ბიბლიის თვალსაზრისი
არასწორია ცხოველებისადმი სისასტიკის გამოვლენა?
ცენტრალური ამერიკის სპორტულ არენაზე ყველას თვალი ორი მამლისკენაა მიპყრობილი. ერთი წითელია, მეორე კი — თეთრი. წითელი მამალი თეთრ მამალს ძლიერად ურტყამს ფეხზე მიბმულ სამართებელივით ბასრ ლითონს; ბრბო გრგვინავს. მსაჯი ორივე ფრინველს ხელში იყვანს. თეთრი მკვდარ მამალს სისხლი სდის. მამლების ორთაბრძოლა დასრულდა.
ფილიპინების სამხრეთ ნაწილში ერთმანეთთან შესაჯიბრად ორი ულაყი გამოჰყავთ. მაყურებლები შემაძრწუნებელ სანახაობას უყურებენ — ცხენები ერთმანეთს კბენენ ყურებზე, კისერზე, დრუნჩსა და სხეულის სხვა ნაწილებზე. მიუხედავად იმისა, რომ არენა შეიძლება ორივემ ცოცხალმა დატოვოს, სულ მცირე ერთი მაინც შეიძლება დაბრმავდეს ან სასიკვდილოდ დასახიჩრდეს.
რუსეთში ორ ძაღლს ერთმანეთს აჯიბრებენ. მოკლე ხანში თვალებდათხრილი და ყურებდაფლეთილი ძაღლები ძლივს დგანან დასახიჩრებულ თათებზე, დაფლეთილი სხეულიდან კი სისხლი სდით.
საუკუნეების განმავლობაში ადამიანი ცხოველებს გართობის საბაბით უპირისპირებდა ერთმანეთს, ხშირად კი ამის მიზეზი ფულთან იყო დაკავშირებული. ამ სიას ემატება კორიდა ხარების ბრძოლა, მელიებზე ნადირობა და ობობების ბრძოლებიც კი. ამასთანავე, ბევრი ცხოველი მეცნიერული კვლევის მსხვერპლი ხდება. გარდა ამისა, აურაცხელი ცხოველი ხვდება უსულგულობას პატრონის მხრიდან, განზრახ იქნება ეს თუ განუზრახველად.
ზოგ ქვეყანაში დადგენილია კანონები, რომლებიც აწესრიგებს ცხოველებისადმი მოპყრობის საკითხებს და კრძალავს მათდამი სასტიკ მოქცევას. ჯერ კიდევ მასაჩუსეტს-ბეის კოლონიამ შეადგინა „ნებართვების კრებული“, რომელშიც ნათქვამი იყო: „აკრძალულია ტირანია და სისასტიკე ნებისმიერი პირუტყვის მიმართ, რომელიც ადამიანს, ჩვეულებრივ, თავისთვის ჰყავს“. მას შემდეგ სისასტიკისგან ცხოველების დასაცავად გამოდის კანონები და იქმნება სხვადასხვა საზოგადოება.
მაგრამ მრავალს, ვინც ხელს უწყობს გართობის ამ სახეობას, არ მიაჩნია თავი დამნაშავედ ცხოველებისადმი სისასტიკის გამოვლენაში. ზოგი აცხადებს, რომ უყვართ ცხოველები, მაგრამ ულმობლად იმეტებენ მათ სატანჯველად ან სასიკვდილოდ. მამლების ორთაბრძოლების მოყვარულები აცხადებენ, რომ მათი ფრინველები უფრო დიდხანს ცოცხლობენ, ვიდრე ჩვეულებრივი დასაკლავი წიწილები. ხომ მანუგეშებელია?!
რატომ არის სისასტიკე ცუდი?
ბიბლიური პრინციპებით დაშვებულია ცხოველების დახოცვა საჭმელად გამოყენებისა და ტანსაცმლის დამზადების მიზნით, აგრეთვე თავდასაცავად (დაბადება 3:21; 9:3; გამოსვლა 21:28). მიუხედავად ამისა, სიცოცხლე წმინდაა ღვთის თვალში. ცხოველებზე ჩვენი ბატონობა გაწონასწორებული უნდა იყოს, რაც უჩვენებს, რომ ვაფასებთ სიცოცხლეს. ბიბლია მსჯავრს სდებს ნებროთს, რომელიც, როგორც ჩანს, ხოცავდა ცხოველებს და, შესაძლოა, ადამიანებსაც, რაც მას სიამოვნებას ანიჭებდა (დაბადება 10:9, აქ).
თუ როგორ ზრუნავდა ღმერთი ცხოველებზე, იესომ შემდეგი სიტყვებით გამოხატა: „განა ხუთი ბეღურა ორი ასარი არა ღირს? და არც ერთი მათგანი დავიწყებული არ არის ღვთის წინაშე“ (ლუკა 12:6). ამასთანავე, როდესაც ბოროტებით აღსავსე ქალაქ ნინევეს მოსახლეობამ მოინანია, ღმერთმა შეცვალა გადაწყვეტილება ქალაქის განადგურებასთან დაკავშირებით და თქვა: „როგორ არ დამენანოს დიდი ქალაქი ნინევე, სადაც ასოციათასზე მეტი კაცია. . . და სადაც უთვალავი პირუტყვია“ (იონა 4:11). აშკარაა, რომ მას არ მიაჩნია ცხოველები „ერთჯერადი გამოყენების საგნებად“, რომლებსაც, როცა გინდა, მაშინ გადაყრი.
რჯულის მიცემის დროს ღმერთმა ისრაელებს ასწავლა, სათანადოდ ეზრუნათ ცხოველებზე. ღმერთი მათგან მოითხოვდა, რომ გზააბნეული პირუტყვი პატრონისთვის დაებრუნებინათ და დახმარება გაეწიათ გასაჭირში ჩავარდნილი ცხოველებისთვის (გამოსვლა 23:4, 5). ადამიანების მსგავსად, შაბათ დღეს ცხოველებსაც უნდა დაესვენათ (გამოსვლა 23:12). ისრაელებს მიცემული ჰქონდათ კანონები, რომელთა თანახმადაც შინაურ ცხოველებს სათანადოდ უნდა მოქცეოდნენ (მეორე რჯული 22:10; 25:4). აშკარაა, რომ, ექსპლუატაციის ნაცვლად, უნდა ეზრუნათ ცხოველებზე და დაეცვათ ისინი.
იგავნის 12:10 გარკვევით აცხადებს ღვთის თვალსაზრისს: „მართალი ზრუნავს თავისი პირუტყვის სიცოცხლეზე, ბოროტეულთა გული კი სასტიკია“. ერთ ნაშრომში ეს მუხლი შემდეგნაირადაა განმარტებული: „მართალი კაცის გულკეთილობა პირუტყვზეც კი ვრცელდება, ხოლო ბოროტი კაცი სასტიკია, მაშინაც კი, როცა ფიქრობს, რომ ძალიან კეთილშობილია“ (Believer’s Bible Commentary, უილიამ მაკდონალდი).
მართალი კაცი ცხოველების მიმართ გულკეთილობას ავლენს და ცდილობს გაიგოს, თუ რა აწუხებს მათ. ბოროტი ადამიანი შეიძლება ამბობდეს, რომ უყვარს ცხოველები, მაგრამ მისი „გულმოწყალება“, უკეთეს შემთხვევაში, სისასტიკეა. მისი მოქმედებები ცხადყოფს, რომ ეგოისტური სურვილები ამოძრავებს. როგორ მართლდება ეს მათზე, რომლებიც ფულის მოგების მიზნით ცხოველებს ერთმანეთს უპირისპირებენ!
შვება ცხოველებისთვის
მართალია, ღვთის თავდაპირველი განზრახვა იყო, რომ ადამიანს ‘ეპატრონა ზღვაში თევზისთვის, ცაში ფრინველისა და ყოველი ცხოველისთვის, რაც კი დედამიწაზე დახოხავდა’ (დაბადება 1:28). მაგრამ ამ განზრახვასთან საერთო არაფერი აქვს ცხოველებისადმი სისასტიკეს. ცხოველების მიმართ არაჰუმანური მოპყრობა მარადიულად არ გაგრძელდება. ჩვენ გვაქვს საფუძველი ვირწმუნოთ, რომ ღმერთი შეწყვეტს ყოველგვარ ტანჯვას. მაგრამ როგორ?
ის გვპირდება, რომ მოსპობს ბოროტ და სასტიკ ადამიანებს (იგავნი 2:22). ცხოველებთან დაკავშირებით ოსიას 2:20 ამბობს: „დავდებ იმ დღეს მათთვის აღთქმას ველის მხეცებთან, ცის ფრინველებთან და ქვეწარმავლებთან. . . და მშვიდობით დავავანებ მათ“. რა შესანიშნავი იქნება ცხოვრება მაშინ, როცა მშვიდობიანი პირობები სარგებლობას მოუტანს არა მარტო პატიოსან ადამიანებს, არამედ ცხოველებსაც!