნენ, პარასკევ დილით როგორ ჩამოდიოდნენ დაქირავებული ავტობუსებიდან ეს საყვარელი ძმები და მათი მეუღლეები!
ხელისუფლების წარმომადგენლების ნებართვით კონგრესები ჩატარდა ძმების მიერ აშენებულ გადაუხურავ ნაგებობებში. იმ ადგილზე, სადაც ტარდებოდა ჰავანის კონგრესი, შესასვლელში ქვებზე ამოკვეთილი იყო „ფსალმუნი 132:1“, რაც შეახსენებდა ძმებს ამ მუხლში მოცემულ სიტყვებს: „აჰა, რა კარგია და რა საამურია, ერთად რომ ცხოვრობენ ძმები!“. უეჭველად, ასეთ გარემოში მართლაც სასიამოვნო და სასარგებლო იყო ქრისტიანების მეგობრული ურთიერთობა.
დამსწრეებმა აღნიშნეს, რომ შესანიშნავად იყო წარმოდგენილი მთელი რიგი მოხსენებები და ინტერვიუები; ასევე მათზე შთაბეჭდილება მოახდინა დრამამ, რომელიც დაფუძნებული იყო დანიელის მე-3 თავში მოცემულ ბიბლიურ ისტორიაზე, რომელიც ძველ ბაბილონში მოხდა. ერთმა დამ აღნიშნა: „ყველამ შესანიშნავად ითამაშა თავ-თავიანთი როლი დრამაში, ამავე დროს, ხმებიც იმდენად კარგად იყო შეწყობილი ერთმანეთთან, რომ ვერც კი მიხვდებოდი, რომ ჩანაწერი წინასწარ ჰქონდათ გაკეთებული . . . აშკარად ჩანდა, რომ ბოროტი ბაბილონელები მართლაც ბოროტები იყვნენ, ხოლო სამი ებრაელი მტკიცე და შეურყეველი“.
რელიგიურ საქმეთა სამინისტროს თანამშრომლებმა და ხელისუფლების სხვა წარმომადგენლებმა, რომლებიც მოვიდნენ კონგრესებზე დასასწრებად, შეაქეს ძმები ორგანიზებულობისა და კარგი ყოფაქცევისთვის. ძმა ბერმა გულწრფელი მადლიერება გამოთქვა ხელისუფლების წარმომადგენლების მისამართით, რადგან ისინი საუკეთესოდ მოეპყრნენ მოწვეულ დელეგატებს. მქუხარე ტაში, რომელიც ხშირად რამდენიმე წუთი გრძელდებოდა, იმის მანიშნებელი იყო, რომ ძმები მადლიერებას გამოთქვამდნენ წარმოდგენილი მოხსენებებისთვის და ასევე, მადლობას უხდიდნენ ხელისუფლების წარმომადგენლებს, რომლებმაც დაუშვეს, რომ ჩატარებულიყო კონგრესები. „ეს იყო უჩვეულო მოვლენა, რომელმაც ჩვენს მოლოდინს გადააჭარბა — მცირე მასშტაბიანი საერთაშორისო კონგრესი!, — აღნიშნა ერთმა ქრისტიანულმა ოჯახმა. — ეს მართლაც შესანიშნავი იყო, ამით დამტკიცდა, რომ იეჰოვა უდიდესი ძალის მფლობელია, რომელსაც შესწევს უნარი, სისრულეში მოიყვანოს თავისი განზრახვები“.
გარდა ამისა, ამ კონგრესების საშუალებით სხვებმა უკეთესად გაიცნეს მოწმეები. ავტობუსის ერთ-ერთი მძღოლი დაესწრო კონგრესის შაბათისა და კვირის პროგრამას. მან აღნიშნა, რომ უამრავი რამ ჰქონდა მოსმენილი იეჰოვას მოწმეებზე, მაგრამ ახლა მიხვდა, რომ ისინი კეთილი და მშვიდობისმოყვარე ხალხია.
„ეს არასოდეს დაგვავიწყდება“
დელეგატებზე შთაბეჭდილება მოახდინა კუბის მაცხოვრებლების მიერ გამოვლენილმა სითბომ და გულითადობამ. კუბელები შრომისმოყვარე, პრინციპული და კეთილი ხალხია. ერთმა კონგრესის დელეგატმა აღნიშნა: „სრულიად უცნობი ადამიანები არაერთხელ გვთავაზობდნენ დახმარებას“.
დელეგატებზე ღრმა შთაბეჭდილება მოახდინა კუბაში მცხოვრები მოწმეების მიერ გამოვლენილმა რწმენამ, სიყვარულმა და მათმა ბედნიერმა გამომეტყველებამ. მართალია, ისინი უამრავ დაბრკოლებებს აწყდებიან, მაგრამ მათ საყრდენს იეჰოვა წარმოადგენს (ფსალმუნი 90:2). ჯონ ბარმა აღნიშნა: „ჩემი ამ პირველი ვიზიტის დროს ბევრმა რამემ აღმაფრთოვანა კუბაში; კერძოდ, ქვეყნის სილამაზემ, ადამიანების მეგობრულმა დამოკიდებულებამ და, განსაკუთრებით, კუბელი მოწმეების განწყობილებამ. არასდროს მსმენია, ვინმეს ასე გულწრფელად ემღეროს სამეფო სიმღერები და ასე მხურვალედ და ხანგრძლივად დაეკრას ტაში სულიერი საკითხებით გაჟღენთილი მასალის გულთან ახლოს მიტანის შემდეგ! ეს არასოდეს დაგვავიწყდება და ყოველთვის ძვირფასი იქნება ჩვენთვის“.
ფსალმუნის 96:1-ში ნათქვამია: „გაიხარონ უამრავმა კუნძულებმა“. ნამდვილად, კუნძულ კუბაზე მცხოვრებმა იეჰოვას მოწმეებმა გაიხარეს, რომ მიეცათ შესაძლებლობა, უფრო თავისუფლად ეცათ თაყვანი ღვთისთვის; აგრეთვე მათი სიხარული გამოწვეული იყო სხვადასხვა ეროვნების დელეგატების ისტორიული ვიზიტითაც.
[სურათები 8 გვერდზე]
კუბაში უამრავი ოჯახი დაესწრო სპეციალურ საოლქო კონგრესებს სახელწოდებით, „ღვთისმოსაწონი ცხოვრების გზა“.
[სურათი 8 გვერდზე]
1994 წელს ჰავანაში ხელახლა გაიხსნა ბეთელი.
[სურათი 8 გვერდზე]
ხელმძღვანელი საბჭოს წევრები ხელს აწერენ ხელისუფლების წარმომადგენლებისთვის განკუთვნილ სამახსოვრო ბიბლიებს.