რეგულარულად ისწავლეთ ღვთის სიტყვა მთელი ოჯახით
„არა პურითა ერთითა ცოცხლობს კაცი, არამედ ღვთის პირიდან მომდინარე ყოველი სიტყვით“ (მათე 4:4).
1. რას ამბობს ბიბლია ოჯახის უფროსის პასუხისმგებლობაზე, ასწავლოს შვილებს იეჰოვას გზები?
იეჰოვა ღმერთი ხშირად შეახსენებდა ოჯახის უფროსებს შვილების დარიგებასთან დაკავშირებით თავიანთი პასუხისმგებლობის შესახებ. ასეთი დარიგებები ბავშვებს ბევრ რამეს ასწავლიდა და მომავლისთვისაც ამზადებდა. ღვთის მიერ გამოგზავნილმა ანგელოზმა აბრაამს სახლეულობის დამოძღვრის პასუხისმგებლობაზე მიუთითა, რათა ოჯახს ‘უფლის გზაზე ევლო’ (დაბადება 18:19). ისრაელ მშობლებს დავალებული ჰქონდათ, შვილებისთვის აეხსნათ, როგორ გაათავისუფლა ისინი ღმერთმა ეგვიპტიდან და როგორ მისცა რჯული სინაის მთაზე, ხორებში (გამოსვლა 13:8, 9; მეორე რჯული 4:9, 10; 11:18–21). ქრისტიანული ოჯახის უფროსებს ეძლევათ რჩევა, „უფლის მოძღვრებითა და დარიგებით“ აღზარდონ შვილები (ეფესელთა 6:4). მაშინაც კი, როდესაც მხოლოდ ერთ-ერთი მშობელია იეჰოვას მსახური, ის უნდა ეცადოს, შვილებს იეჰოვას გზები ასწავლოს (2 ტიმოთე 1:5; 3:14, 15).
2. საჭიროა თუ არა ოჯახური შესწავლა, თუ ოჯახში ბავშვები არა ჰყავთ? განმარტეთ.
2 მაგრამ ღვთის სიტყვის ოჯახური შესწავლა მხოლოდ ბავშვიან ოჯახებს როდი უნდა ჰქონდეთ. როდესაც ცოლ-ქმარს, მაშინაც კი, თუ შვილები არ ჰყავთ, აქვთ ოჯახური შესწავლა, ეს იმის მაჩვენებელია, რომ ისინი აფასებენ სულიერ საკითხებს (ეფესელთა 5:25, 26).
3. რატომ არის მნიშვნელოვანი ოჯახური შესწავლის რეგულარულად ჩატარება?
3 იეჰოვას მიერ ისრაელებისთვის უდაბნოში ნასწავლი გაკვეთილის თანახმად, საუკეთესო შედეგების მისაღწევად საჭიროა რეგულარული შესწავლა: „მხოლოდ პურით არ ცოცხლობს კაცი, არამედ უფლის პირიდან გამომავალი ყოველი სიტყვით ცოცხლობს კაცი“ (მეორე რჯული 8:3). ოჯახური მდგომარეობის მიხედვით ზოგმა შეიძლება გადაწყვიტოს, ჰქონდეს ყოველკვირეული შესწავლა, სხვებმა კი ყოველდღიურად ცოტ-ცოტა ისწავლონ. არა აქვს მნიშვნელობა, როგორ არჩევანს გააკეთებთ, მთავარია, რომ შემთხვევითობაზე არ დატოვოთ შესწავლა. ამისათვის „მოივაჭრეთ ჟამი“. ჟამის მოსავაჭრებლად საჭირო საფასურის გადახდა გონივრულად დაბანდებული კაპიტალია. სასწორზე თქვენი ოჯახის წევრების სიცოცხლეა დადებული (ეფესელთა 5:15–17; ფილიპელთა 3:16).
მიზნები, რომლებიც ყოველთვის უნდა გახსოვდეთ
4, 5. ა) რა მნიშვნელოვანი საკითხის სწავლება დაავალა იეჰოვამ მშობლებს მოსეს მეშვეობით? ბ) რა შედის ამაში დღეს?
4 ოჯახური შესწავლა უდიდესი სარგებლობის მომტანი იქნება, თუ ყოველთვის მტკიცედ გემახსოვრებათ დასახული მიზნები. განვიხილოთ ამის რამდენიმე შესაძლებლობა.
5 ყოველ შესწავლაზე შეეცადეთ, გააღრმაოთ იეჰოვა ღმერთისადმი სიყვარული. აღთქმულ ქვეყანაში შესვლამდე, როდესაც ისრაელმა ერმა მოაბის ველზე მოიყარა თავი, მოსემ ყურადღება გაამახვილა სიტყვებზე, რომლებსაც მოგვიანებით იესო ქრისტემ ‘რჯულის დიდი მცნება’ უწოდა. რა სიტყვები იყო ეს? „გიყვარდეს უფალი, შენი ღმერთი მთელი შენი გულითა და სულით, მთელი შენი შეძლებით“ (მათე 22:36, 37; მეორე რჯული 6:5). მოსე მოუწოდებდა ისრაელებს, გულსა და გონებაში ჩაებეჭდათ ეს მცნება და შვილებისთვისაც ესწავლებინათ ის. ამისათვის მათ ბავშვებთან არაერთხელ უნდა აღენიშნათ, ყურადღება უნდა გაემახვილებინათ, იეჰოვასადმი სიყვარულის მიზეზებზე; მისადმი სიყვარულისთვის ხელისშემშლელი აზროვნება და საქციელი უნდა გამოესწორებინათ და პირად ცხოვრებაშიც გამოევლინათ იეჰოვასადმი სიყვარული. განა ჩვენი შვილებიც მსგავსად არ უნდა დავარიგოთ? რა თქმა უნდა! თანაც უნდა დავეხმაროთ, ‘გულები დაიცვითონ’ ანუ ჩამოიშორონ ყველაფერი, რაც იეჰოვას სიყვარულში ხელს შეუშლიდათ (მეორე რჯული 10:12, 16; იერემია 4:4). დამაბრკოლებელ ფაქტორთა შორის შეიძლება იყოს იმის სიყვარული, რაც წუთისოფელშია, აგრეთვე მის საქმეებში ჩაფლობის საშიშროებები (1 იოანე 2:15, 16). იეჰოვასადმი სიყვარული მოქმედი, ძლიერი და იმის კეთებისკენ აღმძვრელი უნდა იყოს, რაც ჩვენს ზეციერ მამას სიამოვნებს (1 იოანე 5:3). ოჯახურმა შესწავლამ რომ ხანგრძლივი სარგებლობა მოგიტანოთ, ის ყოველთვის უნდა განამტკიცებდეს ამ სიყვარულს.
6. ა) რა მოითხოვება ზუსტი შემეცნების გადასაცემად? ბ) როგორ უსვამს ხაზს საღვთო წერილი ზუსტი შემეცნების მნიშვნელოვნებას?
6 ჩაუნერგეთ ღვთის მოთხოვნების შესახებ ზუსტი შემეცნება. რა შედის ამაში? საკმარისი არ არის ჟურნალიდან ან წიგნიდან მხოლოდ პასუხის ამოკითხვა. იმის დასანახავად, რომ დანარჩენებმა ნათლად გაიგეს საკვანძო სიტყვები და ძირითადი აზრები, ჩვეულებრივ, საჭიროა საუბარი. ზუსტი შემეცნება მნიშვნელოვანი ფაქტორია ახალ პიროვნებად შემოსვაში, პრობლემებთან გამკლავებისას ყურადღების მართლაც მნიშვნელოვან საკითხებზე გამახვილებასა და, ამგვარად, ნამდვილად ღვთისმოსაწონად მოქმედებაში (ფილიპელთა 1:9–11; კოლასელთა 1:9, 10; 3:10).
7. ა) რომელი კითხვების დასმა დაეხმარება ოჯახს ნასწავლი მასალის პრაქტიკულად გამოყენებაში? ბ) როგორ ამახვილებს ყურადღებას საღვთო წერილი ასეთი მიზნის ღირებულებაზე?
7 დაეხმარეთ ნასწავლის პრაქტიკულად გამოყენებაში. ყოველი ოჯახური შესწავლის დროს გახსოვდეთ ეს და დასვით კითხვები: „რა გავლენა უნდა მოახდინოს ამ მასალამ ჩვენზე? საჭიროა თუ არა ჩვენს ამა თუ იმ მოქმედებაში რაიმე ცვლილების შეტანა? რატომ უნდა გვქონდეს რაღაცის შეცვლის სურვილი?“ (იგავნი 2:10–15; 9:10; ესაია 48:17, 18). ნასწავლის პრაქტიკულად გამოყენებაზე საკმაო ყურადღების მიპყრობა მნიშვნელოვანი ფაქტორია ოჯახის წევრების სულიერი ზრდისთვის.
ბრძნულად გამოიყენეთ სასწავლო საშუალებები
8. რა საშუალებებს გვაწვდის მონის კლასი ბიბლიის შესასწავლად?
8 „ერთგული და გონიერი მონა“ უხვად გვაწვდის საშუალებებს, რომელთა გამოყენებაც შეიძლება შესწავლის დროს. ჟურნალი „საგუშაგო კოშკი“, რომელიც ბიბლიასთან ერთად გამოსაყენებლად არის გამიზნული, 131 ენაზე გამოიცემა. ბიბლიის შესასწავლად გამოცემულია წიგნები 153 ენაზე, ბროშურები — 284-ზე, აუდიოკასეტები — 61-ზე, ვიდეოკასეტები — 41-ზე და 9 ენაზე ბიბლიის კვლევის კომპიუტერული პროგრამებიც კი არის შედგენილი (მათე 24:45–47).
9. ოჯახთან ერთად „საგუშაგო კოშკის“ შესწავლისას როგორ შეგვიძლია გამოვიყენოთ ამ აბზაცში მითითებულ მუხლებში მოცემული რჩევები?
9 მრავალი ოჯახურ შესწავლას კრებისთვის „საგუშაგო კოშკის“ მოსამზადებლად იყენებს. რამხელა სარგებლობის მოტანა შეუძლია ამას! „საგუშაგო კოშკი“ შეიცავს ძირითად სულიერ საზრდოს, რომელიც მთელ მსოფლიოში მიეწოდება იეჰოვას ხალხს აღსაშენებლად. ოჯახთან ერთად ამ ჟურნალის შესწავლისას ნუ შემოიფარგლებით მხოლოდ აბზაცების წაკითხვითა და იქვე მოცემულ კითხვებზე პასუხის გაცემით. მთელი გულით ეცადეთ ჩასწვდეთ შინაარსს. დრო დაუთმეთ მითითებული ბიბლიური მუხლების წაკითხვას. წაახალისეთ ოჯახის წევრები, ეს მუხლები აბზაცში მოყვანილ აზრებს დაუკავშირონ. ყოველივე ეს გულმოდგინედ აკეთეთ (იგავნი 4:7, 23; საქმეები 17:11).
10. რა შეიძლება გაკეთდეს იმ მიზნით, რომ შესწავლაში ბავშვებმაც მიიღონ მონაწილეობა, და რით შეიძლება შესწავლა მათთვის სასიამოვნო დროდ აქციოთ?
10 თუ ოჯახში ბავშვები გყავთ, როგორ შეგიძლიათ შესწავლა არა მხოლოდ წესად გქონდეთ, არამედ ის იყოს აღშენების დრო, ტარდებოდეს საინტერესოდ და ბედნიერების ატმოსფერო სუფევდეს? ეცადეთ, შეძლებისდაგვარად, ყველამ მიიღოს მონაწილეობა, ისე რომ, ყურადღება სასწავლო მასალაზე იყოს გამახვილებული. თუ შესაძლებელია, თითოეულ ბავშვს ჰქონდეს ბიბლიისა და შესასწავლი ჟურნალის საკუთარი ეგზემპლარი. მშობელს შეუძლია იესოს მსგავსად გამოავლინოს სითბო და ბავშვი გვერდზე მოისვას ან პატარას ხელიც კი მოხვიოს (შეადარეთ მარკოზი 10:13–16). ოჯახის უფროსმა შეიძლება ყველაზე უმცროსს სასწავლო მასალაში მოცემული სურათის აღწერა სთხოვოს. ბავშვს შეიძლება წინასწარ მიეცეს დავალება, წაიკითხოს გარკვეული მუხლი. უფროსს შეიძლება დაევალოს, რომ მოიყვანოს შემთხვევები, სადაც შეიძლებოდა ამ სასწავლო მასალის გამოყენება.
11. სხვა რა სასწავლო საშუალებები არსებობს და, თუ ისინი ხელმისაწვდომია თქვენთვის, როგორ შეიძლება ოჯახური შესწავლისას მათი ეფექტურად გამოყენება?
11 მიუხედავად იმისა, რომ შეიძლება საუბრებს „საგუშაგო კოშკზე“ აფუძნებდეთ, მხედველობიდან არ გამოგრჩეთ სხვა სასწავლო საშუალებები, რომლებიც მრავალ ენაზეა ხელმისაწვდომი. თუ ბიბლიური ინფორმაციის ისტორიული ფონი ან განმარტება გჭირდებათ, ეს შეიძლება ბიბლიურ ცნობარში იპოვოთ (Insight on the Scriptures). სხვა კითხვებზე პასუხის მოძებნა შეიძლება «„საგუშაგო კოშკის“ პუბლიკაციების საძიებლის» ან საზოგადოების მიერ შედგენილი ბიბლიის კვლევის კომპიუტერული პროგრამის დახმარებით. ამ საშუალებების გამოყენების სწავლამ (თუ ისინი თქვენს ენაზე ხელმისაწვდომია) შეიძლება ოჯახურ შესწავლაში ძვირფასი წვლილი შეიტანოს. ბავშვებში ინტერესის აღძვრის მიზნით, შეიძლება ოჯახურ შესწავლაში ჩართოთ საზოგადოება „საგუშაგო კოშკის“ მიერ გამოცემული ვიდეოკასეტის გარკვეული ნაწილის ყურება ან დრამის აუდიოჩანაწერის რომელიმე ეპიზოდის მოსმენა და შემდეგ განიხილოთ ისინი. ამ საშუალებების გონივრულად გამოყენება დაგეხმარებათ, რომ თქვენი ოჯახური შესწავლა მთელი ოჯახისთვის საინტერესო და სარგებლობის მომტანი გახადოთ.
შეუსაბამეთ თქვენი ოჯახის მოთხოვნილებებს
12. როგორ დაგეხმარებათ ოჯახური შესწავლა იმ პრობლემებთან გამკლავებაში, რომლებიც დაუყოვნებელ გადაჭრას მოითხოვს?
12 შეიძლება თქვენი ოჯახი, ჩვეულებრივ, „საგუშაგო კოშკიდან“ კრების შეხვედრაზე განსახილველ მასალას სწავლობს, მაგრამ მხედველობიდან არ გამოგრჩეთ ოჯახის თითოეული წევრის პირადი პრობლემებიც. თუ დედა არ მუშაობს, მას შეუძლია ყოველდღიურად დაუთმოს ბავშვებს გარკვეული დრო მათი სკოლიდან დაბრუნების შემდეგ. ზოგი პრობლემის გამკლავება ამ დროს შეიძლება, ზოგს კი მეტი დრო და მეტი ყურადღება სჭირდება. როდესაც ოჯახში წამოიჭრება პრობლემა, რომელსაც დაუყოვნებელი გადაჭრა სჭირდება, ნუ უგულებელყოფთ მას (იგავნი 27:12). ამაში შეიძლება არა მხოლოდ სკოლაში წამოჭრილი სირთულეები შედიოდეს. შეარჩიეთ სათანადო მასალა და წინასწარ უთხარით ყველას, რის შესწავლას აპირებთ.
13. რატომ შეიძლება აღმოჩნდეს სასარგებლო ოჯახში სიღარიბესთან გამკლავებაზე საუბარი?
13 მაგალითად, დედამიწის მრავალ კუთხეში ხალხი სიღარიბის მარწუხებშია; ასე რომ, იქ შეიძლება აუცილებელი იყოს საუბარი ამ პრობლემასთან გამკლავების შესახებ. თქვენი ოჯახისთვისაც სასარგებლო ხომ არ იქნებოდა ოჯახური შესწავლა ცხოვრებისეულ სიტუაციებსა და ბიბლიურ პრინციპებზე აგეგოთ? (იგავნი 21:5; ეკლესიასტე 9:11; ებრაელთა 13:5, 6, 18).
14. რა სიტუაციებმა შეიძლება წამოჭრას ოჯახში ძალადობის, ომებისა და ქრისტიანული ნეიტრალიტეტის შესახებ იეჰოვას თვალსაზრისზე საუბარი?
14 კიდევ ერთ აქტუალურ თემას წარმოადგენს ძალადობა. თითოეულ ჩვენგანს სჭირდება, გულსა და გონებაში მტკიცედ ჩაიბეჭდოს იეჰოვას თვალსაზრისი (დაბადება 6:13; ფსალმუნი 10:5). ოჯახური შესწავლის დროს ამ თემაზე საუბრისას შეიძლება განხილულ იქნეს, როგორ გაუმკლავდნენ ბავშვები სკოლაში ხულიგნებს, ისწავლონ თუ არა თავდაცვის მიზნით რაიმე ილეთები ან რით გაერთონ. დღეს ძალადობა ყველგან არის გავრცელებული; თითქმის ყველა ქვეყანაში მძვინვარებს სამოქალაქო ომი, ხდება პოლიტიკური ან ეთნიკური კონფლიქტები, ან ბანდებს შორის შეტაკებები. ყოველივე ამის შედეგად, შეიძლება ოჯახში აუცილებელი გახდეს ქრისტიანული ნეიტრალიტეტის შენარჩუნების შესახებ საუბარი (ესაია 2:2–4; იოანე 17:16).
15. როგორ უნდა მიეცეს შვილებს რჩევები სექსსა და ქორწინებასთან დაკავშირებით?
15 ბავშვების წამოზრდასთან ერთად, ასაკის შესაბამისად, საჭიროა მათთან სექსსა და ქორწინებაზე საუბარი. ზოგან მშობელთა უმეტესობა არასოდეს ლაპარაკობს შვილებთან სქესობრივი ურთიერთობის შესახებ. დასაშვებია, გაუთვითცნობიერებელი ბავშვები შეცდომაში შეიყვანოს სხვა ახალგაზრდების შეხედულებებმა, რასაც შეიძლება სავალალო შედეგები მოჰყვეს. განა უკეთესი არ იქნებოდა მიგვებაძა იეჰოვასთვის, რომელიც ბიბლიაში პირდაპირ, მაგრამ ტაქტიანად იძლევა ამ საკითხებთან დაკავშირებულ რჩევებს? ღვთის რჩევები ჩვენს შვილებს საკუთარი თავისადმი პატივისცემის გრძნობის შენარჩუნებასა და საპირისპირო სქესის წარმომადგენლებთან ღირსეულად მოპყრობაში დაეხმარება (იგავნი 5:18–20; კოლასელთა 3:5; 1 თესალონიკელთა 4:3–8). მაშინაც კი, თუ ამ საკითხებზე ადრე გილაპარაკიათ, ნუ მოგერიდებათ ამაზე კვლავ საუბარი. დროთა განმავლობაში, ახალ-ახალი სიტუაციები იქმნება და ამიტომ გამეორება ძალზე მნიშვნელოვანია.
16. ა) როდის ატარებს ზოგი ოჯახი შესწავლას? ბ) როგორ უმკლავდებით დაბრკოლებებს, რომლებიც ხელს გიშლით ოჯახური შესწავლის რეგულარულად ჩატარებაში?
16 როდის შეიძლება ოჯახური შესწავლის ჩატარება? მთელი დედამიწის ზურგზე არსებული ბეთელის ოჯახების მიბაძვით მრავალმა გადაწყვიტა, რომ ოჯახური შესწავლა ორშაბათ საღამოს დაეგეგმა. სხვები სხვაგვარად მოიქცნენ. არგენტინაში 11-კაციანი ოჯახი, რომელშიც 9 ბავშვი იზრდება, ამ მიზნით ყოველ დილით, რეგულარულად 5 საათზე დგებოდა, რადგან ყველა სხვადასხვა დროს გადიოდა სახლიდან და ეს საშუალებას არ აძლევდათ, რომ სხვა დროს შეკრებილიყვნენ. ეს ადვილი არ იყო, მაგრამ ასეთი სახით ბავშვების გონებასა და გულებში ოჯახური შესწავლის მნიშვნელოვნება იბეჭდებოდა. ფილიპინებზე ერთი უხუცესი რეგულარულად ატარებდა ოჯახურ შესწავლას ცოლსა და სამ შვილთან. კვირის განმავლობაში მშობლები თითოეულ ბავშვთანაც ატარებდნენ პირად შესწავლას, რათა მათ ჭეშმარიტება გაეთავისებინათ. შეერთებულ შტატებში ერთი და, რომელსაც ურწმუნო ქმარი ჰყავს, ყოველ დილით აცილებს შვილებს სკოლის ავტობუსამდე. ავტობუსის მოლოდინში, დაახლოებით 10 წუთის განმავლობაში, ისინი ერთად კითხულობენ და საუბრობენ შერჩეულ ბიბლიურ თემაზე, ხოლო შემდეგ დედა წარმოთქვამს მოკლე ლოცვას და ბავშვები ავტობუსში სხდებიან. კონგოს დემოკრატიულ რესპუბლიკაში ერთ ქალს, რომელიც ურწმუნო ქმარმა მიატოვა, შეზღუდული განათლების გამო ძალიან უჭირს შესწავლის ჩატარება. მას ეხმარება უფროსი ვაჟი, რომელიც კვირაში ერთხელ მიდის მშობლიურ სახლში, რათა დედასა და უმცროს ძმებს შესწავლა ჩაუტაროს. დედა გულმოდგინე მომზადებით შვილებს შესანიშნავ მაგალითს აძლევს. თქვენც ხომ არაფერი გიშლით ხელს რეგულარული ოჯახური შესწავლის ჩატარებაში? გულს ნუ გაიტეხთ. ყველანაირად ეცადეთ, რომ იეჰოვამ აკურთხოს თქვენი მცდელობა, გქონდეთ ბიბლიის რეგულარული შესწავლა (მარკოზი 11:23, 24).
ჯილდო, რომელიც სიმტკიცის გამოვლენას მოაქვს
17. ა) რა არის საჭირო ოჯახური შესწავლის რეგულარულად ჩასატარებლად? ბ) რა შემთხვევა ცხადყოფს, რომ იეჰოვას გზებით სიარულისთვის ოჯახის რეგულარულად დამოძღვრა მნიშვნელოვანია?
17 აუცილებელია დაგეგმვა. ამასთანავე, საჭიროა სიმტკიცის გამოვლენა. მაგრამ სარგებლობა, რომელიც რეგულარულ ოჯახურ შესწავლას მოაქვს, ძალისხმევად ღირს (იგავნი 22:6; 3 იოანე 4). გერმანელმა ცოლ-ქმარმა, ფრანცმა და ჰილდამ, 11 შვილი გაზარდეს. წლების შემდეგ მათმა ქალიშვილმა მაგდალენამ თქვა: „დღეს ყველაზე მნიშვნელოვნად ის მიმაჩნია, რომ ყოველდღიურად მივიღო სულიერი საზრდო“. როდესაც ადოლფ ჰიტლერის მმართველობის დროს გერმანიაში ნაციონალიზმის სული გაბატონდა, მაგდალენას მამა კარს მომდგარი განსაცდელებისთვის ოჯახს ბიბლიის დახმარებით ამზადებდა. გარკვეული დროის შემდეგ ოჯახის უმცროსი წევრები დააპატიმრეს და გამოსასწორებელ სკოლაში წაიყვანეს; სხვები ციხეში ჩასხეს და საკონცენტრაციო ბანაკებში მოათავსეს. ზოგი კი სიკვდილით დასაჯეს. თითოეულმა მათგანმა ურყევი რწმენა შეინარჩუნა სასტიკი დევნის დროს. ისინი კი, რომლებიც გადარჩნენ, მომდევნო წლების განმავლობაშიც ერთგულად ემსახურებოდნენ ღმერთს.
18. როგორ დაჯილდოვდა მარტოხელა მშობლების მცდელობა?
18 მსგავსი სახით, მრავალი მარტოხელა მშობელი ან ის, ვისაც ურწმუნო მეუღლე ჰყავს, შვილებს რეგულარულად ასწავლის ბიბლიის. ერთი ინდოელი ქვრივი ძალ-ღონეს არ იშურებდა ორი შვილისთვის იეჰოვას სიყვარულის ჩასანერგავად. მაგრამ მოგვიანებით მისმა ვაჟიშვილმა იეჰოვას ხალხთან ურთიერთობა შეწყვიტა, რამაც დედას საშინლად დასწყვიტა გული. ის ევედრებოდა იეჰოვას, ეპატიებინა მისთვის, თუ რამე შეცდომა დაუშვა შვილის აღზრდაში. მაგრამ, როგორც აღმოჩნდა, შვილს ნასწავლი არ დავიწყებია. დაახლოებით ათი წლის შემდეგ ის დაბრუნდა, სულიერად წინ წაიწია და კრების უხუცესი გახდა. ახლა ის და მისი მეუღლე სრული დროით პიონერებად მსახურობენ. რამდენად მადლიერები არიან მშობლები, რომლებმაც ყურად იღეს იეჰოვასა და მისი ორგანიზაციის რჩევები, რეგულარულად ისწავლონ ბიბლია მთელი ოჯახით! თქვენი ოჯახიც იყენებს ამ რჩევას?
როგორ განმარტავდით?
◻ რატომ არის მნიშვნელოვანი რეგულარული ოჯახური შესწავლა?
◻ რა მიზნები უნდა დავისახოთ ყოველი ოჯახური შესწავლის დროს?
◻ რა სასწავლო საშუალებებით ვართ აღჭურვილი?
◻ როგორ შეიძლება შესწავლა მოვურგოთ ოჯახურ მოთხოვნილებებს?
[სურათი 15 გვერდზე]
მტკიცედ დასახული მიზნები თქვენს ოჯახურ შესწავლას უფრო შინაარსიანს გახდის.