როგორ შეუძლიათ ანგელოზებს თქვენი დახმარება?

როგორც ბიბლიიდან ჩანს, ღვთის ნება რომ შესრულებულიყო, ზოგჯერ ანგელოზები ღვთის მსახურებს იცავდნენ (ფსალმუნი 34:7). მოვიყვანოთ რამდენიმე მაგალითი:

• როდესაც იეჰოვამ ბოროტებით სავსე ქალაქები, სოდომი და გომორა გაანადგურა, ანგელოზები მართალ ლოტსა და მის ოჯახს დაეხმარნენ, სოდომიდან გაქცეულიყვნენ (დაბადება 19:1, 15—26).

• როცა ძველ ბაბილონში სამი ახალგაზრდა ებრაელი გავარვარებულ ღუმელში ჩაყარეს, ღმერთმა „თავისი ანგელოზი გამოგზავნა და იხსნა თავისი მსახურები“ (დანიელი 3:19—28).

• მას შემდეგ, რაც მართალმა კაცმა, დანიელმა, მთელი ღამე დამშეული ლომების ხაროში გაატარა, თავისი გადარჩენის მიზეზი ასე ახსნა: „ჩემმა ღმერთმა თავისი ანგელოზი გამოგზავნა და ლომებს პირი აუკრა“ (დანიელი 6:16, 22).

ანგელოზები მხარს უჭერდნენ პირველი საუკუნის ქრისტიანულ კრებას

დროდადრო ღვთის ანგელოზები პირველი საუკუნის ქრისტიანული კრების წევრებს ეხმარებოდნენ, როცა ეს იეჰოვას განზრახვის შესასრულებლად იყო საჭირო. აი, ამის რამდენიმე მაგალითი:

• ერთხელ ანგელოზმა საპყრობილის კარი გააღო, გაათავისუფლა დაპატიმრებული მოციქულები და უთხრა, რომ კვლავ გაეგრძელებინათ ტაძარში ქადაგება (საქმეები 5:17—21).

• ანგელოზმა მახარობელ ფილიპეს მიუთითა, რომ იერუსალიმიდან ღაზასკენ მიმავალ უკაცრიელ გზაზე ერთ ეთიოპს შეხვედროდა, რომელიც იერუსალიმში თაყვანსაცემად იყო ჩასული, და მისთვის ექადაგა (საქმეები 8:26—33).

• როდესაც ღვთის ნებისამებრ უცხოტომელებსაც მიეცათ გაქრისტიანების შესაძლებლობა, ანგელოზი ხილვაში რომაელ ასისთავს, კორნელიუსს, გამოეცხადა და უთხრა, რომ მოციქული პეტრე სახლში მიეწვია (საქმეები 10:3—5).

• ანგელოზი საპყრობილეში მყოფ მოციქულ პეტრეს გამოეცხადა და იქიდან გამოიყვანა (საქმეები 12:1—11).

როგორ შეუძლიათ ანგელოზებს თქვენი დახმარება?

არაფერი მოწმობს იმაზე, რომ დღეს ღმერთი ანგელოზების მეშვეობით სასწაულებრივი სახით ეხმარება ადამიანებს, როგორც ეს ბიბლიურ დროში ხდებოდა. თუმცა იესომ ასეთი რამ იწინასწარმეტყველა: „ამ სასიხარულო ცნობას სამეფოს შესახებ იქადაგებენ მთელ მსოფლიოში ყველა ხალხისთვის დასამოწმებლად და მაშინ მოვა აღსასრული“ (მათე 24:14). იცოდით, რომ ქრისტეს მოწაფეები ამ დავალებას ანგელოზების მეთვალყურეობით ასრულებენ?

როგორც წიგნ „გამოცხადებიდან“ ვიგებთ, ანგელოზები ყველაფერს აკეთებენ იმისთვის, რომ ადამიანებმა მთელ მსოფლიოში იეჰოვა ღმერთისა და მისი განზრახვების შესახებ გაიგონ. იოანე მოციქულმა დაწერა: «ვიხილე სხვა ანგელოზი, რომელიც ცაში დაფრინავდა და მარადიული სასიხარულო ცნობა ჰქონდა, რომ ეხარებინა დედამიწის მკვიდრთათვის, ყოველი ერისთვის, ტომისთვის, ენისა და ხალხისთვის. ის ხმამაღლა ამბობდა: „გეშინოდეთ ღვთისა და დიდება მიაგეთ მას, რადგან მოვიდა მისი სასამართლოს საათი. თაყვანი ეცით ცისა და დედამიწის, ზღვისა და წყალთა წყაროების შემქმნელს“» (გამოცხადება 14:6, 7). დღესაც არაერთი შემთხვევა მოწმობს, რომ ანგელოზები მხარს უჭერენ სამეფოს შესახებ სასიხარულო ცნობის ქადაგებას. ერთმა ცოდვილმაც რომ მოინანიოს, „ხარობენ ღვთის ანგელოზები“ (ლუკა 15:10).

რა მოხდება, როცა სამქადაგებლო საქმე დასრულდება? მაშინ „ზეციერი ლაშქარი“ მეფეთა მეფის, იესო ქრისტეს, მეთაურობით „ყოვლისშემძლე ღვთის დიდ დღეს“ გამართულ არმაგედონის ომში იბრძოლებს (გამოცხადება 16:14—16; 19:14—16). უფალ იესო ქრისტესთან ერთად ძლევამოსილი ანგელოზები ღვთის განაჩენს აღასრულებენ და შურს იძიებენ მათზე, „ვინც არ ემორჩილება სასიხარულო ცნობას ჩვენი უფლის იესოს შესახებ“ (2 თესალონიკელები 1:7, 8).

დარწმუნებული იყავით, რომ ანგელოზებს თითოეული თქვენგანის მდგომარეობა აღელვებთ. ისინი გულწრფელად არიან დაინტერესებული ყველა იმ ადამიანის კეთილდღეობით, ვისაც ღვთის მსახურება სურს. იეჰოვას თავისი ანგელოზების მეშვეობით არაერთხელ განუმტკიცებია და დაუცვია ერთგული მსახურები (ებრაელები 1:14).

ასე რომ, თითოეული ჩვენგანი მნიშვნელოვანი არჩევანის წინაშე დგას: გამოვეხმაურებით სასიხარულო ცნობას, რომელიც დღეს მთელ მსოფლიოში ვრცელდება? თქვენ მახლობლად მცხოვრები იეჰოვას მოწმეები სიამოვნებით აგიხსნიან, თუ როგორ შეუძლიათ ღვთის ძლევამოსილ ანგელოზებს თქვენი დახმარება.