Hkaw Tsun Bungli Hta Grau Kaja Hkra Galaw Ai Lam—Kaga Amyu Ga Shaga Ai Ni Hpe Mung Sakse Hkam U

Hpa Majaw A Hkyak: Yehowa gaw masha “amyu baw shagu” hpe teng man ai tara chye shangun mayu ai. (Kasa 10:34, 35) Dai hta n-ga Yesu gaw “mungkan ting” na “masha amyu baw shagu” hpe kabu gara shiga hkaw tsun ra ai ngu tsun da ai. (Mah. 24:14) Zehkaria mung “ga amyu baw kaga ga tsun” ai masha ni gaw, kabu gara shiga madat na re ngu tau hkrau tsun wa ai. (Zeh. 8:23) Kasa Yawhan mung shingran hta “masha mungdan shagu hta na mung, baw lakung shagu hta na mung, amyu baw shagu hta na mung, ga amyu shagu hta na” masha ni mung, ru tsang kaba kaw na lawt pru wa ai hpe mu ai. (Shi. 7:9, 13, 14) Dai majaw hkaw tsun bungli hta shang lawm ai shaloi, kaga amyu ga shaga ai ni hpe mu yang sakse hkam lu na matu shakut ra ai.

Galaw Mai Ai Lam:

Tau hkrau shajin da u. Hkaw tsun sa ai shaloi “A Myu Baw Shagu Na Masha Ni A Matu Kabu Gara Shiga” laika buk kaji hpe la sa u. Kaga amyu ga shaga ai ni hpe lu karum na matu, ndai laika buk kaji a ga n-hpaw hpe a tsawm hti da u. Hkrum chye ai masha amyu baw a ga ni hte mara da ai jw.org hta na video, laili laika langai ngai hpe na a phone shing nrai tablet hta bang da u. Shanhte a ga ni hpe loi chye na hkra JW Language app hta sharin da u. Anhte hkaw tsun sa na lawk hta kaga amyu ga shaga ai hpung ni mung, hkaw tsun ai nga yang, shanhte na ga hte shapraw da ai laili laika ni hpe hkum la sa. Masha amyu hkum ai shara hta, masha hpawng man sakse hkam ai nga yang, hkrum chye ai amyu ni a laili laika ni hpe la sa u.
Tinang a ga hpe nchye na ai ni hpe mu yang “Karai Kasang a mauhpa amu” hpe shi a ga hte lu tsun na matu shakut u. (Kasa 2:11) jw.org hta shi a ga hte mara da ai laili laika ni hte kaga lam law law mung lu mai ai ngu tsun dan u. Shi teng sha myit lawm yang Hkan Sa U (S-43) hta ka nna hpung amu madu hpe jaw u. Myit lawm ai wa a amyu ga hpe, chye tsun ai hkaw tsun masha langai hpe nmu dingsa, shi hte matut mahkai nga u.

Ndai Shata Laman Shakut Yu U:

Na a Dinghku Nawku hta kaga amyu masha hpe hkaw tsun lu hkra shaman u.