მეძავის განადგურება

15. რას ამბობს ანგელოზი მეძავზე, როგორ მოექცევიან მას ათი რქა და მხეცი?

¹⁵ ათი რქა მხოლოდ ღვთის ხალხს არ მტრობს. ანგელოზი იოანეს ახლა ისევ მეძავზე უმახვილებს ყურადღებას: «და მეუბნება: „წყლები, რომლებიც იხილე და რომლებზეც მეძავი ზის, ნიშნავს ხალხებს, ჯგუფებს, ერებსა და ენებს. ათი რქა, შენ რომ იხილე, და მხეცი შეიძულებენ მეძავს, ააწიოკებენ მას და გააშიშვლებენ, მის ხორცს შეჭამენ და მას ცეცხლში დაწვავენ“ » (გამოცხადება 17:15, 16).

16. რატომ ვერ დაუჭერენ მხარს დიდ ბაბილონს მისი დამცავი წყლები, როცა მსოფლიო მმართველები თავს დაესხმებიან მას?

¹⁶ როგორც ძველი ბაბილონი იყო დაიმედებული დამცავ წყლებზე, ისე დიდი ბაბილონი ამყარებს იმედს თავის უამრავ მიმდევარზე, „ხალხებზე, ჯგუფებზე, ერებსა და ენებზე“. ანგელოზი ტყუილუბრალოდ არ ამახვილებს ჩვენს ყურადღებას ამ „წყლებზე“. მოგვიანებით ის ჰყვება, რა უჩვეულოდ განვითარდება მოვლენები: დედამიწის მმართველები გააფთრებით დაესხმებიან თავს დიდ ბაბილონს. რას გააკეთებენ იმ დროს „ხალხები, ჯგუფები, ერები და ენები“? ღვთის ხალხი უკვე აფრთხილებს დიდ ბაბილონს, რომ დაშრება ევფრატის წყლები (გამოცხადება 16:12). საბოლოოდ მათგან არაფერი დარჩება. „წყლები“ ვერ დაეხმარებიან საზიზღარ ძველ მეძავს მაშინ, როცა მას ყველაზე მეტად გაუჭირდება (ესაია 44:27; იერემია 50:38; 51:36, 37).

17. ა) რატომ ვერ იხსნის დიდ ბაბილონს სიმდიდრე? ბ) რა სამარცხვინო აღსასრული ელის დიდ ბაბილონს? გ) ვინ შეუერთდება ათი რქით წარმოდგენილ ერებს დიდი ბაბილონის განადგურებაში?

¹⁷ დიდ ბაბილონს ვერც დიდძალი სიმდიდრე უშველის. შესაძლოა მან კიდეც დააჩქაროს მისი განადგურება. როგორც ხილვიდან ჩანს, როცა მხეცი და ათი რქა დიდ ბაბილონს თავიანთ რისხვას დაანთხევენ, მას სამეფო სამოსელსა და სამკაულებს შემოაძარცვავენ. ისინი გაძარცვავენ მას, გააშიშვლებენ, შეარცხვენენ და სააშკარაოზე გამოიტანენ მის საქმეებს. რა საშინელი აღსასრული ელის ბაბილონს! ეს განადგურება მართლაც სამარცხვინო იქნება. მხეცი და ათი რქა „მის ხორცს შეჭამენ“ და მისგან მხოლოდ ძვალიღა დარჩება, ბოლოს კი „ცეცხლში დაწვავენ“. მას დაწვავენ როგორც ჭირიანს და დამარხვასაც არ აღირსებენ. დიდი მეძავის განადგურებაში ათი რქით წარმოდგენილ ერებთან ერთად მხეცით წარმოდგენილი გაეროც ჩაერევა. ის იქნება ცრუ რელიგიის განადგურების ინიციატორი. გაეროში გაწევრიანებულმა 190-ზე მეტმა ქვეყანამ თავისი მტრული პოზიცია უკვე დააფიქსირა რელიგიების, განსაკუთრებით კი ქრისტიანული სამყაროს მიმართ.

18. ა) რა ცხადყოფს, რომ მოსალოდნელია ერების თავდასხმა „ბაბილონურ“ რელიგიაზე? ბ) რა იქნება დიდ მეძავზე თავდასხმის ძირითადი მიზეზი?

¹⁸ რატომ დაესხმებიან ერები თავს თავიანთ ყოფილ საყვარელს ასეთი სისასტიკით? ბოლოდროინდელმა მოვლენებმა ცხადყო, რომ „ბაბილონურ“ რელიგიაზე თავდასხმა მოსალოდნელია. მაგალითად, მთავრობის მხრიდან წინააღმდეგობამ საგრძნობლად შეასუსტა რელიგიის გავლენა საბჭოთა კავშირსა და ჩინეთში. ევროპის პროტესტანტულ ქვეყნებში ფართოდ გავრცელებული გულგრილობისა და უნდობლობის გამო ეკლესიებს დღითი დღე აკლდება მრევლი. ამგვარად, ევროპაში რელიგია, ფაქტობრივად, მკვდარია. კათოლიკურ სამყაროში არსებულ განხეთქილებებსა და დამოუკიდებლობის სულს ვერაფერს შველიან რელიგიური წინამძღოლები. მხედველობიდან არ უნდა გამოგვრჩეს, რომ დიდი ბაბილონის საბოლოო და ტოტალური განადგურება დიდი მეძავისთვის გამოტანილი ღვთის უცვლელი განაჩენის აღსრულება იქნება.

ღვთის ჩანაფიქრის განხორციელება

19. ა) როგორ დაემსგავსება იეჰოვას მიერ დიდი მეძავისთვის გამოტანილი განაჩენი ძვ. წ. 607 წელს იერუსალიმისთვის გამოტანილ განაჩენს? ბ) რას განასახიერებს ძვ. წ. 607 წელს გაპარტახებული და გაუდაბურებული იერუსალიმი?

¹⁹ როგორ აღასრულებს იეჰოვა თავის განაჩენს? ეს კარგად ჩანს იქიდან, თუ როგორ მოექცა იეჰოვა ძველად თავის განდგომილ ხალხს, რომელზეც თქვა: „საშინელებასა და მრუშობას ვხედავ იერუსალიმის წინასწარმეტყველთა შორის, და ვხედავ, რომ სიცრუით დადიან; ხელს უმართავენ ბოროტმოქმედებს, რომ არ მობრუნდნენ თავიანთი ბოროტებიდან. ჩემთვის სოდომივითაა ყოველი მათგანი, მისი მკვიდრნი კი — გომორასავით“ (იერემია 23:14). ძვ. წ. 607 წელს იეჰოვამ ნაბუქოდონოსორი აღძრა, რომ სულიერი გაგებით მეძავი ქალაქისთვის ‘ტანსაცმელი გაეხადა, წაეღო მისი ლამაზი ნივთები და შიშველ-ტიტველი დაეტოვებინა’ (ეზეკიელი 23:4, 26, 29). ძველი იერუსალიმი თანამედროვე ქრისტიანულ სამყაროს განასახიერებს. იეჰოვა იერუსალიმის მსგავსად დასჯის ქრისტიანულ სამყაროსა და სხვა ცრუ რელიგიებს, რასაც იოანეს ხილვებიც ადასტურებს. ძვ. წ. 607 წელს გაპარტახებული და გაუდაბურებული იერუსალიმი წარმოდგენას გვიქმნის, თუ რას დაემსგავსება სიმდიდრედაკარგული და საჯაროდ შერცხვენილი ქრისტიანული სამყარო. არც დიდი ბაბილონის სხვა რელიგიებს დაადგებათ კარგი დღე.

20. ა) როგორ აჩვენებს იოანე, რომ იეჰოვა განაჩენის აღსასრულებლად ისევ ადამიანთა მმართველებს აღძრავს? ბ) რა არის ღვთის ჩანაფიქრი ანუ „აზრი“? გ) რა „ერთობლივ აზრს“ განახორციელებენ ერები, მაგრამ სინამდვილეში ვისი აზრი იქნება ეს?

²⁰ იეჰოვა კვლავაც ადამიანთა მმართველებს აღძრავს თავისი განაჩენის აღსასრულებლად. „რადგან ღმერთმა მათ გულებში ჩაუდო, რომ განახორციელონ მისი აზრი, თავიანთი ერთობლივი აზრი, მისცენ სამეფო მხეცს, სანამ ღვთის სიტყვები არ შესრულდება“ (გამოცხადება 17:17). რა არის ღვთის ჩანაფიქრი ანუ „აზრი“? ღვთის ჩანაფიქრი ისაა, რომ თავი მოუყაროს დიდი ბაბილონის დამსჯელებს, რათა სრულიად გაანადგურონ ის. რა თქმა უნდა, მმართველებს თავიანთი „ერთობლივი აზრი“ აღძრავს, თავს დაესხან ბაბილონს. ისინი დაასკვნიან, რომ მათ ეროვნულ ინტერესებში შედის დიდ მეძავზე თავდასხმა. მათ შეიძლება ჩათვალონ, რომ რელიგიის არსებობა მათ დამოუკიდებლობას უქმნის საფრთხეს. მაგრამ მოვლენები იეჰოვას ნებისამებრ განვითარდება. ისინი შეასრულებენ იეჰოვას ჩანაფიქრს ანუ „აზრს“ და ერთი დარტყმით გაანადგურებენ ღვთის ძველ მტერს, მეძავ დიდ ბაბილონს (შეადარეთ იერემიას 7:8—11, 34).

21. რას გააკეთებენ ერები, თუ გავითვალისწინებთ იმას, რომ დიდი ბაბილონი ალისფერმა მხეცმა უნდა გაანადგუროს?

²¹ ერები ალისფერ მხეცს ანუ გაერთიანებული ერების ორგანიზაციას გაანადგურებინებენ დიდ ბაბილონს, რადგან იეჰოვა ჩაუდებს მათ გულებში ერთობლივი აზრის განხორციელების სურვილს და მხეცისთვის სამეფოს გადაცემის იდეას. როგორც ჩანს, მოვა დრო, როცა ერები საჭიროდ ჩათვლიან გაერთიანებული ერების ორგანიზაციის გაძლიერებას. ისინი თითქოს კბილებს ჩაუსვამენ ანუ მთელ თავიანთ ძალასა და ძალაუფლებას მისცემენ მას, რათა წარმატებით გაილაშქროს ცრუ რელიგიის წინააღმდეგ, „სანამ ღვთის სიტყვები არ შესრულდება“. ამგვარად, ძველ მეძავს თავისი საქმეებისამებრ მიეზღვება და საბოლოოდ განადგურდება.

22. ა) რას ადასტურებს ანგელოზის სიტყვები, რომლებიც გამოცხადების 17:18-შია ჩაწერილი? ბ) როგორ ეხმაურებიან იეჰოვას მოწმეები გაცხადებულ საიდუმლოს?

²² იმის დასამტკიცებლად, რომ იეჰოვა მსოფლიო ცრუ რელიგიისთვის გამოტანილ განაჩენს აუცილებლად მოიყვანს სისრულეში, ანგელოზი ასეთ სიტყვებს ამბობს: „ქალი კი, შენ რომ იხილე, დიდ ქალაქს ნიშნავს, რომელიც იმეფებს დედამიწის მეფეებზე“ (გამოცხადება 17:18). როგორც ბელშაცარის დროინდელი ბაბილონი, ისე დიდი ბაბილონიც „სასწორზე“ აიწონა და „მსუბუქი“ აღმოჩნდა (დანიელი 5:27). ის სწრაფად განადგურდება, ერთხელ და სამუდამოდ. როგორ ეხმაურებიან იეჰოვას მოწმეები დიდი მეძავისა და ალისფერი მხეცის შესახებ გაცხადებულ საიდუმლოს? ისინი მთელი გულმოდგინებით აცხადებენ იეჰოვას სასამართლო დღის შესახებ და „მადლიანად“ პასუხობენ ჭეშმარიტების გულწრფელ მაძიებლებს (კოლოსელები 4:5, 6; გამოცხადება 17:3, 7). მომდევნო თავი დაგვანახვებს, რომ დიდი მეძავის განადგურების დროს გადარჩენის მსურველებმა არ უნდა დააყოვნონ, მათ მოქმედება მართებთ.

თავი 36

დიდი ქალაქის განადგურება

ხილვა 12 გამოცხადება 18:1—19:10

თემა: დიდი ბაბილონის დაცემა და განადგურება; კრავის ქორწილის გაცხადება.

შესრულების დრო: 1919 წლიდან დიდი გასაჭირის შემდგომ პერიოდამდე.

1. რა იქნება დიდი გასაჭირის დაწყების ნიშანი?

უეცარი, გამაოგნებელი, გამანადგურებელი — ასეთი იქნება დიდი ბაბილონის აღსასრული! ეს კატასტროფა იმის ნიშანი იქნება, რომ დაიწყო „დიდი გასაჭირი, როგორიც არ ყოფილა ქვეყნიერების დასაწყისიდან დღემდე და აღარც იქნება“ (მათე 24:21).

2. მრავალი იმპერიის აღზევებისა თუ დაცემის მიუხედავად რა არ განადგურებულა?

² დიდი ხანია, რაც ცრუ რელიგია არსებობს, და ის არ შეწყვეტილა იმ სისხლისმღვრელი ნიმროდის დროიდან, რომელიც იეჰოვას ეწინააღმდეგებოდა და რომელმაც ხალხს ბაბილონის გოდლის მშენებლობა დააწყებინა. როცა იეჰოვამ ამ ურჩ ადამიანებს ენები აურია, ისინი მთელ დედამიწაზე მიმოიფანტნენ და ბაბილონური ცრუ რელიგიაც თან გაიყოლეს (დაბადება 10:8—10; 11:4—9). მას შემდეგ მრავალი იმპერია აღზევდა და დაეცა, მაგრამ ბაბილონური რელიგია დღემდე არსებობს. უფრო მეტიც, მისგან სხვადასხვა რელიგია წარმოიშვა და ის ცრუ რელიგიურ სამყაროდ ანუ წინასწარმეტყველებაში აღწერილ დიდ ბაბილონად იქცა. მისი ძირითადი ნაწილი ქრისტიანული სამყაროა, რომელიც ბაბილონური სწავლებებისა და განდგომილ ქრისტიანთა მოძღვრებების შერწყმის შედეგად ჩამოყალიბდა. მრავალს არ სჯერა დიდი ბაბილონის განადგურების, რადგან მისი არსებობის ისტორია არაერთ საუკუნეს ითვლის.

3. როგორ გვარწმუნებს „გამოცხადება“, რომ ცრუ რელიგიას უბედურება ეწევა?

³ „გამოცხადება“ დაბეჯითებით ამბობს, რომ ცრუ რელიგიას უბედურება ეწევა, რასაც ადასტურებს ის, რომ მასში ორგვარად არის აღწერილი როგორც ცრუ რელიგიის დაცემა, ისე მისი დაცემის წინა პერიოდი. ჩვენ გავიგეთ, რომ ის „დიდი მეძავია“, რომელსაც საბოლოოდ ანადგურებენ მისი ძველი საყვარლები, ანუ პოლიტიკური ძალები (გამოცხადება 17:1, 15, 16). ამ ახალ ხილვაში ის ქალაქად არის წარმოდგენილი, რომლის პირველსახეც ძველი ბაბილონია.

დიდი ბაბილონის დაცემა

4. ა) რას ხედავს ხილვაში იოანე? ბ) როგორ შეგვიძლია დავადგინოთ ხილვაში ნანახი ანგელოზის ვინაობა, და სწორედ მან რატომ უნდა გააცხადოს დიდი ბაბილონის დაცემა?

⁴ იოანე განაგრძობს თხრობას: «ამის შემდეგ ვიხილე ციდან ჩამომავალი სხვა ანგელოზი, რომელსაც დიდი ძალაუფლება ჰქონდა. მისმა დიდებამ დედამიწა გაანათა. მან ძლიერი ხმით დაიძახა: „დაეცა! დაეცა დიდი ბაბილონი!“ » (გამოცხადება 18:1, 2ა). იოანე უკვე მეორედ ისმენს ამ ცნობას ანგელოზისგან (იხილეთ გამოცხადების 14:8). ეს ცნობა რომ მნიშვნელოვანია, იქიდან ჩანს, რომ მას დიდებული ზეციერი ანგელოზი აცხადებს, რომლის დიდებამაც დედამიწა გაანათა. ვინ არის ეს ანგელოზი? საუკუნეებით ადრე წინასწარმეტყველმა ეზეკიელმა ზეციური ხილვის აღწერისას აღნიშნა, რომ „მიწა განათდა მისი [იეჰოვას] დიდებით“ (ეზეკიელი 43:2). ერთადერთი ანგელოზი, რომლის დიდებასაც შეუძლია იეჰოვას დიდებასავით გაანათოს, უფალი იესოა, რომელიც „არის მისი [ღვთის] დიდების ანარეკლი და ზუსტად წარმოგვიდგენს მას“ (ებრაელები 1:3). 1914 წლიდან იესო ზეციერი მეფეა და ის იეჰოვასთან ერთად ხელმძღვანელობს დედამიწას, როგორც მეფე და მოსამართლე. ამიტომ მართებულია, რომ სწორედ მან გააცხადოს დიდი ბაბილონის დაცემა.

5. ა) ვის აცხადებინებს ანგელოზი დიდი ბაბილონის დაცემას? ბ) რა მდგომარეობაში იყო ქრისტიანული სამყარო, როცა დაიწყო მათი სასამართლო, ვინც თავს „ღვთის სახლის“ წარმომადგენლად აცხადებდა?

⁵ ვის აცხადებინებს დიდი ძალაუფლების მქონე ანგელოზი ამ გასაოცარ ცნობას? ის ბაბილონის დაცემის შედეგად გათავისუფლებულ ადამიანებს ანუ ჯერ კიდევ დედამიწაზე მცხოვრებ ცხებულებს, იოანეს კლასს იყენებს. 1914—1918 წლებში დიდი ბაბილონი ძლიერ ავიწროებდა მათ. 1918 წელს უფალმა იეჰოვამ და „[აბრაამთან დადებული] შეთანხმების მაცნემ“, იესო ქრისტემ, „ღვთის სახლიდან“ დაიწყეს მათი გასამართლება, ვინც თავს ქრისტიანად აცხადებდა. ასე გამოიცადა განდგომილი ქრისტიანული სამყარო (მალაქია 3:1; 1 პეტრე 4:17). ის იმიტომ გასამართლდა, რომ ბაბილონურ მოძღვრებებს იზიარებდა და მონაწილეობდა პირველი მსოფლიო ომის დროინდელ სისხლისღვრასა და იეჰოვას ერთგული მოწმეების დევნაში. ვერც დიდი ბაბილონის სხვა რელიგიებმა დაიმსახურეს ღვთის კეთილგანწყობა (შეადარეთ ესაიას 13:1—9).

6. რატომ შეიძლება ითქვას, რომ 1919 წელს დიდი ბაბილონი დაეცა?

⁶ დიდი ბაბილონი 1919 წელს დაეცა, რამაც ხელი შეუწყო ღვთის ხალხის გათავისუფლებას. ისინი თითქოსდა ერთ დღეში აღდგნენ სულიერად და სულიერი გაგებით თავიანთ ქვეყანას დაუბრუნდნენ (ესაია 66:8). იმ წელს იეჰოვა ღმერთმა და იესო ქრისტემ, დიდმა დარიოსმა და დიდმა კიროსმა, ისე წარმართეს მოვლენები, რომ ცრუ რელიგიას მეტად ვეღარ მოეხდინა გავლენა იეჰოვას ხალხზე. ის ვეღარ უშლიდა ხელს მათ იეჰოვასთვის მსახურებაში, რათა ყველასთვის, ვისაც მოსმენა შეეძლო, გაეცხადებინათ მეძავის მსგავსი დიდი ბაბილონის აღსასრული და ის, რომ მალე იეჰოვას უზენაესობა დამტკიცდებოდა (ესაია 45:1—4; დანიელი 5:30, 31).

7. ა) მიუხედავად იმისა, რომ დიდი ბაბილონი 1919 წელს არ განადგურებულა, როგორ უყურებდა მას იეჰოვა? ბ) რას ნიშნავდა იეჰოვას ხალხისთვის 1919 წელს დიდი ბაბილონის დაცემა?

⁷ დიდი ბაბილონი 1919 წელს არ განადგურებულა, ისევე როგორც ძველი ბაბილონი არ გაუნადგურებიათ ძვ. წ. 539 წელს, როცა სპარსელი კიროსის ლაშქარმა დაიპყრო იგი; მაგრამ იეჰოვას თვალში დაეცა ეს ორგანიზაცია. ის მსჯავრდადებულია და განაჩენის აღსრულებას ელის. ასე რომ, ცრუ რელიგია მეტად ვეღარ შეძლებდა იეჰოვას ხალხის დატყვევებას (შეადარეთ ლუკას 9:59, 60). ისინი გათავისუფლდნენ ბატონის დანიშნული ერთგული და გონიერი მონის მოვალეობის შესასრულებლად და სულიერი საზრდოს დროულად მოსამზადებლად; სასამრთლოს დროს კი ისინი შეაქეს და იეჰოვას საქმის გასაგრძელებლად წაახალისეს (მათე 24:45—47; 25:21, 23; საქმეები 1:8).

8. რას აცხადებს ესაიას 21:8, 9-ში მოხსენიებული გუშაგი და ვინ წარმოადგენს დღეს ამ გუშაგს?

⁸ ათასწლეულების წინ იეჰოვამ სხვა წინასწარმეტყველების პირით იწინასწარმეტყველა ეს ისტორიული მოვლენა. ესაია საუბრობდა გუშაგზე, რომელმაც «ლომივით იღრიალა: „დღისით მუდამ ვდგავარ საგუშაგო კოშკზე, იეჰოვა, და ჩემს სადარაჯოზე ვდგავარ ყოველ ღამე!“ ». რა დაინახა გუშაგმა და რას აცხადებს ლომის სიმამაცით? აი რას: „დაეცა! დაეცა ბაბილონი და მიწასთან გასწორდა მისი ღმერთების ქანდაკებები!“ (ესაია 21:8, 9). ამ გუშაგით წარმოდგენილია იოანეს კლასი, რომელიც ფხიზლობს და ჟურნალ „საგუშაგო კოშკითა“ და სხვა თეოკრატიული პუბლიკაციებით ყველას აუწყებს დიდი ბაბილონის დაცემას.

დიდი ბაბილონი ძალას კარგავს

9, 10. ა) როგორ შესუსტდა დიდი ბაბილონის გავლენა პირველი მსოფლიო ომის შემდეგ? ბ) როგორ აღწერს ძლევამოსილი ანგელოზი დიდი ბაბილონის დაცემულ მდგომარეობას?

⁹ ძვ. წ. 539 წელს ძველი ბაბილონის დაცემამ საბოლოოდ მისი განადგურება განაპირობა. პირველი მსოფლიო ომის შემდეგ მთელ მსოფლიოში შესამჩნევად შესუსტდა დიდი ბაბილონის გავლენა. მეორე მსოფლიო ომის შემდეგ სინტოისტურ იაპონიაში იმპერატორის თაყვანისცემა აიკრძალა; ჩინეთში კომუნისტური მთავრობა აკონტროლებდა რელიგიურ მსახურებსა და მათ საქმიანობას; პროტესტანტულ ჩრდილოეთ ევროპაში ადამიანთა უმეტესობას რელიგიაზე გული აუცრუვდა; რომის კათოლიკური ეკლესიის გავლენა საგრძნობლად დასუსტდა შიდა უთანხმოებებისა და განხეთქილებების გამო (შეადარეთ მარკოზის 3:24—26).

¹⁰ ყოველივე ეს ‘მდინარე ევფრატის დაშრობას’ ნიშნავს, რაც წინ უძღვის დიდ ბაბილონზე იერიშის მიტანას. ამაზე მოწმობს 1986 წლის ოქტომბერში პაპის მიერ გაკეთებული განცხადებაც, რომ ეკლესია შემოსავლის დაკარგვის გამო „კვლავ გაღატაკდა“ (გამოცხადება 16:12). განსაკუთრებით 1919 წლიდან ყველასთვის ნათელი გახდა, რომ დიდი ბაბილონი სულიერი თვალსაზრისით გაუდაბურებული იყო, როგორც ეს ძლევამოსილმა ანგელოზმაც გააცხადა: „გახდა დემონების სამკვიდრო, ყოველი უწმინდური ამონასუნთქისა და ყოველი უწმინდური და საძულველი ფრინველის თავშესაფარი!“ (გამოცხადება 18:2ბ). მალე ის პირდაპირი გაგებით გაპარტახდება და დაემსგავსება ძველ ბაბილონს, რომლის ნანგრევებიღა შემორჩა დღევანდელი ერაყის ტერიტორიაზე (იხილეთ აგრეთვე იერემიას 50:25—28).

11. როგორ გახდა დიდი ბაბილონი „დემონების სამკვიდრო“ და „ყოველი უწმინდური ამონასუნთქისა და ყოველი უწმინდური. . . ფრინველის თავშესაფარი“?

¹¹ სიტყვა „დემონები“ გვახსენებს ესაიას მიერ ბაბილონის დაცემის აღწერისას მოხსენიებულ თხისმაგვარ დემონებს (სეირიმ): „იქ დაისვენებენ უწყლო მხარეების ბინადარნი და მათი სახლები ზარნაშოებით აივსება. სირაქლემები დამკვიდრდებიან იქ და თხისმაგვარი დემონები იკუნტრუშებენ“ (ესაია 13:21). ამ სიტყვებში იგულისხმება არა პირდაპირი გაგებით დემონები, არამედ უდაბნოს ბანჯგვლიანი ცხოველები, რომელთა დანახვაც კაცს დემონებს მოაგონებს. ნანგრევებში რომ ასეთი ცხოველები ბინადრობენ, უწმინდური ფრინველები ბუდობენ და ჰაერი მოწამლული და შმორიანია („უწმინდური ამონასუნთქი“), იმაზე მიუთითებს, რომ დიდი ბაბილონი სულიერი გაგებით მკვდარია. ის სიცოცხლის ვერანაირ იმედს ვერ იძლევა (შეადარეთ ეფესოელების 2:1, 2).

12. როგორ შეესაბამება დიდი ბაბილონის მდგომარეობა იერემიას 50-ე თავში მოცემულ წინასწარმეტყველებას?

¹² დიდი ბაბილონის მდგომარეობა იერემიას წინასწარმეტყველებაშიც არის აღწერილი: „მახვილია ქალდეველთა წინააღმდეგ, — ამბობს იეჰოვა, — ბაბილონის მკვიდრთა, მის მთავართა და მის ბრძენთა წინააღმდეგ. . . განადგურებაა მის წყლებზე — დაშრება ისინი. ქანდაკებების ქვეყანაა ის და შეშლილებივით იქცევიან თავიანთი საზარელი ხილვების გამო. ამიტომ ღრიალა ცხოველებთან ერთად იცხოვრებენ უწყლო მხარის ბინადრები და სირაქლემები დაიბუდებენ იქ; აღარ დასახლდება იქაურობა და აღარ ექნება მას სამკვიდრო თაობიდან თაობაში“. კერპთაყვანისმცემლობა და ერთფეროვანი ლოცვები ვერ იხსნის დიდ ბაბილონს ღვთის იმ სასჯელისგან, რომელიც სოდომისა და გომორას სასჯელს ჰგავს (იერემია 50:35—40).

ვნების აღმძვრელი ღვინო

13. ა) როგორ აღწერს ძლევამოსილი ანგელოზი დიდი ბაბილონის მეძაობას? ბ) როგორი უზნეობა იყო გავრცელებული ძველ ბაბილონში, რაც არც დიდი ბაბილონისთვის ყოფილა უცხო?

¹³ ამის შემდეგ ძლევამოსილი ანგელოზი აცხადებს, რომ დიდმა ბაბილონმა მთელ ქვეყანასთან იმეძავა: „მისი სიძვის მრისხანების ღვინომ იმსხვერპლა ყველა ხალხი. დედამიწის მეფეები მეძაობდნენ მასთან, ხოლო დედამიწის დიდვაჭრები მისი სამარცხვინო ფუფუნების ძალით გამდიდრდნენ“ (გამოცხადება 18:3). მან მთელ კაცობრიობას მოახვია თავს თავისი უწმინდური რელიგია. როგორც ბერძენი ისტორიკოსი ჰეროდოტე იუწყება, ძველ ბაბილონში ყველა გოგონას მოეთხოვებოდა, ქალწულობას ტაძარში მეძაობით გამოსთხოვებოდა. აღმაშფოთებელი გარყვნილება ასახულია კამპუჩიაში ომის დროს დაზიანებულ ანგკორ-ვატის ქანდაკებებზე და ხაჯურაჰოს (ინდოეთი) ტაძრებში, სადაც ამაზრზენი ეროტიკული სცენების ფონზე გამოსახულია ინდუსების ღვთაება ვიშნუ. 1987—1988 წლებში მსოფლიო შოკში ჩააგდო შეერთებულ შტატებში ტელეევანგელისტების უზნეობაში მხილებამ და რელიგიურ მსახურთა შორის ფართოდ გავრცელებულმა ჰომოსექსუალიზმმა, რაც იმაზე მეტყველებს, რომ სიძვას ქრისტიანული სამყაროც იწყნარებს. თუმცა ერებს უფრო ამაზრზენ სიძვაშიც მიუძღვით ბრალი.

14—16. ა) რა გაუმართლებელი ურთიერთობა ჰქონდა რელიგიასა და პოლიტიკას ფაშისტურ იტალიაში? ბ) რა კომენტარები გააკეთეს რომის კათოლიკური ეკლესიის ეპისკოპოსებმა იტალიის მიერ აბისინიის დაპყრობასთან დაკავშირებით?

¹⁴ ჩვენ უკვე განვიხილეთ რელიგიისა და პოლიტიკის გაუმართლებელი ურთიერთობა, რამაც ხელი შეუწყო ნაცისტური გერმანიის ხელისუფლებაში ჰიტლერის მოსვლას. სხვა ერებიც დაზარალდნენ პოლიტიკაში რელიგიის ჩარევით. მაგალითად, ფაშისტურ იტალიაში 1929 წლის 11 თებერვალს მუსოლინიმ და კარდინალმა გასპარიმ ხელი მოაწერეს ლატერანის ხელშეკრულებას, რის შემდეგაც ვატიკანი დამოუკიდებელი სახელმწიფო გახდა. პაპმა პიუს XI-მ განაცხადა, რომ მან „იტალია ღმერთს დაუბრუნა, ღმერთი კი — იტალიას“. იყო ეს ასე? ვნახოთ, რა მოხდა ექვსი წლის შემდეგ. 1935 წლის 3 ოქტომბერს იტალია აბისინიაში შეიჭრა, რადგან ამტკიცებდა, რომ ის იყო „ბარბაროსული ქვეყანა, სადაც ჯერ კიდევ მონათმფლობელობა“ არსებობდა. მაგრამ ვინ იყო სინამდვილეში ბარბაროსი? განსჯიდა კათოლიკური ეკლესია მუსოლინის ბარბაროსობას? მაშინ როცა პაპი ორაზროვან განცხადებებს აკეთებდა, მისი ეპისკოპოსები აშკარად ლოცავდნენ თავიანთ „სამშობლოს“, იტალიის შეიარაღებულ ძალებს. ენტონი როდოსი თავის ერთ-ერთ წიგნში აღნიშნავს:

¹⁵ «19 ოქტომბრის [1935 წელი] წერილობით მიმართვაში უდინეს [იტალია] ეპისკოპოსმა დაწერა: „ახლა იმის განსჯის დრო არ არის, სწორია ეს თუ არა. ჩვენი, როგორც იტალიელების და, რაც უფრო მთავარია, ქრისტიანების მოვალეობაა, ხელი შევუწყოთ ჩვენი ბრძოლის წარმატებას“. 21 ოქტომბერს პადუის ეპისკოპოსი წერდა: „გთხოვთ, ამ ძნელბედობის ჟამს ეჭვის თვალით ნუ შეხედავთ ჩვენს სახელმწიფო მოღვაწეებსა და შეიარაღებულ ძალებს“. 24 ოქტომბერს კრემონას ეპისკოპოსმა აკურთხა რამდენიმე სამხედრო დროშა და აღნიშნა: „ღმერთმა აკურთხოს ეს ჯარისკაცები, რომლებიც აფრიკის კონტინენტზე ახალ და ნაყოფიერ მიწებს მოუპოვებენ დიდებულ იტალიას და რომაულ და ქრისტიანულ კულტურას აზიარებენ აფრიკელებს. დაე, იტალიამ კვლავ უქადაგოს ქრისტიანობა მთელ მსოფლიოს“ » („The Vatican in the Age of the Dictators“).

¹⁶ რომის კათოლიკური სამღვდელოების ლოცვა-კურთხევით აბისინია ბარბაროსულად დაიპყრეს. შეეძლო სამღვდელოების რომელიმე წარმომადგენელს მოციქული პავლესავით ეთქვა: „სუფთა ვარ ყველას სისხლისაგან“? (საქმეები 20:26).

17. როგორ დაზარალდა ესპანეთი იმის გამო, რომ მისმა სამღვდელოებამ ‘მახვილებისგან სახნისები ვერ გამოჭედა’?

¹⁷ გერმანიის, იტალიისა და აბისინიის გარდა დიდი ბაბილონის მსხვერპლი ესპანეთიც გახდა. ესპანეთში 1936—1939 წლებში მიმდინარე სამოქალაქო ომის მიზეზი ნაწილობრივ ის იყო, რომ დემოკრატიულმა მთავრობამ გარკვეულ ზომებს მიმართა რომის კათოლიკური ეკლესიის უდიდესი ძალაუფლების შესაზღუდავად. ომის გაჩაღების შემდეგ ფაშისტური რევოლუციური მოძრაობის ლიდერმა, კათოლიკე ფრანკომ თავის თავს „წმინდა ჯვაროსნული ლაშქრობის გენერალსიმუსი“ უწოდა, თუმცა მოგვიანებით ამ ტიტულზე უარი განაცხადა. ამ ბრძოლაში ასიათასობით ესპანელი დაიღუპა. გარდა ამისა, ზოგადი სტატისტიკის თანახმად ფრანკოს მომხრე ნაციონალისტებმა სახალხო ფრონტის 40 000 მონაწილე მოკლეს, სახალხო ფრონტის მონაწილეებმა კი თავის მხრივ 8 000 ღვთის მსახურის სიცოცხლე შეიწირეს — მღვდლების, ბერმონაზვნებისა და მორჩილების. ომისთვის დამახასიათებელი ასეთი საშინელებები და ტრაგედიები ადასტურებენ, რაოდენ ბრძნულია იესოს სიტყვების გათვალისწინება: „ჩააბრუნე მახვილი თავის ადგილას, რადგან ყველა, ვინც მახვილს აიღებს, მახვილით დაიღუპება“ (მათე 26:52). რა ამაზრზენია ასეთ მასობრივ სისხლისღვრაში ქრისტიანული სამყაროს მონაწილეობა! მათი სამღვდელოება ძალიან შორს არის იმისგან, რომ ‘მახვილებისგან სახნისები გამოჭედონ’ (ესაია 2:4).

დიდვაჭრები

18. ვინ არიან „დედამიწის დიდვაჭრები“?

¹⁸ ვინ არიან „დედამიწის დიდვაჭრები“? დღეს ჩვენ შეიძლება მათ ვაჭრები, მსხვილი ბიზნესმენები და ოლიგარქები ვუწოდებთ, მაგრამ ეს იმას არ ნიშნავს, რომ კანონიერი გზებით ბიზნესის წარმოება არასწორია. ბიბლია ბრძნულ რჩევას აძლევს ბიზნესში ჩაბმულებს და აფრთხილებს, რომ მოერიდონ უპატიოსნობას, სიხარბესა და მსგავს თვისებებს (იგავები 11:1; ზაქარია 7:9, 10; იაკობი 5:1—5). დიდი მონახვეჭია, „იყო ღვთისადმი ერთგული და იმით კმაყოფილი, რაც გაქვს“ (1 ტიმოთე 6:6, 17—19). სატანის ქვეყნიერება არ ცხოვრობს სამართლიანი პრინციპებით. ყველგან ყვავის კორუფცია, რელიგიაშიც, პოლიტიკაშიც და ბიზნესშიც. დროდადრო მასობრივი საინფორმაციო საშუალებები აშუქებენ ისეთ სკანდალებს, როგორიცაა სახელმწიფო მოხელეების მიერ თანხების მითვისება და იარაღით უკანონო ვაჭრობა.

19. მსოფლიო ეკონომიკასთან დაკავშირებული ფაქტების თანახმად, რატომ არიან დედამიწის ვაჭრები „გამოცხადებაში“ უარყოფითად მოხსენიებული?

¹⁹ ყოველწლიურად იარაღით ვაჭრობიდან მიღებული შემოსავალი ტრილიონ დოლარს აჭარბებს მაშინ, როცა ასობით მილიონ ადამიანს ელემენტარული მოთხოვნილებები ვერ დაუკმაყოფილებია. ამაში კარგი არაფერია. როგორც ჩანს, იარაღით ვაჭრობა მსოფლიო ეკონომიკის ძირითადი საყრდენია. ლონდონში გამომავალი გაზეთის „სპექტატორის“ 1987 წლის 11 აპრილის ნომერში ნათქვამი იყო: „იარაღის წარმოებით მარტო შეერთებულ შტატებში 400 000 ადამიანია დასაქმებული, ევროპაში კი — 750 000. საინტერესოა, რომ მაშინ, როცა იარაღის წარმოება სოციალური და ეკონომიკური თვალსაზრისით უფრო მნიშვნელოვანი ხდება, იარაღის მწარმოებელთა უსაფრთხოების საკითხი მეორე პლანზე გადადის“. მთელ მსოფლიოში ბომბებითა და სხვა იარაღით ვაჭრობას უდიდესი მოგება მოაქვს; ისინი იარაღით პოტენციურ მოწინააღმდეგეებსაც კი ამარაგებენ. პარადოქსია, მაგრამ ერთ დღეს ეს ბომბები შეიძლება იარაღით მოვაჭრე ქვეყნების გასანადგურებლად გამოიყენონ. გარდა ამისა, არ უნდა დაგვავიწყდეს ის მაქინაციები, რაც იარაღით ვაჭრობას უკავშირდება. როგორც „სპექტატორი“ იტყობინებოდა, მხოლოდ შეერთებულ შტატებში „ყოველწლიურად პენტაგონი დაუდგენელი მიზეზებით 900 მილიონი დოლარის ღირებულების იარაღსა და აღჭურვილობას კარგავს“. გასაკვირი არ არის, რატომ არიან დედამიწის ვაჭრები „გამოცხადებაში“ უარყოფითად მოხსენიებული.

20. რომელი მაგალითი ცხადყოფს უპატიოსნო ბიზნესში რელიგიის მონაწილეობას?

²⁰ დიდებული ანგელოზის წინასწარმეტყველების თანახმად რელიგიაც გარეულია ასეთ უპატიოსნო ბიზნესში. მაგალითად, ვატიკანმა თავისი წვლილი შეიტანა 1982 წელს იტალიაში ბანკ „ამბროზიანოს“ გაკოტრებაში. 80-იან წლებში მიმდინარე ხანგრძლივმა სასამართლო პროცესმა ვერ დაადგინა, სად გაქრა ფული. 1987 წლის თებერვალში მილანის მოსამართლეებმა გასცეს ორდერი ვატიკანის სამი სასულიერო პირის, მათ შორის ამერიკელი არქიეპისკოპოსის, დაპატიმრების შესახებ. მათ ბანკის ხელოვნური გაკოტრება ედებოდათ ბრალად, მაგრამ ვატიკანმა უარი განაცხადა დამნაშავეთა გადაცემაზე. 1987 წლის ივლისში, დიდი პროტესტის მიუხედავად, იტალიის უმაღლესმა სააპელაციო სასამართლომ ვატიკანსა და იტალიის მთავრობას შორის დადებული ძველი ხელშეკრულების საფუძველზე ორდერები გააუქმა.

21. საიდან ვიცით, რომ იესოს საერთო არაფერი ჰქონდა საეჭვო სავაჭრო საქმიანობასთან, და ამის საპირისპიროდ, რისი თქმა შეიძლება დღეს ბაბილონურ რელიგიაზე?

²¹ ჰქონდა რაიმე კავშირი იესოს საეჭვო სავაჭრო საქმიანობასთან? არა. მას საკუთარი ქონებაც კი არ ჰქონია, „თავის დასადები ადგილი არ გააჩნდა“. იესომ ერთ მდიდარ მმართველს მოუწოდა: „რაც გაქვს, ყველაფერი გაყიდე, ღარიბებს დაურიგე და გექნება განძი ზეცაში. მერე მოდი და გამომყევი“. ეს შესანიშნავი რჩევა გაათავისუფლებდა მას სავაჭრო საქმეებთან დაკავშირებული საზრუნავისგან (ლუკა 9:58; 18:22). ბაბილონურ რელიგიას კი ხშირად გაუმართლებელი კავშირი აქვს დიდ ბიზნესთან. მაგალითად, 1987 წელს ერთ-ერთი გაზეთის ცნობის თანახმად მაიამის (ფლორიდა, აშშ) კათოლიკური ეპარქიის ხაზინადარმა აღიარა, რომ ეკლესია ბირთვული იარაღის, ბავშვებისთვის აკრძალული ფილმებისა და სიგარეტის მწარმოებელი კომპანიების აქციებს ფლობდა („Albany Times Union“).

„გამოდით მისგან, ჩემო ხალხო“

22. ა) რას ამბობდა ზეციდან მომავალი ხმა? ბ) რა იყო ღვთის ხალხის სიხარულის მიზეზი ძვ. წ. 537 წელსა და ახ. წ. 1919 წელს?

²² იოანეს სიტყვებიდან ჩანს როგორ ვითარდება მოვლენები წინასწარმეტყველების თანახმად: «სხვა ხმაც გავიგონე ციდან, რომელიც ამბობდა: „გამოდით მისგან, ჩემო ხალხო, თუ არ გინდათ, მისი ცოდვების თანამონაწილენი იყოთ და მისი წყლულები მიიღოთ“ » (გამოცხადება 18:4). ძველი ბაბილონის დაცემის შესახებ ებრაულ წერილებში მოცემულ წინასწარმეტყველებებში ჩაწერილია ისიც, თუ რა უბრძანა იეჰოვამ თავის ხალხს: „გაიქეცით ბაბილონიდან“ (იერემია 50:8, 13). ეს მოწოდება დღესაც ეხება ღვთის ხალხს, რადგან მოახლოებულია დიდი ბაბილონის განადგურება. ძვ. წ. 537 წელს ერთგულმა ისრაელებმა დიდად გაიხარეს, რადგან ბაბილონის ტყვეობიდან თავის დახსნის საშუალება მიეცათ. მსგავსადვე გაიხარა ღვთის ხალხმა 1919 წელს ბაბილონის ტყვეობიდან გათავისუფლების გამო (გამოცხადება 11:11, 12). მას შემდეგ მილიონობით ადამიანი დაემორჩილა ბრძანებას და გაიქცა.

23. როგორ ამახვილებს ყურადღებას ზეციდან მომავალი ხმა დიდი ბაბილონიდან სასწრაფოდ გამოსვლის აუცილებლობაზე?

²³ ნუთუ აუცილებელია, რომ ასე სასწრაფოდ გამოვიდეთ დიდი ბაბილონიდან და ყოველგვარი კავშირი გავწყვიტოთ მსოფლიოში არსებულ რელიგიებთან? აუცილებელია. ჩვენ ღვთის თვალით უნდა ვუყურებდეთ ამ ძველ რელიგიურ ურჩხულს, დიდ ბაბილონს. ღმერთმა სამართლიანად უწოდა მას დიდი მეძავი. ახლა ზეციდან მომავალი ხმა იოანეს ამ მეძავზე ასეთ რამეს ეუბნება: „მისი ცოდვები ცას მისწვდა და ღმერთმა გაიხსენა მისი უსამართლო საქმეები. მიუზღეთ მას, როგორც მან მოგიზღოთ, და ორმაგად, ორმაგად გადაუხადეთ, რაც გააკეთა. სასმისში, რომელშიც ის ნაზავს ასხამდა, ორმაგი ნაზავი ჩაუსხით. რამდენადაც განადიდებდა საკუთარ თავს და სამარცხვინო ფუფუნებაში ცხოვრობდა, იმდენად მიაგეთ ­ტანჯვა და გლოვა, რადგან გულში ამბობს: დედოფლად ვზივარ, ქვრივი არა ვარ და გლოვას არასოდეს ვიხილავო. ამიტომაც ერთ დღეში მოვა მისი წყლულები, სიკვდილი, გლოვა და შიმშილობა და ცეცხლში დაიწვება, რადგან ძლიერია იეჰოვა ღმერთი, მისი გამსამართლებელი“ (გამოცხადება 18:5—8).

24. ა) რას გადაურჩება ღვთის ხალხი, თუ გაიქცევა დიდი ბაბილონიდან? ბ) დიდი ბაბილონის რომელი ცოდვების თანამონაწილე გახდება ის, ვინც არ გაიქცევა მისგან?

²⁴ ნამდვილად შთამბეჭდავი სიტყვებია. ამიტომ საჭიროა მოქმედება. იერემია თავის თანამედროვე ისრაელებს მოქმედებისკენ აღძრავდა: „გაიქეცით ბაბილონიდან, . . რადგან ეს იეჰოვას შურისძიების დროა; სამაგიეროს უხდის მას. გამოდი მისგან, ჩემო ხალხო, და გადაირჩინეთ თქვენ-თქვენი სულები იეჰოვას მრისხანებისგან“ (იერემია 51:6, 45). დღეს ზეციდან მომავალი ხმა მსგავსადვე აფრთხილებს ღვთის ხალხს, რომ გაიქცნენ დიდი ბაბილონიდან, რათა მისი წყლულები არ მიიღონ. ახლა ცხადდება ამ ქვეყნიერებისა და დიდი ბაბილონის წინააღმდეგ იეჰოვას მიერ გამოტანილი დამაწყლულებელი განაჩენი (გამოცხადება 8:1—9:21; 16:1—21). ღვთის ხალხი უნდა გამოეყოს ცრუ რელიგიას, რათა არ დაიტანჯოს ამ წყლულებით და მეძავთან ერთად არ დაიღუპოს. თუ ისინი მეძავის ორგანიზაციაში დარჩებიან, მისი ცოდვების თანამონაწილენი გახდებიან. ისინი დიდ ბაბილონზე ნაკლებად როდი იქნებიან დამნაშავენი სულიერ მეძაობაში და „დედამიწაზე ყოველი მოკლულის“ სისხლისღვრაში! (გამოცხადება 18:24; შეადარეთ ეფესო-ელების 5:11; 1 ტიმოთეს 5:22).

25. როგორ გამოვიდა ღვთის ხალხი ძველი ბაბილონიდან?

²⁵ როგორ გამოდის ღვთის ხალხი დიდი ბაბილონიდან? ძველ დროს იუდეველები პირდაპირი გაგებით წამოვიდნენ ქალაქ ბაბილონიდან და აღთქმულ მიწას დაუბრუნდნენ. მაგრამ ეს საკმარისი არ ყოფილა. ესაიამ უთხრა ისრაელებს: „ზურგი აქციეთ, ზურგი აქციეთ, გამოდით, უწმინდურს ნუ მიეკარებით! გამოდით მისგან და სუფთები იყავით თქვენ, ვინც იეჰოვას ნივთებს ატარებთ!“ (ესაია 52:11). მათ უნდა მიეტოვებინათ ბაბილონური რელიგიის უწმინდური წესები, რათა არ წაბილწულიყო იეჰოვას თაყვანისცემა.

26. როგორ გამოეხმაურნენ კორინთელი ქრისტიანები მოწოდებას: „გამოდით მათგან და. . . უწმინდურს ნუღარ მიეკარებით“?

²⁶ მოციქული პავლე კორინთელებისთვის მიწერილ წერილში ესაიას სიტყვებს ციტირებდა: «ნუ შეებმებით უთანასწორო უღელში ურწმუნოებთან. რა კავშირი აქვს სიმართლეს უკანონობასთან? ან რა საერთო აქვს სინათლეს სიბნელესთან?. . „ამიტომ გამოდით მათგან და გამოეყავით, — ამბობს იეჰოვა, — უწმინდურს ნუღარ მიეკარებით“ ». ეს მოწოდება იმას არ გულისხმობდა, რომ კორინთელ ქრისტიანებს კორინთი დაეტოვებინათ. ისინი არ უნდა შესულიყვნენ ცრუ რელიგიურ უწმინდურ ტაძრებში და უნდა მორიდებოდნენ კერპთაყვანისმცემელთა უწმინდურ წეს-ჩვეულებებს. 1919 წელს ღვთის ხალხმაც დაიწყო გამოსვლა დიდი ბაბილონიდან და უარი თქვა ჯერ კიდევ შემორჩენილ უწმინდურ სწავლებებსა და წეს-ჩვეულებებზე. როგორც განწმენდილ ხალხს, მათ მხოლოდ ასე შეეძლოთ ღვთისთვის მსახურება (2 კორინთელები 6:14—17; 1 იოანე 3:3).

27. რა მსგავსებაა ძველი ბაბილონისა და დიდი ბაბილონის სასჯელს შორის?

²⁷ ძველი ბაბილონი თავისი ცოდვების საზღაურად დაეცა და საბოლოოდ განადგურდა, „რადგან ცას მისწვდა მისი განაჩენი“ (იერემია 51:9). ამის მსგავსად დიდი ბაბილონის ცოდვებიც „ცას მისწვდა“, ანუ თვით იეჰოვას ყურადღება მიიქცია. მას ბრალი მიუძღვის უსამართლობაში, კერპთაყვანისმცემლობაში, უზნეობაში, ჩაგვრაში, ძარცვასა და მკვლელობაში. ძველი ბაბილონი გარკვეულწილად იმის გამო დაეცა, რომ ის იეჰოვას ტაძარსა და მის ჭეშმარიტ თაყვანისმცემლებს მტრობდა (იერემია 50:8, 14; 51:11, 35, 36). დიდი ბაბილონის დაცემა და საბოლოო განადგურება ღვთის შურისძიების მაჩვენებელია, რადგან ის საუკუნეების განმავლობაში მტრობდა ჭეშმარიტ თაყვანისმცემლებს. მისი საბოლოო განადგურება „ჩვენი ღვთის შურისძიების დღის“ დასაწყისი იქნება (ესაია 34:8—10; 61:2; იერემია 50:28).

28. რა პრინციპით აღასრულებს იეჰოვა სამართალს დიდ ბაბილონზე და რატომ?

²⁸ მოსეს კანონის მიხედვით თუ ისრაელი თავის თანამემამულეს რამეს მოჰპარავდა, ორმაგად მაინც უნდა ეზღო (გამოსვლა 22:1, 4, 7, 9). დიდი ბაბილონის მოახლოებული განადგურების დროს იეჰოვა ასეთივე პრინციპით აღასრულებს სამართალს. დიდმა ბაბილონმა ორმაგად უნდა ზღოს. მას არ შეიწყალებენ, რადგან არც ის იწყალებდა თავის მსხვერპლს. ის როგორც პარაზიტი, ისე წოვდა დედამიწის ხალხებს, რომ „სამარცხვინო ფუფუნებაში“ ეცხოვრა. ახლა მას ტანჯვა და გლოვა ელის. ძველ ბაბილონს ეგონა, რომ მის უსაფრთხოებას არაფერი დაემუქრებოდა, და იკვეხნიდა: „არ დავქვრივდები და არც შვილების დაკარგვას გამოვცდიო“ (ესაია 47:8, 9, 11). დიდი ბაბილონიც უსაფრთხოდ გრძნობს თავს, მაგრამ ისიც სწრაფად, „ერთ დღეში“ განადგურდება ძლევამოსილი იეჰოვას ბრძანებისამებრ.

თავი 37

ბაბილონის აღსასრულით გამოწვეული გლოვა და სიხარული

1. როგორ რეაგირებენ „დედამიწის მეფეები“ დიდი ბაბილონის უეცარ განადგურებაზე?

ბაბილონის აღსასრული სასიხარულო ცნობაა იეჰოვას ხალხისთვის, მაგრამ როგორ რეაგირებენ ამაზე ერები? იოანე გვეუბნება: «დედამიწის მეფეები, რომლებიც მასთან მეძაობდნენ და სამარცხვინო ფუფუნებაში ცხოვრობდნენ, იტირებენ და მწუხარებისგან მკერდში დაიწყებენ ცემას მის გამო ცეცხლის კვამლის დანახვაზე, რომელშიც ის დაიწვება. ისინი მოშორებით იდგებიან, მისი ­ტანჯვით შეშინებულები, და იტყვიან: „ვაი, ვაი, დიდო ქალაქო ბაბილონო, ძლიერო ქალაქო, რადგან ერთ საათში მოვიდა შენი გასამართლება!“ » (გამოცხადება 18:9, 10).

2. ა) რატომ გლოვობენ „დედამიწის მეფეები“ დიდი ბაბილონის განადგურებას, მიუხედავად იმისა, რომ მას ალისფერი მხეცის სიმბოლური ათი რქა ანადგურებს? ბ) რატომ დგანან დამწუხრებული მეფეები განწირული ქალაქის მოშორებით?

² ერების რეაქცია ერთი შეხედვით გასაკვირია, რადგან ბაბილონს ალისფერი მხეცის სიმბოლური ათი რქა ანადგურებს (გამოცხადება 17:16). ბაბილონის განადგურების შემდეგ „დედამიწის მეფეები“, როგორც ჩანს, მიხვდებიან, როგორ ეხმარებოდა მათ ბაბილონი ხალხის დამშვიდებასა და დამორჩილებაში. სამღვდელოება წმინდად აცხადებდა ომებს, ჯარისკაცებს ომში იწვევდა და ახალგაზრდებს ბრძოლაში მონაწილეობისკენ მოუწოდებდა. გახრწნილი მმართველები სიწმინდის ნიღაბს ამოფარებული რელიგიის მხარდაჭერით ხალხს ჩაგრავდნენ (შეადარეთ იერემიას 5:30, 31; მათეს 23:27, 28). აღსანიშნავია, რომ დამწუხრებული მეფეები განწირული ქალაქის მოშორებით დგანან. ისინი მის დასახმარებლად ახლოსაც კი არ მიდიან. მეფეები დამწუხრებულები არიან დიდი ბაბილონის განადგურებით, მაგრამ არც ისე ძლიერ, რომ მის დასახმარებლად თავი საფრთხეში ჩაიგდონ.

ვაჭრების ტირილი და გლოვა

3. იოანეს სიტყვების თანახმად დიდი ბაბილონის აღსასრულით კიდევ ვინ წუხს და რატომ?

³ მხოლოდ დედამიწის მეფეები არ არიან დამწუხრებულნი დიდი ბაბილონის აღსასრულით. „მის გამო ტირიან და გლოვობენ დედამიწის დიდვაჭრებიც, რადგან აღარავინ ყიდულობს მათი მარაგიდან: ოქროს, ვერცხლის, ძვირფასი ქვების, მარგალიტის, ბისონის, ძოწისფერი ქსოვილის, აბრეშუმისა და ალისფერი ქსოვილის მარაგიდან; სურნელოვანი ხისა და სპილოს ძვლის ყოველგვარ ნაკეთობას, უძვირფასესი ხის, სპილენძის, რკინისა და მარმარილოს ნაკეთობებს; არც დარიჩინსა და ინდურ სანელებელს, საკმეველსა და ნელსაცხებელს, გუნდრუკს, ღვინოსა და ზეითუნის ზეთს, წმინდად დაფქულ ფქვილს და ხორბალს, ცხვარ-ძროხას, ცხენებსა და ეტლებს, მონებსა და ადამიანთა სულებს. მწიფე ხილი, რომელიც შენს [დიდ ბაბილონს] სულს სურდა, გაგეცალა, ყოველივე საუკეთესო და ბრწყინვალე დაგეკარგა და ვეღარასოდეს იპოვიან მათ“ (გამოცხადება 18:11—14).

4. რატომ ტირიან და გლოვობენ „დიდვაჭრები“ დიდი ბაბილონის განადგურებას?

⁴ დიდი ბაბილონი მდიდარი ვაჭრების ახლო მეგობარი და კარგი მუშტარი იყო. მაგალითად, ქრისტიანული სამყაროს მონასტრებსა და ეკლესიებში საუკუნეების განმავლობაში აგროვებდნენ დიდძალ ოქროს, ვერცხლს, ძვირფას ქვებს, ძვირფასმერქნიან ხე-ტყეს და სხვა სახის სიმდიდრეს. გარდა ამისა, რელიგია იწონებდა იმ მფლანგველობასა და ღრეობებს, რომლებიც თან ახლავს ქრისტეს შეურაცხმყოფელი შობის დღესასწაულისა თუ სხვა ეგრეთ წოდებულ წმინდა დღესასწაულებს. ქრისტიანული სამყაროს მისიონერებმა ახალ ქვეყნებში შეაღწიეს და ამ ქვეყნიერების „დიდვაჭრებს“ ახალი ბაზრები გაუხსნეს. XVII საუკუნეში კათოლიკური რელიგია, რომელიც ვაჭრებთან ერთად შევიდა იაპონიაში, ფეოდალურ ომებშიც კი ჩაება. „ენციკლოპედია ბრიტანიკაში“ ოსაკას ციხესიმაგრის კედლებთან მიმდინარე გადამწყვეტი ბრძოლის შესახებ აღნიშნულია: „ტოკუგავას ჯარი ებრძოდა მტერს, რომლის დროშები ჯვრებით, მხსნელისა და წმინდა იაკობის, ესპანეთის მფარველი წმინდანის გამოსახულებით იყო შემკული“. გამარჯვებულმა მხარემ კათოლიციზმის დევნა დაიწყო და, ფაქტობრივად, ამოძირკვა კიდეც ის იმ მხარეში. არც დღეს მოიტანს კურთხევას ეკლესიის ჩარევა საერო საქმეებში.

5. ა) როგორ აღწერს ზეციდან მომავალი ხმა „დიდვაჭრების“ გლოვას? ბ) რატომ დგანან ვაჭრებიც მოშორებით?

⁵ კვლავ ისმის ზეციდან ხმა: «დიდვაჭრებს, რომლებიც ამით ვაჭრობდნენ და ბაბილონმა გაამდიდრა, მისი ­ტანჯვა შეაშინებთ, რის გამოც შორს დადგებიან, იტირებენ, იგლოვებენ და იტყვიან: „ვაი, ვაი, დიდო ქალაქო, ბისონით, ძოწისფრითა და ალისფრით შემოსილო, ოქროთი, ძვირფასი ქვებითა და მარგალიტებით მორთულო, რადგან ესოდენ დიდი სიმდიდრე ერთ საათში განადგურდა!“ » (გამოცხადება 18:15—17ა). დიდი ბაბილონის განადგურებისას „ვაჭრები“ თავიანთი „ბიზნეს-პარტნიორის“ დაკარგვას გლოვობენ. ეს მათთვის მართლაც „ვაის“ ნიშნავს. აღსანიშნავია, რომ მათ მხოლოდ გამორჩენა ადარდებთ, თუმცა მეფეების მსგავსად „მოშორებით დგანან“. ისინი არ უწვდიან დახმარების ხელს დიდ ბაბილონს, არც კი ეკარებიან მას.

6. როგორ აღწერს ზეციდან მომავალი ხმა გემის მესაჭეთა და მეზღვაურთა გლოვას და რატომ ტირიან ისინი?

⁶ თხრობა ასე გრძელდება: «ყოველი გემის მესაჭე, ყოველი, ვინც ზღვით მგზავრობს, ყოველი მეზღვაური და ყველა, ვინც ზღვით ირჩენს თავს, მოშორებით იდგნენ და ცეცხლის კვამლის დანახვაზე, რომელშიც ის იწვოდა, აყვირდნენ: „რომელი ქალაქი შეედრება ამ დიდ ქალაქს?“ თავზე მტვერს იყრიდნენ, ყვიროდნენ და ტირილითა და გლოვით ამბობდნენ: „ვაი, ვაი დიდ ქალაქს, რომლის ფუფუნებითაც გამდიდრდა ყველა, ვისაც ზღვაში ხომალდები ჰქონდა, ვინაიდან ერთ საათში განადგურდა!“ » (გამოცხადება 18:17ბ—19). ძველი ბაბილონი სავაჭრო ქალაქი იყო და დიდი ფლოტი ჰქონდა. თავის მიმდევართა „მრავალი წყლის“ წყალობით დიდი ბაბილონიც სავაჭრო საქმიანობას ეწევა. ამის შედეგად მის მორჩილთაგან მრავალი დასაქმებულია. როგორი ეკონომიკური ზარალი იქნება მათთვის დიდი ბაბილონის განადგურება! მეტად აღარ ექნებათ ისეთი შემოსავალი, როგორიც ჰქონდათ.

დიდი ბაბილონის განადგურებით გამოწვეული სიხარული

7, 8. როგორ აღწევს დიდი ბაბილონის შესახებ ზეციდან გაცხადებული ცნობა თავის აპოგეას და ვინ ეხმაურება ამ სიტყვებს?

⁷ მიდიელებისა და სპარსელების მიერ ძველი ბაბილონის დაპყრობის შესახებ იერემიამ იწინასწარმეტყველა: „სიხარულით შესძახებენ ბაბილონის გამო ცა და მიწა და ყველაფერი, რაც მათშია“ (იერემია 51:48). დიდი ბაბილონის განადგურების შემდეგ ზეციდან გაცხადებული ცნობა თავის აპოგეას აღწევს: „იხარეთ იმის გამო, რაც მას დაემართა, ზეცავ და თქვენ — წმინდებო, მოციქულებო და წინასწარმეტყველებო, რადგან ღმერთმა სასჯელი გამოუტანა მას თქვენ გამო!“ (გამოცხადება 18:20). იეჰოვა და ანგელოზები გაიხარებენ ღვთის დიდი ხნის მტრის განადგურებით, მათ შორის მოციქულები და პირველი ქრისტიანი წინასწარმეტყველები, რომლებიც აღდგნენ და 24 უხუცესის რიგებს შეუერთდნენ (შეადარეთ ფსალმუნის 97:8—12).

⁸ როგორც ზეცაში აღდგენილი, ისე დედამიწაზე მცხოვრები „წმინდები“ სიხარულით იყიჟინებენ, მათთან ერთად იყიჟინებს სხვა ცხვრებისგან შემდგარი უამრავი ხალხიც. დროთა განმავლობაში ახალ ქვეყნიერებაში ძველ დროს მცხოვრები ყველა ერთგული ადამიანი აღდგება და ისინიც გაიზიარებენ ამ სიხარულს. ღვთის ხალხს არასდროს უცდია შურისძიება თავიანთ მდევნელებზე, ცრუ რელიგიის წარმომადგენლებზე. მათ ახსოვდათ იეჰოვას სიტყვები: „ჩემია შურისძიება, მე მივუზღავ, — ამბობს იეჰოვა“ (რომაელები 12:19; მეორე კანონი 32:35, 41—43). იეჰოვამ დიდ ბაბილონს საკადრისი მიუზღო და შური იძია მისი დაღვრილი სისხლის გამო.

დიდი დოლაბის გადმოგდება

9, 10. ა) რას აკეთებს და რას ამბობს ძლიერი ანგელოზი? ბ) გამოცხადების 18:21-ში მოხსენიებული ძლიერი ანგელოზის მოქმედება, რით ჰგავს იმას, რაც იერემიას დროს მოხდა, და რისი გარანტიაა ეს? გ) რაზე მეტყველებს იოანეს მიერ ნანახი ძლიერი ანგელოზის მოქმედება?

⁹ ის, რასაც იოანე ახლა ხედავს, იმას ადასტურებს, რომ იეჰოვას მიერ დიდი ბაბილონისთვის გამოტანილი განაჩენი საბოლოოა: «ერთმა ძლიერმა ანგელოზმა დიდი დოლაბის მსგავსი ქვა ასწია, ზღვაში ჩააგდო და თქვა: „ასეთი სისწრაფით დაეცემა დიდი ქალაქი ბაბილონი და ვეღარასოდეს იპოვიან მას“ » (გამოცხადება 18:21). იერემიას დროს მსგავსი რამ მოხდა, რასაც წინასწარმეტყველური მნიშვნელობა ჰქონდა. იერემიამ შთაგონებით ჩაწერა წიგნში „ყველა ის უბედურება, რაც ბაბილონს უნდა დასტყდომოდა“ და წიგნი სერაიას ხელით ბაბილონში გაგზავნა. იერემიას სიტყვისამებრ სერაიამ ხმამაღლა წაიკითხა ქალაქისთვის გამოტანილი განაჩენი: „ო, იეჰოვა, შენ ლაპარაკობ ამ ადგილზე, რომ მოსპო ის და არავინ იცხოვროს იქ, არც ადამიანმა და არც პირუტყვმა, და სამარადისოდ გაპარტახდეს“. სერაიამ ქვა შეაბა ამ წიგნს, მდინარე ევფრატში ჩააგდო და თქვა: „ასე ჩაიძირება და აღარასოდეს აღდგება ბაბილონი იმ უბედურების გამო, რომელსაც დავატეხ მას“ (იერემია 51:59—64).

¹⁰ ქვამობმული წიგნის მდინარეში გადაგდება იმის მაჩვენებელი იყო, რომ ბაბილონი დავიწყებას მიეცემოდა და აღარასოდეს აღდგებოდა. მოციქული იოანეს მიერ ნანახი ძლიერი ანგელოზიც სერაიას მსგავსად იქცევა, რაც იმის გარანტიაა, რომ იეჰოვა დიდ ბაბილონთან დაკავშირებულ თავის განზრახვასაც შეასრულებს. ძველი ბაბილონის გაპარტახება დღეს იმაზე მეტყველებს, რომ ცრუ რელიგიაც მის ბედს გაიზიარებს ახლო მომავალში.

11, 12. ა) როგორ მიმართავს ძლიერი ანგელოზი დიდ ბაბილონს? ბ) რა იწინასწარმეტყველა იერემიამ განდგომილ იერუსალიმზე და რას ნიშნავს ეს დღეს?

¹¹ ახლა ძლიერი ანგელოზი დიდ ბაბილონს მიმართავს: „შენში აღარასოდეს გაისმება მომღერალი მექნარეების, მუსიკოსების, მესალამურეებისა და მესაყვირეების ხმა; აღარ იქნება შენში არანაირი ხელობის ხელოსანი, დოლაბის ხმაც აღარ გაისმება შენში; აღარც ლამპრის სინათლე გაანათებს შენში და ნეფისა და პატარძლის ხმაც აღარასოდეს გაისმება, რადგან შენი დიდვაჭრები დედამიწის დიდებულები იყვნენ და შენი სპირიტიზმით შეცდომაში შეგყავდა ხალხები“ (გამოცხადება 18:22, 23).

¹² მსგავსი სიტყვებით იერემიამაც იწინასწარმეტყველა განდგომილ იერუსალიმზე: „მოვსპობ მათში სიხარულისა და მხიარულების ხმას, ნეფისა და პატარძლის ხმას, ხელსაფქვავის ხმასა და ლამპრის შუქს. მთელი ეს მიწა განადგურდება და გაოგნდებიან მისი შემხედვარენი“ (იერემია 25:10, 11). ქრისტიანული სამყარო, დიდი ბაბილონის ძირითადი ნაწილი, ნანგრევებს დაემსგავსება, რაც ძვ. წ. 607 წლის შემდეგ იერუსალიმის გაპარტახებამ ცხადყო. ქრისტიანული სამყარო, ერთ დროს მხიარული და მოფუსფუსე, დაპყრობილი და მიტოვებული აღმოჩნდება.

13. რა დაემართება უეცრად დიდ ბაბილონს და როგორ იმოქმედებს ეს „დიდვაჭრებზე“?

¹³ როგორც ანგელოზი ეუბნება იოანეს, მთელი დიდი ბაბილონი, ძლიერი მსოფლიო იმპერია, გახრიოკებულ უდაბნოს დაემსგავსება. მისი „დიდვაჭრები“, მათ შორის ცნობილი მილიონერები, რელიგიას გამორჩენისთვის ან თავშესაფრად იყენებდნენ; სამღვდელოებასაც ხელს აძლევდა მათთან ერთად ყურადღების ცენტრში ყოფნა. ამ ვაჭრებს აღარ ეყოლებათ თანამზრახველი დიდი ბაბილონი. ის მეტად ვეღარ აცდუნებს დედამიწის ერებს თავისი მისტიკური, რელიგიური წეს-ჩვეულებებით.

შემაძრწუნებელ სისხლის ღვრაში დამნაშავე

14. ძლიერი ანგელოზის სიტყვების თანახმად რატომ გამოაქვს იეჰოვას ასეთი მკაცრი განაჩენი და რა თქვა იესომ ამასთან დაკავშირებით დედამიწაზე ყოფნისას?

¹⁴ ბოლოს ძლიერი ანგელოზი ხსნის, თუ რატომ სჯის იეჰოვა დიდ ბაბილონს ასე მკაცრად: „მასში იქნა ნაპოვნი წინასწარმეტყველების, წმინდებისა და დედამიწაზე ყოველი მოკლულის სისხლი“ (გამოცხადება 18:24). დედამიწაზე ყოფნისას იესომ უთხრა რელიგიურ წინამძღოლებს, რომ „ყველა მართლის სისხლი, მიწაზე დაღვრილი, მართალი აბელის სისხლიდან“ მოყოლებული, მათ კისერზე იყო, რის გამოც ახ. წ. 70 წელს ის უკუღმართი თაობა განადგურდა (მათე 23:35—38). დღეს ღვთის მსახურების დევნის გამო კიდევ ერთ თაობას ედება ბრალი სისხლის ღვრაში.

15. რის საფუძველზე აღმოჩნდა ნაცისტური გერმანიის კათოლიკური ეკლესია დამნაშავე სისხლის ღვრაში?

¹⁵ თავის წიგნში „კათოლიკური ეკლესია და ნაცისტური გერმანია“ გიუნთერ ლევი წერს: „როცა ბავარიაში იეჰოვას მოწმეებს დევნიდნენ, [1933 წლის] 13 აპრილს ეკლესია დათანხმდა, შეესრულებინა განათლებისა და რელიგიის სამინისტროს დავალება და დაესმინა ამ სექტის ნებისმიერი წევრი, რომელიც უარს არ იტყოდა აკრძალულ რელიგიაზე“. ამგვარად კათოლიკურმა ეკლესიამ თავისი წვლილი შეიტანა იმაში, რომ ათასობით მოწმე საკონცენტრაციო ბანაკებში მოხვედრილიყო. მას სიკვდილით დასჯილი ასობით მოწმის სისხლით აქვს გასვრილი ხელი. როცა ახალგაზრდა მოწმეებმა, მათ შორის ვილჰელმ კუსეროვმა, ცხადყვეს, რომ შეეძლოთ გაბედულად შეხვედროდნენ დახვრეტას, ჰიტლერმა გადაწყვიტა, რომ ასეთი სასჯელი საკმაოდ მსუბუქი იყო მათთვის. ამიტომ ვილჰელმის ძმას, 20 წლის ვოლფგანგს, გილიოტინაზე მოკვეთეს თავი. მეორე მხრივ, კათოლიკური ეკლესიის მოწოდებით ახალგაზრდა გერმანელი კათოლიკები თავს სწირავდნენ სამშობლოს. აშკარაა, რომ ეკლესია დამნაშავეა სისხლის ღვრაში.

16, 17. ა) რა მოეკითხება დიდ ბაბილონს და როგორ გახდა ვატიკანი დამნაშავე ნაცისტური დარბევების დროს ებრაელთა ხოცვაში? ბ) რატომ ედება ბრალი ცრუ რელიგიას მილიონობით ადამიანის დაღუპვაში?

¹⁶ წინასწარმეტყველებაში ნათქვამია, რომ დიდი ბაბილონი იქნებოდა დამნაშავე „დედამიწაზე ყოველი მოკლულის სისხლის“ დაღვრაში. უდავოა, რომ ეს სიტყვები ჩვენს დროში მართლდება. მაგალითად, ჰიტლერი კათოლიკური ეკლესიის ინტრიგებით მოვიდა გერმანიის სათავეში, რითაც ვატიკანმა თავისი წვლილი შეიტანა საშინელ სისხლის ღვრაში, ნაცისტური დარბევების დროს ექვსი მილიონი ებრაელის დახოცვაში. გარდა ამისა, ჩვენს დროში ას მილიონზე მეტი ადამიანი დაიღუპა ასობით ომში. მიუძღვის ამაში ბრალი ცრუ რელიგიას? დიახ, ორი მიზეზით.

¹⁷ ერთი მიზეზი ის არის, რომ მრავალი ომი რელიგიური უთანხმოებების საფუძველზე ხდება. მაგალითად, 1946—1948 წლებში ინდოეთში მუსლიმანებისა და ინდუსების შეტაკების მიზეზი რელიგია იყო. ამ კონფლიქტმა ასი ათასობით ადამიანის სიცოცხლე შეიწირა. ერაყსა და ირანს შორის 1980-იან წლებში მიმდინარე ბრძოლა სექტებს შორის არსებულმა უთანხმოებებმა გამოიწვია, რამაც ასი ათასობით ადამიანს მოუსწრაფა სიცოცხლე. ჩრდილოეთ ირლანდიაში კათოლიკებისა და პროტესტანტების მტრობამ ათასობით ადამიანი იმსხვერპლა. 1976 წელს ამ საკითხის შემსწავლელმა ჟურნალისტმა, კ. ლ. ზულცბერგერმა, აღნიშნა: „მწარე სიმართლეა, მაგრამ მსოფლიოში მიმდინარე ომების ნახევარზე მეტს მთლიანად ან ნაწილობრივ რელიგიური საფუძველი აქვს“. ამას ბაბილონის მშფოთვარე ისტორია ნამდვილად ადასტურებს.

18. რა არის მეორე მიზეზი, რის გამოც მსოფლიო რელიგიები დამნაშავენი არიან სისხლის ღვრაში?

¹⁸ რა არის მეორე მიზეზი? იეჰოვას თვალსაზრისით მსოფლიოს რელიგიები იმიტომაც არიან დამნაშავენი სისხლის ღვრაში, რომ საფუძვლიანად არ ასწავლიან თავიანთ მიმდევრებს, სინამდვილეში რას მოითხოვს იეჰოვა თავისი მსახურებისგან. ისინი საფუძვლიანად არც იმას ასწავლიან ხალხს, რომ ღვთის ჭეშმარიტი თაყვანისმცემლები იესო ქრისტეს უნდა ჰბაძავდნენ და წარმომავლობის მიუხედავად ერთმანეთის მიმართ სიყვარულს უნდა ავლენდნენ (მიქა 4:3, 5; იოანე 13:34, 35; საქმეები 10:34, 35; 1 იოანე 3:10—12). რადგან დიდი ბაბილონის რელიგიები სიყვარულს არ ასწავლიან, მათი მიმდევრები საერთაშორისო კონფლიქტების ციებ-ცხელებაში არიან ჩაბმული. ეს თვალსაჩინო გახდა XX საუკუნის პირველ ნახევარში მომხდარი ორივე მსოფლიო ომის დროს. როგორც პირველი, ისე მეორე მსოფლიო ომი ქრისტიანულ სამყაროში დაიწყო, რის შედეგადაც თანამორწმუნეებმა ერთმანეთი გაჟლიტეს. ბიბლიის პრინციპებით რომ ეხელმძღვანელა ყველას, ვინც თავს ქრისტიანს უწოდებდა, ეს ომები აღარ მოხდებოდა.

19. რა შემაძრწუნებელ სისხლის ღვრაშია დამნაშავე დიდი ბაბილონი?

¹⁹ იეჰოვა დიდ ბაბილონს ადანაშაულებს მთელ ამ სისხლის ღვრაში. რელიგიურ წინამძღოლებს, განსაკუთრებით ქრისტიანული სამყაროს წინამძღოლებს, ხალხისთვის რომ ბიბლიური ჭეშმარიტება ესწავლებინათ, ასეთ მასობრივ სისხლის ღვრას თავიდან აირიდებდნენ. იეჰოვას წინაშე უეჭველად პასუხს აგებს დიდი ბაბილონი, დიდი მეძავი და ცრუ რელიგიური სამყარო, არა მხოლოდ რელიგიური წინამძღოლების მიერ დევნილი და დახოცილი წინასწარმეტყველებისა და წმინდების სისხლის გამო, არამედ „დედამიწაზე ყოველი მოკლულის სისხლის“ გამო. უდავოა, დიდი ბაბილონი შემაძრწუნებელ სისხლის ღვრაშია დამნაშავე. რა ბედნიერებაა, რომ ის საბოლოოდ განადგურდება!

თავი 38

ადიდეთ იაჰი მისი სამართლისთვის!

1. რას ამბობს „ციდან დიდი ხმა, როგორც დიდძალი ხალხის ხმა“?

დიდი ბაბილონი მეტად აღარ არსებობს! ეს ნამდვილად სასიხარულო ცნობაა, ამიტომაც ესმის იოანეს სიხარულით წარმოთქმული ქება-დიდების სიტყვები. «ამის შემდეგ გავიგონე ციდან დიდი ხმა, როგორც დიდძალი ხალხის ხმა. ისინი ამბობდნენ: „ადიდეთ იაჰი [ალილუია]a! ხსნა, დიდება და ძლიერება ჩვენს ღმერთს ეკუთვნის, რადგან ჭეშმარიტი და მართალია მისი სამართალი. აღასრულა განაჩენი დიდ მეძავზე, რომელმაც გარყვნა დედამიწა თავისი სიძვით, და მოჰკითხა მან მეძავს თავისი მონების სისხლი“. მათ მაშინვე გაიმეორეს: ადიდეთ იაჰი [ალილუია]b! მეძავის კვამლი არ შეწყდება მარადიულად“ » (გამოცხადება 19:1—3).

2. ა) რას ნიშნავს „ალილუია“ და რისი მიმანიშნებელია ის, რომ იოანეს ორჯერ ესმის „ალილუია“? ბ) ვის ეკუთვნის დიდება დიდი ბაბილონის განადგურებისთვის? ახსენით.

² ალილუია! როგორც ვხედავთ, ეს სიტყვა ნიშნავს „ადიდეთ იაჰი!“. იაჰი ღვთის სახელის, იეჰოვას, შემოკლებული ფორმაა. გვახსენდება ფსალმუნმომღერლის მოწოდება: „ყოველმა სულდგმულმა ადიდოს იაჰი. ადიდეთ იაჰი!“ (ფსალმუნი 150:6). მოზეიმე ზეციერი გუნდი ახლა უკვე მეორეჯერ მღერის ალილუიას, რაც იმაზე მეტყველებს, რომ ღვთიური ჭეშმარიტება განუწყვეტლივ ცხადდება. როგორც ებრაულ, ისე ქრისტიანულ-ბერძნულ წერილებში მხოლოდ ერთ ღმერთზე მიდის საუბარი, რომლის სახელიც იეჰოვაა. ეს ის ღმერთია, რომელმაც დაამხო ძველი ბაბილონი, განაჩენი გამოუტანა დიდ ბაბილონს და გაანადგურა ის. დიდება მიაგეთ მას ამ გამარჯვებისთვის! ბაბილონი ღვთის ძალამ დაამხო და არა იმ ერების ძალამ, რომელთაც ღმერთმა ბაბილონი გაანადგურებინა. ჩვენ ხსნას მხოლოდ იეჰოვას უნდა ვუმადლოდეთ (ესაია 12:2; გამოცხადება 4:11; 7:10, 12).

3. რატომ დაიმსახურა დიდმა მეძავმა ასეთი სასჯელი?

³ რატომ იმსახურებდა ეს დიდი მეძავი ასეთ სასჯელს? იეჰოვას კანონით, რომელიც მან ნოეს და შესაბამისად მთელ კაცობრიობას მისცა, სისხლის უმიზეზოდ დამღვრელი სიკვდილით უნდა დასჯილიყო. ეს კანონი ისრაელისთვის მიცემულ კანონშიც გამეორდა (დაბადება 9:6; რიცხვები 35:20, 21). გარდა ამისა, მოსეს კანონით როგორც ფიზიკური, ისე სულიერი მრუშობა სიკვდილით ისჯებოდა (ლევიანები 20:10; მეორე კანონი 13:1—5). ათასობით წელია, რაც დიდ ბაბილონს სისხლის ღვრაში ედება ბრალი. ის ურცხვად მრუშობს. მაგალითად, რომის კათოლიკური ეკლესიის მიერ მღვდლებისთვის ქორწინების აკრძალვის გამო არაერთი მღვდელი ჩაეფლო დიდ უზნეობაში და დღეს ბევრი მათგანი შიდს—ით არის დაავადებული (1 კორინთელები 6:9, 10; 1 ტიმოთე 4:1—3). დიდი ბაბილონის უდიდესი ცოდვა, რომელიც „ცას მისწვდა“, გამაოგნებელი სულიერი მეძაობაა, რაშიც ცრუ სწავლებების გავრცელება და გახრწნილ პოლიტიკოსებთან ახლო ურთიერთობა იგულისხმება (გამოცხადება 18:5). ის საბოლოოდ დაისაჯა, რის გამოც უამრავი ზეციერი ქმნილება მეორედ წარმოთქვამს „ალილუიას“.

4. რას ნიშნავს ის, რომ დიდი ბაბილონის კვამლი „არ შეწყდება მარადიულად“?

⁴ დიდი ბაბილონი დაპყრობილი ქალაქივით დაიწვა და მისი კვამლი „არ შეწყდება მარადიულად“. როცა ქალაქს დამპყრობელთა ჯარი წვავს, კვამლი მანამდე ასდის, სანამ ნაკვერჩხლები არ ჩაინავლება. ვინც შეეცდება მბოლავი ქალაქის აღდგენას, მხრჩოლავ ნანგრევებში დაიწვება. დიდი ბაბილონის კვამლი „არ შეწყდება მარადიულად“, რაც იმას ნიშნავს, რომ მისი სასჯელი საბოლოოა და ვერავინ შეძლებს ამ შემზარავი ქალაქის აღდგენას. ცრუ რელიგია სამუდამოდ მოისპო. ალილუია! (შეადარეთ ესაიას 34:5, 9, 10).

5. ა) რას აკეთებენ და რას ამბობენ 24 უხუცესი და ოთხი ცოცხალი ქმნილება? ბ) რატომ არის ეს „ალილუია“ ქრისტიანულ სამყაროს ტაძრებში შესრულებულ „ალილუიაზე“ ბევრად მელოდიური?

⁵ ადრეულ ხილვაში იოანემ იხილა ტახტის ირგვლივ ოთხი ცოცხალი ქმნილება 24 უხუცესთან ერთად, რომლებიც ზეცაში განდიდებულ სამეფოს მემკვიდრეებს განასახიერებენ (გამოცხადება 4:8—11). ახლა იოანე კვლავ ხედავს მათ. ამჯერად ისინი დიდი ბაბილონის განადგურების გამო გრგვინვით წარმოთქვამენ მესამე „ალილუიას“: «ოცდაოთხი უხუცესი და ოთხი ცოცხალი არსება დაემხვნენ, თაყვანი სცეს ტახტზე მჯდომ ღმერთს და თქვეს: „ამინ! ადიდეთ იაჰი [ალილუია]c!“ » (გამოცხადება 19:4). კრავის სადიდებელი „ახალი სიმღერის“ გარდა ეს დიდებული გუნდი „ალილუიასაც“ მღერის (გამოცხადება 5:8, 9). ისინი დიდებული გამარჯვების სიმღერას მღერიან და დიდებას მიაგებენ უზენაეს უფალ იეჰოვას დიდ ბაბილონზე, დიდ მეძავზე სრული გამარჯვებისთვის. ეს „ალილუია“ ქრისტიანული სამყაროს ტაძრებში შესრულებულ „ალილუიაზე“ ბევრად მელოდიურია; ამ ტაძრებში შეურაცხყოფენ იეჰოვას ანუ იაჰს და არაფრად აგდებენ მას. მეტად არავინ იმღერებს იეჰოვას სახელის შეურაცხმყოფელ ფარისევლურ სიმღერას.

6. ვისი ხმა ისმის, რისკენ მოუწოდებს ის და ვინ ეხმაურება ამ ხმას?

⁶ იეჰოვამ 1918 წლიდან დაიწყო თავისი „სახელის მოშიშების, პატარებისა და დიდების“ დაჯილდოება. იეჰოვამ აღადგინა სიკვდილამდე ერთგული ცხებული ქრისტიანები და ზეცაში 24 უხუცესს მიაკუთვნა (გამოცხადება 11:18). როგორც იოანე ამბობს, სხვებიც უერთდებიან „ალილუიას“: «ტახტიდან გამოვიდა ხმა, რომელმაც თქვა: „ადიდეთ ჩვენი ღმერთი ყველა მისმა მონამ, ვისაც მისი შიში გაქვთ, დიდებმაც და პატარებმაც“ » (გამოცხადება 19:5). ეს ხმა იეჰოვას წარმომადგენლის, მისი ძის, იეჰოვას ტახტთან მდგომი იესო ქრისტეს ხმაა (გამოცხადება 5:6). ამ სიმღერას „ყველა მისი მონა“ მღერის, როგორც ზეცაში, ისე დედამიწაზე. დედამიწაზე ამ სიმღერას ცხებული იოანეს კლასი უძღვება. რა სიხარულით ემორჩილებიან ისინი მითითებას: „ადიდეთ ჩვენი ღმერთი“!

7. დიდი ბაბილონის განადგურების შემდეგ ვინ განადიდებს იეჰოვას?

⁷ მონების რიცხვში უამრავი ხალხიც შედის. 1935 წლიდან ისინი დიდი ბაბილონიდან გამოვიდნენ. მათზეც შესრულდა ღვთის დაპირება: „ის აკურთხებს იეჰოვას მოშიშებს, დიდებსა და პატარებს“ (ფსალმუნი 115:13). მეძავის, დიდი ბაბილონის განადგურების შემდეგ უამრავი ხალხის მილიონობით წარმომადგენელი იოანეს კლასთან და ზეციერ ლაშქართან ერთად განადიდებს ღმერთს. მოგვიანებით, როცა დიდი ბაბილონის სამუდამო განადგურებას შეიტყობენ, უეჭველად იმღერებენ „ალილუიას“ დედამიწაზე აღდგენილები, როგორც ცნობილი ისე უცნობი ადამიანები (გამოცხადება 20:12, 15). მთელი დიდება იეჰოვას ეკუთვნის ძველ მეძავზე ბრწყინვალე გამარჯვებისთვის!

8. დიდი ბაბილონის განადგურებამდე რისკენ უნდა აღგვძრას ზეცაში შესრულებულმა სადიდებელმა სიმღერამ?

⁸ ეს აღგვძრავს, რომ დღეს სრული მონაწილეობა მივიღოთ ღვთის საქმეში! დაე, ახლავე, დიდი ბაბილონის დამხობამდე და განადგურებამდე, იაჰის ყველა მსახურმა მთელი სულითა და გულით გააცხადოს ღვთის განაჩენი და სამეფოს დიდებული იმედი! (ესაია 61:1—3; 1 კორინთელები 15:58).

ალილუია, იეჰოვაა მეფე!

9. რატომ ჟღერს ბოლო „ალილუია“ ასე მძლავრად?

⁹ იოანე სიხარულის სხვა მიზეზებსაც მოიხსენიებს: «გავიგონე ხმა, როგორც დიდძალი ხალხის ხმა, როგორც ბევრი წყლის ხმა, და როგორც ძლიერი ჭექა-ქუხილის ხმა: „ადიდეთ იაჰი [ალილუია]d, რადგან გამეფდა ჩვენი ღმერთი იეჰოვა, ყოვლისშემძლე“ » (გამოცხადება 19:6). ეს მეოთხე და ბოლო „ალილუიაა“, რომელიც ამ ცნობის ყოვლისმომცველობაზე მიუთითებს. ეს ძლიერი, ზეციერი ხმა ადამიანთა ნებისმიერი გუნდის ხმაზე დიდებულია, ნებისმიერი ჩანჩქერის ხმაზე შთამბეჭდავია და ნებისმიერი ჭექა-ქუხილის ხმაზე შიშის მომგვრელია. მილიონობით ზეციერი ქმნილების ხმა საზეიმოდ აცხადებს, რომ „გამეფდა ჩვენი ღმერთი იეჰოვა, ყოვლისშემძლე“!

10. რა გაგებით შეიძლება ითქვას, რომ იეჰოვა დიდი ბაბილონის განადგურების შემდეგ გამეფდა?

¹⁰ რა გაგებით გამეფდა იეჰოვა? ჯერ კიდევ ასწლეულების წინ ფსალმუნმომღერალმა თქვა: „ღმერთია ჩემი მეფე უხსოვარი დროიდან“ (ფსალმუნი 74:12). იეჰოვა მანამდეც მეფობდა. მაშ, როგორ მღერის ზეციერი გუნდი, რომ „იეჰოვა გამეფდა“? ის იმ გაგებით გამეფდა, რომ დიდი ბაბილონის განადგურებით მან ჩამოიშორა კადნიერი მტერი, რომელიც ხალხს ხელს უშლიდა სამყაროს უზენაესი ღვთის მორჩილებაში. ცრუ რელიგია მეტად ვეღარ აღძრავს დედამიწის მმართველებს ღვთის წინააღმდეგ. როცა ძველმა ბაბილონმა მსოფლიო ბატონობა დაკარგა, სიონმა ასეთი ტრიუმფალური ცნობა მოისმინა: „გამეფდა შენი ღმერთი!“ (ესაია 52:7). 1914 წელს სამეფოს დაბადების შემდეგ, 24 უხუცესმა განაცხადა: „გმადლობთ, იეჰოვა ღმერთო, . . შენი დიდი ძალა რომ გამოიყენე და დაიწყე მეფობა“ (გამოცხადება 11:17). შეძახილი დიდი ბაბილონის განადგურების შემდეგაც მეორდება: „გამეფდა იეჰოვა!“ ადამიანთა შექმნილი ვერც ერთი ღმერთი ვერ შეედავება უზენაესობაში ჭეშმარიტ ღმერთს, იეჰოვას.