გადაქცევა — ყოველთვის სარწმუნოა ნანახი?
„გამოიღვიძეთ!“-ის კორესპონდენტისგან ცენტრალური აფრიკის რესპუბლიკაში.
ექიმბაში მოკვდა. მაგრამ მის სახლთან შეკრებილებიდან ბევრი ფიქრობდა, რომ ის, უბრალოდ, გარდაისახა. ექიმბაშის სიკვდილის მომენტში დაინახეს, თუ როგორ ჩაიქროლა მისი სახლის კართან უზარმაზარმა პითონმა. ზოგისთვის, ეს მხოლოდ დამთხვევა იყო. მაგრამ სხვები ფიქრობდნენ, რომ ეს ექიმბაშის პითონად გადაქცევის მტკიცება იყო.
აფრიკის მრავალ ქვეყანაში ღრმად არის ფესვგადგმული აზრი, რომ ადამიანი შეიძლება ცხოველად გადაიქცეს. ფიქრობენ, რომ შემლოცველებს ხშირად ლეოპარდად ან პითონად შეუძლიათ იქცნენ. ფართოდაა გავრცელებული აგრეთვე ვარაუდი იმის შესახებ, რომ შემლოცველებს ცხოველებად სხვების გადაქცევაც შეუძლიათ. დასავლეთ აფრიკაში სჯერათ, რომ თუ ჯადოქრებს სურთ ადამიანს ავნონ, შეუძლიათ მისი სული ფრინველის ან ცხოველის სხეულში შეიყვანონ. ცენტრალურ აფრიკაში ზოგი არ კლავს სპილოს ან გველს, რადგან ეშინია, რომ რომელიმე გარდაცვლილი ნათესავი არ იყოს ამ ცხოველებად გადაქცეული.
თუმცა ყოველივე ეს შეიძლება საკმაოდ უცნაურად მოეჩვენოს ზოგ მკითხველს, მაგრამ მრავალ აფრიკელს სჯერა, რომ ასეთი გადაქცევები თვითმხილველების მიერაა დადასტურებული. ისინი ამტკიცებენ, რომ საკმაოდ ჭკვიანი ხალხის მიერ მოყოლილი მრავალი ამბავი შეუძლებელია უბრალო შემთხვევითობა იყოს.
ისიც ფაქტია, რომ მსგავს აზროვნებას მსოფლიოს სხვა ნაწილებშიც შეხვდებით. მაგალითად, იაპონიაში სჯერათ, რომ ადამიანი შეიძლება გადაიქცეს მელად, ძაღლად და ჯიქად. ევროპელთა ფოლკლორიც შეიცავს მსგავს ლეგენდებს, რომლებშიც მოთხრობილია, თუ როგორ გარდაისახებოდნენ მამაკაცები ღამით მკვლელ მგელკაცებად. მსოფლიოს სხვა კუთხეებშიც არსებობს ლეგენდები, რომ ვეფხვი, ტახი, ნიანგი და კატაც კი შეიძლება გადაიქცნენ ადამიანად და პირიქით.
ასეა ბიბლიაში?
ზოგი იმასაც ამბობს, რომ თვით ბიბლია ადასტურებს ზებუნებრივი გადაქცევის არსებობას. დამამტკიცებელ საბუთად ხშირად ოთხი ადგილი მოჰყავთ ბიბლიიდან. პირველი, იესოს მიერ ორი მამაკაციდან განდევნილი დემონების ღორების კოლტში შეშვება (მათე 8:28–33). მეორე, ცნობა რიცხვნის 22:26–35-დან, სადაც ბალაამს თავისი ვირი დაელაპარაკა. მესამე, შესაძლოა ამ ცნობებიდან ყველაზე ცნობილი, როდესაც ედემის ბაღში გველი დაელაპარაკა ევას (დაბადება 3:1–5).
მაგრამ ამ ცნობებზე ცოტა მეტი დაკვირვება გვიჩვენებს, რომ ისინი სავსებით არ არის გადაქცევის მაგალითები. განვიხილოთ ღორების შემთხვევა, რომლებშიც დემონები შევიდნენ. ბიბლია არ ამბობს, რომ ეს ღორები ოდესმე ადამიანები იყვნენ და შემდეგ იქცნენ ღორებად. არა, ცნობაში ნათქვამია, რომ მათში დემონების შესვლამდე მოშორებით „ძოვდა ღორების დიდი კოლტი“ (მათე 8:30). ღორებში შევიდა არა ადამიანების სული, არამედ სატანის დემონების.
რა შეიძლება ითქვას ბალაამის ვირსა და ედემის ბაღის გველზე? პირველ შემთხვევაში ბიბლია ხაზგასმით ამბობს, რომ „გაუხსნა ბაგე უფალმა სახედარს“ და ისიც ალაპარაკდა (რიცხვნი 22:28). ის ადამიანად არ ქცეულა. რაც შეეხება ედემის ბაღის გველს, ბიბლია ბოროტ სულს, სატანა ეშმაკს, ‘ძველ გველს’ უწოდებს (გამოცხადება 12:9). ეს სატანა ლაპარაკობდა გველის მეშვეობით და „მზაკვრობით აცდუნა ევა“ (2 კორინთელთა 11:3). დიახ, ბალაამის ვირი და გველი ალაპარაკებამდეც ცხოველები იყვნენ და ცხოველებადვე დარჩნენ.
მეოთხე ცნობა, რომელიც ხშირად მოჰყავთ ამასთან დაკავშირებით, ბაბილონის ქედმაღალ მეფე ნაბუქოდონოსორს ეხება. ბიბლია ამბობს, რომ ღმერთმა ქედი მოახრევინა ნაბუქოდონოსორს. „მისი გული მხეცისას დაემსგავსა და ველურ ვირებთან ცხოვრობდა. ბალახს აჭმევდნენ როგორც ხარს და მისი ტანი ციური ცვარ-ნამით სველდებოდა, ვიდრე არ შეიგნო, რომ უზენაესი ხელმწიფობს კაცთა სამეფოზე“ (დანიელი 5:21). შვიდი წლის განმავლობაში არანორმალურ მდგომარეობაში ყოფნის გამო ნაბუქოდონოსორი როგორც გარეგნობით, ისე მოქმედებით, გარეულ მხეცს ჰგავდა. დანიელის 4:30-ის თანახმად, ნაბუქოდონოსორს „თმები არწივის ბუმბულივით გაუხდა, ფრჩხილები კი — ფრინველის კლანჭებივით“. მიუხედავად ამისა, მეფეს არასოდეს ჰქონია ნამდვილი ბუმბული და კლანჭები. ის ადამიანი დარჩა.
აზრი ზებუნებრივი გადაქცევის შესახებ ეწინააღმდეგება ბიბლიურ მოძღვრებას. ჯერ ერთი, ბიბლია აჩვენებს, რომ ადამიანს არა აქვს განცალკევებით სული, რომელიც შეიძლება შემდეგ ცხოველში შესახლდეს. პირიქით, ადამიანი თვითონ არის ‘სული’ (დაბადება 2:7; „ძველი აღთქმის ორტომეული“, 1884 წლის გამოცემა). მეორეც, გადაქცევა ეწინააღმდეგება იმ ბუნებრივ წესრიგს, რომელიც იეჰოვა ღმერთმა დააფუძნა. ცხოველები ისე იყვნენ შექმნილი, რომ გამრავლებულიყვნენ „თავ-თავისი გვარისდა მიხედვით“ (დაბადება 1:24, 25). ღვთის მიერ დადგენილი გენეტიკური შეუთავსებლობის გამო შეუძლებელია სხვადასხვა გვარის ან უფრო დიდი ჯგუფების ცხოველების შეჯვარება ნაყოფიერი იყოს. უფრო დიდი უფსკრულია ცხოველებსა და ‘ღვთის ხატად’ შექმნილ ადამიანებს შორის (დაბადება 1:26). რა თქმა უნდა, ღმერთი სასაცილოდ არ აიგდებდა თავის კანონს და ადამიანებს იმის ძალას არ მისცემდა, რომ შესძლებოდათ საკუთარი თავი აზროვნების უნარს მოკლებულ ცხოველად გადაექციათ.
მართალია, ბუნებაში არსებობს მეტამორფოზი. მუხლუხი პეპლად იქცევა, ხოლო თავკომბალა ბაყაყად. მაგრამ დაკვირვების შედეგად ცხადი ხდება, რომ მეტამორფოზის ეს მაგალითები არ წარმოადგენს ერთი სახეობის მეორედ გადაქცევას, არამედ ეს პროცესი ერთი და იმავე სახეობის განვითარების საფეხურებია. ზრდასრული ასაკის მიღწევის შემდეგ ისინი „თავ-თავისი გვარისდა მიხედვით“ მრავლდებიან.
ნანახი ყოველთვის სარწმუნო არ არის
მაშინ როგორ უნდა ავხსნათ ის ფაქტი, რომ არსებობენ ადამიანები, რომლებიც აცხადებენ, რომ ზებუნებრივი გადაქცევის თვითმხილველები არიან? აშკარაა, რომ ეს ‘სატანის ყოველგვარი ყალბი ძალით, ნიშნებითა და სასწაულებით, და უსამართლობის ყველა საცდურით დაღუპულთათვის მოქმედების’ კიდევ ერთი მაგალითია (2 თესალონიკელთა 2:9, 10).
ნებისმიერი დამშინებლის მსგავსად, დემონებს სურთ ადამიანებს საკუთარი თავი იმაზე მეტი ძალის მქონეებად მოაჩვენონ, რაც სინამდვილეში აქვთ. ისინი თითქოსდა დამაჯერებელ ‘ნიშნებს’ იძლევიან, რაც სხვა არაფერია, თუ არა თაღლითობა და გაიძვერობა.
მაგალითად, კარტების მეშვეობით გამომძალველები, ხშირად თავმოყრილი არიან აფრიკის მრავალ ბაზრობაზე. ისინი კარტის თაღლითური თამაშით ზოგ დიასახლისს უსინდისოდ სტყუებენ მძიმე შრომით გამომუშავებულ ფულს. ისინი ქალს აჩვენებენ სამ კარტს — ორ წითელს და ერთ შავს — და ეუბნებიან, რომ თუ ამოიღებს შავ კარტს, დადებული თანხა გაორკეცებულად დაუბრუნდება უკან. ქალი თავიდან მერყეობს, მაგრამ როდესაც ხედავს ვიღაცა სხვას, ვინც ამ იოლ თამაშში ვითომ იმარჯვებს, თვითონაც ებმება თამაშში. ამ ქალმა არც კი იცის, რომ ეს ვითომ გამარჯვებული, მაქინატორების კომპანიონია. ის დებს გარკვეული რაოდენობის თანხას, მისჩერებია შავ კარტს, მაშინ როდესაც კარტებს გადაატრიალებენ და ურევენ. მაგრამ თავისდა სამარცხვინოდ და თავზარდასაცემად კარტი, რომელსაც ის ირჩევს, წითელი აღმოჩნდება. ქალი კარგავს ფულს, რომელიც ოჯახის სარჩენად იყო გამიზნული და ის საკუთარი სიხარბისა და ჭკვიანი თაღლითის ხელგაწაფულობის მსხვერპლი ხდება. ქალი საკმაოდ გვიან ხვდება, რომ ნანახი ყოველთვის სარწმუნო არ არის.
ასეთივე სახით ატყუებენ სატანა და მისი დემონები ხალხს და აფიქრებინებენ, რომ ადამიანები შეიძლება ცხოველებად გადაიქცნენ. სატანა დახელოვნებული მატყუარაა. მან უთხრა ევას პირველად ტყუილი: „არ მოკვდებით. . . შეიქნებით ღმერთივით“ (დაბადება 3:4, 5). მისი ტყუილი გავრცელდა და სხვადასხვა სწავლებებში გადაიზარდა, სწავლებებში, რომლებსაც ხალხი შიშში ჰყავს; ესენია სწავლებები სულის უკვდავების, ჯოჯოხეთის ცეცხლისა და გადაქცევის შესახებ. ამგვარად, აფრიკელი ხალხი უზარმაზარ თანხებს იხდის „აცრის“ გაკეთებაში, ვინაიდან ფიქრობენ, რომ ეს მათ ცხოველად გადაქცევისგან დაიცავს. სინამდვილეში, ასეთი ადამიანები ‘ეშმაკთა მოძღვრებების’ ტყვეობაში არიან, რაც მათ ხელს უშლის ღვთის ნების შესრულებაში (1 ტიმოთე 4:1; იაკობი 4:7).
ნამდვილი გარდაქმნა
შესაძლოა თქვენ ყოველთვის გწამდათ ან გეშინოდათ კიდეც გარდასახვის. თუ ასეა, ყურადღება მიაქციეთ ბიბლიაში, კერძოდ კი, რომაელთა 12:2-ში ჩაწერილ სიტყვებს. ორიგინალში აქ გამოყენებულია ბერძნული სიტყვის „მეტამორფოსოს“ (გადაქცევა) ფორმა. «შეიცვალენით [„მეტამორფოზა“] თქვენი გონების განახლებით». ეს მიუთითებს შესაძლებელ გარდაქმნაზე, პიროვნების მთლიანად შეცვლაზე.
ყველამ, ვისაც გვსურს ღმერთს ვასიამოვნოთ, უნდა მოვახდინოთ საკუთარი პიროვნების მსგავსი გარდაქმნა, რადგან ბიბლია მოგვიწოდებს: „გაიძრეთ ძველი ადამიანი მისი საქმეებითურთ. და შეიმოსეთ ახალი, რომელიც შემეცნებაში განახლებულია მისი შემქმნელის ხატისამებრ“ (კოლასელთა 3:9, 10; „ახალი აღთქმა და ფსალმუნები“, 1990 წლის გამოცემა).
როგორ შეგიძლიათ გარდაიქმნათ? ბიბლიიდან ზუსტი შემეცნების მიღებით. ეს შემეცნება შეგიცვლით იმ აზრებსა და გაგებებს, რომლებიც ადრე გქონდათ. როგორც იესო ამბობს: „შეიცნობთ ჭეშმარიტებას და ჭეშმარიტება გაგათავისუფლებთ თქვენ“ (იოანე 8:32). დიახ, თქვენ შეგიძლიათ გათავისუფლდეთ მცდარი წარმოდგენებისა და გარდასახვის შიშისგან.
[სურათი 15 გვერდზე]
რასაც თვალი „ხედავს“, ყოველთვის სინამდვილე როდია.