კეთილი საქმეებით განადიდე იეჰოვა
1 თუ ძლიერ ქარიშხალში მოყევი, რამხელა შვება იქნებოდა შენთვის თავშესაფრის პოვნა! თუ მასში თბილა, თავს უსაფრთხოდ გრძნობ და მობინადრენიც სტუმართმოყვარენი არიან, გაგიხარდებოდა იქ დარჩენა. სამეფოს შესახებ ქადაგების საქმიანობა ადამიანებს სატანის სისტემიდან თავდასახსნელად მსგავსი თავშესაფრისკენ უთითებს. ეხმარება თუ არა ჩვენი ყოველდღიური საქციელი სხვებს იმის დანახვაში, თუ რამდენად უსაფრთხოა ეს თავშესაფარი? დიახ, რადგან იესომ განაცხადა, რომ ადამიანები ‘დაინახავდნენ ჩვენს კეთილ საქმეებს და განადიდებდნენ ჩვენს მამას, რომელიც ზეცაშია’ (მათ. 5:16).
2 როგორ უნდა მოვიქცეთ, რომ ჩვენმა საქმეებმა სხვები იეჰოვასა და მისი ორგანიზაციისკენ მიიზიდოს? ყოველდღიურ ცხოვრებაში უნდა ვიხელმძღვანელოთ იესოს სიტყვებით, რომლებიც ჩაწერილია ლუკას 6:31-სა და 10:27-ში. ეს აღგვძრავს, სიყვარულით აღსავსე მზრუნველობა გამოვავლინოთ სხვა ადამიანების მიმართ, რაც განგვასხვავებს ამ ცივ და გულგრილ წუთისოფელში.
3 ერთმა დამ გემზე შენიშნა ახალგაზრდა ქალი, რომელიც ზღვის ავადმყოფობისგან ისე იყო დაუძლურებული, რომ საკუთარი პატარა ბავშვის მოვლა არ შეეძლო. დამ მას ბავშვის მოვლა შესთავაზა. როცა ქალმა ჰკითხა მას, თუ როგორ შეეძლო თავისი მადლიერება გამოეხატა, დამ უთხრა: „გთხოვთ მოუსმინეთ იეჰოვას მოწმეებს, როცა ისინი მოგაკითხავენ“. ქალი ასეც მოიქცა და ახლა ის და მისი მეუღლე მოწმეები არიან. კეთილ საქმეებზეა დამოკიდებული, თუ როგორ გამოეხმაურებიან სხვები სამეფოს ცნობას.
4 ამაში შედის მთელი ჩვენი ცხოვრება. ჩვენი ქცევა მეზობლებთან, სამსახურსა თუ სკოლაში და გართობის დროს, სხვებს წარმოდგენას უქმნის ჩვენსა და ჩვენი რელიგიის შესახებ. ამიტომ კარგი იქნებოდა, გვეკითხა საკუთარი თავისთვის: როგორი შეხედულება აქვთ ჩემზე და ჩემს ოჯახზე სხვებს? ხედავენ თუ არა მეზობლები, რომ ჩვენი სახლი და ეზო სუფთა და მოვლილია? გვთვლიან თუ არა თანამშრომლები და თანაკლასელები პუნქტუალურ და გულმოდგინე ადამიანებად? ვავლენთ თუ არა ჩვენი გარეგნობით მოკრძალებულობასა და პატივისცემას? ჩვენი კარგი საქმეები იეჰოვას თაყვანისმცემლობას სხვებისთვის უფრო მიმზიდველს ხდის.
5 პეტრე ქრისტიანებს აფრთხილებდა, რომ დასცინებდნენ (1 პეტ. 4:4). ამიტომ დარწმუნებული უნდა ვიყოთ, რომ ჩვენი ქცევით ადამიანთა უარყოფით გამოხმაურებას არ ვიწვევთ (1 პეტ. 2:12). თუ ჩვენი ყოველდღიური მოქმედება განადიდებს ღმერთს, რომელსაც თაყვანს ვცემთ, იმ აღმართული სანთელივით ვიქნებით, რომელიც იეჰოვას მიერ შემოთავაზებული უსაფრთხო თავშესაფრისკენ მიიზიდავს სხვებს (მათ. 5:14—16).