თავი 18

მიწისძვრები უფლის დღეს

1, 2. ა) რა ხდება ძლიერი მიწისძვრის დროს? ბ) რას აღწერს იოანე მეექვსე ბეჭდის ახსნისას?

შესწრებიხართ ოდესმე ძლიერ მიწისძვრას? ცხადია, სასიამოვნო ამაში არაფერია. ძლიერ მიწისძვრას ზოგჯერ შეიძლება თან სდევდეს შემზარავი გუგუნი; შეიძლება რყევა ყოველმა ახალმა ბიძგმა გააძლიეროს; ხალხი ამ დროს უსაფრთხო ადგილს ეძებს და შეიძლება მაგიდის ქვეშაც კი შეძვრეს. ზოგჯერ მიწისძვრა მოულოდნელი და დამანგრეველი ბიძგით იწყება, რასაც ჭურჭლისა თუ ავეჯის მტვრევა, შენობების ნგრევა მოსდევს. მას კოლოსალური ზარალი მოაქვს, განმეორებითი ბიძგები კი დამატებით ზარალს იწვევს და ტრაგიკულ მდგომარეობას კიდევ უფრო ამძიმებს.

² ეს იმ სურათის წარმოდგენაში გვეხმარება, რომელიც იოანემ მეექვსე ბეჭდის ახსნისას იხილა: „როცა მეექვსე ბეჭედი ახსნა, დავინახე, რომ ძლიერი მიწისძვრა მოხდა“ (გამოცხადება 6:12ა). როგორც ჩანს, ეს დროის იმ მონაკვეთში ხდება, როცა სხვა ბეჭდებიც იხსნება. უფლის დღის რა მონაკვეთში ხდება ეს მიწისძვრა და რა მიწისძვრაზეა ლაპარაკი? (გამოცხადება 1:10).

3. ა) იესოს წინასწარმეტყველების თანახმად რა იქნებოდა მისი გამეფების ამოსაცნობი ნიშანი? ბ) რა მიწისძვრები უძღვის წინ გამოცხადების 6:12-ში აღწერილ ძლიერ სიმბოლურ მიწისძვრას?

³ ბიბლიაში პირდაპირი თუ გადატანითი მნიშვნელობით არაერთხელ არის საუბარი მიწისძვრებზე. როცა იესო იმ ნიშნის შესახებ საუბრობდა, რომლითაც მისი გამეფება ამოიცნობოდა, იწინასწარმეტყველა, რომ იქნებოდა „მიწისძვრები ხან ერთ და ხან მეორე ადგილას“ და ეს იქნებოდა „მშობიარობის ტკივილების“ დაწყების ერთ-ერთი მაჩვენებელი. 1914 წლიდან მოყოლებული, როდესაც დედამიწის მოსახლეობამ მილიარდებს მიაღწია, მიწისძვრების რიცხვმა იმატა, რამაც ადამიანთა მდგომარეობა კიდევ უფრო დაამძიმა (მათე 24:3, 7, 8). მართალია, მიწისძვრების გახშირებით წინასწარმეტყველება სრულდება, მაგრამ ეს მიწისძვრები სტიქიური უბედურებებია და სხვა არაფერი. ეს მიწისძვრები წინ უძღვის გამოცხადების 6:12-ში აღწერილ ძლიერ სიმბოლურ მიწისძვრას, რაც არაერთი წინასწარი ბიძგის შემდეგ საბოლოო გამანადგურებელ დარტყმას მიაყენებს ისედაც საძირკველშერყეულ სატანის ქვეყნიერებასa.

სოციალური რყევები

4. ა) როდიდან ელოდა იეჰოვას ხალხი 1914 წელს კატასტროფული მოვლენების დაწყებას? ბ) დროის რა პერიოდი უნდა დასრულებულიყო 1914 წელს?

⁴ იეჰოვას ხალხი XIX საუკუნის 70-იანი წლებიდან ელოდა იმას, რომ 1914 წელს კატასტროფული მოვლენების დაწყებით დასრულდებოდა უცხოტომელთათვის დანიშნული დროები. დროის ეს პერიოდი მოიცავს „შვიდ დროს“ (2520 წელს), რომელიც ძვ. წ. 607 წელს იერუსალიმში დავითის სამეფო დინასტიის დამხობით დაიწყო და ახ. წ. 1914 წელს ზეციერ იერუსალიმში იესოს გამეფებით დასრულდა (დანიელი 4:24, 25; ლუკა 21:24)b.

5. ა) რა განცხადება გააკეთა ჩარლს ტეიზ რასელმა 1914 წლის 2 ოქტომბერს? ბ) რა პოლიტიკური ძვრები დაიწყო 1914 წლიდან?

⁵ ჩარლზ ტეიზ რასელმა 1914 წლის 2 ოქტომბერს ბრუკლინში (ნიუ-იორკი) დილის თაყვანისცემაზე ბეთელის ოჯახის წინაშე მნიშვნელოვანი განცხადება გააკეთა: „წარმართთა ჟამი დასრულდა; მათი მეფეების დღეები დათვლილია“. მართლაც, 1914 წელს ისეთი ძლიერი ძვრები დაიწყო, რომ მსოფლიო სცენიდან არაერთი საუკუნოვანი მონარქია გაქრა. 1917 წელს რუსეთში სოციალისტური რევოლუციის დროს ბოლშევიკების მიერ მეფის რეჟიმის დამხობამ ხანგრძლივი კონფრონტაცია წარმოშვა მარქსისტულ იდეოლოგიასა და კაპიტალიზმს შორის. პოლიტიკური ცვლილებები დღესაც არყევს მსოფლიოს. დღეს მთავრობები ერთი ან ორი წელი თუ ძლებენ. პოლიტიკურ არასტაბილურობას მარტო იტალიის შემთხვევაც ცხადყოფს; ამ ქვეყანაში მეორე მსოფლიო ომის შემდეგ მხოლოდ 42 წლის განმავლობაში 47-ჯერ შეიცვალა მთავრობა. ეს ცვლილებები კი გლობალურ ცვლილებას უძღვის წინ. რა იქნება ამის შედეგი? დედამიწას მხოლოდ ღვთის სამეფო უხელმძღვანელებს (ესაია 9:6, 7).

6. ა) როგორ აღწერს ჰ. ჯ. უელსი ახალ ეპოქას? ბ) რას წერენ ფილოსოფოსი ბერტრან რასელი და სახელმწიფო მოღვაწე ჰაროლდ მაკმილანი 1914 წლის შემდგომ განვითარებულ მოვლენებზე?

⁶ ისტორიკოსებმა, ფილოსოფოსებმა და პოლიტიკურმა ლიდერებმა 1914 წელს „ახალი და მნიშვნელოვანი ეპოქის დასაწყისი“ უწოდეს. ამ ეპოქის დაწყებიდან 17 წლის შემდეგ ისტორიკოსმა ჰ. ჯ. უელსმა აღნიშნა: „წინასწარმეტყველი დიდი სიამოვნებით იწინასწარმეტყველებდა კარგს, მაგრამ ის ვალდებულია, თქვას ის, რასაც ხედავს. ის ხედავს მსოფლიოს, რომელშიც ჯერ კიდევ ჯარისკაცები, პატრიოტები, მევახშეები და თაღლითები ბატონობენ; მსოფლიოს, რომელიც გაჟღენთილია უნდობლობითა და სიძულვილით; მსოფლიოს, სადაც ელვის სისწრაფით იკარგება ადამიანის თავისუფლების ცნება; მსოფლიოს, რომელიც მწვავე კლასობრივი დაპირისპირებებისკენ მიექანება და ახალი ომებისთვის ემზადება“. 1953 წელს ფილოსოფოსი ბერტრან რასელი წერდა: „1914 წლიდან ყველა, ვინც აანალიზებს მსოფლიო მდგომარეობას, დიდად შეშფოთებულია მოვლენების განვითარებით, რომლებიც გაცილებით დიდი უბედურების მომასწავებელ სასიკვდილო მარშს მოგვაგონებს. . . ისინი ხედავენ, რომ კაცობრიობა ჰგავს ერთი ბერძნული ტრაგედიის გმირს, რომელსაც მრისხანე ღმერთები მიაქანებენ და ვეღარ განაგებს თავის ბედს“. 1980 წელს ერთ-ერთი სახელმწიფო მოღვაწე ჰაროლდ მაკმილანი იხსენებდა, რა მშვიდობიანად დაიწყო XX საუკუნე: „მე იმ მსოფლიოში დავიბადე, სადაც თითქოს ყველაფერი უკეთესობისკენ მიდიოდა. . . მაგრამ 1914 წლის ერთ მშვენიერ დილას მოულოდნელად ყველაფერი თავდაყირა დადგა“.

7—9. ა) რა „მიწისძვრები“ არყევს საზოგადოებას 1914 წლიდან მოყოლებული? ბ) რით დამთავრდებოდა ის სოციალური რყევები, რომლებიც იესოს მოსვლის შემდეგ დაიწყო?

⁷ მეორე მსოფლიო ომმა რყევების მორიგი ტალღა ააგორა. მცირემასშტაბიანმა ომებმა და საერთაშორისო ტერორიზმმა შეძრა მთელი დედამიწა. ხალხის უმეტესობას აშფოთებს ბირთვული განადგურების საშიშროება. საბედნიეროდ, კაცობრიობის მომავალი ადამიანის შემოქმედის ხელშია და არა თავად ადამიანის (იერემია 17:5).

⁸ ომების გარდა 1914 წლიდან ბევრმა სხვა მოვლენამ შეძრა საზოგადოება. 1929 წელს ამერიკის საფონდო ბირჟამ კრახი განიცადა. ამას მოჰყვა მსოფლიო ეკონომიკური კრიზისი, რამაც ყველა კაპიტალისტური ქვეყანა დააზარალა. მართალია, 1932—1934 წლებში ეს კრიზისი ჩაცხრა, მაგრამ მისი უარყოფითი შედეგი დღემდე შეიმჩნევა. ეკონომიკურად არასტაბილურ მსოფლიოში მდგომარეობის გასაუმჯობესებლად 1929 წლიდან არაერთი დროებითი პროგრამა აამოქმედეს. სახელმწიფოები დღემდე ბიუჯეტის დეფიციტის პოლიტიკას ატარებენ. 1973 წელს ნავთობის კრიზისმა და 1987 წელს საფონდო ბირჟაზე გამართულმა სპეკულაციებმა ფინანსურად კიდევ უფრო შეარყია მსოფლიო. მილიონები ცხოვრობდნენ ბანკიდან გამოტანილი სესხის ხარჯზე. ფინანსურ მაქინაციებს, ფასიანი ქაღალდების ბაზარზე გამართულ სპეკულაციებს, ლატარეასა და სხვა ფინანსურ თაღლითობას დიდძალი ხალხი ეწირება. ხშირ შემთხვევაში ეს სახელმწიფო მხარდაჭერით ხდება, როცა სახელმწიფო თავად უნდა ზრუნავდეს თავისი მოქალაქეების კეთილდღეობაზე. ქრისტიანული სამყაროს ტელე-ევანგელისტებიც კი მრავალმილიონიან მოგებას იღებენ (შეადარეთ იერემიას 5:26—31).

⁹ უფრო ადრე კი ეკონომიკურმა სირთულეებმა გზა გაუხსნა მუსოლინისა და ჰიტლერს ძალაუფლების ხელში ჩასაგდებად. დიდ ბაბილონს დრო არ დაუკარგავს მათი კეთილგანწყობის მოსაპოვებლად. ვატიკანმა 1929 წელს კონკორდატი დადო იტალიის მთავრობასთან, 1933 წელს კი — გერმანიის მთავრობასთან (გამოცხადება 17:5). ამას მოჰყვა შავბნელი დრო, რითაც ნაწილობრივ შესრულდა წინასწარმეტყველება იესოს მოსვლის შესახებ: „ხალხები გაიტანჯებიან და არ ეცოდინებათ გამოსავალი. . . ხალხს გული წაუვა შიშით და იმის მოლოდინით, რა დაატყდება თავს მსოფლიოს“ (ლუკა 21:7—9, 25—31)c. 1914 წლიდან მოყოლებული საზოგადოებას არყევდა და კვლავაც არყევს ძლიერი „მიწისძვრები“.

ახლა იეჰოვა არყევს

10. ა) რითაა გამოწვეული სოციალური რყევები? ბ) რას აკეთებს იეჰოვა და რატომ?

¹⁰ სოციალური რყევების მიზეზი ის არის, რომ ადამიანს არ შეუძლია თავისი ნაბიჯების წარმართვა (იერემია 10:23). გარდა ამისა, ძველი გველი, სატანა, „რომელსაც შეცდომაში შეჰყავს მთელი მსოფლიო“, უბედურებას ატეხს დედამიწას და ბოლო ძალებით ცდილობს, მთელი კაცობრიობა ჩამოაშოროს იეჰოვას თაყვანისცემას. თანამედროვე ტექნიკამ მსოფლიო ერთ დიდ სოფლად აქცია, თუმცა ეროვნული და რასობრივი სიძულვილი კვლავ ძირ-ფესვიანად არყევს საზოგადოებას, ეგრეთ წოდებული გაერთიანებული ერების ორგანიზაცია კი ვერანაირ გამოსავალს ვერ პოულობს. როგორც არასდროს, „კაცი კაცზე მძლავრობს მისდა საზიანოდ“ (გამოცხადება 12:9, 12; ეკლესიასტე 8:9). მაგრამ უზენაესი უფალი იეჰოვა, ცისა და მიწის შემოქმედი, 90 წელზე მეტი ხანია, რაც თვითონაც არყევს ხალხს, რათა ერთხელ და სამუდამოდ გადაიჭრას დედამიწაზე არსებული პრობლემები. როგორ?

11. ა) რას ნიშნავს „შევძრავ ცასა და მიწას“, რაზეც ანგიას 2:6, 7-შია საუბარი? ბ) როგორ სრულდება ანგიას წინასწარმეტყველება?

¹¹ ანგიას 2:6, 7-ში ვკითხულობთ: «აი რას ამბობს ლაშქართა ღმერთი იეჰოვა: „ცოტაც და კიდევ ერთხელ შევძრავ ცასა და დედამიწას, ზღვასა და ხმელეთს; შევძრავ ხალხებს და მოვა ხალხთა საუნჯე; დიდებით ავავსებ ამ სახლს, — ამბობს ლაშქართა ღმერთი იეჰოვა“ ». განსაკუთრებით 1919 წლიდან იეჰოვამ აღძრა თავისი მოწმეები, რომ ყველანაირი ადამიანისთვის გაეცხადებინათ გამოტანილი განაჩენი. ეს ის გაფრთხილებაა, რომელსაც სატანის მთელი ქვეყნიერება ისმენსd. ეს ხმა უფრო და უფრო მეტი ძალით ისმის და ღვთის მოშიშ ადამიანებს ანუ „საუნჯეს“ აღძრავს, გამოეყონ ერებს; თუმცა ისინი გამოეყოფიან ერებს არა იმიტომ, რომ სატანის ორგანიზაცია ირყევა, არამედ იმიტომ, რომ სწორად აფასებენ მოვლენებს და სურთ, იოანეს ცხებულ კლასთან ერთად იეჰოვას თაყვანისცემის სახლი დიდებით აავსონ. როგორ? ღვთის უკვე დამყარებული სამეფოს შესახებ სასიხარულო ცნობის გულმოდგინე ქადაგებით (მათე 24:14). ეს სამეფო, რომელშიც იესო და მისი ცხებული მიმდევრები მმართველობენ, მარადიულად იმეფებს იეჰოვას სადიდებლად, რადგან ის არის „სამეფო, რომელიც არ შეირყევა“ (ებრაელები 12:26—29).

12. თუ უკვე გამოეხმაურეთ მათეს 24:14-ში ნაწინასწარმეტყველებ ქადაგებას, რისი გაკეთება გმართებთ გამოცხადების 6:12-ში მოხსენიებულ „ძლიერ მიწისძვრამდე“?

¹² თუ თქვენც იმ მილიონებს მიეკუთვნებით, რომლებიც გამოეხმაურნენ ქადაგებას და დაესწრნენ იესოს სიკვდილის გახსენების საღამოს, მაშ, განაგრძეთ ბიბლიური ჭეშმარიტების შესწავლა (2 ტიმოთე 2:15; 3:16, 17). მიატოვეთ სატანის საზოგადოებისთვის დამახასიათებელი უზნეო ცხოვრების წესი. ეს საზოგადოება სასიკვდილოდაა განწირული. შეუერთდით ქრისტიანებისგან შემდგარ ახალი ქვეყნიერების საზოგადოებას და გულმოდგინედ შეასრულეთ ის საქმე, რასაც ეს საზოგადოება აკეთებს, სანამ საბოლოო „მიწისძვრას“ მიწასთან არ გაუსწორებია სატანის ქვეყნიერება! ვნახოთ, რა იგულისხმება „ძლიერ მიწისძვრაში“.

ძლიერი მიწისძვრა!

13. რატომ შეიძლება ითქვას, რომ კაცობრიობას ჯერ არ უხილავს ასეთი ძლიერი მიწისძვრა?

¹³ ამ ძნელად ასატან ბოლო დღეებში მრავალი მიწისძვრა ხდება — როგორც პირდაპირი, ისე გადატანითი მნიშვნელობით (2 ტიმოთე 3:1). მაგრამ არც ერთი მათგანი არ არის ის საბოლოო ძლიერი მიწისძვრა, რომელიც იოანემ მეექვსე ბეჭდის ახსნისას იხილა. წინასწარი რყევების დრო იწურება. კარსაა მომდგარი ისეთი ძლიერი მიწისძვრა, როგორიც კაცობრიობას ჯერ არ უხილავს. ეს იმდენად ძლიერი მიწისძვრა იქნება, რომ რყევები ვერ გაიზომება ვერც რიხტერის შკალით და ვერც სხვა რომელიმე საზომით. ეს იქნება არა რომელიმე კონკრეტულ ადგილზე მომხდარი უბედურება, არამედ კატაკლიზმი, რომელიც მთელ დედამიწას, მთელ გახრწნილ საზოგადოებას შეარყევს.

14. ა) რომელ წინასწარმეტყველებაშია მოხსენიებული ძლიერი მიწისძვრა და მისი შედეგები? ბ) რას ეხება იოელისა და გამოცხადების 6:12, 13-ში მოხსენიებული წინასწარმეტყველებები?

¹⁴ იეჰოვას სხვა წინასწარმეტყველებიც წინასწარმეტყველებდნენ ამ მიწისძვრისა და მისი კატასტროფული შედეგების შესახებ. მაგალითად, ძვ. წ. დაახლოებით 820 წელს იოელმა იწინასწარმეტყველა „იეჰოვას დიდი და შიშის მომგვრელი დღის მოსვლა“ და თქვა, რომ მაშინ მზე დაბნელდებოდა და მთვარე სისხლად იქცეოდა. შემდეგ განაგრძო: „ბრბოები, ბრბოები არიან განაჩენის ველზე, რადგან უახლოვდება იეჰოვას დღე განაჩენის ველს. დაბნელდება მზე და დაბნელდება მთვარე, აღარ გამოანათებენ ვარსკვლავები. სიონიდან დაიგრგვინებს იეჰოვა და იერუსალიმიდან გამოსცემს ხმას. შეირყევა ცა და მიწა, მაგრამ იეჰოვა იქნება თავშესაფარი თავისი ხალხისთვის და სიმაგრე — ისრაელის ძეებისთვის“ (იოელი 2:31; 3:14—16). ასეთი მიწისძვრა მხოლოდ იეჰოვას განაჩენის აღსრულების დროს, დიდი გასაჭირის დღეებში შეიძლება მოხდეს (მათე 24:21). ამგვარად, ლოგიკურია, დავასკვნათ, რომ გამოცხადების 6:12, 13-ში მოცემული წინასწარმეტყველება დროის იმავე მონაკვეთს ეხება (იხილეთ აგრეთვე იერემიას 10:10; სოფონიას 1:14, 15).

15. რა ძლიერ მიწისძვრაზე წინასწარმეტყველებდა აბაკუმი?

¹⁵ წინასწარმეტყველმა აბაკუმმა, რომელიც იოელის მოღვაწეობიდან დაახლოებით 200 წლის შემდეგ ცხოვრობდა, ლოცვით მიმართა თავის ღმერთს: „იეჰოვა, მოვისმინე შენ შესახებ. შემაშინა, იეჰოვა, შენმა საქმეებმა. განაახლე და გააცხადე ისინი ამ წლებში! შენი რისხვისას გაიხსენე წყალობა“. რა რისხვაზე მიდის საუბარი? აბაკუმი განაგრძობს, ხატოვნად აღწერს დიდ გასაჭირს და იეჰოვაზე ამბობს: „გაჩერდა ის, რომ შეერყია დედამიწა. შეხედა და შიშით აათრთოლა ხალხები. . . მრისხანედ მიაბიჯებდი დედამიწაზე და შენი რისხვით გალეწე ხალხები. მაინც გავიხარებ იეჰოვათი და ვიმხიარულებ ჩემი ხსნის ღმერთით“ (აბაკუმი 3:1, 2, 6, 12, 18). მართლაც მძლავრად შეარყევს იეჰოვა მთელ დედამიწას, როდესაც „გალეწავს“ ხალხებს!

16. ა) რა იწინასწარმეტყველა ეზეკიელმა სატანის მიერ ღვთის ხალხზე საბოლოო იერიშის მიტანის შესახებ? ბ) რა მოჰყვება იმ ძლიერ მიწისძვრას, რომელზეც გამოცხადების 6:12-შია საუბარი?

¹⁶ ეზეკიელიც წინასწარმეტყველებდა, რომ როდესაც გოგი (ზნედაცემული სატანა) მაგოგიდან საბოლოო იერიშს მიიტანდა ღვთის ხალხზე, იეჰოვა შეაზანზარებდა ისრაელის მიწას (ეზეკიელი 38:18, 19). ამაში შეიძლება პირდაპირი გაგებით მიწისძვრაც იგულისხმებოდეს, მაგრამ ისიც არ უნდა დაგვავიწყდეს, რომ წიგნი „გამოცხადება“ სიმბოლური ენითაა დაწერილი; ეს წინასწარმეტყველებაც სხვა წინასწარმეტყველებების მსგავსად სიმბოლური ხასიათისაა. აქედან გამომდინარე, მეექვსე ბეჭდის ახსნით ვიგებთ, რომ ქვეყნიერება ისე შეირყევა, როგორც არასდროს — მოხდება საშინელი მიწისძვრა და ყველა, ვინც იეჰოვა ღმერთის უზენაესობის წინააღმდეგ ილაშქრებს, განადგურდება.

სიბნელის დრო

17. როგორ მოქმედებს ძლიერი მიწისძვრა მზეზე, მთვარეზე და ვარსკვლავებზე?

¹⁷ იოანე განაგრძობს თხრობას. ძლიერი მიწისძვრის დროს მომხდარი საშინელი მოვლენები ზეცაზეც მოქმედებს. იოანე ყვება: „მზე ჯვალოსავით გაშავდა და მთვარე მთლიანად სისხლივით გახდა, ცის ვარსკვლავები დედამიწაზე ჩამოცვივდა მკვახე ლეღვივით, ძლიერი ქარით შერხეულ ლეღვის ხეს რომ სცვივა“ (გამოცხადება 6:12ბ, 13). მართლაც განსაცვიფრებელი მოვლენებია აღწერილი. წარმოიდგინეთ, რა საზარელი უკუნეთი ჩამოწვებოდა, ეს წინასწარმეტყველება პირდაპირი გაგებით რომ შესრულებელიყო. აღარ გაგვათბობდა მზის სხივები; აღარც ღამით გაგვინათებდა გზას ვერცხლისფერი მთვარე; აღარც ვარსკვლავები იციმციმებდა ცის კამარაზე. ნაცვლად ამისა, ცივი და უსიცოცხლო წყვდიადი დაისადგურებდა (შეადარეთ მათეს 24:29).

18. რა გაგებით დაუბნელდა ცა იერუსალიმს ძვ. წ. 607 წელს?

¹⁸ ერთ-ერთი წინასწარმეტყველების თანახმად ძველ ისრაელს სულიერი გაგებით ასეთი წყვდიადი მოიცავდა. იერემია აფრთხილებდა ისრაელს: „გაპარტახდება მთელი ქვეყანა. განა ბოლომდე არ შევმუსრავ მას?! ამიტომ იგლოვებს ქვეყანა და მაღლა ცა დაბნელდება“ (იერემია 4:27, 28). ძვ. წ. 607 წელს, როდესაც ეს წინასწარმეტყველება შესრულდა, იეჰოვას ხალხისთვის, მართლაც, შავბნელი დრო დადგა. მათი დედაქალაქი, იერუსალიმი, ბაბილონელებმა დაიპყრეს, მათი ტაძარი დაანგრიეს, მიწა კი გააპარტახეს. ისრაელებისთვის აღარ ჩანდა ზეციდან იმედის ნაპერწკალი. ყველაფერი ისე იყო, როგორც მგლოვიარე იერემია შესჩიოდა იეჰოვას: „გვკლავ და არ გვიბრალებ. ღრუბლებით კეტავ შენთან მოსასვლელს, ლოცვებმა რომ ვერ გამოაღწიონ მათში“ (გოდება 3:43, 44). იერუსალიმისთვის ეს ის წყვდიადი იყო, რომელიც სიკვდილსა და განადგურებას ნიშნავდა.

19. ა) როგორ აღწერს ღვთის წინასწარმეტყველი ესაია იმ სიბნელეს, რომელიც ძველ ბაბილონში დაისადგურებდა? ბ) როდის და როგორ შესრულდა ესაიას წინასწარმეტყველება?

¹⁹ მოგვიანებით, მსგავსი წყვდიადი ძველი ბაბილონისთვისაც უბედურებას ნიშნავდა. ამის შესახებ ერთი წინასწარმეტყველი ღვთის შთაგონებით წერდა: „აი, მოდის იეჰოვას დღე, სასტიკი რისხვითა და მრისხანებით, რათა გამაოგნებელი გახადოს ქვეყანა და აღგავოს მისგან ცოდვილები. აღარ გამოანათებენ ცის ვარსკვლავები და ქესილის თანავარსკვლავედები; მზე დაბნელდება ამოსვლისას და მთვარე აღარ გამოსცემს სინათლეს. ამ მიწაზე მივაქცევ მისივე ბოროტებას და ბოროტებზე — მათივე დანაშაულს“ (ესაია 13:9—11). ეს წინასწარმეტყველება შესრულდა ძვ. წ. 539 წელს, როდესაც ბაბილონი მიდიელებმა და სპარსელებმა დაიპყრეს; ის კარგად აღწერს იმ წყვდიადს, სასოწარკვეთილებას, რამაც იმედგადაწურული ბაბილონი მოიცვა, როდესაც მან სამუდამოდ დაკარგა მსოფლიო იმპერიის წოდება.

20. რა შემზარავი მომავალი ელის ამ ქვეყნიერებას, როდესაც ძლიერი მიწისძვრა მოხდება?

²⁰ მსგავსად ამისა, როდესაც ძლიერი მიწისძვრა მოხდება, მთელ ქვეყნიერებას წყვდიადი მოიცავს და ხალხი სასოწარკვეთილებაში ჩავარდება. ისინი სატანის ქვეყნიერების „მოკაშკაშე მნათობებში“ იმედის ნაპერწკალსაც ვეღარ დაინახავენ. პოლიტიკურ ლიდერებს, განსაკუთრებით კი ქრისტიანული ქვეყნების მეთაურებს დღეს უკვე გატეხილი აქვთ სახელი კორუფციით, სიცრუითა და უზნეობით (ესაია 28:14—19). მათი ნდობა აღარ შეიძლება. მალე ჩაქრება მათი მბჟუტავი სინათლე, როცა იეჰოვა განაჩენს აღასრულებს მათ წინააღმდეგ. მთვარის მსგავსად ისინიც ახდენენ გავლენას დედამიწაზე, მაგრამ მალე გამოაშკარავდება, რომ სისხლისმღვრელები და მკვლელები არიან. ამ ქვეყნიერების „ვარსკვლავები“ ჩამოვარდნილი მეტეორიტებივით ჩაქრებიან და ძლიერი ქარით გაფანტულ „მკვახე ლეღვს“ დაემსგავსებიან. მთელ დედამიწას შეარყევს „დიდი გასაჭირი, როგორიც არ ყოფილა ქვეყნიერების დასაწყისიდან დღემდე და აღარც იქნება“ (მათე 24:21). მართლაც შემზარავი მომავალია!

„ცა გრაგნილივით დაიხვა“

21. იოანეს ხილვაში რა ემართება „ცას“, „ყოველ მთას და ყოველ კუნძულს“?

²¹ იოანეს ხილვა ასე გრძელდება: „ცა გრაგნილივით დაიხვა და გაუჩინარდა, ყოველი მთა და ყოველი კუნძული მოშორებულ იქნა თავისი ადგილიდან“ (გამოცხადება 6:14). ცხადია, აქ არ იგულისხმება პირდაპირი გაგებით ცა, მთები და კუნძულები. მაშ, რაზეა საუბარი?

22. რა გაგებით დაიხვა ედომის ცა გრაგნილივით?

²² „ცის“ მნიშვნელობის გაგებაში გვეხმარება მსგავსი წინასწარმეტყველება, რომელიც ერების წინააღმდეგ იეჰოვას რისხვას ეხება: „დალპება ყველა, ვინც ცის ლაშქარშია. ცა გრაგნილივით დაიხვევა“ (ესაია 34:4). ეს წინასწარმეტყველება ედომზე უნდა შესრულებულიყო. როგორ? ძვ. წ. 607 წელს იერუსალიმის განადგურებიდან მცირე ხანში ბაბილონელებმა ედომიც მიწასთან გაასწორეს. როგორც ცნობილია, იმ დროს ცაში განსაკუთრებული არაფერი მომხდარა, მაგრამ ედომის „ცაში“e დიდი უბედურება დატრიალდა. ედომის მმართველებმა დაკარგეს ცასავით მაღალი მდგომარეობა (ესაია 34:5). ისინი თითქოს დაახვიეს და გამოუსადეგარი ძველი გრაგნილივით გვერდზე გადადეს.

23. რა არის „ცა“, რომელიც „გრაგნილივით დაიხვა“, და როგორ ადასტურებს ამას პეტრეს სიტყვები?

²³ ამგვარად „ცაში“, რომელიც „გრაგნილივით დაიხვა“, იგულისხმება ღვთის მოწინააღმდეგე მთავრობები, რომლებიც დედამიწაზე მმართველობენ. თეთრ ცხენზე ამხედრებული ყოვლისმპყრობელი მხედარი მათ ერთხელ და სამუდამოდ გაანადგურებს (გამოცხადება 19:11—16, 19—21). ამას ადასტურებს პეტრე მოციქული, რომელიც მეექვსე ბეჭდის ახსნისას განვითარებულ მოვლენებს ელოდა: „ახლანდელი ცა და დედამიწა კი იმავე სიტყვით ცეცხლისთვის არის გამზადებული და შემონახული უღვთოთა გასამართლებისა და დაღუპვის დღისთვის“ (2 პეტრე 3:7). მაგრამ რას ნიშნავს ფრაზა „ყოველი მთა და ყოველი კუნძული მოშორებულ იქნა თავისი ადგილიდან“?

24. ა) ბიბლიური წინასწარმეტყველებების თანახმად რის გამო იძვრის და რის გამო კარგავს სიმტკიცეს მთები და კუნძულები? ბ) როგორ „შეიძრნენ მთები“ ნინევეს დაცემის დროს?

²⁴ ბიბლიურ წინასწარმეტყველებებში ნათქვამია, რომ მთები და კუნძულები იძვრის ან კარგავს სიმტკიცეს დიდი პოლიტიკური რყევების გამო. მაგალითად, ნინევეს წინააღმდეგ იეჰოვას გამოტანილ განაჩენს რომ აცხადებდა, წინასწარმეტყველმა ნაუმმა დაწერა: „შეიძრნენ მთები მის გამო, დადნენ გორები. ზანზარებს დედამიწა მისი სახის წინაშე და ნაყოფიერი მიწა თავისი მკვიდრებითურთ“ (ნაუმი 1:5). როგორც ცნობილია, ძვ. წ. 632 წელს ნინევეს დაცემის დროს მთები პირდაპირი გაგებით არ შეძრულა, თუმცა ეს მსოფლიო იმპერია, რომელიც თავისი ძლიერებით მთას ჰგავდა, მოულოდნელად დაეცა (შეადარეთ იერემიას 4:24).

25. ქვეყნიერების აღსასრულს, როგორ ‘იქნება მოშორებული ყოველი მთა და ყოველი კუნძული’ თავისი ადგილიდან?

²⁵ მაშასადამე, მეექვსე ბეჭდის ახსნისას მოხსენიებული „ყოველი მთა და ყოველი კუნძული“ უნდა განასახიერებდეს მთავრობებსა და მათზე დამოკიდებულ ორგანიზაციებს, რომლებიც, ერთი შეხედვით, სიმტკიცით გამოირჩევიან. ისინი მალე შეიძვრებიან და შეაძრწუნებენ მათზე დაიმედებულ ხალხს. წინასწარმეტყველების თანახმად მოდის იეჰოვას და მისი ძის, იესოს რისხვის დიდი დღე — სატანის ორგანიზაციის გამანადგურებელი საბოლოო „მიწისძვრა“. ისინი შურს იძიებენ!

„ზედ დაგვემხეთ და დაგვმალეთ“

26. როგორ დაეცემათ თავზარი ღვთის უზენაესობის მოწინააღმდეგეებს და რას იტყვიან ისინი მაშინ, როცა შეძრწუნდებიან?

²⁶ იოანე განაგრძობს: «დედამიწის მეფეები, დიდებულები, ათასისთავები, მდიდრები და ძლიერები, ყველა მონა და თავისუფალი გამოქვაბულებსა და კლდოვან მთებში დაიმალნენ. ეუბნებიან მთებსა და კლდეებს: „ზედ დაგვემხეთ და დაგვმალეთ ტახტზე მჯდომის სახისგან და კრავის რისხვისგან, რადგან მოვიდა მათი რისხვის დიდი დღე და ვინ გაუძლებს?“ » (გამოცხადება 6:15—17).

27. რას ამბობდნენ სამარიაში მცხოვრები ორგული ისრაელები, და როგორ შესრულდა წინასწარმეტყველება?

²⁷ სამარიის, ისრაელის ჩრდილოეთი სამეფოს დედაქალაქის წინააღმდეგ იეჰოვას გამოტანილ განაჩენს რომ აცხადებდა, ოსიამ თქვა: «მოისპობა ბეთ-ავენის მაღლობები, ისრაელის ცოდვა. ნარ-ეკალი ამოვა მათ სამსხვერპლოებზე. ხალხი ეტყვის მთებს: „დაგვფარეთ!“ და გორებს: „ზედ დაგვემხეთ!“ » (ოსია 10:8). როდის შესრულდა ეს სიტყვები? ძვ. წ. 740 წელს, როდესაც ასურელებმა ხელთ იგდეს სამარია და ისრაელებს გასაქცევი აღარსად ჰქონდათ. ოსიას სიტყვები კარგად ასახავს უსუსურობით, შიშითა და დაბნეულობით გამოწვეულ განცდას, რაც მტრის ხელში ჩავარდნილ ხალხს დაეუფლა. ვერც გორებმა და ვერც სამარიის მთისმაგვარმა წეს-წყობილებამ ვერ დაიცვა ისინი, მიუხედავად იმისა, რომ ერთი შეხედვით, მტკიცედ იდგნენ.

28. ა) რა გამაფრთხილებელი სიტყვები უთხრა იესომ იერუსალიმელ ქალებს? ბ) როგორ შესრულდა იესოს სიტყვები?

²⁸ როდესაც რომაელ ჯარისკაცებს იესო ბოძზე გასაკრავად მიჰყავდათ, მან შემდეგი სიტყვებით მიმართა იერუსალიმელ ქალებს: «მოვა დრო, როცა ხალხი იტყვის: „ბედნიერნი არიან უშვილონი, საშვილოსნო, რომელსაც არ უშობია, და ძუძუ, რომელსაც არ უწოვებია!“ მაშინ ეტყვიან მთებს: „ზედ დაგვემხეთ!“ და გორებს: „დაგვფარეთ!“ » (ლუკა 23:29, 30). სარწმუნო ისტორიული წყაროები ადასტურებს, რომ ახ. წ 70 წელს რომაელებმა იერუსალიმი გაანადგურეს. ცხადია, იესოც იმას გულისხმობდა, რასაც ოსია. იუდაში დარჩენილმა ებრაელებმა ვერაფერს შეაფარეს თავი. ზოგი იერუსალიმს აფარებდა თავს, ზოგი კი მთის წვერზე აგებულ მასადას ციხე-სიმაგრეს, მაგრამ მაინც ვერ გაექცნენ იეჰოვას განაჩენის აღსრულებას.

29. ა) რა მდგომარეობაში აღმოჩნდებიან ქვეყნიერების მხარდამჭერები იეჰოვას რისხვის დღეს? ბ) იესოს რომელი წინასწარმეტყველება შესრულდება, როცა იეჰოვა რისხვით აენთება?

²⁹ მეექვსე ბეჭდის ახსნით ვიგებთ, რა მოხდება იეჰოვას რისხვის დღეს. ქვეყნიერება ერთხელ და სამუდამოდ შეირყევა, და მისი მხარდამჭერები თავშესაფარს დაუწყებენ ძებნას, მაგრამ ვერსად იპოვიან. ცრუ რელიგიამ, „დიდმა ბაბილონმა“, აშკარად გაუცრუა მათ იმედი. დახმარებას მათ ვეღარც მთის გამოქვაბულები აღმოუჩენენ და ვეღარც მთასავით ვეებერთელა პოლიტიკური თუ ფინანსური ორგანიზაციები. იეჰოვას რისხვისგან ვერაფერი დაიფარავს მათ, ვისი შემაშფოთებელი მდგომარეობაც იესომ შემდეგი სიტყვებით აღწერა: „მაშინ ცაში გამოჩნდება კაცის ძის ნიშანი და დედამიწის ყველა ტომი მწუხარებისგან მკერდში დაიწყებს ცემას; იხილავენ ძლიერებითა და აღმატებული დიდებით ცის ღრუბლებზე მომავალ კაცის ძეს“ (მათე 24:30).

30. ა) რატომ იკითხავენ: „ვინ გაუძლებს“? ბ) გაუძლებს ვინმე იეჰოვას სასამართლოს დღეს?

³⁰ ვინც არ ცნობს თეთრ ცხენზე ამხედრებული გამარჯვებული მხედრის ძალაუფლებას, მოუწევს იმის აღიარება, რომ ცდებოდა. ვინც განგებ უერთდება გველის შთამომავლობას, სატანის ქვეყნიერებასთან ერთად განადგურდება (დაბადება 3:15; 1 იოანე 2:17). მაშინ მთელი მსოფლიო ისეთ სავალალო მდგომარეობაში აღმოჩნდება, რომ ბევრი იკითხავს, ვინ გაუძლებსო?! მათ შეიძლება ისიც დაასკვნან, რომ გასამართლების დღეს კაციშვილი არ გამართლდება იეჰოვას წინაშე, მაგრამ ისინი შეცდებიან, როგორც ამას წიგნი „გამოცხადება“ ცხადყოფს.

[სქოლიოები]

თავი 19

ღვთის ისრაელი ბეჭედდასმულია

ხილვა 4 გამოცხადება 7:1—17

თემა: ბეჭედდასმულია 144 000 და უამრავი ხალხი დგას იეჰოვას ტახტისა და კრავის წინაშე.

შესრულების დრო: 1914 წელს იესო ქრისტეს გამეფებიდან მისი ათასწლიანი მეფობის განმავლობაში.

1. „ვინ გაუძლებს“ ღვთის რისხვის დიდ დღეს?

„ვინ გაუძლებს?“ (გამოცხადება 6:17). ეს ჩვენც გვაინტერესებს. სავსებით შესაძლებელია, რომ ეს კითხვა გაუჩნდეს როგორც მთავრობის წარმომადგენელს, ისე ნებისმიერ ადამიანს, როდესაც ღვთის რისხვის დიდი დღე დაატყდება სატანის ქვეყნიერებას. მათი აზრით, მოახლოებული კატაკლიზმი მთელ კაცობრიობას გაანადგურებს. მაგრამ მართლა ასე მოხდება? საბედნიეროდ არა, რადგან ღვთის წინასწარმეტყველი გვარწმუნებს: „ყოველი, ვინც იეჰოვას სახელს უხმობს, გადარჩება“ (იოელი 2:32). ამას მოციქულები პეტრე და პავლეც ადასტურებდნენ (საქმეები 2:19—21; რომაელები 10:13). აქედან გამომდინარე, გადარჩებიან ისინი, ვინც იეჰოვას სახელს უხმობენ. ვინ არიან ისინი? ამას მომდევნო ხილვიდან გავიგებთ.

2. რატომ არის საოცარი ის ფაქტი, რომ ზოგიერთები იეჰოვას სასამართლოს დღეს გადაურჩებიან?

² საოცარია ის ფაქტი, რომ ზოგიერთები გადაურჩებიან იეჰოვას სასამართლოს დღეს, რადგან ღვთის ერთ-ერთი წინასწარმეტყველი ამ დღეს ასე აღწერს: „აი, ქარიშხალივით, ყველაფრის აღმგველი გრიგალივით გამოდის იეჰოვას რისხვა; ბოროტთა თავზე დატრიალდება ის. არ დაცხრება იეჰოვას მრისხანება, სანამ არ აღასრულებს, სანამ ბოლომდე არ მიიყვანს იმას, რაც გულში განიზრახა“ (იერემია 30:23, 24). ეს ქარიშხალი რომ გადავიტანოთ, გულხელდაკრეფილები არ უნდა ვისხდეთ (იგავები 2:22; ესაია 55:6, 7; სოფონია 2:2, 3).

ოთხი ქარი

3. ა) რა დავალებას ასრულებენ ანგელოზები, როგორც ამას იოანე ხედავს? ბ) რა არის წარმოდგენილი „ოთხი ქარით“?

³ სანამ იეჰოვა რისხვით აენთება, ზეციერი ანგელოზები ერთ დავალებას ასრულებენ. აი რას ხედავს იოანე ხილვაში: „ამის შემდეგ ვიხილე დედამიწის ოთხ კუთხეში მდგომი ოთხი ანგელოზი, რომლებსაც მაგრად ეჭირათ დედამიწის ოთხი ქარი, რათა არ ექროლა ქარს არც მიწაზე, არც ზღვაზე და არც რომელიმე ხეზე“ (გამოცხადება 7:1). რას ნიშნავს ეს ჩვენთვის? ამ „ოთხი ქარით“ წარმოდგენილია ის გამანადგურებელი განაჩენი, რომელიც მალე აღსრულდება ამ ბოროტ მიწიერ საზოგადოებაზე, ზღვასავით აბობოქრებულ უკანონო ხალხსა და მაღალი ხეების მსგავს მმართველებზე, რომლებიც ხალხის მხარდაჭერით არსებობენ (ესაია 57:20; ფსალმუნი 37:35, 36).

4. ა) რას განასახიერებს ოთხი ანგელოზი? ბ) რა დაემართება სატანის მიწიერ ორგანიზაციას, როცა ოთხი ქარი დაუბერავს?

⁴ ეს ოთხი ანგელოზი ანგელოზთა ოთხ ჯგუფს განასახიერებს, რომლებიც იეჰოვას ნებით დანიშნულ დრომდე აკავებენ განაჩენის აღსრულებას. როცა ეს ანგელოზები აღარ შეაკავებენ ღვთის რისხვის ქარს და ის ჩრდილოეთიდან, სამხრეთიდან, აღმოსავლეთიდან და დასავლეთიდან დაუბერავს, შედეგები მართლაც გამანადგურებელი იქნება, როგორც მაშინ, როცა იეჰოვამ ოთხი ქარის მეშვეობით გაფანტა, შეაძრწუნა და შემუსრა ელამელები; ოღონდ იმ განსხვავებით, რომ ამჯერად განადგურება მთელ ქვეყნიერებას დაატყდება (იერემია 49:36—38). ეს იქნება უძლიერესი ქარიშხალი, იმ ქარიშხალზე გამანადგურებელი, რომლითაც იეჰოვამ ამონელები ამოწყვიტა (ამოსი 1:13—15). სატანის მიწიერი ორგანიზაციის ვერც ერთი ნაწილი ვერ გაუძლებს იეჰოვას რისხვის დღეს, როდესაც ის ერთხელ და სამუდამოდ დაამტკიცებს თავის უზენაესობას (ფსალმუნი 83:15, 18; ესაია 29:5, 6).

5. როგორ გვარწმუნებს იერემიას წინასწარმეტყველება, რომ ღვთის განაჩენი მთელ დედამიწაზე აღსრულდება?

⁵ მართლა აოხრდება მთელი დედამიწა ღვთის განაჩენის აღსრულების დროს? მოდი, კვლავ დავუგდოთ ყური წინასწარმეტყველ იერემიას: „აი, ხალხიდან ხალხში გადადის უბედურება; დიდი ქარიშხალი ამოვარდება დედამიწის კიდეებიდან. იმ დღეს იეჰოვას დახოცილნი დედამიწის კიდით კიდემდე იქნებიან“ (იერემია 25:32, 33). ამ საშინელი ქარიშხლის დროს მთელ მსოფლიოს წყვდიადი მოიცავს და ყველა მთავრობა წარსულს ჩაჰბარდება (გამოცხადება 6:12—14). მაგრამ ყველა ადამიანი როდი გაიზიარებს ამ ხვედრს. მაშ, ვისი გულისთვის უჭირავთ ანგელოზებს ოთხი ქარი?

ღვთის მონებს ბეჭედი ესმებათ

6. ვისი ნებით იჭერენ ანგელოზები ოთხ ქარს და რისი დრო რჩება ამის წყალობით?

⁶ იოანე მოგვითხრობს, როგორ დაედებათ ნიშანი მათ, ვინც უნდა გადარჩეს: «ვიხილე სხვა ანგელოზი, მზის ამოსავლიდან ამომავალი, რომელსაც ცოცხალი ღვთის ბეჭედი ჰქონდა. მან ხმამაღლა მიმართა ოთხ ანგელოზს, რომელთაც ნება ჰქონდათ მიცემული, ევნოთ მიწისა და ზღვისთვის: „ნუ ავნებთ ნურც მიწას, ნურც ზღვას და ნურც ხეებს, სანამ ბეჭედს არ დავასვამთ შუბლზე ჩვენი ღვთის მონებს“ » (გამოცხადება 7:2, 3).

7. ვინ არის მეხუთე ანგელოზი და რა გვეხმარება მისი ვინაობის ამოცნობაში?

⁷ მიუხედავად იმისა, რომ მეხუთე ანგელოზი სახელით არ მოიხსენიება, ყველაფერი იმაზე მეტყველებს, რომ ეს განდიდებული უფალი იესო უნდა იყოს. იესო მთავარანგელოზია და როგორც დავინახეთ, მას ძალაუფლება აქვს სხვა ანგელოზებზე (1 თესალონიკელები 4:16; იუდა 9). ეს ანგელოზი აღმოსავლეთიდან მოდის, როგორც „მზის ამოსავლიდან მომავალი მეფეები“ — იეჰოვა და ქრისტე. ისინი განაჩენის აღსასრულებლად მოდიან დარიოსისა და კიროსის მსგავსად, რომლებმაც ერთ დროს ძველი ბაბილონი დასცეს (გამოცხადება 16:12; ესაია 45:1; იერემია 51:11; დანიელი 5:31). ისიც უნდა აღინიშნოს, რომ ეს ანგელოზი უფლებამოსილია, ბეჭედი დაასვას ცხებულ ქრისტიანებს (ეფესოელები 1:13, 14). გარდა ამისა, როდესაც ოთხი ქარი დაუბერავს, მაშინ სწორედ იესო წაუძღვება ზეციერ ლაშქარს ერებზე განაჩენის აღსასრულებლად (გამოცხადება 19:11—16). აქედან გამომდინარე, შეგვიძლია დავასკვნათ, რომ იესოა ის, ვინც ბრძანება გასცა, არ განადგურებულიყო სატანის მიწიერი ორგანიზაცია, ვიდრე ღვთის მონებს ბეჭედი არ დაესმებოდათ.

8. რა იგულისხმება ბეჭდის დასმაში და როდის დაიწყო ბეჭდის დასმა?

⁸ რა იგულისხმება ბეჭდის დასმაში და ვინ არიან ღვთის ეს მონები? ბეჭდის დასმა ახ. წ. 33 წლის ორმოცდამეათე დღის დღესასწაულზე დაიწყო, როდესაც პირველი იუდეველი ქრისტიანები წმინდა სულით იქნენ ცხებული. მოგვიანებით ღმერთმა გამოიხმო უცხოტომელები და ისინიც სცხო (რომაელები 3:29; საქმეები 2:1—4, 14, 32, 33; 15:14). მოციქულმა პავლემ დაწერა ცხებულ ქრისტიანებზე, რომ ისინი ქრისტესნი არიან, და დასძინა, რომ ღმერთმა თავისი ბეჭედი დაასვა და მისცა სული მათ გულებში, რაც მომავლის საწინდარია (2 კორინთელები 1:21, 22; შეადარეთ გამოცხადების 14:1). ამგვარად, როდესაც ღმერთი ამ მონებს თავის სულიერ ძეებად აღიარებს, მათ ბეჭედი ესმებათ, რაც მათთვის ზეციერი მემკვიდრეობის მიღების გარანტიაა (2 კორინთელები 5:1, 5; ეფესოელები 1:10, 11). მათ შეუძლიათ თქვან: „ეს სული თვითონვე მოწმობს ჩვენს სულთან ერთად, რომ ღვთის შვილები ვართ. და თუ შვილები ვართ, მემკვიდრენიც ვართ — ღვთის მემკვიდრენი და ქრისტეს თანამემკვიდრენი, თუკი მასთან ერთად ვიტანჯებით, რომ მასთან ერთად განვდიდდეთ კიდეც“ (რომაელები 8:15—17).

9. ა) რას უნდა გაუძლონ ღვთის სულითცხებულმა ძეებმა? ბ) რამდენ ხანს გასტანს ცხებულების შემოწმება?

⁹ რას ნიშნავს „თუკი მასთან ერთად ვიტანჯებით“? სიცოცხლის გვირგვინის მისაღებად ცხებულმა ქრისტიანებმა განსაცდელებს უნდა გაუძლონ და სიკვდილამდე ერთგულება უნდა შეინარჩუნონ (გამოცხადება 2:10). ისინი არ ცხოვრობენ იმ პრინციპით, რომ „ერთხელ გადარჩენილი სამუდმოდ გადარჩენილია“ (მათე 10:22; ლუკა 13:24). ბიბლია მათ მოუწოდებს: „უფრო მეტად ეცადეთ, რომ განმტკიცდეთ თქვენს მოწოდებასა და რჩეულობაში“. ბოლოს ისინიც იტყვიან იმას, რაც მოციქულმა პავლემ თქვა: „ღირსეულ ბრძოლაში ვიბრძოდი, სარბიელი ბოლომდე გავირბინე და რწმენა შევინარჩუნე“ (2 პეტრე 1:10, 11; 2 ტიმოთე 4:7, 8). დღეს მცხოვრები სულითცხებულების, ღვთის ძეების შემოწმება და გაცხრილვა მანამდე გასტანს, სანამ იესო და მისი ანგელოზები თითოეულ მათგანს საბოლოოდ არ დაადებენ შუბლზე ბეჭედს, რაც ერთხელ და სამუდამოდ დაადასტურებს იმას, რომ ისინი არიან ღვთის ერთგული და განსაცდელგამოვლილი მონები. ეს ბეჭედი სამუდამო ბეჭედია. როგორც ჩანს, როდესაც დიდი გასაჭირის მომასწავებელი ოთხი ქარი დაუბერავს, სულიერი ისრაელიდან ყველა საბოლოოდ იქნება ბეჭედდასმული, მიუხედავად იმისა, რომ ზოგიერთები ჯერ კიდევ დედამიწაზე იქნებიან (მათე 24:13; გამოცხადება 19:7). ამგვარად, დასრულდება სულიერი ისრაელის შეკრება (რომაელები 11:25, 26).

რამდენია ბეჭედდასმული?

10. ა) რომელი ბიბლიური მუხლებიდან ვიგებთ, რომ ბეჭედდასმულთა რიცხვი შეზღუდულია? ბ) სულ რამდენია ბეჭედდასმული და რა თანმიმდევრობით არიან ისინი ჩამოთვლილი?

¹⁰ იესომ მათ, ვისაც ბეჭედი დაესმებოდა, უთხრა: „ნუ გეშინია, მცირე სამწყსოვ, რადგან თქვენმა მამამ მოისურვა თქვენთვის სამეფოს მოცემა“ (ლუკა 12:32). გამოცხადების 6:11 და რომაელების 11:25 აჩვენებს, რომ მცირე სამწყსოს წევრთა რიცხვი შეზღუდულია და წინასწარ არის განსაზღვრული. ამაში იოანეს შემდეგი სიტყვებიც გვარწმუნებს: „გავიგონე ბეჭედდასმულთა რიცხვი: ას ორმოცდაოთხი ათასი, ბეჭედდასმულნი ისრაელის ძეთა ყველა ტომიდან: იუდას ტომიდან თორმეტი ათასი ბეჭედდასმული; რეუბენის ტომიდან თორმეტი ათასი; გადის ტომიდან თორმეტი ათასი; აშერის ტომიდან თორმეტი ათასი; ნაფთალის ტომიდან თორმეტი ათასი; მენაშეს ტომიდან თორმეტი ათასი; სიმონის ტომიდან თორმეტი ათასი; ლევის ტომიდან თორმეტი ათასი; ისაქარის ტომიდან თორმეტი ათასი; ზებულონის ტომიდან თორმეტი ათასი; იოსების ტომიდან თორმეტი ათასი; ბენიამინის ტომიდან თორმეტი ათასი ბეჭედდასმული“ (გამოცხადება 7:4—8).

11. ა) რატომ არ იგულისხმება ხორციელი ისრაელი „გამოცხადებაში“ ჩამოთვლილ 12 ტომში? ბ) რატომ არის „გამოცხადებაში“ ჩამოთვლილი 12 ტომი? გ) რატომ უნდა შეასრულოს ღვთის ისრაელის ყველა ტომმა სამეფო და სამღვდელო საქმე?

¹¹ აქ ხორციელ ისრაელზე არ მიდის საუბარი, რადგან გამოცხადების 7:4—8-ში ჩამონათვალი არ შეესაბამება ტომების ჩვეულებრივ ჩამონათვალს (რიცხვები 1:17, 47). ეს ჩამონათვალი მოცემულია არა ხორციელი ისრაელის ამოცნობის მიზნით, არამედ იმის საჩვენებლად, რომ სულიერი ისრაელიც მსგავსად არის ორგანიზებული. ამ ჩამონათვალში წესრიგი ჩანს. ამ ახალ ერს ზუსტად 144 000 წევრი წარმოადგენს — თორმეტივე ტომიდან თორმეტ-თორმეტი ათასი. ღვთის ისრაელში არც ერთი ტომი არ არის მხოლოდ სამეფო ან სამღვდელო, მთელმა ერმა უნდა იმეფოს და ერის ყველა წარმომადგენელმა უნდა იმსახუროს მღვდლად (გალატელები 6:16; გამოცხადება 20:4, 6).

12. რატომ არ არის გასაკვირი, რომ 24 უხუცესი კრავის წინაშე მღერის, როგორც ეს გამოცხადების 5:9, 10-ში წერია?

¹² სულიერ ისრაელში გაერთიანების შესაძლებლობა თავდაპირველად იუდეველებსა და იუდეველ პროზელიტებს მიეცათ, მაგრამ მათგან მხოლოდ მცირედმა გამოიყენა ეს შესაძლებლობა. ამიტომ იეჰოვამ უცხოტომელებიც მიიწვია სულიერ ისრაელში გასაერთიანებლად (იოანე 1:10—13; საქმეები 2:4, 7—11; რომაელები 11:7). როგორც ერთ დროს ისრაელისგან გაუცხოებული ეფესოელების შემთხვევაში მოხდა, არაიუდეველებსაც დაესვათ ღვთის სულით ბეჭედი და ისინი ცხებული ქრისტიანების კრებას შეუერთდნენ (ეფესოელები 2:11—13; 3:5, 6; საქმეები 15:14). ამიტომ არ არის გასაკვირი, რატომ მღერის 24 უხუცესი კრავის წინაშე: „შენი სისხლით იყიდე ადამიანები ღვთისთვის ყოველი ტომიდან, ენიდან, ხალხიდან და ერიდან, ჩვენი ღვთის სამეფოდ და მღვდლებად გახადე ისინი და მეფეები იქნებიან, დედამიწის მმართველები“ (გამოცხადება 5:9, 10).

13. რატომ მიმართავს იესოს ნახევარძმა იაკობი „მიმოფანტულ თორმეტ ტომს“?

¹³ ქრისტიანული კრება „რჩეული მოდგმა“, „სამეფო სამღვდელოება“ და „წმინდა ერია“ (1 პეტრე 2:9). ღვთის ერი, ძველი ისრაელი, შეცვალა ახალმა ისრაელმა, რომელიც „ნამდვილი ისრაელია“ (რომაელები 9:6—8; მათე 21:43)a. გასაკვირი არ არის, თუ რატომ სწერს იესოს ნახევარძმა იაკობი თავის წერილს „მიმოფანტულ თორმეტ ტომს“, ანუ ცხებულ ქრისტიანთა მსოფლიო კრებას, რომლის შემადგენლობაშიც დროთა განმავლობაში 144 000 სულით ცხებული შევიდოდა (იაკობი 1:1).

ღვთის ისრაელი დღეს

14. საიდან ჩანს, რომ იეჰოვას მოწმეებს ცხებულ ქრისტიანთა რიცხვი — 144 000 ყოველთვის პირდაპირი გაგებით ესმოდათ?

¹⁴ ჩარლზ ტეიზ რასელისთვის ცხადი გახდა, რომ სულიერ ისრაელში პირდაპირი გაგებით 144 000 ადამიანი შევიდოდა. 1904 წელს გამოცემული წიგნის „საღვთო წერილის გამოკვლევა“ VI ტომში, რომლის სახელწოდებაცაა „ახალი ქმნილება“, მან დაწერა: «ჩვენ ეჭვი არ უნდა გვეპარებოდეს, რომ რჩეულ ცხებულთა განსაზღვრული რიცხვი შეესაბამება „გამოცხადებაში“ (7:4; 14:1) რამდენჯერმე მოხსენიებულ რიცხვს; ისინი არიან 144 000, „კაცთაგან. . . გამოსყიდულნი“ ». მსგავსი რამ არის ნათქვამი ბიბლიის მკვლევარების მიერ 1930 წელს გამოცემულ წიგნში „სინათლე“ (ტომი I): „ამგვარად ქრისტეს სხეულის 144 000-ვე წევრი რჩეული, ცხებული და ბეჭედდასმულია“. იეჰოვას მოწმეებს ყოველთვის სწამდათ, რომ ცხებულ ქრისტიანთა — სულიერი ისრაელის — რიცხვი პირდაპირი გაგებით 144 000 იყო.

15. ბიბლიის მკვლევარების აზრით, რომლებიც უფლის დღის დადგომამდე ცხოვრობდნენ, რა პერსპექტივა ელოდა ხორციელ ისრაელს უცხოტომელთათვის დანიშნული დროების დასასრულს?

¹⁵ სარგებლობს ხორციელი ისრაელი რაიმე განსაკუთრებული მდგომარეობით? უფლის დღის დადგომამდე, როცა ბიბლიის გულწრფელი მკვლევარები ღვთის სიტყვის კვლევას განაგრძობდნენ, მათ სჯეროდათ, რომ უცხოტომელთათვის დანიშნული დროების გასვლის შემდეგ იუდეველები კვლავ მოიპოვებდნენ ღვთის კეთილგანწყობას. ჩ. ტ. რასელი თავის წიგნში „დრო ახლოსაა“ („საღვთო წერილის გამოკვლევა“, ტომი II, 1889 წელი) იერემიას 31:29—34-ის განხილვისას ხორციელ იუდეველებზე საუბრობდა: «მსოფლიო მოვლენები ადასტურებს, რომ ისრაელი დასჯილია ძვ. წ. [607 წლიდან] და უცხოტომელთა უღელქვეშაა; ის მანამ არ აღორძინდება, სანამ ახ. წ. 1914 წელს არ ამოიწურება „შვიდი დრო“ — 2520 წელი». იმ დროს ეგონათ, რომ ისრაელი აღორძინდებოდა როგორც ერი. ეს პერსპექტივა 1917 წელს უფრო რეალური გახდა, როდესაც ეგრეთ წოდებული „ბალფურის დეკლარაციის“ თანახმად ბრიტანეთის მხარდაჭერით პალესტინაში იუდეველთა „ეროვნული კერა“ უნდა ჩამოყალიბებულიყო.

16. რას აკეთებდნენ იეჰოვას მოწმეები იმისათვის, რომ ქრისტიანული ცნობა ხორციელი ისრაელის ყურამდე მისულიყო და რა შედეგით?

¹⁶ პირველი მსოფლიო ომის შემდეგ პალესტინა დიდი ბრიტანეთის სამანდატო ტერიტორია გახდა და ბევრ ისრაელს გზა გაეხსნა სამშობლოში დასაბრუნებლად. 1948 წელს ისრაელის სახელმწიფო შეიქმნა. იყო ეს იმის მაჩვენებელი, რომ ისრაელებს ღმერთი აკურთხებდა? მრავალი წლის განმავლობაში იეჰოვას მოწმეებს ასეც სჯეროდათ. ამიტომ 1925 წელს მათ გამოსცეს 128-გვერდიანი წიგნი „ნუგეში იუდეველებისთვის“. 1929 წელს კი გამოსცეს 360-გვერდიანი წიგნი „სიცოცხლე“, რომელიც ებრაელებისთვის იყო გამოცემული; მასში ბიბლიური წიგნი „იობიც“ განიხილებოდა. განსაკუთრებით ნიუ-იორკში დიდი ძალისხმევა მოხმარდა იმას, რომ ცნობა მესიის შესახებ ებრაელების ყურამდე მისულიყო. საბედნიეროდ, ცოტანი მაინც გამოეხმაურნენ ამ ცნობას. I საუკუნეში მცხოვრებ წინაპართა მსგავსად კი ებრაელების უმეტესობამ არ აღიარა მესიის მოსვლა.

17, 18. რა გაიგეს ღვთის მონებმა ახალი შეთანხმებისა და იმ ბიბლიური წინასწარმეტყველებების შესახებ, რომლებიც აღორძინებას ეხება?

¹⁷ ცხადია, ისრაელი, როგორც ერი, არ იყო ის ისრაელი, რომელზეც გამოცხადების 7:4—8-ში ან უფლის დღესთან დაკავშირებულ სხვა წინასწარმეტყველებებშია საუბარი. ებრაელები ტრადიციულად თავს არიდებდნენ ღვთის სახელის გამოყენებას (მათე 15:1—3, 7—9). იეჰოვას მოწმეების მიერ გამოცემულ წიგნში „იეჰოვა“ (1934 წელი), რომელშიც იერემიას 31:31—34 განიხილება, ერთმნიშვნელოვნად იყო აღნიშნული: „ახალ შეთანხმებას არაფერი აქვს საერთო ისრაელის ხორციელ შთამომავლებთან და არც ზოგადად კაცობრიობასთან. . . ის მხოლოდ სულიერ ისრაელს ეხება“. ბიბლიური წინასწარმეტყველებები აღორძინების შესახებ არ უკავშირდება არც ხორციელ ისრაელს და არც პოლიტიკურ ისრაელს, რომელიც გაერთიანებული ერების ორგანიზაციის წევრი და იმ ქვეყნიერების ნაწილია, რომელზეც იესო იოანეს 14:19, 30-სა და 18:36-ში ლაპარაკობდა.

¹⁸ დედამიწაზე ღვთის მონებმა 1931 წელს დიდი სიხარულით მიიღეს სახელი „იეჰოვას მოწმეები“. ისინი მთელი გულით შეუერთდნენ ფსალმუნის 97:11-ში ჩაწერილ სიტყვებს: „სინათლემ გამოანათა მართალთათვის და მხიარულებამ — გულმართალთათვის“. მათ გაიგეს, რომ ახალი შეთანხმება მხოლოდ სულიერ ისრაელთანაა დადებული (ებრაელები 9:15; 12:22, 24). ამ შეთანხმებაში წილი არა აქვს არც ხორციელ ისრაელს, რომელმაც არ მიიღო ცნობა მესიის შესახებ, და არც ზოგადად კაცობრიობას. საკითხის სწორად გაგებამ გზა მისცა ღვთის კაშკაშა სინათლეს, რითაც თეოკრატიის ისტორიაში ახალი ეპოქა დაიწყო. მაშინ ცხადი გახდა, რა გულუხვად ავლენს იეჰოვა წყალობას, სიკეთეს და როგორ უზიარებს ჭეშმარიტებას ყველას, ვინც მას უახლოვდება (გამოსვლა 34:6; იაკობი 4:8). ღვთის ისრაელის გარდა სხვებიც მიიღებდნენ სარგებლობას იმით, რომ ოთხი ანგელოზი გამანადგურებელ ოთხ ქარს აკავებს. ვინ შეიძლება იყვნენ ეს სხვები? ხართ თქვენც ერთ-ერთი მათგანი? ვნახოთ.

[სქოლიოები]

[გვერდი 114 დათმობილი აქვს სურათს]

[სურათები 116, 117 გვერდებზე]

ღვთის ისრაელის არჩევა მიმდინარეობდა ახ. წ. 33 წლის ორმოცდამეათე დღის დღესასწაულიდან 1935 წლამდე, როცა ვაშინგტონში, იეჰოვას მოწმეთა ისტორიულ კონგრესზე აღინიშნა, რომ დიდი მნიშვნელობა ენიჭებოდა უამრავი ხალხის შეკრებას, რომელთაც დედამიწაზე ცხოვრების იმედი ჰქონდათ (გამოცხადება 7:9).

თავი 20

უამრავი ხალხი

1. კიდევ ვის ხედავს იოანე მას შემდეგ, რაც გავიგეთ, როგორ დაესვა ბეჭედი 144 000 ცხებულ ქრისტიანს?

მას შემდეგ, რაც იოანემ მოგვითხრო, როგორ იქნა ბეჭედდასმული 144 000 ქრისტიანი, ის აღგვიწერს ერთ-ერთ ყველაზე ამაღელვებელ ხილვას. იოანეს სიხარულს საზღვარი არ ექნებოდა: „ამის შემდეგ გავიხედე და, აი, უამრავი ხალხი, რომლის დათვლა არავის შეეძლო, ყველა ერიდან და ტომიდან, ხალხიდან და ენიდან, იდგნენ ტახტისა და კრავის წინ თეთრი გრძელი სამოსლით შემოსილნი, ხელში პალმის ტოტები ეჭირათ“ (გამოცხადება 7:9). ოთხი ქარის შეკავება ხსნის საშუალებას აძლევს არა მხოლოდ 144 000 სულიერ ისრაელს, არამედ მრავალენოვან და მრავალეროვან უამრავ ხალხს (გამოცხადება 7:1).

2. როგორ აღწერდნენ სწავლულები უამრავ ხალხს და რას ფიქრობდნენ ბიბლიის მკვლევარები ამ ჯგუფზე?

² სწავლულთა აზრით, უამრავი ხალხის რიცხვში შეიძლება შედიოდნენ გაქრისტიანებული არაებრაელები ან ის წამებული ქრისტიანები, რომლებსაც ზეციერი სამკვიდრო ელით. თავდაპირველად ბიბლიის მკვლევარებიც იმას ფიქრობდნენ, რომ ეს მეორეხარისხოვანი ზეციერი კლასი იყო. მაგალითად, 1886 წელს გამოცემულ წიგნში „ღვთის გეგმა საუკუნეების მანძილზე“ („საღვთო წერილის გამოკვლევა“, ტომი I) აღნიშნული იყო: „ისინი ვერ მიიღებენ ჯილდოდ ტახტსა და ღვთიურ ბუნებას. მართალია, საბოლოოდ სულიერ ქმნილებებად დაიბადებიან, მაგრამ ღვთიური ბუნებას ვერ ეზიარებიან. ისინი ღვთისთვის მიძღვნილი ქრისტიანები არიან, მაგრამ მათზე იმდენად მოქმედებს ქვეყნიერების სული, რომ თავგანწირული სულისკვეთებით ვერ ცხოვრობენ“. ეს შეხედულება დიდი ხნის განმავლობაში იყო გავრცელებული, რაზეც მოწმობს 1930 წელს გამოცემული წიგნი „სინათლე“ (ტომი I), მასში წერია: „უამრავი ხალხი არ ეხმაურება მოწოდებას, გახდნენ უფლის გულმოდგინე მოწმეები“. მათ თვლიდნენ თვითკმაყოფილ ადამიანებად, რომლებსაც ჰქონდათ ჭეშმარიტების ცოდნა, მაგრამ ქადაგებას დიდ დროს არ უთმობდნენ. როგორც იმ დროს ფიქრობდნენ, ზეცაში ისინი მეორეხარისხოვანი ჯგუფის ადგილს დაიკავებდნენ და ქრისტესთან ერთად ვერ იმეფებდნენ.

3. ა) რა იმედი ჰქონდათ სიმართლის მოყვარულ ადამიანებს, რომლებიც მოგვიანებით გულმოდგინედ შეუდგნენ ქადაგებას? ბ) როგორ აიხსნა 1923 წელს გამოცემულ „საგუშაგო კოშკში“ იგავი ცხვრებისა და თხების შესახებ?

³ ცხებულ ქრისტიანებს სხვა თანამოაზრეებიც ჰყავდათ, რომლებიც მოგვიანებით მთელი გულმოდგინებით შეუდგნენ ქადაგებას. მათ არ ჰქონიათ ზეცაში ცხოვრების სურვილი. მათ იმედს კარგად გადმოსცემდა მოხსენება სათაურით — „მოაწია ქვეყნიერების აღსასრულმა — დღეს მცხოვრები მილიონები არასდროს მოკვდებიან“, რომელიც 1918—1922 წლებში იკითხებოდა იეჰოვას ხალხის წინაშეa. ამის შემდეგ მალევე, 1923 წლის 15 ოქტომბრის „საგუშაგო კოშკში“ განხილული იყო იესოს იგავი ცხვრებისა და თხების შესახებ (მათე 25:31—46). მასში ნათქვამი იყო: „ცხვრით წარმოდგენილნი არიან ყველა ეროვნების ადამიანები, რომლებიც არ არიან სულითცხებულები, მაგრამ სიმართლისკენ ისწრაფვიან. ისინი გონებით აღიარებენ იესო ქრისტეს როგორც უფალს და ელიან უკეთეს მომავალს, რომელსაც მისი სამეფო მოიტანს“.

4. როგორ ხდებოდა უფრო და უფრო გასაგები მიწიერ კლასთან დაკავშირებული საკითხები 1931, 1932 და 1934 წლებში?

⁴ რამდენიმე წლის შემდეგ, კერძოდ 1931 წელს, წიგნში „გამართლება“ (ტომი I) განიხილებოდა ეზეკიელის მე-9 თავი, სადაც ნათქვამი იყო, რომ შუბლზე ნიშანდადებულნი ქვეყნიერების აღსასრულს გადაურჩებოდნენ. წიგნში ეს ადამიანები იესოს იგავში მოხსენიებულ ცხვრებთან იყვნენ გაიგივებული. 1932 წელს კი გამოიცა წიგნ „გამართლების“ III ტომი, რომელშიც აღწერილი იყო იეჰონადაბის, იმ არაისრაელი მამაკაცის სულისკვეთება, რომელიც ისრაელის ცხებული მეფის, იეჰუს ეტლზე ავიდა და იმის სანახავად გაეშურა, როგორი შემართებით მოსპობდა იეჰუ ცრუ ღმერთის თაყვანისმცემლებს (2 მეფეები 10:15—17). წიგნში ვკითხულობთ: «იეჰონადაბი წარმოადგენდა, ანუ განასახიერებდა, დედამიწაზე დღეს მცხოვრებ კეთილი ნების ადამიანთა ჯგუფს, რომელიც იეჰუს საქმიანობის [იეჰოვას განაჩენის გაცხადების] პერიოდში სატანის ორგანიზაციის წესებისამებრ კი არ ცხოვრობს, არამედ სიმართლეს უჭერს მხარს. არმაგედონის დროს უფალი გადაარჩენს მათ, იხსნის გასაჭირის დროს და დედამიწაზე მარადიულად დაამკვიდრებს. ისინი „ცხვრების“ ჯგუფს წარმოადგენენ». 1934 წელს „საგუშაგო კოშკში“ გარკვევით იყო ნათქვამი, რომ მიწიერი იმედის მქონე ქრისტიანებმა თავი უნდა მიუძღვნან იეჰოვას და უნდა მოინათლონ. მიწიერ კლასთან დაკავშირებული საკითხები სულ უფრო და უფრო გასაგები ხდებოდა (იგავები 4:18).

5. ა) 1935 წელს რასთან იყო გაიგივებული უამრავი ხალხი? ბ) რა მოხდა, როდესაც ჯ. ფ. რუტერფორდმა სთხოვა იმ დელეგატებს, რომლებსაც დედამიწაზე მარადიული ცხოვრების იმედი ჰქონდათ, ფეხზე წამომდგარიყვნენ?

⁵ დგებოდა დრო, როცა გამოცხადების 7:9—17 მუხლების მნიშვნელობა ცხადი უნდა გამხარიყო (ფსალმუნები 97:11). ჟურნალ „საგუშაგო კოშკში“ არაერთხელ აღინიშნა, რომ კონგრესი, რომელიც 1935 წლის 30 მაისიდან 3 ივნისის ჩათვლით უნდა ჩატარებულიყო ვაშინგტონში (აშშ), „ნამდვილად მანუგეშებელი და სასარგებლო“ იქნებოდა იმ ჯგუფისთვის, რომელსაც იეჰონადაბი განასახიერებდა. მოლოდინი გამართლდა! ჯ. ფ. რუტერფორდმა, რომელიც იმ დროს სამქადაგებლო საქმიანობას ხელმძღვანელობდა, კონგრესის 20 000-მდე დამსწრის წინაშე წარმოთქვა ამაღელვებელი მოხსენება სახელწოდებით „უამრავი ხალხი“. ბიბლიის საფუძველზე მან ჩვენს დღეებში მცხოვრები სხვა ცხვრები გამოცხადების 7:9-ში მოხსენიებულ უამრავ ხალხთან გააიგივა. მოხსენების კულმინაციური მომენტი დადგა მაშინ, როცა რუტერფორდმა თხოვნით მიმართა დამსწრეებს: „გთხოვთ, ფეხზე წამოდგეთ, ვისაც დედამიწაზე მარადიული ცხოვრების იმედი გაქვთ!“ როდესაც დამსწრეთა დიდი ნაწილი წამოდგა, მომხსენებელმა განაცხადა: „აი, უამრავი ხალხი!“ უეცრად სიჩუმე ჩამოვარდა, რასაც მალე მქუხარე ოვაცია მოჰყვა. იოანეს კლასიცა და იეჰონადაბის კლასიც სიხარულს ვერ მალავდა! მომდევნო დღეს 840 ადამიანი მოინათლა. მათგან უმრავლესობა უამრავ ხალხს მიეკუთვნებოდა.

ვინ არის უამრავი ხალხი

6. ა) რატომ შეგვიძლია დარწმუნებულები ვიყოთ, რომ უამრავი ხალხი ღვთისთვის მიძღვნილი და დედამიწაზე მარადიული ცხოვრების იმედის მქონე ქრისტიანები არიან? ბ) რას განასახიერებს უამრავი ხალხის თეთრი გრძელი სამოსელი?

⁶ საიდან ჩანს, რომ უამრავი ხალხი ღვთისთვის მიძღვნილი და დედამიწაზე მარადიული ცხოვრების იმედის მქონე ქრისტიანები არიან? ადრე იოანემ იხილა ზეციერი ჯგუფი, რომელიც „ნაყიდი“ იყო ღვთისთვის „ყოველი ტომიდან, ენიდან, ხალხიდან და ერიდან“ (გამოცხადება 5:9, 10). უამრავი ხალხიც „ყოველი ტომიდან, ენიდან, ხალხიდან და ერიდან“ არის, მაგრამ ისინი ზეცაში არ მიდიან. ღვთის ისრაელისგან განსხვავებით მათი რიცხვი წინასწარ განსაზღვრული არ ყოფილა. წინასწარ ვერავინ იტყვის, რამდენი ადამიანი გაერთიანდება უამრავ ხალხში. მათ გაირეცხეს და გაათეთრეს თავიანთი გრძელი სამოსელი კრავის სისხლით, რაც იმას ნიშნავს, რომ იესოს მსხვერპლისადმი გამოვლენილი რწმენის საფუძველზე იეჰოვა მათ მართლებად აღიარებს (გამოცხადება 7:14). მათ ხელში პალმის ტოტები უჭირავთ და ხმამაღლა ამბობენ, რომ მესია მათი მეფეა.

7, 8. ა) რას გაახსენებდა მოციქულ იოანეს პალმის ტოტები? ბ) რატომ აქნევს უამრავი ხალხი პალმის ტოტებს?

⁷ როდესაც ამ ხილვას ხედავდა, იოანე ალბათ გაიხსენებდა, რაც 60 წელზე მეტი ხნის წინ დედამიწაზე მოხდა, იესოს ცხოვრების ბოლო კვირას. ახ. წ. 33 წლის 9 ნისანს ხალხი ესალმებოდა იერუსალიმში შემოსულ იესოს; მათ «აიღეს პალმის ტოტები, მის შესაგებებლად გავიდნენ და იძახდნენ: „გევედრებით, იხსენი! კურთხეულია იეჰოვას სახელით მომავალი, ისრაელის მეფე!“ » (იოანე 12:12, 13). პალმის ტოტების ქნევითა და მხიარული შეძახილებით უამრავი ხალხიც მსგავსადვე გამოხატავს თავის უსაზღვრო სიხარულს და იესოს იეჰოვას მიერ დანიშნულ მეფედ ცნობს.

⁸ პალმის ტოტები და მხიარული შეძახილები იოანეს კარვობის დღესასწაულსაც მოაგონებდა, რომელსაც ძველ ისრაელში ზეიმობდნენ. ამ დღესასწაულის შესახებ იეჰოვამ თქვა: „პირველ დღეს აიღეთ საუცხოო ხეების ნაყოფი, პალმის რტოები, შეფოთლილი ტოტები, ხევის ალვის ხის ტოტები და შვიდ დღეს იმხიარულეთ თქვენი ღვთის, იეჰოვას წინაშე“. პალმის ტოტები სიხარულის სიმბოლო იყო. დროებითი კარვები ისრაელებს შეახსენებდა, რომ იეჰოვამ თავისი ხალხი ეგვიპტიდან დაიხსნა და უდაბნოში ყოფნისას კარვებში ცხოვრობდნენ. ხიზნები, ქვრივები და უმამო ბავშვებიც ზეიმობდნენ ამ დღესასწაულს. მთელ ისრაელს უნდა გაეხარა (ლევიანები 23:40; მეორე კანონი 16:13—15).

9. რას ამბობს ერთხმად უამრავი ხალხი?

⁹ გასაკვირი არ არის, რომ უამრავი ხალხი პალმის ტოტებს აქნევს, მიუხედავად იმისა, რომ არ შედიან სულიერ ისრაელში; ისინი დიდი სიხარულით ემადლიერებიან ღმერთსა და კრავს გამარჯვებისა და ხსნისთვის. ეს იოანეს ხილვაში ჩანს: «და ხმამაღლა ამბობდნენ: „ხსნას ჩვენს ღმერთს, ტახტზე მჯდომს, და კრავს ვუმადლით“» (გამოცხადება 7:10). თუმცა უამრავ ხალხს შორის ყველა ეთნიკური ჯგუფის წარმომადგენელია, ისინი ხმამაღლა და ერთხმად ყიჟინებენ. ეროვნული და ენობრივი სხვაობის მიუხედავად როგორ ახერხებენ ისინი ამას?

10. ეროვნული და ენობრივი სხვაობის მიუხედავად როგორ ყიჟინებს უამრავი ხალხი ერთხმად?

¹⁰ უამრავი ხალხი იმ ერთადერთი, მართლაც ერთიანი მრავალეროვანი ორგანიზაციის ნაწილია, რომელიც დღეს დედამიწაზე არსებობს. მიუხედავად იმისა, რომ ისინი სხვადასხვა ქვეყანაში ცხოვრობენ, განსხვავებული ნორმებით არ ხელმძღვანელობენ, ისინი ერთსა და იმავე ბიბლიურ პრინციპებს მიჰყვებიან. უამრავი ხალხი არ მონაწილეობს არც ეროვნულ მოძრაობებში და არც რევოლუციებში, ისინი „მახვილებისგან სახნისებს ჭედავენ“ (ესაია 2:4). ისინი არ არიან დაყოფილი სექტებად და კონფესიებად, ქრისტიანული სამყაროს რელიგიებისგან განსხვავებით სხვადასხვა ხმაზე არ ყიჟინებენ და ურთიერთსაპირისპირო მოძღვრებებს არ ასწავლიან; მათ არც სამღვდელო კლასი ჰყავთ, რომელიც მათ მაგივრად უძღვნის ღმერთს ქება-დიდებას; ხსნას წმინდა სულს არ უმადლიან, რადგან არ ემსახურებიან სამერთიან ღმერთს. 230-ზე მეტ ქვეყანაში ისინი ერთხმად მოუხმობენ იეჰოვას სახელს, რადგან ჭეშმარიტების ერთ სუფთა ენაზე ლაპარაკობენ (სოფონია 3:9). ისინი საჯაროდ აცხადებენ, რომ მათი ხსნა იესო ქრისტეს, ხსნის მეთაურის მეშვეობით იეჰოვასგან, ხსნის ღვთისგანაა (ფსალმუნი 3:8; ებრაელები 2:10).

11. როგორ ეხმარება ტექნიკური პროგრესი უამრავ ხალხს, რომ მათი ხმა უფრო მძლავრად ისმოდეს?

¹¹ ტექნიკური პროგრესის წყალობით უამრავი ხალხის ხმა კიდევ უფრო გაძლიერდა. არც ერთი რელიგიური მიმდინარეობა არ გამოსცემს ბიბლიის შესასწავლ დამხმარე პუბლიკაციებს 400-ზე მეტ ენაზე, რადგან არც ერთი მათგანი არ არის დაინტერესებული, რომ ყველა ეროვნების ადამიანამდე ერთი ცნობა მიიტანოს. ამ საქმის გასაადვილებლად იეჰოვას მოწმეთა ხელმძღვანელი საბჭოს სულითცხებული წევრების ზედამხედველობით შეიქმნა მრავალენოვანი ელექტრონული ფოტოაწყობის სისტემა (MEPS). დღეისათვის მსოფლიოს მრავალ ქვეყანაში ამ სისტემის სხვადასხვა ვერსია გამოიყენება, რისი წყალობითაც შესაძლებელია ჟურნალ „საგუშაგო კოშკის“ თვეში ორჯერ 130-ზე მეტ ენაზე ერთდროულად გამოცემა. გარდა ამისა, იეჰოვას მოწმეები ამ წიგნის, „გამოცხადების“ მსგავს წიგნებს ერთდროულად გამოსცემენ მრავალ ენაზე. ამგვარად, იეჰოვას მოწმეები, რომელთა უმრავლესობაც უამრავი ხალხია, ყოველწლიურად ავრცელებენ მრავალ ენაზე გამოცემულ ასობით მილიონ პუბლიკაციას; ეს ყველა ტომიდან და ენიდან კიდევ უფრო მეტ ადამიანს აძლევს ღვთის სიტყვის შესწავლისა და უამრავ ხალხთან ერთად ყიჟინის საშუალებას (ესაია 42:10, 12).

ზეცაში თუ დედამიწაზე?

12, 13. რა გაგებით დგას უამრავი ხალხი „ტახტისა და კრავის წინ“?

¹² საიდან ვიცით, რომ „ტახტის წინ“ დგომა უამრავი ხალხის ზეცაში ყოფნას არ ნიშნავს? ამის საკმაოდ ნათელი მტკიცება არსებობს. მაგალითად, ბერძნული სიტყვა ენოპიონ, რომელიც ბიბლიაში ითარგმნა როგორც „წინ“ (ან „წინაშე“), სიტყვასიტყვით ნიშნავს „მხედველობის არეში“, და რამდენჯერმე გამოიყენება იმ ადამიანებთან დაკავშირებით, რომლებიც დედამიწაზე ცხოვრობენ, მაგრამ იეჰოვას „წინ“ ანუ მისი „მხედველობის არეში“ არიან (1 ტიმოთე 5:21; 2 ტიმოთე 2:14; რომაელები 14:22; გალატელები 1:20). ერთხელ, ისრაელების უდაბნოში ყოფნისას, მოსემ უთხრა აარონს: «უთხარი ისრაელის ძეების მთელ კრებულს: „წარდექით იეჰოვას წინაშე, რადგან გაიგონა მან თქვენი დრტვინვა“ » (გამოსვლა 16:9). იეჰოვას წინაშე წარსადგომად ისრაელებს ზეცაში ასვლა არ სჭირდებოდათ (შეადარეთ ლევიანების 24:8). ისინი ისედაც იეჰოვას მხედველობის არეში იყვნენ და მისი ყურადღება მათკენ იყო მიპყრობილი.

¹³ ჩვენ აგრეთვე ვკითხულობთ: „როცა მოვა კაცის ძე. . . თავისი დიდებით. . . შეიკრიბება მის წინაშე ყველა ხალხი“. ამ წინასწარმეტყველების შესრულების დროს ადამიანები ზეცაში არ იქნებიან; არც ისინი იქნებიან ზეცაში, ვინც „მარადიულად მოიკვეთებიან“ (მათე 25:31—33, 41, 46). ადამიანები იესოს მხედველობის არეში არიან; ის გაასამართლებს მათ. ამის მსგავსად, უამრავი ხალხი „ტახტისა და კრავის წინ“ დგას იმ გაგებით, რომ ისინი მხედველობის არეში ჰყავთ იეჰოვასა და მის მიერ დანიშნულ მეფეს, იესო ქრისტეს, რომელსაც განაჩენი მათ სასარგებლოდ გამოაქვს.

14. ა) ვინ დგას „ტახტის ირგვლივ“ და ზეციერი „სიონის მთაზე“? ბ) რატომ არ შედის უამრავი ხალხი სამღვდელო კლასში მიუხედავად იმისა, რომ ღმერთს „მის ტაძარში“ ემსახურება?

¹⁴ „გამოცხადებაში“ 24 უხუცესისა და 144 000 ცხებული ქრისტიანის შესახებ წერია, რომ ისინი იეჰოვას „ტახტის ირგვლივ“ და ზეციერი „სიონის მთაზე“ არიან (გამოცხადება 4:4; 14:1). უამრავი ხალხი სამღვდელო კლასში არ შედის და ამ ამაღლებულ მდგომარეობას არ იკავებს. მართალია, მოგვიანებით, გამოცხადების 7:15-ში მათზე ნათქვამია, რომ ღმერთს ისინი „მის ტაძარში“ ემსახურებიან, მაგრამ ამ ტაძარში არ იგულისხმება საწმინდრის შიდა ნაწილი ანუ წმინდათაწმინდა. აქ ლაპარაკია ღვთის სულიერი ტაძრის მიწიერ ეზოზე. ბერძნული სიტყვა ნაოს, რომელიც აქ ტაძრად არის ნათარგმნი, ხშირად უფრო ფართო გაგებით გამოიყენება და მასში იეჰოვას თაყვანისმცემლობისთვის აგებული მთლიანი ნაგებობა იგულისხმება. დღეს იეჰოვას ტაძარი წარმოადგენს სულიერ ნაგებობას, რომელშიც შედის როგორც ზეცა, ისე დედამიწა (შეადარეთ მათეს 26:61; 27:5, 39, 40; მარკოზის 15:29, 30; იოანეს 2:19—21).

მთელ სამყაროში ღვთის სადიდებელი ისმის

15, 16. ა) როგორ ხვდებიან ზეცაში უამრავი ხალხის გამოჩენას? ბ) როგორ რეაგირებენ იეჰოვას სულიერი ქმნილებები ღვთის ყოველი განზრახვის გაცხადებაზე? გ) ჩვენ როგორ შეგვიძლია შევუერთდეთ ამ სადიდებელ სიმღერას?

¹⁵ უამრავი ხალხი განადიდებს იეჰოვას, მაგრამ მის სადიდებელს სხვებიც მღერიან. იოანე მოგვითხრობს: «ყველა ანგელოზი ტახტის, უხუცესებისა და ოთხი ცოცხალი არსების ირგვლივ იდგა. ისინი პირქვე დაემხვნენ ტახტის წინ, თაყვანი სცეს ღმერთს და თქვეს: „ამინ! კურთხევა, დიდება, სიბრძნე, მადლობა, პატივი, ძლიერება და ძალა ჩვენს ღმერთს მარადიულად. ამინ!“ » (გამოცხადება 7:11, 12).

¹⁶ როდესაც იეჰოვა ქმნიდა დედამიწას, წმინდა ანგელოზები „ერთად ჟრიამულობდნენ. . . ღვთის ძეები ყიჟინებდნენ“ (იობი 38:7). ანგელოზები იეჰოვას განზრახვების ყოველი ახალი გაცხადებისასაც იყიჟინებდნენ. როდესაც 24 უხუცესი — ზეცაში განდიდებული 144 000 ცხებული ქრისტიანი — ხმამაღლა აქებს კრავს, ღვთის სხვა ყველა ზეციერი ქმნილება უერთდება მათ იესოსა და იეჰოვა ღმერთის განდიდებაში (გამოცხადება 5:9—14). ამ ქმნილებების სიხარულს საზღვარი არ ჰქონდა, როდესაც იხილეს, თავისი განზრახვისამებრ როგორ აღადგინა იეჰოვამ ერთგული ცხებული ქრისტიანები, რათა მათ დიდებული ადგილი დაემკვიდრებინათ სულიერ სამყაროში. ახლა კი, უამრავი ხალხის გამოჩენას იეჰოვას ყველა ერთგული ზეციერი ქმნილება დიდი სიხარულითა და მელოდიური სადიდებლით ხვდება. იეჰოვას ყველა მსახურისთვის უფლის დღე მართლაც ამაღელვებელი დროა (გამოცხადება 1:10). ჩვენ ნამდვილად დიდი პატივი გვხვდა წილად, განვადიდოთ იეჰოვა სადიდებელი სიმღერით, რომელსაც ღვთის სამეფოს შესახებ ქადაგებით ვასრულებთ.

ჩნდება უამრავი ხალხი

17. ა) რა კითხვა დასვა 24 უხუცესთაგან ერთ-ერთმა, და რაზე მეტყველებს ის, რომ პასუხის გაცემა თავადვე შეეძლო? ბ) როდის გაეცა პასუხი უხუცესის კითხვას?

¹⁷ მოციქულ იოანეს დროიდან უფლის დღემდე ცხებული ქრისტიანები ვერ იგებდნენ უამრავი ხალხის ვინაობას. ამიტომ გასაკვირი არაა, რომ ერთ-ერთი იმ 24 უხუცესთაგან, რომლებიც ზეცაში მყოფ ცხებულებს განასახიერებენ, იოანეს სავსებით მართებულ და დამაფიქრებელ კითხვას უსვამს: «მაშინ ერთ-ერთმა უხუცესმა მკითხა: „ვინ არიან ეს თეთრი გრძელი სამოსლით შემოსილნი, და საიდან მოვიდნენ?“ მე მაშინვე მივუგე: „ჩემო ბატონო, შენ იცი“ » (გამოცხადება 7:13, 14ა). ესე იგი ამ უხუცესს შეეძლო ამ კითხვაზე იოანესთვის ეპასუხა. აქედან შეგვიძლია დავასკვნათ, რომ 24 უხუცესის ჯგუფში შემავალი აღდგენილი ცხებულები შეიძლება დღეს მონაწილეობას იღებდნენ ღვთისგან მომდინარე ჭეშმარიტების გაცხადებაში, ხოლო დედამიწაზე მყოფმა იოანეს კლასმა იეჰოვას საქმეებზე დაკვირვებით პასუხი მიიღო კითხვაზე — ვინ იყო უამრავი ხალხი. მათ მალევე იხილეს ღვთიური სინათლის თვალისმომჭრელი ნათება, რისი წყალობითაც 1935 წელს, იეჰოვას მიერ დანიშნულ დროს, სულიერი საკითხები უფრო გასაგები გახდა.

18, 19. ა) რის იმედზე ამახვილებდა ყურადღებას იოანეს კლასი XX საუკუნის 20—30-იან წლებში, მაგრამ უფრო მეტად ვინ ეხმაურებოდა მათ ცნობას? ბ) 1935 წელს უამრავი ხალხის ამოცნობამ რა გახადა ცხადი? გ) რას ცხადყოფს გახსენების საღამოზე დამსწრეთა რიცხვი?

¹⁸ იოანეს კლასი XX საუკუნის 20—30-იან წლებში ხშირად ამახვილებდა ყურადღებას ზეციერ იმედზე, როგორც პუბლიკაციებში, ისე ქადაგებისას. როგორც ჩანს, მაშინ ცხებულთა რიცხვი — 144 000 — ჯერ კიდევ არ იყო შევსებული. მიუხედავად ამისა, სულ უფრო და უფრო მეტ ადამიანს, რომელიც ყურადღებით ისმენდა ნაქადაგებ ცნობას და თავადაც გულმოდგინედ იწყებდა ქადაგებას, დედამიწაზე სამოთხეში მარადიული ცხოვრება იზიდავდა; მათ არ ჰქონიათ ზეცაში ცხოვრების სურვილი. ეს არ იყო მათი მოწოდება. ისინი მცირე სამწყსოს კი არ მიეკუთვნებოდნენ, არამედ სხვა ცხვარს (ლუკა 12:32; იოანე 10:16). 1935 წელს უამრავი ხალხის გამოჩენა იმაზე მიუთითებდა, რომ 144 000 ცხებულის არჩევა დასასრულს უახლოვდებოდა.

¹⁹ ამას ამტკიცებს სტატისტიკური მონაცემებიც. 1938 წელს მთელ მსოფლიოში 59 047 იეჰოვას მოწმე ქადაგებდა. მათგან 36 732-მა მიიღო სიმბოლოები იესოს სიკვდილის გახსენების ყოველწლიურ დღესასწაულზე, რითაც ცხადყვეს, რომ მათ ზეციერი მოწოდება ჰქონდათ. წლების შემდეგ მათი რიცხვი თანდათანობით შემცირდა, უმთავრესად იმის გამო, რომ ერთგული იეჰოვას მოწმეები მიწიერ ცხოვრებას ასრულებდნენ. 2005 წელს გახსენების საღამოს 16 390 116 ადამიანი დაესწრო და მათგან მხოლოდ 8 524-მა მიიღო სიმბოლოები, ანუ დამსწრეთა 0, 05 პროცენტმა.

20. ა) რა უთქვამს ჯ. ფ. რუტერფორდს უამრავი ხალხის შესახებ მეორე მსოფლიო ომის დროს? ბ) რა ცხადყოფს, რომ უამრავი ხალხი მართლაც მრავალრიცხოვანია?

²⁰ როცა მეორე მსოფლიო ომმა იფეთქა, სატანა გააფთრებით შეეცადა უამრავი ხალხის შეკრების შეჩერებას. იეჰოვას საქმე ბევრ ქვეყანაში შეიზღუდა. იმ შავბნელ დროს სიკვდილამდე ცოტა ხნით ადრე ჯ. ფ. რუტერფორდს (გარდაიცვალა 1942 წლის იანვარში) უთქვამს: „საქმეს ისეთი პირი უჩანს, რომ უამრავი ხალხი შეიძლება არც ისე ბევრი აღმოჩნდეს“. მაგრამ ღმერთმა სულ სხვაგვარად წარმართა მოვლენები. 1946 წელს მოწმეთა რიცხვი მთელ მსოფლიოში შესამჩნევად გაიზარდა და 176 456-ს მიაღწია. მათი უმრავლესობა უამრავი ხალხი იყო. 2005 წელს 235 ქვეყანაში 6 390 022 მოწმე ერთგულად ემსახურებოდა იეჰოვას — მართლაც უამრავია ეს ხალხი! მათი რიცხვი კვლავაც იზრდება.

21. ა) როგორ შეესაბამება იოანეს ხილვას უფლის დღის განმავლობაში ღვთის ხალხის შეკრება? ბ) როგორ დაიწყო მნიშვნელოვანი წინასწარმეტყველებების შესრულება?

²¹ უფლის დღის განმავლობაში ღვთის ხალხის შეკრება სრულად შეესაბამება იოანეს ხილვას: თავდაპირველად შეიკრიბნენ ის ცხებულები, რომლებსაც რიცხვი 144 000 უნდა შეევსო, ხოლო შემდეგ — უამრავი ხალხი. ესაიას წინასწარმეტყველების თანახმად ახლა, „უკანასკნელ დღეებში“, ყველა ეროვნების ადამიანი „მიედინება“ იეჰოვას წმინდა თაყვანისმცემლობისკენ. ჩვენ მადლიერები ვართ იეჰოვასი „ახალი ცისა და ახალი დედამიწის“ შექმნისთვის (ესაია 2:2—4; 65:17, 18). ღმერთი ქრისტეში კვლავ თავს უყრის ყველაფერს, რაც ზეცაშია და რაც დედამიწაზეა (ეფესოელები 1:10). ზეციერი სამეფოს ცხებული მემკვიდრეები, რომელთა არჩევაც იესოს ცხოვრების შემდეგ საუკუნეების მანძილზე მიმდინარეობდა, არიან ისინი, ვისზეც ნათქვამია: „რაც ზეცაშია“, უამრავი ხალხი კი ისინი არიან, ვისზეც ნათქვამია: „რაც დედამიწაზეა“. ასეთი თეოკრატიული წესრიგით მსახურება მარადიული ბედნიერების საწინდარია.

უამრავი ხალხი კურთხევებს იმკის

22. კიდევ რას იგებს იოანე უამრავი ხალხის შესახებ?

²² ღვთის მაცნის პირით იოანე უფრო მეტს იგებს უამრავი ხალხის შესახებ: «მან [უხუცესმა] კი მითხრა: „ესენი დიდი გასაჭირიდან მოსულები არიან, მათ გაირეცხეს თავიანთი გრძელი სამოსელი და გაათეთრეს კრავის სისხლით. ამიტომაც არიან ღვთის ტახტის წინ, მის ტაძარში წმინდა მსახურებას ასრულებენ მისთვის დღე და ღამე. ტახტზე მჯდომი კი თავის კარავს გაშლის მათზე“ » (გამოცხადება 7:14ბ, 15).

23. რა არის დიდი გასაჭირი, საიდანაც უამრავი ხალხია მოსული?

²³ ადრე იესოს ნათქვამი ჰქონდა, რომ მისი მეფობის დროს განსაკუთრებული მოვლენა იქნებოდა „დიდი გასაჭირი, როგორიც არ ყოფილა ქვეყნიერების დასაწყისიდან დღემდე და აღარც იქნება“ (მათე 24:21, 22). როცა ამ წინასწარმეტყველების შესრულების დრო დადგება, ანგელოზები აუშვებენ დედამიწის ოთხ ქარს სატანის ქვეყნიერების გასანადგურებლად. პირველი, რაც წარსულს ჩაბარდება, დიდი ბაბილონია, ცრუ რელიგიური სამყარო. შემდეგ კი, როდესაც დიდი გასაჭირი პიკს მიაღწევს, იესო გაათავისუფლებს 144 000-გან დედამიწაზე დარჩენილებს და უამრავ ხალხს (გამოცხადება 7:1; 18:2).

24. რის საფუძველზე გადარჩება უამრავი ხალხი?

²⁴ რის საფუძველზე გადარჩება უამრავი ხალხი? უხუცესი ეუბნება იოანეს, რომ „მათ გაირეცხეს თავიანთი გრძელი სამოსელი და გაათეთრეს კრავის სისხლით“. სხვა სიტყვებით რომ ვთქვათ, ისინი ავლენენ რწმენას იესოსადმი, როგორც გამომსყიდველისადმი, თავს უძღვნიან იეჰოვას, რასაც წყალში ნათლობით გამოხატავენ, და სწორი საქციელის წყალობით „სუფთა სინდისი“ აქვთ (1 პეტრე 3:16, 21; მათე 20:28). ამგვარად, ისინი წმინდები და მართლები არიან იეჰოვას თვალში. ისინი უმანკოდ იცავენ თავს ქვეყნიერებისგან (იაკობი 1:27).

25. ა) როგორ ასრულებს უამრავი ხალხი იეჰოვასთვის „მის ტაძარში წმინდა მსახურებას. . . დღე და ღამე“? ბ) როგორ „შლის“ იეჰოვა „თავის კარავს“ უამრავ ხალხზე?

²⁵ გარდა ამისა, ისინი იეჰოვას გულმოდგინე მოწმეები ხდებიან და „მის ტაძარში წმინდა მსახურებას ასრულებენ მისთვის დღე და ღამე“. თქვენც ღვთისთვის მიძღვნილ უამრავ ხალხს შორის ხართ? თუ დიახ, მაშინ წილად გხვდათ პატივი, მუდმივად ემსახუროთ იეჰოვას მისი დიდებული სულიერი ტაძრის მიწიერ ეზოში. ცხებულთა ხელმძღვანელობით დღეს უამრავი ხალხი სამქადაგებლო საქმიანობის უდიდეს ნაწილს ასრულებს. ამ ჯგუფის ასობით ათასი წარმომადგენელი სრული დროით პიონერად მსახურობს მიუხედავად იმისა, რომ სხვადასხვა საქმის კეთებაც უწევთ. პიონერი ხარ თუ არა, შენ, როგორც ღვთისთვის მიძღვნილ მსახურსა და უამრავი ხალხის ერთ-ერთ წარმომადგენელს, უნდა გიხაროდეს, რადგან შენი რწმენისა და საქმეების გამო მართლად ხარ აღიარებული როგორც ღვთის მეგობარი, და მის კარავში სტუმრად ხარ მიწვეული (ფსალმუნი 15:1—5; იაკობი 2:21—26). ამგვარად, იეჰოვა „თავის კარავს“ შლის მათზე, ვისაც უყვარს ის, და კეთილი მასპინძელივით იცავს მათ (იგავები 18:10).

26. კიდევ რა კურთხევებს მოიმკის უამრავი ხალხი?

²⁶ უხუცესი განაგრძობს: „აღარ მოშივდებათ, აღარც მოსწყურდებათ, აღარც მზე დაჰკრავთ და აღარც პაპანაქება შეაწუხებთ, რადგან ტახტთან მყოფი კრავი დამწყემსავს და სიცოცხლის წყლის წყაროებისკენ წაუძღვება მათ. და მოსწმენდს მათ ღმერთი ყოველ ცრემლს თვალებიდან“ (გამოცხადება 7:16, 17). გარდა იმისა, რომ იეჰოვა სტუმართმოყვარეა, კიდევ რა მნიშვნელობა აქვს ამ სიტყვებს?

27. ა) რა საერთოა ესაიას წინასწარმეტყველებასა და უხუცესის სიტყვებს შორის? ბ) საიდან ჩანს, რომ ესაიას წინასწარმეტყველების შესრულება დაიწყო პავლეს დროს და უშუალოდ ქრისტიანულ კრებას უკავშირდებოდა?

²⁷ მოდი, განვიხილოთ მსგავსი წინასწარმეტყველება: «აი რას ამბობს იეჰოვა: „სასურველ დროს გიპასუხე, ხსნის დღეს დაგეხმარე. . . არც მოშივდებათ და არც მოსწყურდებათ, არც მზე დაჰკრავთ და არც მწველი სიცხე, რადგან მათი შემბრალებელი წაუძღვება მათ და წყლის წყაროებზე მიიყვანს“ » (ესაია 49:8, 10; იხილეთ აგრეთვე ფსალმუნის 121:5, 6). პავლე მოციქულმა ამ წინასწარმეტყველების ნაწყვეტი მოიყვანა და ის „ხსნის დღეს“ დაუკავშირა, რომელიც ახ. წ. 33 წლის ორმოცდამეათე დღის დღესასწაულიდან დაიწყო. პავლე წერდა: «რადგან ის [იეჰოვა] ამბობს: „სასურველ დროს მოგისმინე და ხსნის დღეს დაგეხმარე“. აი ახლაა ყველაზე სასურველი დრო. აი ახლაა ხსნის დღე» (2 კორინთელები 6:2).

28, 29. ა) როგორ შესრულდა ესაიას სიტყვები I საუკუნეში? ბ) როგორ სრულდება უამრავ ხალხზე გამოცხადების 7:16? გ) რა იქნება იმის შედეგი, რომ უამრავ ხალხს კრავი „სიცოცხლის წყლის წყაროებისკენ“ წაუძღვება? დ) რითი განსხვავდება სხვებისგან უამრავი ხალხი?

²⁸ როგორ შესრულდა დანაპირები, რომ ადამიანებს არ მოშივდებოდათ, არ მოსწყურდებოდათ და მწველი სიცხე არ შეაწუხებდათ? I საუკუნეში მცხოვრები ქრისტიანები დროდადრო, რა თქმა უნდა, განიცდიდნენ შიმშილსა და წყურვილს, თუმცა სულიერი გაგებით მათ არაფერი აკლდათ (2 კორინთელები 11:23—27). ყველაფერი უხვად ჰქონდათ, სულიერად არც შიოდათ და არც სწყუროდათ. უფრო მეტიც, მათ წინააღმდეგ იეჰოვას მწველი რისხვა არ ანთებულა, როდესაც მან ახ. წ. 70 წელს იერუსალიმი და მისი ტაძარი გაანადგურა. გამოცხადების 7:16-ში ჩაწერილი სიტყვები სულიერი გაგებით დღეს უამრავ ხალხზეც სრულდება. ცხებულ ქრისტიანებთან ერთად ისინიც ხარობენ უხვი სულიერი საკვებით (ესაია 65:13; ნაუმი 1:6, 7).

²⁹ რა გაჭირვებასა და სიძნელეებსაც არ უნდა აწყდებოდეთ სატანის ქვეყნიერების ამ შავბნელ დროში, თუ თქვენ უამრავ ხალხს მიეკუთვნებით, „მხიარული გული“ გექნებათ (ესაია 65:14). ამ გაგებით იეჰოვას ახლაც კი შეუძლია მოგწმინდოთ „ყოველი ცრემლი თვალებიდან“. თქვენ აღარ გემუქრებათ მცხუნვარე „მზე“ ღვთის სასჯელად, და როცა ანგელოზები გამანადგურებელ ოთხ ქარს აუშვებენ, თქვენ არ იგრძნობთ იეჰოვას უკმაყოფილებით გამოწვეულ „მწველ სიცხეს“. დასრულდება ეს განადგურება და კრავი წაგიძღვებათ, რათა სრულად ისარგებლოთ „სიცოცხლის წყლის“ გამომაცოცხლებელი „წყაროებით“. ამ წყაროებით წარმოდგენილია ყველაფერი, რასაც იეჰოვა ჩვენი მარადიული სიცოცხლისთვის აკეთებს. კრავის სისხლისადმი თქვენი რწმენა გამართლდება და თანდათანობით სრულყოფილებას მიაღწევთ. თქვენ, უამრავი ხალხი, იმ „მილიონთა“ შორის იქნებით, რომლებიც არ იგემებენ სიკვდილს, და სწორედ ეს განგვასხვავებს სხვებისგან! თქვენი თვალებიდან ცრემლი გაქრება (გამოცხადება 21:4).

ჩაეჭიდეთ თქვენს მოწოდებას

30. რა დიდებული სურათი იშლება ჩვენ თვალწინ იოანეს ხილვიდან გამომდინარე, და ვინ „იდგება“?

³⁰ ამ სიტყვებიდან გამომდინარე, მართლაც დიდებული სურათი იშლება ჩვენ თვალწინ! იეჰოვა თავის ტახტზე ზის, მისი მსახურები კი, ზეცაში თუ დედამიწაზე, გაერთიანებულად განადიდებენ მას. მის მიწიერ მსახურებს ესმით, რა დიდი პატივი ხვდათ წილად, რომ მონაწილეობენ ღვთის განდიდებაში იმ ხალხთან ერთად, რომელთა რიცხვიც მუდმივად იზრდება. იეჰოვა და იესო ქრისტე ძალიან მალე აღასრულებენ განაჩენს და გაისმება შეძახილი: „მოვიდა მათი რისხვის დიდი დღე და ვინ გაუძლებს?“ (გამოცხადება 6:17). გაუძლებს კაცობრიობის მხოლოდ მცირე ნაწილი: 144 000 ბეჭედდასმულ ცხებულ ქრისტიანთაგან დედამიწაზე მცხოვრებნი და უამრავი ხალხი, რომელიც „იდგება“, ანუ მათთან ერთად გადარჩება (იერემია 35:19; 1 კორინთელები 16:13).

31. როგორ უნდა მოქმედებდეს იოანეს ხილვის შესრულება ცხებულ ქრისტიანებსა და უამრავ ხალხზე?

³¹ ამის გამო იოანეს კლასი, ცხებული ქრისტიანები, ყოველ ღონეს ხმარობენ, რათა ისწრაფონ „მიზნისკენ, ღვთის მიერ ზეციური მოწოდების ჯილდოსკენ ქრისტე იესოს მეშვეობით“ (ფილიპელები 3:14). მათ კარგად ესმით, რომ დღევანდელი მდგომარეობის გამო განსაკუთრებული სიმტკიცე მართებთ (გამოცხადება 13:10). ისინი დიდი ხნის განმავლობაში ერთგულად ემსახურებიან იეჰოვას, ამიტომ მტკიცედ არიან ჩაჭიდებული თავიანთ რწმენას და ხარობენ იმით, რომ მათი სახელები „ზეცაში ჩაიწერა“ (ლუკა 10:20; გამოცხადება 3:5). უამრავი ხალხის წარმომადგენლებმაც იციან, რომ მხოლოდ „ბოლომდე მომთმენი. . . გადარჩება“ (მათე 24:13). მართალია, უამრავმა ხალხმა, როგორც ჯგუფმა, დიდი გასაჭირი გამოიარა, მაგრამ ამ ჯგუფის თითოეული წევრი თავის მხრივ ყველანაირად უნდა ცდილობდეს სიწმინდის შენარჩუნებას და მსახურებაში აქტიურობას.

32. თუ გავითვალისწინებთ იმას, რომ იეჰოვას რისხვის დღეს მხოლოდ ორი ჯგუფი „იდგება“, რისი გაკეთება გვმართებს დაუყოვნებლივ?

³² არაფერი მიუთითებს იმაზე, რომ ამ ორი ჯგუფის გარდა კიდევ ვინმე „იდგება“ იეჰოვას რისხვის დღეს. რას ნიშნავს ეს იმ მილიონებისთვის, რომლებიც ყოველ წელს ესწრებიან იესოს სიკვდილის გახსენების საღამოს ქრისტეს გაღებული მსხვერპლისადმი პატივისცემის ნიშნად, მაგრამ ჯერ იმდენად არ ავლენენ იესოს მსხვერპლისადმი რწმენას, რომ თავი მიუძღვნან იეჰოვას, მოინათლონ და აქტიურად ემსახურონ მას? გარდა ამისა, რისი თქმა შეიძლება მათზე, ვინც ერთ დროს აქტიურად მსახურობდა, მაგრამ ახლა გული დაიმძიმა ცხოვრებისეული საზრუნავით? დაე, გამოფხიზლდნენ ასეთები და არ მოდუნდნენ, რათა თავი დააღწიონ მოსახდენს და წარსდგნენ კაცის ძის, იესო ქრისტეს წინაშე! დრო არ ითმენს! (ლუკა 21:34—36).

[სქოლიოები]

[გვერდი 121 დათმობილი აქვს სურათს]