‘Yehowa Hpe Tam Ai Ni Mai Kaja Ai Lam Langai Mi Mung Ra Kadawn Na N Re’

1. Dawi gara zawn mayak mahkak hkrum ai kun?

DAWI gaw Israela hkawhkam Shawlu hkan sat taw ai majaw, asak lawt na matu hprawng ra taw ai. Noba mare de du ai shaloi, malu masha ra kadawn ai majaw, hkinjawng kaw na muk tawng 5 daram hpyi wa ai. (1 Sa 21:1, 3) Dai hpang, shi hte shi a masha ni gaw, lungpu langai hta sa shingbyi ma ai. (1 Sa 22:1) Ya na zawn masa de Dawi gara hku du mat ai kun?

2. Shawlu gaw shoihpa nga ai masa hpe gara hku lata wa ai kun? (1 Samuela 23:16, 17)

² Dawi a gumhkawng ai lam, majan hta awng dang ai lam ni a majaw, Shawlu manawn wa ai. Shawlu gaw Yehowa a ga n madat ai majaw, shi hpe Israela hkawhkam aya kaw na nyet kau sai lam, shi a shara hta Dawi hpe lata da sai lam chye ai. (1 Samuela 23:16, 17 hpe hti u.) Shawlu gaw Israela hkawhkam naw rai nga nna, shi hta hpyen dap kaba hte madi shadaw ya na ni grai law hkra nga ai. Dai majaw, Dawi gaw asak lawt na matu hprawng ra ai. Dawi hpe hkawhkam hku nna Karai Kasang aya tang da ai hpe, Shawlu teng sha jahkring kau lu na ngu shadu ai kun? (Esa 55:11) Chyum Laika hta n tsun da tim, Shawlu gaw shoihpa nga ai masa hpe shi nan lata wa ai hpe gaw chye lu ai. Karai Kasang hpe ninghkap ai ni gaw galoi mung awng dang na n re.

3. Dawi gaw shi a masa hte seng nna gara hku hkamsha ai kun?

³ Dawi gaw grai shagrit shanem ai wa re. Israela hkawhkam byin na matu, shi nan lata wa ai n re. Yehowa lata ai she re. (1 Sa 16:1, 12, 13) Shawlu gaw Dawi hpe grai nan n ju n dawng ai. Raitim, Dawi gaw ya na zawn shoihpa hkrum nga ai hte seng nna Yehowa hpe mara n shagun ai. Shahpa ra kadawn ai, lungpu hta makoi nga ra ai lam a matu mung mara n shagun wa ai. Dai hku hprawng makoi nga ai aten hta sha, “Yehowa hpe tam ai ni gaw, mai kaja ai lam langai mi mung ra kadawn na n re” ngu ai madung Chyum daw hte hpawn, shakawn mahkawn ni hpe ka wa ai.​—Shk 34:10, NWT.

4. Gara ga san ni hpe hkaja na kun? Dai gaw hpa majaw ahkyak ai kun?

⁴ Dai ni aten Yehowa a mayam law law hta mung, malu masha hte kaga ra kadawn ai lam ni law law nga ai. Ya na zawn, Kobit ana chyam bra nga ai aten hta, dai zawn grau byin nga ai. “Ru tsang kaba” ni wa sai hte maren, grau nna yak wa na hpe myit mada da ra ai. (Mat 24:21) Dai hpe myit hta bang da nna, ndai ga san 4 a mahtai hpe yu yu ga. “Mai kaja ai lam langai mi mung ra kadawn na n re” ngu Dawi gara lam hku nna tsun mayu ai rai kun? Myit dik chye na matu hpa majaw sharin la ra ai kun? Yehowa lanu lahku na hpe hpa majaw kam mai ai kun? Htawm hpang a matu, ya aten kaw nna gara hku hkyen lajang da mai ai kun?

“Langai Mi Mung Ra Kadawn Na N Re”

5-6. Yehowa a mayam ni gaw, “mai kaja ai lam langai mi mung ra kadawn na n re” ngu Dawi tsun ai lachyum hpe chye na na matu Shakawn Kungdawn 23:1-6 gaw gara hku karum ya ai kun?

⁵ Yehowa a mayam ni gaw, “mai kaja ai lam langai mi mung ra kadawn na n re” ngu Dawi tsun wa ai gaw hpa lachyum rai kun? Dai hpe chye na na matu, Shakawn Kungdawn 23 hpe hkaja yu ga. (Shakawn 23:1-6 hpe hti u.) “Yehowa ngai sagu hpe rem ai wa rai nga ai; Ngai hpa mung n ra nngai” ngu ai ga si ni hte nnan hpang da ai. Dai hpang, Yehowa hpe shi a Sagu Rem hku nna hkap la ai majaw, lu la ai wenyi shaman chyeju ni a lam hpe matut nna tsun da ai. Yehowa gaw shi hpe “ding man ai lam” de woi sa nna, kaja ai aten ni hta mung, n kaja ai aten ni hta mung, madi shadaw ya ai. Shi prat gaw, Yehowa a “tsit lali ai udat shara” hta nga nga tim, manghkang n nga na ngu nna gaw n sawn la wa ai. Shi hta hpyen ni nga ai majaw, “si ai hkaraw a shingnip” hta hkawm nga ai zawn, myit daw ai aten ni kalang lang nga chye ai. Raitim, Yehowa gaw shi a Sagu Rem Ai Wa re ai majaw, Dawi ‘aru ara hpe n hkrit ai.’

⁶ “Mai kaja ai lam langai mi mung ra kadawn na n re” ngu Dawi gara lam hku nna tsun mayu ai rai kun? Mahtai gaw, wenyi lam hte seng nna ra kadawn nga ai lam yawng hpe lu la ai ngu tsun mayu ai re. Shi a ngwi pyaw lam gaw, arung arai ni hta n madung ai. Yehowa madi shadaw ya wa ai lam hte myit dik ai. Shi a matu ahkyak htum gaw, Karai a shaman chyeju hte makawp maga ya ai lam re.

7. Luka 21:20-24 hku nga yang, Yuda mung hta nga ai tsa ban langai na Hkristan ni gara mayak mahkak ni hkrum wa ai kun?

⁷ Arung arai ni hpe rap ra ai hku mu mada na matu grai ahkyak ai hpe Dawi a ga ni kaw na chye lu ai. Anhte a prat hta arung arai ni hpe madung n tawn ai sha, nga ai daram hte ngwi pyaw hkra nga lu ai. Dai lam ahkyak ai hpe, Yuda mung hta nga ai tsa ban langai na Hkristan ni chye wa ai. (Luka 21:20-24 hpe hti u.) Yerusalem mare hpe “hpyen luksuk ni hte wang kawan da ai” aten du wa na ngu Yesu sadi jaw wa ai. Dai hku byin ai shaloi, “bum lang de hprawng” ra ai. Dai shaloi, asak lawt na matu shanhte a arung arai ni hpe tawn da ra ai. Lai wa sai shaning loi mi hta, Sin Langchyi kaw ndai hku tsun wa ai: “Hkauna ni, nta ni hpe shanhte ngam da ra ai sha n-ga, arung arai ni hpe pyi n lu la ai. Yehowa a makawp maga lam hte madi shadaw ya ai lam hpe kamhpa nna, ahkyak ai ngu shadu ai lam yawng mayawng hta na, shi a nawku dawjau lam hpe shawng tawn wa ai.”

8. Yuda mung hta nga ai tsa ban langai na Hkristan ni a mabyin kaw na hpa sharin la lu ai kun?

⁸ Yuda mung hta nga ai tsa ban langai na Hkristan ni a mabyin kaw na hpa sharin la lu ai kun? Dai Sin Langchyi kaw sha ndai hku tsun da ai: “Arung arai ni hpe gara hku mu mada ai hte seng nna chyam dinglik lam ni nga wa chye ai. Dai lam ni gaw, anhte a matu ahkyak htum rai kun? Shing nrai, Karai a maga tsap ai ni gaw asak hkye la hkrum na matu grau ahkyak ai kun? Hpang jahtum aten du wa ai shaloi, yakhkak ai lam ni, sak jaw ra ai lam ni nga wa chye ai. Hpa mi raitim, Yuda mung kaw na hprawng wa ai Hkristan ni zawn galaw na matu jin jin rai ra ai.”b

9. Hebre nawku hpung hpe jaw wa ai Pawlu a hpaji jaw ga ni gaw nang hpe gara hku n-gun lu shangun ai kun?

⁹ Dai Hkristan ni gaw, lu malu yawng hpe kau da nna, shara nnan hta prat hpe nnan hpang na matu, kade daram yak na hpe shingran yu u. Ra kadawn ai lam ni a matu, Yehowa hpe kamhpa ra ai. Shanhte karum shingtau lam lu wa ai. Yerusalem hpe Roma ni garai n wang da shi ai 5 ning daram hta, kasa Pawlu gaw, Hebre nawku hpung hpe ndai zawn hpaji jaw ga tsun wa ai: “Gumhpraw marin ai lam hkum hkan myit; nanhte lu ai made hte myit dik nga mu: . . . Ngai nang hte teng teng n hka na nngai, gaja wa teng teng n kau da na nngai, nga nna shi nan tsun nga ai. Dai re ai majaw, Dai Madu ngai hpe karum ai wa rai nga ai, Ngai hpa mung n hkrit nga nngai: Masha wa ngai hpe hpa di lu na a ta? ngu nna nden ja ai myit hte anhte tsun nga ga ai.” (Heb 13:5, 6) Pawlu a dai hpaji jaw ga hpe hkan sa ai ni gaw, shara nnan hta, nga ai hte sha myit dik hkra chye nga na matu grau loi na re. Ra kadawn ai lam ni hpe Yehowa madi shadaw ya na hpe shanhte kam ai. Anhte mung, shanhte zawn kam ai myit nga na matu Pawlu a ga ni gaw karum ya ai.

“Anhte Dai Hte Myit Dik Nga Ga”

10. Pawlu “sharin la” wa ai lam gaw hpa rai kun?

¹⁰ Pawlu gaw, Timohti hpe dai hte bung ai hpaji jaw ga tsun wa ai. Dai hpe anhte mung hkan sa mai ai. Shi ndai hku ka ai: “Dai rai nna, lu sha hte hpun palawng lu nga ga yang gaw, anhte dai hte myit dik nga ga.” (1 Tm 6:8) Grai mu ai malu masha ni n mai sha ai, nta kaja ni hta n mai nga ai, bu hpun palawng nnan ni chyahkring hkring mari ai gaw shut ai ngu tsun mayu ai kun? N re. Nga ai hte sha myit dik na matu Pawlu tsun nga ai re. (Hpl 4:12) Dai gaw Pawlu “sharin la” wa ai lam re. Manu dan ai lam gaw, arung arai ni n re ai sha, Karai Kasang hte hku hkau lam re.​—Hab 3:17, 18.

11. Israela ni hpe Mawshe tsun wa ai ga kaw na hpa sharin la lu ai kun?

¹¹ Anhte a ra kadawn ai lam hte seng nna, Yehowa a ningmu hte anhte a ningmu gaw shai chye ai. Nam maling hta 40 ning nga ngut ai hpang, Israela ni hpe Mawshe ndai hku tsun ai: “Na a Karai Kasang Yehowa gaw lam shagu hta nang hpe shaman ya nit dai; ndai nam mali kaba hta e nang hkawm sa wa ai lam hpe shi dum ya nga ai; ndai mali shi ning tup na a Karai Kasang Yehowa gaw nang hte rau nga nga sai rai nna, nang hpa mung n ra hkra rai nit dai.” (Trj 2:7) Dai 40 ning laman, Yehowa gaw sha na matu, Israela ni hpe mana muk madi shadaw ya ai. Egutu mung kaw na pru wa ai shaloi kaw na hpun da ai palawng ni mung n dingsa mat ai. (Trj 8:3, 4) Dai zawn madi shadaw ya ai hpe, nkau mi gaw myit n dik ai majaw, nga ai hte sha myit dik na matu Mawshe bai sadi jaw wa ai. Myit dik na matu sharin la na, Karai madi shadaw ya ai kaji kajaw lam ni kaw nna hkawt chyeju dum na, shaman chyeju hku mu mada na nga yang, shi myit pyaw na re.

Yehowa Lanu Lahku Na Hpe Kam U

12. Dawi gaw, shi hkum shi hpe n re ai sha, Yehowa hpe kamhpa ai lam gara hku madun wa ai kun?

¹² Yehowa gaw shi hpe tsawra ai ni hpe sadi dung ai, lanu lahku ai hpe Dawi chye ai. Shakawn Kungdawn 34 hpe ka ai shaloi, asak shoihpa nga tim, “grup yin” hta, Yehowa a “lamu kasa dap” jung nga ai hpe makam masham myi hte Dawi mu ai. (Shk 34:7) Yehowa a lamu kasa hpe, majan pa hta hpyen ni hpe galoi mung maja nga ai hpyen la langai hte shingdaw wa ai rai na re. Dawi gaw, share ninghkrin rai nna, Yehowa aya tang da sai hkawhkam mung re. Raitim, lakli ni, nhtu ni hpe lang nna hpyen ni hpe gasat lu ai shi a atsam hpe n kamhpa wa ai. (1 Sa 16:13; 24:12) Karai hpe sha kamhpa ai. Karai hpe “hkrit kamyin ai ni” hpe Yehowa a lamu kasa hkye la ai hpe mung kam ai. Dai ni aten hta, mauhpa lam hte makawp maga hkrum na hpe anhte n myit mada ai. Raitim, Yehowa hpe kamhpa ai ni, prat tup shoihpa hkrum nga na n re ai hpe gaw kam ai.

13. Magoga mung na Goga gasat ai shaloi, anhte gaw hpa majaw matsan mayan zawn byin nga na kun? Raitim, anhte hta hpa makam masham nga ai kun? (Makawp sumla hpe yu u.)

¹³ Kade n na yang, anhte hpe makawp maga ya lu ai Yehowa a atsam hpe kamhpa ai myit chyam dinglik hkrum wa na re. Mungdan ga daga ni hte hpawng de da ai Magoga mung na Goga, Karai a masha ni hpe gasat ai shaloi, anhte a asak shoihpa nga na re. Yehowa anhte hpe hkye la na, hkye la lu ai atsam nga ai hpe mung kam ra ai. Shanhte gaw anhte hpe, makawp maga ya na kadai mung n nga ai sagu ni zawn, mu nga na re. (Eze 38:10-12) Anhte hta laknak ni, lahkrut la ai lam ni mung n nga ai majaw, aloi sha gasat lu na ngu shadu ai. Karai a masha ni a makau grup-yin hta, lamu kasa dap jung nga nna, makawp maga ya na matu jin jin re ai hpe, makam masham myi hte anhte mu lu ai zawn, shanhte n mu ai. Hpa majaw kun? Shanhte hta wenyi myi n nga ai majaw re. Anhte a matu sumsing lamu hpyen dap ni gasat ya ai shaloi, shanhte mau mat na re.​—Shr 19:11, 14, 15.

Htawm Hpang A Matu Ya Hkyen Lajang U

14. Htawm hpang a matu, ya kaw nna hpa ni hkyen lajang mai ai kun?

¹⁴ Htawm hpang a matu, anhte ya, hpa ni hkyen lajang mai ai kun? Arung arai ni hpe rap ra ai hku mu mada ra ai. Lani mi na aten hta, dai ni hpe kau da ra na re. Myit dik lam nga ra ai. Yehowa hte hku hkau lam kaja hkra galaw ra ai. Karai Kasang hpe anhte grau chye wa yang, Magoga mung na Goga gasat ai shaloi, shi a makawp maga ya lu ai atsam hpe grau nna kam wa na re.

15. Dawi hpe Yehowa galoi myit n daw shangun ai hpe asak kaji ai aten na mahkrum madup ni gaw gara hku sharin ya ai kun?

¹⁵ Dawi hpe, hpa gaw naw karum ya lu ai, yakhkak ai lam ni a matu anhte hpe gara hku karum ya lu ai ngu ai hpe yu yu ga. Dawi ndai hku tsun ai: “Yehowa mai kaja nga ai gaw, chyim yu nna chye mu; Shi hta shingbyi ai wa gaw, a nga ai.” (Shk 34:8) Yehowa a madi shadaw ya ai lam hpe, Dawi kamhpa wa ai hpe, dai ga ni kaw na chye lu ai. Yehowa hpe Dawi galoi mung kamhpa wa ai majaw, Karai Kasang gaw, shi hpe myit daw hkra n galaw wa ai. Shi asak naw kaji ai aten, Hpilisti masha numraw Goliat hte hkrum ai shaloi ndai hku tsun ai: ‘Yehowa, dai ni nye a lata hta nang hpe ap na.’ (1 Sa 17:46) Hpang hta, shi hpe chyahkring hkring sat na matu gyam wa ai hkawhkam Shawlu kaw magam gun wa ai. Raitim, ‘Yehowa Dawi hte rau nga nga ai.’ (1 Sa 18:12) Lai wa sai aten hta, Yehowa shi hpe karum ya ai hpe hkrum ga ai majaw, ya hkrum nga ai mayak mahkak ni hpe tawt lai lu hkra mung Yehowa karum ya na hpe kam ai.

16. Yehowa a mai kaja ai lam ni hpe gara lam ni hku nna “chyim yu” mai ai kun?

¹⁶ Ya aten hta, Yehowa a lam matsun hpe grau kamhpa yang, htawm hpang hta, anhte hpe hkye la lu ai shi a atsam hpe mung grau kamhpa wa na re. Ninghtawn hte ginwang zuphpawng lu lung hkra, ahkang hpyi na matu, hkaw tsun bungli grau shang lawm lu na matu, zuphpawng yawng hpe lu lung na matu, bungli aten galai shai na hte seng nna, bungli madu hpe hpyi shawn gwi hkra, makam masham hte Yehowa hpe kam ai myit nga ra ai. Anhte hpyi shawn ai hpe bungli madu nyet kau ai majaw, bungli n lu mat ai ngu saga. Anhte hpe Yehowa galoi n kau da ai, ra kadawn ai lam ni hpe madi shadaw ya na ngu ai hpe kam ai kun? (Heb 13:5) Ra kadawn nga ai aten hta Yehowa karum ya ai hpe aten hpring magam gun ai ni tatut hkamsha lu wa ai. Yehowa gaw sadi dung ai.

17. 2022 na shaning ginchyum chyum daw gaw hpa rai kun? Dai gaw hpa majaw htap htuk ai kun?

¹⁷ Anhte maga hta Yehowa nga yang, htawm hpang hta hpa mi byin wa tim, hkrit tsang na lam n nga ai. Anhte a prat hta, mungdan lam hpe shawng tawn yang, Karai Kasang galoi kau da na n re. Kade n na yang hkrum wa na yakhkak ai lam ni a matu, ya kaw nna hkyen lajang lu hkra, Yehowa galoi n kau da ai hpe kam hkra, Uphkang Hpung gaw, 2022 na shaning ginchyum chyum daw hpe “Yehowa hpe tam ai ni gaw, mai kaja ai lam langai mi mung ra kadawn na n re” ngu ai Shakawn Kungdawn 34:10 hpe lajang da ya ai.