Ĩvuku ya Kelĩ ya Samũeli
1 Ĩtina wa kĩkwʼũ kya Saũlo, yĩla Ndaviti wasyokie aumĩte kũsinda* Aamaleki, Ndaviti nĩwekalile Nzikilaki mĩthenya ĩlĩ. 2 Mũthenyanĩ wa katatũ, mũndũũme ũmwe nĩwookie aumĩte kambinĩ ya Saũlo ngũa syake syĩ ndembũange na e na kĩtoo mũtwe. Yĩla wathengeeie Ndaviti, nĩwavalũkile nthĩ na eekumanyʼa.
3 Ndaviti amũkũlilye atĩĩ: “Wauma va?” Nake amũsũngĩa: “Navonoka kuma kambinĩ ya Aisilaeli.” 4 Nake Ndaviti amũkũlya: “Maũndũ manaendie ata? Mwa ndavye.” Nake amwĩa: “Andũ nĩmanasembie makĩa kaũ na aingĩ moo makwʼa. O na Saũlo na mwanae Yonathani nĩmanakwie.” 5 Nĩvo ĩndĩ Ndaviti wakũlilye mwanake ũsu wamũetee ũvoo atĩĩ: “Wĩsĩ ata kana Saũlo na mwana wake Yonathani nĩmanakwie?” 6 Nake mwanake ũsu amũsũngĩa amwĩa: “Nĩnesie kwĩyĩthĩa Kĩĩmanĩ kya Ngilivoa, na nĩ kũu noona Saũlo etw’ĩĩkĩte na ĩtumo yake, na makasya na atwai ma mbalasi manaĩ manavika vala ũĩ. 7 Yĩla ũnavĩndũkie na ambona, nũnambĩtie, nakwa nasya, ‘Ninyioo vaa!’ 8 Anangũlilye, ‘Nue ũũ?’ Nakwa namũsũngĩa, ‘Nyie nĩ Mũamaleki.’ 9 Na ĩndĩ ambĩa, ‘Mwa ũka ũmbũae, nũndũ nĩthĩnĩte mũno, ĩndĩ ndinesa kũkwʼa.’* 10 Kwoou nathi vala ũĩ na namũaa, nũndũ nĩnĩneesĩ kana ndesa kũendeea kwĩkala thayũ ĩtina wa kũvalũka nthĩ e mũũmĩsye mũno. Na ĩndĩ noosa ngovia ya ũsumbĩ ĩla ĩnaĩ* mũtwenĩ wake na mbangili ĩla ĩnaĩ kwʼokonĩ kwake, na nii vaa naetee mwĩai wakwa.”
11 Yĩla Ndaviti weewie ũu, nĩwakwatie ngũa syake na aitembũa, na aũme onthe ala maĩ nake o namo meeka oou. 12 Na maĩa mauĩte mbu na matĩĩa kũya nginya ĩ ya wĩoo kwondũ wa Saũlo, kwondũ wa mwana wake Yonathani, kwondũ wa andũ ma Yeova, na kwondũ wa nyũmba ya Isilaeli, nĩkwĩthĩwa nĩmooaĩtwe na ũvyũ.
13 Ndaviti akũlilye mwanake ũla wamũetee ũvoo ũsu atĩĩ: “Umĩte va?” Nake amũsũngĩa: “Nĩ mwana wa mwĩkali wa ũeninĩ, Mũamaleki.” 14 Nĩvo ĩndĩ Ndaviti wamũkũlilye: “Nĩkĩ ũtanaakĩa kũkĩlya kwʼoko kwaku ũae mwĩtĩkĩwʼa mauta wa Yeova?” 15 Na ĩndĩ Ndaviti eeta mwanake ũmwe wake na amwĩa: “Thengeea ũmũae.” Kwoou amũkũna amũaa. 16 Ndaviti amwĩie atĩĩ: “Nthakame yaku yĩ mũtwenĩ waku mwene, nũndũ kanywʼa waku mwene nĩwakũsĩĩa ĩũlũ waku ũyasya, ‘Nyie mwene nĩnĩnooaie mwĩtĩkĩwʼa mauta wa Yeova.’”
17 Na ĩndĩ Ndaviti aina wathi ũũ wa kĩmeto kwondũ wa Saũlo na mwana wake Yonathani 18 na asya andũ ma Yuta maĩlĩte kũmanyĩwʼa wathi ũsu wa kĩmeto wĩtawa “Ũta,” ũla ũandĩkĩtwe ĩvukunĩ ya Yasali:
19 “Wanake waku, we Isilaeli, ũvalũkĩte wĩ mũae kũndũnĩ kwaku kũtũlu.
Mwa sisyai ũndũ ala me vinya mavalũka!
20 Ndũkawete ũndũ ũsu Ngathi;
Ndũkaũtangaase nzĩanĩ nene sya Asikeloni,
Eĩtu ma Avilisiti maikese kũtana,
Kana eĩtu ma aũme mate aĩke matane mũno.
21 Inywʼĩ iĩma sya Ngilivoa,
Mũikethĩwe na ĩmwe o na mbua ndĩkaue ĩũlũ wenyu,
O na mĩũnda ĩkũsyaa mĩvothi mĩtheu,
Nũndũ ngao ya ala me vinya nĩyavukĩiwʼe kũu,
Nĩkwĩthĩwa yu ngao ya Saũlo ti mbĩtĩkĩsye mauta.
22 Kuma nthakamenĩ ya ala oae, kuma mathunyanĩ ma ala me vinya,
Ũta wa Yonathani ndwaasyoka ĩtina,
Na ũvyũ wa Saũlo ndwaĩ ũsyoka ũtasindĩte.
23 Saũlo na Yonathani, andũ mendetwe na moonekaa me ma vata* thayũnĩ woo,
O na kĩkwʼũnĩ mayaataananwʼa.
Maĩ mĩtũkĩ kwĩ ndiũ,
Maĩ vinya kwĩ mĩnyambũ.
24 Inywʼĩ eĩtu ma Isilaeli, ĩĩai Saũlo,
Ũla wamwĩkĩie ngũa ndune mũno na syĩndũ sya wanake,
Ũla weekĩie syĩndũ sya kwĩyanakavya sya thaavu ngũanĩ syenyu.
25 Mwa sisyai ũndũ ala me vinya mavalũkĩa kaũnĩ!
Yonathani avalũkĩte e mũae kũndũnĩ kwenyu kũtũlu!
26 Nĩ na kyeva kingĩ mũno nũndũ waku, mwana-a-ia Yonathani;
Nĩnakwendete mũno vyũ.
Wendo waku ũnaĩ mũseo mũno kwĩ wendo wa aka.
27 Mwa sisyai ũndũ ala me vinya mavalũka
Na mĩio ya kaũ yathela!”