Prat Tup Nga Lu Hkra Gara Hku Galaw Ra Ai

NDAI numsha hte shi a manang ni hpa hti nga ma ni? Tsun lu na kun? Teng ai. Nanhte hti nga ai NYE A CHYUM LAIKA MAUMWI hpe hti nga ma ai. Nanhte hti nga ai maumwi prat tup “NGA LU HKRA GARA HKU GALAW RA AI” lam hpe hti nga ma ai.

Shanhte hpa lam ni chye na la sai kun? Shawng nnan e prat tup hkrung nga lu na matu, Yehowa hte shi a kasha Yesu a lam hpe chye ra ai. Chyum Laika hta e, ‘prat tup nga lu na matu ndai zawn galaw ra ai nga nna tsun ai. Teng man ai Karai Kasang hte, ga ntsa de shangun dat ai Yesu a lam hpe sharin la ra ai.’

Yehowa Karai Kasng hte shi a kasha Yesu a lam hpe gara hku sharin la lu na kun? Lam langai mi gaw, NYE A CHYUM LAIKA BUK hpe ningpawt kaw nna htum hkra hti ra ai. Dai hta e, Yehowa hte Yesu a lam law law lawm ai. Teng ai nrai ni? Bai nna shan galaw lai wa sai lam ni hte, bai galaw ya na lam ni law law ka tawn ai. Raitimung ndai laika buk hpe hti ai hte sha grai nngut ai.

Dun ntsa hta taw nga ai kaga laika hpe mu a ni? Chyum Laika re. Ndai laika buk a rudi gindai shatai tawn ai Chyum Laika daw ni marai ngai hpe hti shangun u. Htani htana asak lu la na matu, Yehowa hpe teng ai hku nawku ai lam hta ra nga ai hkumtsup ai machye machyang hpe Chyum Laika gaw anhte hpe jaw ai. Dai majaw chyum Laika hpe loi hkring hkring hti ai lai kyang galaw ra ai.

Raitimung Yehowa hte Yesu a lam hpe sharin la ai hte sha garai n-ram ai. Shan hte seng ai lam, bai nna shan a sharin shaga ai lam law law chye timung htani htana asak garai nlu ai. Hpa naw ra nga ai hpe chye a ni?

Anhte sharin la ai lam hte maren mung hkan shatup ra ai. Yuda- iskarut hpe matsing ma ni? Yesu lata la ai kasa 12 hta shi mung langai mi lawm ai. Yuda gaw Yehowa hte Yesu a lam law law chye ai. Raitimung shi hpa byin mat a ni? Na wa jang tinang a akyu hpe chyu myit wa ai. Yesu hpe gumlau nna hpyen ni a lata hta gumhpraw 30 hte dut kau ai. Dai majaw Yuda-iskarut gaw htani htana asak nlu sai.

Maumwi 69 hta lawm ai Gehazi hpe matsing ma ni? Shi gaw tinang hte nseng ai hpun palawng hte gumhpraw hpe ra marin ai. Dai majaw arai ni hpe lu la na matu masu tsun ai. Raitimung Yehowa gaw shi hpe ari jaw ai. Anhte mung Yehowa a tara hpe n hkan shatup yang anhte hpe ari jaw na re.

Yehowa hpe sadi dung ai hte nawku ai masha kaja ni mung law law nga ai. Shanhte zawn anhte bung mayu ma ai. Teng ai nrai ni? Ma kaji Samuela gaw anhte a matu kasi ningli kaja madun ai. Naw matsing a ni? Maumwi 55 hta mu lu ai hte maren, Yehowa a nawku sum hta nnan sa wa ai shaloi, asak mali manga ning sha naw kaba ai. Dai majaw nanhte kade daram asak naw kaji timung Yehowa hpe n naw kulu hkra n kaji ai.

Anhte yawng kasi yu la na matu kaja htum ai wa gaw Yesu re. Maumwi 87 hta lawm ai hte maren, ma kaji prat hta pyi, nawku htingnu hta kaga masha ni hte shi a sumsing lamu na kawa a lam tsun ai. Shi a kasi ningli hpe chye hkan ga. Anhte a kaja htum ai Yehowa hte, shi a kasha Yesu a lam hpe dang lu ai daram kaga masha ni hpe tsun dan ga. Ndai lam ni hpe galaw ga ai rai yang gaw, ginding aga ntsa na Hparadisu ningnan kaw e anhte prat tup asak hkrung nga lu na re.