დიდი ალისფერი დრაკონი

7. კიდევ რა ნიშანს ხედავს იოანე ზეცაში?

⁷ რას ხედავს ამის შემდეგ იოანე? „სხვა ნიშანიც გამოჩნდა ცაში: დიდი ალისფერი დრაკონი, რომელსაც შვიდი თავი და ათი რქა ჰქონდა, თავებზე კი შვიდი გვირგვინი ედგა. მან კუდი მოუსვა ცის ვარსკვლავების მესამედს და დედამიწაზე გადმოყარა. დრაკონი იდგა მშობიარე ქალის წინ, რათა, როცა იმშობიარებდა, შთაენთქა მისი ბავშვი“ (გამოცხადება 12:3, 4).

8. ა) ვინ არის დიდი ალისფერი დრაკონი? ბ) რისი სიმბოლოა დრაკონის შვიდი თავი, ათი რქა და თითოეულ თავზე დადგმული გვირგვინი?

⁸ ეს დრაკონი სატანაა, „ძველი გველი“ (გამოცხადება 12:9; დაბადება 3:15). ის არის მძვინვარე გამანადგურებელი, შვიდთავიანი დრაკონი, შთამნთქმელი, რომელსაც შეუძლია მთლიანად შთანთქოს მსხვერპლი. მართლაც შემზარავი აღწერილობაა! შვიდი თავი და ათი რქა იმის მაჩვენებელია, რომ „გამოცხადების“ მე-13 თავში აღწერილი პოლიტიკური მხეცი მისი ქმნილებაა. ამ მხეცსაც შვიდი თავი და ათი რქა აქვს. ვინაიდან სატანას თითოეულ თავზე თითო, სულ კი შვიდი გვირგვინი ადგას, უდავოა, რომ ამ მხეცით წარმოდგენილი მსოფლიო პოლიტიკური ძალები მას ემორჩილებიან (იოანე 16:11). ათი რქა იმ ძალაუფლების სიმბოლოა, რასაც ის სრულად ავლენს მთელ ქვეყნიერებაზე.

9. რაზე მიუთითებს ის, რომ დრაკონმა კუდით „ცის ვარსკვლავების მესამედი“ დედამიწაზე გადმოყარა?

⁹ დრაკონს სულიერ სფეროშიც აქვს ძალაუფლება. მან კუდით ცის ვარსკვლავების მესამედი „დედამიწაზე გადმოყარა“. ვარსკვლავებით ანგელოზები არიან წარმოდგენილი (იობი 38:7). „მესამედი“ იმაზე მიუთითებს, რომ სატანამ მრავალი ანგელოზი შეიყვანა შეცდომაში. რადგან ერთხელ დაემორჩილნენ ეშმაკს, თავს ვეღარ დააღწევენ მას. მათ აღარ დაიტოვეს ღვთის წმინდა ორგანიზაციაში დასაბრუნებელი გზა. ისინი დემონები გახდნენ, სატანამ, მათმა მეფემ და მმართველმა, თითქოს „კუდი მოუსვა“ მათ (მათე 12:24). სატანამ ისინი დედამიწაზე გადმოყარა. ამ შემთხვევაში, უდავოა, ნოეს წარღვნამდე პერიოდი იგულისხმება, როცა სატანამ აცდუნა ღვთის ურჩი ძეები, რომ დედამიწაზე ჩამოსულიყვნენ და ადამიანთა ასულებთან ეცხოვრათ. ღმერთმა ეს „შემცოდველი ანგელოზები“ დასაჯა და, ასე ვთქვათ, საპატიმროში ანუ ტარტაროზში ჩაყარა (დაბადება 6:4; 2 პეტრე 2:4; იუდა 6).

10. რომელი ურთიერთდაპირისპირებული ორგანიზაციების არსებობა გახდა ცხადი, და რატომ ცდილობს დრაკონი დაბადებისთანავე ბავშვის შთანთქმას?

¹⁰ ამგვარად აშკარა გახდა, რომ არსებობს ორი ურთიერთდაპირისპირებული ორგანიზაცია: ქალის სახით წარმოდგენილი იეჰოვას ზეციერი ორგანიზაცია და სატანის დემონური ორგანიზაცია, რომელიც საკამათოს ხდის ღვთის უზენაესობას. მაგრამ, როგორ უნდა გადაწყდეს ღვთის უზენაესობის მნიშვნელოვანი საკითხი? სატანა, რომელსაც კვლავაც მიჰყვებიან დემონები, მსხვერპლს დადარაჯებულ მძვინვარე მტაცებელს ჰგავს. ის ქალის მშობიარობას ელოდება. მას სურს ახალშობილის შთანთქმა, რადგან იცის, რომ ის სერიოზულ საფრთხეს უქმნის როგორც მის, ასევე მის ძალაუფლებაში მყოფი ქვეყნიერების არსებობას (იოანე 14:30).

ვაჟი

11. როგორ აღწერს იოანე ბავშვის დაბადებას, და რატომ იყენებს ის ორ სიტყვას ბავშვის სქესის საჩვენებლად?

¹¹ უცხოტომელთათვის დანიშნული დრო, როცა მათ შეეძლოთ ღვთისგან დამოუკიდებლად ემმართველათ, 1914 წელს დასრულდა (ლუკა 21:24). მაშინ, ზუსტად დადგენილ დროს, ქალმა იმშობიარა: „შვა ვაჟი, რომელმაც უნდა მწყემსოს ყველა ხალხი რკინის კვერთხით. ბავშვი ატაცებულ იქნა ღმერთთან და მის ტახტთან. ქალი კი გაიქცა უდაბნოში, სადაც ღმერთს მისთვის ადგილი ჰქონდა მომზადებული, რათა ეკვებათ იქ ათას ორას სამოც დღეს“ (გამოცხადება 12:5, 6). ბერძნულ ტექსტში იოანე ორ სიტყვას იყენებს: ვაჟს და მამრს. რატომ იყენებს იოანე ორ სიტყვას? ამით იოანეს იმის ჩვენება უნდა, რომ ბავშვს აქვს უნარი და სათანადო ძალა, მართოს ერები. ეს იმასაც უსვამს ხაზს, რამდენად მნიშვნელოვანი და სასიხარულო მოვლენაა ამ ბავშვის დაბადება. ვაჟი გადამწყვეტ როლს შეასრულებს ღვთის წმინდა საიდუმლოს დასრულებაში, რადგან მან უნდა „მწყემსოს ყველა ხალხი რკინის კვერთხით“.

12. ა) რა იწინასწარმეტყველა იეჰოვამ იესოს შესახებ „ფსალმუნებში“? ბ) რას ნიშნავს ვაჟის დაბადება, რომელმაც უნდა „მწყემსოს ყველა ხალხი რკინის კვერთხით“?

¹² ეს ფრაზა ნაცნობია ჩვენთვის, რადგან იეჰოვამ წინასწარმეტყველებისას იესოს ასე მიმართა: „დალეწავ მათ რკინის კვერთხით და მეთუნის ჭურჭელივით დაამსხვრევ“ (ფსალმუნი 2:9). მასზე ისიც იყო ნაწინასწარმეტყველები: «იეჰოვა შენი ძლიერების კვერთხს გამოგიგზავნის სიონიდან და გეტყვის: „იბატონე შენს მტრებს შორის“ » (ფსალმუნი 110:2). ამიტომ აშკარაა, რომ ბავშვის დაბადება, რაც იოანემ იხილა, იესო ქრისტეს ეხება. თუმცა აქ არ იგულისხმება ახალი წელთაღრიცხვის I საუკუნის დაწყებამდე იესოს დაბადება ქალწულისგან და არც ახ. წ. 33 წელს მისი აღდგომა სულიერ ქმნილებად. აქ არც სულის გარდასახვაა ნაგულისხმები, არამედ საუბარია 1914 წელს ღვთის სამეფოს დაბადებაზე, რომლის მეფეა ამაღლებიდან ოცი საუკუნის განმავლობაში ზეცაში მყოფი იესო ქრისტე (გამოცხადება 12:10).

13. რას ნიშნავს ის, რომ ვაჟი „ატაცებულ იქნა ღმერთთან და მის ტახტთან“?

¹³ იეჰოვა არასოდეს მისცემდა სატანას მისი ცოლისა და ახალშობილი ვაჟის შთანთქმის ნებას. დაბადებისთანავე ვაჟი „ატაცებულ იქნა ღმერთთან და მის ტახტთან“. ამგვარად იეჰოვა იცავს და მზრუნველობას არ აკლებს ამ ახალდაბადებულ სამეფოს, რომლის მეშვეობითაც ის თავის წმინდა სახელს განწმენდს. ქალი მშობიარობის შემდეგ უდაბნოში გაიქცა, სადაც ღმერთს ადგილი ჰქონდა მომზადებული მისთვის. ამას დაწვრილებით მოგვიანებით განვიხილავთ. ახლა დადგა იმ მნიშვნელოვანი მოვლენის დრო, რის შემდეგაც სატანა ვეღარასოდეს შეუქმნის საფრთხეს ზეციერ სამეფოს. რა მოვლენაზეა საუბარი?

ომი ზეცაში!

14. ა) იოანეს სიტყვების თანახმად რომელი მოვლენის შემდეგ ვეღარ უქმნის სატანა საფრთხეს სამეფოს? ბ) მხოლოდ სად შეუძლიათ სატანასა და მის დემონებს მოქმედება?

¹⁴ იოანე მოგვითხრობს: „ატყდა ზეცაში ომი. მიქაელი და მისი ანგელოზები ებრძოდნენ დრაკონს. იბრძოდნენ დრაკონი და მისი ანგელოზები, მაგრამ ვერ სძლია დრაკონმა და აღარც ადგილი აღმოჩნდა მათთვის ზეცაში. გადმოგდებულ იქნა დიდი დრაკონი, ძველი გველი, რომელსაც ეშმაკი და სატანა ჰქვია და რომელსაც შეცდომაში შეჰყავს მთელი მსოფლიო, გადმოგდებულ იქნა დედამიწაზე და მისი ანგელოზებიც მასთან ერთად იქნენ გადმოყრილნი“ (გამოცხადება 12:7—9). მნიშვნელოვანი მოვლენა გვაახლოებს ღვთის წმინდა საიდუმლოს დასასრულთან: სატანა განდევნილია, გადმოგდებულია ზეციდან და მისი დემონებიც მასთან ერთად არიან გადმოყრილნი დედამიწაზე. სატანას, რომელმაც შეცდომაში შეიყვანა მთელი მსოფლიო და მის ღმერთად იქცია თავი, ახლა მხოლოდ დედამიწაზე შეუძლია მოქმედება, სადაც მისმა ურჩობამ პირველად იჩინა თავი (2 კორინთელები 4:3, 4).

15, 16. ა) ვინ არის მიქაელი და საიდან ვიცით ეს? ბ) რატომაა ზეციდან სატანის გადმოგდება მეფის შესასრულებელი დავალება?

¹⁵ ვინ გაიმარჯვა ამ დიდებულ ბრძოლაში იეჰოვას სახელით? როგორც ბიბლიაშია ნათქვამი, მიქაელმა და მისმა ანგელოზებმა. ვინ არის მიქაელი? სახელი მიქაელი ნიშნავს: „ვინ არის ღვთის მსგავსი?“ ამიტომ მიქაელი არის ის, ვისაც სურს იეჰოვას უზენაესობის დამტკიცება და იმის დადასტურება, რომ ვერავინ შეედრება ღმერთს. იუდას მე-9 მუხლში ის მოხსენიებულია როგორც „მიქაელ მთავარანგელოზი“. აღსანიშნავია, რომ ბიბლიაში მხოლოდ ერთ პიროვნებას, იესო ქრისტეს ეწოდება მთავარანგელოზიb. პავლე მასზე ამბობს: „რადგან უფალი თვითონ ჩამოვა ზეციდან მბრძანებლური მოწოდებით, მთავარანგელოზის ხმითა და ღვთის საყვირით“ (1 თესალონიკელები 4:16). სიტყვა მთავარანგელოზი ანგელოზთა მთავარს ნიშნავს. ამიტომაც გასაკვირი არაა, თუ რატომ არის „გამოცხადებაში“ მოხსენიებული „მიქაელი და მისი ანგელოზები“. ბიბლიის სხვა მუხლებში ნათქვამია, რომ ანგელოზები ღვთის მართალ მსახურს ემორჩილებიან; ამ მსახურში იესო იგულისხმება. პავლეს სიტყვების თანახმად „უფალი იესო ზეციდან თავისი ძლიერი ანგელოზებითურთ გამოგვეცხადება“ (2 თესალონიკელები 1:7; იხილეთ აგრეთვე მათეს 24:30, 31; 25:31).

¹⁶ ამ და სხვა მუხლებს ერთადერთ დასკვნამდე მივყავართ, რომ მიქაელი ზეცაში მყოფი უფალი იესო ქრისტეა. უფლის დღის დროს იესო მეტად აღარ ეტყვის სატანას: „იეჰოვამ შეგრისხოს“. მოვიდა გასამართლების დრო და იესომ, იგივე მიქაელმა, ზეციდან გადმოყარა ბოროტი სატანა და მისი დემონები (იუდა 9; გამოცხადება 1:10). ეს სწორედ მეფის შესასრულებელი დავალებაა. იესო ჯერ კიდევ ედემის ბაღში აღთქმული შთამომავალია, რომელიც საბოლოოდ თავს გაუჭეჭყავს გველს და სამუდამოდ გაანადგურებს მას (დაბადება 3:15). ზეციდან სატანის გადმოგდებით იესომ კიდევ ერთი ნაბიჯი გადადგა, რომ ის საბოლოოდ გაანადგუროს.

გიხაროდეს, ზეცავ!

17, 18. ა) იოანეს სიტყვების თანახმად, ზეცაში რა რეაქცია მოჰყვა სატანის დედამიწაზე გადმოგდებას? ბ) როგორც ჩანს, ვისი ხმა გაიგონა იოანემ?

¹⁷ იოანე აღწერს, ზეცაში რამხელა სიხარული გამოიწვია სატანის გადმოგდებამ: «გავიგონე ციდან დიდი ხმა: „ახლა მოვიდა ხსნა ჩვენი ღვთისგან, მისი ძლიერება და სამეფო და მისი ქრისტეს ძალაუფლება, რადგან გადმოგდებულ იქნა ჩვენი ძმების ბრალმდებელი, რომელიც ბრალს სდებს მათ ჩვენი ღვთის წინაშე დღე და ღამე! სძლიეს მას კრავის სისხლითა და დამოწმების სიტყვით და არ შეიყვარეს საკუთარი სული მაშინაც კი, როცა სიკვდილს პირისპირ უყურებდნენ. ამიტომ გიხაროდეთ, ზეცავ და თქვენ, ვინც მასში მკვიდრობთ!“ » (გამოცხადება 12:10—12ა).

¹⁸ ვისი ხმა ესმის იოანეს? ბიბლია არ გვიმჟღავნებს ამას, თუმცა გამოცხადების 11:17-ის თანახმად ეს ხმა ზეცაში აღდგენილი 24 უხუცესის შეძახილს ჰგავს, რომლებსაც თავიანთი ადგილები უკავიათ და 144 000 წმინდას წარმოადგენენ (გამოცხადება 11:18). ვინაიდან ღვთის ცხებული მსახურები, რომლებიც ჯერ კიდევ დედამიწაზე იმყოფებიან და იდევნებიან, მოხსენიებულნი არიან როგორც „ჩვენი ძმები“, ეს სიტყვები შესაძლოა ისევ 24 უხუცესს ეკუთვნოდეს. რადგან ამ ერთგული მსახურების აღდგომა სატანისა და მისი დემონების ზეციდან გადმოგდების შემდეგ მალევე მოხდა, უეჭველია, ისინი ერთხმად ყიჟინებენ.

19. ა) რის საშუალებას აძლევს იესოს ღვთის წმინდა საიდუმლოს დასრულება? ბ) რაზე მეტყველებს ის, რომ სატანას „ჩვენი ძმების ბრალმდებელი“ ეწოდება?

¹⁹ ღვთის წმინდა საიდუმლოს დასასრულებლად იესომ ძალაუფლება მიიღო იეჰოვას სამეფოში. ამგვარად, ღმერთი შეასრულებს თავის დიდებულ განზრახვას და იხსნის ერთგულ ადამიანებს. იესო იხსნის არა მხოლოდ დედამიწაზე მცხოვრებ ღვთისმოშიშ მსახურებს, არამედ ღვთის მეხსიერებაში მყოფ მილიონობით გარდაცვლილ ადამიანს (ლუკა 21:27, 28). სატანას „ჩვენი ძმების ბრალმდებელი“ ეწოდება. მიუხედავად იმისა, რომ იობმა დაამტკიცა სატანის ბრალდებების უსაფუძვლობა, ის კვლავაც ეჭვქვეშ აყენებს ღვთის მიწიერი მსახურების ერთგულებას. როგორც ჩანს, მან არაერთხელ დასდო ადამიანს ბრალი იმაში, რომ ადამიანი ყველაფერს გაიღებს სიცოცხლის სანაცვლოდ. რა სამარცხვინო მარცხი განიცადა სატანამ! (იობი 1:9—11; 2:4, 5).

20. როგორ სძლევენ ერთგული ქრისტიანები სატანას?

²⁰ ცხებული ქრისტიანები, რომლებიც „კრავის სისხლით“ მართლებად არიან აღიარებულნი, დევნის მიუხედავად კვლავ ამოწმებენ ღვთისა და იესო ქრისტეს შესახებ. ას ოც წელზე მეტია, იოანეს კლასი ყურადღებას ამახვილებს იმ მნიშვნელოვან საკითხებზე, რომლებიც 1914 წელს უცხოტომელთათვის დანიშნული დროების დასასრულს უკავშირდება (ლუკა 21:24). მათ მხარდამხარ ერთგულად მსახურობს უამრავი ხალხი. იეჰოვას მოწმეების თანამედროვე ისტორიამ არაერთხელ დაადასტურა, რომ არც ერთ მათგანს არ ეშინია „მათი, ვინც სხეულს კლავს, სულის მოკვლა კი არ შეუძლია“. ქრისტიანისთვის შესაფერისი სიტყვითა თუ საქმით მათ სძლიეს სატანას და ამტკიცებენ, რომ ის ცრუა (მათე 10:28; იგავები 27:11; გამოცხადება 7:9). როგორ უნდა ხარობდნენ ცხებული ქრისტიანები ზეცაში აღდგომით, სატანა ხომ მეტად აღარ არის იქ და ვეღარ დასდებს ბრალს მათ ძმებს. მოვიდა დრო, რომ ყველა ანგელოზი სიხარულით გამოეხმაუროს მოწოდებას: „გიხაროდეთ, ზეცავ და თქვენ, ვინც მასში მკვიდრობთ!“

კიდევ ერთი „ვაი“

21. როგორ დაატეხა სატანამ ვაი დედამიწას და ზღვას?

²¹ მესამე „ვაით“ გამძვინვარებული სატანა თავადაც ცდილობს ვაი დაატეხოს კაცობრიობას: „ვაი მიწასა და ზღვას, ვინაიდან თქვენთან ჩამოვიდა ეშმაკი, დიდად განრისხებული, რადგან იცის, რომ დრო ცოტაღა დარჩა“ (გამოცხადება 12:12ბ). სატანის ზეციდან გადმოგდება დედამიწისთვის მართლაც ვაის ნიშნავს, რადგან დედამიწას სატანის ძალაუფლებაში მყოფი ეგოისტი ადამიანები სპობენ (მეორე კანონი 32:5). სატანა მოქმედებს პრინციპით „ან იბატონე ან გაანადგურე“, რაც „ვაის“ ნიშნავს სიმბოლური მიწისთვის, ანუ ადამიანთა საზოგადოებისთვის, და აგრეთვე სიმბოლური ზღვისთვის, ანუ მშფოთვარე ბრბოსთვის. ორივე მსოფლიო ომში სატანის რისხვა მის ძალაუფლებაში მყოფი ერების რისხვაში გამოვლინდა. ასეთი დემონური რისხვა დღემდე ვლინდება, მაგრამ მალე ამას ბოლო მოეღება (მარკოზი 13:7, 8). როგორი საშინელიც არ უნდა იყოს ეშმაკის ზრახვები, ვერ შეედრება ღვთის სამეფოს მიერ სატანის ხილული ორგანიზაციისთვის მიყენებულ დარტყმას, მესამე „ვაის“ შედეგს.

22, 23. ა) იოანეს სიტყვების თანახმად, რა ხდება დრაკონის დედამიწაზე გადმოგდების შემდეგ? ბ) როგორ დევნის დრაკონი „ქალს, რომელმაც ვაჟი შვა“?

²² სატანის გადმოგდების შემდეგ მისი რისხვის სამიზნეები დედამიწაზე დარჩენილი ქრისტეს ძმები გახდნენ. იოანე გვამცნობს: „დაინახა დრაკონმა, რომ გადმოგდებულ იქნა დედამიწაზე, და დევნა დაუწყო ქალს, რომელმაც ვაჟი შვა. მიეცა ქალს დიდი არწივის ორი ფრთა უდაბნოში თავის ადგილზე გადასაფრენად, სადაც იკვებებოდა დროის, დროებისა და ნახევარი დროის განმავლობაში, გველისგან მოშორებით“ (გამოცხადება 12:13, 14).

²³ ხილვაში გრძელდება მე-6 მუხლში დაწყებული აზრი — ბავშვის დაბადების შემდეგ დრაკონისგან დევნილი ქალი უდაბნოში გარბის. შეიძლება გვაინტერესებს, როგორ დევნის დედამიწაზე გადმოგდებული დრაკონი ზეცაში ქალს. ალბათ გვახსოვს, რომ ქალს დედამიწაზე შვილები ანუ შთამომავლობა ჰყავს. მოგვიანებით ამ ხილვაში ჩანს, რომ სატანა თავის რისხვას ანთხევს ქალზე და დევნის მის შთამომავლობას (გამოცხადება 12:17). შეიძლება ითქვას, რომ იმას, რასაც ქალის შთამომავლობა განიცდის დედამიწაზე, სინამდვილეში ქალიც განიცდის (შეადარეთ მათეს 25:40). დედამიწაზე იდევნებიან ქალის შთამომავლობის მხარდამჭერებიც, რომელთა რიცხვიც სულ უფრო და უფრო იზრდება.

ახალი ერი

24. რა გადახდათ ბიბლიის მკვლევარებს, რაც ისრაელების ეგვიპტიდან გამოყვანას ჰგავდა?

²⁴ პირველი მსოფლიო ომის დროს იესოს ძმები თავს არ ზოგავდნენ დამოწმების საქმის ერთგულად შესასრულებლად. სატანისა და მისი გაშმაგებული მხარდამჭერებისგან გაძლიერებული დევნის მიუხედავად, ისინი მაინც განაგრძობდნენ მსახურებას, თუმცა საბოლოოდ, ბიბლიის მკვლევართა დამოწმების საქმიანობა ფაქტობრივად შეჩერდა (გამოცხადება 11:7—10). მათი მაშინდელი მდგომარეობა ეგვიპტეში დაჩაგრული ისრაელების მდგომარეობას ჰგავდა. მაშინ იეჰოვამ სწრაფად, თითქოსდა არწივის ფრთებით, უსაფრთხო ადგილზე, სინას უდაბნოში მიიყვანა ისინი (გამოსვლა 19:1—4). ამის მსგავსად 1918—1919 წლებში სასტიკი დევნის შემდეგ იეჰოვამ თავისი მოწმეები, ქალის წარმომადგენლები, სულიერი გაგებით ისეთ უსაფრთხო ადგილზე მიიყვანა, როგორიც უდაბნო იყო ისრაელებისთვის. ეს მათი ლოცვების პასუხი იყო (შეადარეთ ფსალმუნის 55:6—9).

25. ა) რა გააკეთა იეჰოვამ 1919 წელს, რაც უდაბნოში ისრაელის ერად ჩამოყალიბებას მოგვაგონებს? ბ) ვისგან შედგება ეს ერი და სად შევიდნენ ისინი?

²⁵ უდაბნოში იეჰოვამ ისრაელი ერად ჩამოაყალიბა, სულიერად და ფიზიკურად ზრუნავდა მათზე. მსგავსად, 1919 წლიდან იეჰოვამ სულიერ ერად ჩამოაყალიბა ქალის შთამომავლობა. ეს სულიერი ერი არ უნდა აგვერიოს მესიის სამეფოში, რომელიც ზეცაში 1914 წლიდან მმართველობს. ეს ახალი სულიერი ერი შედგება დედამიწაზე დარჩენილი ცხებული მოწმეებისგან, რომლებიც 1919 წელს დიდებულ სულიერ სამფლობელოში შევიდნენ. ახლა მათ დროულად ჰქონდათ „თავიანთი ულუფა“, რამაც განამტკიცა ისინი სამომავლო საქმის შესასრულებლად (ლუკა 12:42; ესაია 66:8).

26. ა) რამდენ ხანს გასტანა გამოცხადების 12:6, 14-ში მოხსენიებულმა პერიოდმა? ბ) რა მიზანს ემსახურებოდა სამ-ნახევარი დრო, როდის დაიწყო და როდის დამთავრდა?

²⁶ რამდენ ხანს გაგრძელდა ეს შესვენება ღვთის ზეციერი ქალის შთამომავლობისთვის? გამოცხადების 12:6-ის თანახმად 1 260 დღე. გამოცხადების 12:14-ში ეს დრო მოხსენიებულია, როგორც დრო, დროები და ნახევარი დრო, ანუ სამ-ნახევარი დრო. ორივე შემთხვევაში იგულისხმება სამ-ნახევარი წელიწადი, რომელიც ჩრდილოეთ ნახევარსფეროში 1919 წლის გაზაფხულიდან 1922 წლის შემოდგომამდე გაგრძელდა. სულიერად აღდგენილი იოანეს კლასისთვის ეს გამოცოცხლებისა და ორგანიზაციული ცვლილებების დრო იყო.

27. ა) იოანეს სიტყვების თანახმად, რა გააკეთა დრაკონმა 1922 წლის შემდეგ? ბ) რა მიზნით ააგორა სატანამ დევნის ტალღა მოწმეების წინააღმდეგ?

²⁷ დრაკონს ფარ-ხმალი არ დაუყრია. „გველმა ქალის კვალდაკვალ პირიდან ამოანთხია წყალი, მდინარის მსგავსი, რათა მდინარეს დაეხრჩო იგი“ (გამოცხადება 12:15). რა იგულისხმება მდინარის მსგავს წყალში? მეფე დავითი თავის მოწინააღმდეგე ბოროტ ხალხს „უვარგისი ხალხის მოზღვავებას“ [„ნაკადებს უკუღმართებს“, „ბიბლიური საზოგადოების გამოცემა“, ფსალმუნის 17:5] უწოდებდა (ფსალმუნი 18:4, 5, 16, 17). სატანამ ახლაც „უვარგისი ხალხის“ მეშვეობით დაიწყო ღვთის ხალხის დევნა. 1922 წლის შემდეგ სატანამ დევნის ტალღა ააგორა მოწმეების წინააღმდეგ (მათე 24:9—13). ამაში შედიოდა ფიზიკური შეურაცხყოფა, ‘სირთულეების შექმნა დადგენილებით’, პატიმრობა, ჩამოხრჩობა, დახვრეტა და თავის მოკვეთაც კი (ფსალმუნი 94:20). ვინაიდან დამცირებული სატანა ღვთის ზეციერ ქალს ვეღარაფერს ავნებდა, გამძვინვარებულმა დედამიწაზე მცხოვრები მისი შთამომავლობის წინააღმდეგ გაილაშქრა. სატანის მიზანი ან მათი ფიზიკური განადგურება იყო ან მათი ერთგულების შერყევა, რაც მათ ღვთის კეთილგანწყობას დააკარგვინებდა. მაგრამ მათ ისეთივე სულისკვეთება ჰქონდათ, როგორიც იობს: „სანამ ცოცხალი ვარ, არ დავთმობ უმწიკვლობას!“ (იობი 27:5).

28. როგორ გაძლიერდა დევნა მეორე მსოფლიო ომის დროს?

²⁸ სასტიკმა დევნამ კულმინაციას მეორე მსოფლიო ომის დროს მიაღწია. ევროპაში თორმეტი ათასამდე მოწმე ნაცისტურ საკონცენტრაციო ბანაკებში გაგზავნეს, სადაც დაახლოებით 2 000 მათგანი მოკვდა. იტალიაში, იაპონიაში, კორეასა და ტაივანში ერთგული მოწმეები მსგავს სისასტიკეს იტანდნენ სამხედრო დიქტატორული რეჟიმის დროს. ეგრეთ წოდებულ დემოკრატიულ ქვეყნებშიც მოწმეებს თავს ესხმოდნენ „კათოლიკური მოქმედების“ სხვადასხვა ჯგუფები, რომლებიც მათ კუპრს ასხამდნენ, ბუმბულებს აყრიდნენ და ქალაქიდან აძევებდნენ. ქრისტიანთა კონგრესებს შლიდნენ და მოწმეების ბავშვებს სკოლიდან რიცხავდნენ.

29. ა) როგორ აღწერს იოანე უჩვეულო სახით მიღებულ შვებას? ბ) როგორ დაეხმარა მიწა ქალს? გ) რას აკეთებს დრაკონი კვლავაც?

²⁹ შვება უჩვეულო სახით მოვიდა: „მაგრამ ქალს მიწა დაეხმარა, დააღო პირი მიწამ და შთანთქა მდინარე, რომელიც დრაკონმა ამოანთხია პირიდან. განრისხდა დრაკონი ქალზე და წავიდა, რათა შებრძოლებოდა დანარჩენებს მისი შთამომავლებიდან, ვინც იცავს ღვთის მცნებებს და ვისაც იესოს შესახებ დამოწმების საქმე აკისრია“ (გამოცხადება 12:16, 17). „მიწამ“ ანუ სატანის ქვეყნიერების გარკვეულმა ნაწილმა დაიწყო „მდინარის“ შთანთქმა. XX საუკუნის 40-იან წლებში შეერთებული შტატების უზენაესმა სასამართლომ მოწმეების სასარგებლოდ არაერთი გადაწყვეტილება მიიღო. მოწმეების სასარგებლოდ მიიღო გადაწყვეტილებები ზოგიერთი სხვა სახელმწიფოს ხელისუფლებებმაც, რომლებიც მხარს უჭერდნენ რელიგიის თავისუფლებას. საბოლოოდ მოკავშირე ერებმა „შთანთქეს“ დამანგრეველი ნაცისტური და ფაშისტური ძალა, რამაც შვება მოუტანა დიქტატორული რეჟიმით დატანჯულ მოწმეებს, თუმცა დევნა ერთხელ და სამუდამოდ არ შეწყვეტილა. დრაკონი დღემდე მძვინვარებს და ებრძვის მათ, „ვისაც იესოს შესახებ დამოწმების საქმე აკისრია“. ბევრ ქვეყანაში ერთგული მოწმეები კვლავ ციხეებში სხედან, ერთგულების შენარჩუნება ზოგს დღესაც სიცოცხლის ფასად უჯდება. მაგრამ დროდადრო ზოგიერთი მთავრობა დათმობაზე მიდის და მოწმეებს უფრო მეტი თავისუფლება ეძლევათc. ამგვარად სრულდება წინასწარმეტყველება და მიწა კვლავ შთანთქავს დევნის მდინარეს.

30. ა) რა გახდა შესაძლებელი „მიწის“ მიერ მოტანილი შვების წყალობით? ბ) რა არის ღვთის ხალხის ერთგულების შედეგი?

³⁰ ამგვარად, „მიწამ“ შვება მოუტანა ღვთის ხალხს, რისი წყალობითაც ღვთის საქმე დაახლოებით 235 ქვეყანაში ხორციელდება. ამის შედეგად სასიხარულო ცნობის ერთგულ მქადაგებელთა რიცხვმა ექვს მილიონს გადააჭარბა. ქალის დედამიწაზე დარჩენილ შთამომავლობასთან ერთად ყველა ერის წარმომადგენლებისგან შემდგარი უამრავი ხალხი ღვთის მითითებებისამებრ გამოყოფილია ქვეყნიერებისგან, იცავს ზნეობრივ სიწმინდეს, უყვარს საძმო და ქადაგებს მესიის სამეფოს შესახებ. მათი ერთგულება პასუხს სცემს სატანის წამოჭრილ სამარცხვინო ბრალდებას, რაც სატანისა და მისი ქვეყნიერებისთვის სასიკვდილო განაჩენის გამოტანის ტოლფასია (იგავები 27:11).

1, 2. ა) რას გვეუბნება იოანე დრაკონზე? ბ) როგორ აღწერს იოანე დრაკონის ხილულ ორგანიზაციას სიმბოლური ენით?

დიდი დრაკონი გადმოგდებულია დედამიწაზე. „გამოცხადებიდან“ ვიგებთ, რომ გველი, სატანა, და მისი დემონები ვეღარასოდეს დაბრუნდებიან ზეცაში, თუმცა ჯერ ამით არ დაგვისრულებია საუბარი იმის შესახებ, ვისაც „ეშმაკი და სატანა ჰქვია და რომელსაც შეცდომაში შეჰყავს მთელი მსოფლიო“. მომდევნო ხილვიდან უფრო დაწვრილებით გავიგებთ, რა ხრიკებს იყენებს სატანა ქალსა და მის შთამომავლობასთან საბრძოლველად (გამოცხადება 12:9, 17). იოანე ამ ცბიერ დრაკონზე ამბობს: „ის ზღვის ქვიშაზე დადგა“ (გამოცხადება 13:1ა). მოდი, ახლა დრაკონის მეთოდები განვიხილოთ.

² ზეცა მეტად აღარ არის შებღალული სატანისა და მისი დემონებისგან. ეს ბოროტი სულები განიდევნენ ზეციდან და ახლა მხოლოდ დედამიწაზე შეუძლიათ მოქმედება. ამით აიხსნება, თუ რატომაა ჩვენს დროში სპირიტიზმი ასე ფართოდ გავრცელებული. ეს ცბიერი გველი დღემდე იყენებს ბოროტი სულებისგან შემდგარ უხილავ ორგანიზაციას. მაგრამ იყენებს თუ არა ის ხილულ ორგანიზაციასაც ადამიანების შეცდომაში შესაყვანად? იოანე გვეუბნება: „ვიხილე ზღვიდან ამომავალი ათრქიანი და შვიდთავიანი მხეცი, რომელსაც რქებზე ათი გვირგვინი და თავებზე ღვთისმგმობელი სახელები ჰქონდა. მხეცი, რომელიც ვიხილე, ჯიქს ჰგავდა, მაგრამ ფეხები დათვის ფეხებს მიუგავდა, პირი კი — ლომის ხახას. დრაკონმა მხეცს მისცა თავისი ძალა, თავისი ტახტი და დიდი ძალაუფლება“ (გამოცხადება 13:1ბ, 2).

3. ა) რომელი მძვინვარე მხეცები იხილა წინასწარმეტყველმა დანიელმა ხილვებში? ბ) რას განასახიერებდნენ დანიელის მე-7 თავში აღწერილი უზარმაზარი მხეცები?

³ რას განასახიერებს ეს უცნაური მხეცი? თავად ბიბლია გვცემს პასუხს ამ კითხვაზე. ძვ. წ. 537 წელს ბაბილონის დაცემამდე, ებრაელმა წინასწარმეტყველმა დანიელმა ხილვებში მძვინვარე მხეცები იხილა. დანიელის 7:2—8-ში ის აღწერს ზღვიდან ამომავალ ოთხ მხეცს: პირველი ლომს ჰგავს, მეორე დათვს, მესამე ჯიქს და „აი, მეოთხე მხეცი, საშინელი, საზარელი და მეტისმეტად ძლიერი. . . მას ათი რქა ჰქონდა“. ეს მხეცი ძალიან ჰგავს იმ მხეცს, რომელიც იოანემ დაახლოებით ახ. წ. 96 წელს იხილა. ის ლომს, დათვსა და ჯიქს მოგვაგონებს. მას ათი რქა აქვს. რას განასახიერებდნენ დანიელის მიერ ნანახი ეს უზარმაზარი მხეცები? დანიელი გვეუბნება: „ეს ოთხი უზარმაზარი მხეცი ოთხი მეფეა, რომლებიც დედამიწიდან წამოდგებიან“ (დანიელი 7:17). ეს მხეცები მეფეებს ანუ დედამიწის პოლიტიკურ ძალებს განასახიერებენ.

4. ა) რას განასახიერებდნენ დანიელის მე-8 თავში აღწერილი ვერძი და ვაცი? ბ) რას ნიშნავდა ვაცის დიდი რქის მოტეხვა და მის ნაცვლად ოთხი რქის ამოსვლა?

⁴ სხვა ხილვაში დანიელმა იხილა ორრქიანი ვერძი, რომელიც მიწაზე დაანარცხა ერთრქიანმა ვაცმა. ანგელოზმა გაბრიელმა დანიელს აუხსნა ხილვის მნიშვნელობა: „ვერძი. . . მიდიისა და სპარსეთის მეფეები არიან. ბალნიანი ვაცი საბერძნეთის მეფეა“. გაბრიელი იმასაც წინასწარმეტყველებს, რომ ვაცს დიდი რქა მოსტყდება და მის ნაცვლად ოთხი რქა ამოუვა. ეს ორას წელზე მეტი ხნის შემდეგ შესრულდა, როცა ალექსანდრე მაკედონელი მოკვდა და მისმა ოთხმა მხედართმთავარმა ოთხად გაინაწილა მისი სამეფო (დანიელი 8:3—8, 20—25)a.

5. ა) რა იგულისხმება მხეცად ნათარგმნ ბერძნულ სიტყვაში? ბ) რა არის წარმოდგენილი გამოცხადების 13:1, 2-ში მოხსენიებული მხეცითა და მისი შვიდი თავით?

⁵ აშკარაა, რომ ბიბლიის ავტორი დედამიწაზე არსებულ პოლიტიკურ ძალებს მხეცებად მიიჩნევს. როგორები არიან ეს მხეცები? ერთი კომენტატორი გამოცხადების 13:1, 2-ში მოხსენიებულ მხეცს „დაუნდობელს“ უწოდებს და ამბობს: „ჩვენ ვეთანხმებით, რომ სიტყვა თერიონ [ბერძ. θηρίον, ნიშნავს მხეცს] გულისხმობს სასტიკს, გამანადგურებელს, შემზარავს, გაუმაძღარს და ა.შ. მხეცს“b. მართლაც რომ კარგად აღწერს სისხლიან პოლიტიკურ სისტემას, რომლითაც სატანა კაცობრიობას მართავს. ამ მხეცის შვიდი თავით წარმოდგენილია ეგვიპტე, ასურეთი, ბაბილონი, მიდია-სპარსეთი, საბერძნეთი და რომი — ექვსი ძირითადი მსოფლიო მპყრობელი, რომლებიც ბიბლიურ დროში იოანეს დრომდე არსებობდნენ; წინასწარმეტყველების თანახმად მეშვიდე მსოფლიო მპყრობელი მოგვიანებით უნდა გამოჩენილიყო (შეადარეთ გამოცხადების 17:9, 10).

6. ა) რა არის წარმოდგენილი მხეცის შვიდი თავით? ბ) როგორ აღძრა იეჰოვამ რომი იუდეველთა სისტემაზე თავისი განაჩენის აღსასრულებლად, და როგორ მოიქცნენ იერუსალიმში მცხოვრები ქრისტიანები?

⁶ რა თქმა უნდა, ისტორიის განმავლობაში ამ შვიდის გარდა სხვა მსოფლიო მპყრობელებიც არსებობდნენ. ამაზე მეტყველებს ისიც, რომ იოანეს მიერ ნანახ მხეცს შვიდი თავისა და ათი რქის გარდა ტანიც ჰქონდა. ამ შვიდი თავით ღვთის ხალხის მჩაგვრელი შვიდი მსოფლიო მპყრობელია წარმოდგენილი. ახ. წ. 33 წელს, რომის იმპერიის მმართველობის დროს, სატანამ მხეცის ერთ-ერთი თავი ღვთის ძის მოსაკლავად აღძრა. მაშინ ღმერთმა უარყო ორგულ იუდეველთა რელიგია და მოგვიანებით, ახ. წ. 70 წელს, რომაელებს იუდეველებზე თავისი განაჩენის აღსრულების ნება დართო. საბედნიეროდ, ცხებულ ქრისტიანთა კრება, ღვთის ისრაელი, გაფრთხილებული იყო, და ამიტომ იერუსალიმსა და იუდეაში მყოფმა ქრისტიანებმა იორდანის გაღმა გადასვლით უშველეს თავს (მათე 24:15, 16; გალატელები 6:16).

7. ა) რა უნდა მომხდარიყო ქვეყნიერების აღსასრულის მოახლოებისას და უფლის დღის დაწყებისას? ბ) ვინ აღმოჩნდა გამოცხადების 13:1, 2-ში მოხსენიებული მხეცის მეშვიდე თავი?

⁷ ახ. წ. I საუკუნის მიწურულს პირველი კრების მრავალი წევრი განუდგა ჭეშმარიტებას. ჭეშმარიტ ქრისტიანთა „ხორბალი“ ანუ „სამეფოს ძეები“ „სარეველამ“ ანუ „ბოროტის ძეებმა“ თითქმის მოაშთო. ამ ქვეყნიერების აღსასრულის მოახლოებისას კვლავ გამოჩნდა ცხებულ ქრისტიანთა ორგანიზებული ჯგუფი. უფლის დღის განმავლობაში მართლები ‘მზესავით გაანათებდნენ’. ქრისტიანული კრება მზად იყო ღვთის საქმის შესასრულებლად (მათე 13:24—30, 36—43). იმ დროს უკვე აღარ არსებობდა რომის იმპერია. ბრიტანეთის უზარმაზარი იმპერია ამერიკის შეერთებული შტატების ძლიერ სახელმწიფოსთან ერთად მთავარ როლებს ასრულებდნენ მსოფლიო სცენაზე. სწორედ ეს გაერთიანებული მსოფლიო მპყრობელი იყო მხეცის მეშვიდე თავი.

8. რატომ არ არის შეურაცხმყოფელი ინგლის-ამერიკის გაერთიანებული მსოფლიო მპყრობლის შედარება მხეცთან?

⁸ განა შეურაცხმყოფელი არ არის წამყვანი პოლიტიკური ძალების მხეცად მოხსენიება? ამას ამბობდნენ მოწინააღმდეგეები მეორე მსოფლიო ომის დროს, როცა სხვადასხვა ქვეყნის სასამართლოებში კამათი მიდიოდა იეჰოვას მოწმეების, როგორც ორგანიზაციის, ისე ცალკეული პირების, სტატუსის შესახებ. მაგრამ დაფიქრდით, განა თავად ერები არ ირჩევენ სახელმწიფო სიმბოლოებად მხეცებს? მაგალითად, ბრიტანეთის სიმბოლო ლომია, შეერთებული შტატების — არწივი, ჩინეთის კი — დრაკონი. მაშ, რატომ უნდა აღაშფოთოს ვინმე იმან, რომ ღმერთი, წმინდა ბიბლიის ავტორი, მსოფლიო მპყრობელების სიმბოლოდ მხეცებს იყენებს?

9. ა) რატომ უნდა დავეთანხმოთ ბიბლიას, რომ სატანა აძლევს მხეცს დიდ ძალაუფლებას? ბ) როგორ არის სატანა აღწერილი ბიბლიაში, და რა გავლენას ახდენს ის მთავრობებზე?

⁹ რატომ უნდა დავეთანხმოთ ბიბლიაში ნათქვამს, რომ ამ მხეცს სატანა აძლევს დიდ ძალაუფლებას? ამას თავად ღმერთი ამბობს, რომლის წინაშეც „ხალხები სათლიდან გადმოვარდნილ წყლის ერთ წვეთს ჰგვანან და. . . მტვერივით არიან“. ამ ერებისთვის უმჯობესი იქნებოდა ღვთის წყალობის მისაღებად ეღვაწათ, იმის ნაცვლად, რომ განაწყენებულიყვნენ ღვთის წინასწარმეტყველურ სიტყვაში ამგვარი აღწერის გამო (ესაია 40:15, 17; ფსალმუნი 2:10—12). სატანა არ არის მითიური არსება, რომელიც სულებს ცეცხლოვან ჯოჯოხეთში აწამებს; ასეთი ადგილი არც კი არსებობს. წმინდა წერილებში სატანა აღწერილია როგორც „სინათლის ანგელოზი“, დახელოვნებული მატყუარა, რომელიც დიდ ზეგავლენას ახდენს მსოფლიო პოლიტიკაზე (2 კორინთელები 11:3, 14, 15; ეფესოელები 6:11—18).

10. ა) რაზე მეტყველებს ის, რომ მხეცს ათივე რქაზე აქვს გვირგვინები? ბ) რას წარმოადგენს ათი რქა და ათი გვირგვინი?

¹⁰ შვიდთავიან მხეცს ათი რქა აქვს, შესაძლოა, ოთხ თავზე თითო-თითო და სამ თავზე ორ-ორი, რქებზე კი — ათი გვირგვინი. დანიელის წიგნში აღწერილი შიშის მომგვრელი მხეცების რქების რაოდენობა პირდაპირი მნიშვნელობით უნდა გავიგოთ. მაგალითად, ვერძის ორი რქა წარმოადგენდა მიდიისა და სპარსეთის გაერთიანებულ მსოფლიო მპყრობელს, ხოლო ვაცის ოთხი რქა წარმოადგენდა ერთსა და იმავე დროს არსებულ ოთხ იმპერიას, რომლებიც საბერძნეთის, ალექსანდრე მაკედონელის იმპერიისგან წარმოიქმნენ (დანიელი 8:3, 8, 20—22). მაგრამ იოანეს ნანახი მხეცის რქების რიცხვი, როგორც ჩანს, სიმბოლურია (შეადარეთ დანიელის 7:24; გამოცხადების 17:12). ეს რქები წარმოადგენს ყველა დამოუკიდებელ სახელმწიფოს, რომლებიც სატანის პოლიტიკურ ორგანიზაციას შეადგენენ. ყველა რქა მოძალადე და აგრესიულია, მაგრამ ყოველი თავი მხეცის შვიდი თავიდან იმაზე მიუთითებს, რომ დროის ცალკეულ მონაკვეთში მხოლოდ ერთ მსოფლიო მპყრობელს უპყრია ხელთ ძალაუფლება. ათი გვირგვინი კი იმის მაჩვენებელია, რომ დროის ცალკეულ მონაკვეთში გაბატონებულ მსოფლიო მპყრობელთან ერთად ნებისმიერი დამოუკიდებელი სახელმწიფოც ფლობს გარკვეულ ძალაუფლებას.

11. რაზე მიუთითებს ის, რომ მხეცს „თავებზე ღვთისმგმობელი სახელები“ აქვს?

¹¹ მხეცს „თავებზე ღვთისმგმობელი სახელები ჰქონდა“. მხეცი ისეთ რამეს მიაწერს საკუთარ თავს, რაც დიდად შეურაცხყოფს იეჰოვა ღმერთსა და იესო ქრისტეს. ის ღვთისა და ქრისტეს სახელებს არის ამოფარებული თავისი პოლიტიკური მიზნების განსახორციელებლად; ის თითქოს თანამშრომლობს ცრუ რელიგიასთან და სამღვდელოებას პოლიტიკაში მონაწილეობის უფლებასაც კი აძლევს. ინგლისის ლორდთა პალატაში ეპისკოპოსებიც შედიან. კათოლიკე კარდინალებმა მნიშვნელოვანი როლი შეასრულეს საფრანგეთისა და იტალიის პოლიტიკურ ცხოვრებაში, არცთუ ისე დიდი ხნის წინათ კი მღვდლები ლათინურ ამერიკაში სახელმწიფოს მართვაში ჩაებნენ. მთავრობები თავიანთ ბანკნოტებზე ისეთ რელიგიურ ლოზუნგებს წერენ, როგორიცაა „ღმერთზე ვართ მინდობილნი“, ხოლო მონეტებზე ისეთ წარწერებს აკეთებენ, თითქოს მმართველები ღვთის მოწონებით სარგებლობდნენ. მაგალითად, ზოგიერთი წარწერის თანახმად ისინი „ღვთის წყალობით“ არიან დანიშნულნი. ეს კი ღვთის გმობაა, რადგან ამგვარად ღმერთს ბინძურ, ნაციონალისტურ პოლიტიკაში რევენ.

12. ა) რას ნიშნავს ის, რომ მხეცი „ზღვიდან“ ამოდის, და როდის დაიწყო მან ამოსვლა? ბ) რაზე მეტყველებს დრაკონის მიერ სიმბოლური მხეცისთვის დიდი ძალაუფლების მიცემა?

¹² მხეცი ამოდის „ზღვიდან“, რომელიც სათანადოდ განასახიერებს ხალხთა მღელვარე მასას, საიდანაც მთავრობები იღებენ დასაბამს (ესაია 17:12, 13). თავდაპირველად ეს მხეცი ხალხთა მღელვარე „ზღვიდან“ ნიმროდის დროს (დაახლოებით ძვ. წ. XXI საუკუნეში) ამოვიდა, როცა წარღვნის შემდეგ, პირველად, იეჰოვას მოწინააღმდეგე ქვეყნიერება გამოჩნდა (დაბადება 10:8—12; 11:1—9). მაგრამ ბოლო, მეშვიდე თავი აშკარად მხოლოდ უფლის დღის განმავლობაში გამოჩნდა. აღსანიშნავია, რომ დრაკონმა „მხეცს მისცა თავისი ძალა, თავისი ტახტი და დიდი ძალაუფლება“ (შეადარეთ ლუკას 4:6). მხეცი სატანის პოლიტიკური სისტემაა. სატანა ნამდვილად „ქვეყნიერების მმართველია“ (იოანე 12:31).

სასიკვდილო ჭრილობა

13. ა) რა უბედურება დაატყდა თავს მხეცს უფლის დღის დასაწყისში? ბ) რატომ დაუზიანა მხეცს მთელი სხეული მხოლოდ ერთ თავზე მიყენებულმა ჭრილობამ?

¹³ უფლის დღის დასაწყისში მხეცს უბედურება ეწია. იოანე ამბობს: „ვიხილე, რომ ერთ თავს სასიკვდილო ჭრილობა ჰქონდა, მაგრამ სასიკვდილო ჭრილობა შეუხორცდა და მთელი დედამიწა აღტაცებული გაჰყვა მხეცს“ (გამოცხადება 13:3). ამ მუხლში ნათქვამია, რომ მხეცის ერთ თავს მიაყენეს სასიკვდილო ჭრილობა, თუმცა მე-12 მუხლის თანახმად ჭრილობამ თითქოს მხეცის მთელ სხეულს მიაყენა ზიანი. როგორ? მხეცის ყველა თავი ერთდროულად არ მმართველობს. თითოეული მათგანი დროის გარკვეულ პერიოდში ბატონობდა კაცობრიობაზე, განსაკუთრებით კი ღვთის ხალხზე (გამოცხადება 17:10). ამიტომ უფლის დღის დასაწყისში მხოლოდ ერთი, მეშვიდე თავი მოქმედებს, როგორც მთავარი მსოფლიო მპყრობელი, მაგრამ თავში მიყენებული სასიკვდილო ჭრილობა მხეცის მთელ სხეულს აზიანებს.

14. როდის მიაყენეს სასიკვდილო ჭრილობა სატანის მხეცს და როგორ აღწერა ერთმა ოფიცერმა ამის შედეგი?

¹⁴ რა იყო ეს სასიკვდილო ჭრილობა? მოგვიანებით მას მახვილით მიყენებული ჭრილობა ეწოდა; მახვილი ომის სიმბოლოა. უფლის დღის დასაწყისში მახვილით მიყენებული ჭრილობა პირველ მსოფლიო ომს უნდა უკავშირდებოდეს, რომელმაც გააუბედურა და ძალა გამოაცალა სატანის პოლიტიკურ მხეცს (გამოცხადება 6:4, 8; 13:14). მწერალმა მორის ჟენევუამ, რომელიც ამ ომის დროს ოფიცერი იყო, აღნიშნა: „ყველა დაეთანხმება იმ აზრს, რომ კაცობრიობის ისტორიაში მხოლოდ რამდენიმე დღე თუ იყო ისეთი მნიშვნელოვანი, როგორიც 1914 წლის 2 აგვისტო. ჯერ ევროპა და მალე თითქმის მთელი მსოფლიო საშინელ ვითარებაში აღმოჩნდა. ხელშეკრულებები, შეთანხმებები, ზნეობრივი პრინციპები — ყველაფერი დაირღვა; დღითი დღე ყველაფერი ეჭვქვეშ დგებოდა. ეს იმაზე უარესი აღმოჩნდა, ვიდრე ის, რასაც წინათგრძნობა კარნახობდათ და რასაც რეალურად მოელოდნენ. ამ მასშტაბური, ქაოსური და შემზარავი ომის შედეგებს დღემდე ვიმკით“ (საფრანგეთის აკადემიის წევრის მორის ჟენევუას სიტყვები ციტირებულია წიგნიდან „Promise of Greatness“, 1968 წ.).

15. როგორ მიაყენეს სასიკვდილო ჭრილობა მხეცის მეშვიდე თავს?

¹⁵ გაბატონებული მეშვიდე თავისთვის ეს ომი დიდი უბედურება იყო. ბრიტანეთმა ევროპის სხვა ქვეყნებთან ერთად უამრავი მებრძოლი ახალგაზრდა დაკარგა. მხოლოდ ერთ ბრძოლაში, 1916 წელს, მდინარე სომასთან 420 000 ბრიტანელი, 194 000 ფრანგი და 440 000 გერმანელი, სულ მილიონზე მეტი ჯარისკაცი დაიღუპა და დაიჭრა. როგორც ბრიტანეთის, ისე ევროპის სხვა ქვეყნების ეკონომიკამ დიდი ზარალი განიცადა. დარტყმის შედეგად ბრიტანეთის უზარმაზარი იმპერია შეირყა და სრულფასოვნად ვეღარ შეძლო ძალების აღდგენა. ამ ომმა, რომელშიც 28 წამყვანი სახელმწიფო მონაწილეობდა, ისე შეატორტმანა მსოფლიო, თითქოს სასიკვდილოდ დაჭრაო. 1979 წლის 4 აგვისტოს, პირველი მსოფლიო ომის დაწყებიდან 65 წლის შემდეგ, ლონდონში გამომავალ ჟურნალ „ეკონომისტში“ ნათქვამი იყო: „1914 წელს მსოფლიომ დაკარგა ერთიანობა, რომლის აღდგენაც დღემდე ვერ მოხერხდა“.

16. პირველი მსოფლიო ომის დროს როგორ დაამტკიცა შეერთებულმა შტატებმა, რომ ორი სახელმწიფოსგან შემდგარი მსოფლიო მპყრობლის ერთი მხარე იყო?

¹⁶ იმავე დროს, ამ დიდმა ომმა, როგორც მას მაშინ ეწოდებოდა, შეერთებულ შტატებს, ინგლის-ამერიკის მსოფლიო მპყრობლის ერთ-ერთ მხარეს, ასპარეზზე გამოსვლის საშუალება მისცა. ომის პირველ წლებში საზოგადოებრივი აზრი აკავებდა შეერთებულ შტატებს კონფლიქტში მონაწილეობისგან. ისტორიკოსი ესმე უინგფილდ-სტრატფორდი წერდა: „ამ უდიდესი კრიზისის დროს ყველაფერი დამოკიდებული იყო იმაზე, მოაგვარებდნენ თუ არა ბრიტანეთი და შეერთებული შტატები უთანხმოებებს და ისარგებლებდნენ თუ არა ერთიანობის უძლეველი ძალითა და ურთიერთნდობით“. მოვლენების განვითარებამ ცხადყო, რომ ისინი ასეც მოიქცნენ. 1917 წელს შეერთებული შტატები თავისი რესურსებითა და სამხედრო ძალით მხარს უჭერდა ანტანტის მოსუსტებულ წევრებს საბრძოლო მოქმედებებში. ამგვარად მეშვიდე თავი — ბრიტანეთი და შეერთებული შტატები, გამარჯვებული გამოვიდა.

17. რა პროგრესი განიცადა სატანის ქვეყნიერებამ ომის შემდეგ?

¹⁷ ომმა მსოფლიო ძლიერ შეცვალა. მიუხედავად იმისა, რომ სატანის ქვეყნიერება სასიკვდილოდ იყო დაჭრილი, გამოცოცხლდა და ისე გაძლიერდა, როგორც არასდროს. თვითაღდგენის ასეთი უნარით მან ხალხის აღტაცება გამოიწვია.

18. რატომ შეიძლება ითქვას, რომ მთელი ქვეყანა „აღტაცებული გაჰყვა მხეცს“?

¹⁸ ისტორიკოსი ჩარლზ მიი უმცროსი წერს: „ძველი წყობის ნგრევა [რაც პირველმა მსოფლიო ომმა გამოიწვია] აუცილებელი იყო იმისათვის, რომ თვითმმართველობას, ახალი ქვეყნებისა და კლასების გათავისუფლებას, თავისუფლებას და დამოუკიდებლობას ფართო მასშტაბებისთვის მიეღწია“. ომის შემდგომი ეპოქის განვითარებაში წამყვანი როლი შეასრულა მხეცის მეშვიდე თავმა, რომელიც განიკურნა. ამჯერად ამერიკის შეერთებულმა შტატებმა წინა პლანზე გადმოინაცვლა. გაერთიანებული მსოფლიო მპყრობელი პირველი იყო, ვინც მხარს უჭერდა როგორც ერთა ლიგას, ისე გაერთიანებული ერების ორგანიზაციას. 2005 წლისთვის შეერთებული შტატები განვითარებულ ქვეყნებს შორის წამყვანი ქვეყანა იყო ცხოვრების მაღალი დონის, დაავადებებთან ბრძოლისა და ტექნიკური პროგრესის თვალსაზრისით. მთვარეზეც კი ავიდა 12 ამერიკელი კოსმონავტი. ამიტომაც არაა გასაკვირი, რომ მთელი ქვეყანა „აღტაცებული გაჰყვა მხეცს“.

19. ა) მხეცით აღტაცების გარდა კიდევ რას აკეთებს კაცობრიობა? ბ) ვის ძალაუფლებაშია ყველა სამეფო და საიდან ვიცით ეს? გ) როგორ აძლევს სატანა ძალაუფლებას მხეცს და რა გავლენას ახდენს ეს ხალხთა უმრავლესობაზე?

¹⁹ კაცობრიობა მხოლოდ მხეცით როდია აღტაცებული. იოანე ამბობს: «მათ თაყვანი სცეს დრაკონს, რადგან მან მისცა ძალაუფლება მხეცს. თაყვანი სცეს მხეცს და თქვეს: „ვინ არის ამ მხეცის მსგავსი და ვის შეუძლია მასთან შებრძოლება?“ » (გამოცხადება 13:4) იესოს დედამიწაზე ყოფნისას სატანამ განაცხადა, რომ ყველა სამეფო მის ძალაუფლებაში იყო. იესოს ეს ფაქტი ეჭვქვეშ არ დაუყენებია; პირიქით, მან სატანა ქვეყნიერების მმართველად მოიხსენია, თავად კი პოლიტიკისგან შორს დაიჭირა თავი. მოგვიანებით იოანემ ჭეშმარიტ ქრისტიანებს მისწერა: „ვიცით, რომ ღვთისგან ვართ, მთელი ქვეყნიერება კი ბოროტის ხელშია“ (1 იოანე 5:19; ლუკა 4:5—8; იოანე 6:15; 14:30). სატანა ნაციონალიზმის გაღვივებით ძალას აძლევს მხეცს. ნაცვლად იმისა, რომ ღვთის მოსაწონი სიყვარულით გაერთიანდნენ, ადამიანებს ეროვნული და რასობრივი სიამაყე აშორებთ ერთმანეთს. ხალხთა უმრავლესობა თაყვანს სცემს მხეცის იმ ნაწილს, რომელიც მათ ქვეყანას მართავს. ამგვარად, მთელი მხეცი იწვევს ხალხის აღტაცებას და იღებს კიდეც თაყვანისცემას.

20. ა) რა გაგებით სცემს თაყვანს ხალხი მხეცს? ბ) რატომ არ სცემენ ქრისტიანები თაყვანს მხეცს და ვის ჰბაძავენ ისინი?

²⁰ რა გაგებით სცემს თაყვანს ხალხი მხეცს? ისინი ღვთის სიყვარულზე წინ თავიანთი ქვეყნის სიყვარულს აყენებენ. უმეტესობას უყვარს თავისი სამშობლო. ჭეშმარიტი ქრისტიანები კარგი მოქალაქეები არიან; ისინი პატივს სცემენ მმართველებს და უპატივცემულოდ არ ეპყრობიან თავიანთი ქვეყნის სიმბოლოებს, ემორჩილებიან კანონებს და ხელს უწყობენ როგორც მთლიანი საზოგადოების, ისე თავიანთი მეზობლების კეთილდღეობას (რომაელები 13:1—7; 1 პეტრე 2:13—17). მაგრამ ისინი ბრმა ერთგულებას ვერ გამოუცხადებენ მხოლოდ ერთ ქვეყანას. „ჩვენი ქვეყანა მაშინაც მართალია, როცა ტყუის“ — ეს გამონათქვამი არ შეესაბამება ქრისტიანულ სწავლებას. ქრისტიანები იეჰოვა ღმერთს სცემენ თაყვანს და ამიტომ ვერ მიიღებენ მონაწილეობას მხეცის ვერც ერთი ნაწილის თაყვანისცემაში, რადგან ეს თვით დრაკონის, ამ მხეცისთვის ძალაუფლების მიმცემის, თაყვანისცემის ტოლფასი იქნებოდა.