მიმომსვლელი ზედამხედველი — ძღვენი ადამიანში

„ავიდა მაღლობზე, დაატყვევა ტყვე და ნიჭები უბოძა ადამიანს [უბოძა მრავალი ძღვენი ადამიანში, აქ]“ (ეფესელთა 4:8).

1. რა ახალი საქმიანობის შესახებ გამოცხადდა ამ ჟურნალის 1894 წლის გამოცემაში?

საუკუნეზე მეტი ხნის წინათ „საგუშაგო კოშკმა“ სიახლე ამცნო მკითხველებს. ჟურნალში ნათქვამი იყო, რომ სიახლე „მსახურების სხვა სფეროს“ წარმოადგენდა. რას ითვალისწინებდა ეს ახალი საქმე? მიმომსვლელი ზედამხედველების თანამედროვე საქმიანობის დაწყებას. ამ ჟურნალის 1894 წლის 1-ლი სექტემბრის გამოცემაში განმარტებული იყო, რომ კვალიფიცირებული ძმები ეწვეოდნენ ბიბლიის მკვლევარების ჯგუფებს ‘ჭეშმარიტებაში მათი აღშენების მიზნით’.

2. რა ვალდებულებები აქვთ საოლქო და სარაიონო ზედამხედველებს?

² ახალი წელთაღრიცხვით პირველ საუკუნეში ქრისტიანული კრებების მოსანახულებლად მიდიოდნენ ზედამხედველები, მაგალითად, პავლე და ბარნაბა. ამ ერთგულ ადამიანებს კრების ‘აღშენება’ ჰქონდათ მიზნად დასახული (2 კორინთელთა 10:8). დღეს ჩვენ კურთხეული ვართ, რადგან არის ათასობით მამაკაცი, რომლებიც სისტემატურად მოქმედებენ ასე. იეჰოვას მოწმეების ხელმძღვანელმა საბჭომ ისინი დანიშნა სარაიონო და საოლქო ზედამხედველებად. სარაიონო ზედამხედველი ემსახურება დაახლოებით 20 კრებას და წელიწადში ორჯერ თითო კვირით იმყოფება თითოეულ მათგანში, ამოწმებს ჩანაწერებს, კითხულობს მოხსენებებს და სამეფოს ადგილობრივ მაუწყებლებთან ერთად მონაწილეობს სამქადაგებლო მსახურებაში. საოლქო ზედამხედველი მთელ რიგ რაიონებში თავმჯდომარეობს ყოველწლიურ კონგრესებს და სამქადაგებლო მსახურებაში მონაწილეობს იმ კრებებთან, რომლებთანაც სარაიონო კონგრესის დროს არის მონახულებაზე და ამხნევებს ბიბლიაზე დაფუძნებული მოხსენებებით.

მათი თავგანწირული სულისკვეთება

3. რატომ ესაჭიროებათ მიმომსვლელ ზედამხედველებს თავგანწირული სულისკვეთება?

³ მიმომსვლელი ზედამხედველები სულ გზაში არიან. ამისთვის კი თავგანწირული სულისკვეთებაა საჭირო. ერთი კრებიდან მეორისკენ გამგზავრება ხშირად ძნელია, მაგრამ ისინი თავიანთ მეუღლეებთან ერთად ამას დიდი სიხარულით აკეთებენ. ერთ-ერთმა სარაიონო ზედამხედველმა თქვა: „მეუღლე ყოველთვის მიჭერს მხარს და არასოდეს ბუზღუნებს. . . ის თავგანწირული სულისკვეთებისთვის ქებას იმსახურებს“. ზოგ სარაიონო ზედამხედველს 1 000 კილომეტრის გავლა უწევს ერთი კრებიდან მეორემდე მისასვლელად. ბევრი მანქანით მიდის, ზოგიც საზოგადოებრივი ტრანსპორტითა თუ ველოსიპედით, სხვები ცხენებით, ხოლო ზოგი — ფეხით. ერთ-ერთ აფრიკელ სარაიონო ზედამხედველს, კრებას რომ სწვეოდა, მდინარის ფონზე გადასვლა ისე მოუწია, რომ მეუღლე მხრებზე ჰყავდა შესმული. პავლე მოციქული მისიონერული მოგზაურობების დროს ითმენდა სიცხესა და სიცივეს, იტანდა შიმშილსა და წყურვილს, უძილო ღამეებს, მრავალ საშიშროებასა და საშინელ დევნას. ამავე დროს მას უწევდა ‘ყველა ეკლესიაზე ზრუნვა’ — რაც დღეს მიმომსვლელი ზედამხედველებისთვისაც არ არის უცხო (2 კორინთელთა 11:23–29).

4. რა გავლენა შეუძლია მოახდინოს ჯანმრთელობასთან დაკავშირებულმა პრობლემებმა მიმომსვლელ ზედამხედველებსა და მათ მეუღლეებზე?

⁴ პავლეს თანამშრომელი ტიმოთეს მსგავსად, მიმომსვლელ ზედამხედველებსა და მათ მეუღლეებს ზოგჯერ ჯანმრთელობასთან დაკავშირებული პრობლემებიც აქვთ (1 ტიმოთე 5:23). ეს კი დამატებითი სტრესია მათთვის. ერთ-ერთი სარაიონო ზედამხედველის მეუღლე განმარტავს: „როდესაც თავს კარგად ვერ ვგრძნობ, ძმებთან მუდამ ყოფნა დიდი ენერგიის ფასად მიჯდება. კლიმაქტერიული პერიოდის დაწყების დროს ეს ჩემთვის განსაკუთრებით რთულია. ყოველკვირა ჩანთების ჩალაგება და სხვაგან გამგზავრება ნამდვილად რთული გამოცდაა. ხშირად ვჩერდები და ვლოცულობ, რომ მსახურების განსაგრძობად იეჰოვამ მომცეს ძალა“.

5. როგორი სულისკვეთება გამოავლინეს მიმომსვლელმა ზედამხედველებმა და მათმა მეუღლეებმა მრავალი განსაცდელის მიუხედავად?

⁵ ჯანმრთელობასთან დაკავშირებული პრობლემებისა და სხვა განსაცდელების მიუხედავად, მიმომსვლელი ზედამხედველები და მათი მეუღლეები სიხარულით მსახურობენ და ავლენენ თავგანწირულ სიყვარულს. მრავალმა სიცოცხლის საფრთხეში ჩაგდების ფასად სულიერი დახმარება გაუწია სხვებს დევნისა თუ ომიანობის დროს. კრებების მონახულებისას ისინი პავლეს მსგავს სულისკვეთებას ავლენენ, რომელმაც თესალონიკელ ქრისტიანებს უთხრა: „მშვიდად ვიქცეოდით თქვენს შორის, როგორც მეძუძური, თავის ბალღებს რომ შეფოფინებს. ასევე ჩვენც, თქვენდამი გულმხურვალთ გვსურდა მოგვეცა თქვენთვის არა მარტო ღვთის სახარება, არამედ ჩვენი სულიც, იმიტომ რომ საყვარელნი გახდით ჩვენთვის“ (1 თესალონიკელთა 2:7ბ, 8).

6, 7. რა დადებითი გავლენა შეიძლება ჰქონდეთ მთელი ძალებით მომუშავე მიმომსვლელ ზედამხედველებს?

⁶ ქრისტიანული კრების სხვა უხუცესების მსგავსად, მიმომსვლელი ზედამხედველებიც „იღწვიან ქადაგებითა და დამოძღვრით“. ასეთი უხუცესები „ორმაგი პატივის ღირსნი უნდა იყვნენ“ (1 ტიმოთე 5:17). მათი მაგალითი კურთხევა იქნება, თუ ‘მივბაძავთ მათ რწმენას’ (ებრაელთა 13:7).

⁷ რა გავლენა აქვთ მიმომსვლელ ზედამხედველებს სხვებზე? «რა დიდებული გავლენა მოახდინა ძმა პ-მ ჩემს ცხოვრებაზე! — წერდა იეჰოვას ერთ-ერთი მოწმე. — 1960 წლიდან ის იყო მიმომსვლელი ზედამხედველი მექსიკაში. პატარა ვიყავი, მაგრამ მის მოსვლას დიდი მოუთმენლობითა და სიხარულით ველოდი. როდესაც ათი წლის გავხდი, მან მითხრა: „შენც მიმომსვლელი ზედამხედველი იქნები“. გარდატეხის ასაკში, მრავალი პრობლემის დროს ხშირად ვეძებდი მას, რადგან მას ყოველთვის შეეძლო ბრძნული რჩევის მოცემა ჩემთვის. ის სამწყსოს დამწყემსვისთვის ცოცხლობდა! დღეს მეც სარაიონო ზედამხედველი ვარ და ყოველთვის ვცდილობ, დრო დავუთმო ახალგაზრდებს და თეოკრატიული მიზანი დავუსახო მათ, ისევე როგორც მან დამისახა მე ბავშვობაში. თვით სიცოცხლის უკანასკნელ წლებში გულის უკმარისობის მიუხედავად, ძმა პ. ყოველთვის პოულობდა გამამხნევებელ სიტყვებს. სწორედ სიკვდილის წინა დღეს, 1995 წლის თებერვალში, ერთად ვიყავით სპეციალურ ერთდღიან კონგრესზე და მან ერთ-ერთ არქიტექტორ ძმას შესანიშნავი მიზნისკენ მიუთითა. ძმამ დაუყოვნებლივ დაწერა განცხადება ბეთელში მსახურებისთვის».

დაფასებულები არიან

8. ვინ არის ‘ძღვენი ადამიანში’, რომელიც აღწერილია ეფესელთა მე-4 თავში და რა მხრივ არიან კრებისთვის სასარგებლო?

⁸ ნებისმიერ მიმომსვლელ ზედამხედველსა და უხუცესს, რომელსაც ღვთისგან მიღებული დაუმსახურებელი წყალობით აქვს უპირატესობა, ჰქონდეს მსახურებისთვის დანიშნულება, ეწოდება ‘ძღვენი ადამიანში’. იეჰოვას წარმომადგენელმა და კრების თავმა, იესო ქრისტემ, ამ სულიერი მამაკაცების დანიშვნა განიზრახა თითოეული ჩვენგანის ასაშენებლად, სულიერად მოსამწიფებლად (ეფესელთა 4:8–15). ყოველი ძღვენი იმსახურებს მადლიერების გამოხატვას. განსაკუთრებით ეს ასეა იმ ნიჭთან, ანუ ძღვენთან დაკავშირებით, რომელიც გვაძლევს ძალებს, რომ იეჰოვასადმი მსახურება არ შევაჩეროთ. მაშ, როგორ შეგვიძლია მადლიერება გამოვავლინოთ მიმომსვლელი ზედამხედველების მუშაობისთვის? როგორ შეგვიძლია ცხადვყოთ, რომ ‘პატივისცემით ვეპყრობით’ მათ? (ფილიპელთა 2:29).

9. როგორ შეგვიძლია გამოვავლინოთ მიმომსვლელი ზედამხედველებისადმი მადლიერება?

⁹ როდესაც ცხადდება სარაიონო ზედამხედველის მონახულება, შეგვიძლია ყველაფერი ისე დავგეგმოთ, რომ იმ კვირისთვის ყოველმხრივ მივიღოთ კრების საქმიანობაში მონაწილეობა. შესაძლოა, დამატებითი დრო გამოვყოთ მისი მონახულების დროს სამქადაგებლო მსახურების ღონისძიებაში მონაწილეობის მისაღებად. შესაძლოა, შევეცადოთ დამხმარე პიონერად ვიმსახუროთ იმ თვეში. რასაკვირველია, ჩვენი სურვილი იქნება, სარაიონო ზედამხედველის რჩევები პრაქტიკაში გამოვიყენოთ იმ მიზნით, რომ გავაუმჯობესოთ ჩვენი მსახურება. ისეთი სულისკვეთება, რომ მზად ვართ, მივიღოთ რჩევები, კურთხევა იქნება ჩვენთვის და დაარწმუნებს სარაიონო ზედამხედველს, რომ მისი მონახულება სასარგებლო იყო. დიახ, მიმომსვლელი ზედამხედველები კრების მონახულებას აწყობენ ჩვენს „აღსაშენებლად“, მაგრამ მათაც ესაჭიროებათ სულიერი „აღშენება“. პავლესაც ჰქონდა ისეთი მომენტები, როდესაც გამხნევება ესაჭიროებოდა და ხშირად სთხოვდა თანაქრისტიანებს, რომ მისთვის ელოცათ (საქმეები 28:15; რომაელთა 15:30–32; 2 კორინთელთა 1:11; კოლასელთა 4:2, 3; 1 თესალონიკელთა 5:25). დღევანდელ მიმომსვლელ ზედამხედველებსაც ესაჭიროებათ ჩვენი ლოცვები და გამხნევება.

10. როგორ შეგვიძლია დავეხმაროთ მიმომსვლელ ზედამხედველებს, რომ მათი საქმიანობა უფრო სასიხარულო იყოს?

¹⁰ გვითქვამს თუ არა სარაიონო ზედამხეველისა და მისი მეუღლისათვის, რომ მათ მონახულებას ძალიან ვაფასებთ? გვითქვამს თუ არა მისთვის მადლობა იმ რჩევისთვის, რომელიც დამხმარე იყო ჩვენთვის? გვითქვამს თუ არა, რომ მისმა რჩევებმა სამქადაგებლო მსახურებასთან დაკავშირებით, უფრო მეტი სიხარულით აგვავსო? თუ ასე მოვიქცევით ყოველთვის, მის მსახურებას უფრო მეტი სიხარულით ავავსებთ (ებრაელთა 13:17). ერთ-ერთი ზედამხედველი ესპანეთში განსაკუთრებით აღნიშნავდა, თუ რამდენად აფასებდნენ ის და მისი მეუღლე სამადლობელ ბარათებს, რომლებსაც კრებების მონახულების შემდეგ ღებულობდნენ. „ჩვენ შენახული გვაქვს ეს ბარათები და ვკითხულობთ მაშინ, როდესაც გულდამძიმებულები ვართ, — ამბობს ის. — ეს ნამდვილად წარმოადგენს ჩვენი გამხნევების წყაროს“.

11. რატომ უნდა ვუთხრათ საოლქო და სარაიონო ზედამხედველების მეუღლეებს, რომ გვიყვარან და მადლიერები ვართ?

¹¹ მიმომსვლელი ზედამხედველის მეუღლისთვის ნამდვილად კარგი იქნება შექების სიტყვები. ამ სფეროში მსახურებისთვის მეუღლის მხარდასაჭერად მან დიდი მსხვერპლი გაიღო. ამ ერთგულმა დებმა დათმეს ბუნებრივი სურვილი, ჰქონოდათ საკუთარი სახლი და უმეტეს შემთხვევაში უარი თქვეს ბავშვების გაჩენაზე. იფთახის ასული იყო იეჰოვას ერთ-ერთი მსახური, რომელმაც მამის აღთქმის გამო თავისი სურვილით თქვა უარი, ჰყოლოდა მეუღლე და ჰქონოდა ოჯახი (მსაჯულნი 11:30–39). რა თვალსაზრისი ჰქონდათ მის მიერ გაღებულ მსხვერპლზე სხვებს? მსაჯულნის 11:40-ში ნათქვამია: „წლიდან წლამდე, წელიწადში ერთხელ, მიდიან ისრაელიანი ქალიშვილები და ოთხი დღე იხსენებენ [აქებენ, აქ] იფთახ გალაადელის ასულს“. რა სასიამოვნოა, როდესაც ვცდილობთ საოლქო და სარაიონო ზედამხედველის მეუღლეებს ვუთხრათ, რომ გვიყვარან და მადლიერები ვართ!

„სტუმართმოყვარეობა არ დაივიწყოთ“

12, 13. ა) ბიბლიიდან გამომდინარე, რა საფუძველი არსებობს იმისთვის, რომ მიმომსვლელი ზედამხედველებისა და მათი მეუღლეების მიმართ გამოვავლინოთ სტუმართმოყვარეობა? ბ) მოიყვანე მაგალითი, თუ როგორ შეიძლება ასეთი სტუმართმოყვარეობა ორმხრივად სასარგებლო იყოს.

¹² სტუმართმოყვარეობის გამოჩენა სიყვარულისა და მადლიერების გამოვლენის კიდევ ერთი საშუალებაა მათ მიმართ, რომლებიც ასრულებენ ქრისტიანულ მიმოსვლით სამუშაოს (ებრაელთა 13:2). იოანე მოციქულმა შეაქო გაიოზი იმ სტუმართმოყვარეობის გამო, რომელიც გამოიჩინა კრების მოსანახულებლად მისული მიმომსვლელი მისიონერების მიმართ. იოანე წერდა: „საყვარელო! ერთგულად აკეთებ ყოველივეს, რასაც იქმ ძმებისათვის და უცხოთათვის, რომელთაც დაამოწმეს შენი სიყვარული ეკლესიის წინაშე. კარგს იზამ, თუ ღვთის წინაშე ღირსეულად გამოისტუმრებ. ვინაიდან მისი სახელის გულისათვის წავიდნენ და არაფერი აუღიათ წარმართთაგან. ამიტომ გვმართებს ასეთების მიღება, რათა ჭეშმარიტების თანამშრომელნი გავხდეთ“ (3 იოანე 5–8). სამეფოს შესახებ სამქადაგებლო საქმიანობის გარდა, დღეს ჩვენც შეგვიძლია მსგავსი სტუმართმოყვარეობა გამოვავლინოთ მიმომსვლელი ზედამხედველებისა და მათი მეუღლეების მიმართ. რასაკვირველია, ადგილობრივი უხუცესი დარწმუნებული უნდა იყოს, რომ საცხოვრებელი ადგილი დამაკმაყოფილებელია, მაგრამ ერთ-ერთმა საოლქო ზედამხედველმა თქვა: „ჩვენი ურთიერთობა ძმებთან იმაზე არ უნდა იყოს დაფუძნებული, თუ რისი გაკეთება შეუძლიათ ჩვენთვის. ჩვენ არ გვსურს დავტოვოთ ასეთი შთაბეჭდილება. ჩვენ მზად უნდა ვიყოთ ყველა ძმისგან მივიღოთ სტუმართმოყვარეობა, მდიდარი იქნება თუ ღარიბი“.

¹³ სტუმართმოყვარეობა, შესაძლოა, როგორც სტუმრისთვის, ასევე მასპინძლისთვისაც, სასარგებლო იყოს. „ოჯახში ჩვეულებად გვქონდა, რომ ჩვენთან დასარჩენად მოგვეწვია მიმომსვლელი ზედამხედველები, — იხსენებს ჟორჟეი, ყოფილი სარაიონო ზედამხედველი, რომელიც ამჟამად ბეთელში მსახურობს. — ვფიქრობ, რომ მათი სტუმრობა იმაზე მეტად მეხმარებოდა, ვიდრე ბავშვობისას ვხვდებოდი. გარდატეხის ასაკში სულიერ საკითხებთან დაკავშირებით პრობლემები მქონდა. დედა ნერვიულობდა, არ იცოდა როგორ დამხმარებოდა და ამიტომაც სარაიონო ზედამხედველს სთხოვა ჩემთან ესაუბრა. თავდაპირველად თავს ვარიდებდი მასთან შეხვედრას, რადგან მეგონა, რომ შენიშვნებს მომცემდა. მაგრამ მისმა მეგობრულმა დამოკიდებულებამ მიზანს მიაღწია. მან ორშაბათს სადილად დამპატიჟა და მეც გული გავუხსენი, რადგანაც დავრწმუნდი, რომ გამიგო. მან გულდასმით მომისმინა. მისი პრაქტიკული რჩევები ნამდვილად დამხმარე აღმოჩნდა და დავიწყე სულიერი წინსვლა“.

14. რატომ უნდა ვიყოთ მადლიერი და არა კრიტიკულად განწყობილი მიმომსვლელი უხუცესების მიმართ?

¹⁴ მიმომსვლელი ზედამხედველი ცდილობს, რომ სულიერად დაეხმაროს როგორც ახალგაზრდას, ასევე ხანდაზმულს. ამიტომაც ნათელია, რომ მადლიერება უნდა გამოვავლინოთ მისი ძალისხმევისთვის. მაგრამ, ნუთუ მოსაწონი იქნებოდა, გაგვეკრიტიკებინა ისინი მცირე შეცდომების გამო ან უარყოფითი მხრიდან შეგვედარებინა მათთან, რომლებიც ადრე ინახულებდნენ ჩვენს კრებას? ცხადია, რომ ეს გულსატკენი იქნებოდა. პავლესთვის გამამხნევებელი არ ყოფილა, როდესაც ესმოდა, რომ მის საქმიანობას აკრიტიკებდნენ. როგორც ჩანს, ზოგიერთი კორინთელი ქრისტიანი დამამცირებელ შენიშვნებს გამოთქვამდა მის გარეგნობასა და საუბრის უნარზე. პავლემ თავად მოიყვანა ციტატად მათი სიტყვები: „წერილებში ის მძიმე და ძლიერია, მაგრამ როდესაც პირადად იმყოფება, სუსტია და მისი სიტყვაც არარაობააო“ (2 კორინთელთა 10:10). საბედნიეროდ, მიმომსვლელი ზედამხედველები, ჩვეულებრივ, სიყვარულით აღსავსე მადლიერების სიტყვებს ისმენენ.

15, 16. როგორ გავლენას ახდენს მიმომსვლელ ზედამხედველებსა და მათ მეუღლეებზე სიყვარული და მონდომება, რომელსაც თანამორწმუნეები ავლენენ?

¹⁵ სულიერი დებისა და ძმების მოსანახულებლად, ერთ-ერთ სარაიონო ზედამხედველს მთელი დღე უწევს ლათინური ამერიკის ტალახიან გზაზე მგზავრობა იმ ზონაში, რომელსაც პარტიზანები აკონტროლებენ. „აღტაცებული და აღელვებული ვარ, როდესაც ვხედავ, როგორ გამოხატავენ ძმები მადლიერებას მონახულებისთვის, — წერს ის, — მიუხედავად იმისა, რომ ძალიან რთულია მათთან მისვლა და მრავალი საშიშროებისა და გასაჭირის პირისპირ ვარ ხოლმე, ძმების მონდომებითა და სიყვარულით ვჯილდოვდები“.

¹⁶ აფრიკაში ერთ-ერთი სარაიონო ზედამხედველი წერს: „ჩვენ ძალიან გვიყვარს ტანზანია იმის გამო, რომ ძმებმა სიყვარული გვაგრძნობინეს! ძმები მზად იყვნენ, ესწავლათ ჩვენგან და თავს ბედნიერად გრძნობდნენ ოჯახებში ჩვენი სტუმრობით“. პირველი საუკუნის ქრისტიან წყვილს, აკვილასა და პრისკილას, მოსიყვარულე და ბედნიერი ურთიერთობა ჰქონდათ პავლე მოციქულთან. სინამდვილეში მათ შესახებ პავლემ თქვა: „მოიკითხეთ პრისკილა და აკვილა, ჩემი თანამშრომელნი ქრისტე იესოში, რომელნიც თავს სწირავდნენ ჩემი სიცოცხლისათვის და, რომელთაც არა მარტო მე ვემადლიერები, არამედ წარმართთა ეკლესიებიც და მათი საშინაო ეკლესიაც“ (რომაელთა 16:3, 4). მიმომსვლელი ზედამხედველები და მათი მეუღლეები მადლიერები არიან, რომ ჰყავთ აკვილასა და პრისკილას მსგავსი მეგობრები, რომლებიც განსაკუთრებით ცდილობენ, გამოავლინონ სტუმართმოყვარეობა და ახლო თანამშრომლობა.

კრებების განმტკიცება

17. რატომ შეიძლება ითქვას, რომ მიმომსვლელი ზედამხედველის ღონისძიება ბრძნულია და საიდან ღებულობენ ისინი მითითებას?

¹⁷ იესომ თქვა: „სიბრძნე საქმეებითაა გამართლებული“ (მათე 11:19). მიმომსვლელი ზედამხედველის ღონისძიების სიბრძნე ნათელი ხდება იმით, რომ ეხმარება ღვთის ხალხის კრებების განმტკიცებას. მეორე მისიონერული მოგზაურობის დროს პავლე სილასთან ერთად წარმატებით „დადიოდა სირიასა და კილიკიაში და განამტკიცებდა ეკლესიებს“. „მოციქულთა საქმეებში“ ვკითხულობთ: „ქალაქებში გავლისას ისინი ასწავლიდნენ, რომ დაეცვათ მოციქულებისა და უხუცესების მიერ იერუსალიმში დადგენილი წესები. ეკლესიები მტკიცდებოდა რწმენით და დღითი დღე იზრდებოდა მათი რიცხვი“ (საქმეები 15:40, 41; 16:4, 5). ახლანდელი მიმომსვლელი ზედამხედველები, ისევე როგორც თითოეული ქრისტიანი, სულიერ მითითებებს ღებულობენ საღვთო წერილისა და ‘ერთგული და გონიერი მონის’ მიერ გამოცემული პუბლიკაციებით (მათე 24:45).

18. როგორ განამტკიცებენ მიმომსვლელი ზედამხედველები კრებებს?

¹⁸ დიახ, მიმომსვლელი უხუცესები ყოველთვის იეჰოვას სულიერ სუფრასთან უნდა იკვებებოდნენ. მათ ძალიან კარგად უნდა იცოდნენ მეთოდები და მითითებები, რომლებსაც ღვთის ორგანიზაცია მიჰყვება. ამგვარად, ასეთი მამაკაცები კურთხევა იქნებიან სხვებისთვის. სამქადაგებლო მსახურებაში გულმოდგინების შესანიშნავი მაგალითის მიცემით მათ შეუძლიათ, დაეხმარონ თანამორწმუნეებს ქრისტიანული მსახურების გაუმჯობესებაში. მიმომსვლელი უხუცესების მოხსენება, რომელიც ბიბლიაზეა დაფუძნებული, სულიერად „აღაშენებს“ მსმენელებს. მიმომსვლელი ზედამხედველები იმით განამტკიცებენ იმ კრებებს, რომელთა მონახულების უპირატესობაც აქვთ, რომ ეხმარებიან ყველას, მიჰყვნენ ღვთის სიტყვის რჩევას, მთელ მსოფლიოში იეჰოვას ხალხთან შეთახმებულად იმსახურონ და გამოიყენონ სულიერი საზრდოს მარაგი, რომელსაც ღმერთი ‘ერთგული მონის’ მეშვეობით გვთავაზობს.

19. რომელი კითხვები რჩება განსახილველად?

¹⁹ დაახლოებით ერთი საუკუნის წინ, როდესაც იეჰოვას ორგანიზაციამ ბიბლიის მკვლევართა შორის დააწესა მიმომსვლელი უხუცესების სამუშაო, ამ ჟურნალში ნათქვამი იყო: „დაველოდებით შედეგებს, მიგვიძღვის თუ არა უფალი წინ“. იეჰოვას წინამძღოლობა ნათლად გამოჩნდა. მისი კურთხევითა და ხელმძღვანელი საბჭოს ზედამხედველობით ეს საქმიანობა წლების განმავლობაში უფრო გაფართოვდა და დაიხვეწა. შედეგად, მთელ მსოფლიოში იეჰოვას მოწმეთა კრებები რწმენაში უფრო მტკიცე ხდება და დღითი დღე რიცხობრივად იზრდება. როგორც ჩანს, იეჰოვა კურთხევას არ იშურებს თავგანწირული სულისკვეთების მქონე ყველა პიროვნების მიმართ, რომელიც არის ‘ძღვენი ადამიანში’. მაგრამ, როგორ შეუძლიათ მიმომსვლელ ზედამხედველებს წარმატებით შეასრულონ თავიანთი საქმე? რა არის მათი მიზანი? როგორ შეუძლიათ საუკეთესოს მიაღწიონ?

როგორ მსახურობენ კარგ განმგებლებად მიმომსვლელი ზედამხედველები

„თითოეული ერთმანეთს იმ ნიჭით ემსახურეთ, რაც მიგიღიათ, როგორც კარგმა განმგებლებმა ღვთის მრავალგვარი მადლისა“ (1 პეტრე 4:10).

1, 2. ა) როგორ განმარტავდი სიტყვა „განმგებელს“? ბ) ვინ არიან ღვთის მიერ გამოყენებული განმგებლები?

იეჰოვა ყველა თავის ერთგულ ქრისტიანს განმგებლად იყენებს. განმგებელი ხშირად ოჯახის მეურვეა. მან შესაძლოა თავისი ბატონის საქმეებსაც უხელმძღვანელოს (ლუკა 16:1–3; გალატელთა 4:1, 2). იესო თავის მიწიერ ერთგულ ცხებულებს ‘ერთგულ განმგებელს’ უწოდებდა. ამ განმგებელს მიანდო ‘მთელი თავისი ქონება’ და ასევე სამეფოს შესახებ ცნობის ქადაგების საქმიანობა (ლუკა 12:42–44; მათე 24:14, 45).

² პეტრე მოციქული ამბობდა, რომ ყველა ქრისტიანი ღვთისგან სხვადასხვაგვარად ბოძებული დაუმსახურებელი წყალობის განმგებელია. ყოველ ქრისტიანს აქვს სათანადო ადგილი, სადაც შეუძლია ერთგული განმგებელი იყოს (1 პეტრე 4:10). უხუცესებად დანიშნული ქრისტიანები და მათ შორის მიმომსვლელი ზედამხედველებიც განმგებლები არიან (ტიტე 1:7). როგორი თვალსაზრისი უნდა არსებობდეს მიმომსვლელ უხუცესებზე? რა თვისებები და მიზნები უნდა ჰქონდეთ მათ? და როგორ შეუძლიათ ყველაფერი საუკეთესოდ გააკეთონ?

მათი მსახურების გამო მადლიერება

3. რატომ შეიძლება მიმომსვლელ ზედამხედველებს ‘კარგი განმგებლები’ ეწოდოთ?

³ მიმომსვლელ ზედამხედველსა და მის მეუღლეს ერთმა ქრისტიანმა დაქორწინებულმა წყვილმა მისწერა: „გვსურს მადლიერება გამოვთქვათ იმისთვის, რომ დრო და სიყვარული დაგვითმეთ. ჩვენთვის, როგორც ოჯახისთვის, ძალიან სასარგებლო იყო თქვენს მიერ მოცემული რჩევა და გამხნევება. ვიცით, რომ სულიერი ზრდა უნდა განვაგრძოთ, მაგრამ იეჰოვას დახმარებითა და თქვენნაირ და-ძმებთან ურთიერთობით ზრდის პროცესთან დაკავშირებული სიძნელეები უფრო იოლი გადასალახავია“. წერილები, მსგავსი სიტყვებით, ხშირია, რადგან მიმომსვლელი ზედამხედველები პირადად არიან დაინტერესებული თანამორწმუნეებით, სწორედ ისევე, როგორც კარგი განმგებელი — სახლეულის საჭიროებებით. ზოგი შესანიშნავი მომხსენებელია. ზოგიც სამქადაგებლო მსახურებაში გამოირჩევა, ზოგიც ცნობილია სითბოთი და თანაგრძნობით. სხვების მომსახურებაში ასეთი ნიჭების განვითარებითა და გამოყენებით მიმომსვლელ ზედამხედველებს სამართლიანად შეიძლება ეწოდოთ ‘კარგი განმგებლები’.

4. რომელი კითხვები იქნება განხილული?

⁴ „განმგებელთაგან მოითხოვენ, რომ ვინმე აღმოჩნდეს სარწმუნო [„ერთგული“, აფ]“ — წერდა პავლე მოციქული (1 კორინთელთა 4:2). სხვადასხვა კრებებში თანაქრისტიანების მომსახურება კვირიდან კვირამდე განუმეორებელი და სასიხარულო უპირატესობაა. მაგრამ, ამასთანავე, ეს მძიმე პასუხისმგებლობაცაა. მაგრამ, როგორ შეუძლიათ მიმომსვლელ ზედამხედველებს, ერთგულად და წარმატებით შეასრულონ განმგებლობა?

განმგებლობის წარმატებით შესრულება

5, 6. რატომ არის ასე მნიშვნელოვანი მიმომსვლელი ზედამხედველის ცხოვრებაში იეჰოვასადმი ლოცვით მინდობა?

⁵ მნიშვნელოვანია ლოცვით იეჰოვაზე მინდობა, რომ მიმომსვლელმა ზედამხედველებმა განმგებლობაში წარმატებას მიაღწიონ. დღის განრიგისა და მრავალი პასუხისმგებლობის გამო, შესაძლოა, მათ ზოგჯერ თავი გადატვირთულად იგრძნონ (შეადარე 2 კორინთელთა 5:4). ამიტომ, მათ ესაჭიროებათ ფსალმუნმომღერალი დავითის სიტყვების თანახმად მოქმედება, რომელიც მღეროდა: „მიანდე უფალს შენი საზრუნავი და ის შეგეხიდება, იგი არასოდეს არ დაუშვებს წმიდანის წაბორძიკებას“ (ფსალმუნი 54:23). ასევე მანუგეშებელია დავითის, კიდევ ერთგან ჩაწერილი, სიტყვები: „კურთხეული არს უფალი, დღითი დღე ზრუნავს ჩვენზე“ (ფსალმუნი 67:20).

⁶ საიდან ჰქონდა პავლეს ძალები, ეზრუნა საკუთარ სულიერ პასუხისმგებლობებზე? „ყოველივე ძალმიძს ჩემს განმამტკიცებელში,“ — წერდა ის (ფილიპელთა 4:13). დიახ, იეჰოვა ღმერთი იყო პავლეს ძალების სათავე. პეტრეც მსგავს რჩევას იძლეოდა: „თუ ვინმე ემსახურება, ღვთის მიერ მინიჭებული ძალით ემსახუროს, რათა იდიდებოდეს ღმერთი ყველაფერში იესო ქრისტეს მიერ“ (1 პეტრე 4:11). ერთი ძმა, რომელიც მრავალი წელი მიმომსვლელი ზედამხედველი იყო, ღმერთზე მინდობის აუცილებლობას ხაზგასმით აღნიშნავდა შემდეგი სიტყვებით: „მიენდე იეჰოვას პრობლემების გამკლავებისას და ორგანიზაციისგან ეძებე დახმარება“.

7. რა როლს თამაშობს წონასწორობა მიმომსვლელი ზედამხედველის საქმიანობაში?

⁷ წარმატების მისაღწევად მიმომსვლელ ზედამხედველს ესაჭიროება წონასწორობის შენარჩუნება. სხვა ქრისტიანების მსგავსად, ის ცდილობს ‘გამოსცადოს უმჯობესი [უფრო მნიშვნლოვანი, აქ]’ (ფილიპელთა 1:10)a. როდესაც ადგილობრივ უხუცესებს რომელიმე საკითხზე შეკითხვები აქვთ, მათი მხრიდან ბრძნული იქნებოდა, რჩევა ეკითხათ მონახულების დროს მოსული სარაიონო ზედამხედველისთვის (იგავნი 11:14; 15:22). შესაძლოა, მისი გაწონასწორებული შენიშვნები და ბიბლიიდან გამომდინარე რჩევა დამხმარე აღმოჩნდეს, როდესაც კრებიდან მისი წასვლის შემდეგ უხუცესები განაგრძობენ წამოჭრილი საკითხის გადაჭრას. დაახლოებით იგივე აზრი უთხრა პავლემ ტიმოთეს: „რაც მოისმინე ჩემგან მრავალი მოწმის თანდასწრებით, გადაეცი სარწმუნო ადამიანებს, რომელთაც უნარი ექნებათ სხვების სწავლებისა“ (2 ტიმოთე 2:2).

8. რატომ არის აუცილებელი ბიბლიის შესწავლა, კვლევა და მასზე ღრმა ფიქრი?

⁸ საღვთო წერილის შესწავლა, კვლევა და მასზე ღრმა ფიქრი აუცილებელია ბრძნული რჩევის მიცემისთვის (იგავნი 15:28). ერთმა საოლქო ზედამხედველმა თქვა: „როდესაც ვხვდებით უხუცესებს, არ უნდა გვეშინოდეს, ვაღიაროთ, თუ რომელიმე საკითხზე პასუხი არ ვიცით“. ძალისხმევის მოხმარება, რომ ყველაფერზე „ქრისტეს აზრი“ ვიქონიოთ, შესაძლებელს ხდის, რომ ბიბლიაზე დაფუძნებული რჩევები მივცეთ სხვებს, რათა დავეხმაროთ ღვთის ნების შესრულებაში (1 კორინთელთა 2:16). ზოგჯერ მიმომსვლელ ზედამხედველს მითითებებისთვის წერილების წერა უწევს საგუშაგო კოშკის საზოგადოების მისამართით. ნებისმიერ შემთხვევაში იეჰოვა ღმერთისადმი რწმენა და ჭეშმარიტებისადმი სიყვარული უფრო მნიშვნელოვანია, ვიდრე სხვებზე შთაბეჭდილების მოხდენა ან კიდევ — ორატორული ნიჭი. იმის ნაცვლად, რომ პავლე „ამაღლებული სიტყვით ან სიბრძნით“ წარმდგარიყო კორინთში, მსახურება ‘უძლურებით, შიშითა და დიდი ძრწოლით’ დაიწყო. ნუთუ ყოველივე უშედეგო იყო? პირიქით, ეს დაეხმარა კორინთელებს, ჰქონოდათ ‘არა კაცის სიბრძნის, არამედ ღვთის ძალის’ რწმენა (1 კორინთელთა 2:1–5).

სხვა მნიშვნელოვანი თვისებები

9. რატომ არის საჭირო მიმომსვლელი ზედამხედველების მხრიდან თანაგრძნობა?

⁹ მიმომსვლელ ზედამხედველებს თანაგრძნობის გამოვლენა ეხმარება, კარგი შედეგების მიღწევაში. პეტრე ყველა ქრისტიანს მოუწოდებდა, ყოფილიყვნენ „გულშემატკივარნი“, ანუ „თანამგრძნობელნი“ (1 პეტრე 3:8, სქოლიო, აქ). ერთ-ერთი სარაიონო ზედამხედველის აზრით, აუცილებელია ‘დაინტერესებული იყო კრების თითოეული პიროვნებით და გამოავლინო გულწრფელი ყურადღება’. ასეთივე სულისკვეთებით წერდა პავლე: „მოხარულებთან იხარეთ და მოტირალებთან იტირეთ.“ (რომაელთა 12:15). ასეთი პოზიცია აღძრავს მიმომსვლელ ზედამხედველებს, გულწრფელი ძალისხმევა მოახმარონ თანამორწმუნეების პრობლემებისა და მდგომარეობის გაგებას. შემდეგ მათ შეუძლიათ მისცენ „აღმშენებლური“, ბიბლიაზე დაფუძნებული რჩევა, რომლის გამოყენებაც კარგ ნაყოფს გამოიღებს. ერთ-ერთმა სარაიონო ზედამხედველმა, რომელიც სხვების მიმართ თანაგრძნობის გამოვლენით გამოირჩევა, ტურინის (იტალია) ახლოს არსებული კრებიდან მიიღო წერილი: „თუ გსურს იყო საინტერესო, დაინტერესდი სხვებით; თუ გსურს სიამოვნება მიიღო, ასიამოვნე სხვებს; თუ გსურს უყვარდე სხვებს, იყავი მოსიყვარულე; თუ გსურს მიიღო დახმარება, თვითონ იყავი სხვის დასახმარებლად მზად. აი ეს არის ყოველივე ის, რაც თქვენგან ვისწავლეთ!“

10. რა თქვეს თავმდაბლობის შესახებ სარაიონო და საოლქო ზედამხედველებმა და რა მაგალითი დაგვიტოვა იესომ ამასთან დაკავშირებით?

¹⁰ თავმდაბლობა და გულისხმიერება ძალიან ბევრის გაკეთებაში ეხმარება მიმომსვლელ ზედამხედველებს. ერთ-ერთი სარაიონო ზედამხედველი აღნიშნავდა: „ძალიან მნიშვნელოვანია თავმდაბლობის შენარჩუნება“. ის აფრთხილებდა ახალ მიმომსვლელ ზედამხედველებს: „არ დაუშვათ შედარებით მდიდარი ძმების არასწორ გავლენაში მოქცევა იმის გამო, რასაც ძმები შესაძლოა თქვენთვის გააკეთებენ და არც მათთან მეგობრობით არ შემოიფარგლოთ, არამედ ეცადეთ, სხვებთანაც მიუკერძოებლად გქონდეთ ურთიერთობა“ (მეორე ნეშტთა 19:6, 7). ნამდვილად თავმდაბალ მიმომსვლელ ზედამხედველს არ ექნება გადამეტებული წარმოდგენა საკუთარი პიროვნების მნიშვნელობაზე, როგორც საზოგადოების წარმომადგენელზე. ერთ-ერთი საოლქო ზედამხედველი სათანადოდ აღნიშნავდა: „იყავი თავმდაბალი და იყავი მზად, უსმინო ძმებს. შეეცადე, იყო გულისხმიერი“. იესო ქრისტეს, ოდესმე მცხოვრებთაგან ყველაზე დიდებულ ადამიანს, შეეძლო ისე მოქცეულიყო, რომ ადამიანებს თავი მასთან შებოჭილად ეგრძნოთ, მაგრამ ის იმდენად თავმდაბალი და გულისხმიერი იყო, რომ ბავშვებიც კი თავისუფლად გრძნობდნენ თავს მისი თანდასწრებით (მათე 18:5; მარკოზი 10:13–16). მიმომსვლელ ზედამხედველებს სურთ, რომ ყველა, ბავშვი, მოზარდი თუ ასაკოვანი — ყველა, ვინც კი კრებაშია — თავისუფლად მიმართავდეს მათ.

11. რა გავლენა შეიძლება მოახდინოს დროულმა მობოდიშებამ?

¹¹ რასაკვირველია, „ჩვენ ყველანი ბევრს ვცოდავთ“ და არც მიმომსვლელი ზედამხედველია გამონაკლისი (იაკობი 3:2). როდესაც მიმომსვლელი ზედამხედველი რაღაც შეცდომას უშვებს, უხუცესებს გულწრფელი მობოდიშებით აძლევს თავმდაბლობის მაგალითს. იგავნის 22:4-ის თანახმად, „თვინიერების და უფლის შიშის საზღაური სიმდიდრე, დიდება და სიცოცხლეა“. და ნუთუ ღვთის ყველა მსახურს არ ესაჭიროება ‘მოწიწებით [თავმდაბლობით, 1960 წლის ინგლისური გამოცემიდან] სიარული უფლის წინაშე’? (მიქა 6:8). როდესაც ერთ-ერთ სარაიონო ზედამხედველს ჰკითხეს, თუ რა რჩევას მისცემდა ახალ მიმომსვლელ უხუცესს, მან თქვა: „დიდი პატივისცემითა და ყურადღებით მოეპყარი ძმებს და შენზე უკეთესებად მიიჩნიე. ძალიან ბევრს ისწავლი ძმებისგან. ყოველთვის შეინარჩუნე თავმდაბლობა. იყავი ისეთი, როგორიც ხარ. შეეცადე სხვების წინაშე თავი დიდ ვინმედ არ წარმოაჩინო“ (ფილიპელთა 2:3).

12. რატომ არის ასე მნიშვნელოვანი ქრისტიანულ მსახურებაში გულმოდგინება?

¹² ქრისტიანულ მსახურებაში გულმოდგინება წონას მატებს მიმომსვლელი ზედამხედველის სიტყვებს. სინამდვილეში, როცა მიმომსვლელი ზედამხედველი და მისი მეუღლე სახარების ქადაგების საქმეში გულმოდგინების ნიმუშს წარმოადგენენ, უხუცესები, მათი მეუღლეები და კრების დანარჩენი წევრები მხნევდებიან, რომ მსახურებაში გულმოდგინეები იყვნენ. „იყავით მსახურებაში გულმოდგინეები — მოგვიწოდებს ერთ-ერთი სარაიონო ზედამხედველი და შემდეგ აგრძელებს: — როგორც მივხვდი, საერთო ჯამში, კრება რაც უფრო გულმოდგინეა მსახურებაში, პრობლემებიც მით უფრო ნაკლები აქვს“. მეორე სარაიონო ზედამხედველმა აღნიშნა: „მჯერა, რომ თუ უხუცესები და-ძმებთან ერთად გადიან სამქადაგებლო მსახურებაში და ეხმარებიან მათ, სიხარული იგრძნონ მსახურებაში, შედეგი იქნება სულის სიმშვიდე და იეჰოვასადმი მსახურებაში უსაზღვრო კმაყოფილების გრძნობა“. პავლე მოციქულმა მოიკრიფა ‘გაბედულება, რომ თესალონიკელებისთვის დიდი ბრძოლით ექადაგა სახარება’. არ არის გასაკვირი, რომ მათ უამრავი მოგონება ჰქონდათ მის მონახულებასა და სამქადაგებლო საქმიანობასთან დაკავშირებით და პავლესთან კიდევ შეხვედრის დიდი სურვილით იყვნენ გამსჭვალული! (1 თესალონიკელთა 2:1, 2; 3:6).

13. რას ითვალისწინებს მიმომსვლელი ზედამხედველი სამქადაგებლო მსახურების დროს თანაქრისტიანებთან თანამშრომლობისას?

¹³ მიმომსვლელი ზედამხედველი, როდესაც სამქადაგებლო მსახურებაში თანაქრისტიანებთან თანამშრომლობს, ითვალისწინებს მათ მდგომარეობასა და შესაძლებლობებს. მიუხედავად იმისა, რომ მისი რჩევები შესაძლოა დამხმარეა, იცის, რომ შეიძლება ზოგი ღელავს გამოცდილ უხუცესთან ერთად ქადაგებისას. ამიტომ, ზოგჯერ შექება უფრო სასარგებლოა, ვიდრე რჩევა. როდესაც ბიბლიის შესწავლაზე მიმომსვლელი ზედამხედველი ახლავს მაუწყებელს ან პიონერს, მათ შეიძლება ირჩიონ, რომ მიმომსვლელი ზედამხედველი გაუძღვეს შესწავლას. ამგვარად, როგორც ჩანს, ისინი ეცნობიან იმ საშუალებებს, თუ როგორ გააუმჯობესონ სწავლების მეთოდები.

14. რატომ შეიძლება ითქვას, რომ გულმოდგინე მიმომსვლელი ზედამხედველები სხვებშიც გულმოდგინებას აღვივებენ?

¹⁴ გულმოდგინე მიმომსვლელი ზედამხედველები სხვებშიც გულმოდგინებას აღვივებენ. უგანდაში ერთ-ერთი სარაიონო ზედამხედველი ძმასთან ერთად მთელი საათის განმავლობაში გზას მიიკვლევდა უღრან ტყეში, რომ მისულიყვნენ ბიბლიის შესწავლაზე იმ ოჯახში, რომელიც ნელა მიიწევდა წინ. ამასობაში ისეთი კოკისპირული წვიმა წამოვიდა, რომ თავიდან ფეხებამდე გაილუმპნენ. როდესაც ოჯახის ექვსმა წევრმა გაიგო, რომ მათი სტუმარი მიმომსვლელი ზედამხედველი იყო, ძალიან დიდი შთაბეჭდილება მოახდინა მათზე. მათ იცოდნენ, რომ მათი ეკლესიის მსახურები არასოდეს ავლენდნენ თავიანთი სამწყსოს მიმართ ასეთ ინტერესს. შემდეგ კვირა დღეს ისინი პირველად დაესწრნენ ქრისტიანულ შეხვედრას და გამოთქვეს სურვილი, გამხდარიყვნენ იეჰოვას მოწმეები.

15. რა სასიამოვნო შემთხვევა ჰქონდა გულმოდგინე სარაიონო ზედამხედველს მექსიკაში?

¹⁵ ოახაკას შტატში (მექსიკა) ერთი სარაიონო ზედამხედველი ყველანაირად აკეთებდა იმაზე მეტს, რაც მოეთხოვებოდა. მან იზრუნა იმისთვის, რომ ოთხი დღით დარჩენილიყო ციხის საკანში, რათა მოენახულებინა შვიდი პატიმარი, რომლებიც სამეფოს მაუწყებლები გახდნენ. რამდენიმე დღე ის მათთან ერთად დადიოდა საკნიდან-საკანში დამოწმებისას და მათთან ერთად ატარებდა ბიბლიის შესწავლებს. გამოვლენილი ინტერესის გამო ზოგი შესწავლა შუაღამემდე გაუგრძელდათ. „მონახულების დასასრულს, როგორც პატიმრები, ასევე მეც უსაზღვრო სიხარულს ვგრძნობდით ურთიერთგამხნევების შედეგად,“ — გვწერს გულმოდგინე სარაიონო ზედამხედველი.

16. რატომ არის ასე სასარგებლო, როდესაც მიმომსვლელი ზედამხედველები და მათი მეუღლეები ამხნევებენ სხვებს?

¹⁶ მიმომსვლელი ზედამხედველები ცდილობენ, ყოველთვის ყველა გაამხნევონ. როდესაც პავლე მაკედონიის კრებას ეწვია, „მრავალი სიტყვით დაარიგა [გაამხნევა, აქ]“ ისინი (საქმეები 20:1, 2). გამამხნევებელი სიტყვები სულიერი მიზნების დასასახავად, შესაძლოა ძალიან დამხმარე აღმოჩნდეს, როგორც ახალგაზრდებისთვის, ასევე ხანდაზმულებისთვისაც. საგუშაგო კოშკის საზოგადოების ერთ-ერთ დიდ ფილიალში არაფორმალურმა გამოკითხვამ ცხადყო, რომ სრული დროით მსახურთა მსურველების დაახლოებით 20 პროცენტი წახალისებული იყო სარაიონო ზედამხედველების მიერ. მიმომსვლელი ზედამხედველის ცოლიც სამეფოს სრული დროით მქადაგებლის შესანიშნავი მაგალითით ცხადყოფს, რომ გამხნევების უდიდესი წყაროა.

17. რას გრძნობს ხანდაზმული სარაიონო ზედამხედველი იმასთან დაკავშირებით, რომ უპირატესობა აქვს დაეხმაროს სხვებს?

¹⁷ ხანდაზმულებსა და გულგატეხილებს განსაკუთრებით ესაჭიროებათ გამხნევება. ერთი ხანდაზმული სარაიონო ზედამხედველი წერს: „ჩემი მსახურების ერთ-ერთი მხარე, რომელიც ჩემში ენით აუწერელ სიხარულს იწვევს, არის უპირატესობა, ღვთის სამწყსოში დახმარება გავუწიო არააქტიურებსა და ფიზიკურად უძლურებს. ჩემთვის განსაკუთრებული მნიშვნელობა აქვს რომაელთა 1:11, 12-ს, რადგან ვღებულობ უსაზღვრო გამხნევებასა და ძალას, როდესაც ‘სხვებს ვუწილადებ სულიერ ნიჭს განსამტკიცებლად’“.

სიხარულით აღსავსე მსახურების ჯილდო

18. ბიბლიაზე დაფუძნებული რა მიზნები აქვთ მიმომსვლელ ზედამხედველებს?

¹⁸ მიმომსვლელი ზედამხედველები გულწრფელად არიან დაინტერესებული თანამორწმუნეებით. მათ სურთ, გააძლიერონ კრება და სულიერად „აღაშენონ“ (საქმეები 15:41). ერთ-ერთი მიმომსვლელი ზედამხედველი ძალიან ბევრს მუშაობს, რომ „გაამხნევოს, გაახალისოს, გააღვივოს მსახურების შესრულებისა და ჭეშმარიტების თანახმად ცხოვრების სურვილი“ (3 იოანე 3). მეორე ცდილობს, რომ თანამორწმუნეების რწმენა განამტკიცოს (კოლასელთა 2:6, 7). გახსოვდეს, რომ მიმომსვლელი ზედამხედველი არის ‘ერთგული თანამშრომელი’ და არა სხვის რწმენაზე დაუფლებული (ფილიპელთა 4:3; 2 კორინთელთა 1:24). მის მიერ კრების მონახულებისას ვმხნევდებით და გვაქვს დამატებითი მსახურების საშუალება, ასევე უხუცესთა საბჭოს ეძლევა შესაძლებლობა, გადახედოს კრების წარმატებებს და განიხილოს მომავლის მიზნები. მისი სიტყვებითა და მაგალითით კრების მაუწყებლები, პიონერები, სამსახურებრივი თანაშემწეები და უხუცესები შეიძლება გამხნევდნენ და მიეცეთ სტიმული მომავალი საქმისთვის (შეადარე 1 თესალონიკელთა 5:11). ასე რომ, მთელი გულით დაუჭირე მხარი სარაიონო ზედამხედველის მონახულებებს და სრულად გამოიყენე საოლქო ზედამხედველის მიერ შემოთავაზებული მომსახურება.

19, 20. როგორ დაჯილდოვდნენ მიმომსვლელი ზედამხედველები და მათი მეუღლეები ერთგული მსახურებისთვის?

¹⁹ მიმომსვლელი ზედამხედველები და მათი მეუღლეები უხვად არიან დაჯილდოებული ერთგული მსახურებისთვის და შეუძლიათ დარწმუნებული იყვნენ, რომ ყოველი სიკეთისთვის იეჰოვა აკურთხებს მათ (იგავნი 19:17; ეფესელთა 6:8). ხანდაზმული წყვილი, გეორგი და მაგდალენა, მრავალი წელი მონაწილეობდნენ მიმოსვლით მსახურებაში. ლუქსემბურგის კონგრესზე მაგდალენას მიუახლოვდა პიროვნება, რომელსაც მან 20 წლის წინათ დაუმოწმა. ეს ებრაელი ქალი ჭეშმარიტებით დაინტერესდა სწორედ იმ ბიბლიური ლიტერატურის მეშვეობით, რომელიც მაგდალენამ დაუტოვა, და შემდეგ მოინათლა. გეორგთან სულიერი და მივიდა, რომელმაც გაახსენა, რომ დაახლოებით 40 წლის წინ ეწვია სახლში. მის მიერ კეთილი ცნობის შესახებ მთელი ენთუზიაზმით საუბარმა სურვილი აღუძრა მას და მის მეუღლეს, გასცნობოდნენ ჭეშმარიტებას. რასაკვირველია, გეორგმა და მაგდალენამ უსაზღვრო სიხარული განიცადეს.

²⁰ ეფესოში ერთგულმა მსახურებამ პავლეს სიხარული მოუტანა და, ალბათ, აღძრა, ქრისტეს სიტყვები მოეყვანა ციტატად: „გაცემა მეტი ნეტარებაა, ვიდრე მიღება“ (საქმეები 20:35). მიუხედავად იმისა, რომ მიმოსვლითი საქმიანობა განუწყვეტლივ გაცემას ნიშნავს, ისინი, რომლებიც ამას აკეთებენ, თავს ბედნიერად გრძნობენ, განსაკუთრებით მაშინ, როდესაც თავიანთი ტვირთის კარგ ნაყოფს ხედავენ. ერთი სარაიონო ზედამხედველი, რომელიც გულგატეხილ უხუცესს დაეხმარა, მის წერილში კითხულობდა: «ძალიან ‘მანუგეშე’ და დიდი დახმარება გაუწიე ჩემს სულიერ სიცოცხლეს — ისეთი, ვერც კი წარმოგიდგენია. . . შენ ვერასოდეს გაიგებ ბოლომდე, თუ რა დახმარებას წარმოადგენ დღევანდელი მრავალი „ასაფისთვის“, რომელთა „ფეხებმაც კინაღამ გადაუხვიეს“» (კოლასელთა 4:11; ფსალმუნი 72:2).

21. რატომ იტყოდი, რომ 1-ლი კორინთელთა 15:58 შეეხება მიმომსვლელი ზედამხედველების საქმიანობასაც?

²¹ ხანდაზმულ ქრისტიანს, რომელიც მრავალი წელი ასრულებდა სარაიონო საქმეებს, ძალიან უყვარს 1-ლი კორინთელთა 15:58-ზე ფიქრი, სადაც პავლე მოგვიწოდებს: „იყავით მტკიცენი და შეურყეველნი, მუდამ იუხვეთ უფლის საქმეში, რადგან იცით, რომ ფუჭი არაა თქვენი შრომა უფლის წინაშე“. მიმომსვლელ ზედამხედველებს, უეჭველია, ძალიან ბევრი აქვთ უფლის საქმეში გასაკეთებელი. და რა მადლიერები ვართ ჩვენ, რომ ისინი ასეთი სიხარულით მსახურობენ, როგორც იეჰოვასგან მიღებული დაუმსახურებელი წყალობის ერთგული განმგებლები!