ᲤᲐᲡᲔᲑᲘᲡ ᲖᲠᲓᲐ – ᲠᲝᲒᲝᲠ ᲒᲐᲕᲐᲠᲗᲕᲐᲗ ᲗᲐᲕᲘ
როგორ ვაკონტროლოთ ხარჯები
მართალია, ფასების ზრდა ჩვენს ცხოვრებას ართულებს, მაგრამ მდგომარეობის გაუმჯობესება შესაძლებელია.
ᲠᲐᲢᲝᲛ ᲣᲜᲓᲐ ᲕᲐᲙᲝᲜᲢᲠᲝᲚᲝᲗ ᲮᲐᲠᲯᲔᲑᲘ
თუ ხარჯების კონტროლს არ შევეცდებით, შეიძლება სერიოზული ფინანსური პრობლემები შეგვექმნას და მეტი სანერვიულოც გაგვიჩნდეს. ქვემოთ განხილული რჩევები იმ შემთხვევაშიც დაგეხმარებათ, თუ მცირე შემოსავალი გაქვთ.
ᲠᲘᲡᲘ ᲒᲐᲙᲔᲗᲔᲑᲐ ᲨᲔᲒᲘᲫᲚᲘᲐᲗ
შეადგინეთ ბიუჯეტი. ამ შემთხვევაში სანერვიულო ნაკლები გექნებათ და გაუთვალისწინებელი ხარჯებისთვისაც მზად იქნებით.
ბიუჯეტის შედგენა დაგეხმარებათ, იმაზე მეტი არ დახარჯოთ, ვიდრე ამის შესაძლებლობას თქვენი შემოსავალი გაძლევთ. თავიდან უნდა განსაზღვროთ, რა არის თქვენი რეალური საჭიროებები, შემდეგ კი მაქსიმალურად ეცადოთ, რომ განსაზღვრულ ხარჯებს არ გადააჭარბოთ. იმ შემთხვევაში, თუ ფასები ან თქვენი შემოსავალი შეიცვლება, კარგი იქნება, გადახედოთ ბიუჯეტს. თუ დაქორწინებული ხართ, რა თქმა უნდა, ნებისმიერი გადაწყვეტილება თქვენს მეუღლესთან ერთად უნდა მიიღოთ.
ეცადეთ, ასე მოიქცეთ: საკრედიტო ბარათის გამოყენების ნაცვლად ჯობს, ნაღდი ფულით გადაიხადოთ. ასეთი მიდგომა ზოგისთვის დამხმარე აღმოჩნდა, რომ განსაზღვრულზე მეტი არ დაეხარჯა და ვალებიც აეცილებინა თავიდან. კარგი იქნება, შეამოწმოთ ხოლმე თქვენი საბანკო ხარჯებიც. თუ თქვენს ანგარიშს გააკონტროლებთ, უფრო მშვიდადაც იქნებით.
ხარჯების კონტროლი ყოველთვის მარტივი არ არის, მაგრამ კარგად შედგენილი ბიუჯეტი დიდ დახმარებას გაგიწევთ. ამ შემთხვევაში სტრესს აღარ შეგიქმნით ის ფაქტი, რომ გათვალისწინებულზე მეტი დახარჯეთ და მშვიდად იქნებით, რადგან თქვენ აკონტროლებთ სიტუაციას.
ყველანაირად ეცადეთ, არ დაკარგოთ სამუშაო. ეს რომ შეძლოთ, კარგი სამუშაო ეთიკაა საჭირო. მაგალითად, უნდა იყოთ შრომისმოყვარეები და პუნქტუალურები, სიამოვნებით ასრულებდეთ საქმეს და მზად იყოთ, იმაზე მეტი გააკეთოთ, ვიდრე გევალებათ. არანაკლებ მნიშვნელოვანია, მიჰყვეთ შრომის შინაგანაწესს და დაიხვეწოთ და განვითარდეთ თქვენს საქმეში.
ეცადეთ, არ გაფლანგოთ ფული. დაფიქრდით, ხარჯვის როგორი ჩვევები გაქვთ და არაეკონომიურად ხომ არ ხარჯავთ ფულს. ზოგი სიმწრით ნაშოვნ ფულს ნარკოტიკებში, აზარტულ თამაშებსა და სიგარეტში ხარჯავს. ზოგიც იმდენს სვამს, რომ ამაში ეფლანგება ფული. სამწუხაროდ, ასეთი ჩვევები მხოლოდ მათ ჯიბეზე კი არ აისახება უარყოფითად, შეიძლება სამუშაოც დაკარგონ და ჯანმრთელობაც გაიუარესონ.
გააკეთეთ დანაზოგი გაუთვალისწინებელი შემთხვევებისთვის. ამისთვის შეგიძლიათ შიგადაშიგ თუნდაც ცოტაოდენი თანხა გადადოთ. ამ შემთხვევაში გარკვეულწილად მაინც გექნებათ დაცულობის შეგრძნება, თუ თქვენ ან თქვენს ოჯახის წევრს ჯანმრთელობის პრობლემა შეგექმნებათ, სამსახურს დაკარგავთ ან რამე გაუთვალისწინებელი მოხდება.