„აი, ესაა ჩვენი ღმერთი“

ეს ორი სასწავლო სტატია დაფუძნებულია წიგნზე „დაუახლოვდი იეჰოვას“, რომელიც 2002 წლის საოლქო კონგრესზე გამოიცა (იხილეთ სტატია „გული სითბოთი ამივსო“, გვერდი 20).

„აი, ესაა ჩვენი ღმერთი, მას ველოდით, რომ გვიხსნიდა ჩვენ. ეს არის უფალი“ (ესაია 25:9).

1, 2. ა) როგორ მოიხსენია იეჰოვამ პატრიარქი აბრაამი და რა კითხვა შეიძლება დაგვებადოს ამასთან დაკავშირებით? ბ) როგორ გვარწმუნებს ბიბლია, რომ ღმერთთან ახლო ურთიერთობის დამყარება შესაძლებელია?

„ჩემი მეგობარი“ — ამ სიტყვებით მოიხსენია იეჰოვამ, ცისა და დედამიწის შემოქმედმა, პატრიარქი აბრაამი (ესაია 41:8, აქ). წარმოიდგინეთ, უბრალო ადამიანი სამყაროს უზენაესი უფლის მეგობარი გახდა! ალბათ, დაგაინტერესებთ, თქვენთვისაც შესაძლებელია თუ არა ღმერთთან ასე დაახლოება.

² ბიბლია გვარწმუნებს, რომ ღმერთთან ახლო ურთიერთობის დამყარება შესაძლებელია. აბრაამს მიეცა ამის შესაძლებლობა, რადგან მას ‘სწამდა ღმერთი’ (იაკობი 2:23). მსგავსად, იეჰოვა დღესაც „წრფელებთან . . . მეგობრობს“ (იგავები 3:32). იაკობის 4:8-ში (აქ) ბიბლია მოგვიწოდებს: „დაუახლოვდით ღმერთს და ისიც დაგიახლოვდებათ“. ნათელია, რომ იეჰოვასთან დაახლოებას თუ შევეცდებით, თავის მხრივ, ისიც დაგვიახლოვდება. ნიშნავს ეს იმას, რომ ჩვენ — ცოდვილმა, არასრულყოფილმა ადამიანებმა — უნდა გადავდგათ პირველი ნაბიჯი? არა. „სიახლოვე იეჰოვასთან“ შესაძლებელი გახდა მას შემდეგ, რაც ჩვენმა მოსიყვარულე ღმერთმა ორი მნიშვნელოვანი ნაბიჯი გადადგა (ფსალმუნები 25:14  აქ [24:14]).

3. რომელი ორი ნაბიჯი გადადგა იეჰოვამ იმისათვის, რომ მასთან დამეგობრება შეგვძლებოდა?

³ პირველი: იეჰოვას ნებით, იესომ ‘თავი შესწირა მრავალთა გამოსასყიდად’ (მათე 20:28). სწორედ გამომსყიდველური მსხვერპლი გვაძლევს ღმერთთან დაახლოების შესაძლებლობას. ბიბლიაში ნათქვამია: „ჩვენ გვიყვარს იმიტომ, რომ პირველად მან შეგვიყვარა“ (1 იოანე 4:19). დიახ, ღმერთმა ჩაუყარა საფუძველი იმას, რომ მასთან დამეგობრება შეგვძლებოდა, რადგანაც „პირველად მან შეგვიყვარა“. მეორე: იეჰოვამ საკუთარი თავი გაგვაცნო. ნებისმიერ შემთხვევაში, როდესაც ვინმესთან მეგობრულ ურთიერთობას ვამყარებთ, უპირველესად, ვეცნობით მას, გვიზიდავს მისი პიროვნული თვისებები და ვაფასებთ მათ. დაფიქრდით ამაზე. იეჰოვა რომ ფარული, შეუცნობელი ღმერთი ყოფილიყო, ვერასოდეს დავუახლოვდებოდით. იგი არ გვემალება, პირიქით, სურს, რომ გავეცნოთ (ესაია 45:19). ღმერთი თავის სიტყვაში ჩვენთვის გასაგები ენით გვესაუბრება, რაც არა მხოლოდ იმაზე მოწმობს, რომ ვუყვარვართ, არამედ იმაზეც, რომ სურს, გავიცნოთ და შევიყვაროთ, როგორც ჩვენი ზეციერი მამა.

4. რას ვიგრძნობთ იეჰოვას მიმართ, თუ უკეთ გავეცნობით მის თვისებებს?

⁴ ალბათ, გინახავთ პატარა ბავშვი, რომელიც მეგობრებს თავის მამას ანახვებს და გულწრფელი სიხარულითა და სიამაყით ამბობს: „აი, ჩემი მამიკო!“. ღვთის თაყვანისმცემლებს იმის სრული მიზეზი აქვთ, რომ მსგავს გრძნობას განიცდიდნენ იეჰოვას მიმართ. ბიბლიაში ნაწინასწარმეტყველებია იმ დროზე, როცა ერთგული ადამიანები აღტაცებით იტყვიან: „აი, ესაა ჩვენი ღმერთი“ (ესაია 25:8, 9). რაც უფრო უკეთ გავეცნობით იეჰოვას თვისებებს, მით უფრო უკეთ ვიგრძნობთ, რომ საუკეთესო მამა და უახლოესი მეგობარი გვყავს. დიახ, იეჰოვას თვისებების დანახვა მასთან დაახლოების ყოველგვარ მიზეზს გვაძლევს. ამიტომაც მოდი განვიხილოთ, რას გვეუბნება ბიბლია იეჰოვას ოთხი ძირითადი თვისების — ძლიერების, სამართლიანობის, სიბრძნისა და სიყვარულის — შესახებ. ამ სტატიაში პირველ სამ თვისებაზე ვილაპარაკებთ.

„დიდია ის ძალით“

5. მხოლოდ იეჰოვას რატომ ეწოდება „ყოვლისშემძლე“ და რისთვის იყენებს ის თავის უსაზღვრო ძალას?

⁵ იეჰოვა „დიდია . . . ძალით“ (იობი 37:23). იერემიას 10:6-ში ნათქვამია: „არავინ არის შენი მსგავსი, უფალო, დიდი ხარ შენ და დიდია შენი სახელი ძლიერებით“. თავისი ნებისმიერი ქმნილებისგან განსხვავებით, იეჰოვას უსაზღვრო ძალა აქვს. ამიტომაც მხოლოდ მას ეწოდება «ყოვლისმპყრობელი [„ყოვლისშემძლე“, აქ]» (გამოცხადება 15:3). იეჰოვა თავის ძალას იმისათვის იყენებს, რომ შექმნას, გაანადგუროს, დაიფაროს და აღადგინოს. განვიხილოთ ორი მაგალითი — პირველი შემოქმედებით ძალას, ხოლო მეორე მფარველ ძალას დაგვანახვებს.

6, 7. რამდენად ძლიერია მზე და რა მნიშვნელოვან ფაქტს ადასტურებს ეს?

⁶ რას გრძნობთ, როდესაც ზაფხულის თაკარა მზეს ეფიცხებით? ცხადია, მზის სითბოს. თუმცა, უფრო ზუსტად რომ ვთქვათ, იეჰოვას შემოქმედებითი ძალის შედეგს. რამდენად ძლიერია მზე? მზის წიაღში ტემპერატურა დაახლოებით 15 მილიონ გრადუსს აღწევს. მზის წიაღიდან თუნდაც ხორბლის მარცვლისოდენა ნაწილი დედამიწაზე რომ დაგვედო, 140 კილომეტრის რადიუსის ფარგლებში უვნებელი არაფერი დარჩებოდა. ყოველ წამში მზე ასობით მილიონი ბირთვული ბომბის აფეთქების ტოლფას ენერგიას გამოსცემს. საინტერესოა, რომ დედამიწის ორბიტა ამ გამაოგნებელი თერმობირთვული „ღუმლისგან“ ზუსტად საჭირო მანძილით არის დაშორებული. ორბიტა მზესთან უფრო ახლოს რომ ყოფილიყო, დედამიწაზე მთელი წყალი აორთქლდებოდა, ხოლო უფრო შორს რომ ყოფილიყო — მთლიანად გაიყინებოდა. ორივე შემთხვევაში ჩვენი პლანეტა უსიცოცხლო იქნებოდა.

⁷ მიუხედავად იმისა, რომ ადამიანის სიცოცხლე მზეზეა დამოკიდებული, ბევრი საერთოდ არ უფიქრდება, რა მნიშვნელობა აქვს მას ჩვენს ცხოვრებაში. ამიტომაც არ ესმით ის, რასაც მზე გვამცნობს. ფსალმუნების 73:16-ში იეჰოვაზე ნათქვამია: „შენ განამზადე მთვარე და მზე“. დიახ, მზეს დიდება მოაქვს იეჰოვასთვის, ცისა და დედამიწის შემოქმედისთვის (ფსალმუნები 145:6). და მაინც, მზე ღვთის შემოქმედების მხოლოდ ერთ-ერთი ნაყოფია, რომელიც მის უზარმაზარ ძალაზე მეტყველებს. რაც მეტს ვიგებთ იეჰოვას შემოქმედებით ძალაზე, მით მეტად გვიჩნდება მისდამი შიშნარევი მოწიწება.

8, 9. ა) საიდან ვიგებთ, რომ იეჰოვას თავისი თაყვანისმცემლების დაცვა და მათზე ზრუნვა სურს? ბ) როგორ ზრუნავდა ბიბლიურ დროში მწყემსი თავის ფარაზე და რას გვასწავლის ეს ჩვენი დიდებული მწყემსის შესახებ?

⁸ იეჰოვა უსაზღვრო ძალას იმისთვისაც იყენებს, რომ დაიცვას თავისი მსახურები და იზრუნოს მათზე. ბიბლია ცოცხალი და გულში ჩამწვდომი სიტყვებით გადმოგვცემს, როგორ აღუთქვამს მფარველობას იეჰოვა თავის მსახურებს. მაგალითად, ესაიას 40:11-ში იეჰოვა საკუთარ თავს მწყემსს ადარებს, თავის ხალხს კი — ცხვარს. ამ მუხლში ნათქვამია: „ვით მწყემსი დამწყემსავს თავის ფარას; თავისი მკლავით შეკრებს კრავებს და თავის უბეში ატარებს, წარუძღვება მეძუძურთ“. შეეცადეთ წარმოიდგინოთ ის, რაც ამ სიტყვებშია ნათქვამი.

⁹ ცხოველთაგან ბევრი არ არის ისეთი უმწეო, როგორიც ცხვარია. ბიბლიურ დროში მწყემსს სიმამაცე ესაჭიროებოდა, რათა თავისი ფარა მგლების, დათვების და ლომებისგანაც კი დაეცვა (1 მეფეთა 17:34—36; იოანე 10:10—13). მაგრამ ისეთი დროც დგებოდა, როდესაც მფარველობის მიზნით სითბოს გამოვლენა იყო საჭირო. მაგალითად, ცხვარს ფარეხიდან მოშორებით რომ მოეგო, როგორ უნდა დაეცვა მწყემსს უსუსური ბატკანი? შესაძლოა, რამდენიმე დღის განმავლობაში მისი „უბით“ ტარება ყოფილიყო საჭირო. როგორ მოხვდებოდა პატარა ბატკანი მწყემსის „უბეში“? ბატკანი შეიძლება მწყემსს მიახლოებოდა და ფეხზეც კი გახახუნებოდა, მაგრამ დახრით მწყემსი უნდა დახრილიყო, ბატკანი ხელში აეყვანა და ფრთხილად ჩაესვა უბეში. ამ მაგალითით ნათლად ვხედავთ, რომ ჩვენი დიდებული მწყემსი მზად არის, დაგვიცვას და დაგვიფაროს!

10. როგორ გვიცავს იეჰოვა დღეს და რატომ არის ეს განსაკუთრებით მნიშვნელოვანი?

¹⁰ იეჰოვამ მფარველობის დაპირებაზე მეტი გააკეთა. ბიბლიურ დროში მან არაერთხელ დაამტკიცა სასწაულებრივად, რომ შეუძლია „იხსნას განსაცდელისაგან ღვთისმოსავნი“ (2 პეტრე 2:9). რა შეიძლება ითქვას ჩვენი დროის შესახებ? ვიცით, რომ ის არ გვარიდებს დღეს არსებულ ყველა პრობლემასა და უბედურებას, მაგრამ უფრო მნიშვნელოვან რამეს აკეთებს ჩვენთვის — სულიერად გვიცავს. ჩვენი მოსიყვარულე ღმერთი სულიერი ზიანისგან დასაცავად ყველაფერს გვაძლევს, რათა გადავიტანოთ განსაცდელები და გავუფრთხილდეთ მასთან ურთიერთობას. მაგალითად, ლუკას 11:13-ში ნათქვამია: „თუ თქვენ ბოროტებმა, იცით კეთილ მისაცემთა მიცემა თქვენი შვილებისათვის, მეტადრე ზეციერი მამა მისცემს სულიწმიდას იმათ, ვინც სთხოვს“. ამ ძლიერ სულს შეუძლია გაგვამარჯვებინოს ნებისმიერ განსაცდელსა თუ პრობლემაზე (2 კორინთელთა 4:7). ამით იეჰოვა შესაძლებლობას გვაძლევს, რომ მხოლოდ რამდენიმე წელი კი არ ვიცხოვროთ, არამედ მარადიულად. თუ ამას მხედველობაში მივიღებთ, ნამდვილად შევძლებთ, რომ ამ წუთისოფელში ნებისმიერი სატანჯველი „მსუბუქად და ხანმოკლედ“ მივიჩნიოთ (2 კორინთელთა 4:17). განა არ გვიზიდავს ღმერთი, რომელიც სიყვარულით იყენებს ძალას ჩვენს საკეთილდღეოდ?

იეჰოვას „სამართალი უყვარს“

11, 12. ა) რატომ გვაახლოებს იეჰოვასთან მისი სამართლიანობა? ბ) რა დასკვნამდე მივიდა დავითი იეჰოვას სამართლიანობის შესახებ და როგორ გვანუგეშებს მისი სიტყვები?

¹¹ იეჰოვა იმას აკეთებს, რაც სწორი და სამართლიანია; ამასთან, ის მუდამ ასე იქცევა, მიკერძოების გარეშე. ღვთის სამართლიანობა ცივი, მკაცრი თვისება არ არის და უსიამოვნო გრძნობას კი არ იწვევს ჩვენში, არამედ სასიამოვნო თვისებაა, რომელიც იეჰოვასკენ გვიზიდავს. ბიბლია ნათლად აღწერს ამ თვისების გულში ჩამწვდომ ბუნებას. მაშ, მოდი განვიხილოთ სამი მხარე, რომლებშიც იეჰოვას სამართლიანობა ვლინდება.

¹² პირველი: სამართლიანობა იეჰოვას აღძრავს, ერთგულად მოეპყროს თავის მსახურებს. ფსალმუნმომღერალმა დავითმა საკუთარ თავზე გამოსცადა ღვთის სამართლიანობის ეს მხარე. რა დასკვნამდე მიიყვანა დავითი საკუთარმა გამოცდილებამ და ღვთის საქმეების შესწავლამ? მან განაცხადა: „უფალს სამართალი უყვარს, და არ მიატოვებს თავის წმიდებს, სამარადისოდ დაცულნი იქნებიან“ (ფსალმუნები 36:28). რა მანუგეშებელი სიტყვებია! ღვთის სამართლიანობა იმის გარანტიაა, რომ ღმერთი ერთი წუთითაც კი არასოდეს მიატოვებს თავის ერთგულებს. ესე იგი, ახლოს იქნება ჩვენთან და სიყვარულით გვიპატრონებს! (იგავები 2:7, 8).

13. როგორ დასტურდება ისრაელისთვის მიცემულ რჯულში, რომ იეჰოვა ზრუნავს მათზე, ვისაც კეთილსასურველი პირობები არ გააჩნია?

¹³ მეორე: ღვთის სამართლიანობაში ისიც იგულისხმება, რომ ღმერთმა გულდამწუხრებულებს მიხედოს და ზრუნვა არ მოაკლოს. ეს ისრაელი ერისთვის მიცემულმა რჯულმა დაადასტურა. მაგალითად, რჯული ითვალისწინებდა ქვრივ-ობლებზე ზრუნვას (მეორე რჯული 24:17—21). იეჰოვას ესმოდა, რამდენად რთული იქნებოდა ასეთი ოჯახებისთვის ცხოვრება და თავად გახდა მათი მამაც, მოსამართლეც და მფარველიც (მეორე რჯული 10:17, 18). როგორც გამოსვლის 22:22—24-შია ჩაწერილი, იეჰოვა აფრთხილებდა ისრაელებს, რომ თუ ისინი უმწეო ქალებსა და ბავშვებს დაჩაგრავდნენ, შეისმენდა ჩაგრულთა ღაღადს და ‘აინთებოდა მისი რისხვა’. თუმცა რისხვა არ არის ღვთის ძირითადი თვისება, მაგრამ ღმერთი სამართლიან აღშფოთებას გამოხატავს წინასწარგანზრახული უსამართლობის მიმართ, განსაკუთრებით, როდესაც დაზარალებულები უმწეოები არიან (ფსალმუნები 102:6).

14. რა არის იეჰოვას მიუკერძოებლობის მართლაც შესანიშნავი მტკიცება?

¹⁴ მესამე: მეორე რჯულის 10:17-ის თანახმად, ბიბლია გვარწმუნებს, რომ იეჰოვა „მიკერძოებას არ იჩენს და ქრთამს არ იღებს“. ძალაუფლებისა და გავლენის მქონე მრავალი ადამიანისგან განსხვავებით, იეჰოვას ვერ გადმოიბირებ მატერიალური სიმდიდრითა და გარეგნობით. მას არ ახასიათებს მიკერძოება ან ფავორიტიზმი. ამის მტკიცებას ის წარმოადგენს, რომ იეჰოვას ჭეშმარიტ თაყვანისმცემლად გახდომისა და მარადიული ცხოვრების შესაძლებლობა მხოლოდ მცირერიცხოვანი ელიტარული საზოგადოების ხელში არაა. პირიქით, საქმეების 10:34, 35-ში აღნიშნულია, რომ „ღმერთი მიკერძოებული არ არის, არამედ ყოველ ხალხში მისი მოშიში და სიმართლის მოქმედი სათნოა მისთვის“. ასეთი შესაძლებლობა სოციალური ფენის, კანის ფერისა თუ წარმომავლობის მიუხედავად, ყველას ეძლევა. განა ეს ჭეშმარიტ სამართლიანობაზე არ მეტყველებს? ნამდვილად, იეჰოვას სამართლიანობის უკეთ გაგება მისკენ გვიზიდავს!

„ო! ღვთის . . . სიბრძნის . . . სიღრმე!“

15. რა არის სიბრძნე და როგორ ავლენს მას იეჰოვა?

¹⁵ მოციქული პავლე აღძრული იყო, რომაელთა 11:33-ში ჩაწერილი სიტყვები წარმოეთქვა: „ო! ღვთის . . . სიბრძნის . . . სიღრმე!“. დიახ, როდესაც იეჰოვას უდიდესი სიბრძნის სხვადასხვა მხარეზე ვფიქრობთ, შეუძლებელია შიშნარევი მოწიწების გრძნობა არ დაგვეუფლოს. მაგრამ რა იგულისხმება ამ თვისებაში? სიბრძნე მოიცავს ცოდნას, გამჭრიახობასა და გაგების უნარს, რაც საქმეებში ვლინდება. უსაზღვრო ცოდნითა და ღრმა გაგების უნარით იეჰოვა ყოველთვის საუკეთესო გადაწყვეტილებებს იღებს და საუკეთესო გზას მიმართავს მათ განსახორციელებლად.

16, 17. როგორ ადასტურებს იეჰოვას ქმნილებები მის უსაზღვრო სიბრძნეს? მოიყვანეთ მაგალითი.

¹⁶ კონკრეტულად რაში ავლენს იეჰოვა სიბრძნეს? ფსალმუნების 103:24-ში ნათქვამია: „რაოდენ მრავალია საქმენი შენი, უფალო! ყოველივე სიბრძნით შეგიქმნია, სავსეა დედამიწა შენი მონაგარით“. მართლაც, რაც მეტს ვიგებთ იეჰოვას შემოქმედების შესახებ, მით მეტად გვიჩნდება მოკრძალება მისი სიბრძნისადმი. მეცნიერებმა იეჰოვას შემოქმედებითი საქმეებიდან ბევრი რამ ისწავლეს! საფუძველი ჩაეყარა საინჟინრო ტექნიკის ახალ დარგს, ბიონიკას, რომელიც ცოცხალი ორგანიზმების აგებულებისა და ფუნქციების შესწავლის საფუძველზე საინჟინრო ამოცანებს წყვეტს.

¹⁷ მაგალითად, ალბათ, გაოცებულხართ ობობას ქსელის სილამაზით. ის ნამდვილად საოცარი სქემით არის გაბმული. რამდენიმე, ერთი შეხედვით, ფაქიზი ძაფი პროპორციულად ფოლადზე ბევრად მტკიცე და ტყვიაგაუმტარ ჟილეტზე უფრო გამძლეა. რას ნიშნავს ეს? წარმოიდგინეთ ობობას ქსელი, რომელიც თევზსაჭერი გემის ბადის ზომამდეა გაზრდილი. ასეთი ქსელი სამგზავრო თვითმფრინავის გაჩერებას შეძლებდა ჰაერში. დიახ, იეჰოვამ ყველა ეს ქმნილება „სიბრძნით“ შექმნა.

18. როგორ გამოჩნდა იეჰოვას სიბრძნე იმაში, რომ მან თავისი სიტყვის დასაწერად ადამიანები გამოიყენა?

¹⁸ იეჰოვას სიბრძნის უდიდესი დადასტურება მისი სიტყვა, ბიბლიაა. მის ფურცლებზე მოცემული ბრძნული რჩევები ჭეშმარიტად ცხოვრების საუკეთესო გზას გვიჩვენებს (ესაია 48:17). იეჰოვას შეუდარებელი სიბრძნე იქიდანაც ჩანს, თუ როგორ იწერებოდა ბიბლია. რაში გამოიხატება ეს? თავისი სიტყვის დასაწერად ადამიანების გამოყენება იეჰოვას სიბრძნეზე მეტყველებს. დაფიქრდით, იეჰოვას ეს საქმე ანგელოზებისთვის რომ მიენდო, განა ბიბლია ასე მიმზიდველი იქნებოდა? ფაქტია, ანგელოზები იეჰოვას თავიანთი ზეადამიანური თვალსაზრისიდან გამომდინარე წარმოგვიდგენდნენ და ღვთისადმი თავიანთ თავდადებასთან დაკავშირებულ ცნობებს გადმოგვცემდნენ. ნუთუ შევძლებდით, რომ სამყაროსთვის შეგვეხედა ამ სრულყოფილი, სულიერი ქმნილებების თვალსაზრისით, რომელთა ცოდნაც, გამოცდილებაც და ძალაც დიდად აღემატება ჩვენსას? (ებრაელთა 2:6, 7).

19. რომელი მაგალითი ცხადყოფს, რომ ბიბლიის დასაწერად ადამიანების გამოყენებით, ის უფრო გულში ჩამწვდომი და მიმზიდველი გახდა?

¹⁹ ბიბლიის დასაწერად ადამიანების გამოყენებამ ის ძალიან მიმზიდველ და გულში ჩამწვდომ წიგნად აქცია. მის დამწერ ადამიანებს ჩვენი მსგავსი გრძნობები ჰქონდათ. ისინიც არასრულყოფილები იყვნენ და ისეთივე განსაცდელებსა და წინააღმდეგობებს ხვდებოდნენ, როგორსაც ჩვენ. ისინი ზოგჯერ პირველ პირში წერდნენ და გამოხატავდნენ საკუთარ გრძნობებსა და წუხილს (2 კორინთელთა 12:7—10). ისინი წერდნენ იმას, რისი გამოხატვაც არც ერთ ანგელოზს არ შეეძლო. მაგალითად, ავიღოთ დავითის სიტყვები, რომლებიც ფსალმუნის 50-ე თავშია ჩაწერილი. შესავალი სიტყვებიდან გამომდინარე, ეს ფსალმუნი მან სერიოზული ცოდვის ჩადენის შემდეგ შეთხზა. მასში ღვთის წინაშე გადმოღვარა გული; დიდად სწუხდა მომხდარის გამო და ღმერთს პატიებას ევედრებოდა. მე-4 და მე-5 მუხლებში ვკითხულობთ: „მრავლად განმბანე ჩემი ბრალისაგან და ჩემი ცოდვისაგან განმწმიდე; რადგან ვიცი ჩემი დანაშაული, და ჩემი ცოდვა მუდამ თვალწინ მიდგას“. ყურადღება მიაქციეთ მე-7 მუხლს: „აჰა, უკანონოდ ჩავისახე და ცოდვით დაორსულდა ჩემზე დედაჩემი“. მე-19 მუხლი ამატებს: „შესაწირავი ღმერთისა — სული მოდრეკილი. მოდრეკილისა და მორჩილის გული არ დაამცირო, ღმერთო“. გრძნობთ ამ სიტყვების დამწერის სულიერ ტანჯვას? არასრულყოფილი ადამიანის გარდა, შეეძლო ვინმეს ასეთი გულსაკლავი გრძნობების გამოხატვა?

20, 21.ა) რატომ შეიძლება ითქვას, რომ ბიბლიაში იეჰოვას სიბრძნეა მოცემული, მაშინ როცა მის დასაწერად ღმერთმა ადამიანები გამოიყენა? ბ) რა იქნება განხილული მომდევნო სტატიაში?

²⁰ არასრულყოფილი მიწიერი მწერლების მეშვეობით იეჰოვამ ზუსტად ის გადმოგვცა, რაც გვჭირდება — ჩანაწერები „ღვთივსულიერია“, მაგრამ მათში ადამიანის გრძნობებიცაა ასახული (2 ტიმოთე 3:16). დიახ, ბიბლიის დამწერებს სულიწმიდა ხელმძღვანელობდა. ასეთნაირად, ბიბლიაში იეჰოვას სიბრძნე აისახა და არა მათი. ასეთი სიბრძნე აბსოლუტურ ნდობას იმსახურებს. ის იმდენად აღემატება ჩვენს სიბრძნეს, რომ ღმერთი სიყვარულით მოგვიწოდებს: „დაენდე უფალს მთელი შენი გულით და შენს გონებას ნუ დაეყრდნობი. ყველა შენს გზაზე შეიცანი იგი და ის გაასწორებს შენს ბილიკებს“ (იგავები 3:5, 6). თუ ამ ბრძნულ რჩევას გავითვალისწინებთ, დავუახლოვდებით ჩვენს ყოველმხრივ ბრძენ ღმერთს.

²¹ იეჰოვას თვისებებიდან ყველაზე მიმზიდველი და შესანიშნავი სიყვარულია. მომდევნო სტატიაში განხილული იქნება, როგორ ავლენს იეჰოვა ამ თვისებას.

„ღმერთი სიყვარულია“

„ვისაც არ უყვარს, მას არ შეუცვნია ღმერთი, ვინაიდან ღმერთი სიყვარულია“ (1 იოანე 4:8).

1—3. ა) რას ამბობს ბიბლია იეჰოვას თვისებაზე, სიყვარულზე, და რა მხრივ არის ეს სიტყვები შეუდარებელი? ბ) რატომ ამბობს ბიბლია, რომ „ღმერთი სიყვარულია“?

იეჰოვას ყველა თვისება წუნდაუდებელი, სრულყოფილი და მიმზიდველია, მაგრამ მათგან გამორჩეული სიყვარულია, რომელიც ყველაზე ძლიერ გვიზიდავს მისკენ. საბედნიეროდ, სიყვარული მისი ძირითადი თვისებაა. რის საფუძველზე შეიძლება ასეთი დასკვნის გაკეთება?

² ბიბლია სიყვარულის შესახებ ამბობს იმას, რასაც არასოდეს ამბობს იეჰოვას სხვა თვისებებზე. ბიბლია არ ამბობს, რომ ღმერთი სიძლიერეა, სამართალია ან თუნდაც სიბრძნეა. მას აქვს ეს თვისებები. ის არის ამ სამივე თვისების ძირითადი წყარო, მაგრამ მეოთხე თვისების შესახებ განსაკუთრებული სიტყვებია ნათქვამი 1 იოანეს 4:8-ში: „ღმერთი სიყვარულია“. დიახ, სიყვარული მისი პიროვნების განუყოფელი ნაწილია. ეს თვისება ღვთის უმთავრესი შინაგანი ძალაა, მისი ბუნებაა. მოდი ვიმსჯელოთ: იეჰოვა თავისი ძალით მოქმედებს; საქმეებს სამართლიანობითა და სიბრძნით წარმართავს, მაგრამ სიყვარული მას მოქმედებისკენ აღძრავს. და მის სხვა თვისებებს ყოველთვის თან ახლავს სიყვარული.

³ ხშირად ამბობენ, რომ იეჰოვა სიყვარულის განსახიერებაა. აქედან გამომდინარე, თუ გვსურს, უფრო მეტი გავიგოთ სიყვარულის შესახებ, იეჰოვა უნდა გავიცნოთ. მოდი განვიხილოთ იეჰოვას ამ უძვირფასესი თვისების ზოგი მხარე.

სიყვარულის უდიდესი გამოვლინება

4, 5. ა) რა იყო სიყვარულის უდიდესი გამოვლინება კაცობრიობის ისტორიის მანძილზე? ბ) რატომ შეგვიძლია იმის თქმა, რომ იეჰოვა და მისი ძე სიყვარულის უძლიერესი კავშირით არიან შეკრული?

⁴ იეჰოვა მრავალმხრივ ავლენს სიყვარულს, მაგრამ მისი ერთ-ერთი მოქმედება ამ მხრივ ყველა დანარჩენს აღემატება. რას ვგულისხმობთ? იეჰოვამ თავისი ძე გამოგზავნა დედამიწაზე, რომ ჩვენ გამო დატანჯულიყო და მომკვდარიყო. სრული სითამამით შეგვიძლია იმის თქმა, რომ ამით კაცობრიობის ისტორიის მანძილზე უდიდესი სიყვარული გამოვლინდა. რის საფუძველზე ვამბობთ ამას?

⁵ ბიბლია იესოს უწოდებს „პირმშოს ყოველი ქმნილებისას“ (კოლასელთა 1:15). წარმოიდგინეთ, იეჰოვას ძე ჯერ კიდევ მატერიალური სამყაროს შექმნამდე არსებობდა. რამდენ ხანს იყვნენ მამა-შვილი ერთად? ზოგი მეცნიერის ვარაუდით, სამყარო 13 მილიარდი წლისაა. ეს ვარაუდი სწორიც რომ იყოს, საკმარისად მაინც ვერ წარმოგვიდგენდა იეჰოვას მხოლოდშობილი ძის სიცოცხლის ხანგრძლივობას! რას აკეთებდა ის მთელი ამ ხნის განმავლობაში? ძე სიხარულით ემსახურებოდა მამას, „როგორც ოსტატი“ (იგავები 8:30, სსგ; იოანე 1:3). იეჰოვა და ძე ერთად ქმნიდნენ მთელ სამყაროს. რა საინტერესო და ბედნიერი იქნებოდა ის დრო! ამიტომ, რომელ ჩვენგანს შეუძლია ჩასწვდეს ისეთი კავშირის სიმტკიცეს, რომელსაც უთვალავი წლის წინათ ჩაეყარა საფუძველი? ნათელია, რომ იეჰოვა და მისი ძე სიყვარულის უძლიერესი კავშირით არიან შეკრული.

6. იესოს ნათლობისას როგორ გამოხატა იეჰოვამ თავისი გრძნობები ძისადმი?

⁶ მიუხედავად ამისა, იეჰოვამ თავისი ძე დედამიწაზე გამოგზავნა, რათა ადამიანად დაბადებულიყო. ეს კი იმას ნიშნავდა, რომ გარკვეული ხანი იეჰოვას თავის საყვარელ შვილთან განშორება მოუწევდა. იეჰოვა დიდი ინტერესით ადევნებდა თვალს ზეციდან, როგორ იზრდებოდა იესო და როგორ ყალიბდებოდა სრულყოფილ მამაკაცად. დაახლოებით 30 წლის ასაკში იესო მოინათლა. მამამ პირადად განაცხადა ზეციდან: „ეს არის ჩემი საყვარელი ძე, რომელიც მოვიწონე მე“ (მათე 3:17). მამა ნამდვილად კმაყოფილი და გახარებული იქნებოდა, როდესაც ხედავდა, როგორ ერთგულად ასრულებდა იესო მის შესახებ დაწერილ ყველა წინასწარმეტყველებას, ყველაფერს, რაც კი მოეთხოვებოდა! (იოანე 5:36; 17:4).

7, 8. ა) როგორ აწამეს იესო ახ. წ. 33 წლის 14 ნისანს და როგორ იმოქმედა ამან მის ზეციერ მამაზე? ბ) რატომ დაუშვა იეჰოვამ თავისი ძის წამება და სიკვდილი?

⁷ წარმოგიდგენიათ, როგორი გრძნობა დაეუფლებოდა იეჰოვას ახ. წ. 33 წლის 14 ნისანს იესოს გაცემისას, ან იმ დროს, როდესაც ბრბომ შეიპყრო ის? ან მაშინ, როდესაც დასცინოდნენ, აფურთხებდნენ, მუშტებს ურტყამდნენ და შოლტავდნენ, რის დროსაც ზურგი ეფლითებოდა? როდესაც ხის ძელზე გააკრეს, ფეხებითა და ხელებით მიალურსმეს და თან ლანძღავდნენ? რა მდგომარეობაში იქნებოდა მამა, როდესაც მისი საყვარელი შვილი ტკივილებისგან იტანჯებოდა და მას შეჰღაღადებდა? რას იგრძნობდა იეჰოვა, როდესაც იესოს უკანასკნელი სიტყვა აღმოხდა და, სამყაროს გაჩენის დღიდან პირველად, მისმა ძვირფასმა ძემ არსებობა შეწყვიტა? (მათე 26:14—16, 46, 47, 56, 59, 67; 27:26, 38—44, 46; იოანე 19:1).

⁸ ძნელია, სიტყვებით გადმოსცე ის ტკივილი, რომელიც იეჰოვამ თავისი ძის სიკვდილისას განიცადა, მაგრამ შესაძლებელია იმის ახსნა, თუ რატომ დაუშვა იეჰოვამ ეს. რატომ დაუშვა მამამ, რომ პირადად განეცადა ასეთი ტკივილი? იოანეს 3:16-ში იეჰოვა საოცარ ინფორმაციას გვიმხელს. ეს მუხლი იმდენად მნიშვნელოვანია, რომ მას მინიატურული სახარებაც კი უწოდეს. მასში ნათქვამია: „ისე შეიყვარა ღმერთმა წუთისოფელი, რომ მისცა თავისი მხოლოდშობილი ძე, რათა ყოველი მისი მორწმუნე არ დაიღუპოს, არამედ ჰქონდეს საუკუნო სიცოცხლე“. ასე რომ, მიზეზი შეიძლებოდა ასე შეგვეჯამებინა: სიყვარული. ასეთი დიდი სიყვარული არასოდეს გამოვლენილა.

როგორ გვარწმუნებს იეჰოვა თავის სიყვარულში?

9. რაში სურს სატანას დაგვარწმუნოს ჩვენდამი ღვთის დამოკიდებულებასთან დაკავშირებით, მაგრამ რაში გვარწმუნებს თავად იეჰოვა?

⁹ მიუხედავად ზემოთქმულისა, წამოიჭრება მნიშვნელოვანი კითხვა: პირადად ჩვენ თუ ვუყვარვართ იეჰოვა ღმერთს? ზოგი ეთანხმება იმ აზრს, რომ, მთლიანობაში, ღმერთს უყვარს კაცობრიობა, როგორც ამას იოანეს 3:16 ამბობს. თუმცა ისინი ფიქრობენ, რომ პირადად მათ ღმერთი ვერასდროს შეიყვარებს. სატანას მთელი გულით სწადია, დაგვაჯეროს, რომ იეჰოვა ღმერთს არ ვუყვარვართ და არ გვაფასებს. მეორე მხრივ, როგორი უღირსებიც უნდა გვეგონოს საკუთარი თავი და ვფიქრობდეთ, რომ არ ვიმსახურებთ სიყვარულს, იეჰოვა გვარწმუნებს, რომ თითოეული მისი ერთგული მსახური ძვირფასია მისთვის.

10, 11. როგორ გვიჩვენებს ბეღურასთან დაკავშირებით მოყვანილი იესოს მაგალითი, რომ ძვირფასნი ვართ იეჰოვასთვის?

¹⁰ მაგალითისთვის დავფიქრდეთ იესოს სიტყვებზე, რომლებიც მათეს 10:29—31-შია ჩაწერილი. იმისათვის, რომ თავისი მოწაფეებისთვის ეჩვენებინა, რამდენად ძვირფასნი იყვნენ, იესომ თქვა: „განა ორი ბეღურა ერთ ასარად არ იყიდება? მაგრამ არც ერთი მათგანი არ დაეცემა მიწაზე თქვენი მამის ნების გარეშე. ხოლო თქვენ თავზე თმებიც კი დათვლილია. ნუ გეშინიათ: ბევრ ბეღურაზე უკეთესნი ხართ“. განვიხილოთ, თუ რას ნიშნავდა ეს სიტყვები იესოს მსმენელებისთვის პირველ საუკუნეში.

¹¹ იესოს დროს ბეღურა უიაფეს ფრინველად ითვლებოდა. ერთ ასარად (ერთი პატარა მონეტის ფასად) ორი ბეღურის ყიდვა შეიძლებოდა. როგორც ლუკას 12:6, 7-შია მოთხრობილი, შემდეგ იესომ თქვა, რომ თუ მყიდველი ორ ასარს გადაიხდიდა, ოთხის ნაცვლად, ხუთ ბეღურას იყიდდა. მეხუთე ბეღურას ყოველგვარი საფასურის გარეშე აძლევდნენ. შეიძლება ასეთი ფრინველები არაფრად ფასობდა ადამიანის თვალში, მაგრამ როგორ უყურებდა მათ შემოქმედი? იესომ თქვა: „არც ერთი მათგანი [ისიც კი, რომელსაც უფასოდ აძლევდნენ] დავიწყებული არ არის ღვთის წინაშე“. ახლა, ალბათ, უკეთ გვესმის, რის თქმა სურდა ამით იესოს. თუ იეჰოვა ერთ ბეღურას ასე აფასებს, რამდენად ძვირფასია მისთვის ადამიანი! როგორც იესომ თქვა, იეჰოვამ ყველაფერი იცის ჩვენ შესახებ. ჩვენს თავზე თმის ყოველი ღერიც კი დათვლილია!

12. რატომ ვართ დარწმუნებული, რომ იესო არ აზვიადებდა, როცა ამბობდა: „თქვენს თავზე თმებიც კი დათვლილია“?

¹² ზოგმა შეიძლება იესოს ეს ნათქვამი გაზვიადებულად მიიჩნიოს. მაგრამ, აბა, დაფიქრდით აღდგომის იმედზე. რამდენად კარგად უნდა გვიცნობდეს იეჰოვა, რომ ხელახლა შეგვქმნას? ის იმდენად კარგად გვიცნობს, რომ ახსოვს ყოველი წვრილმანი, მათ შორის ჩვენი რთული გენეტიკური კოდი, მთელი ჩვენი განვლილი ცხოვრება და გამოცდილება. ყოველივე ამასთან შედარებით, თმის რაოდენობის დათვლა, რაც საშუალოდ დაახლოებით 100 000-ს აღწევს, არაფერია. რა შესანიშნავად ამტკიცებს იესოს სიტყვები, რომ იეჰოვა პირადად ზრუნავს თითოეულ ჩვენგანზე.

13. როგორ გვიჩვენებს იოშაფატის მაგალითი, რომ იეჰოვა კარგს ეძებს ადამიანებში მათი არასრულყოფილების მიუხედავად?

¹³ ღვთის სიტყვა სხვა მხრივაც გვარწმუნებს იეჰოვას სიყვარულში. ბიბლიიდან ჩანს, რომ ის კარგს ეძებს ჩვენში და ამის გამო გვაფასებს. მაგალითად, დავფიქრდეთ კარგი მეფე იოშაფატის შემთხვევაზე. ერთხელ, როდესაც მეფე უგუნურად მოიქცა, იეჰოვას წინასწარმეტყველმა მას უთხრა: „ამის გამო უფლის რისხვა დაგატყდება თავს“. რა შემზარავი სიტყვებია! მაგრამ იეჰოვას ცნობა ამით არ დამთავრებულა. „თუმცაღა კეთილი საქმეებიც აღმოგაჩნდა“, — განაგრძო წინასწარმეტყველმა (2 ნეშტთა 19:1—3). ასე რომ, სამართლიანმა რისხვამ იეჰოვას არ დაავიწყა იოშაფატის „კეთილი საქმეები“. ნუთუ მანუგეშებელი არ არის იმის ცოდნა, რომ იეჰოვა ღმერთი კარგს ეძებს ადამიანებში მათი არასრულყოფილების მიუხედავად?

ღმერთი, რომელიც მზად არის მისატევებლად

14. როდესაც ვცოდავთ, რა დამთრგუნველი გრძნობები შეიძლება დაგვეუფლოს, მაგრამ როგორ შეგვიძლია ღვთისგან პატიების მიღება?

¹⁴ შეცოდების შემდეგ გულგატეხილობის, სირცხვილისა და დანაშაულის გრძნობის გამო შეიძლება ვფიქრობდეთ, რომ ვეღარასოდეს დავიმსახურებთ, კვლავ იეჰოვას მსახურად ვიწოდებოდეთ. მაგრამ ნუ დაგავიწყდებათ, რომ იეჰოვა ‘მზად არის, მოგვიტევოს’ (ფსალმუნები 86:5, აქ [85:5]). დიახ, თუ ვინანიებთ და მთელი ძალებით ვცდილობთ, რომ ხელმეორედ აღარ ჩავიდინოთ ცოდვა, შეგვიძლია იეჰოვასგან პატიების მიღება. განვიხილოთ, როგორ აღწერს ბიბლია იეჰოვას სიყვარულის ამ საოცარ მხარეს.

15. როგორ გვაშორებს იეჰოვა ცოდვებს?

¹⁵ ფსალმუნმომღერალმა დავითმა ამგვარად აღწერა იეჰოვას მიმტევებლობა: „როგორც დაცილებულია აღმოსავლეთი დასავლეთისაგან, ისე გაგვაშორა მან დანაშაული ჩვენი“ (ფსალმუნები 102:12). რა მანძილით არის დაცილებული აღმოსავლეთი დასავლეთისგან? შეიძლება ითქვას, რომ აღმოსავლეთი და დასავლეთი მათ შორის წარმოსახვითი მანძილის უკიდურესი წერტილებია, რომლებიც ყოველთვის დაშორებულია ერთმანეთისგან. ერთი მკვლევარის აზრით, ამ ფრაზაში იგულისხმება „ყველაზე დიდი მანძილი, რომლის წარმოდგენაც შეგვიძლია“. დავითის სიტყვებში, რომლებიც მან ღვთის შთაგონებით დაწერა, ჩანს, რომ პატიებისას იეჰოვას ჩვენგან რაც შეიძლება შორს მიაქვს ჩადენილი ცოდვები.

16. როდესაც იეჰოვა გვაპატიებს ცოდვებს, რატომ შეგვიძლია ვიყოთ დარწმუნებული, რომ ამის შემდეგ მის თვალში სუფთები ვიქნებით?

¹⁶ გიცდიათ ოდესმე ღია ფერის ტანსაცმლიდან ლაქის ამოყვანა? შესაძლებელია, დიდი მცდელობის მიუხედავად, ლაქა მაინც შესამჩნევი დარჩა. ყურადღება მიაქციეთ, რას ამბობს იეჰოვა თავისი პატიების უნარზე: «ყირმიზივით [„ალისფერიც“, აქ] რომ იყოს თქვენი ცოდვები, თოვლივით გასპეტაკდება, და ჭიაფერივით [„შინდისფერივით“, აქ] წითელიც რომ იყოს, მატყლივით გადაიქცევა“ (ესაია 1:18). სიტყვა „ალისფერი“ მკვეთრ წითელ ფერს ნიშნავსa, „შინდისფერი“ კი ერთ-ერთი მუქი ფერია. საკუთარი ძალებით ვერასდროს შევძლებდით ცოდვის ლაქის მოშორებას. იეჰოვას კი შეუძლია აიღოს ჩვენი „ალისფერი და შინდისფერი“ ცოდვები და თოვლივითა და მატყლივით გაასპეტაკოს. ამიტომ, მას შემდეგ, რაც იეჰოვა გვაპატიებს, არ უნდა ვიფიქროთ, რომ მთელი დარჩენილი სიცოცხლის განმავლობაში მოგვიწევს ცოდვის ლაქის ტარება.

17. რა გაგებით ყრის იეჰოვა ჩვენს ცოდვებს თავის ზურგს უკან?

¹⁷ მომაკვდინებელი სენისგან გამოჯანმრთელების შემდეგ დაწერილ სიმღერაში ხიზკიაჰუმ იეჰოვას უთხრა: „შენს ზურგს უკან გადაყარე ყველა ჩემი ცოდვა“ (ესაია 38:17). იეჰოვა, ასე ვთქვათ, იღებს ადამიანის ცოდვებს და თავის ზურგს უკან ყრის, რომ აღარ დაინახოს და აღარასოდეს მიაქციოს ყურადღება. ერთი თეოლოგიური ლექსიკონის თანახმად, ამ ფრაზაში შემდეგი აზრია ჩადებული: „შენ მომაშორე [ცოდვები], თითქოს არასდროს ჩამიდენია“. განა ეს მანუგეშებელი არ არის?

18. როგორ გვაჩვენებს წინასწარმეტყველი მიქა, რომ, იეჰოვა სამუდამოდ გვაშორებს ცოდვებს, როდესაც გვპატიობს?

¹⁸ აღორძინების შესახებ წინასწარმეტყველებისას მიქამ მტკიცე რწმენა გამოხატა, რომ მონანიების შემდეგ იეჰოვა უსათუოდ აპატიებდა თავის ხალხს: „რომელ ღმერთს . . . უპატიებია ცოდვა თავისი სამკვიდროს ნატამალისთვის? . . .ზღვის უფსკრულებში მოისვრის ყოველ მათ ცოდვას“ (მიქა 7:18, 19). წარმოიდგინეთ, რამდენად ძვირფასი იქნებოდა ეს სიტყვები ბიბლიურ დროში მცხოვრებთათვის. განა მოახერხებდა ვინმე „ზღვის უფსკრულებიდან“ რამის ამოღებას? ამრიგად, მიქა გვეუბნება, რომ იეჰოვა გვპატიობს და სამუდამოდ გვაშორებს ცოდვებს.

„ღვთის თანაგრძნობა“

19, 20. ა) რა მნიშვნელობას ატარებს ებრაული ზმნა, რომელიც „შეწყალებად“ ან „შებრალებად“ არის ნათარგმნი? ბ) როგორ იყენებს ბიბლია დედობრივ გრძნობებს იეჰოვას თანაგრძნობაში გასარკვევად?

¹⁹ თანაგრძნობა იეჰოვას სიყვარულის სხვა მხარეა. რა არის თანაგრძნობა? ბიბლიაში თანაგრძნობასა და გულმოწყალებას შორის ახლო კავშირია. თანაგრძნობის გამომხატველი რამდენიმე ებრაული და ბერძნული სიტყვა არსებობს. მაგალითად, განვიხილოთ ებრაული ზმნა „რახამ“, რომელიც ხშირად ითარგმნება, როგორც „შეწყალება“ ან „შებრალება“. ებრაული სიტყვა, რომელსაც იეჰოვა საკუთარ თავთან მიმართებაში იყენებს, სიტყვა „საშვილოსნოს“ მონათესავეა და „დედობრივ თანაგრძნობასაც“ გულისხმობს.

²⁰ იეჰოვას თანაგრძნობაში გასარკვევად, ბიბლია ამ თვისებას დედობრივ გრძნობებს ადარებს. ესაიას 49:15-ში ვკითხულობთ: «განა დაივიწყებს ქალი თავის ძუძუთა ბავშვს და არ შეიბრალებს [„რახამ“] ძეს თავისი მუცლისას? იმათაც რომ დაივიწყონ, მე არ დაგივიწყებ შენ!». ძნელი წარმოსადგენია დედა, რომელიც დაივიწყებდა, რომ პატარას მოვლა და კვება სჭირდება. ბავშვი ხომ უმწეოა; ის დღედაღამ დედის ზრუნვას საჭიროებს. სამწუხაროდ, ისეც ხდება, რომ ზოგი დედა უარს ამბობს საკუთარ შვილზე, განსაკუთრებით ამ „საზარელ ჟამს“ (2 ტიმოთე 3:1, 3). მაგრამ იეჰოვა ამბობს: „მე არ დაგივიწყებ შენ!“. იეჰოვას მიერ თავისი მსახურებისადმი გამოვლენილი თანაგრძნობა ბევრად აღემატება ჩვენთვის ცნობილ ყველაზე სათუთ გრძნობებსაც კი, თუნდაც დედის ბუნებრივ გრძნობებს საკუთარი შვილისადმი.

21, 22. რა მხრივ იტანჯებოდნენ ისრაელები ძველ ეგვიპტეში და როგორ გამოეხმაურა იეჰოვა მათ ღაღადს?

²¹ როგორ ავლენს იეჰოვა თანაგრძნობას მოსიყვარულე მშობლის მსგავსად? ეს თვისება აშკარად გამოჩნდა ისრაელი ერისადმი მის მოპყრობაში. ძვ. წ. XVI საუკუნის მიწურულს ისრაელი ერი ძველ ეგვიპტეში მონობაში იმყოფებოდა, სადაც მათ მძიმედ ჩაგრავდნენ (გამოსვლა 1:11, 14). გასაჭირში მყოფი ისრაელები იეჰოვას შეჰღაღადებდნენ დახმარებისთვის. უპასუხა თანამგრძნობმა ღმერთმა მათ ლოცვებს?

²² იეჰოვას გული შეძრა მათმა ვედრებამ. მან თქვა: „ვიხილე ტანჯვა ჩემი ხალხისა, რომელიც ეგვიპტეშია, და ვისმინე მისი კვნესა . . . მე ვიცი მისი სატკივარი“ (გამოსვლა 3:7). იეჰოვა ვერ იხილავდა თავისი ხალხის ჩაგვრას და არც მათ ღაღადს მოისმენდა, თანამგრძნობი რომ არ ყოფილიყო. ის შემბრალე ღმერთია. სიბრალული სხვისი ტკივილის გაზიარებას ნიშნავს, რაც თანაგრძნობასთან მჭიდრო კავშირშია. იეჰოვას არა მარტო შეებრალა თავისი ხალხი, არამედ აღიძრა მათ დასახმარებლად. ესაიას 63:9-ში ნათქვამია: „თავისი სიყვარულითა და თავისი მოწყალებით გამოისყიდა ისინი“. იეჰოვამ ისრაელები ეგვიპტიდან „ძლიერი ხელით“ გამოიყვანა (მეორე რჯული 4:34). იმ დროიდან მოყოლებული სასწაულებრივად კვებავდა და ნაყოფიერი ქვეყანაც დაუმკვიდრა.

23. ა) როგორ გვარწმუნებს ფსალმუნმომღერლის სიტყვები, რომ იეჰოვა დიდად არის დაინტერესებული თითოეული ჩვენგანით? ბ) რა მხრივ გვეხმარება იეჰოვა?

²³ იეჰოვა თავისი მსახურებისადმი თანაგრძნობას მხოლოდ როგორც ჯგუფისადმი არ ავლენს. ჩვენი მოსიყვარულე ღმერთი დიდად არის დაინტერესებული თითოეული ჩვენგანით. მას შესანიშნავად ესმის ნებისმიერი სატანჯველი თუ უბედურება, რომელიც თავს გვატყდება. ფსალმუნმომღერალმა თქვა: „უფლის თვალები მიპყრობილია წმიდებისაკენ და მისი ყურები — მათი ღაღადისაკენ. ახლოა უფალი გულმოდრეკილებთან, და სულით მორჩილებს იხსნის“ (ფსალმუნები 33:16, 19). როგორ გვეხმარება იეჰოვა თითოეულს? მან შეიძლება არ აგვაცილოს თავიდან ტანჯვის გამომწვევი მიზეზები, მაგრამ ბევრს აკეთებს მათთვის, ვინც მას საშველად უხმობს. მისი სიტყვა პრაქტიკულ რჩევებს გვთავაზობს, რომლებსაც შეუძლია მნიშვნელოვნად შეცვალოს ჩვენი ცხოვრება. კრებაში იეჰოვა გამოცდილი ზედამხედველებით უზრუნველგვყოფს, რომლებიც ყველანაირად ცდილობენ, იეჰოვას მსგავსად თანაგრძნობა გამოავლინონ და დაეხმარონ თანამორწმუნეებს (იაკობი 5:14, 15). როგორც ‘ლოცვების მომსმენი’, ის აძლევს „სულიწმიდას იმათ, ვინც სთხოვს“ (ფსალმუნები 64:3; ლუკა 11:13). ყველა ეს ძღვენი «ჩვენი ღვთის გულმოწყალების [„თანაგრძნობის“, აქ]» მაჩვენებელია (ლუკა 1:78).

24. როგორ გამოეხმაურებით იეჰოვას სიყვარულს?

²⁴ განა არ აღგვაფრთოვანებს ჩვენი ზეციერი მამის სიყვარულზე დაფიქრება? წინა სტატიაში შევეხეთ იმას, რომ იეჰოვა თავის ძლიერებას, სამართლიანობასა და სიბრძნეს სიყვარულით ავლენს ჩვენს სასარგებლოდ. ამ სტატიაში კი დავინახეთ, რომ იეჰოვა უშუალოდ სიყვარულს ავლენს მრავალგვარი საოცარი სახით, როგორც მთელი კაცობრიობისადმი, ისე ყოველი ჩვენგანისადმი. ახლა კი კარგი იქნება, თითოეულმა ვკითხოთ საკუთარ თავს: მე როგორ გამოვეხმაურები იეჰოვას სიყვარულს? გამოავლინეთ ღვთისადმი სიყვარული მთელი გულით, სულით, გონებითა და ძალით (მარკოზი 12:29, 30). დაე თქვენი ცხოვრებით ყოველდღიურად დამტკიცდეს, რომ გულწრფელად გსურთ, უფრო და უფრო დაუახლოვდეთ იეჰოვას. და იეჰოვაც — ღმერთი, რომელიც სიყვარულია — სულ უფრო და უფრო დაგიახლოვდებათ მთელი მარადიულობის განმავლობაში! (იაკობი 4:8, აქ).

[სქოლიოები]