კრების როლი ბიბლიის შემსწავლელის სულიერ ზრდასა და ნათლობაში

1, 2. ვის შეუძლია თავისი წვლილის შეტანა ბიბლიის შემსწავლელის სულიერ ზრდასა და ნათლობაში?

„ძალიან მომწონდა, რასაც ბიბლიის შესწავლის დროს ვიგებდი. ვიცოდი, რომ ეს ჭეშმარიტება იყო, მაგრამ მხოლოდ და-ძმებთან ურთიერთობის შემდეგ გადავდგი ნაბიჯები და მოვინათლე“, — ამბობს ფიჯიზე მცხოვრები ემი. მისი სიტყვებიდან ერთი მნიშვნელოვანი აზრი იკვეთება: უფრო დიდია იმის ალბათობა, რომ ბიბლიის შემსწავლელი სულიერად წინ წაიწევს და მოინათლება, თუ მას ამაში მთელი კრება დაეხმარება.

² კრების რიცხობრივ ზრდაში თითოეულ მაუწყებელს შეაქვს თავისი წვლილი (ეფეს. 4:16). ვანუატუზე მცხოვრები ერთი პიონერი და ლეილანი ამბობს: „ამბობენ, ბავშვის აღზრდას მთელი სოფელი სჭირდებაო. იმავეს ვიტყოდი მოწაფეების მომზადებაზეც. შეიძლება ითქვას, რომ ერთი მოწაფის მომზადებას მთელი კრება სჭირდება“. მაგალითად, ბავშვის აღზრდაში ჩართული არიან როგორც ოჯახის წევრები, ისე ოჯახის მეგობრები თუ მასწავლებლები. ეს პროცესი მოიცავს ბავშვის წახალისებას და მისთვის სხვადასხვა ფასეულობის ჩანერგვას. მსგავსად ამისა, თითოეულ მაუწყებელს შეუძლია თავისი წვლილი შეიტანოს ბიბლიის შემსწავლელის სულიერ ზრდასა და ნათლობაში, იქნება ეს რჩევის სახით, გამამხნევებელი სიტყვებითა თუ კარგი პირადი მაგალითით (იგავ. 15:22).

3. რომელ აზრს გამოყოფდით ანას, დორინისა და ლეილანის კომენტარებიდან?

³ რატომ უნდა დაიხმაროს ბიბლიის მასწავლებელმა სხვა მაუწყებლები შესწავლაში? ანა, რომელიც სპეციალურ პიონერად მსახურობს მოლდოვაში, ამბობს: „ერთი ადამიანისთვის ძალიან რთულია, დააკმაყოფილოს ბიბლიის შემსწავლელის ყველა მოთხოვნილება, რაც მის სულიერ ზრდას შეუწყობს ხელს“. დორინი, რომელიც იმავე ქვეყანაში მსახურობს სპეციალურ პიონერად, აღნიშნავს: „ხშირად სხვა მაუწყებლები ისეთ რამეს ამბობენ, რაც შემსწავლელის გულს ეხება. მსგავსი რამ მე თავში აზრადაც არ მომივიდოდა“. ლეილანი კიდევ ერთ მიზეზზე ამახვილებს ყურადღებას: „როცა შემსწავლელის მიმართ ყველა სითბოსა და ყურადღებას ავლენს, ის ადვილად ხვდება, სინამდვილეში ვინ არის იეჰოვას ხალხი“ (იოან. 13:35).

4. რას განვიხილავთ ამ სტატიაში?

⁴ შესაძლოა ფიქრობთ, თქვენ რით შეგიძლიათ დაეხმაროთ სხვა მაუწყებლის ბიბლიის შემსწავლელს. მოდი ვიმსჯელოთ, რა შეგვიძლია გავაკეთოთ, როცა შესწავლაზე გვეპატიჟებიან და როცა შემსწავლელი კრების შეხვედრებზე იწყებს დასწრებას. იმაზეც ვისაუბროთ, რა წვლილი შეაქვთ უხუცესებს ბიბლიის შემსწავლელის სულიერ ზრდასა და ნათლობაში.

როცა შესწავლაზე გეპატიჟებიან

5. თქვენ რა გევალებათ, როცა ბიბლიის შესწავლაზე გეპატიჟებიან?

⁵ ბიბლიის შესწავლის დროს უშუალოდ მასწავლებელია პასუხისმგებელი, რომ შემსწავლელს განსახილველი საკითხი კარგად აუხსნას. თუ ბიბლიის შესწავლაზე დაგპატიჟებენ, გახსოვდეთ, რომ თქვენ დამხმარის როლს ასრულებთ (ეკლ. 4:9, 10). რა შეგიძლიათ გააკეთოთ, რომ კარგი პარტნიორობა გასწიოთ?

6. როგორ დაგეხმარებათ იგავების 20:18-ში ჩაწერილი პრინციპი, როცა ბიბლიის შესწავლაზე გეპატიჟებიან?

⁶ მოემზადეთ ბიბლიის შესწავლისთვის. ვიდრე შესწავლაზე წახვალთ, ჯერ მასწავლებლისგან გაიგეთ ცოტა რამ შემსწავლელზე (წაიკითხეთ იგავების 20:18). შეგიძლიათ მასწავლებელს სთხოვოთ, ზოგადი ინფორმაცია მოგაწოდოთ შემსწავლელის შესახებ. ამასთანავე ჰკითხეთ, რა თემას განიხილავთ შესწავლის დროს, რაზე უნდა გააკეთოთ აქცენტი, რისი თქმა ან გაკეთება ღირს ან არ ღირს შესწავლის დროს და რამ შეიძლება წაახალისოს ბიბლიის შემსწავლელი სულიერი წინსვლისკენ. ფაქტია, მასწავლებელი კონფიდენციალურ ინფორმაციას არ გაგიზიარებთ შემსწავლელზე, თუმცა რასაც გეტყვით, ეს შეიძლება პრაქტიკული აღმოჩნდეს თქვენთვის. ჯოი, რომელიც მისიონერად მსახურობს, მსგავსი სახის ინფორმაციას უზიარებს მას, ვისაც ბიბლიის შესწავლებზე ეპატიჟება. ის ამბობს: „ამ ყველაფრის ცოდნა ეხმარება ჩემს პარტნიორს, რომ დაინტერესდეს ბიბლიის შემსწავლელით და თავისი წვლილი შეიტანოს შესწავლაში“.

7. რატომ უნდა მოემზადოთ წინასწარ, თუ შესწავლაზე გეპატიჟებიან?

⁷ თუ ბიბლიის შესწავლაზე გეპატიჟებიან, კარგს იზამთ, თუ წინასწარ მოამზადებთ განსახილველ მასალას (ეზრ. 7:10). ზემოთ მოხსენიებული ძმა დორინი ამბობს: „კარგია, როცა შესწავლისთვის ჩემი პარტნიორიც მომზადებულია. ამ შემთხვევაში ის საინტერესოდ ერთვება განხილვაში“. გარდა ამისა, შემსწავლელს კარგ მაგალითს მისცემთ, როცა ორივე სათანადოდ იქნებით მომზადებული. თუ განსახილველი მასალის საგულდაგულოდ მომზადებას ვერ მოახერხებთ, მთავარ აზრებს მაინც გადაავლეთ თვალი.

8. რა უნდა გააკეთოთ, რომ ბიბლიის შესწავლის დროს წარმოთქმული თქვენი ლოცვა შინაარსიანი იყოს?

⁸ ვინაიდან ლოცვა ძალიან მნიშვნელოვანია ბიბლიის შესწავლის დროს, კარგი იქნება, წინასწარ დაფიქრდეთ, რას იტყვით, თუ ამის გაკეთება თქვენ მოგიწევთ. ასე უფრო შინაარსიანად ილოცებთ (ფსალმ. 141:2). იაპონიაში მცხოვრებ ჰანეს დღემდე ახსოვს ის ლოცვები, რომლებსაც ის და წარმოთქვამდა, მის მასწავლებელს რომ ახლდა შესწავლაზე. ჰანე ამბობს: „მისი ლოცვიდან აშკარად ჩანდა, როგორი სიახლოვე ჰქონდა იეჰოვასთან. მინდოდა, მისთვის მიმებაძა. ძალიან მსიამოვნებდა, როცა მეც მახსენებდა ლოცვაში“.

9. იაკობის 1:19-ის თანახმად, როგორ შეგიძლიათ კარგი პარტნიორობა გაუწიოთ მასწავლებელს ბიბლიის შესწავლის დროს?

⁹ კარგად შეასრულეთ თქვენი, როგორც დამხმარის, როლი. ერთი სპეციალური პიონერი ნიგერიიდან ამბობს: „კარგი პარტნიორი ყურადღებით ადევნებს თვალყურს შესწავლის პროცესს. ის უადგილოდ არ ერთვება განხილვაში და არც ბევრს ლაპარაკობს, რადგან ესმის, რომ ძირითადი პასუხისმგებლობა მასწავლებელს აკისრია“. როგორ უნდა მიხვდეთ, როდის და როგორ უნდა ჩაერთოთ შესწავლაში? (იგავ. 25:11). ყურადღებით მოუსმინეთ მასწავლებლისა და შემსწავლელის დიალოგს (წაიკითხეთ იაკობის 1:19). ეს დაგეხმარებათ, რომ საჭირო დროს ჩაერთოთ მსჯელობაში. ამავე დროს კარგად დაფიქრდით, სანამ რაიმეს იტყვით. მაგალითად, ბევრს ნუ ილაპარაკებთ, ნუ ჩაეჭრებით მასწავლებელს მსჯელობაში და ნუ შემოიტანთ ახალ თემას. მოკლე კომენტარებით, სათანადო მაგალითებითა და კითხვებით განსახილველ მასალას მეტ ნათელს მოჰფენთ. შეიძლება ყოველთვის არ მოგეცეთ იმის საშუალება, რომ აქტიურად ჩაებათ შესწავლაში, მაგრამ ის მაინც შეგიძლიათ, რომ შეაქოთ შემსწავლელი და მისით დაინტერესდეთ. ეს მის სულიერ ზრდას შეუწყობს ხელს.

10. როგორ შეიძლება დაეხმაროს თქვენი გამოცდილება ბიბლიის შემსწავლელს?

¹⁰ გაუზიარეთ თქვენი გამოცდილება. თუ საჭიროდ ჩათვლით, მოკლედ მოუყევით ბიბლიის შემსწავლელს, როგორ გაიგეთ ჭეშმარიტება, როგორ გადალახეთ დაბრკოლებები და როგორ იგრძენით იეჰოვას მხარდაჭერა (ფსალმ. 78:4, 7). თქვენი მონაყოლი შეიძლება ზედგამოჭრილი აღმოჩნდეს მისთვის. ამან შეიძლება რწმენა გაუძლიეროს, ნათლობისკენ წაახალისოს და შექმნილი დაბრკოლებების გადალახვაში დაეხმაროს (1 პეტ. 5:9). ბრაზილიაში მცხოვრები გაბრიელი, რომელიც პიონერად მსახურობს, იხსენებს, ყველაზე მეტად რა დაეხმარა ბიბლიის შესწავლის დროს. ის ამბობს: „როცა და-ძმების ისტორიებს ვისმენდი, ვხვდებოდი, რომ იეჰოვამ კარგად იცის, რა პრობლემებსაც ვაწყდებით. თუ ისინი გაუმკლავდნენ პრობლემებს, ამას მეც შევძლებდი“.

როცა ბიბლიის შემსწავლელი კრების შეხვედრებს ესწრება

11, 12. რატომ უნდა შევხვდეთ თბილად კრებაზე მოსულ ბიბლიის შემსწავლელებს?

¹¹ ბიბლიის შემსწავლელმა სულიერად წინ რომ წაიწიოს და მოინათლოს, მნიშვნელოვანია, რეგულარულად დაესწროს კრების შეხვედრებს (ებრ. 10:24, 25). კრებაზე პირველად, დიდი ალბათობით, თავისი მასწავლებელი დაპატიჟებს. როცა ის შეხვედრაზე მოვა, თითოეულ ჩვენგანს შეგვიძლია წავახალისოთ, რომ კვლავ დაესწროს კრებას. კონკრეტულად რა შეგვიძლია გავაკეთოთ?

¹² გულთბილად შეხვდით (რომ. 15:7). თუ შემსწავლელს თბილად შეხვდებით, სავარაუდოდ, მას სურვილი გაუჩნდება, რომ კვლავ დაესწროს კრების შეხვედრას. შეეცადეთ, თავი უხერხულად არ აგრძნობინოთ, თბილად მიესალმეთ და გააცანით სხვები. ნუ იფიქრებთ, რომ ეს მხოლოდ მასწავლებლის მოვალეობაა. მას შეიძლება აგვიანდებოდეს ან სხვა საქმეებით იყოს დაკავებული. ყურადღებით მოუსმინეთ და დაინტერესდით მისით. რატომ არის მნიშვნელოვანი, რომ თბილად შეხვდეთ შემსწავლელს? დიმიტრი, რომელიც რამდენიმე წლის წინ მოინათლა და ახლა მომსახურედ მსახურობს, ასე იხსენებს თავის პირველ კრების შეხვედრას: „იეჰოვას მოწმეების დარბაზთან ვიდექი და, ცოტა არ იყოს, ვღელავდი. ამ დროს ერთმა ძმამ შემნიშნა და თბილად შემიპატიჟა დარბაზში. ბევრი მოვიდა და მომესალმა, რამაც ძალიან გამაკვირვა. ასეთი ყურადღება იმდენად მესიამოვნა, რომ მზად ვიყავი, ყოველდღე დავსწრებოდი კრებას. მსგავსი რამ სხვაგან არასდროს მიგრძნია“.

13. რაში შეიძლება დაეხმაროს თქვენი კარგი მაგალითი ბიბლიის შემსწავლელს?

¹³ მიეცით კარგი მაგალითი. ჩვენი მაგალითი დაეხმარება შემსწავლელს, დარწმუნდეს, რომ ჭეშმარიტი ქრისტიანები ვართ (მათ. 5:16). ვიტალი, რომელიც მოლდოვაში პიონერად მსახურობს, ამბობს: „ვაკვირდებოდი იეჰოვას მოწმეების ცხოვრების წესს, მათ საუბრებსა და ქცევებს. ამან დამარწმუნა, რომ ისინი ნამდვილად ღვთის ხალხია“.

14. როგორ შეგიძლიათ თქვენი მაგალითით დაეხმაროთ შემსწავლელს სულიერ ზრდაში?

¹⁴ მონათვლისთვის მზად რომ იყოს, შემსწავლელი ნასწავლის თანახმად უნდა ცხოვრობდეს. თუმცა ეს ყოველთვის ადვილი არ არის. როცა შემსწავლელი თქვენს მაგალითზე ხედავს, რა სიკეთე მოაქვს ბიბლიური პრინციპების გამოყენებას, ეს მასაც მისცემს სტიმულს, რომ მოგბაძოთ (1 კორ. 11:1). აი რას გვიყვება ზემოხსენებული ჰანე: „ჩემთვის და-ძმები იმის ცოცხალ მაგალითს წარმოადგენდნენ, რასაც ბიბლიიდან ვსწავლობდი. მათი შემხედვარე მივხვდი, რას ნიშნავს გამხნევება, პატიება და სიყვარულის გამოვლენა. ისინი ყოველთვის დადებითად საუბრობდნენ სხვებზე. ამან მათი მიბაძვის სურვილი გამიჩინა“.

15. იგავების 27:17-დან გამომდინარე, რატომ უნდა დაუმეგობრდეთ იმ ბიბლიის შემსწავლელს, რომელიც კრების შეხვედრებს ესწრება?

¹⁵ დაუმეგობრდით შემსწავლელს. თუ შემსწავლელი რეგულარულად ესწრება კრების შეხვედრებს, ყურადღება გამოიჩინეთ მის მიმართ (ფილ. 2:4). კარგი იქნება, თუ უკეთ გაიცნობთ მას და შეაქებთ იმ სასიკეთო ცვლილებებისთვის, რომლებსაც ახდენს. მაგალითად, შეგიძლიათ ჰკითხოთ ბიბლიის შესწავლის, ოჯახის ან სამუშაოს შესახებ, ოღონდ ისე, რომ ზედმეტად პირადულ კითხვებში არ გადახვიდეთ. ასეთმა საუბრებმა შეიძლება უფრო დაგაახლოვოთ ერთმანეთთან. თუ დაუმეგობრდებით შემსწავლელს, ამით ხელს შეუწყობთ მას სულიერ ზრდასა და ნათლობაში (წაიკითხეთ იგავების 27:17). ჰანე დღეს პიონერად მსახურობს. იმ პერიოდს, როცა კრების შეხვედრებზე დაიწყო სიარული, ასე იხსენებს: „მას შემდეგ, რაც კრებაში მეგობრები შევიძინე, მოუთმენლად ველოდი ყოველ მომდევნო შეხვედრას. დაღლილიც რომ ვყოფილიყავი, მაინც მივდიოდი კრებაზე. ახალშეძენილ მეგობრებთან ურთიერთობა დამეხმარა, ჩამოვშორებოდი იმ მეგობრებს, რომლებიც ჩემს რწმენას არ იზიარებდნენ. მინდოდა, უფრო დავახლოებოდი იეჰოვას და და-ძმებს. ამ ყველაფერმა ნათლობა გადამაწყვეტინა“.

16. კიდევ როგორ დავეხმაროთ ბიბლიის შემსწავლელებს, რომ კრებაში თავი შინაურულად იგრძნონ?

¹⁶ ბიბლიის შემსწავლელს სულიერი ზრდა დაეხმარება, კრებაში თავისი ადგილი დაინახოს. ამაში ხელს შევუწყობთ, თუ მის მიმართ სტუმართმოყვარეობას გამოვიჩენთ (ებრ. 13:2). მოლდოვაში მცხოვრები დენისი იმ პერიოდს, როცა ბიბლიას სწავლობდა, ასე იხსენებს: „მე და ჩემი მეუღლე და-ძმებმა არაერთხელ დაგვპატიჟეს. ასეთი შეხვედრების დროს ისინი ყვებოდნენ, როგორ ეხმარებოდა მათ იეჰოვა. ეს ძალიან გვამხნევებდა. მათთან ურთიერთობა იეჰოვას მსახურების სურვილს მიძლიერებდა და მარწმუნებდა, რომ წინ საუცხოო მომავალი გველოდა“. როცა ბიბლიის შემსწავლელი მაუწყებელი გახდება, შეგიძლიათ მას მსახურება დაუგეგმოთ. ბრაზილიელი მაუწყებელი დიეგო ამბობს: „ბევრმა დამიგეგმა მსახურება. ეს საუკეთესო საშუალებაა და-ძმების ახლოს გასაცნობად. თანაქრისტიანებიც უკეთ გავიცანი და იეჰოვასა და იესოსაც უფრო დავუახლოვდი“.

უხუცესების როლი

17. როგორ ეხმარებიან უხუცესები ბიბლიის შემსწავლელებს?

¹⁷ დრო გამოუყავით ბიბლიის შემსწავლელებს. უხუცესებო, თქვენი სიყვარული და მზრუნველობა დაეხმარებათ ბიბლიის შემსწავლელებს სულიერ ზრდასა და ნათლობაში. ცდილობთ, ყოველთვის გამოელაპარაკოთ ბიბლიის შემსწავლელებს კრების შეხვედრაზე? თქვენს გულწრფელ ინტერესში იმითაც დაარწმუნებთ, თუ მათ სახელებს დაიმახსოვრებთ. ეს განსაკუთრებით მნიშვნელოვანია, როცა ისინი კომენტარს აკეთებენ. კარგი იქნება, თუ შიგადაშიგ დროს გამონახავთ და მაუწყებლებს ბიბლიის შესწავლაზე გაჰყვებით. თქვენ ვერც კი წარმოიდგენთ, რამხელა გავლენის მოხდენა შეგიძლიათ შემსწავლელებზე. ერთი და, რომელიც ნიგერიაში პიონერად მსახურობს, ამბობს: «ბევრ ჩემს შემსწავლელს ძალიან აკვირვებს, როცა შესწავლაზე უხუცესი მიმყავს. ერთ-ერთმა მათგანმა მითხრა: „ჩემი პასტორი ამას არასდროს გააკეთებდა. ის მხოლოდ მდიდრებთან მიდის, ისიც იმ შემთხვევაში, თუ ფულს გადაუხდიან“». დღეს ეს ბიბლიის შემსწავლელი კრების შეხვედრებს ესწრება.

18. როგორ შეუძლიათ უხუცესებს საქმეების 20:28-ში ჩაწერილი პრინციპის გათვალისწინება?

¹⁸ დაარიგეთ და წაახალისეთ ის მაუწყებლები, რომლებიც შესწავლებს ატარებენ. უხუცესებს სერიოზული პასუხისმგებლობა აკისრიათ, რომ მაუწყებლებს მსახურების გაუმჯობესებაში დაეხმარონ, რაშიც ბიბლიის შესწავლების ხარისხის გაუმჯობესებაც იგულისხმება (წაიკითხეთ საქმეების 20:28). თუ მაუწყებელს თქვენი თანდასწრებით ბიბლიის შესწავლის ჩატარება ეუხერხულება, საკუთარ თავზე აიღეთ ინიციატივა. ზემოხსენებული ნიგერიელი პიონერი და ამბობს: „უხუცესები ხშირად მეკითხებიან ჩემი ბიბლიის შემსწავლელების ამბებს. თუ რაიმე პრობლემას ვხვდები ბიბლიის შესწავლის დროს, ისინი პრაქტიკულ რჩევებს მაძლევენ“. უხუცესებს ბევრი რამის გაკეთება შეუძლიათ იმ მაუწყებლების გასამხნევებლად და წასახალისებლად, რომლებიც შესწავლებს ატარებენ (1 თეს. 5:11). ეს და დასძენს: „ძალიან მსიამოვნებს, როდესაც უხუცესები მამხნევებენ და მეუბნებიან, რომ აფასებენ ჩემს შრომას. მათი სიტყვები ჩემთვის ისევე გამომაცოცხლებელია, როგორც პაპანაქება სიცხეში ცივი წყალი. შექება თვითრწმენას მმატებს და მეხმარება, მეტი სიხარულით განვაგრძო ბიბლიის შესწავლების ჩატარება“ (იგავ. 25:25).

19. რა გვანიჭებს სიხარულს?

¹⁹ მაშინაც კი, თუ ბიბლიის შესწავლა არ გვაქვს, შეგვიძლია ხელი შევუწყოთ შემსწავლელების სულიერ ზრდას. თუ შესწავლის დროს ბევრს არ ვისაუბრებთ, კარგად მომზადებულ და გააზრებულ კომენტარებს გავაკეთებთ, ამით შესწავლის ჩამტარებელს დიდ დახმარებას გავუწევთ. შეგვიძლია დავუმეგობრდეთ იმ ბიბლიის შემსწავლელებს, რომლებიც კრების შეხვედრებს ესწრებიან და კარგი მაგალითი მივცეთ. უხუცესებსაც შეუძლიათ მათი გამხნევება, თუ დროს დაუთმობენ. უხუცესები მათაც წაახალისებენ, ვინც შესწავლებს ატარებს, თუ დაეხმარებიან შესწავლის ხარისხის გაუმჯობესებაში და შეაქებენ. ყველას გვახარებს, რომ ვეხმარებით ადამიანებს, შეიყვარონ ჩვენი ზეციერი მამა იეჰოვა და ემსახურონ მას.