თავი 29

როგორ ამოვიგდო თავიდან სექსუალური ფანტაზიები?

„სულ გოგოებზე ვფიქრობ, მაშინაც კი, როცა მათ ვერ ვხედავ. შეიძლება გაგეცინოთ, მაგრამ ამის გამო ზოგჯერ კონცენტრირებაც მიჭირს“, — ამბობს მაიკლი.

შეიძლება შენც გამუდმებული ბრძოლა გაქვს გონებაში და სექსუალურ ფანტაზიებს თავიდან ვერ იცილებ. მაიკლი ამბობს: „სხვა ვეღარაფერზე ფიქრობ. ზოგჯერ შეიძლება გზა დაიგრძელო იმისათვის, რომ ლამაზ გოგოს უყურო, ან სუპერმარკეტში სულ სხვა განყოფილებაში შეხვიდე, ვინმე კარგად რომ შეათვალიერო“.

სქესობრივი ლტოლვა თავისთავად დასაძრახი არ არის. ქალი და მამაკაცი ღმერთმა შექმნა ასეთი ლტოლვით და სქესობრივი მოთხოვნილებების დაკმაყოფილება სავსებით ნორმალურია ცოლქმრულ ურთიერთობაში. თუ დაქორწინებამდე სექსუალური სურვილები გეძალება, ნუ ჩათვლი, რომ ზნეობრივი სიწმინდისგან შორს ხარ. შენზეა დამოკიდებული, დაიცავ თუ არა ზნეობრივ ნორმებს! თუმცა ამისათვის ფიქრების გაკონტროლება დაგჭირდება. რა დაგეხმარება ამაში?

ნუ ისაუბრებ უზნეობაზე. როცა შენი კლასელები უზნეობაზე იწყებენ ლაპარაკს, შეიძლება შენც გაგიჩნდეს საუბარში ჩაბმის სურვილი, მათგან განსხვავებული რომ არ გამოჩნდე. მაგრამ ასეთ თემებზე თუ ილაპარაკებ, უფრო გაგიჭირდება ფიქრების გაკონტროლება. როგორ უნდა მოიქცე? უნდა ადგე და გახვიდე? ასე აჯობებს და ამის სულაც არ უნდა შეგრცხვეს. ხშირად ეს შეიძლება გაკეთდეს ზედმეტი ყურადღების მიქცევის გარეშე და ისე, რომ არავინ დაგცინოს.

აკონტროლე, რას უსმენ და რას უყურებ. ცხადია, ყველა ფილმი და მუსიკა არ არის ცუდი. მაგრამ ბევრი რამ, რითაც დღეს ერთობიან, არასწორ სექსუალურ სურვილებს აღუძრავს ადამიანს. ბიბლია გვირჩევს: „განვიწმინდოთ ყოველივე იმისგან, რაც ბილწავს ხორცსა და სულს, და ღვთის შიშით სრულვყოთ სიწმინდე“ (2 კორინთელები 7:1). ასე რომ, ნუ გაერთობი იმით, რაც სექსუალურ სურვილებს გაგიღვიძებსa.

მასტურბაცია — კიდევ ერთი პრობლემა

ზოგი ახალგაზრდა სექსუალური სურვილების დაკმაყოფილებას მასტურბაციით ცდილობს. ეს შეიძლება სერიოზული პრობლემების მიზეზი გახდეს. ბიბლიაში ასეთი რჩევაა ქრისტიანებისთვის: „ჩაკალით თქვენი სხეულის მიწიერი ნაწილები: სიძვა, უწმინდურება, ვნება, მავნებელი სურვილები და სიხარბე“ (კოლოსელები 3:5). მასტურბაციით ადამიანი კი არ ‘კლავს ვნებას’, არამედ კიდევ უფრო მეტად აძლიერებს.

მასტურბაციამ შეიძლება შენი სურვილების მონად გაქციოს (ტიტე 3:3). ერთ-ერთი პირველი ნაბიჯი, რომელიც ამ ჩვევის დაძლევაში დაგეხმარება, ვინმესთან დალაპარაკებაა. ერთი ქრისტიანი, რომელიც რამდენიმე წელი ებრძოდა ამ ჩვევას, ამბობს: „ნეტა თავის დროზე მქონოდა იმდენი გამბედაობა, რომ ვინმეს დავლაპარაკებოდი. სინდისი წლების მანძილზე მქენჯნიდა. ეს ძალიან მოქმედებდა ჩემს ურთიერთობაზე როგორც სხვებთან, ისე იეჰოვასთან“.

ვის უნდა დაელაპარაკო? ხშირ შემთხვევაში საუკეთესო ვარიანტი მშობელია. კრებიდან რომელიმე მოწიფული ქრისტიანიც შეძლებს შენს დახმარებას. საუბარი შეგიძლია, მაგალითად, ასე დაიწყო: „მინდა ერთი რამ გითხრა, რაც ძალიან მაწუხებს“.

ანდრე ესაუბრა ერთ ქრისტიან უხუცესს. დღეს ის კმაყოფილია, ასე რომ მოიქცა და იხსენებს: „როცა უხუცესი მისმენდა, თვალებზე ცრემლები მოადგა. მან დამარწმუნა, რომ იეჰოვას ვუყვარდი და მითხრა, რომ მარტო მე არ მქონდა ეს პრობლემა. ის დამპირდა, რომ უფრო მეტ ინფორმაციას მომიძებნიდა ბიბლიაზე დაფუძნებულ პუბლიკაციებში და დროდადრო დაინტერესდებოდა ამ მხრივ ჩემი წინსვლით. მასთან საუბარმა მეტი სტიმული მომცა და გადავწყვიტე, ბრძოლა არ შემეწყვიტა, თუნდაც ჩავარდნები მქონოდა“.

მარიომ გადაწყვიტა, მამას დალაპარაკებოდა. მან კარგად გაუგო მარიოს, თანაგრძნობით მოუსმინა და უთხრა, რომ ახალგაზრდობაში თავადაც ჰქონდა ეს პრობლემა. მარიო ამბობს: „მამაჩემის გულახდილობამ ძალიან გამამხნევა. ვიფიქრე, თუ მან შეძლო ამ ჩვევის მიტოვება, მეც გამომივა-მეთქი. მამის სიტყვებმა ისე იმოქმედა ჩემზე, რომ თავი ვეღარ შევიკავე და ავტირდი“.

ანდრესა და მარიოს მსგავსად შენც შეძლებ ამ ჩვევის დაძლევას, თუ უარს არ იტყვი დახმარებაზე. გული არ გაიტეხო, თუ ჩავარდნები გექნება. შენ შეგიძლია ამ ბრძოლაში გამარჯვება!b

ფიქრები რომ აკონტროლო

მოციქული პავლე წერდა: „ვცემ და ვიმონებ ჩემს სხეულს“ (1 კორინთელები 9:27). შენც მკაცრი უნდა იყო საკუთარ თავთან, როცა ცუდი ფიქრები მოგდის. თუ თავს ვერ ერევი, ცოტა წაივარჯიშე. ბიბლიაში ნათქვამია: „ფიზიკური ვარჯიში მეტ-ნაკლებად სასარგებლოა“ (1 ტიმოთე 4:8). სწრაფი სიარული და რამდენიმე წუთიანი ვარჯიში შეიძლება საკმარისი იყოს ცუდი ფიქრების მოსაშორებლად.

რაც მთავარია, გახსოვდეს, რომ დახმარების მიღება ზეციერი მამისგანაც შეგიძლია. „როცა ვგრძნობ, რომ უნებურად სექსზე ვიწყებ ფიქრს, მაშინვე მთელი გულით ვლოცულობ“, — ამბობს ერთი ქრისტიანი. გასაგებია, რომ ღმერთი სქესობრივ ლტოლვას არ გაგიქრობს, მაგრამ მისი დახმარებით შეძლებ გონების სხვა რამეზე გადატანას.

[სქოლიოები]

საკვანძო ბიბლიური მუხლი

„რაც ზნეობრივი და საქებარია, იმაზე იფიქრეთ“ (ფილიპელები 4:8).

რჩევა

თუ მასტურბაციის ჩვევა თავს შეგახსენებს, არ დანებდე! დაფიქრდი, რატომ მოგივიდა ეს და ეცადე, იგივე შეცდომა აღარ გაიმეორო.

იცოდი, რომ . . . ?

ის, რაზეც ხშირად ფიქრობ, გავლენას მოახდენს შენს თვისებებსა და მოქმედებებზე (იაკობი 1:14, 15).

რა უნდა გავაკეთო

თუ ცუდი ფიქრები მომივა ․․․․․

თუ კლასელები გადაკვრით ან პირდაპირ უხამს თემებზე დაიწყებენ ლაპარაკს ․․․․․

რა ვკითხო მშობლებს ამ საკითხზე? ․․․․․

როგორ ფიქრობ?

● რატომ არ უნდა ჩათვალო, რომ სქესობრივი ლტოლვა თავისთავად ცუდია?

● რატომ უნდა აკონტროლო სექსუალური სურვილები?

● როგორ გართობას უნდა მოერიდო იმისათვის, რომ ნაკლებად მოგივიდეს არასწორი ფიქრები?

● რატომ აჯობებს, რომ აღარ მოუსმინო ისეთ საუბარს, რომელიც გადაკვრით ან პირდაპირ უხამს თემებს ეხება?

[ჩანართი 240 გვერდზე]

„გონების სხვა თემაზე გადატანა ძალიან მეხმარება ისეთი ფიქრების თავიდან ამოგდებაში, რომლებიც აღმაგზნებს. თავს ვახსენებ ხოლმე, რომ ეს ყველაფერი თანდათანობით გაივლის“ (სკოტი).

[სურათი 239 გვერდზე]

არაჯანსაღი ფიქრები ისეთივე საფრთხეს უქმნის შენს გონებას, როგორც ვირუსები კომპიუტერს.