Ĩvuku ya Kelĩ ya Asumbĩ
19 Yĩla Mũsumbĩ Esekia weewie ũndũ ũsu oou, nĩwatembũie ngũa syake na eevwʼĩka ngũa ya ĩkunia na alika nyũmbanĩ ya Yeova. 2 Na ĩndĩ atũma Eliakimu, ũla waũngamĩe nyũmba,* Sevina, ũla waĩ mũandĩki, na atumĩa ma athembi, mevwʼĩkĩte ngũa sya makunia, nĩ kana mathi vala ve mwathani Ĩsaĩa, mwana wa Amosu. 3 Na mamwĩa: “Ũũ nĩwʼo Esekia ũkwasya, ‘Ũmũnthĩ nĩ mũthenya wa thĩna, wa kĩvũthya,* na wa nthoni; nĩkwĩthĩwa syana nivikĩĩe kũsyawa,* ĩndĩ vai vinya wa kũisyaa. 4 Noĩthwa Yeova Ngai waku atonya kwĩwʼa ndeto syonthe sya Lavisake, ũla ũtũmĩtwe nĩ mwĩai wake mũsumbĩ wa Asuli nĩ kana oke kũvũthĩĩsya Ngai ũla wĩ thayũ, na nũndũ wa ũu, Yeova Ngai waku aimwosea ĩtambya nũndũ wa ndeto isu ivikĩte matũnĩ make. Yu ĩndĩ, voya kwondũ wa andũ maitũ ala matialĩte.’”
5 Kwoou athũkũmi ma Mũsumbĩ Esekia nĩmaendie na malika kwa Ĩsaĩa, 6 na Ĩsaĩa amea: “Ũũ nĩwʼo mwaĩlĩte kũtavya mwĩai wenyu, ‘Yeova easya atĩĩ: “Ndũkakĩe nũndũ wa ndeto ila wĩwʼĩte, ndeto ila athũkũmi ma mũsumbĩ wa Asuli mambumangĩte nasyo. 7 Sisya, nĩngwĩkĩa kĩsũanĩo kĩlĩkonĩ kyake,* na nũkũkwata livoti na aisyoka nthĩ yake; na nĩngũtuma oawa na ũvyũ e nthĩ yake mwene.”’”
8 Ĩtina wa Lavisake kwĩwʼa kana mũsumbĩ wa Asuli aĩ anauma Lakisi, nĩwaendie vala ũĩ na amwĩthĩa aendeee kũkita na ndũa ya Livina. 9 Ĩvindanĩ o yĩu, mũsumbĩ nĩwaeteiwe livoti ĩkonetye Mũsumbĩ Tiliaka wa Ethiovia, na eewa atĩĩ: “Nĩwaumaala okite naku.” Na kwoou atũma andũ ĩngĩ kwa Esekia makamũtavye ũũ: 10 “Ũũ nĩwʼo mwaĩlĩte kũtavya Mũsumbĩ Esekia wa Yuta, ‘Ndũketĩkĩle Ngai waku ũla ũmwĩkwatĩtye aũkenge, aikwĩa: “Yelusalemu ndĩnenganwe kw’okonĩ kwa mũsumbĩ wa Asuli.” 11 Sisya! Nĩwĩwʼĩte ũndũ asumbĩ ma Asuli meekanie na isio syonthe, ũndũ masyanangie. Nue wĩ weka ũũvonokwʼa? 12 Syo ngai sya mbaĩ ila aa-ũmae makwa maanangie nĩsyaivonokisye? Syĩ va Ngosani, Alani, na Lesevu, na maĩva andũ ma Eteni ala maĩ Teli-asali? 13 Aĩva mũsumbĩ wa Amathi, mũsumbĩ wa Alivati, na mũsumbĩ wa ndũa ya Sevalivaimu, na wa ndũa ya Ena, na wa ndũa ya Iva?’”
14 Esekia nĩwoosie valũa isu kuma kw’okonĩ kwa ala matũmĩtwe na aisoma. Na ĩndĩ Esekia ambata nyũmbanĩ ya Yeova na atambũũkya valũa isu* mbee wa Yeova. 15 Na Esekia ambĩĩa kũvoya mbee wa Yeova, ayasya: “Ame Yeova Ngai wa Isilaeli, we ũla wĩkalaa kĩvĩlanĩ kyaku kya ũsumbĩ ĩũlũ* wa akelũvi, o we wĩ weka nue Ngai ũla wa w’o wa mosumbĩ onthe ma nthĩ. Nĩwatwʼĩkĩthisye ĩtu na nthĩ. 16 Tea kũtũ kwaku, ame Yeova, nĩ kana wĩwʼe! Salukya metho maku, ame Yeova, nĩ kana wone! Ĩthukĩĩsye ndeto ila Senakelivu ũtũmanĩte nĩ kana avũthĩĩsye Ngai ũla wĩ thayũ. 17 Ame Yeova, nĩ wʼo ki kana asumbĩ ma Asuli nĩmanangĩte mbaĩ mbingĩ vamwe na nthĩ syoo. 18 Na nĩmekĩtye ngai syoo mwakinĩ, nĩkwĩthĩwa iyaĩ ngai ĩndĩ syaĩ o wĩa wa moko ma mũndũ, o mbwaũ na mavia. Nĩkyo kĩtumi maĩ matonya kũsyananga. 19 Ĩndĩ yu, ame Yeova Ngai witũ, nĩngũkwĩsũva ũtũvonokye kuma kw’okonĩ kwake, nĩ kana mosumbĩ onthe ma nthĩ mamanye kana we wĩ weka nue Ngai, ame Yeova.”
20 Na ĩndĩ Ĩsaĩa mwana wa Amosu atũmana kwa Esekia, ayasya: “Ũũ nĩwʼo Yeova Ngai wa Isilaeli ũkwasya, ‘Nĩnĩwʼĩte mboya yaku ĩũlũ wa Mũsumbĩ Senakelivu wa Asuli. 21 Ĩĩ nĩyo ndeto ĩla Yeova ũneenete ĩũlũ wake:
“Mwĩĩtu mũtheu wa Saioni nũkũũmena, nũkũũthekeea.
Mwĩĩtu wa Yelusalemu nũkũthingithya mũtwe wake nũndũ waku.
22 Nũũ ũla ũmũvũthĩĩsye na ũkamũuma?
Nũũ ũla ũmũkĩlĩlye wasya waku
Na ũkamũketeea na itho ĩthũku?
Nĩ Ũla Mũtheu wa Isilaeli!
23 Nũtũmĩte andũ mamũvũthĩĩsye Yeova, ũyasya,
‘Nĩngwambata na makasya makwa maingĩ ma kaũ
Nĩngwambata mĩthyanĩ ya iĩma,
Nĩngũlika isionĩ ila syĩ vaasa vyũ sya Levanoni.
Nĩngũtema mĩtalakwe* yayo mĩasa, mĩvelosi yayo ĩla mĩseo vyũ.
Nĩngũlika kũndũ kwayo kwa kũkoma kũla kwĩ nthĩnĩ vyũ, ithekanĩ syayo nthungu.
24 Nĩngwĩnza ithima na nĩngũnywʼa kĩw’ũ kĩeni;
Nĩngũngʼalĩthya tũlũsĩ twʼonthe twa* Misili na nyaaĩ sya maaũ makwa.’
25 No waaĩwʼa? Kuma tene ũndũ ũũ nĩwatwʼĩtwe.*
Kuma mĩthenyanĩ ya tene nĩnawũmbanĩtye.*
Na yu nĩngũwĩanĩsya.
Ũkatuma ndũa mbiĩĩe itiwa syĩ nthei na syĩ ivumbu.
26 Ekali masyo makatiwa mate na ũtethyo;
Makatelema na makeekĩĩthwʼa nthoni.
Makeethĩwa o ta syĩndũ imeete kĩsesinĩ na ta nyeki nziũ,
O ta nyeki yĩ kĩalanĩ ĩla ĩvĩvĩtwʼe nĩ kĩseve kĩla kyumaa ngalĩko ya wumĩlonĩ wa sua.
27 Ĩndĩ nĩnĩmanyaa nesa yĩla wekala nthĩ, yĩla waumaala, yĩla wasyoka,
Na yĩla wanthilĩkĩla,
28 Nĩkwĩthĩwa ũthilĩku ũla ũnthilĩkĩle nawʼo na kelele wa kĩthokoo kyaku nũvikĩte matũnĩ makwa.
Nũndũ wa ũu, nĩngwĩkĩa ngolya yakwa ĩnyiũũnĩ yaku na mũkwa wakwa katĩkatĩ wa ilomo syaku,
Na nĩngũũthyũũa ũsyoke na nzĩa ĩla ũkie nayo.”
29 “‘Na ũũ nĩwʼo ũkwĩthĩwa wonany’o kwondũ waku:* Mwaka ũũ nũũya kĩla kĩmeasya;* na mwakanĩ wa kelĩ ũkaya lĩu wa mbaa ngetha ũla wĩmeasya; ĩndĩ mwakanĩ wa katatũ ũkavanda mbeũ na ũiketha, na ũkavanda mĩũnda ya mĩsavivũ na ũiya ũsyao wayo. 30 Ala ma nyũmba ya Yuta makavonoka, ala makatiala, makatheesya mĩi nthĩ na mayumya ũsyao ĩũlũ. 31 Nĩkwĩthĩwa ala makatiala makauma Yelusalemu na ala makavonoka makauma Kĩĩmanĩ kya Saioni. Kĩthito kya Yeova wa nguthu kĩkeanĩsya ũndũ ũsu.
32 “‘Nũndũ wa ũu, ũũ nĩwʼo Yeova ũkwasya ĩũlũ wa mũsumbĩ wa Asuli:
“Ndelika ndũanĩ ĩno
Kana kwĩkya ĩangi vo
Kana kũvathengeea akwete ngao
Kana kũmba ivumbu sya kũmĩthyũlũlũka.
33 Esyoka na nzĩa ĩla wũkie nayo;
Ndelika ndũanĩ ĩno,” easya ũu Yeova.
34 “Nĩngũkitĩa ndũa ĩno na nĩngũmĩtangĩĩa kwondũ wakwa mwene
Na kwondũ wa Ndaviti mũthũkũmi wakwa.”’”
35 Na ũtukũ o ũsu mũlaĩka wa Yeova athi na akũna aũme 185,000 ala maĩ kambinĩ ya Aasuli. Na yĩla andũ mookĩlile kwakya tene, moona simba isu syonthe. 36 Na kwoou Mũsumbĩ Senakelivu wa Asuli auma vau na asyoka Nineva na ekala kũu. 37 Na mũthenya ũmwe akumanĩte nyũmbanĩ* ya Nisiloki ngai yake, ana make mwene ala meetawa Atalameleki na Saleseli nĩmamũkũnie na ũvyũ mamũaa na makĩĩa nthĩ ya Alalati. Na Esali-atoni mwana wake atwʼĩka mũsumbĩ vandũ vake.