Mwambĩlĩĩlyo

42 Yĩla Yakovo weewie kana Misili kwĩ lĩu wa mbaa ngetha, nĩwaneenie na ana make na amea atĩĩ: “Nĩkĩ mũkwetye kũsianyʼa?” 2 Na ĩndĩ amea: “Nĩnĩwʼĩte kana Misili kwĩ lĩu wa mbaa ngetha. Theeai kũu na mũithooa lĩu kwondũ witũ, nĩ kana twĩkale thayũ vandũ va kũkwʼa.” 3 Na kwoou ana-a-ĩthe ĩkũmi ma Yosevu matheea Misili makathooe lĩu wa mbaa ngetha. 4 Ĩndĩ Yakovo ndaalekya mwana-a-inyia wa Yosevu, ũla weetawa Mbenyamini, athi na ana-a-ĩthe, nũndũ aisye: “Ko ũtakwatwa nĩ mũisyo ũtuma akwʼa.”

5 Kwoou ana ma Isilaeli maendanyʼa na andũ ala angĩ maendete kũthooa lĩu, nũndũ yũa nĩyavikĩte nthĩ ya Kanaanĩ. 6 Yosevu nĩwe waĩ na ũkũmũ ĩũlũ wa nthĩ ya Misili, na nĩwe wathooeasya andũ onthe ĩũlũ wa nthĩ lĩu wa mbaa ngetha. Kwoou ana-a-ĩthe ma Yosevu mavika vala waĩ na mamũkumanĩa na mothyũ moo nginya nthĩ. 7 Na Yosevu oona ana-a-ĩthe oou amamanya, ĩndĩ ndaaĩmanyĩthanyʼa kwoo. Na kwoou aneena namo e mũkalĩ, aimea: “Mumĩte va?” Namo mamũsũngĩa: “Tumĩte nthĩ ya Kanaanĩ na tũkĩte kũthooa lĩu.”

8 Nũndũ wa ũu, Yosevu nĩwamanyie ana-a-ĩthe, ĩndĩ mo mayaamũmanya. 9 Vau kwa vau Yosevu nĩwalilikanile ndoto ila waotete ĩũlũ woo, na amea: “Inywʼĩ mwĩ athiani! Mwooka nĩ kana mwone kũla kũte na ũseseei nthĩ ĩno!” 10 Na ĩndĩ mamwĩa: “Aiee, mwĩai wakwa, athũkũmi maku mooka kũthooa lĩu. 11 Ithyonthe twĩ ana ma mũndũ ũmwe. Na twĩkaa ũla waĩle. Athũkũmi maku ti athiani.” 12 Ĩndĩ amea: “Ũu ti wʼo! Mwooka nĩ kana mwone kũla kũte na ũseseei nthĩ ĩno!” 13 Na meewʼa ũu mamwĩa: “Ithyĩ athũkũmi maku tũsyaĩtwe twĩ 12. Twĩ ana ma mũndũũme ũmwe wa nthĩ ya Kanaanĩ. Mwana ũla mũnini e vamwe na ĩthe witũ, ĩndĩ mwana ũla ũngĩ nde vo.”

14 Ĩndĩ Yosevu amea ũũ: “No ũndũ namũtavya. ‘Inywʼĩ mwĩ athiani!’ 15 Nĩmũtata na ũndũ ũũ: Vate nzika, o tondũ Valao wĩ thayũ, mũiuma vandũ vaa nginya yĩla mwana-a-ĩthe wenyu ũla mũnini ũkoka vaa. 16 Tũmai ũmwe wenyu aete mwana-a-ĩthe wenyu, ĩndĩ ala angĩ mwĩĩkala mwĩ ove. Kĩu nĩkyo kĩũtata ndeto syenyu mũmanyĩke kana mwĩneena ũla wʼo. Na ethĩwa ũu ti wʼo, vate nzika, o tondũ Valao wĩ thayũ, inywʼĩ mwĩĩthĩwa mwĩ athiani.” 17 Ĩtina wa kwasya ũu nĩwamekalilye me ove mĩthenya ĩtatũ.

18 Na mũthenyanĩ wa katatũ Yosevu amea: “Ĩkai ũndũ ũũ nĩ kana mwĩkale thayũ, nũndũ nyie nĩnĩkĩaa Ngai. 19 Ethĩwa nĩ wʼo mwĩkaa ũla waĩle, ekai ũmwe wa ana-a-ĩthe menyu atiwe e mwove nyũmbanĩ ĩla mwovewe, ĩndĩ ala angĩ no mũthi na mũyosa lĩu wa mbaa ngetha mũtwaĩe andũ ma mĩsyĩ yenyu nĩ kana maeke kũvinyĩĩwa nĩ yũa. 20 Na mũimũete mwana-a-ĩthe wenyu ũla mũnini vaa nĩĩ nĩ kana ndeto syenyu iĩkĩĩthwʼe kana nĩ sya wʼo na nĩ kana mũikakwʼe.” Na ĩndĩ meeka ũu.

21 Na maneenanyʼa mayasya: “Vate nzika, twĩkanwʼa nũndũ wa mwana-a-ĩthe witũ, nũndũ nĩtwoonie ainyamaa yĩla watwĩsũvaa tũmwĩwʼĩe ĩnee, ĩndĩ twalea kũmwĩthukĩĩsya. Nĩkyo kĩtumi o naitũ tũendeee kũnyamaa.” 22 Na ĩndĩ Leũveni amasũngĩa amea: “Nyie ndyaaneena nenyu ndimwĩa, ‘Mũikavĩtĩsye mwana ũũ,’ ĩndĩ mwaema kũmbĩthukĩĩsya? Yu vate ndĩi nthakame yake ĩkwetye kũandũwa.” 23 Ĩndĩ mayaamanya kana Yosevu nĩwaeleawa ndeto syoo, nĩkwĩthĩwa atũmĩaa mũalyũli yĩla ũkũneena namo. 24 Na kwoou auma vala maĩ na ambĩĩa kũĩa. Na yĩla wasyokie na aneena namo ĩngĩ, oosa Simeoni kuma katĩ woo na amwova masyaĩĩsye. 25 Na ĩndĩ Yosevu aumya mwĩao mĩvuko yoo* yusũwʼe lĩu wa mbaa ngetha na kĩla ũmwe aitũngĩwa mbesa syake ĩkunianĩ yake na mainengwa syĩndũ sya kũtũmĩa me kyalonĩ. Na ũu nĩwʼo meekiwe.

26 Ĩtina wa ũu, nĩmatũlilye lĩu woo wa mbaa ngetha mang’oinĩ moo na mauma vau. 27 Na yĩla mavikie vala meũkomela, ũmwe woo athasya ĩkunia yake nĩ kana anenge ĩng’oi yake ũĩthyo, na oona mbesa syake syĩ vau mũvukonĩ ĩũlũ. 28 Na ĩndĩ eea ana-a-ĩthe: “Mbesa syakwa nitũngiwe, na nii vaa mũvukonĩ wakwa!” Namo meewʼa ũu matwʼĩka nda na matetema, na masianyʼa na masya: “Ũndũ ũũ nĩ mwaũ Ngai watwĩka?”

29 Yĩla mavikie nthĩ ya Kanaanĩ kũla kwĩ ĩthe woo Yakovo, nĩmamũtavisye maũndũ onthe ala mamakwatie, maimwĩa: 30 Mũndũũme ũla wĩthĩawa e mwĩai wa nthĩ ĩsu anatũneenisye e mũkalĩ na asya aĩ twĩ athiani ma nthĩ ĩsu. 31 Ĩndĩ tũnamwĩie: ‘Ithyĩ twĩkaa ũla waĩle. Tũi athiani. 32 Tũsyaĩtwe twĩ 12, twĩ ana ma ĩthe ũmwe. Mwana ũmwe nde vo, na ũla mũnini e vamwe na ĩthe witũ nthĩ ya Kanaanĩ.’ 33 Ĩndĩ mũndũũme ũsu wĩthĩawa e mwĩai wa nthĩ ĩsu anatwĩie: ‘Ũndũ ũũ nĩwʼo ũũtuma nĩmanya kana mwĩkaa ũla waĩle: Tiai ũmwe wa ana-a-ĩthe menyu vamwe nakwa. Na ĩndĩ mũyosa lĩu kwondũ wa andũ ma mĩsyĩ yenyu nĩ kana maeke kũvinyĩĩwa nĩ yũa, na mũithi. 34 Na mũindetee mwana-a-ĩthe wenyu ũla mũnini, nĩ kana nĩmanye kana mũi athiani ĩndĩ mwĩkaa ũla waĩle. Na ĩndĩ nĩngũmũtũngĩa mwana-a-ĩthe wenyu, na no mũendeee kwĩka kĩla kĩmũetie nthĩ ĩno.’”

35 Na yĩla makwetye kumya syĩndũ makunianĩ moo, sisya, mbesa sya kĩla ũmwe woo syaĩ ĩkunianĩ yake. Yĩla me na ĩthe woo moonie tũmĩvuko twoo twa mbesa, nĩmalikilwe nĩ wia. 36 Na Yakovo ĩthe woo amea ũũ asengʼete: “Nĩmwosete syana syakwa! Yosevu nde vo, na Simeoni nde vo, na yu mwĩenda kwosa Mbenyamini! Maũndũ aa onthe ninyie makwatĩte!” 37 Ĩndĩ Leũveni eea ĩthe wake atĩĩ: “Ana makwa elĩ no ũmoae ethĩwa ndiũtũngĩa Mbenyamini. Mũnengane mokonĩ makwa, na ngaũtũngĩa we.” 38 Ĩndĩ Yakovo asya: “Mwana wakwa ndetheea vamwe nenyu, nũndũ mwana-a-inyia nĩ mũkwʼũ na nĩwe ũtialĩte e weka. Akakwatwa nĩ mũisyo ũtuma akwʼa mwĩ kyalonĩ, vate ndĩi mũtheesya mbuĩ syakwa Mbũanĩ* na kĩmeto.”