როგორ მოაქვს მშვიდობა იესოს დაბადებას?
„მშვიდობა დედამიწაზე ადამიანებს, რომლებსაც ღმერთი იწონებს“. იესოს დაბადებასთან დაკავშირებით მხოლოდ ეს ერთი წინასწარმეტყველება არ წარმოთქმულა. გარდა იმისა, რაც ანგელოზებმა გაოგნებულ მწყემსებს აუწყეს, ზეციურმა მაცნეებმა ღვთის შთაგონებით მრავალი რამ აცნობეს ახალშობილი იესოს შესახებ მარიამსა და მის ქმარს, იოსებს. ამ ცნობების გაანალიზების წყალობით უკეთ ჩავწვდებით იესოს დაბადების ისტორიას და გავიგებთ, სინამდვილეში რა იგულისხმებოდა ანგელოზების სიტყვებში, რომლებიც ადამიანთა შორის მშვიდობას ეხებოდა.
იესოს დაბადებამდე მარიამს გამოეცხადა ანგელოზი, რომელსაც ბიბლია გაბრიელის სახელით მოიხსენიებს. „გამარჯობა, მადლით მოსილო, შენთანაა იეჰოვა“, — მიესალმა მას ანგელოზი. როგორც ხვდებით, მარიამი ალბათ შეშფოთდებოდა და ცოტა შეშინდებოდა კიდეც. რას ნიშნავდა ასეთი მისალმება?
გაბრიელმა აუხსნა: „აი, ჩაგესახება საშვილოსნოში და გაგიჩნდება ვაჟი, რომელსაც იესო უნდა დაარქვა. ის დიდი იქნება და უზენაესის ძე დაერქმევა. იეჰოვა ღმერთი მას დავითის, მამამისის ტახტს მისცემს და ის მარადიულად იმეფებს იაკობის სახლზე. მის სამეფოს ბოლო არ ექნება“. მარიამმა ჰკითხა ანგელოზს, როგორ მოხდებოდა ეს, რადგან ის ქალწული იყო. გაბრიელმა მიუგო, რომ ბავშვი ღვთის წმინდა სულით ჩაისახებოდა. ის არ იქნებოდა ჩვეულებრივი ბავშვი (ლუკა 1:28—35).
ნაწინასწარმეტყველები მეფე
გაბრიელის სიტყვები მიახვედრებდა მარიამს, რომ მისი ვაჟი სწორედ ის იყო, ვის შესახებაც წარსულში იყო ნაწინასწარმეტყველები. იმის ხსენება, რომ მარიამის ვაჟს იეჰოვა „დავითის, მამამისის ტახტს“ მისცემდა, მარიამს — ისევე როგორც ნებისმიერ იუდეველს, რომელიც კარგად იცნობდა წმინდა წერილებს — გაახსენებდა ღვთის მიერ ისრაელის მეფე დავითისთვის მიცემულ დანაპირებს.
წინასწარმეტყველ ნათანის პირით იეჰოვას ნათქვამი ჰქონდა დავითისთვის: „მარადიულად განმტკიცდება შენი სახლი და შენი სამეფო, მარადიულად განმტკიცდება შენი ტახტი“ (2 სამუელი 7:4, 16). იეჰოვამ თქვა დავითზე: „სამუდამოდ დავაფუძნებ მის შთამომავალს, მანამ იდგება მისი ტახტი, ვიდრე ცა არსებობს. . . მარადიულად იარსებებს მისი შთამომავალი და მისი ტახტი — როგორც მზე ჩემ წინაშე“ (ფსალმუნი 89:20, 29, 35, 36). ამიტომ, უბრალო დამთხვევა არ იყო ის, რომ მარიამიცა და იოსებიც, ორივე დავითის შთამომავლები იყვნენ.
ებრაულ წერილებში მხოლოდ ამ წინასწარმეტყველებებს არ ვხვდებით დავითის სამეფო ხაზში დაბადებული ძის შესახებ. მარიამს ესაიას წინასწარმეტყველებაც ეცოდინებოდა: „შეგვეძინა შვილი, მოგვეცა ძე, რომლის მხარზეც იქნება ხელმწიფობა. დაერქმევა მას საოცარი მრჩეველი, ძლიერი ღმერთი, მარადიული მამა, მშვიდობის მთავარი. მისი ხელმწიფობა განივრცობა და მშვიდობას ბოლო არ ექნება დავითის ტახტზე და მის სამეფოში მის განსამტკიცებლად და სამართლიანობითა და სიმართლით მის შესანარჩუნებლად, ახლაც და მარადიულადაც. ლაშქართა ღვთის, იეჰოვას მოშურნეობა გააკეთებს ამას“ (ესაია 9:6, 7).
ამგვარად, ის, რაც გაბრიელმა მარიამს აცნობა, ბავშვის სასწაულებრივ დაბადებაზე გაცილებით მეტს მოიცავდა. მისი ვაჟი მეფე დავითის მემკვიდრე — ღვთის სამეფოს მუდმივი, მარადიული მემკვიდრე გახდებოდა. იმას, რაც გაბრიელმა იესოს მომავალი როლის შესახებ იწინასწარმეტყველა, დიდი მნიშვნელობა აქვს თითოეული ჩვენგანისთვის.
როდესაც იოსებმა შეიტყო, რომ მარიამი ბავშვს ელოდებოდა, გადაწყვიტა, ნიშნობა გაეუქმებინა. მან იცოდა, რომ ბავშვი თავისი არ იყო, რადგან თავის საცოლესთან სქესობრივი კავშირი არ ჰქონია. ხომ წარმოგიდგენიათ, როგორ გაუჭირდებოდა იოსებს იმის დაჯერება, რასაც მარიამი ეტყოდა თავისი ფეხმძიმობის შესახებ?! სახარებაში ვკითხულობთ: «იეჰოვას ანგელოზი ეჩვენა სიზმარში და უთხრა: „იოსებ, დავითის ძეო, ნუ გეშინია მარიამის, შენი ცოლის სახლში მიყვანის, რადგან ის, ვინც მასშია ჩასახული, წმინდა სულისგან არის. ვაჟს გააჩენს და მას იესო უნდა დაარქვა, რადგან ის დაიხსნის თავის ხალხს მათი ცოდვებისგან“ » (მათე 1:20, 21).
ბიბლია არაფერს ამბობს იმაზე, თუ რამდენად ჩასწვდა იოსები ბავშვის შესახებ ნათქვამ სიტყვებს, რომ ის ‘დაიხსნიდა თავის ხალხს მათი ცოდვებისგან’. მაგრამ ეს ცნობა საკმარისი იყო მისთვის იმაში დასარწმუნებლად, რომ მომავალ დედას ცუდი არაფერი ჩაუდენია. იოსები ისე მოიქცა, როგორც ანგელოზმა უთხრა, და სახლში წაიყვანა მარიამი, რაც ქორწინების ტოლფასი იყო.
ბიბლიაში მოცემული ინფორმაციის წყალობით შეგვიძლია გავიგოთ, თუ რას გულისხმობდა ანგელოზი თავის სიტყვებში. კაცობრიობის ისტორიის გარიჟრაჟზე ერთმა ურჩმა ანგელოზმა ეჭვქვეშ დააყენა იეჰოვას უზენაესობა. ებრაული წერილებიდან ვიგებთ, რომ ამ ურჩმა ანგელოზმა, სხვა ყველაფერთან ერთად, ფაქტობრივად განაცხადა, რომ ღვთის მმართველობა არ იყო სამართლიანი და რომ განსაცდელის დროს არც ერთი ადამიანი არ დარჩებოდა იეჰოვას ერთგული (დაბადება 3:2—5; იობი 1:6—12). მაგალითად, ადამი არ დარჩა ერთგული. მისი ცოდვის შედეგად ყველა ადამიანმა მემკვიდრეობით მიიღო ცოდვა; ცოდვის შედეგი კი სიკვდილია (რომაელები 5:12; 6:23). იესო კი უცოდველი დაიბადა, რადგან მას ხორციელი მამა არ ჰყოლია. იესომ ნებაყოფლობით გაიღო თავისი ადამიანური სიცოცხლე გამოსასყიდად. ეს გამოსასყიდი ზუსტად შეესაბამებოდა იმას, რაც ადამმა დაკარგა, და ამიტომ მას შეეძლო ეხსნა ადამიანები მათი ცოდვებისგან და მათთვის მარადიული სიცოცხლის იმედი მიეცა (1 ტიმოთე 2:3—6; ტიტე 3:6, 7; 1 იოანე 2:25).
დედამიწაზე მსახურების დროს იესომ დაანახვა ხალხს, თუ რას ნიშნავდა ცოდვის შედეგებისგან გათავისუფლება. ის კურნავდა ადამიანებს ყველანაირი დაავადებისგან და მკვდრებსაც კი აცოცხლებდა (მათე 4:23; იოანე 11:1—44). ამ სასწაულებით ის აჩვენებდა, თუ რას გააკეთებდა მომავალში. იესომ თქვა: „მოდის საათი, როცა ყველანი, ვინც სამარხებში არიან, [ჩემს] ხმას მოისმენენ და გამოვლენ“ (იოანე 5:28, 29).
ამ დანაპირებიდან ჩანს, რომ იესოს დაბადება, და მით უფრო სიკვდილი, ძალიან მნიშვნელოვანია ჩვენთვის. ღმერთმა გამოგზავნა თავისი ძე ქვეყნიერებაში, „რომ მისი მეშვეობით გადარჩენილიყო ქვეყნიერება“, — ნათქვამია იოანეს 3:17-ში. ეს შესანიშნავი ცნობა გვახსენებს იმ სიტყვებს, იესოს დაბადების ღამეს რომ მოისმინეს მწყემსებმა, რომლებიც თავიანთ ფარას დარაჯობდნენ.
სასიხარულო ცნობა
ანგელოზების მიერ „მხსნელის, უფალ ქრისტეს“ დაბადების უწყება მართლაც სასიხარულო ცნობა იყო მთელი კაცობრიობისთვის (ლუკა 2:10, 11). ეს ბავშვი გახდებოდა მესია, უდიდესი წინასწარმეტყველი და მმართველი, რომელსაც ღვთის ხალხი დიდი ხნის განმავლობაში ელოდა (მეორე კანონი 18:18; მიქა 5:2). დედამიწაზე თავისი ცხოვრებითა და სიკვდილით ის უმნიშვნელოვანეს როლს შეასრულებდა იეჰოვას უზენაესობის გამართლებაში; სწორედ ამიტომ თქვეს ანგელოზებმა: „დიდება ზეციერ ღმერთს“ (ლუკა 2:14).
იესომ, რომელსაც ბიბლია „უკანასკნელ ადამს“ უწოდებს, ცხადყო, რომ უმძიმესი განსაცდელების დროსაც კი ადამიანს შეუძლია იეჰოვას ერთგული დარჩეს (1 კორინთელები 15:45). ამგვარად, მან დაამტკიცა, რომ სატანა ბოროტი მატყუარაა, რაც უდიდესი სიხარულის მიზეზი იყო ერთგული ანგელოზებისთვის.
მაგრამ, მოდი დავუბრუნდეთ დასაწყისში დასმულ კითხვას: „არსებობს იმის რეალური იმედი, რომ იესოს დაბადების ღამეს ანგელოზების მიერ წარმოთქმული სიტყვები ოდესმე შესრულდება?“ პასუხი ერთმნიშვნელოვანია — დიახ! მშვიდობის დამყარებას უდიდესი მნიშვნელობა ენიჭება დედამიწასთან დაკავშირებული ღვთის განზრახვის შესრულებაში, რომელშიც სამოთხის აღდგენაც შედის. როდესაც ღვთის განზრახვა მთელ დედამიწაზე შესრულდება, ყველა ადამიანი სიყვარულსა და ერთგულებას გამოავლენს. აქედან გამომდინარე, იეჰოვას განზრახვის შესრულება იმასაც მოიცავს, რომ განადგურდეს ყველა, ვინც იეჰოვას უზენაეს ხელისუფლებას არ ემორჩილება. ეს ნამდვილად არ არის სასიხარულო ცნობა მათთვის, ვინც მხარს უჭერს სატანას და ამბობს, რომ იეჰოვას ნორმები ზიანის მომტანია. ასეთი ადამიანებისთვის ეს განადგურებას ნიშნავს (ფსალმუნი 37:11; იგავები 2:21, 22).
ყურადღება მიაქციეთ, რომ ანგელოზებს არ უთქვამთ მწყემსებისთვის, ყველა ადამიანს ექნებაო მშვიდობა და ყველას მოიწონებსო ღმერთი. პირიქით, მათ თქვეს, რომ მშვიდობა ექნებოდათ მხოლოდ იმ „ადამიანებს, რომლებსაც ღმერთი იწონებს“. ისინი, ვისაც იეჰოვასადმი ნამდვილი რწმენა აქვს, იესოს ერთგული მიმდევრები ხდებიან და ბაძავენ მას. ასეთი ადამიანები გულუხვნი და გულისხმიერნი არიან სხვების მიმართ, და ასე იქცევიან არა წლის განსაზღვრულ დროს, არამედ ყოველდღე.
ქრისტიანული თვისებების გამოვლენა მთელი წლის განმავლობაში
სასიხარულო ცნობას, რომელსაც იესო ქადაგებდა, დიდი ძალა აქვს; ის გავლენას ახდენს უამრავი ადამიანის ცხოვრებაზე. ბევრი ადამიანი ქრისტიანულ ნორმებს ცხოვრების ყველა სფეროში იყენებს. ადამიანები, რომლებიც ერთ დროს მხოლოდ საკუთარი თავისთვის ცხოვრობდნენ, ფიქრობენ, თუ როგორ მოიქცეოდა იესო მათ ადგილას. ზოგი, ვისაც მთელი ყურადღება სიმდიდრის მოხვეჭასა და სიამოვნების მიღებაზე ჰქონდა გადატანილი, ხვდება, თუ რა მნიშვნელოვანია სულიერი ფასეულობები და ამ ფასეულობების სხვებისთვის გაზიარება. ეს ადამიანები მთელი წლის განმავლობაში ცდილობენ ხელგაშლილობისა და სიკეთის გამოვლენას. განა ასე არ უნდა იქცეოდნენ ჭეშმარიტი ქრისტიანები?!
თუ გულწრფელი ადამიანები ერთი წუთით შეჩერდებოდნენ და დაფიქრდებოდნენ, რა დგას ანგელოზების მიერ მშვიდობაზე ნათქვამი სიტყვების მიღმა, და ამის შესაბამისად მოიქცეოდნენ, მსოფლიო სულ სხვანაირი იქნებოდა.
მათ, ვისაც ღმერთი იწონებს, იესოს დაბადებასთან დაკავშირებული წინასწარმეტყველებები არწმუნებს, რომ მარადიულად გაიხარებენ ჭეშმარიტი მშვიდობით. ალბათ, თქვენც გსურთ, იცხოვროთ ასეთ გარემოში. ჩვენ შეგვიძლია დარწმუნებული ვიყოთ, რომ იესოს დაბადების დროს ანგელოზების მიერ მშვიდობაზე გაცხადებული დიდებული წინასწარმეტყველება აუცილებლად შესრულდება. ეს არ არის ლიტონი სიტყვები, რომლებიც შობის დღესასწაულის დროს გაისმის — მშვიდობა მალე რეალობად იქცევა და მარადიულად იარსებებს.
[სურათები 7 გვერდზე]
ქრისტიანული თვისებების გამოვლენა შესაძლებელია და ასეც უნდა მოვიქცეთ მთელი წლის განმავლობაში.