HKAJA 5

Tup Hkrak Jaw Hkra Hti Ai Lam

1 Timohti 4:13

KADUN DAWK: Laika man hta ka da ai ga si ni hpe nsen ja ja hte jaw hkra hti u.

Atsawm sha hkyen lajang u. Hpa majaw ka da ai hpe myit yu u. Ga si ni hpe n re ai sha, ga hkaw ni hpe hti shaman u. Ga si ni hpe shajan bang nna hti ai, shalai nna hti ai, kahtap htap hti ai ni hpe hkum galaw. Ga hkring, ga sa ni hpe sadi u.

Nang laika hti ai shaloi, ga si ni tup hkrak jaw n jaw, madat ya na matu marai langai ngai hpe karum hpyi u.
Ga si langai hpra a nsen hpe jaw hkra hti u. Ga si langai hpe gara hku nsen shapraw na hpe n chye yang, laili laika hpe nsen rim da ai audio hpe madat mai ai (sh) laika hti kung ai wa hpe san mai ai.
Asan sha hti u. Baw hpe ding ding da nna, n-gup hpe law law mahka nna hti u. Ga si shagu hpe asan pra pra hti dan lu hkra shakut u.

Nang hti nga ai lam hpe n manu mat hkra, ga si ni hpe ladu lai ahkyak shatai nna, grai pra hkra hti ai hpe koi u.