ორგანიზებულად ვასრულებთ იეჰოვას ნებას

მთელ მსოფლიოში უამრავი რელიგიური, პოლიტიკური, კომერციული თუ საზოგადოებრივი ორგანიზაცია არსებობს, რომლებსაც განსხვავებული იდეები, მიზნები და ამოცანები აქვთ. მაგრამ არსებობს ორგანიზაცია, რომელიც სხვა ორგანიზაციებისგან სრულიად განსხვავდება. ღვთის სიტყვაზე დაყრდნობით თამამად შეგვიძლია ვთქვათ, რომ ეს იეჰოვას მოწმეთა ორგანიზაციაა.

² შენ ახლა იეჰოვას ორგანიზაციაში ხარ, რაც ძალიან სასიხარულოა. შენ უკვე დარწმუნდი, რა არის ღვთის ნება და ასრულებ კიდეც მას (ფსალმ. 143:10; რომ. 12:2). მოსიყვარულე მსოფლიო საძმოს მხარდამხარ გულმოდგინედ ემსახურები ღმერთს (2 კორ. 6:4; 1 პეტ. 2:17; 5:9). ღვთის სიტყვაში ჩაწერილი დაპირებისამებრ, ამას შენთვის კურთხევები და ბედნიერება მოაქვს (იგავ. 10:22; მარ. 10:30). იეჰოვას ნებას ერთგულად რომ ასრულებ, ამით შენს მარადიულ, საუცხოო მომავალს უყრი საძირკველს (1 ტიმ. 6:18, 19; 1 იოან. 2:17).

³ ჩვენს დიდებულ შემოქმედს უნიკალური მსოფლიო ორგანიზაცია აქვს, რომელიც თეოკრატიულად იმართება. ეს იმაზე მეტყველებს, რომ ამ ორგანიზაციას სათავეში თავად იეჰოვა უდგას. ჩვენ სრულიად ვენდობით მას; ის არის ჩვენი მოსამართლე, კანონმდებელი და მეფე (ეს. 33:22). იეჰოვა წესრიგის მოყვარული ღმერთია და ყველაფერს აკეთებს, რომ მასთან ვითანამშრომლოთ მისივე განზრახვის შესასრულებლად (2 კორ. 6:1, 2).

⁴ ქვეყნიერების აღსასრულის მოახლოებასთან ერთად ღვთის ორგანიზაციაში ჩვენი მეფის, იესო ქრისტეს, ხელმძღვანელობით საქმე წინ მიიწევს (ეს. 55:4; გამოცხ. 6:2; 11:15). როგორც იესომ იწინასწარმეტყველა, მისი მიმდევრები იმაზე მეტ საქმეს შეასრულებდნენ, ვიდრე თავად შეასრულა დედამიწაზე მსახურებისას (იოან. 14:12). ვინაიდან იესოს მიმდევრებს უფრო მეტი დრო ექნებოდათ და რიცხობრივადაც გაიზრდებოდნენ, მათი საქმიანობა გაცილებით ვრცელ ტერიტორიას მოიცავდა. ისინი სამეფოს შესახებ სასიხარულო ცნობას დედამიწის კიდით კიდემდე იქადაგებდნენ (მათ. 24:14; 28:19, 20; საქ. 1:8).

⁵ აშკარაა, რომ დღეს ეს წინასწარმეტყველება ზედმიწევნით სრულდება. თუმცა იესომ არაორაზროვნად თქვა, რომ სასიხარულო ცნობის გაცხადება იეჰოვას მიერ დანიშნულ დროს დასრულდებოდა. ყველა ბიბლიური წინასწარმეტყველება იმაზე მოწმობს, რომ იეჰოვას დიდი და შიშის მომგვრელი დღე უკვე ძალიან ახლოსაა (იოელ. 2:31; სოფ. 1:14—18; 2:2, 3; 1 პეტ. 4:7).

⁶ ამ ბოლო დღეების მიწურულს, რაც უფრო მეტად ვწვდებით, რა არის იეჰოვას ნება, მით უფრო გულმოდგინედ უნდა შევასრულოთ მისი მოთხოვნები. ამისათვის საჭიროა, კარგად გავერკვეთ, როგორ ფუნქციონირებს ღვთის ორგანიზაცია და მჭიდროდ ვითანამშრომლოთ მასთან. ღვთის ორგანიზაცია მოქმედებს ბიბლიური პრინციპების, მცნებების, კანონების, მითითებების, წესებისა და ღვთივშთაგონებული სწავლებების საფუძველზე (ფსალმ. 19:7—9).

⁷ იეჰოვას ხალხი ზედმიწევნით მიჰყვება ბიბლიაზე დაფუძნებულ მითითებებს, რისი წყალობითაც მათ შორის მშვიდობა და ერთობა სუფევს (ფსალმ. 133:1; ეს. 60:17; რომ. 14:19). მსოფლიოს სხვადასხვა კუთხეში მცხოვრებ და-ძმებს სიყვარული აერთიანებთ. სწორედ სიყვარულია ჩვენი მამოძრავებელი ძალა და მისით ვართ შემოსილნი (იოან. 13:34, 35; კოლ. 3:14). ჩვენ ღვთისმოსაწონ გზას ვადგავართ და ფეხდაფეხ მივყვებით იეჰოვას ორგანიზაციის ზეციერ ნაწილს.

იეჰოვას ორგანიზაციის ზეციერი ნაწილი

⁸ წინასწარმეტყველებმა, ესაიამ, ეზეკიელმა და დანიელმა, ხილვაში იეჰოვას ორგანიზაციის ზეციერი ნაწილი იხილეს (ეს. თავი 6; ეზეკ. თავი 1; დან. 7:9, 10). მსგავსი ხილვა მოციქულ იოანესაც ჰქონდა, რომელიც ბიბლიის წიგნ „გამოცხადებაში“ ჩაიწერა; ეს წიგნი გარკვეულ წარმოდგენას გვიქმნის ორგანიზაციის ზეციერი ნაწილის შესახებ. მოციქულმა იეჰოვა დიდებულ ტახტზე მჯდომი იხილა. იგი გარშემორტყმული იყო ანგელოზებით, რომლებიც ამბობდნენ: „წმინდაა, წმინდაა, წმინდაა იეჰოვა ღმერთი, ყოვლისშემძლე, რომელიც იყო, არის და მოდის“ (გამოცხ. 4:8). იოანემ „ტახტთან . . . კრავიც“ იხილა, ღვთის კრავი, იესო ქრისტე (გამოცხ. 5:6, 13, 14; იოან. 1:29).

⁹ ამ ხილვიდან ვიგებთ, რომ ღვთის ორგანიზაციას ტახტზე მჯდომი იეჰოვა ღმერთი ხელმძღვანელობს. მისი აღმატებულობის შესახებ 1 მატიანის 29:11, 12-ში ნათქვამია: „იეჰოვა, დიადი, ძლევამოსილი, ბრწყინვალე, აღმატებული და დიდებული ხარ, რადგან ყველაფერი შენია ცაში თუ დედამიწაზე! შენია მეფობა, იეჰოვა! ყველაზე და ყველაფერზე აღმატებული ხარ! შენგანაა სიმდიდრე და დიდება, შენ განაგებ ყველაფერს. ძლიერი და ძლევამოსილი ხარ, შენ ძალგიძს ყველას განდიდება და გაძლიერება“.

¹⁰ იესო ქრისტეს, როგორც იეჰოვას თანამშრომელს, ზეცაში აღმატებული მდგომარეობა უკავია და დიდი ძალაუფლება აქვს მინიჭებული. ღმერთმა „ყველაფერი მას დაუმორჩილა და იგი დააყენა ყველაფრის თავად კრებაში“ (ეფეს. 1:22). მოციქულმა პავლემ იესოს შესახებ თქვა: „ღმერთმა ის უფრო მეტად აამაღლა და მიანიჭა ყველა სახელზე აღმატებული სახელი, რათა იესოს სახელით მუხლი მოიდრიკოს ყველამ, ვინც ზეცაში, დედამიწაზე თუ მიწაშია, და ყველამ საჯაროდ აღიაროს, რომ იესო ქრისტე არის უფალი ღვთის, მამის, სადიდებლად“ (ფილ. 2:9—11). შეგვიძლია დარწმუნებულნი ვიყოთ, რომ იესო ქრისტე სამართლიანად ხელმძღვანელობს ღვთის ორგანიზაციას.

¹¹ წინასწარმეტყველმა დანიელმა ხილვაში ზეციერ ტახტზე მჯდომი „მარად არსებული“ იხილა. მას „ათასობით ათასი [ანგელოზი] ემსახურებოდა და ათიათასობით ათი ათასი იდგა მის წინაშე“ (დან. 7:10). ბიბლიაში ამ ანგელოზთა ლაშქრის შესახებ ნათქვამია, რომ ისინი არიან „წმინდა მსახურების შემსრულებელი სულები . . . მათ მოსამსახურებლად გაგზავნილნი, ვისაც ღმერთი დაიხსნის“ (ებრ. 1:14). ყველა ამ სულიერ ქმნილებას ღვთის ორგანიზაციაში გარკვეული ძალაუფლება აქვს მინიჭებული (კოლ. 1:16).

¹² თუ დავფიქრდებით იმაზე, რაოდენ შთამბეჭდავია იეჰოვას ორგანიზაციის ზეციერი ნაწილი, უკეთ წარმოვიდგენთ ესაიას რეაქციას, რომელიც მას მაშინ დაეუფლა, როცა ტახტზე მჯდომი იეჰოვა და მის ზემოთ მდგომი სერაფიმები იხილა. ესაიას აღმოხდა: „ვაიმე! მკვდარს დავემსგავსე, რადგან ბაგეუწმინდური კაცი ვარ და ბაგეუწმინდურ ხალხში ვცხოვრობ, ჩემმა თვალებმა კი მეფე, ლაშქართა ღმერთი იეჰოვა, იხილა!“ ესაია შიშითა და მოწიწებით განიმსჭვალა, როდესაც გააცნობიერა, რამდენად დიდებული და მასშტაბური იყო იეჰოვას ორგანიზაცია. ნანახმა მასზე იმდენად დიდი შთაბეჭდილება მოახდინა, რომ, როდესაც იეჰოვამ ზეციდან იკითხა, ვინ გაეგზავნებოდა მნიშვნელოვანი დავალების შესასრულებლად და ვინ აუწყებდა მის განაჩენს, ესაიამ მზადყოფნით თქვა: „მე წავალ! მე გამგზავნე!“ (ეს. 6:1—5, 8).

¹³ იეჰოვას მსახურებიც მსგავს სულისკვეთებას ავლენენ, რადგან აცნობიერებენ, რამდენად დიდებულია ღვთის ორგანიზაცია და აფასებენ მას. იეჰოვას ორგანიზაცია წინ მიიწევს და ჩვენც ფეხდაფეხ მივყვებით მას. ჩვენ ბოლომდე უნდა ვენდოთ იეჰოვას ორგანიზაციას.

იეჰოვას ორგანიზაცია წინ მიიწევს

¹⁴ წინასწარმეტყველი ეზეკიელი თავისი წიგნის პირველ თავში აღწერს უზარმაზარ ზეციერ ეტლს, რომელსაც თავად იეჰოვა მართავს. ეს შთამბეჭდავი ეტლი იეჰოვას ორგანიზაციის უხილავ ნაწილს განასახიერებს. ამ ეტლს ღმერთი მართავს ანუ მას თავისი განზრახვის შესასრულებლად იყენებს (ფსალმ. 103:20).

¹⁵ ეტლის თითოეულ ბორბალში განივად იმავე დიამეტრის კიდევ ერთი ბორბალი ზის. ამიტომაცაა ამ ბორბლებზე ნათქვამი, რომ „ისინი ოთხივე მიმართულებით მოძრაობდნენ“ (ეზეკ. 1:17). ბორბლებს თვალის დახამხამებაში შეუძლია მიმართულების შეცვლა, მაგრამ ეს იმას არ ნიშნავს, რომ ეტლი უკონტროლოდ მოძრაობს ან მას არავინ მართავს. იეჰოვას თავისი ორგანიზაცია ნებაზე არ ჰყავს მიშვებული. ეზეკიელის 1:20-ში ვკითხულობთ: „საითკენაც სული წაიყვანდა მათ . . . იქით მიდიოდნენ“. ამგვარად, იეჰოვას თავისი სულის მეშვეობით ორგანიზაცია იქით მიჰყავს, საითაც თავად სურს. დროდადრო ყველა უნდა დავფიქრდეთ, მივყვებით თუ არა ფეხდაფეხ ღვთის ორგანიზაციას.

¹⁶ იეჰოვას ორგანიზაციას რომ ფეხდაფეხ მივყვეთ, მხოლოდ კრების შეხვედრებზე დასწრება და სამქადაგებლო მსახურებაში მონაწილეობა არ კმარა. იმისათვის, რომ ფეხი ავუწყოთ ღვთის ორგანიზაციას, სულიერად უნდა ვიზრდებოდეთ. ბიბლია მოგვიწოდებს, დავინახოთ, „რა უფრო მნიშვნელოვანია“, და დროულად მივიღოთ სულიერი საზრდო (ფილ. 1:10; 4:8, 9; იოან. 17:3). არც ის უნდა გამოგვრჩეს მხედველობიდან, რომ ორგანიზაციის ფუნქციონირებისთვის საჭიროა კარგი ხელმძღვანელობის გაწევა და ურთიერთთანამშრომლობა. მნიშვნელოვანია, გონივრულად გამოვიყენოთ მატერიალური სახსრები და სრულად დავიხარჯოთ სულიერ საქმეებში, რადგან გვესმის, რომ ამგვარად ღვთის მიერ მონდობილ დავალებას ვასრულებთ. თუ იეჰოვას ზეციერ ეტლს არ ჩამოვრჩებით, თავადაც იმ ცნობის თანახმად ვიცხოვრებთ, რომელსაც სხვებს ვაუწყებთ.

¹⁷ იეჰოვას ორგანიზაცია გვეხმარება, რომ ერთ ადგილზე არ ვიდგეთ და კვლავაც შევასრულოთ მისი ნება. არ უნდა დაგვავიწყდეს, რომ ზეციერ ეტლს თავად იეჰოვა მართავს. თუ ამ ეტლს ფეხდაფეხ მივყვებით, ამით ვაჩვენებთ, რომ პატივს მივაგებთ და ვენდობით იეჰოვას, ჩვენს კლდეს (ფსალმ. 18:31). ბიბლია გვპირდება: „იეჰოვა მისცემს ძალას თავის ხალხს; იეჰოვა აკურთხებს თავის ხალხს მშვიდობით“ (ფსალმ. 29:11). ვინაიდან იეჰოვას ორგანიზაციაში ვართ, ის თავად გვაძლევს ძალას და გვაკურთხებს მშვიდობით. ჩვენ ეჭვი არ გვეპარება, რომ ის კვლავაც უხვად გვაკურთხებს, თუ მარადიულად შევასრულებთ მის ნებას.