თავი 38

ადიდეთ იაჰი მისი სამართლისთვის!

1. რას ამბობს „ციდან დიდი ხმა, როგორც დიდძალი ხალხის ხმა“?

დიდი ბაბილონი მეტად აღარ არსებობს! ეს ნამდვილად სასიხარულო ცნობაა, ამიტომაც ესმის იოანეს სიხარულით წარმოთქმული ქება-დიდების სიტყვები. «ამის შემდეგ გავიგონე ციდან დიდი ხმა, როგორც დიდძალი ხალხის ხმა. ისინი ამბობდნენ: „ადიდეთ იაჰი [ალილუია]a! ხსნა, დიდება და ძლიერება ჩვენს ღმერთს ეკუთვნის, რადგან ჭეშმარიტი და მართალია მისი სამართალი. აღასრულა განაჩენი დიდ მეძავზე, რომელმაც გარყვნა დედამიწა თავისი სიძვით, და მოჰკითხა მან მეძავს თავისი მონების სისხლი“. მათ მაშინვე გაიმეორეს: ადიდეთ იაჰი [ალილუია]b! მეძავის კვამლი არ შეწყდება მარადიულად“ » (გამოცხადება 19:1—3).

2. ა) რას ნიშნავს „ალილუია“ და რისი მიმანიშნებელია ის, რომ იოანეს ორჯერ ესმის „ალილუია“? ბ) ვის ეკუთვნის დიდება დიდი ბაბილონის განადგურებისთვის? ახსენით.

² ალილუია! როგორც ვხედავთ, ეს სიტყვა ნიშნავს „ადიდეთ იაჰი!“. იაჰი ღვთის სახელის, იეჰოვას, შემოკლებული ფორმაა. გვახსენდება ფსალმუნმომღერლის მოწოდება: „ყოველმა სულდგმულმა ადიდოს იაჰი. ადიდეთ იაჰი!“ (ფსალმუნი 150:6). მოზეიმე ზეციერი გუნდი ახლა უკვე მეორეჯერ მღერის ალილუიას, რაც იმაზე მეტყველებს, რომ ღვთიური ჭეშმარიტება განუწყვეტლივ ცხადდება. როგორც ებრაულ, ისე ქრისტიანულ-ბერძნულ წერილებში მხოლოდ ერთ ღმერთზე მიდის საუბარი, რომლის სახელიც იეჰოვაა. ეს ის ღმერთია, რომელმაც დაამხო ძველი ბაბილონი, განაჩენი გამოუტანა დიდ ბაბილონს და გაანადგურა ის. დიდება მიაგეთ მას ამ გამარჯვებისთვის! ბაბილონი ღვთის ძალამ დაამხო და არა იმ ერების ძალამ, რომელთაც ღმერთმა ბაბილონი გაანადგურებინა. ჩვენ ხსნას მხოლოდ იეჰოვას უნდა ვუმადლოდეთ (ესაია 12:2; გამოცხადება 4:11; 7:10, 12).

3. რატომ დაიმსახურა დიდმა მეძავმა ასეთი სასჯელი?

³ რატომ იმსახურებდა ეს დიდი მეძავი ასეთ სასჯელს? იეჰოვას კანონით, რომელიც მან ნოეს და შესაბამისად მთელ კაცობრიობას მისცა, სისხლის უმიზეზოდ დამღვრელი სიკვდილით უნდა დასჯილიყო. ეს კანონი ისრაელისთვის მიცემულ კანონშიც გამეორდა (დაბადება 9:6; რიცხვები 35:20, 21). გარდა ამისა, მოსეს კანონით როგორც ფიზიკური, ისე სულიერი მრუშობა სიკვდილით ისჯებოდა (ლევიანები 20:10; მეორე კანონი 13:1—5). ათასობით წელია, რაც დიდ ბაბილონს სისხლის ღვრაში ედება ბრალი. ის ურცხვად მრუშობს. მაგალითად, რომის კათოლიკური ეკლესიის მიერ მღვდლებისთვის ქორწინების აკრძალვის გამო არაერთი მღვდელი ჩაეფლო დიდ უზნეობაში და დღეს ბევრი მათგანი შიდს—ით არის დაავადებული (1 კორინთელები 6:9, 10; 1 ტიმოთე 4:1—3). დიდი ბაბილონის უდიდესი ცოდვა, რომელიც „ცას მისწვდა“, გამაოგნებელი სულიერი მეძაობაა, რაშიც ცრუ სწავლებების გავრცელება და გახრწნილ პოლიტიკოსებთან ახლო ურთიერთობა იგულისხმება (გამოცხადება 18:5). ის საბოლოოდ დაისაჯა, რის გამოც უამრავი ზეციერი ქმნილება მეორედ წარმოთქვამს „ალილუიას“.

4. რას ნიშნავს ის, რომ დიდი ბაბილონის კვამლი „არ შეწყდება მარადიულად“?

⁴ დიდი ბაბილონი დაპყრობილი ქალაქივით დაიწვა და მისი კვამლი „არ შეწყდება მარადიულად“. როცა ქალაქს დამპყრობელთა ჯარი წვავს, კვამლი მანამდე ასდის, სანამ ნაკვერჩხლები არ ჩაინავლება. ვინც შეეცდება მბოლავი ქალაქის აღდგენას, მხრჩოლავ ნანგრევებში დაიწვება. დიდი ბაბილონის კვამლი „არ შეწყდება მარადიულად“, რაც იმას ნიშნავს, რომ მისი სასჯელი საბოლოოა და ვერავინ შეძლებს ამ შემზარავი ქალაქის აღდგენას. ცრუ რელიგია სამუდამოდ მოისპო. ალილუია! (შეადარეთ ესაიას 34:5, 9, 10).

5. ა) რას აკეთებენ და რას ამბობენ 24 უხუცესი და ოთხი ცოცხალი ქმნილება? ბ) რატომ არის ეს „ალილუია“ ქრისტიანულ სამყაროს ტაძრებში შესრულებულ „ალილუიაზე“ ბევრად მელოდიური?

⁵ ადრეულ ხილვაში იოანემ იხილა ტახტის ირგვლივ ოთხი ცოცხალი ქმნილება 24 უხუცესთან ერთად, რომლებიც ზეცაში განდიდებულ სამეფოს მემკვიდრეებს განასახიერებენ (გამოცხადება 4:8—11). ახლა იოანე კვლავ ხედავს მათ. ამჯერად ისინი დიდი ბაბილონის განადგურების გამო გრგვინვით წარმოთქვამენ მესამე „ალილუიას“: «ოცდაოთხი უხუცესი და ოთხი ცოცხალი არსება დაემხვნენ, თაყვანი სცეს ტახტზე მჯდომ ღმერთს და თქვეს: „ამინ! ადიდეთ იაჰი [ალილუია]c!“ » (გამოცხადება 19:4). კრავის სადიდებელი „ახალი სიმღერის“ გარდა ეს დიდებული გუნდი „ალილუიასაც“ მღერის (გამოცხადება 5:8, 9). ისინი დიდებული გამარჯვების სიმღერას მღერიან და დიდებას მიაგებენ უზენაეს უფალ იეჰოვას დიდ ბაბილონზე, დიდ მეძავზე სრული გამარჯვებისთვის. ეს „ალილუია“ ქრისტიანული სამყაროს ტაძრებში შესრულებულ „ალილუიაზე“ ბევრად მელოდიურია; ამ ტაძრებში შეურაცხყოფენ იეჰოვას ანუ იაჰს და არაფრად აგდებენ მას. მეტად არავინ იმღერებს იეჰოვას სახელის შეურაცხმყოფელ ფარისევლურ სიმღერას.

6. ვისი ხმა ისმის, რისკენ მოუწოდებს ის და ვინ ეხმაურება ამ ხმას?

⁶ იეჰოვამ 1918 წლიდან დაიწყო თავისი „სახელის მოშიშების, პატარებისა და დიდების“ დაჯილდოება. იეჰოვამ აღადგინა სიკვდილამდე ერთგული ცხებული ქრისტიანები და ზეცაში 24 უხუცესს მიაკუთვნა (გამოცხადება 11:18). როგორც იოანე ამბობს, სხვებიც უერთდებიან „ალილუიას“: «ტახტიდან გამოვიდა ხმა, რომელმაც თქვა: „ადიდეთ ჩვენი ღმერთი ყველა მისმა მონამ, ვისაც მისი შიში გაქვთ, დიდებმაც და პატარებმაც“ » (გამოცხადება 19:5). ეს ხმა იეჰოვას წარმომადგენლის, მისი ძის, იეჰოვას ტახტთან მდგომი იესო ქრისტეს ხმაა (გამოცხადება 5:6). ამ სიმღერას „ყველა მისი მონა“ მღერის, როგორც ზეცაში, ისე დედამიწაზე. დედამიწაზე ამ სიმღერას ცხებული იოანეს კლასი უძღვება. რა სიხარულით ემორჩილებიან ისინი მითითებას: „ადიდეთ ჩვენი ღმერთი“!

7. დიდი ბაბილონის განადგურების შემდეგ ვინ განადიდებს იეჰოვას?

⁷ მონების რიცხვში უამრავი ხალხიც შედის. 1935 წლიდან ისინი დიდი ბაბილონიდან გამოვიდნენ. მათზეც შესრულდა ღვთის დაპირება: „ის აკურთხებს იეჰოვას მოშიშებს, დიდებსა და პატარებს“ (ფსალმუნი 115:13). მეძავის, დიდი ბაბილონის განადგურების შემდეგ უამრავი ხალხის მილიონობით წარმომადგენელი იოანეს კლასთან და ზეციერ ლაშქართან ერთად განადიდებს ღმერთს. მოგვიანებით, როცა დიდი ბაბილონის სამუდამო განადგურებას შეიტყობენ, უეჭველად იმღერებენ „ალილუიას“ დედამიწაზე აღდგენილები, როგორც ცნობილი ისე უცნობი ადამიანები (გამოცხადება 20:12, 15). მთელი დიდება იეჰოვას ეკუთვნის ძველ მეძავზე ბრწყინვალე გამარჯვებისთვის!

8. დიდი ბაბილონის განადგურებამდე რისკენ უნდა აღგვძრას ზეცაში შესრულებულმა სადიდებელმა სიმღერამ?

⁸ ეს აღგვძრავს, რომ დღეს სრული მონაწილეობა მივიღოთ ღვთის საქმეში! დაე, ახლავე, დიდი ბაბილონის დამხობამდე და განადგურებამდე, იაჰის ყველა მსახურმა მთელი სულითა და გულით გააცხადოს ღვთის განაჩენი და სამეფოს დიდებული იმედი! (ესაია 61:1—3; 1 კორინთელები 15:58).

ალილუია, იეჰოვაა მეფე!

9. რატომ ჟღერს ბოლო „ალილუია“ ასე მძლავრად?

⁹ იოანე სიხარულის სხვა მიზეზებსაც მოიხსენიებს: «გავიგონე ხმა, როგორც დიდძალი ხალხის ხმა, როგორც ბევრი წყლის ხმა, და როგორც ძლიერი ჭექა-ქუხილის ხმა: „ადიდეთ იაჰი [ალილუია]d, რადგან გამეფდა ჩვენი ღმერთი იეჰოვა, ყოვლისშემძლე“ » (გამოცხადება 19:6). ეს მეოთხე და ბოლო „ალილუიაა“, რომელიც ამ ცნობის ყოვლისმომცველობაზე მიუთითებს. ეს ძლიერი, ზეციერი ხმა ადამიანთა ნებისმიერი გუნდის ხმაზე დიდებულია, ნებისმიერი ჩანჩქერის ხმაზე შთამბეჭდავია და ნებისმიერი ჭექა-ქუხილის ხმაზე შიშის მომგვრელია. მილიონობით ზეციერი ქმნილების ხმა საზეიმოდ აცხადებს, რომ „გამეფდა ჩვენი ღმერთი იეჰოვა, ყოვლისშემძლე“!

10. რა გაგებით შეიძლება ითქვას, რომ იეჰოვა დიდი ბაბილონის განადგურების შემდეგ გამეფდა?

¹⁰ რა გაგებით გამეფდა იეჰოვა? ჯერ კიდევ ასწლეულების წინ ფსალმუნმომღერალმა თქვა: „ღმერთია ჩემი მეფე უხსოვარი დროიდან“ (ფსალმუნი 74:12). იეჰოვა მანამდეც მეფობდა. მაშ, როგორ მღერის ზეციერი გუნდი, რომ „იეჰოვა გამეფდა“? ის იმ გაგებით გამეფდა, რომ დიდი ბაბილონის განადგურებით მან ჩამოიშორა კადნიერი მტერი, რომელიც ხალხს ხელს უშლიდა სამყაროს უზენაესი ღვთის მორჩილებაში. ცრუ რელიგია მეტად ვეღარ აღძრავს დედამიწის მმართველებს ღვთის წინააღმდეგ. როცა ძველმა ბაბილონმა მსოფლიო ბატონობა დაკარგა, სიონმა ასეთი ტრიუმფალური ცნობა მოისმინა: „გამეფდა შენი ღმერთი!“ (ესაია 52:7). 1914 წელს სამეფოს დაბადების შემდეგ, 24 უხუცესმა განაცხადა: „გმადლობთ, იეჰოვა ღმერთო, . . შენი დიდი ძალა რომ გამოიყენე და დაიწყე მეფობა“ (გამოცხადება 11:17). შეძახილი დიდი ბაბილონის განადგურების შემდეგაც მეორდება: „გამეფდა იეჰოვა!“ ადამიანთა შექმნილი ვერც ერთი ღმერთი ვერ შეედავება უზენაესობაში ჭეშმარიტ ღმერთს, იეჰოვას.

კრავის ქორწილი ახლოსაა!

11, 12. ა) როგორ მიმართავდა ძველი იერუსალიმი ძველ ბაბილონს, და როგორ შეეძლო მიემართა ახალ იერუსალიმს დიდი ბაბილონისთვის? ბ) დიდ ბაბილონზე გამარჯვების შემდეგ რას მღერის და რას აცხადებს ზეციერი ლაშქარი?

¹¹ „ქალო, ჩემო მტერო“, — კერპთაყვანისმცემელ ბაბილონს ასე მიმართავდა იერუსალიმი, სადაც იეჰოვას თაყვანსსაცემად ტაძარი იდგა (მიქა 7:8). ამის მსგავსად „წმინდა ქალაქს, ახალ იერუსალიმს“, 144 000-ით წარმოდგენილ პატარძალს, სრული საფუძველი აქვს, რომ დიდ ბაბილონს თავისი მტერი უწოდოს (გამოცხადება 21:2). ბოლოს და ბოლოს ამ დიდ მეძავს გასაჭირი, უბედურება და განადგურება ეწია. ვერც სპირიტიზმმა იხსნა იგი და ვერც ასტროლოგიამ (შეადარეთ ესაიას 47:1, 11—13). ეს ჭეშმარიტი თაყვანისმცემლობის დიდი გამარჯვებაა!

¹² დიდი ბაბილონი, საძულველი მეძავი განადგურდა. ამიტომ ახლა მთელი ყურადღება ქალწულზე, კრავის უმწიკვლო პატარძალზე გადადის. ზეციერი ლაშქარი სიხარულით განადიდებს იეჰოვას: „ვიხაროთ და ვიმხიარულოთ და დიდება მივაგოთ მას, რადგან დადგა კრავის ქორწილის დრო და მისი პატარძალი გაემზადა. მას ნება მიეცა, ჩაეცვა მბრწყინავი და სუფთა, ძვირფასი სელის სამოსელი, რადგან ძვირფასი სელის სამოსელი წმინდების სიმართლის საქმეებს ნიშნავს“ (გამოცხადება 19:7, 8).

13. რა მზადება მიმდინარეობდა კრავის ქორწილისთვის საუკუნეების განმავლობაში?

¹³ საუკუნეების განმავლობაში იესო სიყვარულით უძღვება სამზადისს ამ ზეციერი ქორწილისთვის (მათე 28:20; 2 კორინთელები 11:2). მან განწმინდა სულიერი ისრაელის 144 000 წარმომადგენელი, რომ „საკუთარი თავისთვის წარედგინა კრება მთელი სიდიადით, რომელსაც არ ექნება ლაქა, ნაოჭი ან რაიმე მსგავსი, არამედ წმინდა და უმანკო იქნება“ (ეფესოელები 5:25—27). „ზეციური მოწოდების ჯილდოს“ მისაღებად თითოეულმა ცხებულმა ქრისტიანმა უნდა გაიხადოს „ძველი პიროვნება მისი საქმეებითურთ“ და შეიმოსოს ახალი პიროვნებით და სიმართლით იმოქმედოს იეჰოვასთვის სულითა და გულით (ფილიპელები 3:8, 13, 14; კოლოსელები 3:9, 10, 23).

14. როგორ ცდილობდა სატანა კრავის პატარძლის წაბილწვას?

¹⁴ ახ. წ. 33 წლის ორმოცდამეათე დღის დღესასწაულიდან სატანა დიდ ბაბილონს იყენებდა კრავის პატარძლის წასაბილწავად. I საუკუნის დასასრულისთვის მან კრებაში ბაბილონური რელიგიის თესლი ჩათესა (1 კორინთელები 15:12; 2 ტიმოთე 2:18; გამოცხადება 2:6, 14, 20). მოციქულმა პავლემ რწმენის დამანგრევლები ასეთი სიტყვებით აღწერა: „ასეთები ცრუმოციქულები არიან, ცბიერი მუშები, რომლებიც ქრისტეს მოციქულთა სახეს იღებენ. თუმცა რა გასაკვირია, თვით სატანაც ხომ სინათლის ანგელოზის სახეს იღებს“ (2 კორინთელები 11:13, 14). მას შემდეგ განდგომილი ქრისტიანული სამყარო, ისევე როგორც დიდი ბაბილონის სხვა წარმომადგენლები, „ძოწისფერი და ალისფერი ქსოვილით“ იმოსებოდა და „ოქროთი, ძვირფასი ქვებითა და მარგალიტებით“ იყო შემკული, ანუ მდიდრდებოდა და განსაკუთრებული უპირატესობით სარგებლობდა (გამოცხადება 17:4). მღვდლები და პაპები მჭიდროდ თანამშრომლობდნენ ისეთ სისხლისმსმელ იმპერატორებთან, როგორებიც იყვნენ კონსტანტინე და კარლოს დიდი. ის არასოდეს შემკულა „წმინდების სიმართლის საქმეებით“. მას ქრისტეს პატარძლის მხოლოდ იერი აქვს, სინამდვილეში კი სატანის სიცრუის „შედევრია“. როგორც იქნა, მას სამუდამოდ მოეღო ბოლო.

კრავის პატარძალი გაემზადა

15. როგორ ხდება ბეჭდის დასმა და რა მოეთხოვებათ ცხებულ ქრისტიანებს?

¹⁵ ახლა, თითქმის 2 000 წლის შემდეგ პატარძლის კლასის 144 000 წევრი მზად არის. მაგრამ როდის შესრულდება სიტყვები: კრავის „პატარძალი გაემზადა“? ახ. წ. 33 წლის ორმოცდამეათე დღის დღესასწაულიდან მორწმუნე ცხებულები „გამოსასყიდით გათავისუფლების დღისთვის“ ბეჭედდასმული იქნენ დაპირებული წმინდა სულით. როგორც მოციქულმა პავლემ თქვა, ღმერთმა „თავისი ბეჭედიც დაგვასვა და მოგვცა სული ჩვენს გულებში, რაც მომავლის საწინდარია“ (ეფესოელები 1:13; 4:30; 2 კორინთელები 1:22). ყოველი ცხებული ქრისტიანი მოწოდებული, რჩეული და ერთგულია (გამოცხადება 17:14).

16. ა) როდის დაესვა ბეჭედი მოციქულ პავლეს და საიდან ვიცით ეს? ბ) როდის იქნება საბოლოოდ მზად კრავის პატარძალი?

¹⁶ ათწლეულების განმავლობაში გამოცდის შემდეგ პავლეს შეეძლო ეთქვა: „ღირსეულ ბრძოლაში ვიბრძოდი, სარბიელი ბოლომდე გავირბინე და რწმენა შევინარჩუნე. ამიერიდან სიმართლის გვირგვინი მენახება, რომლითაც იმ დღეს დამაჯილდოებს უფალი, მართალი მოსამართლე, და მარტო მე კი არა, ყველას, ვინც მისი გამოცხადება შეიყვარა“ (2 ტიმოთე 4:7, 8). როგორც ჩანს, მოციქულს უკვე ბეჭედი ჰქონდა დასმული, თუმცა ის ჯერ კიდევ ცოცხალი იყო და წამებით სიკვდილი ელოდა. ამის მსგავსად, უნდა მოვიდეს დრო, როცა დედამიწაზე დარჩენილი 144 000 სათითაოდ დაიბეჭდება როგორც იეჰოვას საკუთრება (2 ტიმოთე 2:19). ეს მაშინ მოხდება, როცა კრავის პატარძალი საბოლოოდ იქნება მზად. იმ დროისთვის 144 000 სულითცხებულიდან უმეტესობას უკვე მიღებული ექნება ზეციური ჯილდო, დედამიწაზე მცხოვრები სულითცხებულებიც, როგორც ერთგული მსახურები, საბოლოოდ იქნებიან გამართლებულნი და ბეჭედდასმულნი.

17. როდის იქნება კრავის ქორწილი?

¹⁷ იეჰოვას განზრახვის თანახმად მაშინ, როცა 144 000-ს საბოლოოდ დაესმება ბეჭედი, ანგელოზები დიდი გასაჭირის ოთხ ქარს აუშვებენ (გამოცხადება 7:1—3). განაჩენი ჯერ დიდ ბაბილონზე შესრულდება, რომელიც მეძავს მოგვაგონებს. ამის შემდეგ გამარჯვებული ქრისტე დაუყოვნებლივ დაიწყებს დედამიწაზე სატანის ორგანიზაციის სხვა ნაწილების განადგურებას არმაგედონში, ბოლოს კი სატანას და მის დემონებს უფსკრულში ჩაყრის (გამოცხადება 19:11—20:3). თუ ცხებულთაგან იმ დროს ზოგიერთი დედამიწაზე იქნება, ისინი ქრისტეს ლაშქრობის დასრულებისთანავე მიიღებენ ზეციერ ჯილდოს და პატარძლის კლასს შეუერთდებიან. კრავის ქორწილი ღვთის მიერ დანიშნულ დროს იქნება.

18. რა თანამიმდევრობით არის აღწერილი კრავის ქორწილი 45-ე ფსალმუნში?

¹⁸ მოვლენების თანამიმდევრობა 45-ე ფსალმუნშია ნაწინასწარმეტყველები. პირველ რიგში ტახტზე ასული მეფე გამოდის თავისი მტრების წინააღმდეგ გასალაშქრებლად (1—7 მუხლები). ამას მოჰყვება ქორწილი. ზეციერ პატარძალს დედამიწაზე ეყოლება ქალწული მხლებლები, უამრავი ხალხი (8—15 მუხლები). ამ ქორწინების ნაყოფი ის იქნება, რომ აღდგენილი კაცობრიობა სრულყოფილებას მიაღწევს დედამიწაზე დანიშნული მთავრების ხელმძღვანელობით (16, 17 მუხლები). კრავის ქორწილი დიდებულ კურთხევებს მოიტანს.

ბედნიერნი არიან მიწვეულნი

19. რა არის ბედნიერების შვიდი მიზეზიდან მეოთხე და ვინ იზიარებს ამ ბედნიერებას?

¹⁹ იოანე ახლა ბედნიერების შვიდი მიზეზიდან მეოთხეს მოიხსენიებს: «ანგელოზმა მითხრა: „დაწერე: ბედნიერნი არიან კრავის საქორწილო ვახშამზე მიწვეულნი“. აგრეთვე მითხრა: „ეს ღვთის ჭეშმარიტი სიტყვებია“ » (გამოცხადება 19:9)e. „კრავის საქორწილო ვახშამზე“ მიწვეულნი არიან პატარძლის კლასის წევრები (შეადარეთ მათეს 22:1—14). ყველა ცხებული ანუ პატარძლის კლასის ყველა წარმომადგენელი ამ მოწვევით ხარობს. მიწვეულთა უმეტესობა უკვე ზეცაშია, სადაც საქორწილო ვახშამი გაიმართება; მათგან ჯერ კიდევ დედამიწაზე მცხოვრებნი კი იმით ხარობენ, რომ მიწვეულნი არიან. ისინი უეჭველად იქნებიან საქორწილო ვახშამზე (იოანე 14:1—3; 1 პეტრე 1:3—9). პატარძლის კლასის ზეცაში აღდგომის შემდეგ პატარძალი და კრავი იქორწინებენ.

20. ა) რას ნიშნავს ფრაზა: „ეს ღვთის ჭეშმარიტი სიტყვებია“? ბ) როგორ იმოქმედა იოანეზე ანგელოზის სიტყვებმა და რა უთხრა ანგელოზმა?

²⁰ ანგელოზმა თქვა: „ეს ღვთის ჭეშმარიტი სიტყვებია“. სიტყვა „ჭეშმარიტი“ თარგმნილია ბერძნული სიტყვიდან ალეტინოს და ნიშნავს ნამდვილს ან საიმედოს. ეს სიტყვები სრულიად ჭეშმარიტი და სანდოა, რადგან თვითონ იეჰოვა ამბობს (შეადარეთ 1 იოანეს 4:1—3; გამოცხადების 21:5; 22:6). იოანეს, როგორც საქორწილო წვეულებაზე ერთ-ერთ მიწვეულთაგანს, დიდი სიხარული უნდა განეცადა ამის მოსმენით და იმაზე დაფიქრებით, თუ რა კურთხევები ელოდა პატარძლის კლასს. ამან იოანე ისე შეძრა, რომ ანგელოზს მისთვის შენიშვნის მიცემა მოუწია. იოანე ამბობს: «მაშინ დავემხვე მის ფეხებთან, რომ თაყვანი მეცა მისთვის, მაგრამ მან მითხრა: „იცოდე, ამას ნუ იზამ! მეც ისეთივე მონა ვარ, როგორიც შენ და შენი ძმები, რომლებიც იესოს შესახებ დამოწმების საქმეს ასრულებენ. ღმერთს ეცი თაყვანი“ » (გამოცხადება 19:10ა).

21. ა) რას ვიგებთ „გამოცხადებიდან“ ანგელოზების შესახებ? ბ) როგორი დამოკიდებულება უნდა ჰქონდეთ ქრისტიანებს ანგელოზების მიმართ?

²¹ „გამოცხადება“ ანგელოზების ერთგულებისა და გულმოდგინების შესახებ მოწმობს. მათ თავიანთი წვლილი შეაქვთ ჭეშმარიტების გაცხადებაში (გამოცხადება 1:1). ისინი ადამიანებთან ერთად მონაწილეობენ სასიხარულო ცნობის ქადაგებაში და სიმბოლური წყლულების გადმოღვრაში (გამოცხადება 14:6, 7; 16:1). ანგელოზებმა იესოსთან ერთად ზეციდან გადმოყარეს სატანა და მისი ანგელოზები და არმაგედონშიც იესოსთან ერთად იბრძოლებენ (გამოცხადება 12:7; 19:11—14). მათ თვით იეჰოვას წინაშე წარდგომის უფლება აქვთ (მათე 18:10; გამოცხადება 15:6). მიუხედავად ამისა, ისინი თავმდაბლად ემსახურებიან ღმერთს. წმინდა თაყვანისმცემლობა გამორიცხავს ანგელოზების თაყვანისცემას ან წმინდანების, ან ანგელოზების მეშვეობით ღვთის თაყვანისცემას (კოლოსელები 2:18). ქრისტიანები მხოლოდ იეჰოვას სცემენ თაყვანს და მას იესოს სახელით მიმართავენ თხოვნით (იოანე 14:12, 13).

იესოს როლი წინასწარმეტყველებაში

22. რა უთხრა ანგელოზმა იოანეს და რას ნიშნავს ეს სიტყვები?

²² შემდეგ ანგელოზი ამბობს: „იესოს შესახებ დამოწმებაა წინასწარმეტყველების მიზანი“ (გამოცხადება 19:10ბ). რას ნიშნავს ეს? ეს იმას ნიშნავს, რომ ღვთისგან შთაგონებული ყველა წინასწარმეტყველება იესოს ირგვლივ ტრიალებს და ნათელს ჰფენს, რა როლი აკისრია იესოს იეჰოვას განზრახვებში. ბიბლიის პირველ წინასწარმეტყველებაში შთამომავლის მოსვლა იყო ნაწინასწარმეტყველები (დაბადება 3:15). ეს შთამომავალი იესო იყო და ამ ძირითად წინასწარმეტყველებაზე უამრავი სხვა წინასწარმეტყველება იყო დაფუძნებული. მოციქულმა პეტრემ მორწმუნე კორნელიუსს, უცხოტომელ კაცს უთხრა: „მასზე [იესოზე] ყველა წინასწარმეტყველი მოწმობს“ (საქმეები 10:43). დაახლოებით 20 წლის შემდეგ მოციქულმა პავლემ თქვა: «რამდენი დანაპირებიც არ უნდა ჰქონდეს ღმერთს, ყველა მათგანი „დიახ“ ხდება მისი [იესოს] მეშვეობით» (2 კორინთელები 1:20). 43 წლის გასვლის შემდეგ იოანე წერს: „ჭეშმარიტება. . . იესო ქრისტეს მეშვეობით გამოჩნდა“ (იოანე 1:17).

23. იესოს მდგომარეობა და ძალაუფლება რატომ არ ხდის იეჰოვას თაყვანისცემას უმნიშვნელოს?

²³ ეს იმას ხომ არ ნიშნავს, რომ იეჰოვას თაყვანისცემა უმნიშვნელო ხდება? არა. გავიხსენოთ ანგელოზის რჩევა: „ღმერთს ეცი თაყვანი“. იესო იეჰოვას არასოდეს უპირისპირდება (ფილიპელები 2:6). მართალია, ყველა ანგელოზს მდაბლად უნდა ეცა თაყვანი იესოსთვის და ყველა ქმნილებას უნდა ეღიარებინა მისი მაღალი მდგომარეობა, რათა „იესოს სახელით მუხლი მოიდრიკოს ყველამ“, მაგრამ ისიც უნდა აღინიშნოს, რომ ეს ხდება „ღვთის, მამის სადიდებლად“ და მისი ბრძანებისამებრ (ებრაელები 1:6; ფილიპელები 2:9—11). იეჰოვამ იესოს დიდი ძალაუფლება მისცა და ამ ძალაუფლების აღიარებით ღმერთს განვადიდებთ. თუ არ დავემორჩილებით იესოს მმართველობას, ეს იგივეა, რომ თავად იეჰოვა ღმერთის მორჩილებაზე ვთქვათ უარი (ფსალმუნი 2:11, 12).

24. რა ორ გასაოცარ მოვლენას მოველით და რომელ სიტყვებს უნდა გამოვეხმაუროთ?

²⁴ მოდი, ერთად გამოვეხმაუროთ 146—150 ფსალმუნების შესავალი სიტყვების მოწოდებას: „ადიდეთ იაჰი!“ დაე, ხმამაღლა გაისმოდეს „ალილუია“, ვიდრე ველოდებით იეჰოვას გამარჯვებას ბაბილონურ ცრუ რელიგიურ სამყაროზე! დაე, დიდი სიხარულით დაველოდოთ კრავის ქორწილს!

[სქოლიოები]

[ჩარჩო 273 გვერდზე]

„წერილი სოდომსა და გომორას“

ამ სათაურით ლონდონის „დეილი ტელეგრაფის“ 1987 წლის 12 ნოემბრის გამოცემა იუწყებოდა, რა შუამდგომლობით მიმართეს ანგლიკანური ეკლესიის გენერალურ სინოდს. სინოდს სთხოვდნენ, ეკლესიიდან მოეკვეთათ ჰომოსექსუალისტი „ქრისტიანები“. ჟურნალისტმა გოდფრი ბარკერმა დაწერა: «გუშინ კენტერბერის არქიეპისკოპოსმა დამწუხრებულმა აღნიშნა: „საინტერესოა დღეს რა წერილს მისწერდა წმინდა პავლე ანგლიკანურ ეკლესიას?“ ». ბატონმა ბარკერმა თავად უპასუხა ამ კითხვას: „წერილი სოდომსა და გომორას“. შემდეგ განაგრძო: „დ-რ რანსის [არქიეპისკოპოსი] თვალსაზრისით ეს წერილი რომაელებისთვის მიწერილი წერილის პირველი თავის მსგავსი იქნებოდა“.

ჟურნალისტმა მოიყვანა პავლეს სიტყვები რომაელების 1:26—32-დან: „გადასცა ისინი ღმერთმა სამარცხვინო ვნებებს, . . გახურდნენ ერთმანეთთან ავხორცობით — კაცები კაცებთან. . . თუმცა შესანიშნავად იციან ღვთის სამართალი, რომ ამის ჩამდენნი სიკვდილს იმსახურებენ, ისინი არა მხოლოდ აგრძელებენ ასე მოქმედებას, არამედ სხვებსაც უწონებენ ასეთ საქციელს“. მან დაასკვნა: „წმინდა პავლე მრევლზე დარდობდა, დ-რ რანსის კი სამღვდელოება ადარდებს“.

რატომ ადარდებდა არქიეპისკოპოსს ეს საკითხი? ლონდონის 1987 წლის 22 ოქტომბრის „დეილი მეილში“ თვალშისაცემი სათაურები გამოჩნდა: „ყოველი მესამე მღვდელი ჰომოსექსუალისტია. . “., „ჰომოსექსუალისტები რომ განდევნონ, ანგლიკანური ეკლესია დაიხურება“. სტატიებში მოყვანილი იყო ლესბოსელთა და ჰომოსექსუალისტთა ქრისტიანული მოძრაობის „წმინდა“ გენერალური მდივნის სიტყვები: „ამ შუამდგომლობის დაკმაყოფილება ეკლესიის დაღუპვას ნიშნავს და კენტერბერის არქიეპისკოპოსმა იცის ეს. ჩვენი მონაცემებით ანგლიკანური ეკლესიის სამღვდელოების 30—40 პროცენტი ჰომოსექსუალისტია. ისინი ყველაზე აქტიურად მონაწილეობენ ეკლესიის საქმეებში“. ეკლესიის მრევლის შემცირება, უდავოა, ნაწილობრივ იმ სიძულვილის შედეგია, რასაც ხალხში ჰომოსექსუალისტი მღვდლები იწვევენ.

რა გადაწყვიტა საეკლესიო სინოდმა? სინოდის წევრების უმეტესობამ, 388 წევრმა (სამღვდელოების 95 პროცენტმა), ბოლომდე არ დაუჭირა მხარი შუამდგომლობას. 1987 წლის 14 ნოემბრის „ეკონომისტში“ ნათქვამი იყო: «ანგლიკანური ეკლესია ჰომოსექსუალიზმს ეწინააღმდეგება, თუმცა არა კატეგორიულად. გენერალურმა სინოდმა, ეკლესიის უმაღლესმა ორგანომ, ანგარიში გაუწია ჰომოსექსუალისტ მღვდლებს და იმავე კვირას გადაწყვიტა, რომ სიძვისა და მრუშობისგან განსხვავებით ჰომოსექსუალიზმი ცოდვა არ არის. უბრალოდ, ეს არის „გადახვევა კანონზომიერებისგან“, ეს კანონზომიერება კი ის არის, რომ „სქესობრივი ურთიერთობა გამართლებულია დაქორწინებულებს შორის და ცოლ-ქმარს შორის ერთგულების გამოხატვის საშუალებაა“ ». „ეკონომისტში“ დაბეჭდილ სტატიაში კენტერბერის არქიეპისკოპოსის პოზიციას რომაელების 1:26, 27-დან მოციქული პავლეს არაორაზროვანი სიტყვები უპირისპირდებოდა. პავლეს სიტყვების ქვემოთ აღნიშნული იყო: „წმინდა პავლეს კარგად ესმოდა, რასაც ამბობდა“.

იესო ქრისტესაც კარგად ესმოდა, რასაც ამბობდა, და თავის აზრს ნათლად გამოხატავდა. მან აღნიშნა, რომ „სოდომის მიწისთვის უფრო ადვილი ასატანი იქნება სასამართლოს დღე“, ვიდრე იმ რელიგიური წინამძღოლებისთვის, რომლებიც არაფრად აგდებდნენ მის ცნობას (მათე 11:23, 24). იესომ აქ ჰიპერბოლა გამოიყენა იმის საჩვენებლად, რომ ღვთის ძისა და მისი სწავლებების უარმყოფელი რელიგიური წინამძღოლები სოდომელებზე დამნაშავეები იყვნენ. „იუდას“ მე-7 მუხლში ნათქვამია, რომ სოდომელები „საუკუნო ცეცხლით დაისაჯნენ“, რაც მარადიულ განადგურებას ნიშნავს (მათე 25:41, 46). რამდენად მკაცრი იქნება ეგრეთ წოდებულ ქრისტიან წინამძღოლთა სასჯელი, რომლებიც ბრმებივით მიუძღვიან თავიანთ დაბრმავებულ სამწყსოს, ავიწყებენ ღვთის სამეფოს მაღალზნეობრივ ნორმებს და ამ ქვეყნიერების გახრწნილ, „შემწყნარებლურ“ გზებზე ერეკებიან?! (მათე 15:14) რაც შეეხება ცრუ რელიგიას, დიდ ბაბილონს, ზეციდან ასეთი დროული მოწოდება ისმის: „გამოდით მისგან, ჩემო ხალხო, თუ არ გინდათ, მისი ცოდვების თანამონაწილენი იყოთ და მისი წყლულები მიიღოთ“ (გამოცხადება 18:2, 4).

თავი 39

არმაგედონში მებრძოლი მეფე იმარჯვებს

ხილვა 13 გამოცხადება 19:11—21

თემა: იესო სატანის ქვეყნიერების გასანადგურებლად ზეციერ ლაშქარს მიუძღვის.

შესრულების დრო: დიდი ბაბილონის განადგურების შემდგომი პერიოდი.

1. რა არის არმაგედონი და რა მოვლენები უსწრებს მას წინ?

არმაგედონი ბევრს შიშს ჰგვრის, სიმართლის მოყვარულთათვის კი ნანატრი დღეა, როცა იეჰოვა საბოლოოდ აღასრულებს განაჩენს ერებზე. ეს არის არა ადამიანთა ომი, არამედ ომი „ყოვლისშემძლე ღვთის დიდ დღეს“. ამ დღეს იეჰოვა შურს იძიებს დედამიწის მმართველებზე (გამოცხადება 16:14, 16; ეზეკიელი 25:17). დიდი გასაჭირი დიდი ბაბილონის განადგურებით დაიწყება. ამის შემდეგ სატანის მიერ აღძრული ალისფერი მხეცი და მისი ათი რქა იეჰოვას ხალხის წინააღმდეგ გაილაშქრებენ. ეშმაკი, რომელიც მაშინ ყველაზე მეტად განრისხდება ქალთან შედარებულ ღვთის ორგანიზაციაზე, მზად იქნება, რომ თავისი ქვეშევრდომების მეშვეობით ბოლომდე შეებრძოლოს დედამიწაზე მცხოვრებ ქალის შთამომავლებს (გამოცხადება 12:17). ეს სატანის ბოლო მცდელობა იქნება.

2. ვინ არის გოგი მაგოგის მიწიდან და როგორ აღძრავს იეჰოვა მას, რომ თავს დაესხას ღვთის ხალხს?

² ეშმაკის გააფთრებული თავდასხმა კარგად არის აღწერილი „ეზეკიელის“ 38-ე თავში. ამ თავში ზნედაცემულ სატანას ეწოდება „გოგი, რომელიც მაგოგის მიწიდანაა“. იეჰოვა გოგს სიმბოლური გაგებით კავებს ამოსდებს ყბებში და საბრძოლველად გამოიყვანს მის დიდ ლაშქართან ერთად. როგორ გააკეთებს იეჰოვა ამას? ღმერთი ისეთ შთაბეჭდილებას შეუქმნის გოგს, თითქოს იეჰოვას მოწმეები, „ხალხებიდან გამოკრებილი ხალხი, რომელნიც სიმდიდრესა და ქონებას აგროვებენ და დედამიწის შუაგულში ცხოვრობენ“, დაუცველნი არიან. ეს ხალხი ყურადღების ცენტრში მოექცევა, რადგან მხოლოდ ისინი არ ეთაყვანებიან მხეცსა და მის ქანდაკებას. მათი სულიერი ძალა და კეთილდღეობა არისხებს გოგს. გოგი და მისი დიდძალი ლაშქარი, მათ შორის ზღვიდან ამოსული ათრქიანი მხეცი, ნადავლის ხელში ჩასაგდებად იკრიბებიან. დიდი ბაბილონისგან განსხვავებით, ღვთის წმინდა ხალხს იეჰოვა მფარველობს (ეზეკიელი 38:1, 4, 11, 12, 15; გამოცხადება 13:1).

3. როგორ მოიშორებს იეჰოვა თავიდან გოგის ლაშქარს?

³ როგორ მოიშორებს იეჰოვა თავიდან გოგსა და მთელ მის ბრბოს? „მახვილს მოვუხმობ მის წინააღმდეგ მთელ ჩემს მთიან მხარეში, — ამბობს უზენაესი უფალი იეჰოვა. — ყველა თავისი ძმის წინააღმდეგ მიმართავს მახვილს“. არც ბირთვული იარაღი გამოადგებათ ბრძოლაში და არც სხვა სახის იარაღი, რადგან იეჰოვა ამბობს: „განვსჯი მას ჭირითა და სისხლით; თავსხმას, სეტყვას, ცეცხლსა და გოგირდს ვაწვიმებ მას, მის რაზმებსა და მასთან მყოფ მრავალ ხალხს. განვდიდდები და განვიწმინდები მრავალი ხალხის თვალწინ, თავს გავუმჟღავნებ მათ და გაიგებენ, რომ მე ვარ იეჰოვა“ (ეზეკიელი 38:21—23; 39:11; შეადარეთ იესო ნავეს ძის 10:8—14; მსაჯულების 7:19—22; 2 მატიანეს 20:15, 22—24; იობის 38:22, 23).

ის, ვისაც „ერთგული და ჭეშმარიტი“ ეწოდება

4. როგორ აღგვიწერს იოანე საომრად აღჭურვილ იესო ქრისტეს?

⁴ იეჰოვა მოუხმობს მახვილს. ვინ იბრძოლებს ამ მახვილით? ამ კითხვაზე პასუხს „გამოცხადების“ კიდევ ერთი ამაღელვებელი ხილვა გვცემს. იოანეს თვალწინ იხსნება ცა და შიშის მომგვრელი სურათი იშლება; ის საომრად აღჭურვილ იესო ქრისტეს ხედავს. იოანე მოგვითხრობს: „ვიხილე გახსნილი ცა და, აი, თეთრი ცხენი. მასზე მჯდომს ერთგული და ჭეშმარიტი ეწოდება. ის სიმართლით ასამართლებს და სიმართლით იბრძვის. მისი თვალები ცეცხლის ალია, თავზე მრავალი გვირგვინი ადგას“ (გამოცხადება 19:11, 12ა).

5, 6. რას განასახიერებს: ა) თეთრი ცხენი? ბ) სახელი „ერთგული და ჭეშმარიტი“? გ) ცეცხლის ალივით თვალები? დ) მრავალი გვირგვინი?

⁵ როგორც ოთხი მხედრის შესახებ ხილვაში, „თეთრი ცხენი“ ამჯერადაც სამართლიანი ომის სათანადო სიმბოლოა (გამოცხადება 6:2). ღვთის ძეთაგან ვინ შეიძლება იყოს ამ ძლიერ მეომარზე სამართლიანი?! რადგან მას „ერთგული და ჭეშმარიტი ეწოდება“, ის სხვა ვერავინ იქნება თუ არა „ერთგული და ჭეშმარიტი მოწმე“, იესო ქრისტე (გამოცხადება 3:14). ის იბრძვის იეჰოვას სამართლიანი განაჩენის აღსასრულებლად. ის იმოქმედებს, როგორც იეჰოვას დანიშნული მოსამართლე, როგორც „ძლიერი ღმერთი“ (ესაია 9:6). მისი თვალები შიშის მომგვრელია, „ცეცხლის ალია“, ანუ თავისი მტრების ცეცხლოვანი განადგურების დამნახავია.

⁶ ამ მებრძოლ მეფეს თავზე გვირგვინები ადგას. იოანეს მიერ ნანახ ზღვიდან ამოსულ მხეცს ათი გვირგვინი ჰქონდა, რაც დედამიწაზე მის დროებით მმართველობას განასახიერებდა (გამოცხადება 13:1). იესოს კი „მრავალი გვირგვინი“ ადგას. ვერაფერი შეედრება მის დიდებულ მმართველობას, რადგან მას ეწოდება „მეფეთა მეფე და უფალთა უფალი“ (1 ტიმოთე 6:15).

7. რა სახელი აწერია იესოს?

⁷ იოანე აგრძელებს მის აღწერას: „[მას] აწერია სახელი, რომელიც მის მეტმა არავინ იცის“ (გამოცხადება 19:12ბ). ბიბლიაში ღვთის ძე მოიხსენიება სახელებით: იესო, ემანუელი და მიქაელი. ეს სახელი, რომელიც აქ მოხსენიებული არ არის, როგორც ჩანს, იმ განსაკუთრებულ მდგომარეობაზე და უპირატესობაზე მიუთითებს, რაც იესოს უფლის დღის განმავლობაში აქვს (შეადარეთ გამოცხადების 2:17). ესაიამ აღწერა, როგორი იქნებოდა იესო 1914 წლის შემდეგ: „დაერქმევა მას საოცარი მრჩეველი, ძლიერი ღმერთი, მარადიული მამა, მშვიდობის მთავარი“ (ესაია 9:6). მოციქულმა პავლემ იესოს სახელი დაუკავშირა იმ განსაკუთრებულ მსახურებას, რომელსაც იესო შეასრულებდა: „ღმერთმა ის [იესო] უფრო მეტად აამაღლა და მიანიჭა ყველა სახელზე აღმატებული სახელი, რათა იესოს სახელით მუხლი მოიდრიკოს ყველამ“ (ფილიპელები 2:9, 10).

8. რატომ არის მხოლოდ იესოსთვის ცნობილი იმ სახელის მნიშვნელობა, რომელიც თავად მას აწერია, და ვის აძლევს ის გარკვეულ უპირატესობას?

⁸ იესო განსაკუთრებული უპირატესობით სარგებლობს. იეჰოვას გარდა მხოლოდ იესოს ესმის, რას ნიშნავს ასეთი მაღალი მდგომარეობის დაკავება (შეადარეთ მათეს 11:27). ღვთის ქმნილებათა შორის მხოლოდ მას შეუძლია, ბოლომდე ესმოდეს ამ სახელის მნიშვნელობა; თუმცა იესო, თავის მხრივ, თავის პატარძალსაც აძლევს გარკვეულ უპირატესობას. აი, რას ჰპირდება იესო მას: „მძლეველს სვეტად ვაქცევ. . . დავაწერ მას. . . ჩემს ახალ სახელს“ (გამოცხადება 3:12).

9. რას ნიშნავს ის, რომ: ა) იესოს „აცვია სისხლიანი მოსასხამი“? ბ) მისი სახელია „ღვთის სიტყვა“?

⁹ იოანე განაგრძობს: „აცვია სისხლიანი მოსასხამი და მისი სახელია ღვთის სიტყვა“ (გამოცხადება 19:13). ვისი სისხლია ეს? შესაძლოა, ეს იყოს იესოს სისხლი, რომელიც კაცობრიობისთვის დაიღვარა (გამოცხადება 1:5). მაგრამ, როგორც კონტექსტიდან ვხედავთ, ეს მისი მტრების სისხლი უნდა იყოს, იეჰოვას განაჩენის აღსრულების დროს დაღვრილი. ეს გვახსენებს ხილვას დედამიწის ვაზის მოგროვებასა და ღვთის მრისხანების დიდ საწნახელში მის დაწნეხაზე. ამ ხილვაში სისხლმა „ცხენის ლაგმის სიმაღლემდე“ მიაღწია, რაც ღვთის მტრებზე დიდებული გამარჯვების ნიშანი იყო (გამოცხადება 14:18—20). ამ შემთხვევაში იესოს სისხლიანი მოსასხამი იმაზე მოწმობს, რომ მისი გამარჯვება სრული და საბოლოოა (შეადარეთ ესაიას 63:1—6). როგორც ვხედავთ იოანე აქაც მოიხსენიებს იესოს სახელს, მაგრამ ამჯერად ეს კარგად ცნობილი სახელია — „ღვთის სიტყვა“. ამგვარად ვიგებთ, რომ ეს მეომარი მეფე იეჰოვას მთავარი წარმომადგენელი და ჭეშმარიტების დამცველია (იოანე 1:1; გამოცხადება 1:1).

იესოს თანამებრძოლები

10, 11. ა) როგორ ჩანს იოანეს სიტყვებიდან, რომ იესო მარტო არ იბრძვის? ბ) რისი სიმბოლოა თეთრი ცხენები, და რას ნიშნავს ის, რომ მხედრები „თეთრი, სუფთა, ძვირფასი სელის სამოსლით“ არიან შემოსილნი? გ) ვინ შედის ზეციერ ლაშქარში?

¹⁰ იესო მარტო არ იბრძვის. იოანე ამბობს: „მას მიჰყვებოდა თეთრ ცხენებზე ამხედრებული თეთრი, სუფთა, ძვირფასი სელის სამოსლით შემოსილი ზეციერი ლაშქარი“ (გამოცხადება 19:14). თეთრი ცხენები სამართლიანი ომის სიმბოლოა. ძვირფასი სელი შესაფერისი სამოსია მეფის მხედრებისთვის. სელის ბზინვარება და სითეთრე იმას ნიშნავს, რომ ისინი წმინდები და მართლები არიან იეჰოვას წინაშე. ვინ შედის ამ ლაშქარში? უდავოა, წმინდა ანგელოზები. ჯერ კიდევ უფლის დღის დასაწყისში, მიქაელმა და მისმა ანგელოზებმა სატანა და მისი დემონები ზეციდან გადმოყარეს (გამოცხადება 12:7—9). ანგელოზები ემსახურებიან თავის დიდებულ ტახტზე მჯდომ იესოს, რომელიც დედამიწაზე ერებსა და ხალხებს გაასამართლებს (მათე 25:31, 32). უეჭველია, ამ გადამწყვეტ ომში, როცა საბოლოოდ აღსრულდება ღვთის განაჩენი, იესოს გვერდით მისი ანგელოზები იქნებიან.

¹¹ ამ ლაშქარში სხვებიც შედიან. თიატირელი ქრისტიანებისთვის მიწერილ ცნობაში იესომ თქვა: „მძლეველსა და ჩემი საქმეების ბოლომდე დამცველს მივცემ ძალაუფლებას ხალხებზე, როგორიც მე მივიღე მამაჩემისგან; დამწყემსავს ის ხალხს რკინის კვერთხით და თიხის ჭურჭელივით დაიმსხვრევიან“ (გამოცხადება 2:26, 27). უდავოა, იმ დროს ზეცაში მყოფი ქრისტეს ძმებიც რკინის კვერთხით დამწყემსავენ ხალხებსა და ერებს.

12. ა) იბრძოლებენ ღვთის მიწიერი მსახურები არმაგედონის ომში? ბ) როგორ შეეხება არმაგედონი იეჰოვას ხალხს დედამიწაზე?

¹² მონაწილეობენ ღვთის მიწიერი მსახურები ამ ბრძოლაში? იოანეს კლასი არ ჩაებმება არმაგედონის ომში. ამ ომში არც ყველა ერიდან გამოსული ის ერთგული თანამსახურები ჩაებმებიან, რომლებიც იეჰოვას თაყვანისმცემლობის ადგილისკენ, სულიერი ტაძრისკენ მიემართებიან. ამ მშვიდობიანმა ხალხმა მახვილები უკვე სახნისებად გამოჭედა (ესაია 2:2—4). თუმცა ეს ომი მათაც შეეხება. როგორც გავიგეთ, იეჰოვას, ერთი შეხედვით, დაუცველ ხალხს გოგი და მთელი მისი ბრბო გააფრთებით დაესხმება თავს. ეს იქნება იმის ნიშანი, რომ იეჰოვას მიერ დანიშნული მებრძოლი მეფე და მისი ზეციერი ლაშქარი ამ ერების გასანადგურებლად ომს დაიწყებს (ეზეკიელი 39:6, 7, 11; შეადარეთ დანიელის 11:44—12:1). ღვთის ხალხი დედამიწაზე ყურადღებით დააკვირდება ამ მოვლენებს. არმაგედონი მათ გადარჩენას ნიშნავს. ისინი იმ დიდი ომის თვითმხილველნი იქნებიან, რომელიც იეჰოვას უზენაესობას დაამტკიცებს, ამის შემდეგ კი მარადიულად იცხოვრებენ.

13. საიდან ვიცით, რომ იეჰოვას მოწმეები ხელისუფლებას არ ეწინააღმდეგებიან?

¹³ ნიშნავს ეს იმას, რომ იეჰოვას მოწმეები ხელისუფლებას ეწინააღმდეგებიან? რა თქმა უნდა, არა. ისინი ითვალისწინებენ მოციქულ პავლეს რჩევას: „ყოველი სული დაემორჩილოს უმაღლეს ხელისუფალთ“. მათ ესმით, რომ ვიდრე ეს ქვეყნიერება არსებობს, ღვთის ნებით ეს „უმაღლესი ხელისუფალნი“ გარკვეულწილად ხელს უწყობენ საზოგადოებრივ წესრიგს. ამიტომ იეჰოვას მოწმეები იხდიან გადასახადებს, გადიან რეგისტრაციას, ემორჩილებიან კანონებს, იცავენ მოძრაობის წესებსა და ასე შემდეგ (რომაელები 13:1, 6, 7). გარდა ამისა, ისინი ბიბლიური პრინციპების შესაბამისად სანდო და პატიოსანი ადამიანები არიან, უყვართ მოყვასი, ცდილობენ, შექმნან მტკიცე და წესიერი ოჯახები და ბავშვები სამაგალითოდ აღზარდონ. ამგვარად, ისინი ემორჩილებიან მითითებას: „კეისრისა კეისარს მიეცით, ღვთისა კი — ღმერთს“ (ლუკა 20:25; 1 პეტრე 2:13—17). ღვთის სიტყვის თანახმად ამ ქვეყნიერების ხელისუფლებები დროებითია, ამიტომ იეჰოვას მოწმეები უფრო აზრიანი ცხოვრებისთვის, ჭეშმარიტი სიცოცხლისთვის ემზადებიან, რასაც მალე ქრისტეს სამეფო გახდის შესაძლებელს (1 ტიმოთე 6:17—19). მართალია, ისინი არ მიიღებენ მონაწილეობას ამ ქვეყნიერების მთავრობების დამხობაში, მაგრამ, რაც ღვთის შთაგონებულ სიტყვაში, წმინდა ბიბლიაშია ჩაწერილი იეჰოვას მოახლოებული სასამართლოს შესახებ, რომელიც არმაგედონში იქნება, მათში მოკრძალებულ შიშს იწვევს (ესაია 26:20, 21; ებრაელები 12:28, 29).

საბოლოო ბრძოლა

14. რას განასახიერებს იესოს პირიდან გამომავალი „დიდი ბასრი მახვილი“?

¹⁴ რა ძალაუფლებით იმარჯვებს იესო? იოანე გვამცნობს: „მისი პირიდან დიდი ბასრი მახვილია გამოშვერილი, რათა დასცეს ის ხალხებს, და რკინის კვერთხით დამწყემსავს მათ“ (გამოცხადება 19:15ა). ეს „დიდი ბასრი მახვილი“ ღვთის მიერ იესოსთვის მიცემულ ძალაუფლებას განასახიერებს. ამ ძალაუფლებით ის ღვთის სამეფოს უარმყოფელების დასჯის ბრძანებას გასცემს (გამოცხადება 1:16; 2:16). ესაიაც ასეთ სიმბოლურ სიტყვებს იყენებს: „[იეჰოვამ] ბასრ მახვილად აქცია ჩემი პირი. თავისი ხელის ჩრდილში დამმალა. ნელ-ნელა მაქცია წამახულ ისრად“ (ესაია 49:2). ამ შემთხვევაში ესაია ღვთის განაჩენის გამცხადებელ და აღმსრულებელ იესოს წარმოადგენდა. იესოს მოქმედება ისრის მიზანში მოხვედრას შეგვიძლია შევადაროთ.

15. ვინ იქნება მხილებული და გასამართლებული, და რისი მომასწავებელია ეს?

¹⁵ ამ დროისთვის იესომ უკვე იმოქმედა პავლეს წინასწარმეტყველური სიტყვების თანახმად: „მაშინ გამოვლინდება უკანონობის მოქმედი, რომელსაც უფალი იესო გაანადგურებს თავისი ბაგის სულით და ბოლოს მოუღებს თავისი მოსვლის გამოცხადებით“. იესოს მოსვლას (ბერძ. პარუსია) 1914 წლიდან მოყოლებული უკანონობის კაცის ანუ ქრისტიანული სამყაროს სამღვდელოების მხილება და გასამართლება ადასტურებს. მისი მოსვლა მაშინ უფრო ცხადი გახდება, როცა ალისფერი მხეცის ათი რქა ქრისტიანულ სამყაროზე აღასრულებს სამართალს და დიდი ბაბილონის სხვა ნაწილებთან ერთად გაანადგურებს მას (2 თესალონიკელები 2:1—3, 8). ეს დიდი გასაჭირის დასაწყისი იქნება. ამის შემდეგ ესაიას წინასწარმეტყველების თანახმად იესო პასუხს მოსთხოვს სატანის ორგანიზაციის დარჩენილ ნაწილს: „დაჰკრავს დედამიწას თავისი პირის კვერთხს; თავისი ბაგეების სულით დახოცავს ბოროტებს“ (ესაია 11:4).

16. როგორ არის წარმოდგენილი „ფსალმუნებსა“ და „იერემიაში“ იეჰოვას მიერ დანიშნული მებრძოლი მეფის როლი?

¹⁶ იეჰოვას მიერ დანიშნული მებრძოლი მეფე განსაზღვრავს, ვინ გადარჩება და ვინ — არა. იეჰოვამ წინასწარ უთხრა თავის ძეს: „დალეწავ მათ [დედამიწის მმართველებს] რკინის კვერთხით და მეთუნის ჭურჭელივით დაამსხვრევ“. იერემია მიმართავს გახრწნილ მმართველებსა და მათ მსახურებს: „იღრიალეთ, მწყემსებო, და იყვირეთ! იგორავეთ, ფარის დიდებულებო, რადგან მოვიდა თქვენი დაკვლისა და გაფანტვის დღეები; ძვირფასი ჭურჭელივით დაემხობით!“ რაოდენ დიდი მოწონებითაც არ უნდა სარგებლობდნენ ისინი ამ ბოროტ ქვეყნიერებაში, მეფის რკინის კვერთხის ერთი დარტყმით ჭურჭელივით დაიმსხვრევიან. ყველაფერი ისე მოხდება, როგორც დავითმა იწინასწარმეტყველა უფალ იესოზე: «იეჰოვა შენი ძლიერების კვერთხს გამოგიგზავნის სიონიდან და გეტყვის: „იბატონე შენს მტრებს შორის“. იეჰოვა იქნება შენს მარჯვენასთან და შემუსრავს მეფეებს თავისი რისხვის დღეს. ის ხალხებში აღასრულებს თავის განაჩენს; გვამებით აავსებს მათ» (ფსალმუნი 2:9, 12; 83:17, 18; 110:1, 2, 5, 6; იერემია 25:34).

17. ა) იოანეს აღწერილობის თანახმად, როგორ აღასრულებს სამართალს მებრძოლი მეფე? ბ) გაიხსენეთ ზოგიერთი წინასწარმეტყველება, რომელიც აღწერს, რაოდენ გამანადგურებელი იქნება ღვთის რისხვის დღე ერებისთვის.

¹⁷ იოანე ძლიერ, მებრძოლ მეფეს კვლავ ხედავს ხილვაში: „ის წნეხს ყოვლისშემძლე ღვთის რისხვის მძვინვარების საწნახელსაც“ (გამოცხადება 19:15ბ). ადრინდელ ხილვაში იოანემ უკვე იხილა, როგორ დაიწნეხა „ღვთის რისხვის დიდი საწნახელი“ (გამოცხადება 14:18—20). ესაიამაც უღვთოთა დასასჯელი საწნახელი აღწერა, სხვა წინასწარმეტყველებმა კი აღწერეს, რაოდენ გამანადგურებელი იქნებოდა ღვთის რისხვის დღე ყველა ერისთვის (ესაია 24:1—6; 63:1—4; იერემია 25:30—33; დანიელი 2:44; სოფონია 3:8; ზაქარია 14:3, 12, 13; გამოცხადება 6:15—17).

18. იოელ წინასწარმეტყველის სიტყვების თანახმად როგორ გაასამართლებს იეჰოვა ერებს?

¹⁸ წინასწარმეტყველი იოელი საწნახელს უკავშირებს „გარშემო მცხოვრები ყველა ხალხის გასასამართლებლად“ იეჰოვას მოსვლას. იეჰოვა ასეთ ბრძანებას აძლევს, როგორც ჩანს, იესოს, რომელიც მასთან ერთად ასამართლებს, და მის ზეციერ ლაშქარს: „მოიქნიეთ ნამგალი, რადგან მოწეულია სამკალი! მოდით, ჩამოდით, რადგან აივსო საწნახელი! გალიცლიცდა კოდები, რადგან გამრავლდა მათი ბოროტება. ბრბოები, ბრბოები არიან განაჩენის ველზე, რადგან უახლოვდება იეჰოვას დღე განაჩენის ველს. დაბნელდება მზე და დაბნელდება მთვარე, აღარ გამოანათებენ ვარსკვლავები. სიონიდან დაიგრგვინებს იეჰოვა და იერუსალიმიდან გამოსცემს ხმას. შეირყევა ცა და მიწა, მაგრამ იეჰოვა იქნება თავშესაფარი თავისი ხალხისთვის და სიმაგრე — ისრაელის ძეებისთვის. გაიგებთ, რომ მე ვარ იეჰოვა, თქვენი ღმერთი“ (იოელი 3:12—17).

19. ა) როგორ გაეცემა პასუხი 1 პეტრეს 4:17-ში დასმულ კითხვას? ბ) რა სახელი აწერია იესოს მოსასხამზე და რატომ არის ეს სახელი მისთვის შესაფერისი?

¹⁹ ეს უბედურების დღე იქნება როგორც ურჩი ერებისთვის, ისე ცალკეული ურჩი ადამიანებისთვის, ხოლო შვებას მოჰგვრის მათ, ვინც იეჰოვასა და მისი მებრძოლი მეფის მფარველობას ეძებს (2 თესალონიკელები 1:6—9). 1918 წელს ღვთის სახლიდან დაწყებული სასამართლო წარმატებით დასრულდება და 1 პეტრეს 4:17-ში დასმულ კითხვასაც პასუხი გაეცემა: „როგორი აღსასრული მოელით მათ, ვინც არ ემორჩილება ღვთის სასიხარულო ცნობას?“ დიდებული, გამარჯვებული მეფე ბოლომდე დაწნეხს საწნახელს და ცხადს გახდის, რომ ის იოანეს მიერ აღწერილი განდიდებული მეფეა: „მას მოსასხამზე ბარძაყთან აწერია სახელი — მეფეთა მეფე და უფალთა უფალი“ (გამოცხადება 19:16). მან დაამტკიცა, რომ ნებისმიერ მიწიერ მმართველზე, მეფეზე თუ ბატონზე ბევრად ძლიერია. მისი ღირსება და სიდიადე შეუდარებელია. ის „ჭეშმარიტების, თავმდაბლობისა და სიმართლის გულისთვის“ გამოვიდა საბრძოლველად და ერთხელ და სამუდამოდ გაიმარჯვა (ფსალმუნი 45:4). სისხლიან ტანსაცმელზე იესოს უზენაესი უფლის, იეჰოვას ნაბოძები სახელი აწერია. სწორედ ის დაამტკიცებს იეჰოვას უზენაესობას.

ღვთის დიდი ვახშამი

20. როგორ აღწერს იოანე „ღვთის დიდ ვახშამს“ და რომელ ძველ წინასწარმეტყველებას ეხება ეს?

²⁰ ეზეკიელის ხილვაში გოგის ბრბოს განადგურების შემდეგ, ფრინველებსა და მხეცებს ნადიმზე იწვევენ. ისინი იეჰოვას მტრების გვამებს ჭამენ და ამგვარად ასუფთავებენ არემარეს (ეზეკიელი 39:11, 17—20). იოანეს შემდეგი სიტყვები აშკარად ამ წინასწარმეტყველებას ეხება: «ვიხილე აგრეთვე მზეში მდგომი ანგელოზი. ის ხმამაღლა უხმობდა ცის ყველა ფრინველს: „მოდით, მოგროვდით ღვთის დიდ ვახშამზე, რათა ჭამოთ მეფეთა ხორცი, ათასისთავთა ხორცი, ძლიერთა ხორცი, ცხენთა და მათზე ამხედრებულთა ხორცი, ყველას ხორცი: თავისუფლისა და მონისა, დიდისა და პატარისა“ » (გამოცხადება 19:17, 18).

21. რას ნიშნავს: ა) ანგელოზის დგომა მზეში? ბ) დახოცილთა გვამების მიწის პირზე დაყრა? გ) ის, რომ მიწის პირზე ყველანაირი ადამიანის გვამი ეყრება? დ) გამოთქმა „ღვთის დიდი ვახშამი“?

²¹ ანგელოზი ფრინველების მოსახმობად თვალში საცემ ადგილზე, მზეში დგას და მათ მებრძოლი მეფისა და მისი ზეციერი ლაშქრის მიერ დახოცილთა ხორცით გასაძღომად უხმობს. დახოცილთა გვამები მიწის პირზე ეყრება, რაც მათი სამარცხვინო სიკვდილის მაჩვენებელი იქნება. იზებელის მსგავსად არც ისინი დაიმარხებიან ღირსეულად (2 მეფეები 9:36, 37). განადგურებას ვერც ერთი კატეგორიის ადამიანი ვერ გადაურჩება; დახოცილთა შორის იქნებიან: მეფეები, ათასისთავები, ძლიერები, თავისუფლები და მონები. გამონაკლისი არ იქნება დაშვებული. იეჰოვას წინააღმდეგ ამხედრებული ქვეყნიერების ბოლო კვალიც კი წაიშლება. მეტად აღარ იარსებებს თავგზააბნეულ ხალხთა ბობოქარი ზღვა (გამოცხადება 21:1). ეს „ღვთის დიდი ვახშამია“, რადგან თავად იეჰოვა იწვევს ფრინველებს.

22. როგორ აღწერს იოანე გადამწყვეტი ომის მსვლელობას?

²² იოანე მოკლედ აღწერს გადამწყვეტი ომის მსვლელობას: „ვიხილე მხეცი, დედამიწის მეფეები და მათი ლაშქრები, რომლებიც ცხენზე ამხედრებულისა და მისი ლაშქრის წინააღმდეგ საომრად შეკრებილიყვნენ. შეპყრობილ იქნა მხეცი და მასთან ერთად ცრუწინასწარმეტყველი, რომელიც ნიშნებს ახდენდა მის წინაშე, რითაც შეცდომაში შეჰყავდა მხეცის ნიშნის მიმღებნი და მისი ქანდაკების თაყვანისმცემელნი. ორივე ცოცხლად იქნა ჩაგდებული ცეცხლის ტბაში, რომელიც გოგირდით იწვის. დანარჩენები ცხენზე ამხედრებულის პირიდან გამომავალი დიდი მახვილით დაიხოცნენ. ყველა ფრინველი გაძღა მათი ხორცით“ (გამოცხადება 19:19—21).

23. ა) რა გაგებით შეიკრიბებიან საომრად „ყოვლისშემძლე ღვთის დიდ დღეს“ არმაგედონში? ბ) რა გაფრთხილებას უგულებელყოფენ „დედამიწის მეფეები“ და რა მოჰყვება ამას შედეგად?

²³ იეჰოვას რისხვის მეექვსე თასის გადმოღვრის შემდეგ იოანე გვამცნობს, რომ დემონური პროპაგანდის ხელშეწყობით „მთელი მსოფლიოს მეფეები“ საომრად იკრიბებიან „ყოვლისშემძლე ღვთის დიდ დღეს“. ეს ბრძოლა იქნება არმაგედონი. ის გაიმართება არა რომელიმე კონკრეტულ ადგილას, არამედ მთელ მსოფლიოში, იმ მდგომარეობის გამო, რომელიც იეჰოვასგან სამართლის აღსრულებას მოითხოვს (გამოცხადება 16:12, 14, 16). ახლა იოანე საბრძოლოდ დარაზმულ ლაშქარს ხედავს: „დედამიწის მეფეები და მათი ლაშქრები“ ღვთის წინააღმდეგ დარაზმულან. ისინი ჯიუტად უარყოფენ იეჰოვას მიერ დანიშნულ მეფეს. იეჰოვამ გააფრთხილა ისინი: „ეამბორეთ ძეს, რომ არ განრისხდეს ღმერთი და არ მოიკვეთოთ თქვენი გზიდან“. ისინი სიკვდილს იმსახურებენ, რადგან არ ემორჩილებიან ქრისტეს მმართველობას (ფსალმუნი 2:12).

24. ა) როგორ დაისჯებიან მხეცი და ცრუ წინასწარმეტყველი, და რა გაგებით იქნებიან იმ დროს ისინი ჯერ კიდევ ცოცხლები? ბ) რა ამტკიცებს იმას, რომ „ცეცხლის ტბა“ სიმბოლურია?

²⁴ ზღვიდან ამოსული შვიდთავიანი და ათრქიანი მხეცი, რომელიც სატანის პოლიტიკურ ორგანიზაციას განასახიერებს, ცრუ წინასწარმეტყველთან, მეშვიდე მსოფლიო მპყრობელთან ერთად მიეცემა დავიწყებას (გამოცხადება 13:1, 11—13; 16:13). მათ ჩაყრიან „ცეცხლის ტბაში“, როცა ისინი ჯერ კიდევ ცოცხლები იქნებიან, ანუ, როცა გაერთიანებულად იმოქმედებენ და შეეწინააღმდეგებიან ღვთის ხალხს დედამიწაზე. პირდაპირი გაგებით ცეცხლისაა ეს ტბა? არა, როგორც მხეცი და ცრუ წინასწარმეტყველი არ არიან პირდაპირი გაგებით ცხოველები. ეს სრული, საბოლოო განადგურების სიმბოლოა. მოგვიანებით იქ ჩაყრიან სიკვდილს, სამარეს და ეშმაკსაც კი (გამოცხადება 20:10, 14). შეუძლებელია, ის იყოს ბოროტთა სამუდამო სატანჯველი ადგილი, რადგან ასეთი ადგილის წარმოდგენაც კი საძულველია იეჰოვასთვის (იერემია 19:5; 32:35; 1 იოანე 4:8, 16).

25. ა) ვინ დაიხოცება „ცხენზე ამხედრებულის პირიდან გამომავალი დიდი მახვილით“? ბ) აღდგება თუ არა იმ დახოცილთაგან რომელიმე?

²⁵ „ცხენზე ამხედრებულის პირიდან გამომავალი დიდი მახვილით“ ისინიც დაიხოცებიან, ვინც უშუალოდ არ არიან ხელისუფლების წარმომადგენლები, მაგრამ ამ გახრწნილი ქვეყნიერების ნაწილი არიან და არ სურთ გამოსწორება. იესოს თვალში ისინი სიკვდილს იმსახურებენ. მათზე არ არის ნათქვამი, რომ ცეცხლის ტბაში ჩაიყრებიან. ნიშნავს ეს იმას, რომ ისინი აღდგებიან? ბიბლიაში არსად არის ნათქვამი, რომ ისინი, ვისაც იმ დროს იეჰოვას მიერ დანიშნული მოსამართლე დასჯის, აღდგებიან. იესოს სიტყვების თანახმად ვინც „ცხვარი“ არ არის, წავა „მარადიულ ცეცხლში, რომელიც ეშმაკისა და მისი ანგელოზებისთვის არის გამზადებული“, ანუ მარადიულად მოიკვეთება (მათე 25:33, 41, 46). ეს „უღვთოთა გასამართლებისა და დაღუპვის დღის“ კულმინაციაა (2 პეტრე 3:7; ნაუმი 1:2, 7—9; მალაქია 4:1).

26. მოკლედ აღწერეთ, რა მდგომარეობა იქნება არმაგედონის შემდეგ.

²⁶ ამგვარად, სატანის მიწიერი ორგანიზაცია მთლიანად განადგურდება. „წინანდელი ცა“ ანუ პოლიტიკური მმართველობა მოისპობა. „დედამიწა“ ანუ სატანის მიერ საუკუნეების განმავლობაში შექმნილი, ერთი შეხედვით, შეურყეველი ქვეყნიერება სრულიად განადგურდება. „ზღვა“ ანუ იეჰოვას მოწინააღმდეგე ბოროტ ადამიანთა საზოგადოება აღარ იარსებებს (გამოცხადება 21:1; 2 პეტრე 3:10). რას უმზადებს იეჰოვა თვით სატანას? იოანე ამასაც გაგვაგებინებს.