რა ხდება მსოფლიოში?

კანადასა და შეერთებულ შტატებში 5 296 ეგრეთ წოდებული ეკოლოგიურად სუფთა პროდუქტის შემოწმებისას აღმოჩნდა, რომ ამ პროდუქციის 95 პროცენტი „არ აკმაყოფილებდა საჭირო სტანდარტებს“ („ტაიმი“, აშშ).

ბანკოკის საერთაშორისო აეროპორტში უშიშროების სამსახურის თანამშრომლებმა ერთი ქალბატონის ბარგის შემოწმებისას რაღაც საეჭვო შენიშნეს. როდესაც ჩანთა გახსნეს, იპოვეს ცოცხალი ვეფხვის ბოკვერი („ველური ბუნების დაცვის მსოფლიო ფონდი“, ტაილანდი).

ბიომრავალფეროვნება ამაზონის მიდამოებში

მდინარე ამაზონის აუზი ბიომრავალფეროვნებით ცნობილი ერთ-ერთი რეგიონია. „ველური ბუნების დაცვის მსოფლიო ფონდი“ იუწყება, რომ ბოლო ათი წლის განმავლობაში აღმოაჩინეს და კლასებად დაყვეს მცენარეებისა და ცხოველების 1 200-ზე მეტი სახეობა — თევზები, ამფიბიები, ქვეწარმავლები, ფრინველები და ძუძუმწოვრები. ეს იმას ნიშნავს, რომ ამაზონის მიდამოებში საშუალოდ ყოველ სამ დღეში ერთი ახალი სახეობის აღმოჩენა ხდება. ბუნების დაცვის მსოფლიო ფონდის ხელმძღვანელი ბრაზილიაში სარა ჰაჩისონი ამბობს: „გასაოცარია აღმოჩენილ ახალ სახეობათა რიცხვი და თანაც ამაში არ შედის მწერების ბევრი ჯგუფი“.

სტრესი სამსახურში

ყოველი მეხუთე ფინელი თვლის, რომ კონცენტრირებასთან და მეხსიერებასთან დაკავშირებული პრობლემები გავლენას ახდენს მის სამუშაოს ხარისხზე. ფინეთის შრომის ჰიგიენის ინსტიტუტი იტყობინება, რომ ასეთი პრობლემები სულ უფრო მეტად შეიმჩნევა 35 წლამდე ასაკის ადამიანებში, რომელთა ტვინიც წესით ყველაზე კარგად ამ ასაკში უნდა მუშაობდეს. მიზეზებს შორისაა ზღვა ინფორმაცია და გამუდმებული ცვლილებები კომპიუტერულ სისტემებში. პროფესორი კიტი მიულერი ამბობს: „საჭირო ინფორმაციის მოძიების მიზნით, ბევრს უწევს ზღვა ინფორმაციის გადაქექვა“. „ჰელსინკი ტაიმზში“ აღნიშნული იყო: „თუ სტრესი დიდხანს გრძელდება, ტვინი ეჩვევა მას და მანამ არ მოგცემს სიგნალს, რომ სტრესი გაქვს, სანამ სერიოზულად არ გახდები ავად“.

ხდის ადამიანს უფრო აგრესიულს ძალადობრივ ვიდეოთამაშებზე ფიქრი?

რამდენ ხანს შეიძლება გაჰყვეს ადამიანს აგრესია ძალადობრივი ვიდეოთამაშების თამაშის შემდეგ? მკვლევარებმა სტუდენტები, როგორც გოგოები, ისე ბიჭები, ორ ჯგუფად დაყვეს და ერთ ჯგუფს დაავალეს, 20 წუთის განმავლობაში ეთამაშა ძალადობრივი თამაშები, მეორეს — კი არაძალადობრივი. „შემდეგ, თითოეული ჯგუფის ნახევარს უთხრეს, ეფიქრათ თავიანთ თამაშზე. მეორე დღეს მონაწილეები შეაჯიბრეს ერთმანეთს. გამარჯვებულს შეეძლო, დაესაჯა მოწინააღმდეგე იმით, რომ გამაყრუებელი ხმით ჩაეყვირა მისთვის საყურისში“. უფრო მეტი აგრესიულობით გამოირჩეოდნენ ის ბიჭები, რომლებსაც ძალადობრივ თამაშებზე ფიქრი დაავალეს. „ჩვეულებრივ ძალადობრივ თამაშებს 20 წუთზე მეტხანს თამაშობენ ხოლმე და, ალბათ, ღრმად ფიქრობენ ამ თამაშზე,“ — აღნიშნავენ ამ გამოკვლევის ავტორები ერთ-ერთ ჟურნალში. არანაირი განსაკუთრებული აგრესია არ აღენიშნებოდათ გოგონებს, რომლებსაც ჩვეულებრივ არ უყვართ ძალადობრივი თამაშები (Social Psychological and Personality Science).