Mwambĩlĩĩlyo
43 Yu ĩndĩ, yũa yaĩ yingĩ nthĩ ĩsu. 2 Nũndũ wa ũu, yĩla maminie lĩu ũla mathooete Misili, ĩthe woo aneenie namo amea: “Syokai mũkathooe lĩu mũnini kwondũ witũ.” 3 Ĩndĩ Yuta amwĩa: “Mũndũ ũsu nĩwatũkanisye sanzũ atwĩa, ‘Mũikaatate kũka mbee wa ũthyũ wakwa ĩngĩ mũte na mwana-a-ĩthe wenyu.’ 4 Kwoou ethĩwa nũũtwĩtĩkĩlya tũthi na mwana-a-ĩthe witũ, nĩtũũtheea tũkaũthooee lĩu. 5 Ĩndĩ ethĩwa ndwĩtwĩtĩkĩlya tũthi nake, tũitheea kũu, nũndũ mũndũ ũsu atwĩie, ‘Mũikaatate kũka mbee wa ũthyũ wakwa ĩngĩ mũte na mwana-a-ĩthe wenyu.’ 6 Na Isilaeli akũlya: “Nĩkĩ mwatavisye mũndũ ũsu kana mwĩ na mwana-a-ĩthe ũngĩ, nũndũ yu ũũ nĩ thĩna mwandeteie?” 7 Namo mamũsũngĩa: “Mũndũ ũsu atũkũlilye ũtheinĩ ĩũlũ witũ na andũ maitũ ma mũsyĩ, ayasya, ‘Ĩthe wenyu e o thayũ? Mwĩ na mwana-a-ĩthe ũngĩ?’ na twamũtavya maũndũ asu. Yu ĩndĩ, ithyĩ twaĩ tũtonya kũmanya ata kana ĩtina etwĩa, ‘Endai mũete mwana-a-ĩthe wenyu kũũ’?”
8 Na ĩndĩ Yuta amwĩsũva ĩthe wake Isilaeli aimwĩa atĩĩ: “Mbĩtĩkĩlye nĩthi na kĩmwana kĩĩ, na eka tũthi kũu nĩ kana tũendeee kwĩkala thayũ vandũ va kũkwʼa, we vamwe naitũ na syana sitũ. 9 Ũsũvĩo wake wĩ mokonĩ makwa.* Ninyie wĩandũa ũndũ o na wĩva ĩũlũ wake. Ethĩwa ndikamũtũnga na kũmũũngamya mbee waku, ngeethĩwa ngũvĩtĩsye ĩvinda yonthe. 10 Na keka ti kũkũĩĩsya ũndũ ũũ, yu twĩthwa tũendete kũu kelĩ na tũkasyoka.”
11 Na kwoou Isilaeli ĩthe woo amea: “Ethĩwa vai ũndũ ũngĩ vekwa, ĩkai atĩĩ: Osai mosyao ala maseo ma nthĩ mwĩkĩe mĩvukonĩ yenyu* na mũikua mũtheeesye mũndũ ũsu ta mũthĩnzĩo; kuai mauta manini ma seli, ũkĩ mũnini wa nzũkĩ, kĩthana kĩnyungaa nesa, makonde me kĩthana, mbĩndĩ sya mbatani, na mbĩndĩ sya mũlosi. 12 Kuai mbesa kũndũ kwĩlĩ kwa ila mwakuĩte; o na tũngai mbesa ila syeekĩiwe mĩvukonĩ yenyu ĩũlũ. No kwĩthĩwa itaaĩle kũtũngwa. 13 Osai mwana-a-ĩthe wenyu na mũithi, syokai ĩngĩ kwa mũndũ ũsu. 14 Ngai Mwene Vinya W’onthe natume mũndũ ũsu amwĩwʼĩa tei, nĩ kana amũthaĩsye mwana-a-ĩthe wenyu ũla ũngĩ na Mbenyamini. Ĩndĩ a vakwa, ethĩwa no nginya nasye syana syakwa, ekai nĩsyasye!”
15 Kwoou aũme asu nĩmoosie mũthĩnzĩo ũsu, na moosa mbesa kũndũ kwĩlĩ mokonĩ moo o vamwe na Mbenyamini. Na ĩndĩ mookĩla na matheea Misili na maũngama ĩngĩ mbee wa Yosevu. 16 Yĩla Yosevu woonie Mbenyamini e vamwe namo, ndatĩkanĩ o ĩsu nĩwaneenie na mũndũ ũla waũngamĩe nyũmba yake amwĩa: “Likya aũme aa nyũmba na ũithĩnza nyamũ na ũiua lĩu, nũndũ saa sita aũme aa meya vamwe nakwa.” 17 Mũndũ ũsu nĩweekie na mĩtũkĩ kĩla Yosevu wamũtavisye, na amalikya nyũmbanĩ ya Yosevu. 18 Ĩndĩ yĩla aũme asu matwaiwe nyũmbanĩ ya Yosevu, nĩmalikilwe nĩ wia, na mambĩĩa kwasya: “Ũndũ ũũ weekĩka nũndũ wa mbesa ila syatũngiwe mĩvukonĩ yitũ ĩvinda yĩla yĩngĩ twaetiwe vaa. Yu nĩmeũtũkwata na maitũtwʼĩkĩthya ngombo na mayosa mangʼoi maitũ!”
19 Kwoou yĩla mavikie mũomonĩ wa nyũmba nĩmaneenie na mũndũ ũsu waũngamĩe nyũmba ya Yosevu. 20 Mamwĩie: “Nĩtũũkwĩsũva ũtwĩthukĩĩsye, mwĩai wakwa! Nĩtwatheeie kũũ ĩvinda ya mbee nĩ kana tũthooe lĩu. 21 Ĩndĩ yĩla twavikie vala tũũkomela na twambĩĩa kũthasya mĩvuko yitũ, nĩtwasengʼie kwona mbesa sya kĩla ũmwe witũ syĩ ĩũlũ wa mũvuko wake, syonthe siana o ũndũ ikwĩanaa. Kwoou twĩenda kũtũnga mbesa isu ithyĩ ene. 22 Na nĩtwooka na mbesa ingĩ nĩ kana tũthooe lĩu. Tũyĩsĩ nũũ ũla weekĩie mbesa sitũ mĩvukonĩ yitũ.” 23 Nĩvo ĩndĩ mũndũ ũsu wameie: “Vai thĩna. Mũikakĩe. Ngai wenyu na Ngai wa ĩthe wenyu nĩwe weekĩie ũthwii ũsu mĩvukonĩ yenyu. Mbesa syenyu nĩsyambikĩĩte mbee.” Ĩtina wa ũu, nĩwamaumaalĩilye Simeoni.
24 Na ĩndĩ mũndũ ũsu amalikya nyũmbanĩ ya Yosevu na amanenga kĩwʼũ kya kũthamba maaũ, na anenga mangʼoi moo ũĩthyo. 25 Na moombanyʼa mũthĩnzĩo ũla makuĩte mese kũnenga Yosevu saa sya mũthenya, nũndũ nĩmeewʼĩte kana nũkũka aye vamwe namo. 26 Yĩla Yosevu walikile nyũmbanĩ ĩsu, nĩmaetie mũthĩnzĩo woo mbee wake nyũmbanĩ ĩsu na mavalũka nthĩ mbee wake. 27 Ĩtina wa ũu, nĩwamakũlilye ũndũ maendeee na asya: “Ũla ĩthe wenyu mũkũũ mwawetie aendeee ata? E o thayũ?” 28 Namo mamwĩa: “Mũthũkũmi waku, ĩthe witũ, nĩ mũima. E o thayũ.” Na ĩndĩ makumana na mavalũka mbee wake.
29 Na yĩla Yosevu wookĩlilye metho make na oona Mbenyamini ũla masyaanĩwʼe, mwana wa inyia wake, asya: “Ũũ nĩwe mwana-a-ĩthe wenyu mũnini, ũla mwandavisye ĩũlũ wake?” Na ongela kwasya: “Ngai nakwonyʼe ũseo, mwanawa.” 30 Na ĩndĩ Yosevu aumaala ekalaatĩte, nũndũ eewie aitavĩwa ngoonĩ yĩla woonie mwana-a-inyia, na amantha vandũ ũtonya kũĩĩa. Na kwoou athi lumunĩ e weka na aĩĩa vo. 31 Ĩtina wa ũu, nĩwathambie ũthyũ na aumaala, nũndũ yu aĩ anausya, na asya: “Nenganei lĩu.” 32 Na ĩndĩ mamwĩvũĩa Yosevu e weka na ana-a-ĩthe me oka, namo Amisili ala maĩ vamwe nake maya me oka, nĩkwĩthĩwa Amisili mayaĩsanĩaa na Aevelania, nũndũ ũndũ ũsu nĩ ũthatyo kwa Amisili.
33 Na ana-a-ĩthe* maĩ mbee wake, ũla mũkũũ ekalĩte vala vamwaĩle nũndũ wa kĩanda kyake ta we mwana ũla mũkũũ na ũla mũnini vala vamwaĩle kwosana na myaka yake, na onthe matindĩaa kũsianyʼa masengʼete. 34 Na Yosevu nĩwamanenganĩaa lĩu kuma mesanĩ yake ĩngĩ na ĩngĩ, ĩndĩ eekĩĩaa Mbenyamini kũndũ kũtano kwa kĩla weekĩĩa ala angĩ onthe. Na kwoou maendeea kũya na kũnywʼa vamwe nake nginya meanĩwa.