წერილი ხელმძღვანელი საბჭოსგან

ძვირფასო თანამორწმუნენო,

მართლაც, რა დიდებულ დროში ვცხოვრობთ და რა დიდ სიხარულს განვიცდით! ძვირფასო და-ძმებო, ჩვენ ნამდვილად დიდ სიამოვნებას გვანიჭებს თქვენთან ერთად მხარდამხარ მსახურება და ჩვენი ზეციერი მამის, იეჰოვას შესახებ დამოწმება, რამაც უპრეცედენტო მასშტაბებს მიაღწია (სოფ. 3:9; იოან. 14:12).

მართალია, იეჰოვას სიხარულით ვემსახურებით, მაგრამ ეს იმას არ ნიშნავს, რომ სერიოზული პრობლემები არა გვაქვს. გასულ სამსახურებრივ წელს ზოგიერთი თქვენგანი მიწისძვრების, წყალდიდობების, ქარიშხლებისა და სხვა სტიქიური უბედურებების დროს სერიოზულად დაზარალდა (მათ. 24:7). ბევრ თქვენგანს ყოველდღე უწევს ბრძოლა ავადმყოფობასთან თუ სიბერით გამოწვეულ პრობლემებთან. თითოეულ ჩვენგანს მოუწევს „მშობიარობის ტკივილების“ ატანა, რომლებიც სულ უფრო და უფრო ძლიერდება (მათ. 24:8). ზოგ ქვეყანაში, მაგალითად, ერიტრეაში, სამხრეთ კორეასა და სომხეთში, ბევრი ჩვენი ძმა რწმენის გამო ციხეში ზის (მათ. 24:9).

ასეთი სირთულეების მიუხედავად, რა გვეხმარება დადებითი განწყობის შენარჩუნებაში? 2010 წლის მუხლი შეგვახსენებდა, რა იყო მნიშვნელოვანი: „სიყვარული ყველაფერს ითმენს, სიყვარული არასოდეს მთავრდება“ (1 კორ. 13:7, 8). დიახ, ერთმანეთისა და იეჰოვას სიყვარული გვაძლიერებს, რომ ყველაფერი მოვითმინოთ.

ბევრი, ვინც აცხადებს რომ ქრისტიანია, განცვიფრებას ვერ მალავს, როცა ხედავს, როგორ ფართოვდება ჩვენი სამქადაგებლო საქმიანობა და რა შეუჩერებლად მიიწევს წინ. შეიძლება ისინი არ ეთანხმებიან ჩვენს სწავლებებს, მაგრამ ზოგი ასეთ სიტყვებს ამბობს: „ჩვენ გასაკეთებელ საქმეს, თქვენ აკეთებთ!“ რა აძლევს იეჰოვას მოწმეებს დღედაღამ მსახურების ძალებს? ისევ და ისევ სიყვარული. როგორც ჩვენს ზეციერ მამას, არც ჩვენ გვსურს, რომ „ვინმე დაიღუპოს“ (2 პეტ. 3:9). გასულ სამსახურებრივ წელს დაფიქსირდა მაუწყებელთა უმაღლესი რიცხვი 7 508 050. ეს კარგად ცხადყოფს, რომ გვსურს, ყველამ მოინანიოს. სხვა რომელ რელიგიურ ორგანიზაციას ჰყავს ამდენი მოხალისე, რომლებიც ასე თავგამოდებით ქადაგებენ?

გვამხნევებს იმის დანახვა, თუ როგორ სრულდება ესაია წინასწარმეტყველის მიერ დაწერილი სიტყვები: „უკანასკნელ დღეებში იეჰოვას სახლის მთა განმტკიცდება მთების მწვერვალებს ზემოთ, გორებზე მაღლა აღიმართება და ყველა ერი მისკენ დაიწყებს დენას“ (ეს. 2:2—4). იეჰოვას სახლისკენ მიმავალ უამრავ ხალხს შორის არის 294 368 ადამიანი, რომლებიც გასულ სამსახურებრივ წელს მოინათლნენ. ამ ძვირფას და-ძმებს სიხარულით ვიღებთ ჩვენს ორგანიზაციაში. ქრისტიანული სიყვარული აღგვძრავს, რომ კვლავაც დავეხმაროთ მათ სატანა ეშმაკის თავდასხმების მოგერიებაში (1 პეტ. 5:8, 9).

2010 წლის 30 მარტს გახსენების საღამოს 18 706 895 კაცი დაესწრო. ეს იმაზე მეტყველებს, რომ ახლო მომავალში შეიძლება მილიონები შემოგვიერთდნენ იეჰოვას თაყვანისცემაში. რა სასიხარულოა, რომ იეჰოვამ დღემდე არ გაანადგურა ეს ბოროტი ქვეყნიერება! მანამ კი, სანამ ეს მოხდება, სიყვარული მოგვცემს მოთმინების ძალას (2 თეს. 3:5).

2010 წელს მთელ მსოფლიოში ჩატარებული საოლქო კონგრესები, სახელწოდებით „შეინარჩუნეთ იეჰოვასთან ახლო ურთიერთობა!“, დაგვეხმარა კიდევ უფრო განგვემტკიცებინა ჩვენს ზეციერ მამასთან, იეჰოვასთან, ურთიერთობა. ნამდვილად ჭეშმარიტია ფსალმუნმომღერლის სიტყვები: „ბედნიერია ხალხი, რომლის ღმერთიც იეჰოვაა!“ (ფსალმ. 144:15). რაც არ უნდა მოხდეს მომავალში, თუ დარწმუნებული ვიქნებით იეჰოვას მხარდაჭერაში ვერაფერი შეგვაშინებს (ფსალმ. 23:4). მალე იეჰოვა თავისი ძის მეშვეობით დაამსხვრევს „ეშმაკის საქმეებს“ (1 იოან. 3:8). ჩვენ მოუთმენლად ველით ამ დღის დადგომას! მანამდე კი უამრავი საქმე გვაქვს გასაკეთებელი (1 კორ. 15:58).

დარწმუნებული იყავით, რომ „განუწყვეტლივ გიხსენებთ ლოცვებში“ (რომ. 1:9). ასე რომ, „დარჩით ღვთის სიყვარულში, ვიდრე ელით ჩვენი უფლის იესო ქრისტეს გულმოწყალებას და გონებაში გაქვთ მარადიული სიცოცხლე“ (იუდ. 21).

ქრისტიანული სიყვარულით,

თქვენი ძმები,

იეჰოვას მოწმეთა ხელმძღვანელი საბჭო