19. ა) რას განასახიერებს შვიდი კრება დღეს? ბ) ვინ უერთდება ცხებულ ქრისტიანებს, და რატომ არის მათთვისაც გასათვალისწინებელი იესოს რჩევა? გ) რას ნიშნავს ჩვენთვის იესოს სიტყვები, რომლებიც მან I საუკუნის შვიდ კრებას მისწერა?

¹⁹ იესოს სიტყვები უმთავრესად 1914 წლიდან სრულდება. ასე რომ, შვიდი კრება უფლის დღის დროს არსებულ ცხებულ ქრისტიანთა ყველა კრებას გულისხმობს.

თავი 7

განიახლეთ თავდაპირველი სიყვარული!

ეფესო

1. რომელ კრებას მიმართა იესომ პირველად და რა შეახსენა ზედამხედველებს?

იესომ თავდაპირველად ეფესოს კრებას მიმართა. ეფესო მცირე აზიის ეკონომიკურად ძლიერი ზღვისპირა ქალაქი იყო და კუნძულ პატმოსთან ახლოს მდებარეობდა. იესომ იოანეს უბრძანა: „ეფესოს კრების ანგელოზს მისწერე, აი რას ამბობს-თქო ის, ვისაც შვიდი ვარსკვლავი უჭირავს მარჯვენაში და ვინც შვიდ ოქროს სალამპრეს შორის დადის“ (გამოცხადება 2:1). იესო ახლაც თავის ძალაუფლებას უსვამს ხაზს, როგორც დანარჩენ ექვს მიმართვაში. ის ეფესოს კრების ზედამხედველებს შეახსენებს, რომ ყველა უხუცესზე ზრუნავს, ზედამხედველობას უწევს მათ და ყველა კრებას ამოწმებს. იესო, როგორც მოსიყვარულე მეთაური, ჩვენს დროშიც ზრუნავს უხუცესებზე და მწყემსავს როგორც მათ, ისე კრების ყველა წევრს. დროდადრო იესო ცვლილებებს ახდენს კრებაში, რათა სინათლემ უფრო და უფრო ანათოს. ის მართლაც ღვთის ფარის მთავარი მწყემსია (მათე 11:28—30; 1 პეტრე 5:2—4).

2. ა) რისთვის შეაქო იესომ ეფესოს კრება? ბ) პავლეს რომელი რჩევა გაითვალისწინეს ეფესოელმა უხუცესებმა?

² იესო თავისი შვიდი მიმართვიდან ხუთს გულთბილი შექებით იწყებს. აი რა სიტყვებით მიმართავს ის ეფესოს კრებას: „ვიცი შენი საქმეები, შენი შრომა და მოთმინება და ის, რომ ვერ იტან ბოროტებს; გამოცდილი გყავს ისინი, ვინც ამბობს, მოციქულები ვართო, სინამდვილეში კი არ არიან; დანახული გაქვს, რომ მატყუარები არიან. შენ მოთმინებას ავლენ, ყველაფერს იტან ჩემი სახელის გულისთვის და არ დაქანცულხარ“ (გამოცხადება 2:2, 3). წლების წინ პავლე მოციქულმა გააფრთხილა ეფესოელი უხუცესები, რომ გამოჩნდებოდნენ „ულმობელი მგლები“, ანუ განდგომილები, რომლებიც სამწყსოში არეულობას შეიტანდნენ, და მოუწოდა, რომ ‘ფხიზლად ყოფილიყვნენ’. თავად პავლე აძლევდა მათ დაუღალავი შრომის მაგალითს (საქმეები 20:29, 31). როგორც ჩანს, ეფესოელმა უხუცესებმა გაითვალისწინეს ეს რჩევა, რადგან იესო აქებს მათ მოთმინებისა და მძიმე, დაუღალავი შრომისთვის.

3. ა) როგორ ცდილობენ ცრუმოციქულები ერთგულთა შეცდენას? ბ) რა თქვა პეტრემ განდგომილთა შესახებ?

³ უფლის დღესაც გამოჩნდნენ ცრუმოციქულები, რომლებიც ‘უკუღმართად ლაპარაკობენ, რათა თან გაიყოლონ მოწაფეები’ (2 კორინთელები 11:13; საქმეები 20:30; გამოცხადება 1:10). ისინი ცუდს ვერაფერს ხედავენ ერთმანეთის მოწინააღმდეგე სექტების არსებობაში, ამტკიცებენ, რომ თითქოს ღმერთს არა ჰყავს ორგანიზაცია, და 1914 წელს იესოს გამეფებას უარყოფენ. მათზე სრულდება 2 პეტრეს 3:3, 4-ში ჩაწერილი წინასწარმეტყველება: «ბოლო დღეებში მოვლენ დამცინავები მათთვის ჩვეული დაცინვით, თავიანთი სურვილებისამებრ მოიქცევიან და იტყვიან: „სად არის ის დაპირებული დრო, როცა ის მოსული უნდა ყოფილიყო? მას შემდეგ, რაც ჩვენმა მამა-პაპამ სიკვდილის ძილით დაიძინა, ყველაფერი ისევე რჩება, როგორც ქმნილებათა დასაწყისიდან იყო“ ».

4. ა) როგორ ვლინდება დამცინავთა სიამაყე და ურჩობა? ბ) ეფესოელთა მსგავსად რა ზომებს მიმართავენ დღეს ქრისტიანები განდგომილთაგან თავის დასაცავად?

⁴ ეს დამცინავები ვერ ეგუებიან იმ აზრს, რომ თავიანთი რწმენის შესახებ სახალხოდ უნდა ქადაგებდნენ (რომაელები 10:10). მათ მხარს უჭერს ქრისტიანული სამყაროს სამღვდელოება და ბეჭდვითი სიტყვისა და ტელეარხების დახმარებით განდგომილები თავიანთი ყოფილი თანამოაზრეების შესახებ ცრუ ინფორმაციას ავრცელებენ. ერთგული ქრისტიანები მალევე ხვდებიან, რომ განდგომილთა საუბარი და საქციელი მზაკვრობაში ამხელს მათ. ეფესოელთა მსგავსად ქრისტიანები დღესაც ‘ვერ იტანენ ბოროტებს’ და რიცხავენ მათ ქრისტიანული კრებიდანa.

5. ა) იესოს სიტყვების თანახმად რატომ დაიმსახურეს ეფესოელმა ქრისტიანებმა შენიშვნა? ბ) რა სიტყვები უნდა ხსომებოდათ ეფესოელებს?

⁵ მაგრამ, როგორც დანარჩენი ხუთი კრებისადმი მიწერილ წერილებში, იესო ეფესოელების სერიოზულ პრობლემაზეც ამახვილებს ყურადღებას. ის მათ ეუბნება: „მაგრამ შენ წინააღმდეგ ისა მაქვს, რომ მიატოვე თავდაპირველი სიყვარული“ (გამოცხადება 2:4). მათ არ უნდა განელებოდათ სიყვარული, რადგან 35 წლით ადრე პავლემ მისწერა, რომ ღმერთმა „დიდი სიყვარულით. . . შეიყვარა“ ისინი და მოუწოდა: „ამიტომ მიჰბაძეთ ღმერთს, როგორც საყვარელმა შვილებმა, და იარეთ სიყვარულში, როგორც ქრისტემ შეგიყვარათ“ (ეფესოელები 2:4; 5:1, 2). მათ იესოს სიტყვებიც უნდა ჰქონოდათ გულში ჩაბეჭდილი: „იეჰოვა, ჩვენი ღმერთი, ერთია იეჰოვა, გიყვარდეს იეჰოვა, შენი ღმერთი, მთელი გულით, მთელი სულით, მთელი გონებით და მთელი ძალით“ (მარკოზი 12:29—31). ეფესოელებს დაკარგული ჰქონდათ თავდაპირველი სიყვარული.

6. ა) რამდენ ხანსაც არ უნდა ვმსახურობდეთ კრებაში, რატომ უნდა ვიყოთ ფხიზლად? ბ) რისკენ უნდა აღგვძრას ღვთის სიყვარულმა?

⁶ რამდენ ხანსაც არ უნდა ვმსახურობდეთ კრებაში, ფხიზლად უნდა ვიყოთ, რომ იეჰოვასადმი თავდაპირველი სიყვარული არ გაგვინელდეს. როგორ შეიძლება გაგვინელდეს სიყვარული? შეიძლება მთავარ საზრუნავად სამუშაო, ფულის კეთება ან გართობა გვექცეს და შედეგად შეიძლება სულიერი ხედვის ნაცვლად ხორციელი აზროვნება განგვივითარდეს (რომაელები 8:5—8; 1 ტიმოთე 4:8; 6:9, 10). იეჰოვას სიყვარულმა უნდა გაგვათავისუფლოს ასეთი აზროვნებისგან და უპირველესად უნდა ‘ვეძებოთ ღვთის სამეფო და მამის სიმართლე’, რათა ‘განძი ზეცაში მოვაგროვოთ’ (მათე 6:19—21, 31—33).

7. ა) რა უნდა აღგვძრავდეს იეჰოვასთვის მსახურებისკენ? ბ) რას ამბობს იოანე სიყვარულზე?

⁷ იეჰოვასადმი მსახურებას მისი ღრმა სიყვარული უნდა ედოს საფუძვლად. მაშ, გავიღრმაოთ მადლიერება იმისთვის, რაც ჩვენთვის იეჰოვამ და ქრისტემ გააკეთეს. იოანე წერდა: „სიყვარული ის კი არ არის, რომ ჩვენ შევიყვარეთ ღმერთი, არამედ ის, რომ მან შეგვიყვარა და გამოგზავნა თავისი ძე შერიგების მსხვერპლად ჩვენი ცოდვების გამო“. იოანე განაგრძობს: „ღმერთი სიყვარულია და ის, ვინც სიყვარულში რჩება, ერთობაში რჩება ღმერთთან, ღმერთი კი — მასთან“. დაე, არასოდეს გაგვინელდეს იეჰოვას, უფალ იესო ქრისტესა და ღვთის ცოცხალი სიტყვის სიყვარული, რაც არა მარტო ღვთისადმი ჩვენს გულმოდგინე მსახურებაში ვლინდება, არამედ იმაშიც, რომ ვემორჩილებით ‘მცნებას, რომელიც მისგან გვაქვს: ვისაც ღმერთი უყვარს, თავისი ძმაც უნდა უყვარდეს’ (1 იოანე 4:10, 16, 21; ებრაელები 4:12; იხილეთ აგრეთვე 1 პეტრეს 4:8; კოლოსელების 3:10—14; ეფესოელების 4:15).

„აკეთე შენი პირვანდელი საქმეები“

8. იესოს სიტყვების თანახმად როგორ უნდა ემოქმედათ ეფესოელებს?

⁸ ეფესოელებს პირვანდელი სიყვარული უნდა განეახლებინათ, რომ სულიერი კრახი არ განეცადათ. იესო მათ ეუბნება: „ამიტომ გაიხსენე, რა დაკარგე, მოინანიე და აკეთე შენი პირვანდელი საქმეები. თუ არადა, მოვდივარ შენთან და მოვაცილებ შენს სალამპრეს თავისი ადგილიდან, თუ არ მოინანიებ“ (გამოცხადება 2:5). ჩვენ არ ვიცით, როგორ იმოქმედა ეფესოელ ქრისტიანებზე იესოს სიტყვებმა. ალბათ მოინანიეს და განიახლეს იეჰოვას სიყვარული. ასე რომ არ ყოფილიყო, მათი ლამპარი ჩაქრებოდა, იესო მოაცილებდა სალამპრეებს თავისი ადგილიდან და ისინი ვეღარ გაანათებდნენ ჭეშმარიტებით.

9. ა) როგორი სიტყვებით გაამხნევა იესომ ეფესოელები? ბ) იოანეს სიკვდილის შემდეგ როგორ უგულებელყვეს კრებებმა იესოს რჩევა, რომელიც მან ეფესოელებს მისწერა?

⁹ ამის შემდეგ იესო ასეთი სიტყვებით ამხნევებს ეფესოელებს: „ეს კი გაქვს, რომ გძულს ნიკოლაელთა სექტის საქმეები, რაც მეც მძულს“ (გამოცხადება 2:6). სხვა თუ არაფერი, იესოს მსგავსად მათაც სძულდათ სექტები, თუმცა დრომ აჩვენა, რომ ბევრმა კრებამ უგულებელყო იესოს სიტყვები. იეჰოვას, ჭეშმარიტებისა და ერთმანეთის სიყვარულის განელების გამო ისინი სულიერ სიბნელეში მოექცნენ და ერთმანეთის მოწინააღმდეგე უამრავ სექტად დაიყვნენ. „ქრისტიანი“ გადამწერები, რომელთაც არ ჰქონდათ იეჰოვას სიყვარული, ბიბლიის ბერძნულ ხელნაწერებში ღვთის სახელს აღარ წერდნენ. სიყვარულის უქონლობის გამო გადმოიღეს ბაბილონური და ბერძნული მოძღვრებები, მაგალითად, ჯოჯოხეთის, განსაწმენდელისა და სამების შესახებ, და ეს ქრისტიანობის სახელით გააკეთეს. ღვთისა და ჭეშმარიტების სიყვარულის ნაკლებობა გახდა იმის მიზეზიც, რომ მრავალმა, ვისაც თავი ქრისტიანად მოჰქონდა, შეწყვიტა ღვთის სამეფოს შესახებ სასიხარულო ცნობის ქადაგება. ისინი გულისთქმას აყოლილი სამღვდელოების გავლენის ქვეშ მოექცნენ, რომელმაც დედამიწაზე თავისი სამეფო შექმნა (შეადარეთ 1 კორინთელების 4:8).

10. რა მდგომარეობა იყო ქრისტიანულ სამყაროში 1918 წელს?

¹⁰ იმ დროს, როდესაც გასამართლება ღვთის სახლიდან დაიწყო, 1918 წელს, სექტანტური ქრისტიანული სამყაროს სამღვდელოება დაუფარავად უჭერდა მხარს პირველ მსოფლიო ომს და კათოლიკებსა და პროტესტანტებს ერთმანეთის გასანადგურებლად აქეზებდა (1 პეტრე 4:17). ეფესოელთა კრებისგან განსხვავებით, რომელთაც სძულდათ ნიკოლაელთა სექტის საქმეები, ქრისტიანული სამყაროს რელიგიებს კარგა ხნის მიღებული ჰქონდათ ურთიერთგამომრიცხავი, ღვთის საწინააღმდეგო მოძღვრებები. სამღვდელოება ქვეყნიერების განუყოფელი ნაწილი გახდა, არადა იესოს თავისი მოციქულებისთვის ნათქვამი ჰქონდა, რომ არ ყოფილიყვნენ ქვეყნიერების ნაწილი (იოანე 15:17—19). მათი კრებები, რომელთაც წარმოდგენა არ ჰქონდათ ბიბლიის მთავარ თემაზე — ღვთის სამეფოზე, ვეღარ ასრულებდნენ ბიბლიური ჭეშმარიტების მანათობელი სალამპრეების მოვალეობას და აღარც იეჰოვას სულიერი ტაძრის წევრებად ითვლებოდნენ. მათი წინამძღოლები (კაცებთან ერთად ქალებიც) „ვარსკვლავები“ კი არა, „უკანონობის კაცის“ მიმდევრები აღმოჩნდნენ (2 თესალონიკელები 2:3; მალაქია 3:1—3).

11. ა) 1918 წელს რომელი ქრისტიანები მოიქცნენ იესოს მიერ ეფესოელებისთვის მიწერილი სიტყვების თანახმად? ბ) რას აკეთებს იოანეს კლასი 1919 წლიდან მოყოლებული?

¹¹ მაგრამ იოანეს კლასი პირველი მსოფლიო ომით გამოწვეულ ძნელბედობის ჟამს მაინც გამოჩნდა. მათ იეჰოვასა და ჭეშმარიტების სიყვარული აღძრავდა, რომ ღვთისთვის გულმოდგინედ ემსახურათ. ისინი წინააღმდეგობას უწევდნენ მათ, ვინც საზოგადოება „საგუშაგო კოშკის“ პირველ პრეზიდენტს, ჩარლზ რასელს, 1916 წლიდან, მისი სიკვდილის შემდეგ აღმერთებდა და ამით სექტანტურ სულს აღვივებდა. დევნებითა და გასაჭირით გამობრძმედილმა ქრისტიანებმა გასამართლების შემდეგ თავიანთი ბატონისგან ქება დაიმსახურეს და მისი სიხარული გაიზიარეს (მათე 25:21, 23). მათ მსოფლიო მოვლენების განვითარებამ და პირადმა გამოცდილებამ უჩვენა, როგორ სრულდებოდა იესოს ნაწინასწარმეტყველები ნიშანი, რაც მისი უხილავი მეფობის დამადასტურებელი იყო. 1919 წლიდან მოყოლებული ისინი გულმოდგინედ განაგრძობდნენ თავიანთი წვლილის შეტანას იესოს დიდებული წინასწარმეტყველების შესრულებაში: „ამ სასიხარულო ცნობას სამეფოს შესახებ იქადაგებენ მთელ მსოფლიოში ყველა ხალხისთვის დასამოწმებლად და მაშინ მოვა აღსასრული“ (მათე 6:9, 10; 24:3—14). თუკი მანამდე აკლდათ იეჰოვას სიყვარული, ამ დროიდან მოყოლებული ეს სიყვარული ცეცხლივით აუგიზგიზდათ.

12. ა) რა მოწოდება გაისმა 1922 წელს გამართულ ისტორიულ კონგრესზე? ბ) რა სახელწოდება მიიღეს ჭეშმარიტმა ქრისტიანებმა 1931 წელს და რა მოინანიეს?

¹² სიდარ-პოინტში (ოჰაიო, აშშ) 1922 წლის 5—13 სექტემბერს ჩატარდა ისტორიული კონგრესი, რომელსაც 18 000 კაცი დაესწრო. მაშინ ასეთი მოწოდება გაისმა: „კვლავ ველისკენ, უზენაესი ღვთის ძეებო! . . მსოფლიომ უნდა იცოდეს, რომ იესო ქრისტე არის მეფეთ მეფე და უფალთ უფალი. . . ამიტომ აუწყეთ, აუწყეთ, აუწყეთ მეფისა და მისი სამეფოს შესახებ!“ იეჰოვას დიდებული სახელი კიდევ უფრო განდიდდა, როცა 1931 წელს კოლუმბუსში (ოჰაიო, აშშ) ჩატარებულ კონგრესზე ქრისტიანებმა სიხარულით მიიღეს სახელწოდება — „იეჰოვას მოწმეები“. ეს სახელი ღმერთმა ესაიას წინასწარმეტყველებაში მოიხსენია (ესაია 43:10, 12). 1939 წლის პირველ მარტს ორგანიზაციის ძირითად ჟურნალს დაერქვა ახალი სახელწოდება — „საგუშაგო კოშკი იუწყება იეჰოვას სამეფოს შესახებ“, რითაც პატივი მიეგო ჩვენს შემოქმედსა და სამეფო მთავრობას. იეჰოვას მოწმეებმა, რომლებმაც განიახლეს იეჰოვას სიყვარული, მოინანიეს ყველა ცოდვა, რის გამოც შეიძლება წინათ ღირსეულად ვერ მიაგებდნენ პატივს და ვერ განადიდებდნენ მის დიდებულ სახელსა და სამეფოს (ფსალმუნი 106:6, 47, 48).

„მძლეველს“

13. ა) რა კურთხევები მოელოდათ ეფესოელებს, თუ ‘მძლეველები’ იქნებოდნენ? ბ) რა შემთხვევაში გახდებოდნენ ისინი ‘მძლეველები’?

¹³ ბოლოს, ისევე როგორც სხვა წერილებში, იესო ყურადღებას ამახვილებს ღვთის წმინდა სულზე, რომელიც იესოს წყალობით აკურთხებს ერთგულებს. ეფესოელებს მან მისწერა: „ვისაც ყური აქვს, მოისმინოს, რას ეუბნება სული კრებებს: მძლეველს ნებას მივცემ, ჭამოს სიცოცხლის ხიდან, რომელიც ღვთის სამოთხეშია“ (გამოცხადება 2:7). მომსმენი ყურის მქონენი ყურად იღებდნენ ამ მნიშვნელოვან ცნობას, ვინაიდან ის იესოსგან კი არა, თავად იეჰოვასგან, უზენაესი უფლისგან მომდინარეობს წმინდა სულით, მისი მოქმედი ძალით. ისინი ‘მძლეველები’ გახდებოდნენ იმ შემთხვევაში, თუ კვალდაკვალ მიჰყვებოდნენ იესოს, რომელიც სიკვდილამდე ერთგული დარჩა და თქვა: „გამაგრდით! მე ვძლიე ქვეყნიერებას“ (იოანე 8:28; 16:33; იხილეთ აგრეთვე 1 იოანეს 5:4).

14. რას უნდა ნიშნავდეს იესოს მოხსენიებული „ღვთის სამოთხე“?

¹⁴ ეფესოელი ქრისტიანების მსგავსად არც სულითცხებულ ქრისტიანებს აქვთ დედამიწაზე სამოთხეში ცხოვრების იმედი. მაშ, როგორღა ‘შეჭამენ სიცოცხლის ხიდან, რომელიც ღვთის სამოთხეშია’? ამაში არ იგულისხმება დედამიწაზე აღდგენილი სამოთხე, რადგან 144 000 ცხებული ქრისტიანი, მათ შორის ეფესოელი ქრისტიანები, როგორც სულიერი ძეები, კრავთან, ქრისტესთან ერთად იმმართველებენ ზეციერი სიონის მთაზე (ეფესოელები 1:5—12; გამოცხადება 14:1, 4). აქედან გამომდინარე, საუბარი მიდის ზეციერ „ბაღისმაგვარ“ სამეფოზე, რომელსაც ეს ‘მძლეველები’ დაიმკვიდრებენ. იქ, „ღვთის სამოთხეში“, სწორედ იეჰოვას წინაშე, ისინი, ვინც უკვდავებას მიიღებენ. ისინი ‘სიცოცხლის ხიდან შეჭამენ’, ესე იგი უსასრულოდ იცხოვრებენ.

15. რატომ უნდა ავლენდეს დიდ ინტერესს უამრავი ხალხი იესოს გამამხნევებელი სიტყვებისადმი, რომ იყვნენ ‘მძლეველები’?

¹⁵ რა ელით მათ, ვინც ერთგულად უჭერს მხარს 144 000 ცხებულ ქრისტიანს? მათი თანამსახური უამრავი ხალხიც „მძლეველია“, ოღონდ იმ განსხვავებით, რომ მათ დედამიწაზე სამოთხეში ცხოვრების იმედი აქვთ, სადაც ისინი ‘სიცოცხლის წყლის მდინარიდან’ დალევენ და მდინარისპირა ‘ხეების ფოთლებით’ განიკურნებიან (გამოცხადება 7:4, 9, 17; 22:1, 2). თუ მათ შორის ხართ, თქვენც გამოხატეთ იეჰოვასადმი მხურვალე სიყვარული, გაიმარჯვეთ რწმენის ბრძოლაში და მიაღწიეთ ბედნიერებას, რასაც დედამიწაზე სამოთხეში მარადიული სიცოცხლე მოგიტანთ! (შეადარეთ 1 იოანეს 2:13, 14)

[სქოლიოები]

თავი 8

ვისწრაფვით გამარჯვებისკენ

სმირნა

1. ა) ეფესოს კრების შემდეგ რომელ კრებას მიმართა იესომ? ბ) რა შეახსენა იესომ სმირნის კრებას, როცა საკუთარ თავს „პირველი და უკანასკნელი უწოდა“?

დღეს ძველი ეფესოს ნანგრევებიღაა შემორჩენილი. მაგრამ იქ, სადაც იესომ მეორე კრებას მიმართა, დღემდე ხალხმრავალი ქალაქია. ეფესოს ნანგრევებიდან ჩრდილოეთით, დაახლოებით 55 კილომეტრში, მდებარეობს თურქეთის ქალაქი იზმირი, სადაც დღეს იეჰოვას მოწმეთა ოთხი აქტიური კრებაა. ამ ადგილზე I საუკუნეში მდებარეობდა ქალაქი სმირნა. მოდი, ყურადღება მივაქციოთ იესოს შემდეგ სიტყვებს: «სმირნის კრების ანგელოზს მისწერე, აი რას ამბობს-თქო „პირველი და უკანასკნელი“, რომელიც მკვდარი იყო და გაცოცხლდა“ » (გამოცხადება 2:8). ამ სიტყვებით იესო შეახსენებს სმირნელ ქრისტიანებს, რომ უმწიკვლობის დამცველთაგან თვითონ იყო პირველი, ვინც იეჰოვამ უკვდავ სულიერ ქმნილებად აღადგინა, და უკანასკნელი, ვინც უშუალოდ იეჰოვამ აღადგინა; ყველა ცხებულ ქრისტიანს კი თავად იესო აღადგენს. ამიტომ მას აქვს სრული უფლება, დამოძღვროს თავისი ძმები, რომლებსაც იმედი აქვთ, რომ უკვდავებას მიიღებენ და იესოსთან ერთად იქნებიან ზეცაში.

2. როგორ ამხნევებს ყველა ქრისტიანს იესო, რომელიც „მკვდარი იყო და გაცოცხლდა“?

² იესომ გაუძლო სიმართლისთვის დევნას და დამსახურებული ჯილდოც მიიღო. ის სიკვდილამდე ერთგული იყო, სიკვდილის შემდეგ კი აღდგა, რაც ყველა ქრისტიანს იმედის საფუძველს აძლევს (საქმეები 17:31). ის ფაქტი, რომ იესო „მკვდარი იყო და გაცოცხლდა“, აჩვენებს, რომ ჭეშმარიტების გამო ნებისმიერი განსაცდელის ატანა ღირს. იესოს აღდგომა დიდი გამხნევებაა ყველა ქრისტიანისთვის, განსაკუთრებით მათთვის, ვინც რწმენის გამო იტანჯება. თუ თქვენც იმავეს განიცდით, სმირნის კრებისადმი მიწერილი სიტყვები თქვენც გაგამხნევებთ.

3. ა) როგორ გაამხნევა იესომ სმირნელი ქრისტიანები? ბ) რატომ უწოდა იესომ სმირნელ ქრისტიანებს მდიდრები, მიუხედავად იმისა, რომ ღარიბები იყვნენ?

³ „ვიცი შენი გასაჭირი და სიღარიბე, თუმცა მდიდარი ხარ. ვიცი მათი მკრეხელობაც, ვინც ამბობს: იუდეველები ვართო, მაგრამ იუდეველები კი არა, სატანის სინაგოგა არიან“ (გამოცხადება 2:9). იესო არ აკრიტიკებს თავის სმირნელ ძმებს, მხოლოდ გულთბილად აქებს. რწმენის გამო მათ ბევრ გასაჭირს გაუძლეს. როგორც ჩანს, თავიანთი ერთგულების გამო ისინი სიღარიბეში ცხოვრობდნენ (ებრაელები 10:34). სმირნელი ქრისტიანები უმთავრესად თავიანთ სულიერობაზე ზრუნავდნენ და იესოს რჩევის თანახმად განძს ზეცაში აგროვებდნენ (მათე 6:19, 20). ამიტომაც იყვნენ მდიდრები მთავარი მწყემსის თვალში (შეადარეთ იაკობის 2:5).

4. ვინ დევნიდა სასტიკად სმირნელ ქრისტიანებს და რა უწოდა იესომ მათ მდევნელებს?

⁴ იესო კარგად ხედავდა, რომ სმირნელი ქრისტიანები იუდეველებისგან დიდ წინააღმდეგობას ხვდებოდნენ. იუდეველების უმეტესობა გააფთრებით ებრძოდა ქრისტიანობის გავრცელებას (საქმეები 13:44, 45; 14:19). და, აი, ახლა, იერუსალიმის დაცემიდან რამდენიმე ათწლეულის გასვლის შემდეგ, სმირნელი იუდეველები მსგავს სატანურ სულს ავლენენ. ამიტომაც უწოდა იესომ მათ „სატანის სინაგოგა“a!

5. რა განსაცდელები შეხვდებოდათ სმირნელ ქრისტიანებს?

⁵ ასეთი სიძულვილით დევნილ ქრისტიანებს იესო ანუგეშებს: „ნურაფრის გეშინია, რის გამოც ­ტანჯვა მოგიწევს. ეშმაკი კვლავ საპყრობილეში ჩააგდებს ზოგიერთ თქვენგანს, რათა ბოლომდე გამოიცადოთ და გასაჭირი გქონდეთ ათ დღეს. სიკვდილამდე ერთგული დარჩი და მოგცემ სიცოცხლის გვირგვინს“ (გამოცხადება 2:10). იესო ამ მუხლში სამჯერ იყენებს მრავლობით ფორმას, რაც იმაზე მეტყველებს, რომ ის მთელ კრებას მიმართავს. იესოს არ უთქვამს, რომ სმირნელი ქრისტიანების განსაცდელები მალე დასრულდებოდა. ზოგიერთ მათგანს კვლავაც განდევნიდნენ და ჩაყრიდნენ საპყრობილეში. მათი განსაცდელები „ათ დღეს“ გასტანდა. რიცხვი ათი მიწიერი სრულყოფილების ან სისავსის სიმბოლოა. უმწიკვლობის დამცველ ამ სულიერად მდიდარ ქრისტიანებსაც კი სიკვდილამდე მოუწევდათ განსაცდელების ატანა.

6. ა) რატომ არ უნდა ეშინოდეთ სმირნელ ქრისტიანებს? ბ) რა სიტყვებით ამთავრებს იესო თავის მიმართვას სმირნის კრებისადმი?

⁶ მიუხედავად ამისა, სმირნელ ქრისტიანებს არ უნდა შეშინებოდათ და არც კომპრომისზე უნდა წასულიყვნენ. თუ ბოლომდე შეინარჩუნებდნენ ერთგულებას, მათ ჯილდოდ „სიცოცხლის გვირგვინი“ ანუ ზეცაში უკვდავი სიცოცხლე ელოდათ (1 კორინთელები 9:25; 2 ტიმოთე 4:6—8). ამ ჯილდოს მისაღებად პავლე მოციქული მზად იყო, ყველაფერი გაეღო, სიცოცხლეც კი (ფილიპელები 3:8). ერთგულ სმირნელ ქრისტიანებსაც უეჭველად მსგავსი თვალსაზრისი ექნებოდათ. იესო თავის სიტყვებს ასე ამთავრებს: „ვისაც ყური აქვს, მოისმინოს, რას ეუბნება სული კრებებს: მძლეველს ვერაფერს ავნებს მეორე სიკვდილი“ (გამოცხადება 2:11). ‘მძლეველებს’ ეჭვი არ ეპარებათ, რომ მათ უკვდავ ზეციერ სიცოცხლეს სიკვდილი ვერაფერს ავნებს (1 კორინთელები 15:53, 54).

„გასაჭირი ათ დღეს“

7, 8. სმირნის კრების მსგავსად როგორ „გამოიცადა ბოლომდე“ ქრისტიანული კრება 1918 წელს?

⁷ სმირნელი ქრისტიანების მსგავსად იოანეს კლასი და მათი თანამოაზრეები „ბოლომდე იცდებოდნენ“ და დღესაც იცდებიან. ისინი განსაცდელების დროს ერთგულები რჩებიან, რითაც ამტკიცებენ, რომ ღვთის ხალხი არიან (მარკოზი 13:9, 10). მალევე უფლის დღის დაწყებისთანავე იეჰოვას ხალხი — მცირერიცხოვანი საერთაშორისო საძმო — გაამხნევა იესოს სიტყვებმა, რომლებითაც მან სმირნელ ქრისტიანებს მიმართა (გამოცხადება 1:10). 1879 წლიდან მოყოლებული ისინი ღრმად იკვლევდნენ ღვთის სიტყვას, რათა ის სულიერი სიმდიდრე, რომელსაც იქიდან იხვეჭდნენ, სხვებისთვისაც უხვად გაეზიარებინათ. მაგრამ პირველი მსოფლიო ომის დროს ისინი ძლიერ სიძულვილსა და წინააღმდეგობას შეხვდნენ იმიტომ, რომ არ ჩაებნენ ომის ციებ-ცხელებაში, და უშიშრად ამხელდნენ ქრისტიანულ სამყაროს. ქრისტიანული სამყაროს წინამძღოლების წაქეზებით გამოწვეულმა დევნამ პიკს 1918 წელს მიაღწია, რაც იუდეველების მიერ სმირნელი ქრისტიანების დევნას მოგვაგონებს.

⁸ ამერიკის შეერთებულ შტატებში დევნის ტალღამ კულმინაციას მაშინ მიაღწია, როცა 1918 წლის 22 ივნისს საზოგადოება „საგუშაგო კოშკის“ ახალარჩეული პრეზიდენტი ჯოზეფ რუტერფორდი შვიდ თანამოაზრესთან ერთად ციხეში ჩასვეს და მათგან უმეტესობას ოცწლიანი პატიმრობა მიუსაჯეს. რამდენიმე თვის შემდეგ ისინი თავდებით გაათავისუფლეს. 1919 წლის 14 მაისს კი სააპელაციო სასამართლომ გააუქმა მათ წინააღმდეგ გამოტანილი არაერთი დაუსაბუთებელი განაჩენი; სასამართლო საქმის წარმოებისას 130 შეცდომა იყო დაშვებული. კათოლიკე მოსამართლე მანტონი, წმინდა გრიგოლ დიდის ორდენის კავალერი, რომელმაც 1918 წელს უარი განაცხადა ამ ქრისტიანების თავდებით გათავისუფლებაზე, მოგვიანებით, 1939 წელს, ორი წლით დააპატიმრეს და 10 000 აშშ დოლარით დააჯარიმეს, რადგან მექრთამეობისა და გამომძალველობის ექვს შემთხვევაში ედებოდა ბრალი.

9. როგორ ეპყრობოდა ნაცისტურ გერმანიაში ჰიტლერი იეჰოვას მოწმეებს და როგორ რეაგირებდა ამაზე სამღვდელოება?

⁹ გერმანიაში ნაცისტური რეჟიმის დროს ჰიტლერმა აკრძალა იეჰოვას მოწმეების სამქადაგებლო საქმიანობა. წლების განმავლობაში ათასობით იეჰოვას მოწმეს ყრიდნენ საკონცენტრაციო ბანაკებსა და ციხეებში, სადაც მრავალი მათგანი იღუპებოდა. ორასამდე ახალგაზრდა კი, რომლებმაც უარი თქვეს ჰიტლერის არმიაში მსახურებაზე, სიკვდილით დასაჯეს. ამას მხარს უჭერდა სამღვდელოება. ეს კარგად ჩანს ერთი კათოლიკე მღვდლის სიტყვებიდან, რომლებიც დაიბეჭდა 1938 წლის 29 მაისის გაზეთში „გერმანიის გზა“. მან თქვა: «მთელ დედამიწაზე ერთადერთ ქვეყანაში არიან აკრძალული ეგრეთ წოდებული. . . ბიბლიის მკვლევარები [იეჰოვას მოწმეები]. ეს გერმანიაა! . . როცა ადოლფ ჰიტლერი მოვიდა ხელისუფლებაში და გერმანელმა კათოლიკე ეპისკოპოსებმა მასაც მიმართეს თხოვნით, ჰიტლერმა განაცხადა: „ეს ეგრეთ წოდებული ბიბლიის გულმოდგინე მკვლევარები [იეჰოვას მოწმეები] მართლაც შფოთის ამტეხები არიან. . . მე მათ ნამდვილ თაღლითებად მივიჩნევ; მე ვერ ავიტან, რომ გერმანელ კათოლიკებს ასეთ შეურაცხყოფას აყენებდეს ვიღაც ამერიკელი მოსამართლე რუტერფორდი. მე გავწყვეტ [იეჰოვას მოწმეებს] გერმანიაში“ ». ამაზე მღვდელმა შესძახა: „ბრავო!“

10. ა) როგორ წინააღმდეგობას ხვდებოდნენ იეჰოვას მოწმეები უფლის დღის დაწყებიდან? ბ) ხშირად რა შედეგები მოჰქონდა იმას, რომ სასამართლოებში იცავდნენ ქრისტიანები რელიგიურ თავისუფლებას?

¹⁰ უფლის დღის დაწყებიდან მოყოლებული გველსა და მის შთამომავლობას არ შეუწყვეტიათ ბრძოლა ცხებული ქრისტიანებისა და მათი თანამოაზრეების წინააღმდეგ. ბევრ მათგანს აპატიმრებდნენ და სასტიკად დევნიდნენ (გამოცხადება 12:17). ეს მტრები დღემდე ‘ქმნიან სირთულეებს დადგენილებებით’, მაგრამ ამან ვერ გატეხა იეჰოვას ხალხი. მათი პოზიცია ასეთია: „ჩვენ ადამიანებზე მეტად ღმერთს უნდა დავემორჩილოთ, როგორც მმართველს“ (ფსალმუნი 94:20; საქმეები 5:29). 1954 წელს „საგუშაგო კოშკში“ აღნიშნული იყო: „ბოლო ორმოცი წლის განმავლობაში სამოცდაათზე მეტ ქვეყანაში ზღუდავდნენ იეჰოვას მოწმეების საქმიანობას და დევნიდნენ მათ“. სადაც შესაძლებელი იყო ქრისტიანები სასამართლოს ძალით იცავდნენ რელიგიურ თავისუფლებას და არაერთი ბრწყინვალე გამარჯვებაც მოიპოვეს. მარტო შეერთებული შტატების უზენაეს სასამართლოში იეჰოვას მოწმეებმა 50 საქმე მოიგეს.

11. უფლის დღის განმავლობაში იესოს რომელი წინასწარმეტყველება სრულდება იეჰოვას მოწმეებზე?

¹¹ სხვა არც ერთი ჯგუფი არ იცავდა იესოს მითითებას, მიეცათ კეისრისთვის კეისრისა, ისე კეთილსინდისიერად, როგორც იეჰოვას მოწმეები (ლუკა 20:25; რომაელები 13:1, 7). მაგრამ სხვა არც ერთი ჯგუფის წევრები არ დაუპატიმრებიათ იმდენ ქვეყანაში, რამდენშიც იეჰოვას მოწმეები, მიუხედავად იმისა, რა წყობილება იყო ქვეყანაში. დღემდე ასეთი მდგომარეობაა ჩრდილოეთ და სამხრეთ ამერიკაში, ევროპაში, აფრიკასა და აზიაში. იესოს დიდებულ წინასწარმეტყველებაში, რომელიც მისი მოსვლის ნიშანს ეხება, ასეთი სიტყვებიც არის ნათქვამი: „მაშინ გადაგცემენ სატანჯველად და დაგხოცავენ და შეგიძულებთ ყველა ხალხი ჩემი სახელის გამო“ (მათე 24:3, 9). ეს სიტყვები მთელი უფლის დღის განმავლობაში სრულდება იეჰოვას მოწმეებზე, ქრისტიანებზე.

12. როგორ აძლიერებდა იოანეს კლასი ღვთის ხალხს დევნის დროს?

¹² გასაჭირის დროს ღვთის ხალხის გასაძლიერებლად იოანეს კლასი გამუდმებით შეახსენებს მათ იესოს სიტყვებს, რომლებითაც მან სმირნელ ქრისტიანებს მიმართა. მაგალითად, ნაცისტური დევნის დროს 1933—1934 წლებში „საგუშაგო კოშკში“ დაიბეჭდა ასეთი სტატიები: „ნუ შეგეშინდებათ მათი“, რომელშიც განიხილებოდა მათეს 10:26—33; „ღუმელი“, რომელიც დაფუძნებული იყო დანიელის 3:17, 18-ზე; და „ლომების ხახა“, რომლის წამყვანი მუხლიც იყო დანიელის 6:22. 1980-იან წლებში, მაშინ, როდესაც ეს წიგნი გამოიცა და როდესაც იეჰოვას მოწმეები ორმოცზე მეტ ქვეყანაში სასტიკად იდევნებოდნენ, „საგუშაგო კოშკი“ ხალხს ასეთი სტატიებით ამხნევებდა: „დევნის მიუხედავად ბედნიერები!“ და „ქრისტიანები მოთმინებით იტანენ დევნას“b.

13. სმირნელი ქრისტიანების მსგავსად იეჰოვას მოწმეებს, ქრისტიანებს, რატომ არ უნდა ეშინოდეთ დევნების?

¹³ იეჰოვას მოწმეები, ქრისტიანები, მართლაც ხვდებიან დევნასა და სხვა განსაცდელებს სიმბოლური ათი დღის განმავლობაში. სმირნელი ქრისტიანების მსგავსად ისინიც უშიშარნი არიან. ჩვენ არ უნდა გვეშინოდეს, მიუხედავად იმისა, რომ დედამიწაზე მდგომარეობა უფრო და უფრო რთულდება. მზად ვართ, გავუძლოთ განსაცდელებს და ჩვენი „ქონების დატაცებასაც“ კი სიხარულით შევხვდეთ (ებრაელები 10:32—34). ღვთის სიტყვის შესწავლითა და გათავისებით მზად ვიქნებით მტკიცე რწმენის შესანარჩუნებლად. დარწმუნებული იყავით, რომ იეჰოვას შეუძლია თქვენი დაცვა და დაგიცავთ კიდეც, რომ უმწიკვლო დარჩეთ. „ყველა თქვენი საწუხარი მას მიანდეთ, რადგან ის ზრუნავს თქვენზე“ (1 პეტრე 5:6—11).

[სქოლიოები]

თავი 9

ჩაეჭიდეთ იესოს სახელს!

პერგამონი

1. ამჟამად რომელ კრებას მიმართავს იესო და როგორ ქალაქში ცხოვრობდნენ მაშინ ქრისტიანები?

თუ სმირნიდან ჩრდილოეთით სანაპირო გზით 80 კილომეტრს გავივლით, მერე კი ზღვის სანაპიროდან გადავუხვევთ და მდინარე კაიკუსის ველზე 25 კილომეტრს ვივლით, მივალთ ქალაქ ბერგამაში, რომელსაც წინათ პერგამონი ერქვა. ქალაქი ცნობილი იყო ზევსის, იგივე იუპიტერის, ტაძრით. XIX საუკუნის დასაწყისში არქეოლოგებმა ზევსის ტაძრის საკურთხეველი გერმანიაში, კერძოდ ბერლინში, პერგამონ-მუზეუმში გადაიტანეს, სადაც მისი ნახვა დღესაც შესაძლებელია წარმართული ღვთაებების სხვა მრავალ ქანდაკებასა და რელიეფურ გამოსახულებას შორის. რას ეტყოდა იესო ასეთი კერპთაყვანისმცემლობით გარემოცულ კრებას?

2. როგორ წარმოადგენს იესო საკუთარ თავს და რას ნიშნავს ის, რომ მას „ორლესული მახვილი“ აქვს?

² თავიდან იესო აცნობს მათ თავის ვინაობას: „პერგამონის კრების ანგელოზს მისწერე, აი რას ამბობს-თქო ის, ვისაც ბასრი, დიდი ორლესული მახვილი აქვს“ (გამოცხადება 2:12). აქ იესო საკუთარ თავს აღწერს გამოცხადების 1:16-ში აღწერილის მსგავსად. როგორც მოსამართლე და დამსჯელი, ის მოსპობს თავისი მოწაფეების მდევნელებს. ეს მართლაც მანუგეშებელია. თუმცა, კრების წევრებმაც უნდა გაითვალისწინონ, რომ იეჰოვა თავისი „შეთანხმების მაცნის“, იესო ქრისტეს მეშვეობით, როგორც თავად ამბობს, ‘იჩქარებს, რომ დაამოწმოს’ ყველას წინააღმდეგ, ვინც თავს ქრისტიანად აცხადებს, მაგრამ კერპებს სცემს თაყვანს, უზნეობას ეწევა, ცრუობს, უპატიოსნოდ იქცევა და არ ზრუნავს გაჭირვებულებზე (მალაქია 3:1, 5; ებრაელები 13:1—3). ყველამ ყურად უნდა ვიღოთ ის რჩევა და შეგონება, რომელსაც ღმერთი იესოს მეშვეობით გვაძლევს!

3. რა ცრუ თაყვანისმცემლობა იყო გავრცელებული პერგამონში და რატომ შეიძლება ითქვას, რომ იქ „სატანის ტახტი“ იდგა?

³ ახლა უკვე იესო კრებას მიმართავს: „ვიცი, სადაც ცხოვრობ, იქ, სადაც სატანის ტახტია“ (გამოცხადება 2:13ა). ეს ქრისტიანები მართლაც ისეთ გარემოში ცხოვრობდნენ, სადაც სატანის კულტი ფართოდ იყო გავრცელებული. ზევსის ტაძრის გარდა იქ ასკლეპიოსის (მკურნალობის ღვთაება) საწმინდარიც იყო. პერგამონი ის ცენტრი იყო, სადაც იმპერატორს სცემდნენ თაყვანს. სატანად ნათარგმნი ებრაული სიტყვა ნიშნავს მოწინააღმდეგეს, ხოლო მისი ტახტი განასახიერებს მთელ მსოფლიოზე მის ბატონობას, რაც ღმერთმა დროებით დაუშვა (იობი 1:6, სქოლიო). პერგამონში კერპთაყვანისმცემლობის ფართოდ გავრცელება იმაზე მეტყველებდა, რომ ამ ქალაქში სატანის „ტახტი“ მტკიცედ იდგა. რამდენად გააფთრდებოდა სატანა, როცა დაინახავდა, რომ ქრისტიანები არ ეთაყვანებოდნენ მას და მონაწილეობას არ იღებდნენ ცრუ თაყვანისმცემლობაში!

4. ა) როგორ აქებდა იესო პერგამონელ ქრისტიანებს? ბ) რა მისწერა რომაელმა ლეგატმა პლინიუსმა იმპერატორ ტრაიანეს იმაზე, თუ როგორ ექცეოდა ქრისტიანებს? გ) საფრთხის მიუხედავად რას აკეთებდნენ პერგამონელი ქრისტიანები?

⁴ შეიძლება ითქვას, რომ „სატანის ტახტი“ მართლაც შიგ პერგამონში იდგა. „და მაინც — განაგრძობს იესო, — ეჭიდები ჩემს სახელს და არ უარყავი ჩემდამი რწმენა ჩემი ერთგული მოწმე ანტიპას დროსაც კი, რომელიც მოკლეს თქვენთან, იქ, სადაც სატანა მკვიდრობს“ (გამოცხადება 2:13ბ). ასეთმა გულითადმა შექებამ შეუძლებელია, გულგრილი დატოვოს ადამიანი! ანტიპა წამებით უეჭველად იმიტომ მოკლეს, რომ უარი თქვა დემონურ წეს-ჩვეულებებში მონაწილეობასა და რომის იმპერატორის თაყვანისცემაზე. მას შემდეგ, რაც იოანემ მოისმინა ეს წინასწარმეტყველური სიტყვები, მალევე, რომის იმპერატორ ტრაიანეს ლეგატმა, პლინიუს უმცროსმა, მისწერა ტრაიანეს, თუ როგორ ეპყრობოდა მათ, ვისაც ქრისტიანობას ბრალად უთვლიდნენ. იმპერატორი იწონებდა მის მოქმედებას. მათ, ვინც ქრისტიანობაზე უარს იტყოდა, მხოლოდ იმ შემთხვევაში ათავისუფლებდნენ, თუ, როგორც თავად პლინიუსი ამბობს, მისი „თანდასწრებით უხმობდნენ ღმერთებს, უკმევდნენ საკმეველს და ღვინოს უღვრიდნენ. . . [ტრაიანეს] გამოსახულებას. . . და, ამასთან ერთად, ლანძღავდნენ ქრისტეს“. როცა ვინმეს ქრისტიანობას იგებდნენ, სიკვდილით სჯიდნენ. ასეთი საფრთხის მიუხედავადაც კი პერგამონელი ქრისტიანები არ უარყოფდნენ თავიანთ რწმენას. ისინი ‘ეჭიდებოდნენ იესოს სახელს’ და კვლავაც პატივს მიაგებდნენ მის, როგორც იეჰოვას დამცველისა და დანიშნული მოსამართლის, მაღალ მდგომარეობას. ისინი ერთგულად მიჰყვებოდნენ იესოს ნაკვალევს და სამეფოს შესახებ ქადაგებდნენ.

5. ა) დღეს რამ შეცვალა იმპერატორის კულტი და რა სერიოზული გამოცდის წინაშე დგანან ქრისტიანები? ბ) როგორ ეხმარებოდა „საგუშაგო კოშკი“ ქრისტიანებს?

⁵ იესოს არაერთხელ აღუნიშნავს, რომ სატანა მართავს ამ ბოროტ ქვეყნიერებას, თუმცა სატანამ ვერ დაიმორჩილა იესო, რადგან იესომ უმწიკვლობა შეინარჩუნა (მათე 4:8—11; იოანე 14:30). ჩვენს დროში ძლიერი ერები, განსაკუთრებით კი „ჩრდილოეთის მეფე“ და „სამხრეთის მეფე“ მსოფლიო ბატონობის მოსაპოვებლად იბრძვიან (დანიელი 11:40). პატრიოტულმა სულისკვეთებამ გააღვივა ნაციონალიზმის სული, რომელმაც მთელი დედამიწა მოიცვა. ძველად თუ იმპერატორის კულტი იყო, დღეს ნაციონალიზმია. „საგუშაგო კოშკში“ 1939 წლის 1 ნოემბრის, 1979 წლის 1 ნოემბრისა და 1986 წლის 1 სექტემბრის ნომრებში საფუძვლიანად განიხილებოდა ნეიტრალიტეტის თემაზე ბიბლიური თვალსაზრისი და ის პრინციპები, რომლებითაც ქრისტიანებს უნდა ეხელმძღვანელათ, რათა ევლოთ იეჰოვას სახელით და იესოს მსგავსად მამაცურად დაეძლიათ ქვეყნიერება (მიქა 4:1, 3, 5; იოანე 16:33; 17:4, 6, 26; 18:36, 37; საქმეები 5:29).

6. ანტიპას მსგავსად როგორ ინარჩუნებენ დღეს სიმტკიცეს იეჰოვას მოწმეები?

⁶ ასეთი რჩევები მართლაც რომ დროული იყო. არაგონივრული პატრიოტული სულისკვეთების პირისპირ მდგომ იეჰოვას მოწმეებს, როგორც სულითცხებულებს, ისე მათ თანამსახურებს, მტკიცე რწმენა უნდა გამოევლინათ. მაგალითად, შეერთებულ შტატებში ასობით სკოლის მოსწავლე და მასწავლებელი დაითხოვეს სკოლებიდან იმის გამო, რომ სალამს არ აძლევდნენ ეროვნულ დროშას. მოწმეებს სასტიკად დევნიდნენ გერმანიაშიც, რადგან ისინი სვასტიკას პატივს არ მიაგებდნენ. როგორც უკვე აღვნიშნეთ, ჰიტლერის მომხრე ნაცისტებმა იეჰოვას ათასობით ერთგული მსახური მოკლეს იმის გამო, რომ ისინი არ მონაწილეობდნენ ნაციონალისტურ კერპთაყვანისმცემლობაში. XX საუკუნის 30-იან წლებში, როდესაც იაპონიაში იმპერატორის გამაღმერთებელი სინტოიზმი ყვაოდა, ორმა პიონერმა უხვად დათესა სამეფოს თესლი იაპონიის მიერ ოკუპირებულ ტაივანში. ხელისუფლების სათავეში მოსულმა სამხედრო პირებმა ისინი ციხეში ჩაყარეს, სადაც ერთი მათგანი არაადამიანური მოპყრობის გამო მოკვდა; მეორე მოგვიანებით კი გაათავისუფლეს, მაგრამ ზურგში ესროლეს. ეს ქრისტიანები მართლაც რომ ანტიპას მოგვაგონებენ! დღესაც არსებობს ქვეყნები, სადაც ქვეშევრდომებისგან ეროვნული სიმბოლოების თაყვანისცემა და სახელმწიფოსადმი განსაკუთრებული ერთგულება მოითხოვება. ბევრი ახალგაზრდა მოწმე დაუპატიმრებიათ და მრავალი მათგანი მოუკლავთ კიდეც, რადგან ისინი გაბედულად იცავდნენ ქრისტიანულ ნეიტრალიტეტს. ახალგაზრდებმა, რომლებიც მსგავსი სირთულეების პირისპირ დგანან, ყოველდღე უნდა შეისწავლონ ღვთის სიტყვა, რათა რწმენა ჰქონდეთ „სულის ცოცხლად შესანარჩუნებლად“ მარადიული სიცოცხლის იმედით (ებრაელები 10:39—11:1; მათე 10:28—31).

7. რა სირთულის წინაშე აღმოჩნდნენ ინდოეთში ბავშვები და როგორ დასრულდა ეს შემთხვევა?

⁷ ბავშვებიც ხვდებიან მსგავს პრობლემებს სკოლაში. მაგალითად, 1985 წელს ინდოეთის შტატ კერალაში იეჰოვას მოწმეთა სამმა ბავშვმა არ დათმო ბიბლიაზე დაფუძნებული რწმენა და უარი თქვა ეროვნული ჰიმნის შესრულებაზე. მიუხედავად იმისა, რომ მათ პატივისცემა გამოხატეს და ფეხზე იდგნენ, როდესაც სხვები მღეროდნენ, ისინი მაინც გარიცხეს სკოლიდან. მათმა მამამ საჩივრით პირდაპირ ინდოეთის უზენაეს სასამართლოს მიმართა, რომლის ორმა მოსამართლემაც გადაწყვეტილება ბავშვების სასარგებლოდ მიიღო. მათ გაბედულად განაცხადეს: „ჩვენი ტრადიცია შემწყნარებლობას ასწავლის; ჩვენი ფილოსოფიაც შემწყნარებლობას ასწავლის და ჩვენი კონსტიტუციაც შემწყნარებლობას უჭერს მხარს. მოდი, ამის წინააღმდეგ ნუ წავალთ“. ამ პროცესს დადებითად აშუქებდა პრესა და მასობრივი ინფორმაციის სხვა საშუალებები, რისი წყალობითაც მთელმა ქვეყანამ, სადაც მაშინ დედამიწის მოსახლეობის მეხუთედი ცხოვრობდა, შეიტყო, რომ მათ ქვეყანაში არიან ქრისტიანები, რომლებიც ეთაყვანებიან ჭეშმარიტ ღმერთ იეჰოვას და ერთგულად იცავენ ბიბლიურ პრინციპებს.

გამხრწნელი ზეგავლენა

8. რაში სდებდა ბრალს იესო პერგამონელ ქრისტიანებს?

⁸ პერგამონელი ქრისტიანები მართლაც რომ უმწიკვლობის დამცველები არიან. „მაგრამ — ამბობს იესო, — მაქვს ზოგი რამ შენ წინააღმდეგ“. რატომ კიცხავს ის მათ? იესო ამბობს: „შენთან ზოგიერთი ბალაამის სწავლებას ეჭიდება, რომელიც ასწავლიდა ბალაკს, დაებრკოლებინა ისრაელის ძეები, ეჭამათ კერპთშენაწირი და ემეძავათ“ (გამოცხადება 2:14).

9. ვინ იყო ბალაამი და როგორ ‘დააბრკოლა ისრაელის ძეები’ მისმა რჩევამ?

⁹ მოსეს დროს მოაბის მეფე ბალაკმა ისრაელის დასაწყევლად მოისყიდა არაისრაელი წინასწარმეტყველი ბალაამი, რომელსაც ზოგადი წარმოდგენა ჰქონდა იეჰოვას გზებზე. იეჰოვა წინ აღუდგა ბალაამს და აიძულა, ეკურთხებინა ისრაელი და დაეწყევლა მათი მტრები. მიუხედავად ამისა, გაბრაზებულ ბალაკს დასამშვიდებლად ბალაამმა უფრო მზაკვრული ხერხი შესთავაზა — მოაბელ ქალებს ისრაელი მამაკაცები სექსუალურ აღვირახსნილობასა და ცრუ ღმერთის, ფეორის ბაალის თაყვანისმცემლობაში უნდა ჩაეთრიათ! ხერხმა გაჭრა. იეჰოვა სამართლიანი რისხვით აენთო და 24 000 ზნედაცემული ისრაელი მოკლა. ხალხის განადგურება მხოლოდ მაშინ შეწყდა, როცა მღვდელმა ფინხასმა უკიდურესი ზომები მიიღო ისრაელიდან ბოროტების აღმოსაფხვრელად (რიცხვები 24:10, 11; 25:1—3, 6—9; 31:16).

10. რა დაბრკოლება გაჩნდა პერგამონის კრებაში და რატომ შეიძლებოდა ეფიქრათ იმდროინდელ ქრისტიანებს, რომ ღმერთი თვალს დახუჭავდა მათ უზნეობაზე?

¹⁰ საინტერესოა, იოანეს დროსაც არსებობდა მსგავსი დაბრკოლება პერგამონში? ასეთი რამ მართლაც არსებობდა. უზნეობამ და კერპთაყვანისმცემლობამ პერგამონის კრებაშიც შეაღწია. იმდროინდელი ქრისტიანები უგულებელყოფდნენ ღვთის გაფრთხილებას, რომელიც მათ პავლე მოციქულისგან მოისმინეს (1 კორინთელები 10:6—11). ისინი შეიძლება ფიქრობდნენ, რომ, რადგან დევნას უძლებდნენ, იეჰოვა თვალს დახუჭავდა მათ უზნეობაზე. იესომ არაორაზროვნად მიუთითა, რომ მათ ასეთი ბოროტება არ უნდა ჩაედინათ.

11. ა) რისგან უნდა დაიცვან ქრისტიანებმა თავი და რა არ უნდა იფიქრონ? ბ) წლების განმავლობაში რამდენი მოწმე ირიცხება ქრისტიანული კრებიდან და ძირითადად რა მიზეზით?

¹¹ ქრისტიანები დღესაც ფრთხილად უნდა იყვნენ, „ღვთის წყალობა თავაშვებულობის გასამართლებლად“ რომ არ გამოიყენონ (იუდა 4). ჩვენ უნდა შევიძულოთ ბოროტება და ‘ვცემოთ ჩვენს სხეულს’, რათა ქრისტიანული ზნეობა შევინარჩუნოთ (1 კორინთელები 9:27; ფსალმუნი 97:10; რომაელები 8:6). არ უნდა ვიფიქროთ, რომ ღვთის მსახურებაში გულმოდგინება და დევნის დროს უმწიკვლობის შენარჩუნება უზნეობას გაამართლებს. საერთაშორისო ქრისტიანული კრებიდან შემცოდველები ძირითადად სექსუალური უზნეობის გამო ირიცხებიან. მათი რიცხვი ათობით ათასს ითვლის. იყო წლები, როდესაც უფრო მეტი ირიცხებოდა, ვიდრე ძველ ისრაელში ფეორის ბაალისადმი თაყვანისცემის გამო დაიხოცა. მოდი, ყოველთვის ფხიზლად ვიყოთ, რომ არასოდეს აღმოვჩნდეთ უზნეოთა რიგებში! (რომაელები 11:20; 1 კორინთელები 10:12).

12. რა პრინციპებით უნდა იხელმძღვანელონ ქრისტიანებმა დღეს ძველად მცხოვრები ღვთის მსახურების მსგავსად?

¹² იესო პერგამონელ ქრისტიანებს კერპთშენაწირის ჭამის გამოც კიცხავს. რა ჰქონდა მას მხედველობაში? თუ გავითვალისწინებთ პავლეს სიტყვებს, რომელიც მან კორინთელებს მისწერა, შესაძლოა, ზოგი ბოროტად იყენებდა ქრისტიანულ თავისუფლებას და შეგნებულად შეურაცხყოფდა სხვების სინდისს. მაგრამ ის უფრო დასაშვებია, რომ ისინი ამა თუ იმ სახით კერპთაყვანისმცემლობის რიტუალებშიც მონაწილეობდნენ (1 კორინთელები 8:4—13; 10:25—30). ერთგულმა ქრისტიანებმა უანგარო სიყვარულით უნდა გამოიყენონ ქრისტიანული თავისუფლება და ფრთხილად უნდა იყვნენ, რომ სხვები არ დააბრკოლონ. ისინი უნდა მოერიდონ კერპთაყვანისმცემლობის თანამედროვე ფორმებს, მაგალითად, ეკრანისა და სპორტის ვარსკვლავების გაღმერთებას და ფულის ან საკუთარი მუცლის გაკერპებას (მათე 6:24; ფილიპელები 1:9, 10; 3:17—19).

მოერიდეთ სექტანტობას!

13. კიდევ რა შენიშვნა მისცა იესომ პერგამონელ ქრისტიანებს და რატომ?

¹³ იესო კიდევ ერთ შენიშვნას აძლევს პერგამონელ ქრისტიანებს: „შენ ისეთებიც გყავს, ნიკოლაელთა სექტის სწავლებებს რომ ეჭიდებიან“ (გამოცხადება 2:15). ადრე იესომ ეფესოელი ქრისტიანები იმისთვის შეაქო, რომ სძულდათ ამ სექტის საქმიანობა. ქრისტიანული პრინციპების დასაცავად დიდი სიმტკიცე მოითხოვება, რომ არ დაირღვეს ის ერთიანობა, რაზეც იესო იოანეს 17:20—23-ში ლოცულობდა. აუცილებელია შევძლოთ, „როგორც ჯანსაღი სწავლებით დარიგება, ასევე მოწინააღმდეგეების შეგონება“ (ტიტე 1:9).

14. ა) ვისგან უნდა დაეცვა თავი ქრისტიანულ კრებას თავისი არსებობის პირველივე დღიდან და როგორ ახასიათებდა განდგომილებს პავლე მოციქული? ბ) იესოს რომელი სიტყვები უნდა იღოს ყურად მან, ვისაც ცდუნება აქვს, განდგომილებს აჰყვეს?

¹⁴ ქრისტიანულ კრებას თავისი არსებობის პირველივე დღიდან უნდა დაეცვა თავი ამაყი განდგომილებისგან, რომლებიც პირფერობითა და მზაკვრული ლაპარაკით ‘უთანხმოებებს იწვევდნენ და აბრკოლებდნენ სხვებს, რითაც ეწინააღმდეგებოდნენ იმას’, რაც ნასწავლი ჰქონდათ ქრისტიანებს იეჰოვას „არხით“ (რომაელები 16:17, 18). მოციქული პავლე თითქმის ყველა თავის წერილში აფრთხილებდა ქრისტიანებს ამ საშიშროების შესახებa. მიუხედავად იმისა, რომ იესომ ჩვენს დროში ჭეშმარიტ კრებას ქრისტიანული სიწმინდე და ერთიანობა დაუბრუნა, სექტანტობის საშიშროება მაინც არსებობს. ამიტომ ყველამ, ვისაც იმის ცდუნება აქვს, რომ განდგომილთა ჯგუფს აჰყვეს და ხელი შეუწყოს სექტის ჩამოყალიბებას, ყურად უნდა იღოს იესოს შემდეგი სიტყვები: „მაშ, მოინანიე, თუ არადა, მალე მოვალ შენთან და შევებრძოლები მათ ჩემი პირის დიდი მახვილით“ (გამოცხადება 2:16).

15. როგორ იწყება სექტანტობა?

¹⁵ როგორ იწყება სექტანტობა? შეიძლება თვითმარქვია მასწავლებელმა ეჭვქვეშ დააყენოს რომელიმე ბიბლიურ ჭეშმარიტება (მაგალითად, ვცხოვრობთ თუ არა უკანასკნელ დღეებში), მისი თანამოაზრეთა ჯგუფი დანარჩენებს გამოეყოს და მას დაუჭიროს მხარი (2 ტიმოთე 3:1; 2 პეტრე 3:3, 4). შესაძლოა ვინმემ გააკრიტიკოს ის, თუ როგორ სრულდება იეჰოვას საქმე, მოუწოდოს სხვებს, თავს გაუფრთხილდნენ, და ამტკიცოს, რომ სამეფოს შესახებ კარდაკარ ქადაგებას არც ბიბლიური საფუძველი აქვს და არც აუცილებელია. თუ ისინი იესოსა და მოციქულებს მიჰბაძავენ და იქადაგებენ, არ გაამაყდებიან, მაგრამ მათ ურჩევნიათ განცალკევებულნი იყვნენ, თავი არ შეიწუხონ და დროდადრო მხოლოდ ბიბლიის ერთად კითხვით დაკმაყოფილდნენ (მათე 10:7, 11—13; საქმეები 5:42; 20:20, 21). ისინი თავიანთ იდეებს ავრცელებენ იესოს სიკვდილის გახსენების, სისხლისგან თავშეკავების ბიბლიური საფუძვლების, დღესასწაულების აღნიშვნისა და თამბაქოს გამოყენების შესახებ, დიდებას უკარგავენ იეჰოვას სახელს და ამიტომ მალევე უბრუნდებიან „დიდ ბაბილონს“, რომელიც ყველაფრის ნებას რთავს. უფრო მეტიც, სატანის წაქეზებით ზოგი მათგანი იწყებს „თავისნაირივე მონების ცემას“, რომლებიც ერთ დროს მათი ძმები იყვნენ (მათე 24:49; საქმეები 15:29; გამოცხადება 17:5).

16. ა) რატომ უნდა მოინანიოს სასწრაფოდ მან, ვინც განდგომილთა ზეგავლენის ქვეშ ექცევა? ბ) რა ელით მათ, ვისაც არ სურს მონანიება?

¹⁶ ვინც განდგომილთა ზეგავლენის ქვეშ ექცევა, სასწრაფოდ უნდა იმოქმედოს იესოს მოწოდების თანახმად და მოინანიოს! განდგომილთა პროპაგანდა საწამლავია, არ უნდა გავეკაროთ მას! ნამდვილი და წმინდა ჭეშმარიტებისგან განსხვავებით, რომელსაც იესო ასწავლის თავის კრებას, განდგომილთა პროპაგანდა შურსა და სიძულვილს ეფუძნება (ლუკა 12:42; ფილიპელები 1:15, 16; 4:8, 9). მათ, ვისაც არ სურს მონანიება, უფალი იესო შეებრძოლება თავისი „პირის დიდი მახვილით“. ის თითქოს საცერში ცრის თავის ხალხს მათი ერთიანობის შესანარჩუნებლად, რაზეც ის თავის მოწაფეებთან გატარებულ უკანასკნელ საღამოს ლოცულობდა (იოანე 17:20—23, 26). ვინაიდან განდგომილები უარს ამბობენ დახმარებაზე და არ ითვალისწინებენ რჩევებს, რომელსაც სიყვარულით სთავაზობენ იესოს მარჯვენა ხელში მყოფი „ვარსკვლავები“, ის ასამართლებს და ‘სასტიკად სჯის’ მათ და „გარეთ, სიბნელეში“ ყრის. ისინი ირიცხებიან, რომ საფუარივით აღარ იმოქმედონ ღვთის ხალხს შორის (მათე 24:48—51; 25:30; 1 კორინთელები 5:6, 9, 13; გამოცხადება 1:16).

„დაფარული მანანა და პატარა თეთრი ქვა“

17. რა კურთხევები მოელით „მძლეველ“ ცხებულებს და რას უნდა მოერიდონ პერგამონელი ქრისტიანები?

¹⁷ ყველას, ვინც ყურად იღებს იესოს რჩევას, იეჰოვას წმინდა სულის ხელმძღვანელობით გადმოცემულს, დიდი ჯილდო ელის. „ვისაც ყური აქვს, მოისმინოს, რას ეუბნება სული კრებებს: მძლეველს მივცემ დაფარულ მანანას და პატარა თეთრ ქვას ზედ დაწერილი ახალი სახელით, რომელიც არავინ იცის მიმღების გარდა“ (გამოცხადება 2:17). ამგვარად, სმირნელი ქრისტიანების მსგავსად პერგამონელ ქრისტიანებსაც მოუწოდებს იესო, რომ ‘მძლეველები’ იყვნენ. თუ მათ გამარჯვება უნდათ, პერგამონში (სადაც სატანის ტახტია) მცხოვრები ქრისტიანები უნდა მოერიდონ კერპთაყვანისმცემლობას, უზნეობას, სექტანტობასა და განდგომილებას და არ უნდა დაემსგავსონ ბალაკს, ბალაამსა და ნიკოლაელთა სექტის წევრებს. თუ ასე მოიქცევიან, ცხებული ქრისტიანები მიწვეულნი იქნებიან, რომ იგემონ „დაფარული მანანა“. რა იგულისხმება ამაში?

18, 19. ა) რას უგზავნიდა იეჰოვა ისრაელებს? ბ) რომელი მანანა ‘იყო დაფარული’? გ) რას ნიშნავს „დაფარული მანანის“ ჭამა?

¹⁸ მოსეს დროს უდაბნოში ხეტიალისას იეჰოვა მანანით კვებავდა ისრაელებს. ის მანანა არ ყოფილა დაფარული. ყოველ დილით, შაბათის გარდა, მანანა თრთვილივით ეფინებოდა მიწას სასწაულებრივად. ეს ღვთისგან მოვლენილი საკვები ისრაელებს სიცოცხლეს უნარჩუნებდა. იეჰოვამ მოსეს უბრძანა, რომ „თაობიდან თაობაში“ გადასაცემად ეს „პური“ სამახსოვროდ შეენახა ოქროს დოქში, რომელიც შეთანხმების წმინდა კიდობანში იდო (გამოსვლა 16:14, 15, 23, 26, 33; ებრაელები 9:3, 4).

¹⁹ მართლაც შესანიშნავი სიმბოლოა! მანანა ‘დაფარული იყო’ კარვის წმინდათაწმინდაში, სადაც კიდობნის სახურავს სასწაულებრივი სინათლე ეფინებოდა, რაც იეჰოვას იქ ყოფნაზე მიუთითებდა (გამოსვლა 26:34). არავის შეეძლო იმ წმინდა ადგილას შესვლა „დაფარული მანანის“ საჭმელად. მაგრამ როგორც იესომ თქვა, „მძლეველი“ ცხებულები, მისი მიმდევრები შეჭამდნენ „დაფარულ მანანას“. ქრისტეს მსგავსად ისინიც შევიდოდნენ „არა ხელთქმნილ წმინდა ადგილას, რომელიც ჭეშმარიტის ანარეკლია, არამედ თვით ზეცაში“ (ებრაელები 9:12, 24). აღდგომისას ისინი იეჰოვასგან სასწაულებრივ ძღვენს მიიღებენ და უხრწნელობითა და უკვდავებით შეიმოსებიან. სწორედ ამის სიმბოლური სახეა ის, რომ მათ უხრწნელი „დაფარული მანანა“ ეძლევათ. მართლაც დიდი პატივი ხვდა წილად ‘მძლეველთა’ ამ მცირე ჯგუფს! (1 კორინთელები 15:53—57).

20, 21. ა) რას ნიშნავს ცხებული ქრისტიანებისთვის პატარა თეთრი ქვების მიცემა? ბ) რაკი პატარა თეთრი ქვები მხოლოდ 144 000-ია, რა იმედი აქვს უამრავ ხალხს?

²⁰ ცხებულები „პატარა თეთრ ქვასაც“ იღებენ. რომის სასამართლოებში პატარა ქვები სასამართლოს განაჩენის გამოტანის დროს გამოიყენებოდაb. თეთრი ქვა გამართლებას ნიშნავდა, შავი კი — დასჯას, ხშირად სიკვდილს. იესო რომ პერგამონელ ქრისტიანებს „თეთრ ქვას“ აძლევს, ეს იმას ნიშნავს, რომ ის მათ უდანაშაულოებად, წმინდებად და სპეტაკებად აღიარებს. იესოს სიტყვებს შეიძლება სხვა მნიშვნელობაც ჰქონდეს; რომის იმპერიაში პატარა ქვებს მნიშვნელოვან ღონისძიებებზე დასასწრებად ბილეთის დანიშნულებითაც იყენებდნენ. ამიტომ პატარა თეთრ ქვებს ცხებული „მძლეველი“ ქრისტიანებისთვის განსაკუთრებული მნიშვნელობა უნდა ჰქონდეს — ზეცაში კრავის ქორწილში ისინი საპატიო ადგილს დაიკავებენ. ასეთი პატარა ქვა მხოლოდ 144 000-ია (გამოცხადება 14:1; 19:7—9).

²¹ ნიშნავს ეს იმას, რომ უამრავი ხალხი, რომელიც ცხებულების მხარდამხარ მსახურობს, უყურადღებოდ არის მიტოვებული? არავითარ შემთხვევაში! მართალია, ისინი არ იღებენ პატარა თეთრ ქვებს, რომლებიც ზეცაში ცხოვრების უფლებას იძლევა, მაგრამ თუ ერთგულები დარჩებიან, დიდ გასაჭირს გადაიტანენ და დედამიწის სამოთხედ გადაქცევით გაიხარებენ. დროთა განმავლობაში მკვდრებიც აღდგებიან და მათ ქრისტემდე მცხოვრები ღვთის ერთგული მსახურებიც და ჩვენს დროს დაღუპული „სხვა ცხვრებიც“ შეუერთდებიან. საბოლოოდ ყველა გამოსყიდული მიცვალებული ჯილდოდ მიიღებს აღდგომას და იცხოვრებს სამოთხედ ქცეულ დედამიწაზე (ფსალმუნი 45:16; იოანე 10:16; გამოცხადება 7:9, 14).

22, 23. რას ნიშნავს იმ პატარა ქვაზე დაწერილი სახელი, რომელიც ცხებულ ქრისტიანებს ეძლევათ, და რისკენ აღძრავს ეს მათ?

²² რა ახალი სახელი აწერია პატარა ქვას? სახელი ადამიანის ვინაობას გვაცნობს და მას სხვებისგან განასხვავებს. ეს ცხებული ქრისტიანები პატარა ქვებს მას შემდეგ იღებენ, რაც მიწიერ სიცოცხლეს ასრულებენ როგორც ‘მძლეველები’. გამოდის, რომ ქვაზე დაწერილი სახელი იმ დიდ პატივს უნდა უკავშირდებოდეს, რომელსაც ისინი ზეცაში იესოსთან ერთად ყოფნით მიიღებენ. ისინი იესოს გვერდით იქნებიან და მასთან ერთად იმეფებენ. ამ ჯილდოს კი სრულად მხოლოდ ისინი იგემებენ და დააფასებენ, ვინც ზეციერ სამეფოს დაიმკვიდრებს. ამიტომაც ნათქვამია, რომ ეს სახელი, ანუ საპატიო მდგომარეობა, „არავინ იცის მიმღების გარდა“ (შეადარეთ გამოცხადების 3:12).

²³ იოანეს კლასს მართლაც დიდი სტიმული აქვს, „მოისმინოს, რას ეუბნება სული კრებებს“ და მიჰყვეს მის ხელმძღვანელობას! მათი თანამოაზრე უამრავი ხალხიც აღძრულია, იმსახუროს ცხებულებთან ერთად, სანამ ისინი დედამიწაზე არიან და მათთან ერთად აუწყოს იეჰოვას სამეფოს შესახებ!

[სქოლიოები]

თავი 10

შეიძულეთ „სატანის სიღრმეები“

თიატირა

1. სად მდებარეობდა თიატირა და როგორი იყო რელიგიური გარემო ამ ქალაქში?

ბერგამიდან (პერგამონი) სამხრეთ-აღმოსავლეთით დაახლოებით 65 კილომეტრის დაშორებით, თანამედროვე თურქეთის ტერიტორიაზე, მდებარეობს ქალაქი აქჰისარი. დაახლოებით 1900 წლის წინათ აქ ქალაქი თიატირა მდებარეობდა. მიმომსვლელი ზედამხედველი ადვილად ჩავიდოდა პერგამონიდან თიატირაში და, იქ ჩასული, გამოცხადების მე-3 თავში მოხსენიებულ სარდისის, ფილადელფიისა და ლაოდიკეის კრებებსაც მოინახულებდა. პერგამონისგან განსხვავებით თიატირა არ წარმოადგენდა იმპერატორის თაყვანისცემის ცენტრს, თუმცა მასში უხვად იყო წარმართული ღვთაებებისთვის მიძღვნილი საწმინდრები და ტაძრები. თიატირა მნიშვნელოვან სავაჭრო ცენტრად ითვლებოდა.

2, 3. ა) რა არის ცნობილი თიატირელ ქალზე, რომელიც ქრისტიანი გახდა? ბ) რას ნიშნავდა თიატირელი ქრისტიანებისთვის ის, რომ იესო „ღვთის ძეა“ და „თვალები ცეცხლის ალს მიუგავს“?

² მაკედონიაში ქადაგებისას პავლე შეხვდა ძოწეულით მოვაჭრე ერთ თიატირელ ქალს, ლიდიას. ლიდიამ თავის ოჯახის წევრებთან ერთად სიხარულით მიიღო პავლეს ცნობა და სიამოვნებით უმასპინძლა (საქმეები 16:14, 15). წერილობითი ცნობების თანახმად თიატირელთაგან ის პირველი გახდა ქრისტიანი. დროთა განმავლობაში ქალაქში ქრისტიანული კრება ჩამოყალიბდა. იესოს მათთვის ყველაზე მეტი ჰქონდა სათქმელი: „თიატირის კრების ანგელოზს მისწერე, აი რას ამბობს-თქო ღვთის ძე, რომელსაც თვალები ცეცხლის ალს მიუგავს, ფეხები კი — სუფთა სპილენძს“ (გამოცხადება 2:18).

³ ეს ერთადერთი მუხლია „გამოცხადებაში“, სადაც გამოყენებულია გამოთქმა „ღვთის ძე“, თუმცა არის მუხლები, რომლებშიც იესო იეჰოვას თავის მამად მოიხსენიებს (გამოცხადება 2:27; 3:5, 21). ამ სიტყვებით იესო, როგორც ჩანს, თიატირელ ქრისტიანებს უჩვენებს, როგორი ახლო ურთიერთობა აქვს იეჰოვასთან. ძეს „თვალები ცეცხლის ალს მიუგავს“, რაც თიატირელ ქრისტიანებს მიანიშნებს, რომ მისი რისხვა აინთება კრებაში არსებული ყველანაირი უწმინდურების წინააღმდეგ. იესო უკვე მეორედ იხსენიებს თავის მბრწყინავ, სპილენძისმაგვარ ფეხებს, რითაც იმას აღნიშნავს, რომ დედამიწაზე ყოფნისას თვითონ ერთგულების ბრწყინვალე მაგალითი დაგვიტოვა. უეჭველია, თიატირელმა ქრისტიანებმა ყურად იღეს მისი რჩევა. მსგავსადვე უნდა მოვიქცეთ ჩვენც! (1 პეტრე 2:21).

4, 5. ა) რატომ შეაქო იესომ თიატირელი ქრისტიანები? ბ) რითი ჰგავს თიატირის კრება იეჰოვას მოწმეთა 100 000-მდე კრებას დღეს?

⁴ საბედნიეროდ, იესოს თიატირელი ქრისტიანების შექების მიზეზიც აქვს. ის ამბობს: „ვიცი შენი საქმეები, შენი სიყვარული, რწმენა, მსახურება, მოთმინება და ის, რომ შენი უკანასკნელი საქმეები ადრინდელზე მეტია“ (გამოცხადება 2:19). ეფესოელი ქრისტიანებისგან განსხვავებით თიატირელ ცხებულ ქრისტიანებს არ განელებიათ იეჰოვას სიყვარული, რაც თავდაპირველად ჰქონდათ. მათი რწმენა მტკიცე იყო. უფრო მეტიც, მათი საქმეები ადრინდელზე უკეთესი იყო და ადრე მოხსენიებული სამი კრების ქრისტიანების მსგავსად ისინიც სიმტკიცეს ინარჩუნებდნენ. იმავეს თქმა შეიძლება დღესაც მთელ მსოფლიოში 100 000-მდე კრებად გაერთიანებულ იეჰოვას მოწმეთა შესახებ! იეჰოვას სიყვარული და მისთვის მსახურებაში გულმოდგინება ახალგაზრდებსა და ხანდაზმულებს მოქმედებისკენ აღძრავს. იზრდება იმ პიონერთა რიცხვი, რომლებიც ბრძნულად იყენებენ დროს და აუწყებენ ღვთის იმ სამეფოს დიდებული იმედის შესახებ, რომელიც მალე დამყარდება (მათე 24:14; მარკოზი 13:10).

⁵ ათწლეულების განმავლობაში ღვთის მრავალი ერთგული მსახური, როგორც ცხებულები, ისე უამრავი ხალხი, ღვთის მსახურებაში სამაგალითო სიმტკიცეს ავლენენ, როცა ადამიანებს მათ გარშემო სულ უფრო მეტად ეწურებათ იმედი. მაგრამ ჩვენ უიმედობის არანაირი საფუძველი არა გვაქვს! „გამოცხადება“ ადასტურებს ღვთის წინასწარმეტყველთა სიტყვებს: „ახლოს არის იეჰოვას დიდი დღე, ახლოს არის და ძლიერ ჩქარდება“ (სოფონია 1:14; იოელი 2:1; აბაკუმი 2:3; გამოცხადება 7:9; 22:12, 13).

„ქალი იზებელი“

6. ა) შექების მიუხედავად იესომ რა სერიოზული შენიშვნა მისცა თიატირის კრებას, რაც დაუყოვნებლივ მოითხოვდა ყურადღებას? ბ) ვინ იყო იზებელი და ჰქონდა თუ არა უფლება, წინასწარმეტყველად წოდებულიყო?

⁶ იესოს ცეცხლოვანი თვალები უფრო მეტს ხედავს. ის ისეთ რამეს ამჩნევს, რაც დაუყოვნებლივ მოითხოვს ყურადღებას. იესო თიატირელ ქრისტიანებს ეუბნება: „მაგრამ შენ წინააღმდეგ ისა მაქვს, რომ ნებაზე უშვებ ქალ იზებელს, რომელიც თავს წინასწარმეტყველს უწოდებს, ასწავლის ჩემს მონებს და შეცდომაში შეჰყავს ისინი, რომ იმეძაონ და კერპთშენაწირი ჭამონ“ (გამოცხადება 2:20). ძვ. წ. X საუკუნეში ისრაელის მეფე ახაბის ცოლმა, ბაალის თაყვანისმცემელმა დედოფალმა იზებელმა მკვლელობებით, გარყვნილებითა და ძალაუფლების სიყვარულით გაითქვა სახელი. ის მოკლეს იეჰოვას ცხებული იეჰუს ბრძანებით (1 მეფეები 16:31; 18:4; 21:1—16; 2 მეფეები 9:1—7, 22, 30, 33). კერპთაყვანისმცემელ იზებელს უფლება არ ჰქონდა, წინასწარმეტყველად წოდებულიყო. ის არაფრით ჰგავდა მირიამსა და დებორას, რომლებსაც ისრაელში ერთგულ წინასწარმეტყველებად იცნობდნენ (გამოსვლა 15:20, 21; მსაჯულები 4:4; 5:1—31). იეჰოვას სულს არ აღუძრავს ის, რომ მოხუცებული ანასა და მახარობელი ფილიპეს ოთხი ქალიშვილის მსგავსად ეწინასწარმეტყველა (ლუკა 2:36—38; საქმეები 21:9).

7. ა) რა გავლენაზე საუბრობს იესო, როცა მოიხსენიებს „ქალ იზებელს“? ბ) რა შესაძლო გამართლებას უძებნიდა ზოგიერთი ქალი თავის თვითნებურ საქციელს?

⁷ ცხადია, რომ „ქალი იზებელი“, რომელსაც თავი თიატირელ წინასწარმეტყველად მოაქვს, მატყუარაა. მას არა აქვს ღვთის სული. ვინ არის ის? როგორც ჩანს, ის არის ერთი ქალი ან ქალთა ჯგუფი, რომელიც უსირცხვილოდ რყვნის კრებას. შესაძლოა ისინი კრების წევრთაგან ზოგს უზნეობაში ითრევენ და საღვთო წერილების არასწორი ახსნით თავიანთ გარყვნილებას უსირცხვილოდ ამართლებენ. ისინი მართლაც ცრუწინასწარმეტყველები არიან! ეს ქალები სხვებს აცდუნებენ, რომ ისინიც აჰყვნენ „სიძვას, უწმინდურებას, ვნებას, მავნებელ სურვილებსა და სიხარბეს, რაც კერპთაყვანისმცემლობაა“ (კოლოსელები 3:5). ისინი კრების წევრებს უბიძგებენ უზნეობისა და ეგოისტური ცხოვრებისკენ, რასაც ქრისტიანული სამყაროს მიმდინარეობათა უმეტესობა იწყნარებს.

8. ა) რა განაჩენი გამოაქვს იესოს თიატირელი „იზებელისთვის“? ბ) ქალების რა შეუფერებელი ზეგავლენა შეიმჩნევა დღეს?

⁸ შემდეგ იესო თიატირის კრების უხუცესებს მიმართავს: „დრო მივეცი მოსანანიებლად, მაგრამ არ სურს თავისი სიძვის მონანიება. აი, მზად ვარ, ის ლოგინად ჩავაგდო, ხოლო ვინც მასთან ერთად მრუშობს, დიდ გასაჭირში ჩავყარო, თუ არ მოინანიებენ მის საქმეებს“ (გამოცხადება 2:21, 22). დედოფალ იზებელის მსგავსად, რომელიც, როგორც ჩანს, მბრძანებლობდა ახაბზე და ეწინააღმდეგებოდა ღვთის განაჩენის აღმსრულებელ იეჰუს, შეიძლება ეს ქალებიც ცდილობენ, თავიანთი ქმრები და უხუცესები თავიანთ ჭკუაზე ატარონ. როგორც ჩანს, თიატირელი უხუცესები ურიგდებიან ურცხვი იზებელის გავლენას კრებაზე. ამიტომ იესო მთელი სერიოზულობით აფრთხილებს მათ. მისი სიტყვები დღესაც საყურადღებოა იეჰოვას მოწმეთა ყველა კრებისთვის. ახლაც არიან ისეთი თავნება ქალები, რომლებიც განდგომილებისკენ უბიძგებენ თავიანთ ქმრებს და იეჰოვას ერთგულ მსახურთა წინააღმდეგ სასამართლოშიც კი შეაქვთ საჩივრები (შეადარეთ იუდას 5—8).

9. ა) რატომ არ აყენებს ქრისტიან ქალებს ჩრდილს ის სიტყვები, რომლებიც იესომ იზებელზე წარმოთქვა? ბ) რა შემთხვევაში ვლინდება იზებელის გავლენა?

⁹ ეს ფაქტი არავითარ შემთხვევაში არ აყენებს ჩრდილს ერთგულ ქრისტიან ქალებს. დღეს სამქადაგებლო საქმიანობაში სწორედ მათ შეაქვთ უდიდესი წვლილი; ისინი ატარებენ ბიბლიის საშინაო შესწავლებს, რისი წყალობითაც კრებებს უამრავი ახალი ქრისტიანი ემატება. მათ რომ ღვთის კურთხევა არ აკლიათ, ეს ფსალმუნის 68:11-დანაც ჩანს: „იეჰოვა გასცემს ბრძანებას; ქალთა დიდი ლაშქარი აუწყებს სასიხარულო ცნობას“. ქმრებზე კი დადებითად მოქმედებს ცოლების მოკრძალება და მათი პატივისცემა, ვინაიდან ეს „ღვთის თვალში ძალიან ძვირფასია“ (1 პეტრე 3:1—4). მარჯვე და შრომისმოყვარე ცოლს მეფე ლემუელიც აქებს (იგავები 31:10—31). იზებელის გავლენა მხოლოდ მაშინ ვლინდება, როდესაც ქალები ზღვარს სცდებიან, აცდუნებენ მამაკაცებს და ეჭვქვეშ აყენებენ ან არ ცნობენ მეთაურობის პრინციპს (ეფესოელები 5:22, 23; 1 კორინთელები 11:3).

10. ა) რატომ იმსახურებენ იზებელი და მისი შვილები სასჯელს? ბ) რა საფრთხის წინაშე დგანან ისინი, ვინც იზებელის შვილები ხდებიან, და რისი გაკეთება მართებთ მათ?

¹⁰ აი კიდევ რას ამბობს იესო „ქალ იზებელზე“: „მის შვილებს სასიკვდილო ჭირით დავხოცავ და ყველა კრება გაიგებს, რომ მე თირკმელებსა და გულებს ვიკვლევ და თითოეულ თქვენგანს თავისი საქმეების მიხედვით მივუზღავ“ (გამოცხადება 2:23). იესომ იზებელსა და მის შვილებს მოსანანიებლად დრო მისცა, მაგრამ მათ არ ისურვეს თავიანთი გარყვნილი გზების მიტოვება და ამიტომ სასჯელი დაიმსახურეს. ეს სიტყვები ჩვენთვისაც საყურადღებოა. ისინი, ვინც ჰბაძავენ იზებელს, კაცები თუ ქალები, და მეთაურობისა და ზნეობრივი ბიბლიური პრინციპების დარღვევით ან თეოკრატიული წესრიგის უგულებელყოფით მისი შვილები ხდებიან, სულიერი გაგებით დაავადებულები არიან. რა თქმა უნდა, თუ ასეთი ადამიანი კრების უხუცესებს სთხოვს, ილოცონ მისთვის, მაშინ „რწმენით წარმოთქმული ლოცვა გამოაჯანმრთელებს დასუსტებულს. იეჰოვა წამოაყენებს მას“. მაგრამ ეს მხოლოდ იმ შემთხვევაში, თუ ის თავმდაბლურად მოიქცევა ამ ლოცვების შესაბამისად. მაგრამ ნურავინ იფიქრებს, რომ უზნეო საქციელის დაფარვით ან მსახურებაში მოჩვენებითი გულმოდგინებით ღვთისა და ქრისტეს მოტყუებას შეძლებს (იაკობი 5:14, 15).

11. რა კეთდება იმისათვის, რომ კრებებში ქალთა ზეგავლენამ ფეხი არ მოიკიდოს?

¹¹ საბედნიეროდ, იეჰოვას მოწმეთა კრებების უმეტესობას არ ავიწყდება ეს საშიშროება. უხუცესები ფხიზლობენ, რომ კრებაში ფეხი არ მოიკიდოს არათეოკრატიულმა აზროვნებამ და უწმინდურებამ. ისინი ცდილობენ, დაეხმარონ როგორც ძმებს, ისე დებს, რომლებიც ამ საშიშროების წინაშე დგანან, რომ სულიერად გაძლიერდნენ და დროულად გამოსწორდნენ (გალატელები 5:16; 6:1). ეს ქრისტიანი ზედამხედველები სიყვარულით და, ამავე დროს, მტკიცედ მოქმედებენ, რომ ქალები თანასწორუფლებიანობისთვის მებრძოლ ჯგუფებად არ გაერთიანდნენ. გარდა ამისა, დროდადრო დროული რჩევები იეჰოვას მოწმეების მიერ გამოცემულ პუბლიკაციებშიც იბეჭდებაa.

12. იეჰუს მსგავსად როგორ ავლენს შემართებას იოანეს კლასი?

¹² თუ ვინმე უზნეობას სჩადის და, განსაკუთრებით, თუ ეს ჩვევად ექცა, ეს მოუნანიებელი შემცოდველი კრებიდან უნდა გაირიცხოს. გავიხსენოთ, როგორი შემართებით ცდილობდა იეჰუ ისრაელიდან იზებელის ნებისმიერი გავლენის აღმოფხვრას. იოანეს კლასიც მსგავს სიმტკიცეს ავლენს დღეს და თავის თანამსახურ იონადაბის კლასს მაგალითს აძლევს. ისინი ქრისტიანული სამყაროს სამღვდელოებისგან განსხვავებით არ იწყნარებენ ასეთ საქმეებს (2 მეფეები 9:22, 30—37; 10:12—17).

13. რა დაემართებათ ქალების გამხრწნელი ზეგავლენის ქვეშ მოქცეულებს?

¹³ ღვთის ძეს, როგორც იეჰოვას მაცნესა და მის მიერ დანიშნულ მოსამართლეს, სრული უფლება აქვს, ამხილოს და სულიერი გაგებით ლოგინად ჩააგდოს თანამედროვე იზებელი, ვინაიდან მას ქრონიკული ავადმყოფობა ჭირს (მალაქია 3:1, 5). ისინი, ვინც ამ ქალების გამხრწნელი ზეგავლენის ქვეშ ექცევიან, დიდ უბედურებას დაიტეხენ თავს — დამწუხრდებიან გარიცხვის, ქრისტიანული კრებიდან მოკვეთის გამო, რადგან სულიერად მკვდრები იქნებიან. თუ ისინი არ მოინანიებენ, არ მობრუნდებიან და არ აღდგებიან კრებაში, პირდაპირი გაგებითაც „სასიკვდილო ჭირით“ სიკვდილი ელოდებათ, დღეს თუ არა, დიდი გასაჭირის დროს მაინც. თუმცა ჯერ კიდევ შეუძლიათ უკან დაბრუნება, თუ ბოლომდე მოინანიებენ თავიანთ არასწორ საქციელს (მათე 24:21, 22; 2 კორინთელები 7:10).

14. ა) როგორ იყენებს იესო უხუცესებს გარკვეული პრობლემების, მაგალითად, იზებელის გავლენის აღმოსაფხვრელად? ბ) როგორ უნდა დაუჭიროს მხარი კრებამ უხუცესებს, რომლებიც მსგავს პრობლემებს წყვეტენ?

¹⁴ „ყველა კრებამ“ უნდა იცოდეს, რომ იესო იკვლევს „თირკმელებს“, ანუ ყველაზე ღრმა გრძნობებს, და „გულებს“, ანუ შინაგან ადამიანს და მისი გულის ზრახვებს. ამიტომ იესო თავისი „ვარსკვლავების“ ანუ უხუცესების დახმარებით აღმოფხვრის გარკვეულ პრობლემებს, მაგალითად, კრებაში იზებელის ნებისმიერ გავლენას (გამოცხადება 1:20). მას შემდეგ, რაც უხუცესები საგულდაგულოდ განიხილავენ მსგავს საქმეს, მათ მიერ გამოტანილ გადაწყვეტილებაში ეჭვი არავინ უნდა შეიტანოს. ყველა თავმდაბლობით უნდა შეხვდეს უხუცესების გადაწყვეტილებას და მხარი უნდა დაუჭიროს კრების „ვარსკვლავებს“. თუ იეჰოვას ერთგულები ვართ და მზადყოფნით ვემორჩილებით ორგანიზაციაში დადგენილ წესრიგს, აუცილებლად დავჯილდოვდებით (ფსალმუნი 37:27—29; ებრაელები 13:7, 17). დაე, თქვენც მიიღოთ კურთხევები, როცა იესო თითოეულს თავისი საქმეებისამებრ მიაგებს (გალატელები 5:19—24; 6:7—9).

„იმას ჩაეჭიდეთ, რაც გაქვთ“

15. ა) რა უთხრა იესომ მათ, ვინც იზებელის გამხრწნელი ზეგავლენის ქვეშ არ მოქცეულა? ბ) საიდან ჩანს, რომ ყველა, ვინც 1918 წელს თავს ქრისტიანს უწოდებდა, არ მოქცეულა განდგომილი ქრისტიანული სამყაროს გამხრწნელი ზეგავლენის ქვეშ?

¹⁵ იესოს შემდეგი სიტყვები მანუგეშებელია: «დანარჩენებს კი, ვინც თიატირაში ხართ, ყველას, ვისაც ეს სწავლება არა გაქვთ, მათ, ვისაც არ შეგიცნიათ „სატანის სიღრმეები“, გეუბნებით: მეტს აღარაფერს დაგაკისრებთ. ჩემ მოსვლამდე კი კვლავ იმას ჩაეჭიდეთ, რაც გაქვთ» (გამოცხადება 2:24, 25). თიატირაში იყვნენ ისეთი ერთგული ქრისტიანებიც, რომლებიც არ მოექცნენ იზებელის გავლენის ქვეშ. ამის მსგავსად, 40 წლის განმავლობაში, 1918 წლამდე და შემდეგაც ყველა, ვინც თავს ქრისტიანად თვლიდა, არ იწყნარებდა უზნეობასა და გარყვნილებას, რომელიც ფართოდ იყო გავრცელებული ქრისტიანულ სამყაროში. ბიბლიის მკვლევართა პატარა ჯგუფი, რომელიც ახლა იეჰოვას მოწმეების სახელითაა ცნობილი, ცდილობდა ეკლესიის მრევლისთვის დაენახვებინა, რომ ქრისტიანული სამყაროს მრავალ მოძღვრებას არაქრისტიანული საწყისი ჰქონდა. ბიბლიის მკვლევარები თავისუფლდებოდნენ განდგომილი ქრისტიანობისგან გადმოღებული ბაბილონური მოძღვრებებისა და წეს-ჩვეულებებისგან, რომლებშიც „ქალ იზებელის“ ისეთი სწავლებებიც შედიოდა, რომლებიც ხალხს ყველაფრის უფლებას აძლევდა.

16. მართალია, იესო და I საუკუნის ქრისტიანთა ხელმძღვანელი საბჭო მორწმუნეებს დამატებით ტვირთს არ აკისრებდნენ, მაგრამ რისგან უნდა შეეკავებინათ მათ თავი?

¹⁶ დღეს იოანეს კლასიც მოუწოდებს თავის თანამსახურ უამრავ ხალხს, რომ არ მოექცნენ გართობას აყოლილი ქვეყნიერების გამხრწნელი ზეგავლენის ქვეშ. გაუმართლებელია, უყურო ან მონაწილეობა მიიღო გარყვნილებაში ცნობისმოყვარეობის გამო ან მხოლოდ იმის გამო, რომ იცოდე, რას ერიდო. სიბრძნე მოგვიწოდებს, ვერიდოთ „სატანის სიღრმეებს“. იესომ თქვა: „მეტს აღარაფერს დაგაკისრებთ“. I საუკუნეში ქრისტიანთა ხელმძღვანელმა საბჭომაც მსგავსი დადგენილება მიიღო: „წმინდა სულმა და ჩვენ მართებულად მივიჩნიეთ, მეტი აღარაფერი დაგვეკისრებინა თქვენთვის ამ აუცილებლის გარდა, რომ მოერიდოთ კერპთშენაწირს, სისხლს, დამხრჩვალსა და სიძვას. თუ ამისგან დაიცავთ თავს, წარმატებული იქნებით. იყავით ჯანმრთელად“ (საქმეები 15:28, 29). იმისათვის, რომ სულიერად წინ წაიწიოთ, ერიდეთ ცრუ რელიგიას, სისხლის არასწორად გამოყენებას (მაგალითად, სისხლის გადასხმას) და უზნეობას! ამგვარად ფიზიკურ ჯანმრთელობასაც შეინარჩუნებთ.

17. ა) როგორ აცდუნებს სატანა ადამიანებს თავისი „სიღრმეებით“? ბ) როგორი დამოკიდებულება უნდა გვქონდეს სატანის ქვეყნიერების „სიღრმეებისადმი“, თავგზას რომ უბნევს ხალხს?

¹⁷ სატანას დღეს სხვა „სიღრმეებიც“ აქვს. მაგალითად, გონების მაამებელი რთული, ფილოსოფიური მსჯელობები და უზნეობისა და თავაშვებულობის მხარდამჭერი საუბრები. სატანის „სიღრმეები“ სპირიტიზმსა და ევოლუციის თეორიასაც მოიცავს. როგორ უყურებს ამ „სიღრმეებს“ ყოვლადბრძენი შემოქმედი? მოციქული პავლე ციტირებს მის სიტყვებს: „ბრძენთა სიბრძნეს მოვსპობ“. სატანის „სიღრმეებისგან“ განსხვავებით „ღვთის სიღრმეები“ უბრალო, ადვილად გასაგები და სასიამოვნოა. გონიერი ქრისტიანები გაურბიან სატანის ქვეყნიერების „სიღრმეებს“, თავგზას რომ უბნევს ხალხს. გახსოვდეთ, რომ „გადადის ქვეყნიერებაც და მისი სურვილებიც, ღვთის ნების შემსრულებელი კი სამარადისოდ რჩება“ (1 კორინთელები 1:19; 2:10; 1 იოანე 2:17).

18. რა კურთხევებს ჰპირდება იესო ცხებულ ქრისტიანებს, რომლებიც ბოლომდე ერთგულები რჩებიან, და რა პატივი ხვდებათ წილად მათ, მკვდრეთით აღდგენილებს, არმაგედონის დროს?

¹⁸ თიატირელ ქრისტიანებს იესო ახლა გამამხნევებელი სიტყვებით მიმართავს. ეს სიტყვები დღეს ცხებულ ქრისტიანებსაც ამხნევებს: „მძლეველსა და ჩემი საქმეების ბოლომდე დამცველს მივცემ ძალაუფლებას ხალხებზე, როგორიც მე მივიღე მამაჩემისგან; დამწყემსავს ის ხალხს რკინის კვერთხით და თიხის ჭურჭელივით დაიმსხვრევიან“ (გამოცხადება 2:26, 27). რაოდენ დიდი პატივია! ძალაუფლებაში, რასაც „მძლეველი“ ცხებულები აღდგომისას მიიღებენ, იგულისხმება ის, რომ იესოსთან ერთად არმაგედონში ისინი „რკინის კვერთხით“ გაანადგურებენ ურჩებს. ხალხთა ბირთვული იარაღი ნესტიან ასანთს დაემსგავსება, როდესაც ქრისტე თიხის ჭურჭელივით ნაცარტუტად აქცევს თავის მტრებს (ფსალმუნი 2:8, 9; გამოცხადება 16:14, 16; 19:11—13, 15).

19. ა) ვინ არის „ცისკრის ვარსკვლავი“ და როგორ „მიეცემა“ ის ‘მძლეველებს’? ბ) რა ამხნევებს უამრავ ხალხს?

¹⁹ იესო დასძენს: „და მივცემ მას ცისკრის ვარსკვლავს“ (გამოცხადება 2:28). მოგვიანებით იესო თვითონ განმარტავს ამ ვარსკვლავის მნიშვნელობას: „მე ვარ დავითის ფესვი და შთამომავალი და კაშკაშა ცისკრის ვარსკვლავი“ (გამოცხადება 22:16). წინასწარმეტყველება, რომელიც იეჰოვამ ურჩ ბალაამს ათქმევინა, იესომ შეასრულა: „ვარსკვლავი ამოვა იაკობიდან და კვერთხი აღიმართება ისრაელიდან“ (რიცხვები 24:17). რა გაგებით მისცემს იესო „ცისკრის ვარსკვლავს“ ‘მძლეველებს’? როგორც ჩანს, იმ გაგებით, რომ საკუთარ თავს „აძლევს“ მათ, ანუ ძალიან ახლო ურთიერთობა ექნება მათთან (იოანე 14:2, 3). მათ მართლაც უღირთ ერთგულების შენარჩუნება! უამრავ ხალხს ძალებს მატებს ის, რომ „კაშკაშა ცისკრის ვარსკვლავი“ მალე თავისი მეფური ძალაუფლების წყალობით დედამიწაზე სამოთხეს აღადგენს.

შეინარჩუნეთ უმწიკვლობა

20. რა მხრივ მოგვაგონებს ქრისტიანული სამყარო თიატირის კრებას?

²⁰ ამ ცნობას თიატირელი ქრისტიანები ძლიერ უნდა გაემხნევებინა. წარმოიდგინეთ, ზეცაში განდიდებული ღვთის ძე თიატირელ ქრისტიანებს ელაპარაკა იმ პრობლემებზე, რომლებსაც უნდა გამკლავებოდნენ! უეჭველია, კრებაში ზოგიერთი გამოეხმაურა მოსიყვარულე მწყემსის ასეთ მზრუნველობას. შვიდიდან ეს ყველაზე გრძელი მიმართვა დღეს ჭეშმარიტი კრების ამოცნობაში გვეხმარება. 1918 წელს, როცა იესო იეჰოვას ტაძარში მივიდა როგორც მოსამართლე, იმ მიმდინარეობათა უმეტესობა, რომლებიც ქრისტიანებად აცხადებდნენ თავს, კერპთაყვანისმცემლობითა და სულიერი უზნეობით იყო წაბილწული (იაკობი 4:4). ზოგიერთი თავის მრწამსს XIX საუკუნის თავისუფლად მოაზროვნე ქალთა მოძღვრებებზე აფუძნებდა, მაგალითად, ელენ უაიტისა (მეშვიდე დღის ადვენტისტები) და მერი ბეიკერ ედის მოძღვრებაზე („ქრისტიანული მეცნიერება“); ამ ბოლო დროს არაერთი ქალი ქადაგებს აუდიტორიის წინაშე (შეადარეთ 1 ტიმოთეს 2:11, 12). კათოლიციზმის ბევრ მიმდინარეობაში მარიამს უფრო დიდ პატივს სცემენ, ვიდრე ღმერთსა და ქრისტეს; იესოს არ აღუზევებია ის ასე (იოანე 2:4; 19:26). განა შეიძლება ქრისტიანულად მივიჩნიოთ ის მიმდინარეობები, რომლებშიც ქალებს ასეთი დიდი ზეგავლენა აქვთ, რაც არ შეშვენით?

21. რით არის ჩვენთვის საყურადღებო თიატირელებისთვის ნათქვამი სიტყვები?

²¹ თითოეული ქრისტიანი, იქნება ის იოანეს კლასის წარმომადგენელი თუ სხვა ცხვრისა, უნდა დაფიქრდეს ამ ცნობაზე (იოანე 10:16). ზოგიერთმა შეიძლება თიატირელი იზებელის მიმდევრების მსგავსად ადვილი გზა აირჩიოს და კომპრომისზეც წავიდეს. დღეს ისეთი საკითხების წინაშე გვიწევს დგომა, როგორიცაა სისხლის გადასხმა ან სისხლის შემცველი პროდუქტების საკვებად გამოყენება. შეიძლება ზოგი ფიქრობდეს, რომ თუ გულმოდგინე მქადაგებელია ან მოხსენებებით გამოდის, შეუძლია თავს უფლება მისცეს, უყუროს ძალადობის ან გარყვნილების ამსახველ ფილმებს ან დიდი რაოდენობით ალკოჰოლი მიიღოს. იესოს მიერ თიატირელი ქრისტიანებისთვის მიცემული გაფრთხილება ჩვენთვისაც საყურადღებოა, რომ თავს ზედმეტის უფლება არ მივცეთ. იეჰოვას სურს, თიატირელი ქრისტიანების უმეტესობის მსგავსად ჩვენც წმინდები, ერთსულოვნები და ერთგულები ვიყოთ.

22. როგორ დაგვანახვა იესომ, რომ მნიშვნელოვანია, ყური მზად გვქონდეს მოსასმენად?

²² ბოლოს იესო ამბობს: „ვისაც ყური აქვს, მოისმინოს, რას ეუბნება სული კრებებს“ (გამოცხადება 2:29). იესომ მეოთხედ გაიმეორა ეს დამაფიქრებელი სიტყვები და ამავე სიტყვებით ასრულებს მომდევნო სამ მიმართვასაც. მზად გაქვთ ყური მოსასმენად? მაშ, ყურად იღეთ დარიგებები, რომლებსაც ღმერთი თავისი სულისა და თავისი „არხის“ მეშვეობით გვაძლევს.

[სქოლიოები]

თავი 11

ჩაწერილია შენი სახელი სიცოცხლის წიგნში?

სარდისი

1. რა მდგომარეობა იყო სარდისის კრებაში და როგორ იწყებს იესო თავის მიმართვას?

თანამედროვე ქალაქ აქჰისარიდან (თიატირა) სამხრეთით დაახლოებით 50 კილომეტრში მდებარეობდა ქალაქი სარდისი. სწორედ ამ ქალაქშია კრება, რომელსაც ახლა მიმართავს განდიდებული იესო. ძვ. წ. VI საუკუნეში ის ლიდიის სამეფოს დიდებული დედაქალაქი და უსაზღვროდ მდიდარი მეფე კრეზუსის სატახტო ქალაქი იყო. იოანეს დროს ქალაქს ძნელბედობის ჟამი დასდგომოდა და კრეზუსის დროინდელი კეთილდღეობა წარსულს ჩაჰბარებოდა. ამ დროს ქრისტიანული კრების სულიერი მდგომარეობა სავალალო იყო. ეს პირველი შემთხვევაა, როცა იესო თავის მიმართვას შექებით არ იწყებს. ის ამბობს: «სარდისის კრების ანგელოზს მისწერე, აი რას ამბობს-თქო ის, ვისაც აქვს ღვთის შვიდი სული და შვიდი ვარსკვლავი: „ვიცი შენი საქმეები, ისეთი სახელი გაქვს, თითქოს ცოცხალი იყო, თუმცა მკვდარი ხარ“ » (გამოცხადება 3:1).

2. ა) რას ნიშნავს სარდისელი ქრისტიანებისთვის ის, რომ იესოს „შვიდი სული“ აქვს? ბ) როგორი სახელი ჰქონდა სარდისის კრებას, მაგრამ სინამდვილეში რა მდგომარეობაში იყო ის?

² რატომ ამბობს იესო, რომ „შვიდი სული“ აქვს? შვიდი სულით წარმოდგენილია იეჰოვას წმინდა სული, რომელიც შეუფერხებლად ვლინდება. მოგვიანებით იოანე შვიდ სულს აღწერს, როგორც „შვიდ თვალს“, რაც მიუთითებს მახვილ მხედველობაზე, რომელიც ღვთის წმინდა სულის წყალობით აქვს იესოს (გამოცხადება 5:6). ეს საშუალებას აძლევს მას, აღმოაჩინოს და გამოასწოროს კრების ნებისმიერი პრობლემა (მათე 10:26; 1 კორინთელები 4:5). სარდისის კრება თითქოს ცოცხალი და აქტიურია, მაგრამ იესო ხედავს, რომ ის სულიერად მკვდარია. როგორც ჩანს, კრებაში უმრავლესობა ისეთივე უმოქმედო მდგომარეობაშია, როგორშიც ქრისტიანობამდე იყვნენ (შეადარეთ ეფესოელების 2:1—3; ებრაელების 5:11—14).

3. ა) რატომ უნდა მიაქციოს „სარდისის კრების ანგელოზმა“ განსაკუთრებული ყურადღება იმას, რომ იესოს „შვიდი ვარსკვლავი“ აქვს? ბ) რა მკაცრი გაფრთხილება მისცა იესომ სარდისის კრებას?

³ „სარდისის კრების ანგელოზს“ იესო იმასაც შეახსენებს, რომ მას აქვს „შვიდი ვარსკვლავი“. მას მარჯვენაში ჰყავს კრების უხუცესები ანუ ხელმძღვანელობს მათ სამწყემსო საქმიანობას. უხუცესებმა გული უნდა დაუდონ ფარის კარგად გაცნობას (იგავები 27:23). ასე რომ, მეტი გულისყურით უნდა მოისმინონ იესოს შემდეგი სიტყვები: „იფხიზლე და განამტკიცე ისინი, ვინც სიკვდილის პირას იყვნენ, რადგან ვერ ვნახე, რომ ბოლომდე შეგესრულებინოს შენი საქმეები ჩემი ღვთის წინაშე. ამიტომ გახსოვდეს: რაც მიიღე და მოისმინე, კვლავაც დაიცავი და მოინანიე. თუ არ გამოფხიზლდები, ქურდივით მოვალ და არ გეცოდინება, რომელ საათზე დაგადგები თავს“ (გამოცხადება 3:2, 3).

4. როგორ დაეხმარებოდა პეტრეს სიტყვები სარდისის კრებას განმტკიცებაში?

⁴ სარდისელმა უხუცესებმა უნდა გაიხსენონ, თავდაპირველად რა დიდი სიხარულით მიიღეს ჭეშმარიტება და რა კურთხევები ჰქონდათ მაშინ; ახლა კი ისინი მკვდრები ანუ სულიერად უმოქმედოები არიან. რწმენის საქმეების სიმცირის გამო მათი კრების ლამპარი ძლივსღა ბჟუტავს. დიდი ხნით ადრე პეტრე მოციქულმა მისწერა აზიის კრებებს (როგორც ჩანს, სარდისის კრებასაც), რომ უფრო მეტად დაეფასებინათ დიდებული სასიხარულო ცნობა, გაცხადებული „ზეციდან გამოგზავნილი წმინდა სულით“, რომელიც იოანეს ხილვაში შვიდი სულით იყო წარმოდგენილი. აზიელ ქრისტიანებს პეტრემ ისიც შეახსენა, რომ ისინი იყვნენ ‘რჩეული მოდგმა, სამეფო სამღვდელოება, წმინდა ერი, ღვთისთვის გამორჩეული საკუთრება, რომ ყველგან ეუწყებინათ მისი აღმატებულობის შესახებ, ვინც სიბნელიდან თავის საოცარ სინათლეში გამოიხმო ისინი’ (1 პეტრე 1:12, 25; 2:9). ამ ჭეშმარიტებებზე დაფიქრება სარდისის კრებას მონანიებასა და განმტკიცებაში დაეხმარებოდა (შეადარეთ 2 პეტრეს 3:9).

5. ა) შერჩათ თუ არა სარდისელ ქრისტიანებს მადლიერება? ბ) რა მოხდებოდა, თუ სარდისელი ქრისტიანები არ გამოეხმაურებოდნენ იესოს რჩევას?

⁵ იმ დროს სარდისელი ქრისტიანების მადლიერება ჭეშმარიტებისთვის და ჭეშმარიტების სიყვარული წააგავდა მბჟუტავ ცეცხლს; მხოლოდ რამდენიმე ნაკვერჩხალიღა ღვიოდა. იესო მოუწოდებდა მათ, რომ ნაკვერჩხლისთვის შეებერათ, ცეცხლი გაეჩაღებინათ, გულგრილობის შედეგად ჩადენილი ცოდვები მოენანიებინათ და კვლავაც სულიერად გამოეცოცხლებინათ კრება (შეადარეთ 2 ტიმოთეს 1:6, 7). თუ არადა, როდესაც იესო მოულოდნელად, „ქურდივით“ მოვიდოდა განაჩენის აღსასრულებლად, სარდისის კრება მოუმზადებელი დახვდებოდა (მათე 24:43, 44).

იესო „ქურდივით“ მოდის

6. რა გაგებით მოვიდა იესო 1918 წელს „ქურდივით“ და რა მდგომარეობაში დახვდნენ ეგრეთ წოდებული მიმდევრები?

⁶ იესოს გაფრთხილება, რომ „ქურდივით“ მოვა, ჩვენს დროსაც ეხება. ეს განსაკუთრებით მნიშვნელოვანი იყო იმ ქრისტიანებისთვის, რომლებიც უფლის დღის მომსწრენი იყვნენ. 1914 წლის შემდეგ მალევე შესრულდა მალაქიას წინასწარმეტყველება: « „უეცრად მოვა თავის ტაძარში ჭეშმარიტი უფალი, რომელსაც ეძებთ, და შეთანხმების მაცნე, რომლის მოსვლაც გწადიათ. აი, უეჭველად მოვა ის“, — ამბობს ლაშქართა ღმერთი იეჰოვა» (მალაქია 3:1; გამოცხადება 1:10). იესო, როგორც „შეთანხმების მაცნე“, მოვიდა მათ შესამოწმებლად და განსასჯელად, ვინც თავს მის მიმდევრად აცხადებდა (1 პეტრე 4:17). იმ დროს, 1918 წელს, ქრისტიანული სამყაროს ხელი ერია პირველი მსოფლიო ომით გამოწვეულ სისხლის ღვრაში და ის სულიერი გაგებით მკვდარი იყო. ჭეშმარიტი ქრისტიანებიც კი, რომლებიც ომის დაწყებამდე მთელი მონდომებით ქადაგებდნენ, დროებით სულიერად მიძინებულები იყვნენ. ყველასთვის ცნობილი უხუცესებიდან ზოგი დაპატიმრებული იყო, სამქადაგებლო საქმიანობა თითქმის შეწყდა. მომდევნო წელს, როდესაც იეჰოვას სულმა გამოაფხიზლა ეს ქრისტიანები, ყველანი მზად არ აღმოჩნდნენ. იესოს იგავში მოხსენიებული უგუნური ქალწულების მსგავსად, ზოგი სულიერად არ იყო მზად იეჰოვას საპატიო მსახურების შესასრულებლად. მაგრამ, საბედნიეროდ, გონიერი ქალწულების მსგავსად მრავალმა გაითვალისწინა იესოს გაფრთხილება: „იფხიზლეთ, რადგან არც დღე იცით და არც საათი“ (მათე 25:1—13).

7. რატომ უნდა იფხიზლონ ქრისტიანებმა?

⁷ ქრისტიანებისთვის სიფხიზლე მხოლოდ უფლის დღის დასაწყისში როდი იყო საჭირო. თავის დიდებულ წინასწარმეტყველებაში, თუ რა იქნებოდა „იმ დროის ნიშანი“, როცა ეს ყველაფერი დასრულდებოდა, იესომ მთელი სერიოზულობით გაგვაფრთხილა: „იმ დღეზე ან საათზე კი მამის გარდა არავინ იცის. . . ფრთხილად იყავით და იფხიზლეთ, რადგან არ იცით, როდის დადგება დანიშნული დრო. რასაც თქვენ გეუბნებით, ყველას ვეუბნები: იფხიზლეთ“ (მარკოზი 13:4, 32, 33, 37). ყველამ, ცხებულებმა თუ უამრავი ხალხის წარმომადგენლებმა, უნდა ვიფხიზლოთ და ვიბრძოლოთ ამ საათამდე, რათა სულიერად არ ჩაგვთვლიმოს. დაე, ფხიზლად დავხვდეთ იეჰოვას დღეს, რომელიც ღამე ქურდივით მოვა, რათა ღმერთმა ჩვენ სასარგებლოდ გამოიტანოს განაჩენი (1 თესალონიკელები 5:2, 3; ლუკა 21:34—36; გამოცხადება 7:9).

8. როგორ ეხმარება ღვთის ხალხს იოანეს კლასი სულიერი სიფხიზლის შენარჩუნებაში?

⁸ იოანეს კლასს კარგად ესმის, თუ რამდენად აუცილებელია, ხელი შეუწყოს ღვთის ხალხის სულიერ სიფხიზლეს. ამიტომაც მთელ მსოფლიოში წელიწადში რამდენჯერმე ტარდება სპეციალური შეხვედრები. გასულ წელს ჩატარებულ 2 981 საოლქო კონგრესს მთლიანობაში 10 953 744 ადამიანი დაესწრო და მათგან 122 701 მოინათლა. უკვე ას წელზე მეტია, რაც იოანეს კლასი ჟურნალ „საგუშაგო კოშკს“ იეჰოვას სახელისა და მისი განზრახვების გასაცხადებლად გამოსცემს. ორივე მსოფლიო ომის დროს სასტიკი დევნების საპასუხოდ „საგუშაგო კოშკში“ გამოქვეყნებულმა სტატიებმა — „კურთხეულნი არიან უშიშარნი“ (1919 წ.), „მოწოდება მოქმედებისკენ“ (1925 წ.) და „დევნაზე გამარჯვება“ (1942 წ.) — ახალი ძალები შემატა იეჰოვას მოწმეებს.

9. ა) რაზე უნდა დაფიქრდეს ყველა ქრისტიანი? ბ) რა გამამხნევებელი სტატიები დაიბეჭდა „საგუშაგო კოშკში“?

⁹ სარდისელი ქრისტიანების მსგავსად დღეს ქრისტიანული კრების ყველა წევრისთვის აუცილებელია თვითშემოწმება. თითოეული უნდა დავფიქრდეთ: ‘ბოლომდე ვასრულებთ ჩვენს საქმეებს’ ღვთის წინაშე? ვივითარებთ თავგანწირვის სულს და ვცდილობთ, მთელი სულით ვემსახუროთ ღმერთს ისე, რომ სხვები არ განვსაჯოთ? ამ თემას განიხილავს ჟურნალი „საგუშაგო კოშკი“ სტატიებში: „გამოსცადეთ საკუთარი თავი“ და „ჩვენ აღარ ვცოცხლობთ საკუთარი თავისთვის“a. მოდი, ასეთი სულიერი დახმარების წყალობით შევამოწმოთ საკუთარი თავი, რათა კვლავაც თავმდაბლად და უმწიკვლოდ ვიაროთ იეჰოვას წინაშე, რაშიც ლოცვაც დაგვეხმარება (ფსალმუნები 26:1—3; 139:23, 24).

„რამდენიმე კაცი“

10. რა სასიამოვნო რამ აღმოაჩინა იესომ სარდისის კრებაში და როგორ უნდა იმოქმედოს ამან ჩვენზე?

¹⁰ იესო შემდეგ ძალიან გამამხნევებელი სიტყვებით მიმართავს სარდისის კრებას: „მაგრამ გყავს სარდისში რამდენიმე კაცი, რომლებსაც კარგი სახელი აქვთ და არ წაუბილწავთ თავიანთი ტანსაცმელი. ისინი ჩემთან ერთად ივლიან თეთრებში, რადგან ღირსნი არიან. მძლეველი თეთრი ტანსაცმლით შეიმოსება. მის სახელს არ ამოვშლი სიცოცხლის წიგნიდან და ვაღიარებ მის სახელს მამაჩემისა და მისი ანგელოზების წინაშე“ (გამოცხადება 3:4, 5). ეს სიტყვები მართლაც გვამხნევებს და გაბედულებას გვმატებს ერთგულების შესანარჩუნებლად. უხუცესთა საბჭოს უყურადღებობის გამო შეიძლება მთელმა კრებამ სულიერი გაგებით ღრმად ჩაიძინოს, თუმცა კრებაში შეიძლება მაინც იყვნენ ისეთები, რომლებიც გაბედულად შეეცდებიან ქრისტიანული სახის წმინდად და შეუბღალავად შენარჩუნებას, და ამგვარად იეჰოვას თვალში კარგი სახელის დამკვიდრებას (იგავები 22:1).

11, 12. ა) რა მსგავსება იყო „რამდენიმე“ სარდისელ ერთგულ კაცსა და დიდი განდგომილების დროს მცხოვრებ ქრისტიანებს შორის? ბ) რა შვება იგრძნეს ხორბალთან შედარებულმა ქრისტიანებმა უფლის დღეს?

¹¹ „ტანსაცმელი“ მიუთითებს სიმართლეზე, რომლითაც ამოიცნობა ქრისტიანი (შეადარეთ გამოცხადების 16:15; 19:8). იესოსთვის ალბათ სასიამოვნო იქნებოდა ის, რომ უმრავლესობის გულგრილობის მიუხედავად „რამდენიმე კაცი“, ანუ სარდისის კრების რამდენიმე ცხებული წევრი, კვლავაც ინარჩუნებდა ქრისტიანულ სახეს. ამის მსგავსად, მას შემდეგ, რაც ეგრეთ წოდებული ქრისტიანები მრავალსაუკუნოვანი დიდი განდგომილების დროს „დიდ ბაბილონს“ ანუ ცრუ რელიგიურ სამყაროს შეუერთდნენ, როგორც ჩანს, ყოველთვის არსებობდნენ ადამიანები, რომლებიც დიდი წინააღმდეგობის მიუხედავად მაინც ცდილობდნენ იეჰოვას ნების შესრულებას. ეს მართალი ადამიანები ხორბლის მსგავსად იყვნენ ჩაკარგული სარეველასავით ამოსულ სექტანტებს შორის (გამოცხადება 17:3—6; მათე 13:24—29).

¹² ხორბალთან შედარებულ ქრისტიანებს იესო შეჰპირდა, რომ „ყოველდღე. . . ქვეყნიერების აღსასრულამდე“ მათთან იქნებოდა. მან იცის, ვინ არიან ისინი, და ისიც იცის, რომ კარგ სახელს იხვეჭენ (მათე 28:20; ეკლესიასტე 7:1). წარმოიდგინეთ, როგორ გაიხარებდა ეს „რამდენიმე“ ერთგული კაცი, რომლებიც უფლის დღეს მოესწრნენ! ისინი საბოლოოდ გამოეყვნენ სულიერად მკვდარ ქრისტიანულ სამყაროს და გაერთიანდნენ მართალი ხალხის კრებულში, რომელიც ძალიან წააგავდა სმირნის კრებას (მათე 13:40—43).

13. რა კურთხევები ელით ცხებულ ქრისტიანებს, რომელთაც არ „წაიბილწეს ტანსაცმელი“?

¹³ სარდისელ ქრისტიანებს, რომლებიც ბოლომდე ერთგულები იყვნენ და არ შეუბღალავთ თავიანთი ქრისტიანული სახე, არაჩვეულებრივი იმედი რეალობად ექცათ. მას შემდეგ, რაც 1914 წელს იესოს, მესიის სამეფო დამყარდა, ისინი სულიერი ცხოვრებისთვის იქნენ აღდგენილნი და როგორც ‘მძლეველები’, უბიწოებისა და შეუბღალავი სიმართლის ნიშნად თეთრი ტანსაცმლით არიან შემოსილნი. მარადიული იქნება მათი ჯილდო, რადგან სიცოცხლის ვიწრო გზა განვლეს (მათე 7:14; იხილეთ აგრეთვე გამოცხადების 6:9—11).

სიცოცხლის წიგნში სამარადისოდ ჩაწერილნი

14. რა არის „სიცოცხლის წიგნი“ და ვისი სახელებია მასში ჩაწერილი?

¹⁴ რა არის „სიცოცხლის წიგნი“ და ვისი სახელები დარჩება მასში? სიცოცხლის წიგნში ანუ გრაგნილში იგულისხმება იეჰოვას იმ მსახურთა ნუსხა, რომლებიც ჯილდოდ მარადიულ სიცოცხლეს მიიღებენ (მალაქია 3:16). „გამოცხადებაში“ განსაკუთრებული ყურადღება ექცევა ცხებული ქრისტიანების სახელებს, მაგრამ სიცოცხლის წიგნში ჩაწერილია მათი სახელებიც, ვისაც დედამიწაზე ელის მარადიული სიცოცხლე. ისიც უნდა აღინიშნოს, რომ ამ წიგნიდან სახელების „ამოშლაც“ შესაძლებელია (გამოსვლა 32:32, 33). იოანეს კლასის წევრები, რომელთა სახელებიც მათ სიკვდილამდე დარჩება სიცოცხლის წიგნში, ზეცაში უკვდავებას მიიღებენ (გამოცხადება 2:10). ეს მათი სახელებია, ვისაც იესო თავისი მამისა და მისი ანგელოზების წინაშე ცნობს. ეს მართლაც დიდებული ჯილდოა!

15. რა შემთხვევაში ჩაიწერება სამარადისოდ უამრავი ხალხის სახელები სიცოცხლის წიგნში?

¹⁵ უამრავი ხალხი, რომელთა სახელებიც სიცოცხლის წიგნშია ჩაწერილი, გადაურჩება დიდ გასაჭირს. და თუ კვლავაც გამოავლენენ რწმენას იესოს ათასწლიანი მეფობისა და საბოლოო გამოცდის დროს, ისინი მარადიულად იცხოვრებენ სამოთხეში დედამიწაზე (დანიელი 12:1; გამოცხადება 7:9, 14; 20:15; 21:4). მაშინ მათი სახელები სამარადისოდ ჩაიწერება სიცოცხლის წიგნში. თუ ყურად ვიღებთ იმას, რასაც წმინდა სული უცხადებს კრებებს, მზადყოფნითა და ენთუზიაზმით გამოვეხმაურებით იესოს არაერთხელ გამეორებულ მოწოდებას: „ვისაც ყური აქვს, მოისმინოს, რას ეუბნება სული კრებებს“ (გამოცხადება 3:6).

[სქოლიოები]

თავი 12

„ჩაეჭიდე იმას, რაც გაქვს“

1. რომელი ქალაქის კრებას მიმართა იესომ და რას ნიშნავს ამ ქალაქის სახელწოდება?

ძმათმოყვარეობა მართლაც სასურველი თვისებაა! იესოს აშკარად ეს ჰქონდა მხედველობაში, როცა მეექვსედ მიმართა ახლა უკვე ფილადელფიის კრებას, რადგან ეს სიტყვა „ფილადელფია“ ძმათმოყვარეობას ნიშნავს. მოხუცებულ იოანეს ჯერ კიდევ ემახსოვრებოდა ის შემთხვევა, როცა 60 წელზე მეტი ხნით ადრე პეტრემ სამჯერ უთხრა იესოს, რომ ძალიან უყვარდა თავისი უფალი (იოანე 21:15—17). ავლენდნენ ფილადელფიელი ქრისტიანები ძმათმოყვარეობას? როგორც ჩანს, ავლენდნენ!

2. როგორი ქალაქი იყო ფილადელფია, როგორი კრება იყო იქ და რას ეუბნება იესო ამ კრების ანგელოზს?

² ფილადელფია, რომელიც სარდისის სამხრეთ-აღმოსავლეთით დაახლოებით ორმოცდაათ კილომეტრში მდებარეობდა (თურქეთის თანამედროვე ქალაქ ალაშეჰირის ადგილზე), იოანეს დროს აყვავებული ქალაქი იყო. უფრო მნიშვნელოვანი კი ის არის, რომ აქ ქრისტიანული კრებაც ყვაოდა. ადვილი წარმოსადგენია, რა დიდი სიხარულით შეხვდებოდნენ ფილადელფიელი ქრისტიანები იმ მსახურს, რომელიც მათთან ალბათ სარდისის გავლით მივიდოდა. მსახური რჩევით მიდის მათთან, რათა მოქმედებისკენ აღძრას ისინი. მაგრამ ეს რჩევა მისი სახელოვანი ავტორის ძალაუფლებაზე საუბრით იწყება: „ფილადელფიის კრების ანგელოზს მისწერე, აი რას ამბობს-თქო წმინდა და ჭეშმარიტი, ვისაც აქვს დავითის გასაღები და ვინც ისე აღებს, რომ ვერავინ დაკეტავს და ისე კეტავს, რომ ვერავინ გააღებს“ (გამოცხადება 3:7).

3. რატომ არის მართებული, იესოს ვუწოდოთ „წმინდა“ და „ჭეშმარიტი“?

³ იოანეს გაგონილი ჰქონდა, როგორ უთხრა პეტრემ დედამიწაზე მყოფ იესო ქრისტეს: „შენა გაქვს მარადიული სიცოცხლის სიტყვები. ჩვენ ვირწმუნეთ და შევიცანით, რომ შენა ხარ ღვთის წმინდა“ (იოანე 6:68, 69). იეჰოვა ღმერთი სიწმინდის განსახიერებაა და მისი მხოლოდშობილი ძეც „წმინდაა“ (გამოცხადება 4:8). იესო „ჭეშმარიტიცაა“. აქ გამოყენებული ბერძნული სიტყვა ალეთინოს უტყუარობაზე მიუთითებს. აქედან გამომდინარე, იესო ჭეშმარიტი სინათლეცაა და ჭეშმარიტი პურიც, რომელიც ზეციდან ჩამოვიდა (იოანე 1:9; 6:32). ის არის ჭეშმარიტი ვაზიც (იოანე 15:1). იესო იმ გაგებითაც არის ჭეშმარიტი, რომ სანდოა. ის ყოველთვის ჭეშმარიტებას ლაპარაკობს (იხილეთ იოანეს 8:14, 17, 26). ღვთის ძე ნამდვილად ღირსია, იყოს მეფე და მოსამართლე (გამოცხადება 19:11, 16).

„დავითის გასაღები“

4, 5. რა შეთანხმებას უკავშირდებოდა „დავითის გასაღები“?

⁴ იესოს „დავითის გასაღები“ აქვს, რომლითაც „ისე აღებს, რომ ვერავინ დაკეტავს და ისე კეტავს, რომ ვერავინ გააღებს“. რა არის „დავითის გასაღები“?

⁵ იეჰოვამ ისრაელის მეფე დავითთან დადო შეთანხმება მარადიულ სამეფოზე (ფსალმუნი 89:1—4, 34—37). ძვ. წ. 1070 წლიდან ძვ. წ. 607 წლამდე მეფობდნენ დავითი და მისი შთამომავლობები და იეჰოვას ტახტზე ისხდნენ იერუსალიმში. მაგრამ მოგვიანებით, როდესაც ამ სამეფოში ბოროტებამ მოიკიდა ფეხი, ღმერთმა განაჩენი გამოუტანა ისრაელებს და დასაჯა ისინი. ასე დაიწყო იეჰოვამ ეზეკიელის 21:27-ში ჩაწერილი თავისი წინასწარმეტყველების შესრულება: „ნანგრევებად, ნანგრევებად, ნანგრევებად ვაქცევ მას [მიწიერ იერუსალიმს]! არავისი არ იქნება ის [დავითის სამეფო ხაზის კვერთხი], სანამ არ მოვა კანონით უფლებამოსილი, — მას გადავცემ“.

6, 7. როდის და როგორ გამოჩნდებოდა „კანონით უფლებამოსილი“?

⁶ როდის და როგორ გამოჩნდა „კანონით უფლებამოსილი“? როგორ მიეცემა მას დავითის კვერთხი?

⁷ დაახლოებით 600 წლის შემდეგ მეფე დავითის შთამომავალი იუდეველი ქალწული მარიამი წმინდა სულით დაორსულდა. ღმერთმა ანგელოზი გაბრიელის მეშვეობით მარიამს შეატყობინა, რომ ეყოლებოდა ვაჟი, რომელსაც იესოს დაარქმევდნენ. გაბრიელმა თქვა: „ის დიდი იქნება და უზენაესის ძე დაერქმევა. იეჰოვა ღმერთი მას დავითის, მამამისის ტახტს მისცემს და ის მარადიულად იმეფებს იაკობის სახლზე. მის სამეფოს ბოლო არ ექნება“ (ლუკა 1:31—33).

8. როგორ დაამტკიცა იესომ, რომ დავითის ტახტის ღირსეული მემკვიდრე იქნებოდა?

⁸ ახ. წ. 29 წელს იესო მდინარე იორდანეში მოინათლა და მასზე წმინდა სული გადმოვიდა. მაშინ ცხო ღმერთმა იგი, როგორც მომავალი მეფე დავითის ხაზიდან. ის სამეფოს შესახებ სასიხარულო ცნობას სამაგალითო გულმოდგინებით ქადაგებდა, რისი კეთებაც თავის მოწაფეებსაც დაავალა (მათე 4:23; 10:7, 11). იესომ თავი დაიმდაბლა და წამების ძელზეც კი მოკვდა, რითაც დაამტკიცა, რომ დავითის ტახტის ღირსეული მემკვიდრე იქნებოდა. იეჰოვამ იესო მკვდრეთით აღადგინა, როგორც უკვდავი სული, აღამაღლა და ზეცაში თავის მარჯვნივ დასვა; დანიშნულ დროს კი იესო თავისი უფლებით ისარგებლებდა, რათა ‘ებატონა თავის მტრებს შორის’ (ფსალმუნი 110:1, 2; ფილიპელები 2:8, 9; ებრაელები 10:13, 14).

9. როგორ გააღებდა და როგორ დაკეტავდა კარს იესო დავითის გასაღებით?

⁹ იესო გამეფებამდე დაიწყებდა დავითის გასაღების გამოყენებას და ღვთის სამეფოს კარს გახსნიდა. იეჰოვა იესოს მეშვეობით გაათავისუფლებდა დედამიწაზე მცხოვრებ ცხებულ ქრისტიანებს „სიბნელის ძალაუფლებისგან“ და „თავისი საყვარელი ძის სამეფოში“ გადაიყვანდა (კოლოსელები 1:13, 14). იესო გასაღებს იმისთვისაც გამოიყენებდა, რომ ორგულთათვის კარი დაეკეტა (2 ტიმოთე 2:12, 13). რაკი იესოს, დავითის ტახტის უცვლელ მემკვიდრეს, იეჰოვა უჭერს მხარს, ვერავინ შეუშლის ხელს თავისი საქმის შესრულებაში (შეადარეთ მათეს 28:18—20).

10. როგორ ამხნევებს იესო ფილადელფიის კრებას?

¹⁰ ძალაუფლების მქონე იესოს სიტყვები ფილადელფიელი ქრისტიანებისთვის განსაკუთრებით გამამხნევებელი იქნებოდა. იესო მათ აქებს: „ვიცი შენი საქმეები (აი, დავდგი შენ წინაშე ღია კარი, რომელსაც ვერავინ დაკეტავს), რომ გაქვს გარკვეული ძალა, დაიცავი ჩემი სიტყვა და არ უარყავი ჩემი სახელი“ (გამოცხადება 3:8). ეს კრება აქტიურია და მისთვის მსახურების კარიც ფართოდ არის ღია (შეადარეთ 1 კორინთელების 16:9; 2 კორინთელების 2:12). ამიტომ მოუწოდებს იესო კრებას, რომ სრულად ისარგებლოს ქადაგების შესაძლებლობით. კრების წევრებმა ბევრი განსაცდელი გადაიტანეს და დაამტკიცეს, რომ ღვთის სულის დახმარებით საკმარისი ძალა ჰქონდათ იეჰოვასთვის მსახურებაში უფრო მეტი „საქმის“ გასაკეთებლად (2 კორინთელები 12:10; ზაქარია 4:6). ისინი დაემორჩილნენ იესოს მითითებებს და არ უარყვეს ქრისტე არც სიტყვით და არც საქმით.

„მდაბლად თაყვანს გცემენ“

11. რა კურთხევას დაჰპირდა იესო ქრისტიანებს და როგორ შესრულდა ეს დანაპირები?

¹¹ იესო ჰპირდება ფილადელფიელ ქრისტიანებს, რომ მათი საქმეები უკვალოდ არ ჩაივლის: „აი, მოგცემ მათ, ვინც სატანის სინაგოგიდან არიან და ამბობენ, იუდეველები ვართო, როცა არ არიან და ცრუობენ. ვაიძულებ, მოვიდნენ და შენს ფეხებთან დაემხონ, რომ მდაბლად თაყვანი გცენ და გავაგებინებ, რომ მე შეგიყვარე“ (გამოცხადება 3:9). შესაძლოა, სმირნელი ქრისტიანების მსგავსად ფილადელფიელ ქრისტიანებსაც უქმნიდნენ პრობლემებს ადგილობრივი იუდეველები, რომლებსაც იესო „სატანის სინაგოგას“ უწოდებს. მიუხედავად ამისა, ზოგიერთი იუდეველი მალე მიხვდა, რომ რასაც ქრისტიანები იესოს შესახებ ქადაგებდნენ, ჭეშმარიტება იყო. როგორც ჩანს, ისინი ‘მდაბლად თაყვანს სცემდნენ’ ქრისტიანებს ისე, როგორც ეს პავლემ აღწერა 1 კორინთელების 14:24, 25-ში. ისინი მოინანიებდნენ, თვითონაც ქრისტიანები გახდებოდნენ და სრულად დააფასებდნენ იესოს უდიდეს სიყვარულს, რომელიც მან თავისი მოწაფეებისთვის საკუთარი სულის გაწირვით გამოხატა (იოანე 15:12, 13).

12. რატომ გააოცებდათ ფილადელფიის იუდეველთა სინაგოგის წევრებს იმის გაგება, რომ ზოგიერთ მათგანს ‘მდაბლად თაყვანი უნდა ეცა’ ქრისტიანებისთვის?

¹² ფილადელფიის იუდეველთა სინაგოგის წევრებს გააოცებდათ იმის გაგება, რომ ზოგიერთ მათგანს ადგილობრივი ქრისტიანებისთვის ‘მდაბლად თაყვანისცემა’ მოუწევდა. თუ გავითვალისწინებთ იმას, რომ კრებაში ბევრი ქრისტიანი არაიუდეველი იყო, ფილადელფიელ იუდეველებს იმედი ექნებოდათ, რომ სრულიად საპირისპირო რამ მოხდებოდა. რატომ? ესაიამ იწინასწარმეტყველა: „[არაიუდეველი] მეფეები გიპატრონებენ [ისრაელის ხალხო] და დედოფლები გეყოლება ძიძებად. პირქვე დამხობილნი მდაბლად თაყვანს გცემენ“ (ესაია 49:23; 45:14; 60:14). მსგავსი რამ ზაქარიამაც იწინასწარმეტყველა: «აი რას ამბობს ლაშქართა ღმერთი იეჰოვა: „იმ დროს ყველა ენის ხალხიდან ათი [არაიუდეველი] კაცი მოეჭიდება იუდეველის კალთას და ეტყვის: თქვენთან ერთად წამოვალთ, რადგან გვსმენია, რომ თქვენთან არისო ღმერთი“ » (ზაქარია 8:23). მართლაც, არაიუდეველებს უნდა ეცათ თაყვანი იუდეველებისთვის და არა პირიქით!

13. რომელ იუდეველებზე შესრულდებოდა ძველ ისრაელზე ნაწინასწარმეტყველები?

¹³ ეს ნაწინასწარმეტყველები სიტყვები მართლაც ღვთის რჩეულ ხალხს ეხებოდა. ამ სიტყვების წარმოთქმისას ამ საპატიო მდგომარეობით მხოლოდ ხორციელი ისრაელი სარგებლობდა, მაგრამ როცა ისრაელმა უარყო მესია, იეჰოვამ ჩამოართვა მათ ეს უპირატესობა (მათე 15:3—9; 21:42, 43; ლუკა 12:32; იოანე 1:10, 11). ძვ. წ. 33 წლის ორმოცდამეათე დღის დღესასწაულზე მან იუდეველების ნაცვლად ღვთის ჭეშმარიტი ისრაელი — ქრისტიანული კრება აირჩია, რომლის წევრებიც გულით წინადაცვეთილი სულიერი იუდეველები იყვნენ (საქმეები 2:1—4, 41, 42; რომაელები 2:28, 29; გალატელები 6:16). მას შემდეგ ხორციელი იუდეველებისთვის იეჰოვასთან ურთიერთობის აღდგენის ერთადერთ საშუალებად იესოსადმი, როგორც მესიისადმი, რწმენის გამოვლენა რჩებოდა (მათე 23:37—39). როგორც ჩანს, ზოგი ფილადელფიელი ასეც მოიქცეოდაa.

14. როგორ სრულდება ესაიას 49:23 და ზაქარიას 8:23 დღეს?

¹⁴ ესაიას 49:23 და ზაქარიას 8:23 ჩვენს დროში დიდი მასშტაბით სრულდება. იოანეს კლასის მიერ შესრულებული სამქადაგებლო საქმიანობის წყალობით უამრავმა ხალხმა ღია კარში შეაბიჯა და სამეფოსთვის მსახურება დაიწყოb. მათგან უმეტესობამ დატოვა ქრისტიანული სამყარო, რომლის მიმდინარეობებსაც სულიერ ისრაელად მოაქვთ თავი (შეადარეთ რომაელების 9:6). ისინი, უამრავი ხალხი, იესოს დაღვრილი სისხლისადმი რწმენით ირეცხავენ და ითეთრებენ სამოსელს (გამოცხადება 7:9, 10, 14). ისინი იმედოვნებენ, რომ ქრისტეს სამეფოს მორჩილებით კურთხევებს მიიღებენ დედამიწაზე. უამრავი ხალხი იესოს ცხებულ ძმებთან მიდის და სულიერი გაგებით ‘მდაბლად თაყვანს სცემს მათ’, რადგან ‘სმენიათ, რომ მათთან არის ღმერთი’. ისინი ემსახურებიან ცხებულებს, რომლებთან ერთადაც მსოფლიო საძმოდ არიან გაერთიანებულნი (მათე 25:34—40; 1 პეტრე 5:9).

„გამოცდის საათი“

15. ა) რას დაჰპირდა იესო ფილადელფიელ ქრისტიანებს და რისკენ მოუწოდა მათ? ბ) რა „გვირგვინის“ მიღებას ელოდებიან ქრისტიანები?

¹⁵ იესო განაგრძობს: „რაკი დაიცავი სიტყვა ჩემი მოთმინების შესახებ, მეც დაგიცავ გამოცდის საათისგან, რომელიც მთელ მსოფლიოზე მოვა, რათა გამოიცადონ დედამიწის მცხოვრებნი. მალე მოვალ. ჩაეჭიდე იმას, რაც გაქვს, რათა არავინ წაგართვას გვირგვინი“ (გამოცხადება 3:10, 11). მართალია იოანეს დროს მცხოვრები ქრისტიანები ვერ მოესწრებოდნენ უფლის დღეს, რომელიც 1914 წელს დაიწყო, მაგრამ რწმენა იმისა, რომ იესო მოვიდოდა, მათ მსახურების გაგრძელების ძალებს მისცემდა (გამოცხადება 1:10; 2 ტიმოთე 4:2). ზეცაში მათ „გვირგვინი“ ანუ მარადიული სიცოცხლის ჯილდო ელოდათ (იაკობი 1:12; გამოცხადება 11:18). თუ ისინი ერთგულებას სიკვდილამდე შეინარჩუნებდნენ, ვეღარავინ წაართმევდა მათ ამ ჯილდოს (გამოცხადება 2:10).

16, 17. ა) რა არის გამოცდის საათი, „რომელიც მთელ მსოფლიოზე მოვა“? ბ) რა მდგომარეობაში იყვნენ ცხებულები „გამოცდის საათის“ დაწყებისას?

¹⁶ რა „გამოცდის საათზეა“ საუბარი? უეჭველია, რომ ამ აზიელ ქრისტიანებს რომის იმპერიისგან საშინელი დევნის ახალ ტალღასთან უწევდათ გამკლავებაc. მაგრამ ეს წინასწარმეტყველება გაცილებით დიდი მასშტაბით სრულდება უფლის დღის დადგომიდან, როდესაც გაცხრილვისა და სასამართლოს საათი დაიწყო, ხოლო 1918 წლიდან მოყოლებული ამ წინასწარმეტყველების შესრულება კულმინაციას აღწევს. გამოცდა გამოავლენს, ვინ დგას ღვთის სამეფოს მხარეს და ვინ — სატანის ქვეყნიერების მხარეს. ეს გამოცდა შედარებით მცირე ხანს — „საათს“ გრძელდება და ჯერ არ დამთავრებულა. ვიდრე ეს დრო არ გასულა, არ უნდა დავივიწყოთ, რომ „გამოცდის საათის“ პერიოდში ვცხოვრობთ (ლუკა 21:34—36).

¹⁷ იოანეს კლასი ანუ ცხებული ქრისტიანები ფილადელფიის ერთგული კრების მსგავსად 1918 წელს შეხვდებოდნენ წინააღმდეგობას დღევანდელი „სატანის სინაგოგისგან“. ქრისტიანული სამყაროს წინამძღოლები, რომლებსაც თავი სულიერ იუდეველებად მოჰქონდათ, ცბიერებით აიძულებდნენ სახელმწიფო მოხელეებს, რომ ქრისტიანები შეევიწროებინათ. მიუხედავად ასეთი წინააღმდეგობისა, ცხებულები ‘იცავდნენ სიტყვას ქრისტეს მოთმინების შესახებ’. სულიერი დახმარების ანუ მნიშვნელოვანი „გარკვეული ძალის“ წყალობით ისინი გადარჩნენ და აღიძრნენ მათ წინაშე გაღებულ კარში შესასვლელად. როგორ?

„ღია კარი“

18. ვინ დანიშნა იესომ 1919 წელს და რა მსგავსება იყო მათსა და ხიზკიას ერთგულ გამგებელს შორის?

¹⁸ იესომ 1919 წელს შეასრულა თავისი დანაპირები და ამოიცნო ჭეშმარიტი ცხებული ქრისტიანების ჯგუფი — „ერთგული და გონიერი მონა“ (მათე 24:45—47). მათ ისეთივე ახალ კარში შეაბიჯეს, როგორშიც — მეფე ხიზკიასd დროს მცხოვრებმა ერთგულმა გამგებელმა ელიაკიმმა. იეჰოვამ ელიაკიმს უთხრა: „მხარზე ჩამოვკიდებ დავითის სახლის გასაღებს და ისე გააღებს, რომ ვერავინ დაკეტავს, და ისე დაკეტავს, რომ ვერავინ გააღებს“. ელიაკიმმა იტვირთა ხიზკიას, დავითის ტახტის შთამომავლის სერიოზული პასუხისმგებლობები. მსგავსად ამისა, დღეს იოანეს კლასს, ცხებულ ქრისტიანებს, მხარზე აქვთ ჩამოკიდებული „დავითის სახლის გასაღები“, ანუ მათ ავალიათ დედამიწაზე მესიის სამეფოს ინტერესების განხორციელება. იეჰოვამ განამტკიცა თავისი ხალხი ამ საპატიო მსახურების შესასრულებლად და მათი „გარკვეული ძალა“ ისე გაზარდა, რომ მთელ მსოფლიოში შესძლებოდათ ქადაგება (ესაია 22:20, 22; 40:29).

19. როგორ გაართვა თავი იოანეს კლასმა იესოს მიერ 1919 წელს დაკისრებულ მოვალეობას, და რა მოჰყვა ამას შედეგად?

¹⁹ ცხებულთა დარჩენილმა ნაწილმა 1919 წლიდან იესოს მაგალითს მიჰბაძა და სამეფოს შესახებ სასიხარულო ცნობის ქადაგებას გულმოდგინედ შეუდგა, რათა ეს ცნობა ყველა ადამიანის ყურამდე მიეწვდინა (მათე 4:17; რომაელები 10:18). შედეგად სატანის დღევანდელი სინაგოგის, ქრისტიანული სამყაროს ზოგიერთი წევრი ცხებულებთან მივიდა, მოინანია, ‘მდაბლად თაყვანი სცა’ და „მონის“ უფლებამოსილება აღიარა; მათაც დაიწყეს იოანეს კლასის ასაკოვან წევრებთან ერთად მსახურება. ასე გრძელდებოდა მანამ, სანამ სრულად არ შეგროვდნენ იესოს ცხებული ძმები. ამის შემდეგ „უამრავი ხალხი. . . ყველა ერიდან“ მივიდა, რათა ‘მდაბლად თაყვანი ეცათ’ ცხებული მონისთვის (გამოცხადება 7:3, 4, 9). მას შემდეგ ცხებულები და უამრავი ხალხი ერთად მსახურობენ, როგორც იეჰოვას მოწმეთა ერთი ფარა.

20. რატომ უნდა ჰქონდეთ იეჰოვას მოწმეებს დღეს განსაკუთრებით ძლიერი რწმენა და რატომ არ უნდა იშურებდნენ ძალ-ღონეს, რომ ღმერთს ემსახურონ?

²⁰ ძმური სიყვარულით გაერთიანებული ფილადელფიელი ქრისტიანების მსგავსად იეჰოვას მოწმეებსაც ესმით, რომ სამქადაგებლო საქმიანობა დაუყოვნებლივ უნდა სრულდებოდეს. მალე დიდი გასაჭირი ბოლოს მოუღებს სატანის ბოროტ ქვეყნიერებას. დაე, იმ დროისთვის თითოეულ ჩვენგანს ჰქონდეს ძლიერი რწმენა და ძალ-ღონეს არ იშურებდეს ღვთის მსახურებისთვის, რათა არ ამოიშალოს ჩვენი სახელები იეჰოვას სიცოცხლის წიგნიდან! (გამოცხადება 7:14). მოდი, სერიოზულად მოვეკიდოთ იესოს მიერ ფილადელფიის კრებისთვის მიცემულ შეგონებას, რათა მტკიცედ ჩავეჭიდოთ მონდობილ მსახურებას და შედეგად მარადიული სიცოცხლე მივიღოთ!

‘მძლეველთა’ კურთხევები

21. როგორ იცავენ დღეს ცხებული ქრისტიანები ‘სიტყვას ქრისტეს მოთმინების შესახებ’ და რა ელის მათ?

²¹ დღეს იოანეს კლასი ‘იცავს სიტყვას ქრისტეს მოთმინების შესახებ’, რაც იმას ნიშნავს, რომ ისინი ჰბაძავენ იესოს და მოთმინებას ავლენენ (ებრაელები 12:2, 3; 1 პეტრე 2:21). მათ ამხნევებს ის სიტყვები, რომლებითაც იესომ ფილადელფიის კრებას მიმართა: „მძლეველს სვეტად ვაქცევ ჩემი ღვთის ტაძარში და ის აღარასოდეს გავა გარეთ“ (გამოცხადება 3:12ა).

22. ა) რა იგულისხმება იესოს ღვთის ტაძარში? ბ) როგორ გახდებიან ცხებული ქრისტიანები სულიერი ტაძრის სვეტები?

²² როგორი პატივია, იყო სვეტი იეჰოვას ტაძარში! ძველად იერუსალიმში იეჰოვას თაყვანისმცემლობის ცენტრი ტაძარი იყო. ამ ტაძარში მღვდელმთავარი წელიწადში ერთხელ სწირავდა მსხვერპლად მიყვანილ ცხოველთა სისხლს წმინდათაწმინდაში სასწაულებრივად მოვლენილი სინათლის წინაშე, რომელიც იეჰოვას იქ ყოფნაზე მიანიშნებდა (ებრაელები 9:1—7). იესოს მონათვლის შემდეგ კი საფუძველი ჩაეყარა იეჰოვას თაყვანისმცემლობისთვის განკუთვნილ ახალ, უფრო დიდ სულიერ ტაძარს. ამ ტაძრის წმინდათაწმინდა ზეცაშია, სადაც იესო ღირსეულად წარდგა „ღვთის სახის წინაშე“ (ებრაელები 9:24). მღვდელმთავარი იესოა და ცოდვების ერთხელ და სამუდამოდ გამოსასყიდი მსხვერპლიც ერთია — სრულყოფილი ადამიანის, იესოს დაღვრილი სისხლი (ებრაელები 7:26, 27; 9:25—28; 10:1—5, 12—14). ვიდრე ერთგულებას ინარჩუნებენ, ცხებული ქრისტიანები ტაძრის მიწიერ ეზოებში მსახურობენ იესოს დამხმარე მღვდლებად (1 პეტრე 2:9). როგორც კი ‘მძლეველები’ გახდებიან, ისინიც შევლენ ზეციერ წმინდათაწმინდაში და თაყვანისცემისთვის განკუთვნილი სულიერი ტაძრის ურყევ სვეტებად იქცევიან (ებრაელები 10:19; გამოცხადება 20:6). მაშინ მათ იქიდან ‘გარეთ გასვლის’ საშიშროება აღარ დაემუქრებათ.

23. ა) კიდევ რას შეჰპირდა იესო ცხებულ მძლეველ ქრისტიანებს? ბ) რას ნიშნავს ის, რომ ქრისტიან ‘მძლეველებს’ იეჰოვასა და ახალი იერუსალიმის სახელი აწერიათ?

²³ იესო განაგრძობს: „დავაწერ მას ჩემი ღვთის სახელს და ჩემი ღვთის ქალაქის სახელს — ახალ იერუსალიმს, რომელიც ზეციდან ჩამოდის ჩემი ღვთისგან, და ჩემს ახალ სახელს“ (გამოცხადება 3:12ბ). ამ ‘მძლეველებს’ აწერიათ იეჰოვას — თავიანთი და იესოს ღვთის — სახელი. ეს ნათლად აჩვენებს, რომ იეჰოვა და იესო ორი სხვადასხვა პიროვნებაა და არა სამპიროვანი ღვთის ანუ სამების ორი ნაწილი (იოანე 14:28; 20:17). საბოლოოდ ყველა ქმნილება იხილავს, რომ ეს ცხებულები იეჰოვას ეკუთვნიან. ისინი მისი მოწმეები არიან. მათ აწერიათ იმ ზეციერი ქალაქის, ახალი იერუსალიმის სახელიც, რომლის ‘ზეციდან დაშვებაც’ სასიკეთო მმართველობის ყველა ერთგულზე გავრცელებას ნიშნავს (გამოცხადება 21:9—14). ამგვარად, მიწიერი იმედის მქონე ყველა ქრისტიანი გაიგებს, რომ ეს ცხებული მძლეველები ღვთის სამეფოს, ზეციერი იერუსალიმის მოქალაქეები არიან (ფსალმუნი 87:5, 6; მათე 25:33, 34; ფილიპელები 3:20; ებრაელები 12:22).

24. რაზე მიუთითებს იესოს ახალი სახელი, და რა გაგებით აწერია ეს სახელი ერთგულ ცხებულ ქრისტიანებს?

²⁴ დაბოლოს, ცხებულ ‘მძლეველებს’ იესოს ახალი სახელიც აწერიათ. ეს მიუთითებს იესოს ახალ მდგომარეობაზე და იეჰოვასგან დაკისრებულ საპატიო მოვალეობებზე (ფილიპელები 2:9—11; გამოცხადება 19:12). სხვას არავის ეცოდინება ეს სახელი, რადგან ეს საპატიო მოვალეობები სხვას არავის დაეკისრება. როდესაც იესო თავის ერთგულ ძმებს თავის სახელს აწერს, ეს იმას ნიშნავს, რომ ისინი იესოსთან ზეციერ სამეფოში განსაკუთრებულ ურთიერთობას ამყარებენ და მას საპატიო მოვალეობების შესრულებაში ეხმარებიან (ლუკა 22:29, 30). ამიტომ, გასაკვირი არ არის, თუ რატომ ამთავრებს იესო თავის მიმართვას შემდეგი მოწოდებით: „ვისაც ყური აქვს, მოისმინოს, რას ეუბნება სული კრებებს“ (გამოცხადება 3:13).

25. რა პრინციპის გამოყენება შეუძლია თითოეულ ქრისტიანს იმ რჩევიდან, რომელიც იესომ ფილადელფიის კრებას მისცა?

²⁵ რა გამამხნევებელი იქნებოდა ეს სიტყვები ფილადელფიელი ერთგული ქრისტიანებისთვის! იოანეს კლასი ახლაც, უფლის დღის განმავლობაში, ბევრს სწავლობს ამ სიტყვებიდან, თუმცა აქ მოცემული პრინციპები მნიშვნელოვანია როგორც ცხებული ქრისტიანებისთვის, ისე სხვა ცხვრებისთვის (იოანე 10:16). მაშ, ფილადელფიელი ქრისტიანების მსგავსად, თითოეულმა ჩვენგანმა გამოვიღოთ „სამეფოს ნაყოფი“. „გარკვეული ძალა“ ყველას გვაქვს. ყველას შეუძლია რაღაცის კეთება იეჰოვასთვის მსახურებაში. ნუ დავზოგავთ ამ ძალას! თუ მოგვეცემა სამეფოსთვის მსახურების გაფართოების საშუალება, ნუ დავაყოვნებთ ჩვენ წინაშე გაღებულ ნებისმიერ კარში შესვლას. შეგვიძლია ვილოცოთ კიდეც, რომ იეჰოვამ ასეთი კარი გაგვიღოს (კოლოსელები 4:2, 3). თუ მივყვებით იესოს სიმტკიცის მაგალითს და დავრჩებით მისი სახელის ერთგულები, ცხადვყოფთ, რომ ყური მზად გვაქვს იმის მოსასმენად, რასაც ღვთის წმინდა სული ეუბნება კრებებს.

[სქოლიოები]

დახმარება მდაბლად თაყვანისსაცემად

144 000 ცხებულიდან, რომლებიც ზეციერ სამეფოს დაიმკვიდრებენ, დარჩენილ ნაწილს ანუ იოანეს კლასს, რომლის წევრთა რიცხვიც 9000-მდეა, ჯერ კიდევ დასასრულებელი აქვს მიწიერი ცხოვრების გზა. იმავდროულად, უამრავი ხალხის რაოდენობამ 6 600 000-ს გადააჭარბა (გამოცხადება 7:4, 9). რამ გამოიწვია ეს არნახული ზრდა? ამაში დიდი წვლილი შეიტანა იეჰოვას მოწმეების მიერ დაარსებულმა სხვადასხვა სკოლამ. ქრისტიანული სამყაროს სემინარიებისგან განსხვავებით, რომლებიც ქვეყნიურ ფილოსოფიას ასწავლიან და ბიბლიის მნიშვნელობას ამცირებენ, იეჰოვას მოწმეთა ეს სკოლები ღვთის მსახურებს ღვთის სიტყვისადმი რწმენას უმტკიცებს, რასაც ისინი ზნეობრივი ცხოვრებითა და ღვთისადმი ერთგული მსახურებით ცხადყოფენ. 1943 წლიდან მთელ მსოფლიოში იეჰოვას მოწმეთა ყველა კრება სამეფო დარბაზში „თეოკრატიული სამსახურის სკოლას“ ატარებს. ყოველკვირეულად მილიონობით ადამიანი ესწრება ამ სკოლას და ერთიან საგანმანათლებლო ბიბლიურ პროგრამას მიჰყვება.

1959 წლიდან იეჰოვას მოწმეებმა დააარსეს „სამეფო მსახურების სკოლა“ კრების უხუცესებისა და მომსახურეების დასახმარებლად. 1977 წლიდან კი ტარდება „პიონერული მსახურების სკოლა“. ეს სკოლა ასობით ათასმა და-ძმამ გაიარა. ისინი ფილადელფიელი ქრისტიანების მსგავს სულს ავლენენ, იეჰოვას სრული დროით ემსახურებიან და ქადაგებენ. 1987 წელს დაარსდა „მსახურებაში დახელოვნების სკოლა“, რაც იეჰოვას მოწმეებს, მხოლოდ მამაკაცებს, განსაკუთრებული მსახურებისთვის ამზადებს.

იეჰოვას მოწმეთა მიერ დაარსებულ სკოლებს შორის გამორჩეულია „საგუშაგო კოშკის ბიბლიური სკოლა გალაადი“. 1943 წლიდან მისიონერთა სკოლას, რომელიც ნიუ-იორკშია, ყოველწლიურად ორი კლასი ამთავრებს. სულ იეჰოვას 7000-ზე მეტ მსახურს აქვს გავლილი ეს კურსი საზღვარგარეთ მისიონერად მსახურებისთვის. ამ სკოლის კურსდამთავრებულები ასზე მეტ ქვეყანაში მსახურობენ; ბევრ ქვეყანაში ისინი პირველები იყვნენ სამეფოს შესახებ მქადაგებელთა შორის. მას შემდეგ დაახლოებით 60 წელი გავიდა და რამდენიმე პირველი კურსდამთავრებული ჯერ კიდევ მისიონერად მსახურობს; ახალ მისიონერებთან ერთად ისინი ძალ-ღონეს არ იშურებენ მთელ მსოფლიოში იეჰოვას ორგანიზაციის საქმიანობის გასაფართოებლად. მართალაც გრანდიოზულია ეს საქმე!

[ცხრილი 64 გვერდზე]

1919 წელს მეფე იესო ქრისტემ თავის მიმდევრებს მსახურების კარი გაუღო. ამ გაღებულ კარში სულ უფრო და უფრო მეტი ერთგული ქრისტიანი შედის.

ქადაგება

1918 14 3 868 591

1928 32 23 988 1 883

1938 52 47 143 4 112

1948 96 230 532 8 994

1958 175 717 088 23 772

1968 200 1 155 826 63 871

1978 205 2 086 698 115 389

1988 212 3 430 926 455 561

1998 233 5 544 059 698 781

2005 235 6 390 022 843 234

[სქოლიოები]

[ცხრილი 65 გვერდზე]

იეჰოვას მოწმეები მთელი გულით მსახურობენ. თვალი გადავავლოთ ქადაგებისა და სწავლების საქმისთვის დათმობილი დროის ანგარიშს და ვნახოთ ბიბლიის რამდენი უფასო საშინაო შესწავლა ჩატარდა.

1918 19 116 უცნობია

1928 2 866 164 უცნობია

1938 10 572 086 უცნობია

1948 49 832 205 130 281

1958 110 390 944 508 320

1968 208 666 762 977 503

1978 307 272 262 1 257 084

1988 785 521 697 3 237 160

1998 1 186 666 708 4 302 852

2005 1 278 235 504 6 061 534

თავი 13

იყიდე ცეცხლით გაწმენდილი ოქრო

ლაოდიკეა

1, 2. რომელ ქალაქში მდებარეობდა შვიდიდან ბოლო კრება, რომელსაც განდიდებულმა იესომ მიმართა, და რითი გამოირჩეოდა ეს ქალაქი?

ლაოდიკეის კრება ბოლოა იმ შვიდი კრებიდან, რომელსაც მკვდრეთით აღმდგარმა იესომ დამაფიქრებელი და მოქმედებისკენ აღმძვრელი სიტყვებით მიმართა.

² დღეს ლაოდიკეის ნანგრევების ნახვა ალაშეჰირიდან სამხრეთ-აღმოსავლეთით 90 კილომეტრის მოშორებით დენიზლის მახლობლად შეიძლება. I საუკუნეში ლაოდიკეა აყვავებული ქალაქი იყო. ამ ქალაქზე მთავარი სავაჭრო გზა გადიოდა და ქალაქი სავაჭრო-საფინანსო ცენტრად ითვლებოდა. ლაოდიკეისთვის ძირითადი შემოსავალი კარგად ცნობილი თვალის მალამოთი ვაჭრობას მოჰქონდა. ქალაქს შავი შალის ძვირფასი ტანსაცმლის წარმოებითაც ჰქონდა სახელი განთქმული. ლაოდიკეის მთავარი პრობლემა უწყლოობა იყო, რაც შორი ცხელი წყაროებიდან არხების გამოყვანით გადაიჭრა, თუმცა ქალაქამდე მოსული წყალი უკვე ნელთბილი იყო.

3. რა სიტყვებით იწყებს იესო ლაოდიკეის კრებისადმი მიმართვას?

³ ლაოდიკეა კოლოსეს მახლობლად მდებარეობდა. კოლოსელებისთვის მიწერილ წერილში მოციქულმა პავლემ ლაოდიკეელთათვის მიწერილი წერილიც მოიხსენია (კოლოსელები 4:15, 16). ჩვენ არ ვიცით, რას წერდა ის ამ წერილში, მაგრამ ლაოდიკეელებისადმი იესოს მიმართვიდან ჩანს, რომ მათი სულიერი მდგომარეობა სავალალო იყო. წინა მიმართვების მსგავსად იესო ამ მიმართვასაც თავის მდგომარეობის ხაზგასმით იწყებს: „ლაოდიკეის კრების ანგელოზს მისწერე, აი რას ამბობს-თქო ამინი, ერთგული და ჭეშმარიტი მოწმე, ღვთის შემოქმედების დასაწყისი“ (გამოცხადება 3:14).

4. რა გაგებით არის იესო „ამინი“?

⁴ რატომ უწოდებს იესო საკუთარ თავს „ამინს“? ეს წოდება მის სიტყვებს წონას მატებს. „ამინ“ ებრაული სიტყვის ტრანსლიტერაციაა და ნიშნავს „ნამდვილად“, „იყოს ასე“, რაც იმის ნიშნად წარმოითქმება, რომ ვეთანხმებით ლოცვაში გამოხატულ აზრებს (1 კორინთელები 14:16). იესო იმიტომაა „ამინი“, რომ მისი უმწიკვლობა და სიცოცხლის მსხვერპლად გაღება იეჰოვას ძვირფასი დაპირებების შესრულების დასტურია (2 კორინთელები 1:20). აი რატომ აღვავლენთ იეჰოვასადმი ყველა ლოცვას იესოს მეშვეობით (იოანე 15:16; 16:23, 24).

5. რა გაგებით არის იესო „ერთგული და ჭეშმარიტი მოწმე“?

⁵ იესო არის „ერთგული და ჭეშმარიტი მოწმეც“. წინასწარმეტყველებაში ის ხშირად მოიხსენიება, როგორც ერთგული, ჭეშმარიტი და მართალი, რადგან ის, როგორც იეჰოვა ღმერთის მსახური, სრულიად სანდოა (ფსალმუნი 45:4; ესაია 11:4, 5; გამოცხადება 1:5; 19:11). ის იეჰოვას უდიდესი მოწმეა. იესო „ღვთის შემოქმედების დასაწყისი“ იყო და ოდითგანვე აცხადებდა იეჰოვას დიდებას (იგავები 8:22—30). დედამიწაზე ყოფნისას იესო ჭეშმარიტებას ამოწმებდა (იოანე 18:36, 37; 1 ტიმოთე 6:13). მკვდრეთით აღდგომის შემდეგ კი თავის მოწაფეებს წმინდა სულს დაჰპირდა და უთხრა: „იქნებით ჩემი მოწმეები იერუსალიმში, მთელ იუდეასა და სამარიაში და დედამიწის კიდით კიდემდე“. ახ. წ. 33 წლის ორმოცდამეათე დღის დღესასწაულის შემდეგ იესო ცხებულ ქრისტიანებს ხელმძღვანელობდა, რომ „ყველა ქმნილებას ცისქვეშეთში“ მოესმინა სასიხარულო ცნობა (საქმეები 1:6—8; კოლოსელები 1:23). იესოს მართლაც დამსახურებულად ეწოდება ერთგული და ჭეშმარიტი მოწმე, რომლის სიტყვებიც სასიკეთო გავლენას მოახდენდა ლაოდიკეელ ცხებულ ქრისტიანებზე.

6. ა) როგორ აღწერა იესომ ლაოდიკეის კრების სულიერი მდგომარეობა? ბ) რაში ვერ მიჰბაძეს იესოს ლაოდიკეელმა ქრისტიანებმა?

⁶ რას ეუბნება იესო ლაოდიკეელებს? ის არ აქებს მათ, უბრალოდ, გულწრფელად ეუბნება: „ვიცი შენი საქმეები, რომ არც ცივი ხარ და არც ცხელი. ნეტავ ან ცივი იყო, ან ცხელი! რაკი ნელთბილი ხარ, არც ცხელი ხარ და არც ცივი, ამოგანთხევ ჩემი პირიდან“ (გამოცხადება 3:15, 16). თქვენ როგორ გამოეხმაურებოდით უფალ იესო ქრისტეს ასეთ სიტყვებს? განა არ მოუხმობდით გონიერებას და არ შეამოწმებდით საკუთარ თავს? ლაოდიკეელებს გონიერებისთვის უნდა მოეხმოთ, რადგან სულიერად მოიკოჭლებდნენ და, როგორც ჩანს, ბევრ რამეს სათანადოდ ვერ აფასებდნენ (შეადარეთ 2 კორინთელების 6:1). იესო, რომლისთვისაც ლაოდიკეელ ქრისტიანებს უნდა მიებაძათ, იეჰოვასა და მისი მსახურებისადმი ყოველთვის დიდ გულმოდგინებას ავლენდა (იოანე 2:17). თვინიერები ხედავდნენ, რომ ის სათნო და რბილი ხასიათის ადამიანი იყო; ხალხზე იესო ისე მოქმედებდა, როგორც ცივი წყალი პაპანაქება სიცხეში (მათე 11:28, 29). მაგრამ ლაოდიკეელი ქრისტიანები არც ცხელები იყვნენ და არც ცივები. ქალაქში შეყვანილი წყლის მსგავსად ნელთბილები იყვნენ და იესოსგან უარყოფას და ‘პირიდან ამონთხევას’ იმსახურებდნენ. მოდი, ჩვენ ყოველთვის გულმოდგინედ ვეცადოთ, რომ სულიერად გამოვაცოცხლოთ სხვები (მათე 9:35—38).

„ამბობ, მდიდარი ვარ“

7. ა) იესოს სიტყვების თანახმად რატომ იყვნენ ლაოდიკეელი ქრისტიანები სავალალო მდგომარეობაში? ბ) რატომ ამბობს იესო, რომ ლაოდიკეელი ქრისტიანები ‘ბრმები და შიშვლები’ არიან?

⁷ რამ ჩაყარა ლაოდიკეელები ამ სავალალო მდგომარეობაში? ამას იესოს შემდეგი სიტყვებიდან ვიგებთ: „რაკი ამბობ, მდიდარი ვარ, გავმდიდრდი და არაფერი მჭირდებაო, ის კი არ იცი, რომ საწყალი, საცოდავი, ღარიბი, ბრმა და შიშველი ხარ“ (გამოცხადება 3:17; შეადარეთ ლუკას 12:16—21). მდიდარ ქალაქში მცხოვრები ლაოდიკეელები სიმდიდრეზე იყვნენ დაიმედებულნი. როგორც ჩანს, ისინი დიდ მნიშვნელობას ანიჭებდნენ სტადიონზე, თეატრებსა და სპორტულ სკოლებში სიარულს, რის გამოც „უფრო სიამოვნებათა მოყვარულები“ გახდნენ, „ვიდრე ღვთისა“a (2 ტიმოთე 3:4). მდიდარი ლაოდიკეელები სულიერად გაღატაკდნენ. მათ ძალიან ცოტა ‘განძი ჰქონდათ მოგროვილი ზეცაში’, თუ საერთოდ ჰქონდათ (მათე 6:19—21). მათი თვალი არ იყო სუფთა და ღვთის სამეფოს პირველ ადგილზე ვერ აყენებდნენ. ისინი სრულ სიბნელეში დადიოდნენ, ბრმები იყვნენ და არანაირი სულიერი ხედვა არ ჰქონდათ (მათე 6:22, 23, 33). მიუხედავად იმისა, რომ სიმდიდრის წყალობით ძვირფასი ტანსაცმლით იმოსებოდნენ, იესოს თვალში შიშვლები იყვნენ. მათ არ ჰქონდათ ქრისტიანისთვის შესაფერისი სულიერი ტანსაცმელი (შეადარეთ გამოცხადების 16:15).

8. ა) რითი ჰგავს ლაოდიკეაში არსებული მდგომარეობა დღევანდელ მდგომარეობას? ბ) როგორ იტყუებს ზოგიერთი ქრისტიანი თავს სიმდიდრეს დახარბებულ ქვეყნიერებაში?

⁸ მართლაც შემაძრწუნებელი მდგომარეობაა! განა ჩვენს დროშიც ხშირად არ ვხედავთ იმავეს?! რა არის ამის მიზეზი? თავდაჯერებულობა, რომელიც სიმდიდრესა და ადამიანის შესაძლებლობებზე დაიმედებას მოჰყვება. ქრისტიანული სამყაროს მრევლის მსგავსად იეჰოვას მოწმეთაგან ზოგიერთი თავს იტყუებს და ფიქრობს, რომ ღმერთს მაშინაც ასიამოვნებს, თუ დროდადრო დაესწრება კრების შეხვედრებს. ისინი მოჩვენებითი „სიტყვის შემსრულებელნი“ არიან და ასე ცდილობენ ფონს გასვლას (იაკობი 1:22). იოანეს კლასის არაერთი გაფრთხილების მიუხედავად ისინი ვერ ელევიან მოდურ ტანსაცმელს, თანამედროვე მანქანებს, სახლებს, გართობასა და სიამოვნებას (1 ტიმოთე 6:9, 10; 1 იოანე 2:15—17). ყველაფერი ეს მათ სულიერად აძინებს (ებრაელები 5:11, 12). ისინი „ნელთბილები“ კი არ უნდა იყვნენ, არამედ ‘სული უნდა აინთონ’ და დიდი გულმოდგინებით უნდა ‘იქადაგონ სიტყვა’ (1 თესალონიკელები 5:19; 2 ტიმოთე 4:2, 5).

9. ა) იესოს რომელი სიტყვები მოიყვანდა გონზე „ნელთბილ“ ქრისტიანებს და როგორ? ბ) როგორ შეუძლია კრებას, დაეხმაროს გზააბნეულ „ცხვარს“?

⁹ როგორ მოეპყრო იესო „ნელთბილ“ ქრისტიანებს? მის პირდაპირობას ისინი გონზე უნდა მოეყვანა: „ის კი არ იცი, რომ საწყალი, საცოდავი, ღარიბი, ბრმა და შიშველი ხარ“. მათ იმდენად გაუხეშებული ჰქონდათ სინდისი, რომ ვერც კი აღიქვამდნენ თავიანთ სავალალო მდგომარეობას (შეადარეთ იგავების 16:2; 21:2). ასეთ სავალალო მდგომარეობაზე თვალის დახუჭვა გაუმართლებელი იქნება. თუ უხუცესები და მათი დანიშნული მსახურები გზააბნეულ „ცხვარს“ გულმოდგინე მსახურების მაგალითს მისცემენ და სიყვარულით დამწყემსავენ, შეიძლება გამოაღვიძონ ისინი და დაუბრუნონ სიხარული, რომელიც მათთვის მთელი გულით მსახურებას მოჰქონდა (ლუკა 15:3—7).

რჩევა ‘გამდიდრებისთვის’

10. რა ოქროს ყიდვას სთავაზობდა იესო ლაოდიკეელ ქრისტიანებს?

¹⁰ არსებობდა გამოსავალი სავალალო მდგომარეობაში ჩავარდნილი ლაოდიკეელი ქრისტიანებისთვის? არსებობდა, თუ ისინი იესოს რჩევას გაითვალისწინებდნენ: „გირჩევ, იყიდო ჩემგან ცეცხლით გაწმენდილი ოქრო, რათა გამდიდრდე“ (გამოცხადება 3:18ა). მათ ღვთის თვალში გაამდიდრებდათ ქრისტიანული „ოქრო“, რომელიც ცეცხლითაა განწმენდილი ყოველგვარი მინარევებისგან (ლუკა 12:21). სად უნდა შეეძინათ მათ ასეთი ოქრო? არა ადგილობრივი ვაჭრებისგან, არამედ იესოსგან! მოციქულმა პავლემ ახსნა, რა იგულისხმება ამ ოქროში, როდესაც ტიმოთეს შეძლებული ქრისტიანებისთვის მითითებების მიცემა დაავალა: „აკეთონ სიკეთე, გამდიდრდნენ კარგი საქმეებით, იყვნენ გულუხვები და გამზიარებლები, მოაგროვონ განძი, რომელსაც საფრთხე არ ემუქრება — კარგი საძირკველი მომავლისთვის“. მხოლოდ ასე შეეძლოთ მათ ‘მტკიცედ ჩაჭიდებოდნენ ჭეშმარიტ სიცოცხლეს’ (1 ტიმოთე 6:17—19). მატერიალურად უზრუნველყოფილი ლაოდიკეელები პავლეს რჩევას უნდა გამოხმაურებოდნენ და სულიერად გამდიდრებულიყვნენ (იხილეთ აგრეთვე იგავების 3:13—18).

11. ვინ ყიდულობდა ჩვენს დროში „ცეცხლით გაწმენდილ ოქროს“?

¹¹ არსებობს დღეს „ცეცხლით გაწმენდილი ოქროს“ ყიდვის მაგალითები? რა თქმა უნდა, არსებობს! ჯერ კიდევ უფლის დღის დადგომამდე ბიბლიის მკვლევართა პატარა ჯგუფმა დაინახა, რომ ქრისტიანული სამყარო ბევრ ბაბილონურ ცრუ მოძღვრებას ასწავლიდა, მაგალითად სამების, სულის უკვდავების, ჯოჯოხეთის ცეცხლოვანი სატანჯველის, ჩვილთა ნათლობისა და გამოსახულებათა (როგორც ჯვრის, ისე მარიამის) თაყვანისცემის შესახებ. ერთგული ქრისტიანები ბიბლიური ჭეშმარიტების დასაცავად ქადაგებდნენ, რომ იეჰოვას სამეფო იყო კაცობრიობის ერთადერთი იმედი, ხოლო იესოს გამომსყიდველური მსხვერპლი — გადარჩენის საფუძველი. 1914 წლამდე თითქმის 40 წლით ადრე ისინი ამბობდნენ, რომ ბიბლიური წინასწარმეტყველების თანახმად სწორედ ამ წელს დასრულდებოდა უცხოტომელთათვის დანიშნული დროები, რასაც დედამიწაზე მოვლენების საოცარი განვითარება მოჰყვებოდა (გამოცხადება 1:10).

12. პირველად ვინ ხელმძღვანელობდა იმ ქრისტიანებს, რომლებიც სულიერად იღვიძებდნენ, და ზეცაში განძის დაგროვების რა ბრწყინვალე მაგალითი დაგვიტოვა მან?

¹² სულიერად გამოღვიძებულ ქრისტიანებს ჩარლზ ტეიზ რასელი ხელმძღვანელობდა. მან XIX საუკუნის 70-იან წლებში ალეგანში (ახლა პიტსბურგის ნაწილი, პენსილვანია, აშშ) ბიბლიის მკვლევართა ჯგუფი ჩამოაყალიბა. როდესაც რასელმა ჭეშმარიტების ძიება დაიწყო, ის მამამისთან ერთად ბიზნესში იყო ჩაბმული და შეეძლო მილიონერი გამხდარიყო, მაგრამ გაყიდა მაღაზიათა ქსელი და აღებული თანხა ღვთის სამეფოს შესახებ მსოფლიო სამქადაგებლო საქმეს მოახმარა. 1884 წელს ჩარლზ რასელი გახდა იმ კორპორაციის პირველი პრეზიდენტი, რომელსაც დღეს „პენსილვანიის საგუშაგო კოშკის, ბიბლიისა და ტრაქტატების საზოგადოება“ ჰქვია. 1916 წელს მისიონერული მოგზაურობის შემდეგ შეერთებული შტატების დასავლეთიდან დაბრუნებისას ნიუ-იორკში მატარებლით მიმავალი რასელი პამპის (ტეხასის შტატი) მახლობლად გარდაიცვალა. მან სულიერი განძის ზეცაში დაგროვების ბრწყინვალე მაგალითი დაგვიტოვა, რომელსაც ასობით ათასი თავდაუზოგავი პიონერი ჰბაძავს (ებრაელები 13:7; ლუკა 12:33, 34; შეადარეთ 1 კორინთელების 9:16; 11:1).

სულიერი თვალის მალამო

13. ა) როგორ განკურნავდა ლაოდიკეელებს სულიერი თვალის მალამო? ბ) როგორი ტანსაცმლის ყიდვას ურჩევდა იესო მათ და რატომ?

¹³ იესომ მკაცრად შეაგონა ლაოდიკეელები: „გირჩევ, იყიდო. . . თეთრი ტანსაცმელი, რათა ჩაიცვა და არ გამოჩნდეს შენი სამარცხვინო სიშიშვლე, და თვალის მალამო, თვალებში რომ შეიზილო და დაინახო“ (გამოცხადება 3:18ბ). სულიერი სიბრმავისგან განსაკურნებლად მათ თვალის მალამო მხოლოდ იესოსგან უნდა ეყიდათ, და არა იქაური მკურნალებისგან. ეს მათ სულიერ ხედვას დაუბრუნებდა, ‘მართალთა ბილიკზე’ სიარულში დაეხმარებოდა, და ისინი გაბრწყინებულ მზერას ღვთის ნების შესრულებისკენ მიაპყრობდნენ (იგავები 4:18, 25—27). ამგვარად, ისინი შეიმოსებოდნენ არა ლაოდიკეაში დამზადებული შავი შალის ძვირფასი ტანსაცმლით, არამედ საუკეთესო „თეთრი ტანსაცმლით“, რაც იმის მიმანიშნებელი იქნებოდა, რომ მათ ჰქონდათ პატივი, იესო ქრისტეს მიმდევრებად წოდებულიყვნენ (შეადარეთ 1 ტიმოთეს 2:9, 10; 1 პეტრეს 3:3—5).

14. ა) რა სულიერი თვალის მალამოა ხელმისაწვდომი 1879 წლიდან? ბ) ძირითადად ვინ უჭერს მხარს ფინანსურად იეჰოვას მოწმეებს? გ) სხვებისგან განსხვავებით როგორ იყენებენ იეჰოვას მოწმეები შესაწირავებს?

¹⁴ დღესაც შესაძლებელია სულიერი თვალის მალამოს შეძენა? რა თქმა უნდა! 1879 წელს რასელმა, რომელსაც სიყვარულით პასტორს ეძახდნენ, ჭეშმარიტების დასაცავად დაიწყო ჟურნალის გამოცემა, რომელიც დღეს ცნობილია სახელწოდებით — „საგუშაგო კოშკი იუწყება იეჰოვას სამეფოს შესახებ“. ამ ჟურნალის მეორე ნომერში მან აღნიშნა: «ჩვენ გვჯერა, რომ [ეს ჟურნალი] იეჰოვას მხარდაჭერით გამოდის, ამიტომ არასდროს ვთხოვთ ადამიანებს დახმარებას, რადგან, თუ მან, ვინც თქვა — ‘ჩემია მთის ოქრო და ვერცხლი’, შეგვიწყვიტა ფინანსური მხარდაჭერა, დროებით უნდა შევაჩეროთ ამ ჟურნალის გამოცემა». ზოგიერთი ტელეევანგელისტი არნახულ სიმდიდრეს აგროვებს და უსირცხვილო (და ზოგჯერ უზნეო) განცხრომაში ცხოვრობს (გამოცხადება 18:3). მათგან განსხვავებით ბიბლიის მკვლევარები, რომელთაც დღეს იეჰოვას მოწმეები ეწოდებათ, ნებაყოფლობით შესაწირავებს სრულად ახმარენ მთელ მსოფლიოში იეჰოვას მოახლოებული სამეფოს შესახებ ქადაგებას. იოანეს კლასის ხელმძღვანელობით დღემდე გამოიცემა ჟურნალები „საგუშაგო კოშკი“ და „გამოიღვიძეთ!“, რომელთა საერთო ტირაჟმა 2006 წელს 59 მილიონს გადააჭარბა. „საგუშაგო კოშკი“ 150 ენაზე გამოდის. ეს არის ექვს მილიონზე მეტი ქრისტიანისგან შემდგარი კრების ძირითადი სახელმძღვანელო — სულიერი თვალის მალამო, რომელიც ცრუ რელიგიის ნამდვილ სახეს წარმოაჩენს და ქრისტიანებს ყველა ერისთვის სასიხარულო ცნობის გადაუდებლად ქადაგების აუცილებლობას შეახსენებს (მარკოზი 13:10).

შეგონება და აღზრდა

15. რატომ აძლევდა იესო ლაოდიკეელ ქრისტიანებს მკაცრ რჩევას და როგორ უნდა გამოხმაურებოდა კრება?

¹⁵ დავუბრუნდეთ ლაოდიკეელებს. როგორ გამოეხმაურებოდნენ ისინი იესოს მკაცრ რჩევას? უნდა გაეტეხათ გული და ეფიქრათ, რომ იესო მათ თავის მიმდევრებად აღარ თვლიდა? არა, ეს სულაც არ არის ასე. მიმართვაში ნათქვამია: „ყველას, ვინც მიყვარს, შევაგონებ და აღვზრდი. ამიტომ იყავი მოშურნე და მოინანიე“ (გამოცხადება 3:19). როგორც იეჰოვასგან, ისე იესოსგან აღზრდა სიყვარულის მაჩვენებელია (ებრაელები 12:4—7). ლაოდიკეის კრება უნდა გამოხმაურებოდა იესოს მზრუნველობას და უნდა მიეღო მისგან რჩევა. მათ უნდა მოენანიებინათ და ეღიარებინათ, რომ „ნელთბილი“ მდგომარეობა ცოდვის ჩადენის ტოლფასი იყო (ებრაელები 3:12, 13; იაკობი 4:17). ლაოდიკეელ უხუცესებს თავი უნდა დაენებებინათ სიმდიდრის მოხვეჭისთვის და ღვთისგან ბოძებული ძღვენი ‘ცეცხლივით უნდა აეგიზგიზებინათ’. დაე, სულიერი თვალის მალამომ, როგორც მთის ცივმა ნაკადულმა, კრების ყველა წევრს განუახლოს ძალები! (2 ტიმოთე 1:6; იგავები 3:5—8; ლუკა 21:34).

16. ა) როგორ ავლენს იესო სიყვარულსა და სითბოს? ბ) როგორ უნდა მოვიქცეთ, თუ მკაცრი რჩევა გვეძლევა?

¹⁶ რა შეიძლება ითქვას ჩვენზე? იესოს კვლავ ‘უყვარს თავისები, რომლებიც ქვეყნიერებაში არიან’ და ეყვარება „ქვეყნიერების აღსასრულამდე“ (იოანე 13:1; მათე 28:20). იესო ქრისტიანულ კრებაში სიყვარულსა და სითბოს თანამედროვე იოანეს კლასისა და ვარსკვლავების ანუ უხუცესების მეშვეობით ავლენს (გამოცხადება 1:20). დღეს, ძნელბედობის ჟამს, უხუცესები თავს არ ზოგავენ თითოეული ჩვენგანის, ახალგაზრდისა თუ ხანდაზმულის დასახმარებლად, რომ მტკიცედ ჩავეჭიდოთ თეოკრატიას, არ განვივითაროთ დამოუკიდებლობის სული და სიხარბე და არ ვიცხოვროთ ქვეყნიერებისთვის დამახასიათებელი უწმინდურებით. თუ მკაცრი რჩევა ან შეგონება გვეძლევა, გვახსოვდეს, რომ ‘შეგონება და დარიგება სიცოცხლის გზაა’ (იგავები 6:23). ყველანი არასრულყოფილები ვართ და საჭიროების შემთხვევაში მზად უნდა ვიყოთ მოსანანიებლად, რათა გამოვსწორდეთ და დავრჩეთ ღვთის სიყვარულში (2 კორინთელები 13:11).

17. რა სულიერი საფრთხე შეიძლება შეგვიქმნას სიმდიდრემ?

¹⁷ სიმდიდრემ ან სიღარიბემ არ უნდა გვაქციოს „ნელთბილ“ ქრისტიანებად. სიმდიდრემ შეიძლება მსახურების ახალი კარი გაგვიხსნას, მაგრამ ამავე დროს საფრთხეც შეგვიქმნას (მათე 19:24). შეძლებულმა ადამიანმა, თუ დროდადრო დიდ თანხას სწირავს, შეიძლება იფიქროს, რომ მსახურებაში ისეთი გულმოდგინება არ სჭირდება, როგორც სხვებს; ის შეიძლება სხვებისგან განსაკუთრებულ კეთილგანწყობასაც მოელოდეს; ისიც შესაძლებელია, რომ მდიდრები სხვებთან შედარებით უფრო სასიამოვნოდ ისვენებდნენ და ერთობოდნენ. მაგრამ ეს ყველაფერი დიდ დროს მოითხოვს, წინდაუხედავი ადამიანი შეიძლება ქრისტიანულ მსახურებას ჩამოშორდეს და „ნელთბილი“ გახდეს. ნურასოდეს გავებმებით მსგავს მახეებში, ყოველთვის მთელი გულით ‘ვირჯებოდეთ და თავს არ ვზოგავდეთ’ მარადიული სიცოცხლის მისაღებად! (1 ტიმოთე 4:8—10; 6:9—12).

‘ვახშმობა’

18. რას სთავაზობდა იესო ლაოდიკეელ ქრისტიანებს?

¹⁸ შემდეგ იესო ამბობს: „აი, კართან ვდგავარ და ვაკაკუნებ. თუ ვინმე მოისმენს ჩემს ხმას და კარს გამიღებს, შევალ და მასთან ერთად ვივახშმებ, ის კი — ჩემთან“ (გამოცხადება 3:20). თუ მიიწვევდნენ ლაოდიკეელები იესოს თავიანთ კრებაში, ის დაეხმარებოდა მათ, აღარ ყოფილიყვნენ „ნელთბილები“ (მათე 18:20).

19. რას გულისხმობდა იესო, როცა ლაოდიკეელებს დაჰპირდა, რომ მათთან ერთად ივახშმებდა?

¹⁹ თავის სიტყვებში იესომ ვახშამი მოიხსენია, რაც ლაოდიკეელებს იმ დროს ახსენებდა, როცა იესო თავის მოწაფეებთან ვახშმობდა ხოლმე (იოანე 12:1—8). ვინც ასეთ ვახშამს ესწრებოდა, ყოველთვის სულიერ სარგებლობას იღებდა. იყო განსაკუთრებული შემთხვევებიც, როცა მკვდრეთით აღმდგარი იესო თავის მოწაფეებთან ერთად ჭამდა. ამ დროს ისინი სულიერად მტკიცდებოდნენ (ლუკა 24:28—32; იოანე 21:9—19). ამგვარად, იესოს დაპირება, რომ ესტუმრებოდა ლაოდიკეის კრებას და მათთან ერთად ივახშმებდა, იმას ნიშნავს, რომ ის სულიერად გაამდიდრებდა ლაოდიკეელებს, თუ მიიღებდნენ მას.

20. ა) რა მოიტანა შედეგად ქრისტიანული სამყაროს „ნელთბილმა“ მდგომარეობამ უფლის დღის დადგომისას? ბ) რა მოუტანა ქრისტიანულ სამყაროს იესოს განაჩენმა?

²⁰ ლაოდიკეელებისთვის მიცემულ გულთბილ შეგონებას დღეს დიდი მნიშვნელობა აქვს ცხებული ქრისტიანებისთვის. ზოგიერთ მათგანს ახსოვს, რომ უფლის დღის დაწყებისას ქრისტიანული სამყაროს რელიგიური წინამძღოლები მეტისმეტად „ნელთბილები“ იყვნენ. იმის მაგივრად, რომ 1914 წელს უფალს დახვედროდა, ქრისტიანული სამყაროს სამღვდელოება პირველი მსოფლიო ომის დროს სისხლისღვრაში ჩაება. ომში მონაწილე 28 ქვეყნიდან 24 ქრისტიანობაზე დებდა თავს. რამდენი სისხლი დაიღვარა მათი „წყალობით“! მეორე მსოფლიო ომის დროსაც, როცა მებრძოლი ქვეყნების უმეტესობა ქრისტიანულ ქვეყნებს წარმოადგენდა, ცრუ რელიგიის ცოდვები კვლავ „ცას მისწვდა“ (გამოცხადება 18:5). სამღვდელოებამ არ იკმარა ეს და ზურგი აქცია იეჰოვას სამეფოს, რადგან მხარს უჭერდა ერთა ლიგას, გაერთიანებული ერების ორგანიზაციასა და ნაციონალისტურ, რევოლუციურ მოძრაობებს, რომელთაგანაც ვერც ერთი ვერ გადაჭრიდა კაცობრიობის პრობლემებს. იესომ დიდი ხნის წინ უარყო სამღვდელოება, გაასამართლა და ისე მოიშორა, როგორც მეთევზემ უვარგისი თევზი ბადიდან. დღეს ქრისტიანული სამყაროს ეკლესიების სავალალო მდგომარეობა ადასტურებს იმას, რომ ის სასჯელს იმსახურებს. დაე, მათი საბოლოო ხვედრი გამაფრთხილებელი იყოს ჩვენთვის! (მათე 13:47—50).

21. როგორ ეხმაურებოდა ლაოდიკეელი ქრისტიანებისთვის მიწერილ სიტყვებს ჭეშმარიტ ქრისტიანთა კრება 1919 წლიდან?

²¹ ჭეშმარიტ ქრისტიანულ კრებაშიც კი იყვნენ „ნელთბილები“. ისინი ისეთ სასმელს ჰგავდნენ, რომელიც არც სიცხეში აგრილებს კაცს და არც სიცივეში ათბობს. მაგრამ იესოს მაინც მთელი გულით უყვარდა თავისი კრება. იესო ყოველთვის ეხმაურებოდა სტუმართმოყვარეთა მიწვევას. მრავალმა უკვე მიიწვია ის სიმბოლურ ვახშამზე. ამიტომაც 1919 წლიდან მათ თვალი აეხილათ და ბიბლიური წინასწარმეტყველებების მნიშვნელობას ჩასწვდნენ. მათთვის ბევრ რამეს მოეფინა ნათელი (ფსალმუნი 97:11; 2 პეტრე 1:19).

22. კიდევ რა ვახშამი შეიძლებოდა ჰქონოდა იესოს მხედველობაში და ვინ დაესწრებოდა ამ ვახშამს?

²² ლაოდიკეელებს რომ მიმართავდა, იესოს შეიძლება სხვა ვახშამიც ჰქონოდა მხედველობაში. „გამოცხადებაში“ ვკითხულობთ: „ბედნიერნი არიან კრავის საქორწილო ვახშამზე მიწვეულნი“. აქ საუბარია ცრუ რელიგიის განადგურების შემდეგ იეჰოვას განსადიდებლად გამართულ გამარჯვების საზეიმო წვეულებაზე. ამ წვეულებას ზეცაში ესწრებიან ქრისტე და მისი პატარძალი, რომელსაც 144 000 წარმოადგენს (გამოცხადება 19:1—9). ლაოდიკეის კრების წევრები, რომლებმაც მიიღეს რჩევა, და დღეს მცხოვრები იესო ქრისტეს ერთგული ძმები, რომელთაც ცხებული ქრისტიანების ამოსაცნობი სუფთა ტანსაცმელი აცვიათ, ნეფესთან ერთად ივახშმებენ (მათე 22:2—13). განა ამან მოშურნეობისა და მონანიებისკენ არ უნდა აღგვძრას?!

მძლეველთა ტახტი

23, 24. ა) კიდევ რომელ ჯილდოზე საუბრობს იესო? ბ) როდის ავიდა იესო, როგორც მესია, ტახტზე და როდის დაიწყო ეგრეთ წოდებული ქრისტიანების გასამართლება? გ) რას დაჰპირდა იესო თავის მოწაფეებს, როცა თავისი სიკვდილის გახსენების საღამოს აღნიშვნა დააწესა?

²³ შემდეგ იესო მომავალ ჯილდოზე საუბრობს: „მძლეველს ნებას მივცემ, ჩემთან ერთად დაჯდეს ჩემს ტახტზე, როგორც მე გავხდი მძლეველი და მამაჩემთან ერთად დავჯექი მის ტახტზე“ (გამოცხადება 3:21). როგორც ფსალმუნის 110:1, 2-ში წინასწარმეტყველებს დავითი, უმწიკვლობის დამცველი იესო, რომელმაც სძლია ქვეყნიერებას, ახ. წ. 33 წელს მკვდრეთით აღდგა, ამაღლდა და მამამისთან დაჯდა მის ზეციერ ტახტზე (საქმეები 2:32, 33). 1914 წელს კი, იესო მოვიდა და როგორც მესია, თავის ტახტზე დაჯდა, როგორც მეფე და მოსამართლე. სასამართლო, როგორც ჩანს, 1918 წელს დაიწყო ეგრეთ წოდებული ქრისტიანების გასამართლებით. ცხებული ‘მძლეველები’, რომლებიც მანამდე დაიხოცნენ, უნდა აღმდგარიყვნენ და იესოსთან ერთად უნდა ემეფათ მის სამეფოში (1 პეტრე 4:17). მეფობა იესომ თავის მოწაფეებს მაშინ აღუთქვა, როცა თავისი სიკვდილის გახსენების საღამოს აწესებდა. მან უთხრა მათ: „შეთანხმებას გიდებთ სამეფოსთვის, როგორც მე დამიდო მამაჩემმა შეთანხმება, რათა ჭამოთ და სვათ ჩემს სუფრაზე ჩემს სამეფოში და ტახტებზე დასხდეთ ისრაელის თორმეტი ტომის გასასამართლებლად“ (ლუკა 22:28—30).

²⁴ მართლაც რა ბრწყინვალე დავალებაა მეფის გვერდით ჯდომა და მასთან ერთად ‘ხელახლა შექმნის’ დროს, მისი სრულყოფილი მსხვერპლის საფუძველზე, მორჩილი კაცობრიობის მიყვანა იმ სრულყოფილებამდე, რომელიც პირველ ადამიანებს ჰქონდათ ედემის ბაღში (მათე 19:28; 20:28). როგორც იოანე გვამცნობს, იესომ ეს ‘მძლეველები’ „ღვთისა და მამის სამეფოდ და მღვდლებად“ დანიშნა, რათა იეჰოვას დიდებული ზეციერი ტახტის გარშემო დამსხდარიყვნენ (გამოცხადება 1:6; 4:4). დაე, ყველა, ცხებული თუ განახლებული დედამიწის მკვიდრი, რომელთაც სამოთხის აღდგენაში მონაწილეობის მიღების იმედი აქვთ, მთელი გულისყურით მოეკიდონ იესოს სიტყვებს, რომლებითაც მან ლაოდიკეელებს მიმართა (2 პეტრე 3:13; საქმეები 3:19—21).

25. ა) წინა მიმართვების მსგავსად როგორ ამთავრებს იესო ლაოდიკეელებისთვის მიწერილ წერილს? ბ) როგორ უნდა გამოეხმაუროს თითოეული ქრისტიანი იესოს სიტყვებს, რომლებითაც ლაოდიკეის კრებას მიმართა?

²⁵ წინა მიმართვების მსგავსად, იესო ამ მიმართვასაც ასეთი მოწოდებით ასრულებს: „ვისაც ყური აქვს, მოისმინოს, რას ეუბნება სული კრებებს“ (გამოცხადება 3:22). ბოლო დღეები იწურება. უამრავი მტკიცება არსებობს იმისა, რომ ქრისტიანულ სამყაროს სიყვარული გაუნელდა. ჩვენ კი, ჭეშმარიტი ქრისტიანები, მთელი გულით ვეხმაურებით იესოს სიტყვებს, რომლებითაც მან არა მხოლოდ ლაოდიკეის კრებას, არამედ შვიდივე კრებას მიმართა. მოდი, მთელი გულმოდგინებით მივიღოთ მონაწილეობა იესოს დიდებული წინასწარმეტყველების შესრულებაში, რომელიც ჩვენს დღეებს ეხება: „და ამ სასიხარულო ცნობას სამეფოს შესახებ იქადაგებენ მთელ მსოფლიოში ყველა ხალხისთვის დასამოწმებლად და მაშინ მოვა აღსასრული“ (მათე 24:12—14).

26. როდემდე აღარ მიმართავს იოანეს იესო, მაგრამ როდის ხედავს იოანე იესოს?

²⁶ ასე დაასრულა იესომ შვიდი კრებისთვის რჩევების მიცემა. თვითონ იოანესთვის იესოს „გამოცხადების“ ბოლო თავამდე აღარ მიუმართავს, თუმცა იოანე არაერთ ხილვაში ხედავს მას, მაგალითად, იეჰოვას განაჩენის აღსრულების ხილვაში. ახლა, მოდი, იოანეს კლასთან ერთად განვიხილოთ მეორე გასაოცარი ხილვა, რომელიც უფალმა იესო ქრისტემ უჩვენა იოანეს.

[სქოლიოები]