დედამიწაზე ადამიანები გამრავლდნენ. უმრავლესობა კაენივით ცუდად იქცეოდა. თუმცა ერთი კაცი განსხვავებული იყო. მას ენოქი ერქვა. ის მამაცი ადამიანი იყო. მიუხედავად იმისა, რომ სხვები ბოროტებას სჩადიოდნენ, ენოქი ღმერთს ემსახურებოდა.

იცი, რატომ იქცეოდა ხალხი ცუდად? გახსოვს, ვინ უბიძგა ადამსა და ევას, არ დამორჩილებოდნენ ღმერთს და აკრძალული ნაყოფი ეჭამათ? ეს იყო ბოროტი ანგელოზი, რომელსაც ბიბლიაში სატანა ეწოდება. ის ყველა ადამიანს ბოროტებისკენ უბიძგებს.

ერთხელ იეჰოვა ღმერთმა ენოქს დაავალა, ხალხისთვის ეთქვა ის, რაც მათ არ მოეწონებოდათ. აი რა უნდა ეთქვა: „ერთ დღეს ღმერთი ყველა ბოროტ ადამიანს გაანადგურებს“. ამის მოსმენაზე ხალხი, ალბათ, ძალიან განრისხდა. ისინი შეიძლება ენოქის მოკვლასაც კი ცდილობდნენ. ენოქს სიმამაცე სჭირდებოდა, რომ მათთვის ღვთის განაჩენი გაეცხადებინა.

ღმერთმა არ დაუშვა, რომ ენოქს დიდხანს ეცხოვრა ამ ბოროტ ხალხში. მან მხოლოდ 365 წელი იცოცხლა. რატომ ვამბობთ, რომ ეს „მხოლოდ 365 წელი“ იყო? იმ დროს ადამიანები უფრო ჯანმრთელები იყვნენ და დიდხანს ცოცხლობდნენ. მაგალითად, ენოქის შვილმა, მეთუშალახმა 969 წელი იცოცხლა.

ენოქის სიკვდილის შემდეგ ადამიანები უარესად გაბოროტდნენ. ბიბლიაში ნათქვამია, რომ ‘ისინი მხოლოდ ბოროტებაზე ფიქრობდნენ’ და ‘დედამიწა ძალადობით აივსო’.

იცი, რატომ ხდებოდა მაშინ დედამიწაზე ამდენი უბედურება? ერთ-ერთი მიზეზი ის იყო, რომ სატანამ კიდევ ერთ ხერხს მიმართა ადამიანების გასაბოროტებლად. ამის შესახებ მომდევნო მოთხრობაში წავიკითხავთ.

რას იფიქრებ ისეთ მაღალ ადამიანზე, რომელიც თავით ჭერს სწვდება? ალბათ, იფიქრებ, რომ ის ბუმბერაზია. ერთ დროს დედამიწაზე მართლა ცხოვრობდნენ ბუმბერაზები. ბიბლია ამბობს, რომ მათი მამები ზეციდან ჩამოსული ანგელოზები იყვნენ. მაგრამ როგორ მოხდა ეს?

გაიხსენე, ბოროტ ანგელოზ სატანას სურდა, რომ ყველა ბოროტი გამხდარიყო. ის ცდილობდა, ღვთის ანგელოზებიც გაებოროტებინა. დროთა განმავლობაში ზოგმა ანგელოზმა დაუჯერა სატანას და შეწყვიტა ზეცაში იმ საქმის კეთება, რაც ღმერთმა მათ დაავალა. ისინი ჩამოვიდნენ დედამიწაზე და ხორცი შეისხეს. იცი, რატომ მოიქცნენ ასე?

ბიბლიიდან ვიგებთ, რომ ღვთის ამ სულიერმა ძეებმა დაინახეს ლამაზი ქალები და მათთან ცხოვრება მოინდომეს. ისინი ჩამოვიდნენ დედამიწაზე და ცოლები შეირთეს. ბიბლია ამბობს, რომ ეს ცუდი საქციელი იყო, რადგან ღმერთმა ანგელოზები ზეცაში საცხოვრებლად შექმნა.

ანგელოზებისგან ქალებს ბავშვები შეეძინათ, რომლებიც სხვა ბავშვებისგან განსხვავდებოდნენ. თავიდან ეს შეიძლება შესამჩნევი არ იყო, მაგრამ როცა გაიზარდნენ და გაძლიერდნენ, ისინი ბუმბერაზები გახდნენ.

ბუმბერაზები ბოროტები, ძალიან დიდები და ძლიერები იყვნენ და სხვებს ჩაგრავდნენ. ისინი ცდილობდნენ, რომ ყველა მათსავით გაბოროტებულიყო.

ენოქი ცოცხალი აღარ იყო, თუმცა დედამიწაზე ერთი კარგი კაცი მაინც ცხოვრობდა. ეს იყო ნოე, რომელიც ყოველთვის ასრულებდა ღვთის ნებას.

ერთ დღეს ღმერთმა უთხრა ნოეს, რომ ბოროტი ადამიანების განადგურებას აპირებდა. თუმცა ის გადაარჩენდა ნოეს, მის ოჯახსა და ცხოველებს. მოდი გავიგოთ, როგორ გააკეთებდა ამას.