1 | ლოცვა — „ყველა თქვენი საწუხარი მას მიანდეთ“

ᲑᲘᲑᲚᲘᲐᲨᲘ ᲜᲐᲗᲥᲕᲐᲛᲘᲐ: „ყველა თქვენი საწუხარი მას [ღმერთს] მიანდეთ, რადგან ის ზრუნავს თქვენზე“ (1 ᲞᲔᲢᲠᲔ 5:7).

არსი

იეჰოვა ღმერთი მოგვიწოდებს, ნებისმიერი საწუხარი გავუზიაროთ, რაც გულს გვიმძიმებს (ფსალმუნი 55:22). არ უნდა ვიფიქროთ, რომ პრობლემა იმდენად უმნიშვნელოა, რომ ამაზე ლოცვა არ ღირს; ან იმდენად სერიოზულია, რომ ლოცვა ვერაფერში დაგვეხმარება. იეჰოვა ზრუნავს ჩვენზე, ამიტომ ჩვენი საწუხარი მისი საწუხარიცაა. ლოცვა აუცილებელია, რომ შინაგანი სიმშვიდე ვიგრძნოთ (ფილიპელები 4:6, 7).

როგორ გვეხმარება ლოცვა

მენტალური პრობლემების დროს შეიძლება თავი მარტოსულად ვიგრძნოთ. ზოგჯერ სხვებს ბოლომდე არ ესმით, სინამდვილეში რისი ატანა გვიწევს (იგავები 14:10). მაგრამ ღმერთი ყოველთვის მზადაა, ყურადღებით მოგვისმინოს, გაგვიგოს და თანაგვიგრძნოს. იეჰოვა კარგად გვიცნობს; იცის, რა გვაწუხებს და სურს, რომ ლოცვაში გავანდოთ ჩვენი ტკივილი (2 მატიანე 6:29, 30).

როცა ლოცვაში ღმერთს გულს ვუღვრით, გვიმტკიცდება რწმენა, რომ ის ზრუნავს ჩვენზე. ამ დროს იმავეს ვგრძნობთ, რასაც ფსალმუნმომღერალი, რომელმაც თქვა: „დაინახე ჩემი გაჭირვება; შენ უწყი, რა მიფორიაქებს სულს“ (ფსალმუნი 31:7). მხოლოდ იმის ცოდნაც კი, რომ იეჰოვას შეუმჩნეველი არ რჩება ჩვენი გასაჭირი, გვეხმარება, ხელი არ ჩავიქნიოთ და განვაგრძოთ ბრძოლა. გარდა იმისა, რომ ის ამჩნევს ჩვენს შინაგან მდგომარეობას, საუკეთესოდ ესმის ჩვენი და ბიბლიის მეშვეობით გვანუგეშებს.

ღვთის სიტყვის ძალა — ჯულიანი

რასთან მიწევს ბრძოლა

„შფოთვითი აშლილობა და აკვიატებული მდგომარეობის ნევროზი მაქვს. ზოგჯერ შფოთვა მოულოდნელად, სრულიად უმიზეზოდ მეწყება; არადა რამდენიმე წუთის წინ თავს მშვენივრად ვგრძნობდი. ხშირად ასეთი რამ ხალხთან ყოფნის დროს მემართება. მეტისმეტად ვწუხვარ ხოლმე, რას იფიქრებენ სხვები ჩემზე.

ისინი, ვინც ჩემი პრობლემის შესახებ იციან, ყველანაირად მიდგანან მხარში. უნდა ვაღიარო, რომ ზოგჯერ მათი სიტყვები ვერაფრით მანუგეშებს, მაგრამ მაინც სასიამოვნოა, რომ ცდილობენ ჩემ დახმარებას.

ამ დაავადებების გამო ზოგჯერ ლოცვაც მიჭირს. ძალიან უნდა დავძაბო გონება, რომ ყურადღება მოვიკრიბო და იეჰოვას ლოცვით მივმართო. იმდენად სწრაფად მეფანტება გონება, რომ აზრებს თავს ვერ ვუყრი. ამიტომაც მიძნელდება, ჩემი ფიქრები და გრძნობები იეჰოვას გავუზიარო“.

როგორ მეხმარება ბიბლია

«როგორც ბიბლიიდან გავიგე, არ არის აუცილებელი, ლოცვები ხანგრძლივი და მაღალფარდოვანი იყოს, რომ ღმერთმა შეისმინოს. როცა გრძნობების სიტყვებით გადმოცემა მიჭირს, უბრალოდ ვამბობ ხოლმე: „იეჰოვა, გთხოვ დამეხმარე“. ასეთი მოკლე ლოცვის შემდეგაც კი ვგრძნობ, რომ იეჰოვას კარგად ესმის ჩემი და შინაგან სიმშვიდეს მგვრის, რაც იმ მომენტში ყველაზე მეტად მჭირდება. რა თქმა უნდა, მკურნალობის კურსსაც გავდივარ და თავს გაცილებით უკეთ ვგრძნობ. ეს ყველაფერი მეხმარება, ვებრძოლო ჩემს დაავადებას და წონასწორობა არ დავკარგო. მართალია, დიდი ძალისხმევის ფასად მიჯდება ლოცვა, მაგრამ სწორედ ამ დროს ვრწმუნდები იეჰოვას მზრუნველობასა და სიყვარულში».