თავი 10

რატომ მატკინა გული მეგობარმა?

„კერისთან ძალიან ახლოს ვიყავი. მას მანქანა არ ჰყავდა და სამუშაოდან ყოველდღე მე მომყავდა. მაგრამ მალე მივხვდი, რომ ის უბრალოდ მიყენებდა.

როცა მანქანაში ჯდებოდა, თან ტელეფონზე ლაპარაკობდა ან SMS-ებს წერდა. მადლობასაც არ მეუბნებოდა. ცოტა ხანში ბენზინის ფულსაც აღარ მაძლევდა. სულ უარყოფითზე ლაპარაკობდა. უკვე ჩემს თავზე მეშლებოდა ნერვები, ამდენს რომ ვუთმენდი.

ერთ დღესაც რბილად ვუთხარი, რომ სამუშაოდან ვეღარ წამოვიყვანდი მანქანით. ამის შემდეგ ჩემგან შორს დაიჭირა თავი. კიდევ ერთხელ დავრწმუნდი, რომ მას ჩემი გამოყენება უნდოდა და მეტი არაფერი. ამან ძალიან მატკინა გული“ (ნიკოლი).

ასეთი რამ საუკეთესო მეგობრებს შორისაც შეიძლება მოხდეს. დღეს რომ ერთმანეთის გარეშე ვერ ძლებენ, ხვალ შეიძლება ერთმანეთის დანახვაც აღარ უნდოდეთ. რატომ ხდება ასე?

● ჯერემისთვის ყველაფერი მაშინ შეიცვალა, როცა მისი მეგობარი შორს გადავიდა საცხოვრებლად. ის იხსენებს: „ერთხელაც არ დაურეკია. ძალიან მეწყინა“.

● კერინი ამჩნევდა, რომ მისი დაქალი, რომელთანაც ხუთი წელი მეგობრობდა, სხვანაირი გახდა. კერინი გვიყვება: „მისი აზროვნება და საუბარი აღარ მომწონდა. ჩემთვის მნიშვნელოვან საკითხებზე აგდებულად ლაპარაკობდა. როცა ამაზე ვესაუბრე, აქეთ მომდო შარი, შენი თავი ყველაზე კარგი გგონია, მოღალატე ხარ და შენთან მეგობრობა საერთოდ არ ღირსო“.

● გლორიას და მისი მეგობრის ურთიერთობა მოულოდნელად და ყოველგვარი ახსნა-განმარტების გარეშე დამთავრდა. გლორია ამბობს: „თავიდან ძალიან კარგად გავუგეთ ერთმანეთს. მეუბნებოდა, ჩემთვის დასავით ხარო. მაგრამ ერთი დღე იყო და მას შემდეგ ჩემკენ გამოხედვაც აღარ უნდოდა. ყოველთვის რაღაცას იმიზეზებდა“.

● დარიას და ლორას მაშინ გაუფუჭდათ ურთიერთობა, როცა დარიამ ლორას შეყვარებული წაართვა. „საათობით ელაპარაკებოდა ჩემს შეყვარებულს ტელეფონზე, — იხსენებს ლორა. — ერთდროულად ახლო მეგობარიც დავკარგე და შეყვარებულიც“.

რა ხდება?

შეცდომებს ყველა ვუშვებთ. გამონაკლისი არც მეგობარი იქნება და ადრე თუ გვიან შეიძლება მანაც გატკინოს გული სიტყვით ან საქმით. თუ დაფიქრდები, ალბათ შენც გაიხსენებ ისეთ შემთხვევებს, როცა სხვებისთვის გიწყენინებია (ეკლესიასტე 7:22). „ყველანი არასრულყოფილები ვართ და შიგადაშიგ გულს ვტკენთ ერთმანეთს“, — ამბობს ლიზა. უმნიშვნელო გაუგებრობის მოსაგვარებლად, ჩვეულებრივ, მოკლე საუბარიც საკმარისია.

მაგრამ არის შემთხვევები, როცა მეგობრობას ბზარი თანდათან უჩნდება. შეიძლება დროთა განმავლობაში ხედავ, რომ არც ისე ბევრი გაქვთ საერთო, როგორც თავიდან გეგონა. ეს არ უნდა გაგიკვირდეს, რადგან ზრდასთან ერთად გემოვნება გეცვლება. იმავეს თქმა შეიძლება შენს მეგობარზეც. რა უნდა გააკეთო, თუ ატყობ, რომ თქვენ შორის ურთიერთობა ცივდება?

რა ვუშველოთ?

გაგხევია როდესმე ტანსაცმელი? გაადააგდე თუ გაკერვა სცადე? ეს იმაზეც იქნებოდა დამოკიდებული, ოდნავ გაგეხა თუ ძალიან და მოგწონდა თუ არა ის. თუ შენი საყვარელი ტანსაცმელი იყო, ალბათ, მაშინვე არ გადააგდებდი. იმავეს თქმა შეიძლება მეგობრობაზე. ბევრი რამ იმაზეა დამოკიდებული, თუ რა მოხდა თქვენ შორის და რამდენად აფასებ თქვენს ურთიერთობასa.

მაგალითად, თუ ვინმემ სიტყვით ან საქმით გული გატკინა, შეეცადე ფსალმუნის 4:4-ში ჩაწერილი რჩევის გათვალისწინებას: „გულში თქვით, თქვენს საწოლში, და ჩუმად იყავით“. სერიოზულად დაფიქრდი, სანამ თქვენს ურთიერთობას ხაზს გადაუსვამ. სპეციალურად მოიქცა ასე? თუ დარწმუნებული არა ხარ ამაში, რაღა მაინცდამაინც ცუდზე უნდა იფიქრო?! „სიყვარული უამრავ ცოდვას ფარავს“ (1 პეტრე 4:8).

იმაზეც ღირს დაფიქრება, ნაწილობრივ შენც ხომ არა ხარ დამნაშავე. მაგალითად, თუ მეგობარმა შენი საიდუმლო გასცა, იქნებ შენი ბრალიც არის, რომ ის მას გაანდე? ან იქნებ მეტისმეტი და დაუფიქრებელი ლაპარაკით დააკარგვინე მას შენდამი პატივისცემა? (იგავები 15:2). ასეთ შემთხვევაში უნდა იფიქრო, თუ რის შეცვლა აჯობებს იმისათვის, რომ მეგობრის პატივისცემა დაიბრუნო.

„იქნებ გვესაუბრა იმაზე, რაც მოხდა“

როგორ უნდა მოიქცე, თუ ადვილად ვერ ივიწყებ იმას, რაც მოხდა? ამ შემთხვევაში შეიძლება ღირდეს მეგობართან დალაპარაკება. მაგრამ ცხელ გულზე ნუ გააკეთებ ამას. ბიბლიაში ნათქვამია: „განრისხებული კაცი შუღლს აღვივებს, რისხვაში ნელი კი დავას აცხრობს“ (იგავები 15:18). ამიტომ ჯერ დამშვიდდი და მერე იფიქრე პრობლემის მოგვარებაზე.

მეგობართან საუბრის მიზანი სამაგიეროს გადახდა არ არის (რომაელები 12:17). შენთვის მთავარი მდგომარეობის მოგვარება და მეგობრობის გადარჩენა უნდა იყოს (ფსალმუნი 34:14). ლაპარაკისას იყავი გულწრფელი. შეგიძლია ასეთი რამ უთხრა: „ამდენი ხანია მეგობრები ვართ. იქნებ გვესაუბრა იმაზე, რაც მოხდა“. როცა გაიგებ პრობლემის მიზეზს, უფრო გაგიადვილდება ურთიერთობის აღდგენა. თუნდაც მეგობარმა საუბარი არ მოისურვოს, გეცოდინება, რომ შენი მხრიდან ყველაფერი გააკეთე.

რეალობას ვერ გაექცევი: „არიან მოძმეები, რომლებიც ერთმანეთის გასაგლეჯადაც კი მზად არიან“. მაგრამ საბედნიეროდ არსებობენ „ძმაზე ახლობელი“ მეგობრებიც (იგავები 18:24). ზოგჯერ შეიძლება საუკეთესო მეგობრებს შორისაც დაიძაბოს ურთიერთობა. ასეთ შემთხვევაში ყველაფერი გააკეთე მდგომარეობის გამოსასწორებლად. როცა ასე იქცევი, ეს უკვე იმის ნიშანია, რომ ბავშვი აღარა ხარ.

წაიკითხე დამატებითი მასალა პირველი ტომის მე-8 თავში.

[სქოლიო]

საკვანძო ბიბლიური მუხლი

„რამდენადაც თქვენი მხრივ შესაძლებელია, მშვიდობიანად იყავით ყველასთან“ (რომაელები 12:18).

რჩევა

სანამ რამეს დაასკვნიდე, ჯერ მეგობარს მოუსმინე (იგავები 18:13).

იცოდი, რომ . . . ?

კარგი მეგობრები ერთმანეთის თავისუფლებას არ ზღუდავენ (იგავები 25:17). თუ მეგობრისგან ზედმეტად ითხოვ დროსა და ყურადღებას, თქვენს ურთიერთობას წყალი შეუდგება.

რა უნდა გავაკეთო

თუ მეგობარი მაწყენინებს და მასთან დალაპარაკებას გადავწყვეტ, პირველ რიგში ვეტყვი, რომ ․․․․․

გაბრაზებულიც რომ ვიყო მეგობარზე, მაინც ვეცდები ․․․․․

რა ვკითხო მშობლებს ამ საკითხზე? ․․․․․

როგორ ფიქრობ?

● რატომ ცივდება ზოგჯერ მეგობრებს შორის ურთიერთობა?

● თუ მეგობარი გაწყენინებს, რა შემთხვევაში ჩათვლი საჭიროდ მასთან დალაპარაკებას და რა შემთხვევაში — არა?

● რა შეიძლება გასწავლოს მეგობრისგან გულისტკენამ?

● შენი მხრიდან რის გაკეთება შეგიძლია იმისათვის, რომ მეგობარმა გული არ გატკინოს?

[ჩანართი 95 გვერდზე]

„ყველაფრის თავიდან დაწყება რომ შემეძლოს, ჩემს მეგობარს სრულყოფილებას არ მოვთხოვდი, უფრო მეტად მოვუსმენდი, გვერდში დავუდგებოდი და მის შეცდომებს არ გავაზვიადებდი. ახლა ვხვდები, რომ მეგობრობა სირთულეებით იცდება“ (კინონი).

[სურათი 94 გვერდზე]

მაშინვე გადააგდებ კარგ ტანსაცმელს, თუ ოდნავ გაგეხევა? ნურც მეგობარზე იტყვი უარს უბრალო გაუგებრობის გამო.