ცხოვრება და ქადაგება ვულკანის მახლობლად
„ეს შემზარავია. ეს ძალიან ჰგავს წუთისოფლის აღსასრულს, რომელზეც ბიბლიაშია საუბარი. ჩვენ უნდა ვიფხიზლოთ და ყოველთვის იეჰოვას წინაშე კარგი რეპუტაცია გვქონდეს“. ეს სიტყვები ერთ იეჰოვას მოწმეს, ბიქტორს, ეკუთვნის, რომელიც მექსიკაში პოპოკატეპეტლის (ჩვეულებრივ, პოპოდ წოდებულ) ვულკანთან ძალიან ახლოს ცხოვრობს. მან მოგვითხრო იქ არსებული სიტუაციის შესახებ.
ამ მოთუხთუხე ვულკანმა 1994 წლიდან მიიქცია მსოფლიო მასობრივი საინფორმაციო საშუალებების ყურადღებაa. ხელისუფლებამ დაასკვნა, რომ კრატერიდან 30 კილომეტრის რადიუსში საკმაოდ სახიფათო ზონაა. განსაკუთრებით სახიფათოა ვულკანის სამხრეთი მხარე, რადგან კრატერი ამ მიმართულებითაა დახრილი და ამონთხეული ლავა და ჭუჭყი შეიძლება აქ არსებულ მრავალ ღრმა და ვიწრო ხევში ჩაიღვაროს.
რასაკვირველია, ბევრს აინტერესებს, თუ რა დაემართება მეხიკოს ვულკანის ძლიერი ამოფრქვევის შემთხვევაში. ემუქრება ქალაქს საფრთხე? ამასთანავე, ვულკანის სამხრეთით არსებული შტატი მორელოსიც დასახლებული ტერიტორიაა. ემუქრებათ საფრთხე იმ მხარეში მცხოვრებთაც? როგორია, იცხოვროთ ვულკანის მახლობლად ისე, რომ არ იცოდეთ, თუ რა შეიძლება მოხდეს ყოველ წუთს?
ვულკანის საშიშროება
პოპოკატეპეტლის ჩრდილო-დასავლეთით დაახლოებით 70 კილომეტრში მეხიკოს საქმიანი რაიონია, თუმცა ზოგი გარეუბანი ვულკანისგან 40 კილომეტრითაა დაშორებული. ტექნიკური თვალსაზრისით, მთელი ქალაქი 20-მილიონიანი მოსახლეობით საშიშ ზონაში არ იმყოფება. მიუხედავად ამისა, თუ ვულკანიდან დიდი რაოდენობით ამოიფრქვევა ფერფლი, ქარის შედეგად ამ მხარეს შეიძლება საფრთხე დაემუქროს.
ვულკანის ფერფლის ეფექტი, ჩვეულებრივ, უფრო მწვავეა ვულკანის აღმოსავლეთით. ეს მხარე მოიცავს ქალაქ პუებლასა და რამდენიმე პატარა ქალაქსა და სოფელს, სადაც დაახლოებით 200 000 ადამიანი დიდად სახიფათო ზონაში ცხოვრობს. 1997 წლის 11 მაისს, კვირას, ვულკანიდან ამოფრქვეული ტონობით ფერფლი ჰაერში გავრცელდა და მთელ ამ ტერიტორიაზე მიმოიფანტა, აღმოსავლეთით კი 300 კილომეტრზე მეტ მანძილზე გავრცელდა და ვერაკრუსის შტატამდე მიაღწია. ვულკანის სამხრეთით, მორელოსის შტატში, რამდენიმე ქალაქი და სოფელი შედის, სადაც დაახლოებით 40 000 ადამიანი ცხოვრობს; ისინიც სერიოზული საფრთხის წინაშე აღმოჩნდენ.
ამ მოვლენებს შორის ცხოვრობენ და მსახურობენ იეჰოვას მოწმეები. მეხიკოში 90 000-ზე მეტი მოწმე და 1 700-მდე კრებაა. მეხიკოს ჩრდილო-აღმოსავლეთით მდებარეობს საზოგადოება „საგუშაგო კოშკის“ ფილიალი, რომელიც ვულკანიდან დაახლოებით 100 კილომეტრითაა დაშორებული. ფილიალში 800-ზე მეტი მოხალისე მსახურობს; გარდა ამისა, დაახლოებით 500 მოხალისე მუშაობს დიდ სამშენებლო პროექტზე. არც ერთი მათგანი არ იმყოფება სახიფათო ზონაში.
მორელოსის შტატში იეჰოვას მოწმეთა დაახლოებით 50 კრება და სამეფოს 2 000-ზე მეტი მაუწყებელია. ზოგი კრება კრატერიდან 20 კილომეტრის მოშორებითაა ტეტელა დელ ბოლკანსა და უეიაპანში. გარდა ამისა, აღმოსავლეთით, პუებლას შტატში არსებულ კრებებში დაახლოებით 600 მაუწყებელია, რომლებიც ვულკანიდან 20—30 კილომეტრში ცხოვრობენ. რასაკვირველია, მათაც შეიძლება სერიოზული საფრთხე დაემუქროს.
იეჰოვას მოწმეები კვლავაც აქტიურობენ
მუდმივი საფრთხის მიუხედავად, იეჰოვას მოწმეები არ წყვეტენ ქადაგებას ამ რეგიონში. ისინი აგრეთვე ქრისტიანული შეხვედრების განრიგს მიჰყვებიან, რაც ერთიანობის გრძნობასა და დაჯერებულობას უნერგავს ამ არასასიამოვნო ვითარებაში (ებრაელთა 10:24, 25). ერთ-ერთი კრებიდან გვატყობინებენ: „სამეფოს შესახებ კეთილ ცნობასთან დაკავშირებით ხალხის პოზიცია საოცრად შეიცვალა. მაგალითად, ახლახან ერთ პატარა სოფელში 18 ადამიანი დაგვთანხმდა ბიბლიის საშინაო შესწავლაზე“.
მეორე კრებიდან, რომელიც ვულკანიდან 20 კილომეტრზეა, გვაცნობეს: „დიდი ზრდა შეიმჩნევა. ეს კრება 1996 წლის ნოემბრიდან ფუნქციონირებს. ექვსი თვის განმავლობაში 10 პიროვნება მომზადდა სამქადაგებლო მსახურებაში მონაწილეობისთვის. ზოგი მაუწყებელი კრატერიდან მხოლოდ 20 კილომეტრის მოშორებით ცხოვრობს. აქ იმართება ქრისტიანული შეხვედრები, რომლებსაც დაახლოებით 40 ადამიანი ესწრება“.
მაგდალენა, რომელიც ვულკანიდან ზუსტად 25 კილომეტრის მოშორებით ცხოვრობს სან-აგუსტინ-იკსტაუიკსტაში (პუებლა), აქტიურად უძღვება ბიბლიის შესწავლებს. ის მოგვითხრობს, თუ რა მოხდა ერთი სერიოზული ამოფრქვევის შემდეგ:
„შეგვატყობინეს, რომ დაგვეტოვებინა სახლები, რის გაკეთებაც ფერფლის წვიმაში მოგვიხდა. მიუხედავად ექსტემალური პირობებისა, გამახსენდა დორადოების ოჯახი, რომელსაც ბიბლიას ვასწავლიდი. მე და რამდენიმე ძმა მათთან წავედით, რომ დავხმარებოდით უსაფრთხო ადგილას გადასვლაში. ახლოს მდებარე ქალაქ პუებლაში ამოქმედდა იეჰოვას მოწმეების დახმარების კომიტეტი. დორადოების ოჯახზე დიდი შთაბეჭდილება მოახდინა ყველა ჩვენგანისადმი გამოვლენილმა ყურადღებამ. ჩვენმა ძმებმა წინასწარ მოგვიმზადეს საცხოვრებლები სხვადასხვა ტერიტორიებზე. მიუხედავად იმისა, რომ სახლიდან შორს ვიყავით, არაფერი გვაკლდა. მანამდე დორადოების ოჯახი რამდენიმე შეხვედრას დაესწრო სამეფო დარბაზში, მაგრამ გაოცებული იყვნენ მათდამი იმ ძმების მიერ გამოვლენილი სიყვარულის გამო, რომლებსაც არასოდეს შეხვედრიან. სახლში დაბრუნებიდან რამდენიმე კვირის შემდეგ ამ ოჯახმა შეხვედრებზე სისტემატური დასწრება დაიწყო. მალე ისინი კეთილი ცნობის მაუწყებლები გახდნენ. ორი მათგანი ახლა მონათლულია. ისინი რამდენიმე თვეა დამხმარე პიონერებად მსახურობენ და გეგმებს სახავენ სრული დროით მსახურებისთვის“.
20 წლის გოგონას, მარტას, რომელიც კრატერიდან 21 კილომეტრში ცხოვრობს, უმწეობის მიუხედავად, ყოველთვის იყენებდა შესაძლებლობას ქადაგებისთვის. მან ჭეშმარიტება სამი წლის წინ შეიცნო, იმ დროს, როცა ვულკანმა კვლავ იწყო მოქმედება. საინვალიდო სავარძლის ნაცვლად, მარტა ვირით დადის სამქადაგებლო მსახურებაში, რადგან, სადაც ცხოვრობს, ციცაბო ადგილებია და გაუჭირდებოდა საინვალიდო სავარძლის მართვა. ის კრების შეხვედრებზეც ვირით დადის. მარტა დიდად მადლიერია იეჰოვასი, რომ მოსიყვარულე საძმოს ნაწილია, სადაც დები უწევენ დახმარებას ვირზე შეჯდომასა და ჩამოსვლაში. ის ყოველ თვე 15 საათზე მეტს ქადაგებს.
ამ იზოლირებულ ტერიტორიებზე მეზობლები იეჰოვას მოწმეებზე ხშირად ზემოქმედებენ, რომ შეუერთდნენ რელიგიური დღესასწაულების აღნიშვნაში. ვულკანიდან დაახლოებით 20 კილომეტრით დაშორებულ სოფელ ტულსინგოში მოწმეებთან გააგზავნეს წარმომადგენელი, რათა დღესასწაულისთვის შესაწირავები შეეგროვებინა. ძმებმა მშვიდად აუხსნეს, თუ რატომ არ შეეძლოთ ამ რელიგიურ ზეიმში მონაწილეობის მიღება. ის ისე შეუპოვრად ცდილობდა ძმებისგან ფულადი სახსრების მიღებას, რომ დაიწყო ძმებთან ურთიერთობა, რათა სცოდნოდა ზოგი რამ მათი რწმენის შესახებ. მას უხაროდა, როდესაც მისთვის საინტერესო შეკითხვებზე პასუხებს თავისსავე კათოლიკურ ბიბლიაში პოულობდა. ერთი წლის განმავლობაში მეუღლესა და ქალიშვილთან ერთად რეგულარულად ესწრებოდა კრების შეხვედრებს და დიდი სურვილი გამოთქვა, გამხდარიყო კეთილი ცნობის მაუწყებელი.
როგორ შეგიძლიათ მოემზადოთ?
ვულკანოლოგები გამოკვლევებს ატარებენ და გადმოსცემენ ოფიციალურ ცნობებს სახიფათო პოპოკატეპეტლზე, მაგრამ, სინამდვილეში, არავინ იცის, როდის რა მოხდება. მასობრივი საინფორმაციო საშუალებებისა და ახლო-მახლო მცხოვრებლების აზრით, ვულკანის ამოფრქვევა ყოველ წუთსაა მოსალოდნელი. საშიშროება რეალურად არსებობს. რასაკვირველია, ხელისუფლება ძალიან შეწუხებულია და ყოველ ღონეს ხმარობს, რომ მზად იყოს კრიტიკული მდგომარეობისთვის. მაგრამ ნათელია, რომ ისინი ფრთხილად უნდა იყვნენ გაფრთხილებასთან დაკავშირებით, რადგან მათ არ სურთ წამოიწყონ მოსახლეობის მასიური გაყვანა მანამ, სანამ საშიშროება გარდაუვალი არ იქნება. მაშ, რის გაკეთება შეიძლება?
„გონიერი ხედავს ბოროტებას და თავს არიდებს, სულელნი კი ჯიქურ მიდიან და ისჯებიან“, — ამბობს ბიბლიური იგავი (იგავნი 22:3). აქედან გამომდინარე, ‘ჯიქურ წასვლის’ ნაცვლად, თავის დაზღვევის მიზნით, გონივრული იქნებოდა აუცილებელი ზომების მიღება, სანამ ჯერ კიდევ არ არის გვიან. როდესაც ასეთ საზარელ სტიქიურ ძალებთან გაქვთ საქმე, ნუ გადადებთ უკანასკნელ წუთამდე, თითქოს არასოდეს არაფერი მოხდება. ასეთია ამ მხარეში მცხოვრები იეჰოვას მოწმეების თვალსაზრისი.
ამას წინათ საზოგადოება „საგუშაგო კოშკის“ ფილიალის წარმომადგენლებმა პუებლას შტატში მოინახულეს მიმომსვლელი ზედამხედველები, რომლებსაც მჭიდრო კავშირი აქვთ ამ საშიშ ზონაში არსებულ კრებებთან. დაგეგმეს, რომ მიმომსვლელ ზედამხედველებსა და დახმარების კომიტეტის წევრებს მოენახულებინათ კრატერიდან 25 კილომეტრში მცხოვრები თითოეული ოჯახი. ამ ოჯახებს დაეხმარნენ, რომ ეფიქრათ საშიში ზონის დატოვება, სანამ პანიკა ატყდებოდა. ორგანიზება გაეწია 1 500 ადამიანის გადაყვანასა და დაბინავებას ქალაქ პუებლაში. ზოგი ოჯახი საცხოვრებლად სხვა ქალაქებში გადავიდა ნათესავებთან.
გაფრთხილება დიდი მასშტაბით
პოპოკატეპეტლიდან ამომავალი კვამლი, ცეცხლი და გრუხუნი ნათლად მიანიშნებს, რომ ვულკანი მალე ამოიფრქვევა. ყველამ, ვისაც სურს გადარჩენა, ყურად უნდა იღოს ხელისუფლების გაფრთხილება და სათანადო ზომები მიიღოს. ვულკანის ახლო-მახლო მცხოვრები იეჰოვას მოწმეები მუდმივ სიფხიზლეს ინარჩუნებენ საკუთარი უსაფრთხოების უზრუნველსაყოფად და სხვებსაც ეხმარებიან, რომ დაანახვონ საშიშროება, რათა რაიმე იღონონ, სანამ ძალიან გვიანი არ არის.
იეჰოვას მოწმეები უფრო დიდი მასშტაბითაც ინარჩუნებენ სიფხიზლეს მსოფლიო მოვლენებისადმი ბიბლიური წინასწარმეტყველების შუქზე. ომები, მიწისძვრები, შიმშილი, ავადმყოფობები და დამნაშავეობა დღეს ისევე ყურადსაღები ფაქტებია, როგორც ვულკანის აქტივობა. ეს იმ შედგენილი ნიშნის ნაწილია, რომელზეც იესო ქრისტემ იწინასწარმეტყველა, რომ „წუთისოფლის აღსასრულის“ ნიშანი იქნებოდა. მიუხედავად იმისა, რომ ზუსტად არავინ იცის, როდის მოვა აღსასრული, ეჭვგარეშეა, რომ ის მოვა და ძალიან, ძალიან მალე (მათე 24:3, 7–14, 32–39).
დღეს უაღრესად მნიშვნელოვანია, რომ მთელი მსოფლიო სერიოზულობით მოეკიდოს იესოს გაფრთხილებას: „გაფრთხილდით, არ დამძიმდეს თქვენი გული ღრეობით, ლოთობითა და სიცოცხლეზე ზრუნვით, და იმ დღემ არ გიწიოთ მოულოდნელად“ (ლუკა 21:34). ეს აშკარად ბრძნული კურსია. როგორც ვულკანის გამაფრთხილებელი ნიშანი არ უნდა მივიჩნიოთ არასერიოზულად, ასევე არ უნდა უგულებელვყოთ ღვთის ძის, იესო ქრისტეს, მოახლოება, რომელმაც მოგვიწოდა: „ამიტომ თქვენც მზად იყავით, ვინაიდან, რომელ საათსაც არ ფიქრობთ, მაშინ მოვა ძე კაცისა“ (მათე 24:44).
[სქოლიო]
a ამ სახიფათო ვულკანის შესახებ სტატია გამოქვეყნებული იყო 1997 წლის 8 მარტის ჟურნალში „გამოიღვიძეთ!“ [რუს.].
[სურათები 23 გვერდზე]
მარტა (ვირზე) სხვა მოწმეებთან ერთად პოპოკატეპეტლთან ახლოს.