Ĩvuku ya Kelĩ ya Asumbĩ

18 Mwakanĩ wa katatũ wa Osiea mwana wa Ela mũsumbĩ wa Isilaeli, Esekia mwana wa Mũsumbĩ Aasu wa Yuta nĩwatwʼĩkie mũsumbĩ. 2 Aĩ na myaka 25 yĩla watwʼĩkie mũsumbĩ, na asumbĩkie myaka 29 e Yelusalemu. Inyia wake eetawa Avi* na aĩ mwĩĩtu wa Nzekalia. 3 Nĩwaendeeie kwĩka kĩla kyaĩlĩte methonĩ ma Yeova, o ta Ndaviti ũmae wake. 4 Nĩwe wavetangie kũla kũndũ kũtũlu, atumbatumba ituĩ sya ũthaithi, na atema ũla mũtĩ wa ũthaithi.* O na ĩngĩ, nĩwatumbatumbie nzoka ya ũthuku ĩla yaseũvĩtwʼe nĩ Mose; nĩkwĩthĩwa kũvikĩĩa ĩvinda yĩu andũ ma Isilaeli nĩmamĩtoeeasya nthembo na andũ mamĩtaa mũvwʼanano wa nzoka ya ũthuku.* 5 Nĩwamwĩkwatĩtye Yeova Ngai wa Isilaeli; kũyaaĩthĩwa ũngĩ take katĩ wa asumbĩ onthe ma Yuta, methĩwe nĩ ala masumbĩkie ĩtina wake kana nĩ ala masumbĩkĩte mbee wake. 6 Nĩwalũmanĩtye vyũ na Yeova. Ndaaelelũka akaeka kũmũatĩĩa; nĩwaendeeie kũkwata mĩao ĩla Yeova wanengie Mose. 7 Na Yeova aĩ vamwe nake. Kwʼonthe kũla wathi, eekaa maũndũ kwa ũĩ. Nĩwaleile kwĩkala e ungu wa mũsumbĩ wa Asuli na nĩwaleile kũmũthũkũma. 8 O na ĩngĩ, nĩwasindie Avilisiti kũvika Ngasa na isio syayo, kuma mwakonĩ mũtũlu wa mũsyaĩĩsya nginya ndũanĩ ĩla mbiĩĩe.*

9 Mwakanĩ wa kana wa Mũsumbĩ Esekia, nawʼo nĩ mwakanĩ wa mũonza wa Osiea mwana wa Ela mũsumbĩ wa Isilaeli, Mũsumbĩ Salimaneseli wa Asuli nĩwambatie avithũkĩe Samalia na ambĩĩa kũmĩthyũlũlũka. 10 Mamĩkwatie mũthyanĩ wa myaka ĩtatũ; mwakanĩ wa thanthatũ wa Esekia, ũla waĩ mwaka wa kenda wa Mũsumbĩ Osiea wa Isilaeli, Samalia nĩyakwatiwe. 11 Na ĩndĩ mũsumbĩ wa Asuli oosa Aisilaeli ta mũtavo na amatwaa Asuli, na amanenga ũtũo kĩsionĩ kya Aalaa na kya Avoli vakuvĩ na ũsĩ wa Ngosani na ndũanĩ sya Ametia. 12 Ũu weekĩkie nũndũ mayaaĩthukĩĩsya wasya wa Yeova Ngai woo, ĩndĩ nĩmaleile kwĩanĩsya ũtianĩo wake ĩngĩ na ĩngĩ, kyonthe kĩla Mose mũthũkũmi wa Yeova wameaĩe. Mayaaĩthukĩĩsya, o na mayaaĩwʼa.

13 Mwakanĩ wa 14 wa Mũsumbĩ Esekia, Senakelivu mũsumbĩ wa Asuli nĩwambatie avithũkĩe ndũa syonthe mbiĩĩe sya Yuta na aikwata. 14 Na kwoou Mũsumbĩ Esekia wa Yuta atũmana Lakisi vala ve mũsumbĩ wa Asuli, ayasya: “Nĩnĩvĩtĩtye. Vetanga ita syaku vala nĩĩ, na nĩngũũnenga kyonthe kĩla ũũmbĩtya.” Na mũsumbĩ wa Asuli aĩvĩthya Mũsumbĩ Esekia wa Yuta vainĩ wa talendi 300* sya vetha na talendi 30 sya thaavu. 15 Na kwoou Esekia anengane vetha wʼonthe ũla waĩ ũtonya kwoneka nyũmbanĩ ya Yeova na kũla kwaiawa ũthwii wa nyũmba ya mũsumbĩ. 16 Ĩvinda yĩu, Esekia nĩwakũie* mĩomo ya ĩkalũ ya Yeova na ituĩ sya mĩomo ĩsu ĩla Mũsumbĩ Esekia wa Yuta woombĩĩĩte na thaavu we mwene, na amĩnenga mũsumbĩ wa Asuli.

17 Na ĩndĩ mũsumbĩ wa Asuli atũma Talitani,* Lavisalisi,* na Lavisake* vamwe na nguthu nene ya asikalĩ kuma Lakisi mathi Yelusalemu kwa Mũsumbĩ Esekia. Na mambata nginya Yelusalemu na maũngama kĩla ũmwe vandũ vake vakuvĩ na mũtaũ wa ndia ya ngalĩko ya ĩũlũ, ĩla yĩ lelũnĩ ũla wĩsĩle kĩsesinĩ kya mũvũi wa ngũa. 18 Yĩla meetanie mũsumbĩ aumaale, Eliakimu mwana wa Ilikia, ũla waũngamĩe nyũmba,* Sevina, ũla waĩ mũandĩki, na Yoa mwana wa Asavu, ũla waiaa lekoti, nĩmaumaalile maneene namo.

19 Na ĩndĩ Lavisake amea: “Nĩngũmwĩsũva, neenai na Esekia na mũimwĩa atĩĩ: ‘Ũũ nĩwʼo mũsumbĩ ũla mũnene, mũsumbĩ wa Asuli, ũkwasya: “Wĩ na kĩtumi kĩva kya kwĩnenga ũkũmbaũ? 20 Wĩasya, ‘Nĩ na ũĩ na vinya wa kũkita,’ ĩndĩ isu no ndeto sya mana. Wĩkwatĩtye ũũ, nĩ kana ũngʼendee nyie? 21 Sisya! Wĩkwatĩtye ũtethyo wa mũangi ũũ mũkanyange, Misili, ũla mũndũ eetwʼĩĩka nawʼo ũmũtemaa kĩtaanĩ kya kwʼoko na ũimũtonya. Ũu nĩwʼo Valao mũsumbĩ wa Misili ũilye kwa onthe ala mamwĩkwatya. 22 Na ethĩwa mwĩmbĩa, ‘Tũmwĩkwatĩtye Yeova Ngai witũ,’ we Ngai ũsu tyo we Esekia ũvetete kũndũ kwake kũtũlu na ithembeo syake, na yu Esekia eĩa Yuta na Yelusalemu, ‘Mwaĩlĩte kũkumanĩa kĩthembeo kĩĩ kĩ Yelusalemu’?”ʼ 23 Kwoou yu ethĩwa nũtonya, ĩwʼana na mwĩai wakwa mũsumbĩ wa Asuli ũndũnĩ ũũ: Nĩngũũnenga mbalasi 2,000 ethĩwa nũtonya kũkwata atwai ma mbalasi meanĩĩe mbalasi isu. 24 Yu ĩndĩ, ũtonya ata kũtũngĩthya o na ngavana o ũmwe ũkũtalwa ta mũnini vyũ katĩ wa athũkũmi ma mwĩai wakwa, na ũyĩkwatya Misili ĩũnenge makasya na atwai ma mbalasi? 25 Yu nyie no nambate nĩvithũkĩe vandũ vaa nĩ kana nĩvanange ndanengetwe mwanya nĩ Yeova? Yeova mwene ambĩie atĩĩ: ‘Ambata ũvithũkĩe nthĩ ĩno na ũimyananga.ʼ”

26 Nĩvo ĩndĩ Eliakimu mwana wa Ilikia na Sevina na Yoa meeie Lavisake atĩĩ: “Nĩtũũkwĩsũva, neena na athũkũmi maku na kĩthyomo kya Kĩalamu,* nũndũ no tũkĩelewe; ndũkaneene naitũ na kĩthyomo kya Ayuti andũ ala me ũkũtanĩ mayĩwʼa.” 27 Ĩndĩ Lavisake amea: “We mwĩai wakwa andũmĩte nĩneene ndeto ii o matũnĩ menyu na ma mwĩai wenyu? Ndandũmĩte nĩineene o na matũnĩ ma ala mekalaa ũkũtanĩ, ala makaya mai moo ene na mainywʼa maumao moo ene vamwe nenyu?”

28 Na ĩndĩ Lavisake aũngama na aneena na wasya mũnene na kĩthyomo kya Ayuti, ayasya: “Ĩthukĩĩsyei ũndũ mũsumbĩ ũla mũnene, mũsumbĩ wa Asuli, ũkwasya. 29 Ũũ nĩwʼo mũsumbĩ ũkwasya, ‘Mũiketĩkĩle kũkengwa nĩ Esekia, nũndũ ndatonya kũmũvonokya kuma kwʼokonĩ kwakwa. 30 Na mũikaeke Esekia atume mũmwĩkwatya Yeova, aimwĩa: “Vate ndĩi, Yeova nũkũtũvonokya, na ndũa ĩno ndĩnenganwe kwʼokonĩ kwa mũsumbĩ wa Asuli.” 31 Mũikamwĩthukĩĩsye Esekia, nũndũ ũũ nĩwʼo mũsumbĩ wa Asuli ũkwasya: “Manthai mũuo nakwa na mũyĩnengane mokonĩ makwa,* na kĩla ũmwe wenyu akaya kuma mũsavivũnĩ wake mwene na kuma mũkũyũnĩ wake mwene na kĩla ũmwe akanywʼa kĩwʼũ kya kĩthima kyake mwene, 32 nginya yĩla ngoka na ndimwosa nĩmũtwae nthĩ ĩilye o ta nthĩ yenyu, nthĩ yĩ ngetha na mbinyu nzaũ, nthĩ yĩ mũkate na mĩũnda ya mĩsavivũ, nthĩ yĩ mĩtĩ ya mĩthata na ũkĩ wa nzũkĩ. Nĩvo ĩndĩ mũkekala thayũ na mũikakwʼa. Mũikethukĩĩsye Esekia, nũndũ eĩka kũmwasya yĩla ũkũmwĩa, ‘Yeova nũkũtũvonokya.’ 33 Yo ve ngai sya mbaĩ ingĩ ivonoketye nthĩ syoo kuma kwʼokonĩ kwa mũsumbĩ wa Asuli? 34 Syĩ va ngai sya Amathi na Alivati? Na syĩ va ngai sya Sevalivaimu, Ena, na Iva? Syo syaavonokya Samalia kuma kw’okonĩ kwakwa? 35 Katĩ wa ngai syonthe sya i nthĩ, nĩ yĩva ĩvonoketye nthĩ yayo kuma kw’okonĩ kwakwa, nĩ kana Yeova atwʼĩke nũkũvonokya Yelusalemu kuma kw’okonĩ kwakwa?”’”

36 Ĩndĩ andũ maendeea kwĩkala mavindĩtye na mayaamũsũngĩa ndeto o na ĩmwe, nũndũ mũsumbĩ amanengete mwĩao ũũ, “Mũikatate kũmũsũngĩa.” 37 Ĩndĩ Eliakimu mwana wa Ilikia, ũla waũngamĩe nyũmba,* Sevina, ũla waĩ mũandĩki, na Yoa mwana wa Asavu, ũla waiaa lekoti, matembũa ngũa syoo na mathi vala ve Esekia na mamũtavya ndeto sya Lavisake.