Ga Amyu Myu Shaga Ai Shara Hta Hkaw Tsun Lu Hkra Rau Jawm Galaw Ai Lam

Masha ni gaw, shanhte a buga ga hte Mungdan kabu gara shiga hpe na ai shaloi, grau hkap la wa ma ai. Dai majaw, A.D. 33, Pentekoti poi hta sa wa ai “sumsing lamu a npu e nga ai masha amyu shagu hta na, tara hkungga ai Yuda masha” ni hpe, kabu gara shiga tsun dan na matu, masha law malawng tsun shaga ai Hebre hte Greek ga hpe, shanhte chye na ai raitim, shanhte a “buga ga” hte hkaw tsun na matu, Yehowa lajang ya wa ai. (Kas 2:5, 8) Dai ni mung, ga amyu law law shaga ai buga shara ni hta, ga amyu law law hte nawku zuphpawng ni galaw nga ai. Hkaw tsun lawk langai hta sha, ga amyu myu hte hkaw tsun nga ai. Dai zawn nawku hpung ni kaw na, hkaw tsun masha ni gaw, kahtap htap shang hkrup ai majaw, nta madu ni hpe masin shapawt ai baw n byin hkra koi nna, masha shagu hpe sakse hkam lu na matu, gara hku rau jawm galaw mai ai kun?

• 

  Hpaji Hpyi U (Gsh 15:22): Kabu gara shiga hkaw tsun na matu seng ang ai nawku hpung ni yawng a magam hpa-awn ni gaw, rau jawm bawngban nna kaja htum lamang hpe tam sagawn ging ai. Hkaw tsun lawk nau n kaba ai nga yang, kaga amyu ga hte hkaw tsun nga ai nawku hpung ni gaw, shanhte a amyu ga shaga ai nta ni hpe shang shangun mayu na n re. Raitim, hkaw tsun lawk grai dam ai majaw, ayan na ngut kre hkra n lu galaw ai nga yang, nta yawng hpe shang shangun mayu nna, myit lawm ai ni hpe mu yang gaw, shanhte hpe tsun dan shangun mayu na re. (od 93 ¶37) Shing nrai, kaga amyu ga shaga ai nawku hpung ni gaw, shanhte a amyu ga shaga ai masha ni hpe tam mu yang, hkring dat ni hpe shanhte hpang ap ya na matu, nanhte a nawku hpung hpe karum hpyi wa chye ai. (km 7/12 5, lawk) Masa nkau mi hta, nta langai hta sha amyu ga langai hta n-ga, tsun ai ni nga ai hpe myit dum ra ai. Hkaw tsun lawk hta nga ai masha shagu hpe hkaw tsun na matu lajang ai shaloi, shanhte hte seng ai kata lam ni hpe akyu jashawn ai hta, mungdan a tara upadi ni hte maren rai ra ai.

• 

  Rau Jawm Galaw U (Ehp 4:16): Na a magam hpa-awn kaw na lu ai, lam matsun yawng hpe atsawm sha hkan sa u. Na a nawku hpung shaga ai amyu ga hte n re ai sha, kaga amyu ga hte marai langai ngai hpe Chyum ga sharin galaw nga ai kun? Chyum ga sharin hpe shi a amyu ga hte galaw ai nawku hpung (sh) group de htawt ya dat na nga yang, grau rawt jat wa na re.

• 

  Tau Hkrau Hkyen Lajang U (Gsh 15:28; 16:1): Kaga amyu ga shaga ai wa hte hkaw tsun bungli hta hkrum yang, kabu gara shiga tsun dan na matu nang dang lu ai daram galaw u. Na a hkaw tsun lawk hta, kaga amyu ga shaga ai ni hte hkrum chye ai hpe, tau hkrau myit da nna, Chyum Laika buk, laili laika ni hte video ni hpe tau hkrau download galaw da mai ai. Shanhte a amyu ga hte shachyen shaga chye na matu, JW Language app kaw nna sharin la mai ai.