Chyum Laika Matut Hkaja Na Matu Hpa Gaw Karum Ya Lu Na Kun?

Chyum Laika hkaja ai gaw akyu lu shangun ai. Raitim, dai hku hkaja na matu galoi shagu gaw loi na n re. Chyum Laika hpe matut hkaja lu na kun? ngu nna kalang lang nang myit na re. Matut nna hkaja lu na matu shakut ai gaw, hpa majaw akyu nga ai kun? Mayak mahkak ni nga tim, matut hkaja lu na matu, nang hpe hpa gaw karum ya lu na kun?

1. Chyum Laika hkaja ai gaw hpa majaw manu dan ai kun?

“Karai a mung ga gaw, hkrung nga ai, atsam nga ai.” (Hebre 4:​12, NWT) Karai a myit mang lam ni, nang hte seng nna shi a hkamsha lam ni hpe tsun dan ai majaw, Chyum Laika gaw manu dan ai. Chyum Laika gaw machye machyang hpe lu la shangun ai sha n-ga, jet ai hpaji byeng-ya hte myit mada lam hpe mung lu shangun ai. Ahkyak htum gaw, Yehowa a jinghku byin na matu nang hpe karum ya lu ai lam re. Chyum Laika hpe nang hkaja na nga yang, Chyum Laika a atsam gaw na a prat hpe akyu shabyin ya lu ai.

2. Chyum Laika tengman lam a manu hpe chye ai gaw hpa majaw ahkyak ai kun?

Chyum Laika hta lawm ai tengman ai lam ni gaw, manu dan ai sut gan ni hte bung ai. Dai majaw, “teng man ai hpe mari la u, hkum dut kau” ngu nna Chyum Laika hta n-gun jaw da ai. (Ga Shagawp 23:23) Chyum Laika tengman lam a manu hpe myit hta bang da na nga yang, pat shingdang ai lam ni hkrum tim pyi, matut hkaja na matu shakut na re.​—Ga Shagawp 2:​4, 5 hpe hti u.

3. Matut hkaja lu na matu nang hpe Yehowa gara hku karum ya na kun?

Yehowa gaw, chyahtum chyalai n-gun rawng ai Hpan Madu hte Manang hku nna, shi a lam sharin la lu hkra nang hpe karum ya mayu ai. “Galaw mayu ai myit” hte ‘galaw lu ai atsam’ hpe shi jaw ya lu ai. (Hpilipi 2:13 hpe hti u.) Hkaja mayu ai myit grau rawt jat hkra, sharin la wa ai lam ni hpe tatut hkan sa lu hkra shi karum ya lu ai. Pat shingdang ai lam ni, ninghkap ai lam ni hpe tawt lai lu hkra, ra nga ai n-gun atsam hpe mung jaw ya lu ai. Chyum Laika hpe matut hkaja lu hkra, Yehowa kaw galoi shagu akyu hpyi u.​—1 Htesaloni 5:17.

Kahtap Hkaja

4. Chyum Laika hkaja ai hpe shawng tawn u

Kalang lang, prat hta bungli nau law ai majaw, Chyum Laika hkaja na matu aten n nga ai ngu hkamsha chye ai. Hpa gaw karum ya lu ai kun? Hpilipi 1:10 (NWT) hta, “grau ahkyak ai lam ni hpe ginhka chye na matu akyu hpyi nga ai. Rai yang, Hkristu a nhtoi du ai shaloi mara shagun shara nga na n re. Kaga ni hpe mung ahtu kataw shangun na n re” ngu tsun da ai. Ndai ga san ni hpe mung bawngban yu u:

• Na a prat hta “grau ahkyak ai lam” nkau mi gaw hpa ni rai kun?

• Chyum Laika hkaja ai lam hpe shawng tawn lu na matu nang gara hku galaw mai ai kun?

1. Zaibru ni hpring nga ai pung hta nlung bai kahtap bang na nga yang shang na n re

2. Nlung hpe shawng bang na nga yang, zaibru law law bang na matu shara shang wa na re. Dai hte maren, na a prat hta “grau ahkyak ai lam ni hpe” shawng tawn na nga yang, dai lam ni hpe galaw ngut kre lu ai sha n-ga, kaga lam ni hpe galaw lu na matu mung aten lu wa na re

Chyum Laika hkaja ai gaw, Karai Kasang hpe chye ra ai, nawku ra ai ngu ai anhte hta ra nga ai wenyi lam hpe madi shadaw ya ai. Mahte 5:3 hpe hti nna, ndai ga san hpe bawngban u:

• Chyum Laika hkaja ai lam hpe shawng tawn ai shaloi, gara akyu lu la na kun?

5. Ninghkap ai lam ni hkrum ai shaloi matut hkaja nga u

VIDEO: Matut Hkaja Ai Majaw Lu La Ai Akyu (5:22)

• Video hta, Hpran Sitsko gaw shi sharin la wa ai lam ni hte seng nna manang ni hte kanu hpe tsun dan ai shaloi, gara hku bai htang ma ai kun?

• Matut hkaja ai majaw shi gara hku akyu lu la wa ai kun?

2 Timohti 2:​24, 25 hpe hti nna, ndai ga san ni hpe bawngban u:

• Nang Chyum Laika hkaja ai hte seng nna na a nta masha ni hte manang ni gara hku hkamsha ai kun?

• Dai Chyum daw hku nga yang, nang Chyum Laika hkaja ai hpe marai langai ngai n ra sharawng ai nga yang, nang gara hku bai htang ging ai kun? Hpa majaw kun?

6. Karum shingtau lam lu na matu Yehowa hpe kamhpa u

VIDEO: Galai Shai Ai Lam Ni Galaw Lu Hkra Yehowa Karum Ya (3:56)

• Ndai video hta, Yehowa ra sharawng ai hpe galaw na matu, hpa ni hpe Jim galai shai wa ai kun?

• Shi a kasi ningli kaw na nang hpa hpe ra sharawng ai kun?

Hebre 11:6 hpe hti nna, ndai ga san ni hpe bawngban u:

• ‘Shi hpe hkan tam’ nna, shi a lam chye hkra galaw ai ni, shi ra sharawng ai hpe galaw na matu shakut ai ni hpe Yehowa hpa galaw ya na kun?

• Ndai Chyum daw hta, Chyum Laika hkaja na matu nang shakut nga ai hpe Yehowa mu ai shaloi, shi gara hku hkamsha ai ngu tsun da ai kun?

Kadun Dawk

Chyum Laika hkaja ai gaw galoi shagu loi na gaw n raitim, na a prat hpe htani htana ngwi pyaw hkra karum ya lu ai. Yehowa hpe matut nna kamhpa yang, nang hpe shaman chyeju jaw na re.

Bai Maram

• Chyum Laika tengman lam ni gaw na a matu hpa majaw manu dan ai kun?

• “Grau ahkyak ai lam ni hpe ginhka chye na matu” nang gara hku galaw lu na kun?

• Chyum Laika hpe matut hkaja lu hkra Yehowa kaw hpa majaw karum hpyi ging ai kun?

Sawk Sagawn

Aten ni hpe hpaji rawng let akyu jashawn lu na matu, masha law law hpe karum ya wa ai lam 4 hpe hkaja yu u.

“Aten Hpe Hpaji Rawng Let Akyu Jashawn Mai Ai Lam” (Dum Hprang!, February 2014)

Madu wa n chye na ya tim, Karai a ra sharawng ai lam lu na matu shakut nga ai num langai hpe Yehowa gara hku karum ya wa ai hpe yu yu u.

Anhte A Lit Hpe Gun Hpai Lu Hkra Yehowa Shangang Shakang Ya (5:05)

Madu jan a shakut shaja ai lam gaw, madu wa hpe gara hku akyu lu shangun wa ai lam yu yu u.

Mayak Mahkak Ni A Lapran Tengman Lam Hpe Shawng Tawn Wa (6:30)

Yehowa Sakse ni gaw dinghku hpe jahten sharun ya ai ni re ngu nna kalang lang tsun hkrum ai. Raitim, dai gaw jaw ai kun?

“Yehowa Sakse Ni Gaw Kun Dinghku Hpe Gawgap Ya Ai Ni Kun? Jahten Sharun Ya Ai Ni Kun?” (Web sumhpa)