Ĩvuku ya Kelĩ ya Samũeli
21 Yu mĩthenyanĩ ya Ndaviti nĩkweethĩiwe na yũa myaka ĩtatũ ĩatĩanĩe, kwoou Ndaviti akũlya Yeova ũtao, nake Yeova amũsũngĩa amwĩa: “Saũlo na nyũmba yake me na ĩvĩtyo ya nthakame, nũndũ wa kũaa Angiveoni.” 2 Kwoou mũsumbĩ nĩweetie Angiveoni na aneena namo. (Angiveoni mayaĩ Aisilaeli ĩndĩ maĩ Aamoli ala matialĩte, na Aisilaeli nĩmamevĩtĩe kana maikamoaa, ĩndĩ Saũlo nĩwendaa kũmamina nũndũ wa kĩthito kĩla waĩ nakyo kwondũ wa andũ ma Isilaeli na Yuta.) 3 Ndaviti akũlilye Angiveoni atĩĩ: “Mwĩenda nĩmwĩke ata, na naĩlĩte kumya nthembo yĩva ĩvwʼĩke ũndũ ũsu, nĩ kana mũathime ũtiĩwa wa Yeova?” 4 Angiveoni mamwĩie atĩĩ: “Vetha na thaavu iitonya kũĩvĩa kĩla Saũlo na mũsyĩ wake matwĩkie; o na tũyĩsa kũaa mũndũ o na wĩva nthĩnĩ wa Isilaeli.” Nĩvo ĩndĩ wasũngĩie: “Nĩngũmwĩka ũndũ o na wĩva ũla mũũndavya.” 5 Meeie mũsumbĩ atĩĩ: “Mũndũ ũla watatie kũtwananga vyũ na avanga kũtũmina nĩ kana tũikekale kĩsionĩ o na kĩva kya Isilaeli, 6 tũnengwe ana make mũonza. Tũkasũsya simba syoo* mbee wa Yeova kũu Ngivea ya Saũlo, ũla mũnyuve wa Yeova.” Na ĩndĩ mũsumbĩ asya: “Nĩngũmũnenga ana asu.”
7 Ĩndĩ mũsumbĩ nĩweewʼĩie ĩnee Mevivosethi, mwana wa Yonathani mwana wa Saũlo, nũndũ wa wĩvĩto ũla Ndaviti na Yonathani, mwana wa Saũlo, meevĩtie mbee wa Yeova. 8 Kwoou mũsumbĩ oosa Alimoni na Mevivosethi, ana elĩ ala Lisiva mwĩĩtu wa Aia wasyaĩe Saũlo, na ana atano ala Mikali, mwĩĩtu wa Saũlo, wasyaĩe Atilieli mwana wa Mbalisilai ũla waĩ Mũmeola. 9 Na ĩndĩ amanengane kũla kwĩ Angiveoni, na masũsya simba syoo kĩĩmanĩ mbee wa Yeova. Onthe me mũonza makwie ĩmwe; mooaiwe mĩthenyanĩ ya mbee ya ngetha, mwambĩĩonĩ wa ngetha ya mbaale. 10 Nĩvo ĩndĩ Lisiva mwĩĩtu wa Aia woosie ngũa ya ĩkunia na amĩalanyʼa ĩvianĩ kuma mwambĩĩonĩ wa ngetha nginya yĩla simba isu syambĩĩie kuĩĩwa nĩ mbua; ndaaĩtĩkĩlya nyũnyi sya matunĩ ivũĩle ĩũlũ wasyo mũthenya kana nyamũ sya kĩthekanĩ iithengeee ũtukũ.
11 Ndaviti nĩwataviwʼe kĩla Lisiva mwĩĩtu wa Aia, kĩveti kya ndũsyo* kya Saũlo, weekie. 12 Kwoou Ndaviti nĩwaendie na oosa mavĩndĩ ma Saũlo na mavĩndĩ ma mwanae Yonathani kuma kwa atongoi* ma Yavesi-ngileati, ala mamoyĩte kuma kĩwanzanĩ kya ndũa ya Mbethi-sani, vala Avilisiti mamasũĩtye mũthenya ũla Avilisiti mooaie Saũlo Kĩĩmanĩ kya Ngilivoa. 13 Nĩwaumisye mavĩndĩ ma Saũlo na mavĩndĩ ma mwanae Yonathani kũu, o na nĩmoombanisye mavĩndĩ ma aũme ala mooaĩtwe.* 14 Na ĩndĩ nĩmathikie mavĩndĩ ma Saũlo na ma mwanae Yonathani nthĩ ya Mbenyamini kũu Nzela mbũanĩ ya Kisi ĩthe wake. Mamina kwĩka maũndũ onthe ala mũsumbĩ wameaĩe, Ngai nĩweethukĩĩisye kwĩsũvana kwoo kwondũ wa nthĩ yoo.
15 Kaũ nĩwaumĩlile ĩngĩ katĩ wa Avilisiti na Aisilaeli. Kwoou Ndaviti na athũkũmi make matheea na mokita na Avilisiti, ĩndĩ Ndaviti nĩwanoie mũno. 16 Mũndũũme ũmwe weetawa Isivi-mbenovu, ũla waĩ nzyawa ya Alevai, na waĩ na ĩtumo ya ũthuku ya ũito wa sekeli 300* na ũla waĩ na ũvyũ mweũ, nĩwendie kũaa Ndaviti. 17 Vau kwa vau Avisai mwana wa Nzeluia nĩwookie kũmũtetheesya na akũna Mũvilisiti ũsu amũaa. Ĩvindanĩ yĩu, aũme ma Ndaviti nĩmamwĩvĩtĩie atĩĩ: “Ndũkaathi kaũnĩ ĩngĩ naitũ! Ndũkavosye taa wa Isilaeli!”
18 Ĩtina wa ũu, nĩmokitĩie ĩngĩ na Avilisiti kũu Ngovu. Ĩvindanĩ yĩu, Sivekai ũla waĩ Mũuusa nĩwooaie Savu, ũla waĩ nzyawa ya Alevai.
19 Na nĩmokitĩie ĩngĩ na Avilisiti kũu Ngovu, na Elianani mwana wa Yaale-olekimu ũla waĩ Mũmbethileemu ooaa Ngoliathi ũla waĩ Mũngathi, na waĩ na ĩtumo yaĩ na mũtĩ wailye ta mũamba wa atumi.
20 Kaũ nĩwaumĩlile ĩngĩ Ngathi, vala vaĩ ĩmũndũ ĩnene yaĩ na syaa 6 kĩla kwʼoko na syaa 6 kĩla kũũ, syaĩ syaa 24 syongelanwʼa; o nayo ĩmũndũ yĩu yaĩ nzyawa ya Alevai. 21 Yatindĩaa kũvũthĩĩsya Aisilaeli. Kwoou Yonathani mwana wa Simei, mwana-a-inyia wa Ndaviti, ayũaa.
22 Asu me ana maĩ nzyawa sya Alevai kũu Ngathi, na mooaiwe nĩ kw’oko kwa Ndaviti na kw’oko kwa athũkũmi make.