Anhte A Nawku Dawjau Ai Lam Gaw Karai Kasang Hpe Gara Hku Myit Shapyaw Ya Lu Ai Kun?

Shawng na daw hta anhte hkaja wa sai hte maren, nawku htung yawng hpe Karai Kasang n ra sharawng ai. Raitim, anhte a Hpan Madu ra sharawng ai hku nawku lu ai. Shi ra sharawng ai “naw ku htung” gaw hpa rai kun? (Yaku 1:27) Chyum Laika hta gara hku tsun da ai hpe yu yu ga.

1. Anhte a nawku dawjau ai lam gaw gara lam hta madung tawn ging ai kun?

Anhte a nawku dawjau ai lam gaw, Chyum Laika hta madung tawn ging ai. Yesu gaw Karai Kasang hpe ndai hku tsun ai: “Na a mung ga gaw, teng man ai lam rai nga lit dai.” (Yawhan 17:17) Nawku htung nkau mi gaw, Karai a Mungga re ai Chyum Laika tengman lam hpe ahkyak n shatai ai. Tengman ai lam a shara hta, shinggyim masha ni a sharin achyin ai lam hte htung lailen ni hpe galai bang kau ai. Raitim, ‘Karai Kasang a hkang da ai ga hpe shingkan kau’ ai ni hpe Yehowa n ra sharawng ai. (Marku 7:9 hpe hti u.) Anhte a nawku dawjau ai lam hpe Chyum Laika hta madung tawn nna, dai hta lawm ai hpaji jaw ga ni hpe tatut hkan sa na nga yang Karai Kasang hpe myit shapyaw ya lu ai.

2. Yehowa hpe gara hku nawku dawjau ging ai kun?

Hpan Madu Yehowa chyu sha, anhte a nawku dawjau ai lam hpe lu la ging ai. (Shingran 4:11) Gawngngu sumla ni, sumla ni n lang ai sha, shi hpe chyu sha nawku dawjau ra nna, shi hpe tsawra ra ai ngu ai lachyum re.​—Esaia 42:8 hpe hti u.

Anhte a nawku dawjau ai lam gaw, Yehowa a matu “chyoi pra” ra nna, “sharawng awng” ai lam rai ra ai. (Roma 12:1) Anhte gaw akyang lailen hte seng ai shi a tsang madang ni hte maren asak hkrung ra ai ngu ai lachyum re. Ga shadawn, Yehowa hpe tsawra ai ni gaw, dinghku hte seng ai shi a tsang madang ni hpe tsawra ra nna hkan sa ra ai. Nanghpam tsi ni hpe lang ai, tsi mawan ni (sh) tsa chyaru ni hpe ladu lai tara n shang ai hku lang ai zawn re ai shoihpa nga ai akyang lailen ni hpe koi ra ai.a

3. Yehowa hpe kamsham ai ni hte rau anhte hpa majaw nawku ging ai kun?

Bat shagu na nawku zuphpawng ni gaw, “shawa hpawng hta . . . Yehowa hpe shakawn” na matu ahkaw ahkang lu shangun ai. (Shakawn 111:​1, 2) Dai hku galaw lu ai lam langai gaw, Karai Kasang hpe mahkawn shakawn ai hku nna re. (Shakawn 104:33 hpe hti u.) Yehowa gaw anhte hpe tsawra ai majaw, zuphpawng ni lung na matu hpyi shawn ai. Zuphpawng ni gaw, anhte a prat htani htana ngwi pyaw na matu karum ya lu ai hpe shi chye ai majaw mung re. Zuphpawng ni hta shada da n-gun jaw ya lu ai.

Kahtap Hkaja

4. Nawku dawjau ai lam hta sumla ni hpe n lang ging

VIDEO: Nawku Dawjau Ai Lam Hta Sumla Lang Ai Hpe Karai Kasang Ra Sharawng Ai Kun? (3:26)

• Nawku dawjau ai lam hta gawngngu sumla jailang na matu, shakut wa ai Chyum Laika prat na Karai a masha nkau mi hpa byin wa ai kun?

Masha nkau mi gaw, shanhte a nawku dawjau ai lam hta sumla jailang yang she, Karai Kasang hte nihtep na ngu hkamsha ma ai. Raitim, dai hku galaw ai gaw shi hte grau tsan mat shangun ai kun? Pru Mat 20:​4-6 hte Shakawn 106:​35, 36 hpe hti nna, ndai ga san ni hpe bawngban u:

• Nawku dawjau ai lam hta, masha ni gaw gara rai ni, gara sumla ni jailang nga ai hpe nang mu ga ai kun?

• Sumla jailang ai hte seng nna Yehowa gara hku hkamsha ai kun?

• Sumla jailang ai hte seng nna nang gara hku hkamsha ai kun?

5. Yehowa hpe nawku dawjau ai lam sha shut shai ai lam ni kaw na shalawt ya

VIDEO: Tengman Ai Lam Gaw Shalawt Ya (5:16)

Shakawn 91:14 hpe hti nna, ndai ga san hpe bawngban u:

• Yehowa hpe sha nawku dawjau nna, shi hpe tsawra ai lam madun na nga yang, anhte a matu hpa galaw ya na ngu Yehowa ga sadi jaw ai kun?

6. Zuphpawng ni hta Karai Kasang hpe nawku dawjau

Zuphpawng ni hta, mahkawn hkawn ai, mahtai jaw ai hku nna, shada da hpe n-gun jaw ya lu ai, Yehowa hpe shakawn lu ai. Shakawn 22:22 hpe hti nna, ndai ga san ni hpe bawngban u:

• Zuphpawng ni hta mahtai ni hpe na lu ai shaloi nang pyaw ai kun?

• Mahtai jaw na matu tau hkrau hkyen lajang mayu ai kun?

7. Anhte chye wa ai lam ni hpe tsun dan ai shaloi Yehowa ra sharawng

Kaga ni hpe Chyum Laika tengman ai lam ni tsun dan lu ai lam law law nga ai. Shakawn 9:1 hte 34:1 hpe hti nna, ndai ga san hpe bawngban u:

• Marai langai ngai hpe Chyum Laika kaw na gara lam hpe nang tsun dan mayu ai kun?

Kadun Dawk

Yehowa hpe sha nawku ai, zuphpawng ni hta shi hpe shakawn ai, chye wa ai lam ni hpe kaga ni hpe tsun dan ai gaw, Hpan Madu hpe myit pyaw hkra galaw nga ai re.

Bai Maram

• Karai Kasang hkap la ai nawku dawjau ai lam byin na matu anhte gara hku sharin la lu ai kun?

• Yehowa hpe sha anhte hpa majaw nawku ging ai kun?

• Karai Kasang ra sharawng ai hpe lu la mayu ai ni hte rau anhte hpa majaw nawku dawjau ging ai kun?

Sawk Sagawn

“Gawngngu Sumla Nawku Ai A Mayam N Rai Sai” ngu ai labau hta gawngngu sumla nawku ai kaw na lawt lu wa ai num langai a lam hpe hti yu u.

“Chyum Laika Gaw Prat Hpe Galai Shai Ya” (Sin Langchyi, July 1, 2011)

Zuphpawng ni hta mahtai jaw na matu, nang hpe karum ya lu ai lam ni hpe hkaja yu u.

“Nawku Hpung Hta Yehowa Hpe Shakawn Shagrau U” (Sin Langchyi, January 2019)

Zuphpawng lung na matu n loi tim, zuphpawng ni kaw na ramma lasha langai gara hku akyu lu la wa ai hpe yu yu u.

Ngai Hpe Yehowa Lanu Lahku (3:07)

Wudang hpe Hkristan ni a masat dingsat re ngu nna masha law law kam ai. Raitim, dai hpe anhte a nawku dawjau ai lam hta akyu jashawn ging ai kun?

“Yehowa Sakse Ni Gaw Nawku Daw Jau Ai Lam Hta Hpa Majaw Wudang Hpe N Lang Ai Kun?” (Web sumhpa)