ნამიბიაში ცოცხალი ძვირფასი ქვებია!

ნამიბია აფრიკის სამხრეთ-დასავლეთ სანაპიროზე დაახლოებით 1 500 კილომეტრზეა გადაჭიმული. ქვეყნის მთელი სანაპირო დიუნების, კლდოვანი გორებისა და ვრცელი ხრეშიანი ვაკეებისგან შედგება. ნამიბიის კენჭიან პლაჟებზე ყველანაირი ფერის სანაკეთო ქვებია; დროდადრო ალმასის პოვნაც კი შეიძლება. მაგრამ ქვეყანას ამ ქვებზე ბევრად ძვირფასი რამ აქვს. ნამიბიაში ცოცხალი ძვირფასი ქვებია — ესენი აქ მცხოვრები მრავალი ეროვნული ჯგუფის წარმომადგენლები არიან.

ნამიბიის უძველესი მკვიდრი მოსახლეობა კოისან ენათა ოჯახს მიეკუთვნებოდა. მათი ლაპარაკი წკლაპუნა ბგერებით გამოირჩეოდა. კოისანზე დღეს ლაპარაკობენ მუქკანიანი დამარები, დაბალი, ღია ფერის კანიანი ნამები და მონადირეებად ცნობილი ბუშმენები. გასულ საუკუნეებში ნამიბიაში ბევრი შავკანიანი ტომიც დასახლდა. ისინი სამ ძირითად ეროვნულ ჯგუფად იყოფიან — ესენია: ოვამბო (უდიდესი ეთნიკური ჯგუფი ნამიბიაში), ჰერერო და კავანგო. ევროპელებმა ნამიბიაში დასახლება XIX საუკუნეში დაიწყეს. უდაბნოს ქვიშაში ალმასის აღმოჩენის შემდეგ იმიგრანტების რიცხვი უფრო გაიზარდა.

ნამიბიის მოსახლეობა ძვირფასია, რადგან იმ წუთისოფლის ნაწილია, რომლისთვისაც ღმერთმა თავისი ძე მისცა, რითაც მარადიული სიცოცხლისკენ მიმავალი გზა გახსნა (იოანე 3:16). უკვე ბევრი ტომის წარმომადგენელი ასობით ნამიბიელი გამოეხმაურა ცნობას ხსნის შესახებ. ისინი შეგვიძლია ცოცხალ ძვირფას ქვებს შევადაროთ, რადგან მიეკუთვნებიან ‘სასურველებს ყოველი ერიდან’, რომლებიც იეჰოვას თაყვანისმცემლობის სახლში იკრიბებიან (ანგია 2:7, აქ).

დაიწყო სულიერი ძვირფასი ქვების მოპოვება

ნამიბიის სულიერი ძვირფასი ქვების მოპოვება 1928 წელს დაიწყო. იმ წელს საზოგადოება „საგუშაგო კოშკის“ სამხრეთ აფრიკაში არსებულმა ფილიალმა ქვეყანაში მიმოფანტულ ხალხს ფოსტით ბიბლიური ლიტერატურის 50 000 ეგზემპლარი დაუგზავნა. მომდევნო წელს ცხებულმა ქრისტიანმა ქალმა, ლინი თერონმა, გამოვლენილი ინტერესის გაღვივებაზე იზრუნა. მან ოთხ თვეში მარტომ მოიარა ეს დიდი ქვეყანა და აფრიკაანსის, აგრეთვე ინგლისურ და გერმანულ ენებზე ბიბლიის შესწავლაში დამხმარე 6 000-ზე მეტი პუბლიკაცია გაავრცელა. რაღა თქმა უნდა, ეს შრომა წყალში არ ჩაყრილა.

მაგალითად, განვიხილოთ ბერნჰარდ ბაადეს, გერმანელი მემაღაროეს, მაგალითი. 1929 წელს მან კვერცხების მარაგი მიიღო ერთი ფერმერისგან, რომელსაც კვერცხები სათითაოდ გაეხვია საზოგადოება „საგუშაგო კოშკის“ პუბლიკაციიდან ამოხეულ ფურცლებში. ბერნჰარდმა გატაცებით წაიკითხა თითოეული ფურცელი და დააინტერესა, ვისი დაწერილი იყო ეს წიგნი. როგორც იქნა, ბოლო გვერდსაც მიაგნო, რომელზეც საზოგადოება „საგუშაგო კოშკის“ გერმანიაში არსებული ფილიალის მისამართი ეწერა. ბერნჰარდმა მეტი ლიტერატურა ითხოვა წერილობით და ჭეშმარიტების მხარეს დამდგარი პირველი ნამიბიელი გახდა.

სრული დროით მსახურების გამოჩენა

1950 წელს ნამიბიაში ოთხი მისიონერი ჩამოვიდა, რომლებმაც საზოგადოება „საგუშაგო კოშკის“ ბიბლიური სკოლა „გალაადი“ დაამთავრეს. 1953 წლისთვის მისიონერების რიცხვი რვამდე გაიზარდა. მათ შორის იყო ავსტრალიელი ცოლ-ქმარი, დიკ და კორალი უოლდრონები, რომლებიც დღემდე ერთგულად მსახურობენ აქ. ნამიბიის სულიერი ძვირფასი ქვების მოპოვებაში სამხრეთ აფრიკიდანა და სხვა ქვეყნებიდან ჩამოსული სამეფოს ბევრი სრული დროით მაუწყებელიც მონაწილეობს. ამ ქვეყანაში სხვა მისიონერები და სამსახურებრივი დახელოვნების სკოლის კურსდამთავრებულებიც გამოიგზავნენ.

ნამიბიაში სულიერ ზრდას ხელი შეუწყო აგრეთვე ბიბლიური ლიტერატურის თარგმნამ და გამოცემამ ძირითად ადგილობრივ ენებზე, როგორიც არის: ჰერერო, კუანგალი, კუანიამა, ნამა ⁄დამარა და ნდონგა. მის დედაქალაქ უინდჰუკში 1990 წლიდან ფუნქციონირებს შესანიშნავი მთარგმნელობითი განყოფილება და სახლი სრული დროით მომსახურე მოხალისეებისთვის. კარენ დეპიში, რომელიც მეუღლესთან ერთად სრული დროით მსახურობს და კეთილ ცნობას ნამიბიის სხვადასხვა კუთხეში ქადაგებს, ამბობს: „ბევრი გაოცებულია, როცა მათს საკუთარ ენაზე გამოცემულ ლიტერატურას ვთავაზობთ, განსაკუთრებით კი მაშინ, როცა იმ ენაზე ძალიან ცოტა წიგნი თუ არსებობს“.

ძვირფასი ქვების გაპრიალება

ნამიბიის ზოგ, პირდაპირი გაგებით, ძვირფას ქვას უკვე ათასწლეულებია ტალღები და სილა აპრიალებს. მაგრამ, რასაკვირველია, ცოცხალი ძვირფასი ქვები ასეთი ბუნებრივი მოვლენების შედეგად არ წარმოიქმნება. არასრულყოფილ ადამიანს ძალისხმევა ესაჭიროება, რომ ‘მიატოვოს ძველი კაცი’ და ქრისტეს მსგავსი ახალი კაცით შეიმოსოს (ეფესელთა 4:20–24). მაგალითად, ნამიბიაში მცხოვრები ბევრი ტომი მკაცრად იცავს მიცვალებული წინაპრებისადმი თაყვანისცემის ტრადიციას. ვინც არ ასრულებს წინაპრების თაყვანისცემის რიტუალებს, ხშირად დევნას განიცდის ოჯახის წევრებისა და მეზობლების მხრიდან. როცა ვინმე ბიბლიიდან გებულობს, რომ მკვდრებმა „არაფერი იციან“, გამოცდის წინაშე დგება (ეკლესიასტე 9:5). რა მხრივ?

ერთი ჰერერო მოწმე ხსნის: „ძალიან ძნელი იყო ჭეშმარიტების თანახმად მოქცევა. მე დავთანხმდი იეჰოვას მოწმეებს ბიბლიის შესწავლაზე, მაგრამ ნასწავლის გამოსაყენებლად დრო დამჭირდა. პირველ რიგში, უნდა შემემოწმებინა, უსაფრთხო იქნებოდა თუ არა ჩემთვის ტრადიციული რწმენის თანახმად მოქმედებაზე უარის თქმა. მაგალითად, ნამიბიის გარკვეულ ადგილებს ისე ჩავუვლიდი ხოლმე, რომ არ ვჩერდებოდი საფლავზე ქვის დასადებად ან მკვდრის საპატივსაცემოდ ქუდის მოსახდელად. თანდათანობით დავრწმუნდი, რომ მკვდარი წინაპრების თაყვანისცემაზე უარის თქმის გამო არაფერი შემემთხვეოდა. რა ბედნიერი ვარ, რომ იეჰოვამ აკურთხა ჩემი ძალისხმევა — ჭეშმარიტება მესწავლებინა ჩემი ოჯახისა და სხვა დაინტერესებულებისთვის!“

საჭირო არიან სულიერი ძვირფასი ქვების მომპოვებლები

1950 წელს მისიონერების ჩამოსვლამდე ნამიბიაში კეთილი ცნობის მხოლოდ ერთი მაუწყებელი იყო. მაუწყებელთა რიცხვი განუწყვეტლივ იზრდება და უკვე 995-ს მიაღწია. მაგრამ კიდევ ბევრი საქმეა გასაკეთებელი. ზოგ მხარეში თითქმის არაფერი გაკეთებულა. შეგიძლიათ იმსახუროთ იქ, სადაც სამეფოს გულმოდგინე მაუწყებლების დიდი მოთხოვნილებაა? თუ დიახ, ჩამოდით ნამიბიაში და დაგვეხმარეთ მეტი სულიერი ძვირფასი ქვის მოპოვებასა და გაპრიალებაში (შეადარეთ საქმეები 16:9).

[რუკა⁄სურათები 26 გვერდზე]

აფრიკა

ნამიბია

[სურათები]

ნამიბია მშვენიერი ძვირფასი ქვების ქვეყანაა.

[საავტორო უფლება]

Maps: Mountain High Maps® Copyright © 1997 Digital Wisdom, Inc.; Diamonds: Courtesy Namdek Diamond Corporation

[სურათები 26 გვერდზე]

კეთილი ცნობა ნამიბიაში არსებულ ყველა ეთნიკურ ჯგუფს ექადაგება.

[სურათი 28 გვერდზე]

შეგიძლიათ იმსახუროთ იქ, სადაც სამეფოს მაუწყებლების უფრო დიდი მოთხოვნილებაა?